ATV

Author: G.O.

  • Presidentja Vjosa Osmani publikon pamje nga pritja e veçantë për Dua Lipën në Presidencë

    Presidentja Vjosa Osmani publikon pamje nga pritja e veçantë për Dua Lipën në Presidencë

    Presidentja e Republikës së Kosovës, Vjosa Osmani, ka ndarë së fundmi një video të veçantë nga takimi që u zhvillua të enjten në Presidencë me yllin botëror të muzikës, Dua Lipa.

    Në një atmosferë solemne dhe plot emocion, Lipa u prit nga Presidentja Osmani në një ceremoni zyrtare, ku iu dorëzua shtetësia e Kosovës si një akt mirënjohjeje për rolin e saj të jashtëzakonshëm në promovimin e vendit në skenën ndërkombëtare të muzikës dhe kulturës.

    Pamjet e publikuara tregojnë momente prekëse nga pritja, përfshirë edhe një interpretim të veçantë nga kori i vajzave që e mirëpritën artisten me këngën e saj të famshme “Levitating”, ndërsa ajo po hynte në ambientet e Presidencës. Emocionet ishin të dukshme në fytyrën e Lipës, e cila u shpreh më herët se ky ishte një nga momentet më të veçanta në jetën e saj.

    Presidentja Osmani, në postimin e saj, theksoi se Dua Lipa është simbol i suksesit, krenarisë dhe identitetit të rinisë kosovare: “Me zërin, talentin dhe përkushtimin e saj, ajo i ka dhënë jehonë Kosovës në gjithë botën. Kjo shtetësi është vetëm një gjest i vogël në krahasim me atë që ajo ka bërë për ne”.

    Vizita e Dua Lipës në Presidencë vjen në prag të edicionit të sivjetmë të festivalit “Sunny Hill”, ku ajo do të performojë për herë të tretë në Prishtinë, të premten mbrëma, duke rikthyer emocionin dhe energjinë në njërën nga ngjarjet më të rëndësishme kulturore të vitit në Kosovë.

  • Kurti: Serbia po vazhdon përpjekjet për destabilizim të vendit tonë

    Kurti: Serbia po vazhdon përpjekjet për destabilizim të vendit tonë

    Qeveria në detyrë është duke mbajtur mbledhjen e radhës. Kryeministri në detyrë, Albin Kurti, ka deklaruar se Serbia po vazhdon përpjekjet për destabilizimin e vendit tonë.

    Kurti foli edhe për arrestimet e fundit të personave të dyshuar për spiunazh, Bojan Jevtiq dhe Igor Popoviq.

    “Serbia po vazhdon përpjekjet për destabilizim të vendit tonë, mirëpo institucionet e sigurisë së inteligjencës në vendin tonë janë duke u kundërvënë suksesshëm ndaj këtyre përpjekjeve. Këtu përfshihen edhe arrestimet e personave përgjegjëse, me dëshmi. Sikurse rasti i fundit, i togerit në Policinë e Kosovës, i arrestuar më 17 korrik, dhe Igor Popoviq”, tha Kurti.

    Tutje në fjalimin e tij, Kurti tha se dënojnë sulmet në Gazë, ku po rezultojnë me vdekjen e civilëve.

  • Kosova heq tarifën 10 për qind ndaj produkteve amerikane

    Kosova heq tarifën 10 për qind ndaj produkteve amerikane

    Kryeministri në detyrë i Kosovës, Albin Kurti, ka njoftuar sot se Qeveria ka miratuar vendimin për heqjen e të gjitha tarifave doganore ndaj produkteve me origjinë nga Shtetet e Bashkuara të Amerikës.

    Gjatë mbledhjes së qeverisë, Kurti theksoi se taksa prej 10 për qind që ishte në fuqi deri më tani do të ulet në zero.

    “Tjetër vendim shumë të rëndësishëm që po marrim sot është largimi i tarifës doganore me ShBA-të,” tha ai. “Kështu që tani e tutje të gjitha produktet me origjinë nga ShBA-të do të kenë tarifë zero për qind.”

    Sipas Kurtit, ky hap do të ndikojë drejtpërdrejt në forcimin e marrëdhënieve tregtare dhe ekonomike mes dy vendeve.

    “Kosova i mirëpret produktet amerikane në vendin tonë dhe besojmë fuqishëm që kjo do të ndikojë në rritjen e këmbimit tregtar si dhe shtimin e investimeve,” theksoi ai.

