Author: G.O.

Një rast i dhunës në familje ka ndodhur dje në fshatin Jabllanicë e Leshanit në Pejë, ku një përleshje mes anëtarëve të familjes ka përfunduar me lëndime fizike serioze.

Policia ka marrë njoftimin rreth orës 16:00 dhe menjëherë dhe ka intervenuar për të qetësuar situatën.

Sipas informacioneve, i dyshuari B.D., 21 vjeç dhe motra e tij A.D., 22 vjeç, janë përfshirë në një konflikt fizik me prindërit e tyre, ku babai A.D., 49 vjeç, ka pësuar lëndime të rënda, ndërsa nëna V.D., 44 vjeç, ka marrë lëndime të dukshme.

Të gjithë janë dërguar për trajtim në Spitalin Rajonal të Pejës.

Pavarësisht lëndimeve, viktimat kanë deklaruar se nuk ndihen të rrezikuar dhe kanë kërkuar të kthehen në shtëpi.

Ndërkohë, ndaj të dyshuarit me inicialet B.D. është caktuar masa e ndalimit prej 48 orësh dhe hetimet për rastin po vazhdojnë.

Vazhdojmë me lajme të tjera të ditës. Një ngjarje e rëndë është raportuar të martën në fshatin Bresalc të Gjilanit, ku një grua është gjetur pa shenja jete në shtëpinë e saj.

Policia ka njoftuar se rreth orës 17:30, është raportuar për një trup të pajetë në një shtëpi private në rrugën “Mursel Rexhi”.

Viktima identifikuar me inicialet V.D., një grua 66-vjeçare, është gjetur e shtrirë në oborr pasi ishte nxjerrë nga familjarët.

Në vendin e ngjarjes kanë dalë njësitë e Policisë, mjekësia emergjente dhe forenzika, të cilët kanë konfirmuar vdekjen e saj.

Me urdhër të Prokurorit, trupi i pajetë është dërguar në Institutin e Mjekësisë Ligjore për obduksion, ndërsa hetimet janë duke u zhvilluar për të zbardhur rrethanat e vdekjes.

Kryetari i Aleancës për Ardhmërinë e Kosovës, Ramush Haradinaj, ka zhvilluar sot një takim me Karen Pierce, të dërguarën e posaçme të Mbretërisë së Bashkuar për Ballkanin Perëndimor, ku u diskutuan zhvillimet aktuale në Kosovë, me theks në konsolidimin e institucioneve demokratike dhe integrimin euroatlantik të vendit.

Haradinaj vlerësoi rolin jetik që Mbretëria e Bashkuar ka pasur, jo vetëm në procesin e çlirimit të Kosovës, por edhe në zhvillimin e saj pas luftës. Ai theksoi se Britania e Madhe mbetet edhe sot një ndër faktorët kyç të paqes dhe stabilitetit në Kosovë dhe në të gjithë rajonin.

“Mirënjohës për angazhimin e znj. Pierce dhe për përkushtimin e Mbretërisë së Bashkuar ndaj Kosovës”, u shpreh Haradinaj në një postim në rrjetin social Facebook, pas takimit.

Bashkimi Evropian po kërkon përditësime nga Izraeli për zbatimin e një marrëveshjeje të re për të dërguar ndihma humanitare në Rripin e Gazës, tha të martën shefja e politikës së jashtme të bllokut, Kaja Kallas.

Ministrat e Jashtëm të 27 vendeve anëtare të BE-së takohen sot në Bruksel, pas një marrëveshjeje të re për ndihmat në Gazë, e cila është arritur kryesisht nga Kallas dhe ministri i jashtëm izraelit, Gideon Saar.

Saar u takua me liderët e BE-së të hënën, pasi javën e kaluar u pajtua të lejojë hyrjen e ushqimit dhe karburantit të domosdoshëm në enklavën bregdetare me 2.3 milionë banorë.

“Ne kemi arritur një mirëkuptim të përbashkët me Izraelin për të përmirësuar vërtet gjendjen në terren, por nuk ka të bëjë me dokumentin, por me zbatimin e tij”, tha Kallas para takimit të Këshillit të Punëve të Jashtme.

“Përderisa gjendja nuk është përmirësuar vërtet, atëherë nuk kemi bërë mjaftueshëm”, shtoi ajo, duke bërë thirrje për armëpushim.

