Ministrja në detyrë e Drejtësisë, Donika Gërvalla, ka vizituar këtë të mërkurë fshatin Kalludër të Zubin-Potokut, ku institucionet kompetente po zhvillojnë gërmime në një lokacion që dyshohet se mund të jetë varrezë masive e personave të zhdukur gjatë luftës në Kosovë.
Në terren janë angazhuar ekipet e Institutit të Mjekësisë Ligjore, nën koordinimin e Prokurorisë Speciale, ndërsa siguria po garantohet nga Policia e Kosovës me mbështetjen monitoruese të EULEX-it.
Bilanci i viktimave nga tërmeti i fuqishëm që goditi jugperëndimin e Japonisë është rritur në 18, ndërsa ekipet e kërkim-shpëtimit vazhdojnë operacionet në zonat më të prekura.
Sipas autoriteteve lokale, në mesin e viktimave është edhe një shtetas i huaj. Të paktën 62 persona kanë mbetur të plagosur, ndërsa gjashtë prej tyre ndodhen në gjendje të rëndë.
Tërmeti me magnitudë 6.8 goditi rajonin e Kumamotos, duke shkaktuar dëme të mëdha në disa zona. Ekipet e shpëtimit po vazhdojnë kërkimet në rrënoja, ndërsa autoritetet paralajmërojnë se numri i viktimave mund të rritet edhe më tej në ditët në vijim.
Ndër zonat më të goditura janë fabrika Nippon Paper Industries në Yatsushiro dhe qendra tregtare Aeon Mall, ku janë raportuar viktima dhe dëme të konsiderueshme.
Rajoni i Kumamotos ishte goditur edhe në vitin 2016 nga një tërmet i fuqishëm, i cili kishte shkaktuar mbi 50 viktima.
Kryetari i Skenderajt, Sami Lushtaku, pas vizitës në Zubin Potok, ku po dyshohet për gjetjen e një varreze masive, ka falënderuar Policinë e Kosovës dhe të gjithë ata që kanë kontribuar në identifikimin dhe gjetjen e personave të zhdukur gjatë luftës, raporton Ekonomia Online.
Lushtaku tha se gjetja e të zhdukurve ka rëndësi të madhe për familjet e tyre dhe për gjithë Kosovën, duke theksuar se për familjarët është e rëndësishme që të kenë mundësi të vendosin lule pranë varreve të të dashurve të tyre.
“Dua ta falenderoj policinë e Kosovës edhe gjithë ata që e kanë bërë të mundur që të gjinden edhe këta të zhdukur, sepse ka shumë rëndësi për familjet, rrethin edhe për Kosovën natyrisht. Sa është e vështirë dhe e rëndë është edhe një ditë sidomos për familjet, çlirimi sepse në fund të fundit kanë mundësi që të shkojnë të vendosin një tufë lule pranë varrezave të tyre”, tha ai.
I pyetur për arrestimin e dy personave lidhur me këtë rast, Lushtaku tha se procesi duhet të vazhdojë në mënyrë profesionale, ndërsa theksoi se arrestimet për krime të kryera gjatë luftës në Kosovë duhet të vazhdojnë.
“Mendoj se këtu tani varet edhe mënyra e punës, profesionalizmi i tyre, për mua është tepër pozitive që janë gjendur një pjesë e tyre. Unë nuk pres nga Serbia që të rreh shuplaka për arrestimin e atyre që kanë bërë krime në këtë vend. Arrestime duhet me vazhdu me ndodh, ka shumë serbë që janë të lirë e krimet janë tepër të mëdha në Kosovë e sidomos në komunën tonë”, tha ai.
Tyler Robinson, njeriu i akuzuar për vrasjen e Charlie Kirk, e kishte marrë në shënjestër aktivistin e krahut të djathtë për shkak të bindjeve të tij politike, kanë thënë të martën prokurorët, duke përmendur kundërshtimin e Kirk-ut ndaj martesave të personave të të njëjtës gjini dhe të drejtave të personave transgjinorë.