  • Protestojnë punëtorët e KOSTT-it, kërkojnë rritje pagash

    Protestojnë punëtorët e KOSTT-it, kërkojnë rritje pagash

    Sindikata e pavarur e Punëtorëve të KOSTT-it ka mbajtur protestë para ndërtesës së KOSTT-it në Prishtinë.

    Protestuesit kërkojnë rritje të pagave, duke e arsyetuar me rritjen e vazhdueshme të kostos së jetesës. Përveç kësaj, ata kanë shprehur një varg shqetësimesh përmes pankartave që mbanin në duar, ku denoncojnë padrejtësi dhe diskriminime brenda kompanisë, mungesë të kompensimit të orëve shtesë, parregullsi në konkurset e brendshme dhe përshkrimet e vendeve të punës.

    Në njoftimin e Sindikatës për këtë protestë, thuhet se ata kërkojnë nga menaxhmenti i KOSTT-it që të rishqyrtojë me urgjencë mundësinë për përmirësimin e mirëqenies së punëtorëve.

  • Tentim vrasje në Viti, i mituri sulmon me bisht sëpate shokun e tij

    Tentim vrasje në Viti, i mituri sulmon me bisht sëpate shokun e tij

    Një përleshje mes të miturve ka përfunduar me tentativë për vrasjeje mbrëmë në qytetin e Vitisë.

    Ngjarja ndodhi rreth orës 21:40 në rrugën “Adem Jashari”, ku një 17-vjeçar dyshohet se e ka goditur me bisht sëpate në kraharor një të ri 18-vjeçar pas një konflikti verbal.

    Viktima ka marrë lëndime trupore dhe është dërguar me urgjencë në Spitalin Rajonal të Gjilanit, ku mjekët kanë konstatuar se gjendja e tij është jashtë rrezikut për jetë.

    Policia ka intervistuar të dyshuarin në prani të prindit dhe avokatit, ndërsa viktima është marrë në pyetje në ambientet e emergjencës. Me urdhër të Prokurorit të rastit, i mituri është ndaluar për 24 orë dhe hetimet për rastin janë duke vazhduar.

  • Djali sulmon prindërit në Gllanasellë të Drenasit, Policia e arreston dy ditë pas ngjarjes

    Djali sulmon prindërit në Gllanasellë të Drenasit, Policia e arreston dy ditë pas ngjarjes

    Një rast dhune në familje është raportuar në fshatin Gllanasellë të Drenasit, ku një burrë ka ushtruar dhunë fizike ndaj prindërve të tij dhe është larguar nga vendngjarja.

    Incidenti ka ndodhur më 29 korrik rreth orës 20:40, pas një mosmarrëveshjeje familjare.

    Sipas Policisë, viktimat kanë raportuar se janë sulmuar fizikisht nga djali i tyre, të cilët kanë pësuar lëndime trupore.

    Menjëherë pas ngjarjes, Policia ka nisur hetimet dhe me urdhër të prokurorit rasti është iniciuar si “dhunë në familje”.

    Pas dy ditësh kërkimesh, dje rreth orës 22:00, i dyshuari është arrestuar dhe dërguar në stacionin policor për intervistim.

    Me vendim të prokurorit të rastit, ai është ndaluar për 48 orë, ndërsa hetimet për të sqaruar motivin e ngjarjes janë duke vazhduar.

  • Rasti i Agon Zejnullahut – Apeli liron pesë zyrtarët policorë nga masa e paraburgimit, do të mbrohen në liri

    Rasti i Agon Zejnullahut – Apeli liron pesë zyrtarët policorë nga masa e paraburgimit, do të mbrohen në liri

    Gjykata e Apelit ka vendosur të lirojë nga paraburgimi pesë zyrtarët policorë që po hetohen për vrasjen nga pakujdesia të të ndjerit Agon Zejnullahut.

    Policët, Ibrahim Nela, Albion Ratkoceri, Artidon Konxheli, Liridon Rrahmani dhe Endrit Beqiri do të mbrohen në liri, pasi Apeli e vlerësoi se nuk ekziston rreziku i përsëritjes së veprës penale, baza e vetme mbi të cilën ishte vendosur masa e paraburgimit.

    Në aktvendimin e sotëm, Gjykata e Apelit konstatoi se megjithëse ekziston dyshimi i bazuar se veprimet e policëve gjatë arrestimit të Agon Zejnullahut kanë qenë të pakujdesshme dhe potencialisht shkaktuan vdekjen e tij, nuk janë paraqitur rrethana konkrete që do të justifikonin rrezikun e përsëritjes së veprës.