Hollësitë e marrëveshjes mbeten ende të paqarta, por zyrtarët e BE-së kanë hedhur poshtë çdo bashkëpunim me Fondin Humanitar të Gazës të mbështetur nga Izraeli për shkak të shqetësimeve etike dhe të sigurisë.

Hapja e më shumë pikave kufitare dhe lejimi i më shumë kamionëve me ndihma për të hyrë në Gazë është prioritet, por zyrtarët thonë se përfundimisht duan të krijojnë një pikë vëzhgimi në pikën kufitare Kerem Shalom.

Shtete evropiane si Irlanda, Holanda dhe Spanja po bëjnë gjithnjë e më shumë thirrje për rishikim të marrëdhënieve të BE-së me Izraelin pas luftës në Gazë.

Një raport i Komisionit Evropian gjeti “tregues” se veprimet e Izraelit në Gazë po shkelin detyrimet për të drejtat e njeriut të përfshira në marrëveshjen që rregullon marrëdhëniet me BE-në, por blloku është i ndarë për mënyrën se si të veprojë në këtë rast.

Presioni publik për sjelljen e Izraelit në Gazë e bëri të mundur këtë marrëveshje të re humanitare edhe pa armëpushim, tha ministri i Jashtëm holandez, Caspar Veldkamp.

“Ajo forcë e 27 shteteve anëtare të BE-së është ajo që dua ta ruaj tani”, tha ai.

Ministri i Jashtëm i Spanjës, Jose Manuel Albares Bueno, tha se hollësitë e marrëveshjes po diskutohen ende dhe se BE-ja do t’i vëzhgojë rezultatet për të parë nëse Izraeli po e zbaton marrëveshjen.

“Nuk e dimë nëse do të dimë si funksionon”, tha ai. “Është shumë e qartë që kjo marrëveshje nuk është fundi. Ne duhet ta ndalim luftën”.

Lufta në Gazë nisi pasi Hamasi – grupi palestinez i shpallur organizatë terroriste nga SHBA dhe BE – e sulmoi Izraelin më 7 tetor 2023, duke vrarë rreth 1.200 njerëz dhe duke marrë peng 251 të tjerë.

Shumica e pengjeve janë liruar gjatë armëpushimeve të mëparshme.

Prej atëherë, lufta e Izraelit në Gazë ka vrarë më shumë se 58.000 palestinezë, mbi gjysma e tyre gra dhe fëmijë, sipas Ministrisë së Shëndetësisë në Gazë.

BE-ja ka parë hyrjen e disa kamionëve me ndihma në Gazë, por “jo mjaftueshëm”, tha Hajda Lahbib, komisionarja e BE-së për ndihmën humanitare dhe menaxhimin e krizave.

“Situata është ende shumë e rrezikshme, shumë e dhunshme, me bombardime që vazhdojnë në terren, kështu që partnerët tanë humanitarë nuk mund të veprojnë. Ky është realiteti, kemi nevojë për një armëpushim”, tha ajo.

Gjykata Supreme e ka shfuqizuar udhëzimin administrativ të nënshkruar nga ministri në detyrë i Financave, Hekuran Murati, me të cilin u pezulluan për 60 ditë shitjet dhe abonimet e arkave fiskale.

Udhëzimi administrativ, i nënshkruar nga ministri në detyrë i Financave më 15 prill të këtij viti, është shpallur i jashtëligjshëm.

Aktgjykimi është nxjerrë më 7 korrik nga një kolegj i gjyqtarëve të Gjykatës Supreme, i kryesuar nga gjyqtarja Delushe Halimi.

Gjykata e ka aprovuar kërkesëpadinë e paditësve, kompanive Enternet dhe Service Global, të cilat merren me shitjen dhe servisimin e arkave fiskale, raporton Paparaci. Lëndën në gjykatë për palën paditëse e ka përfaqësuar avokati Virtyt Ibrahimaga.

“APROVOHET e themeltë kërkesëpadia e paditësve: Enternet Shpk me numër unik identifikues 811557266, me seli në Rrafshi i Kosovës, nr.80, Prishtinë, dhe Konsorciumi Service Global, me numër unik identifikues 602193427, me seli në Prishtinë, e paraqitur kundër të paditurës: Ministria e Financave, Punës dhe Transfereve (MFPT), me seli në Prishtinë”, thuhet në pikën e parë të dispozitivit të aktgjykimit.