Komentet në dokumentet gjyqësore përbëjnë deri tani shpjegimin më të detajuar të prokurorisë lidhur me motivin e dyshuar të sulmit të 10 shtatorit 2025, kur Kirk, një aleat i presidentit amerikan Donald Trump, u vra në një universitet në shtetin e Utah.
Prokurorët e Qarkut Utah kanë cituar një letër të paraqitur si provë nga një mik i Kirk, ku thuhej se qëllimi i aktivistit ishte të promovonte vlerat konservatore, përfshirë bindjen e tij se “eksperimentimi me identitetin seksual ose gjinor është mëkat” dhe se “heteroseksualiteti brenda kufijve të martesës është e vetmja formë e virtytshme e seksualitetit”.
Prokurorët kanë thënë se letra e David Engelhardt, anëtar i bordit të organizatës Turning Point USA të Kirk, tregonte se Kirk përfaqësonte “jo vetëm një lëvizje fetare, por edhe një lëvizje politike kundër martesave të personave të të njëjtës gjini dhe kundër pranimit e mbështetjes së transgjinorizmit, homoseksualitetit dhe eksperimentimit seksual.
Prokurorët pretenduan se “stili i jetesës” i Robinson ishte në kundërshtim me bindjet fetare dhe politike të Kirk dhe se 23-vjeçari e kishte marrë aktivistin në shënjestër për shkak të “shprehjes së tij politike”.
“Provat rrethanore që tregojnë se i pandehuri e kishte marrë në shënjestër zotin Kirk për shkak të bindjeve ose perceptimit të tij mbi bindjet politike të zotit Kirk janë dërrmuese”, kanë thënë prokurorët në argumentimin e tyre me shkrim, duke shpjeguar pse, sipas tyre, ka prova të mjaftueshme që Robinson të dalë në gjyq për vrasjen e Kirk-ut.
Ndërkohë, avokati i Robinsonit, Richard Novak, ka deklaruar në gjykatë më 9 korrik se letra e Engelhardt nuk ofronte asnjë provë që Robinson nuk pajtohej me bindjet politike ose fetare të Kirk dhe nuk ndihmonte aspak për të kuptuar gjendjen mendore të klientit të tij.
E prokurorët kanë thënë se Robinson ishte në një lidhje me shokun e tij të banesës, Lance Twiggs, në kohën kur ka ndodhur sulmi dhe se Tëiggs po shqyrtonte mundësinë e tranzicionit gjinor.
Prokurorët paraqitën një sërë provash që, sipas tyre, tregojnë se Robinson e kishte marrë në shënjestër Kirk për shkak të bindjeve të tij politike.
Ata kanë përmendur gjithashtu mbishkrimet e gdhendura në fishekët e gjetur në armën e dyshuar të vrasjes, ku në njërin prej tyre shkruhej: “Hej fashist, kape këtë”.
Mbrojtja ka afat deri më 18 gusht për të paraqitur argumentet me shkrim se përse, sipas saj, nuk ka prova të mjaftueshme që Robinson të dalë në gjyq.
Kryetari i Prishtinës, Përparim Rama, ka reaguar ndaj deklaratave të anëtarit të Komisionit Qendror të Zgjedhjeve (KQZ), Alban Krasniqi, njëherësh bashkëshort i ushtrueses së detyrës së presidentes, Albulena Haxhiu, i cili e ka quajtur Ramën “vrasës”.
Në reagimin e tij publik, Rama ka thënë se “gjuha e urrejtjes dhe linçimit nuk e ndryshon ligjin”, duke akuzuar Lëvizjen Vetëvendosje për përdorim të këtij lloj diskursi politik. Ai ka përmendur edhe rastin tragjik të vdekjes së 26-vjeçarit në Prishtinë.
“Duke mos i njohur as kompetencat dhe përgjegjësitë institucionale, po tentohet t’i faturohen Kryeqytetit përgjegjësi që sipas ligjit u takojnë institucioneve të nivelit qendror”, ka deklaruar Rama.
Ai ka theksuar se, sipas legjislacionit në fuqi, verifikimi teknik i vinçave, inspektimi i pajisjeve dhe mbikëqyrja e masave të sigurisë në punë janë kompetencë ekskluzive e Inspektoratit Qendror të Punës.
Sipas Ramës, Inspektorati i Kryeqytetit ushtron kompetenca vetëm në zbatimin e kushteve të lejes së ndërtimit dhe legjislacionit përkatës.
“Çdo përpjekje për t’ia faturuar Kryeqytetit dhe mua përgjegjësitë që ligji ua ngarkon institucioneve të nivelit qendror tregon se, përveç dashakeqësisë, jeni edhe të padijshëm!”, ka shkruar ai.
Rama ka bërë të ditur se Inspektorati i Kryeqytetit do të vazhdojë bashkëpunimin me Policinë e Kosovës, Prokurorinë e Shtetit, Inspektoratin Qendror të Punës dhe institucionet e tjera, me qëllim zbardhjen e plotë të rastit.
Ai gjithashtu ka njoftuar se do të ndërmarrë veprime ligjore ndaj Alban Krasniqit.
“Alban Krasniqi do të paditet për shpifje”, ka deklaruar Rama.
Në fund të reagimit të tij, kryetari i Prishtinës ka kritikuar qeverisjen e Lëvizjes Vetëvendosje, duke e akuzuar për mungesë të investimeve kapitale, intimidim të kundërshtarëve politikë dhe përkeqësim të marrëdhënieve me partnerët ndërkombëtarë.
“Po e ripërsëris: ju jeni fatkeqësia e këtij vendi”, ka përfunduar Rama reagimin e tij.
Kryeministri në detyrë, Albin Kurti tha se për periudhën 1 janar 1998 deri më 20 qershor 1999 janë dokumentuar gjithsej 12.230 viktima të luftës në Kosovë, përfshirë 1.047 fëmijë të vrarë, 94 që humbën jetën si pasojë e kushteve të luftës, ndërsa fati i rreth 100 fëmijëve të zhdukur ende nuk dihet.
Në lansimin e Raportit të Institutit të Krimeve të Kryera Gjatë Luftës në Kosovë (IKKL), Kurti tha se vetëm gjatë periudhës mars-qershor 1999 u vranë rreth 9 mijë persona.
Ai theksoi se raporti i publikuar paraqet metodologjinë mbi të cilën është ndërtuar lista e viktimave dhe procesin e mbledhjes së të dhënave, duke shtuar se lista është preliminare dhe do të vazhdojë të plotësohet me dëshmi të reja.
“Pa dokumentim nuk ka kujtesë, drejtësi dhe paqe të qëndrueshme”, deklaroi Kurti, duke u bërë thirrje të gjithë atyre që posedojnë informacione të bashkëpunojnë me institutin.
Kryeministri në detyrë kritikoi Serbinë për, siç tha ai moszbatimin e Deklaratës për Personat e Zhdukur të dakorduar më 2 maj 2023 në Bruksel dhe refuzimin për hapjen e arkivave ushtarake.
“U bëj thirrje ndërkombëtarëve të ushtrojnë presion ndaj Serbisë që të ndryshojë vendimin për klasifikimin 30-vjeçar të dokumenteve deri në vitin 2044 dhe të hapen arkivat e Brigadës së 37-të të Motorizuar të Ushtrisë Jugosllave, në mënyrë që të sigurohen informacione për fatin e personave të zhdukur në Kosovë”, tha Kurti.
Ndërkaq, drejtori i Institutit për Krimet e Kryera Gjatë Luftës, Atdhe Hetemi, tha se raporti nuk përfshin 267 raste që figuronin në lista të mëparshme, pasi bëhet fjalë për persona të vrarë jashtë territorit të Kosovës.
“Ky përjashtim nuk ua mohon statusin e viktimës, por lidhet me mosplotësimin e kritereve të raportit”, tha Hetemi.
Sipas tij, raporti është hartuar duke u mbështetur në burime institucionale, dëshmi të familjarëve dhe hulumtime shtesë të institutit, mbi parimet e plotësueshmërisë, krahasueshmërisë, gjurmueshmërisë dhe integritetit të të dhënave.