Miliarderi Elon Musk ka ndarë në rrjetin social X një hartë që tregon gjendjen e natalitetit në Evropë, ku Kosova shfaqet me ngjyrë të gjelbër, duke reflektuar një nga normat më të larta të lindshmërisë në kontinent.

Sipas hartës, Kosova ka një normë të pritshme lindshmërie prej 1.9 fëmijëve për familje, ndërsa pjesa tjetër e Evropës ka norma të ndryshme, ku me shumicën e shteteve të shënuara me ngjyrë në “të kuqe” që tregojnë norma të ulëta të lindshmërisë.

Ukraina ka një normë alarmante prej vetëm 1.0, ndërsa shtetet perëndimore si Franca kanë një normë prej 1.63.

Krahas Kosovës, edhe Bosnja dhe Hercegovina, Serbia dhe Mali i Zi gjithashtu kanë norma të larta të lindshmërisë.

\Prokuroria Themelore në Prizren, ka ngritur aktakuzë kundër të pandehurit S.Gj., për shkak të dyshimit të bazuar mirë se i njëjti ka kryer veprën penale “Keqpërdorimi i pozitës apo autoritetit zyrtar”.

Sipas aktakuzës, me datë 31 janar 2022 në Prizren, në kohë të pavërtetuar, duke shfrytëzuar detyrën apo autoritetin zyrtar – në cilësinë e mjekut pranë repartit të Gjinekologjisë – Obstetrike të Spitalit të Përgjithshëm të Prizrenit, nuk i përmbush detyrat zyrtare me qëllim që t’i mundësojë dobi pasurore vetes dhe personit tjetër dhe që t’i shkaktojë dëm pasuror personit tjetër, vepron në kundërshtim me Ligjin për Shëndetësi të Republikës së Kosovës, në atë mënyrë që refuzon ta pranojë kërkesën e pacientes G.B., ta kryejë lindjen me operim pranë Spitalit të Përgjithshëm të Prizrenit, “me arsyetimin se pranë Repartit të Gjinekologjisë Obstetrike kishte pasur pacientë të infektuar me Covid-19 dhe i rekomandon të njëjtës dhe bashkëshortit të saj, J.B., që lindjen me operim ta kryejnë në njërën prej klinikave private me seli në Prishtinë, në të cilën klinikë i pandehuri edhe është i angazhuar si mjek, pavarësisht se të gjitha kontrollet paraprake mjekësore pacientja në fjalë në vazhdimësi i ka kryer në Spitalin e Përgjithshëm të Prizrenit, nën kujdesin e të pandehurit si dhe në klinikën private të tij në Prizren, me ç’rast e njëjta detyrohet që lindjen ta kryejë pranë klinikës private në Prishtinë, të cilin operim e kryen vetë i pandehuri, duke i shkaktuar kështu dëm material të dëmtuarve G.B., dhe J.B., në shumën prej 1,500.00 € (njëmijë e pesëqind euro)”.

Sipas njoftimit, me këto veprime, i njëjti ka kryer veprën penale “Keqpërdorimi i pozitës apo autoritetit zyrtar” sipas KPRK-së.

“Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri i lartëcekur për veprën penale për të cilën akuzohet të shpallet fajtor dhe të dënohet sipas ligjit”, thuhet në njoftim.

Të paktën 17 persona janë plagosur dhe disa ndërtesa janë dëmtuar si pasojë e sulmeve ajrore me dronë të Ukrainës ndaj rajoneve ruse të Voronezhit dhe Lipetskut, kanë njoftuar autoritetet ruse të martën.

Sipas guvernatorit Alexander Gusev, 12 dronë janë shkatërruar mbi rajonin e Voronezhit, ndërsa 16 persona, përfshirë një adoleshent, kanë mbetur të plagosur. Dëmet kanë përfshirë banesa dhe objekte tregtare.

Në Lipetsk, guvernatori Igor Artamonov raportoi se një person u plagos kur disa dronë ranë në një zonë industriale.

Ndërkohë, Ministria ruse e Mbrojtjes tha se rreth 55 dronë ukrainas janë shkatërruar brenda natës në pesë rajone të Rusisë dhe në Detin e Zi. Zyrtarët ukrainas nuk kanë komentuar për këto sulme.