Sipas Hetemit, analiza demografike tregon se numri më i madh i viktimave kanë qenë meshkuj, ndërsa grupmosha më e prekur ka qenë ajo 18 deri në 50 vjeç. Ai shtoi se ndër grupet më të cenueshme kanë qenë fëmijët dhe personat mbi 65 vjeç.
Sa i përket shpërndarjes gjeografike, Hetemi tha se rajonet më të prekura nga viktimat e luftës kanë qenë Gjakova, Mitrovica dhe Prishtina, ndërsa rajoni i Gjilanit rezulton të jetë më pak i prekur.
Në aspektin kohor, ai theksoi se numri më i madh i viktimave është regjistruar gjatë vitit 1999, veçanërisht në muajt e parë të atij viti. /KP/
Dhomat e Specializuara të Kosovës në Hagë kanë urdhëruar vazhdimin e paraburgimit ndaj ish-pjesëtarit të Ushtrisë Çlirimtare të Kosovës, Rexhep Selimi.
Në vendimin e publikuar më 28 korrik 2026, Paneli i Gjykatës ka bërë të ditur se rishikimi i ardhshëm i paraburgimit të Selimit është caktuar në parim për 28 shtator 2026, përveç nëse ndërkohë publikohet aktgjykimi i çështjes.
Paneli ka vlerësuar se, duke pasur parasysh se seanca për shpalljen e aktgjykimit është planifikuar për 16 shtator 2026, në këtë fazë nuk është e nevojshme që palëve t’u kërkohen parashtresa shtesë lidhur me vazhdimin e masës së paraburgimit.
Në pjesën përfundimtare të vendimit, gjykata ka urdhëruar vazhdimin e paraburgimit ndaj Selimit dhe ka kërkuar nga mbrojtja e tij që të dorëzojë një version publik të njoftimit për rishikimin e paraburgimit ose të kërkojë riklasifikimin e dokumentit deri më 21 gusht 2026.
Rexhep Selimi po gjykohet në Hagë së bashku me ish-krerët e tjerë të UÇK-së, Hashim Thaçi, Kadri Veseli dhe Jakup Krasniqi, në një proces për akuza për krime lufte dhe krime kundër njerëzimit.
Ky nuk është vendimi i parë për vazhdimin e paraburgimit ndaj Selimit.
Gjykata edhe më herët ka konstatuar se vazhdojnë të ekzistojnë rreziqe të lidhura me pengimin e procedurave gjyqësore, përfshirë ndikimin mbi dëshmitarët. /Telegrafi/
Policia e Shtetit në Shqipëri njoftoi se biznesmeni Ermal Beqiri është arrestuar në Francë. Ai është i shpallur në kërkim ndërkombëtar me kërkesë të Strukturës së Posaçme kundër Korrupsionit (SPAK). Beqiri pritet të ekstradohet në Shqipëri.
Beqiri është pjesë e një prej dosjeve më të rëndësishme hetimore në Shqipëri, që lidhet me dyshimet për abuzime me tenderët e Agjencisë Kombëtare të Shoqërisë së Informacionit (AKSHI).
AKSHI është institucioni qendror që administron dhe zhvillon infrastrukturën e teknologjisë së informacionit të Qeverisë shqiptare, përfshirë platformën e-Albania, sistemet elektronike shtetërore dhe ndërveprimin mes bazave të të dhënave të institucioneve publike. Agjencia mbikëqyret drejtpërdrejt nga kryeministri i Shqipërisë.
Për këtë dosje janë vendosur masa sigurie ndaj tetë personave, mes tyre edhe ndaj ish-drejtoreshës së AKSHI-t, Mirlinda Karçanaj. Më 16 dhjetor 2025, ndaj saj u vendos fillimisht masa e sigurisë “arrest shtëpiak”, ndërsa në shkurt të këtij viti ajo dha dorëheqjen nga drejtimi i Agjencisë Kombëtare të Shoqërisë së Informacionit.
Masa e sigurisë ndaj Karçanajt u zbut më pas nga Gjykata e Lartë, në detyrim paraqitje, ndërsa në fuqi është masa ndaj saj që ia ndalon daljen nga shteti pa autorizim.
Sipas SPAK-ut, Karçanaj dyshohet për “shkelje të barazisë së pjesëmarrësve në tenderë”, të kryer në bashkëpunim dhe në kuadër të “një grupi të strukturuar kriminal” Prokuroria pretendon se, në cilësinë e drejtoreshës së AKSHI-t, ajo ka pasur rol në procedurat e prokurimit publik dhe në favorizimin e kompanive të caktuara në disa tenderë të agjencisë. Nën hetim për të njëjtat akuza është edhe ish-zëvendësdrejtuesja e AKSHI-t.
Sipas SPAK, dy personat e tjerë me role të rëndësishme në hetim janë biznesmenët Ermal Beqiri, i cili pritet të ekstradohet në Shqipëri, dhe Ergys Agasi, i shpallur në kërkim ndërkombëtar.
Katër personat e tjerë të përfshirë në hetim lidhen me kompani private, procedurat e tenderëve dhe elementë të tjerë të skemës së dyshuar.
Ndaj Ermal Beqirit është caktuar masa e arrestit me burg, në mungesë. Ai dyshohet për veprat penale “konkurrencë e paligjshme nëpërmjet dhunës”, “heqje e paligjshme e lirisë”, “shkelje e barazisë së pjesëmarrësve në tenderë apo ankande publike”, vepra të kryera në formën e “grupit të strukturuar kriminal”, si dhe “pastrim parash”.
Më 21 prill 2026, SPAK njoftoi sekuestrimin e 52 pasurive dhe llogarive bankare me vlerë mbi 40 milionë euro. Pasuritë lidhen me Mirlinda Karçanajn, Ergys Agasin, Ermal Beqirin dhe persona të tjerë që janë nën hetim. Mes pasurive të sekuestruara janë banesa në Tiranë, Durrës dhe Vlorë, troje, sipërfaqe toke, llogari bankare dhe një jaht në pronësi të Beqirit, njofton rel.
Ermal Beqiri kontrollonte disa shoqëri në sektorin e teknologjisë, por kompania kryesore që del në qendër të hetimit për tenderët e AKSHI-t është “Soft & Solution”, e cila dyshohet të ketë përfituar kontrata publike nga ky institucion.
Një nga episodet më të rënda të hetimit ndaj Beqirit lidhet me rastin e pengmarrjes së një biznesmeni. Sipas SPAK-ut, ai dyshohet se ka ushtruar presion në kuadër të një konflikti për konkurrencën në tregun e teknologjisë dhe tenderëve publikë. Biznesmeni që u mor peng kishte paraqitur ankesa për procedurat e ndjekura në disa tenderë. Për këtë, Beqiri përballet edhe me akuzën e heqjes së paligjshme të lirisë dhe konkurrencës së paligjshme përmes dhunës.
Dosja AKSHI-t nuk preku vetëm drejtuesit e agjencisë dhe bizneset private, por solli edhe pezullimin e zëvendësdrejtorit të Policisë së Tiranës, Erion Ismaili, i cili u përfshi në hetimin e SPAK-ut lidhur me këtë çështje. Deri tani, autoritetet nuk kanë bërë publike hollësi mbi rolin konkret që dyshohet se ka pasur ai në episodet nën hetim.
Sipas mediave franceze, Ermal Beqiri u arrestua në Francë pasi avioni i vogël që ai pilotonte kaloi mbi zonën e ndjeshme të centralit bërthamor Penly, në Seine-Maritime, duke shkelur kufirin e lejuar të fluturimit. Autoritetet franceze e shoqëruan avionin drejt aeroportit Albert, ku Beqiri u ndalua.
Gjatë kontrollit, atij iu gjetën edhe tre pajisje gjurmuese AirTag. Pas verifikimit të identitetit, autoritetet franceze konstatuan se ai ishte person në kërkim nga Shqipëria për dosjen AKSHI-it. Ai u dënua në Francë me gjobë dhe dënim me kusht për fluturim të paligjshëm dhe tashmë pritet ekstradimi i tij drejt Shqipërisë.
Policia tha se të mërkurën Beqiri pritet të dalë para Gjykatës Penale të Amiens në Francë, ku do t’i komunikohet zyrtarisht kërkimi ndërkombëtar ndaj tij dhe do të vijojnë procedurat për ekstradimin drejt Shqipërisë.
Kryeministri në detyrë, Albin Kurti, ka thënë se dyshimi i parë i institucioneve pas gjetjes së mbetjeve mortore në fshatin Kalludër të Zubin Potokut është se ato mund t’u përkasin grupit prej 23 intelektualësh të Mitrovicës, të cilët ishin rrëmbyer dhe zhdukur më 19 prill 1999, raporton Ekonomia Online.
Kurti tha se ende nuk mund të konfirmohet nëse bëhet fjalë për këtë grup, ndërsa theksoi se duhet pritur konfirmimi nga organet kompetente.
“Dyshimi ynë i menjëhershëm kur kemi marrë vesh se janë gjetur mbetje mortore, natyrisht ka qenë se bëhet fjalë për grupin e intelektualëve, 23-sosh, të cilët u rrëmbyen dhe u zhdukën dhunshëm më 19 prill të vitit 1999, pra grupi i intelektualëve në Mitrovicë. Ne nuk mund ta konfirmojmë që bëhet fjalë për ta, por ky ka qenë dyshimi ynë i menjëhershëm; sidoqoftë, duhet t’i presim organet tona që të na tregojnë se për çfarë bëhet fjalë atje, por duket që kemi një varrezë masive në fshatin Kalludër të Zubin Potokut, që është një komunë në veri të Ibrit, që ka qenë zonë e pashqyrtuar më herët, pra bëhet fjalë për një territor të paprekur prej gërmimeve. Përkintasi, mesbardhjen e fatit të pagjeturve”, tha ai.
Kurti bëri të ditur se në terren janë angazhuar ekipet e Policisë së Kosovës dhe Institutit të Mjekësisë Ligjore, me mbështetjen e EULEX-it.
“Në terren janë angazhuar ekipet e policisë së Kosovës, dhe të Institutit të Mjekësisë Ligjore, me mbështetjen e EULEX-it. Ky fakt na kujton se për shumë familje, lufta nuk ka përfunduar; përderisa ende nuk janë gjetur personat më të dashur të tyre. Për qindra familje, pritja vazhdon. Për to, çdo gërmim është shpresë. Çdo identifikim është një hap drejt së vërtetës e drejt drejtësisë. Derisa këto gërmime janë rezultat i punës së institucioneve tona, mosbatimi nga Serbia i deklaratës së Brukselit për të zhdukurit me dhunë, e dakorduar me 2 maj 2023, përkatësisht refuzimi për të hapur arkivat e ushtrisë, është dëshmi se shteti fqinj vazhdon t’i ikë përgjegjësisë për krimet e kryera në vendin tonë gjatë Luftës së Fundit. Andaj, e përsërisim thirrjen ndaj faktorëve ndërkombëtarë të shtojnë trysni ndaj Serbisë që, mes të tjerash, të ndryshohet vendimi për klasifikim 30-vjeçar deri në vitin 2044 dhe të hapet arkiva e Brigadës së Motorizuar 37 të ushtrisë jugosllave në mënyrë që të kemi informacione për zbardhjen e fatit të të zhdukurve me dhunë”, tha ai.
Ministria e Infrastrukturës dhe Transportit ka njoftuar se nesër, më 29 korrik 2026, do të hyjnë në fuqi kufizime të përkohshme të qarkullimit për automjetet e transportit të mallrave me masë totale mbi 20 tonë në autoudhët e Kosovës.
Sipas njoftimit, kufizimi do të zbatohet nga ora 11:00 deri në 17:30, pasi temperaturat e parashikuara pritet të arrijnë ose tejkalojnë 32 gradë Celsius.
Në rrugët nacionale, rajonale dhe lidhëse qarkullimi do të zhvillohet pa kufizime.
Nga ky vendim përjashtohen automjetet e organeve të rendit dhe sigurisë publike, shërbimeve emergjente dhe institucioneve shëndetësore.
Ministria u bën thirrje operatorëve ekonomikë dhe drejtuesve të mjeteve që të respektojnë kufizimet dhe të planifikojnë qarkullimin sipas orarit të përcaktuar.