    Gjykata theksoi se të pandehurit janë tashmë të suspenduar nga detyra dhe nuk paraqesin rrezik të tillë.

  • Gjuriq telefonon sekretarin e përgjithshëm të OKB-së, i kërkon atij lirimin e Popoviqit të arrestuar në Kosovë

    Gjuriq telefonon sekretarin e përgjithshëm të OKB-së, i kërkon atij lirimin e Popoviqit të arrestuar në Kosovë

    Ministri i Punëve të Jashtme të Serbisë, nëpërmjet një bisede telefonike, ka shprehur shqetësimin Sekretarit të Përgjithshëm të Kombeve të Bashkuara, Antonio Gueterres, lidhur me arrestimin e zyrtarit serb, Igor Popoviq, në Kosovë.

    Në deklaratën e Ministrisë së Punëve të Jashtme serbe thuhet se Gjuriq theksoi se veprime të tilla përfaqësojnë “një përpjekje të rrezikshme për të frikësuar komunitetin serb dhe për të minuar dialogun.

    Gjuriq theksoi se Serbia pret një angazhim të qartë dhe parimor nga ndërkombëtarët, veçanërisht Misionit të OKB-së në Kosovë, “UNMIK”, prania e të cilit mbetet me rëndësi kyçe për mbrojtjen e të drejtave dhe sigurisë së popullit tonë në terren, njoftoi ministria.

    Popoviq u arrestua në Brnjak për nxitje të urrejtjes pasi e quajti Ushtrinë Çlirimtare të Kosovës “terroriste” në një fshat të Rahovecit.

  • “Me çlirimtarët, për drejtësi”, Memli Krasniqi mbështet protestën e 7 gushtit: Ftoj qytetarët të bashkohen

    “Me çlirimtarët, për drejtësi”, Memli Krasniqi mbështet protestën e 7 gushtit: Ftoj qytetarët të bashkohen

    Kryetari i Partisë Demokratike të Kosovës, Memli Krasniqi, ka reaguar përmes një deklarate publike lidhur me zvarritjen e procesit gjyqësor ndaj ish-udhëheqësve të Ushtrisë Çlirimtare të Kosovës në Dhomat e Specializuara në Hagë.

    Ai ka shprehur shqetësimin e tij për kohëzgjatjen e paraburgimit dhe për, siç thotë ai, përdorimin e provave të fabrikuara nga strukturat shtetërore të Serbisë.

    “Prej më shumë se katër vjetësh e gjysmë, udhëheqësit e Ushtrisë Çlirimtare të Kosovës ndodhen në paraburgim në Dhomat e Specializuara, ende pa një vendim përfundimtar”, shkruan Krasniqi.

    Ai kritikon qasjen e gjykatës dhe thotë se “zvarritja e këtij procesi dhe shmangia nga standardet e pritura të drejtësisë kanë ngritur shqetësime serioze, jo vetëm për të drejtat e të akuzuarve, por edhe për besimin e qytetarëve në vetë drejtësinë”.

    Krasniqi përmend raportimet për përdorim të provave të fabrikuara, duke thënë se ato “kanë thelluar edhe më tej shqetësimet për drejtësinë e këtij procesi”.

    Ai deklaron mbështetje të plotë për protestën që do të organizohet më 7 gusht, në orën 17:00, në sheshin “Skënderbeu”, duke e konsideruar atë si një “shprehje demokratike e qëndrimit qytetar, por edhe si bindje për pafajësinë e të akuzuarve”.

    Në fund të njoftimit, ai bën thirrje për pjesëmarrje masive:

    “Ftoj të gjithë qytetarët që besojnë në drejtësinë e luftës sonë për liri, në dinjitetin dhe të ardhmen e Republikës së Kosovës, që t’i bashkohen kësaj proteste”.

    “Me çlirimtarët. Për drejtësi. Për Kosovën.”

  • Kriza e urisë në Gaza, mjeku i spitalit i bën thirrje të dërguarit të Trumpit: Ejani dhe shihni urinë vetë

    Kriza e urisë në Gaza, mjeku i spitalit i bën thirrje të dërguarit të Trumpit: Ejani dhe shihni urinë vetë

    Një mjek amerikan që punon në Gaza ka deklaruar për Sky News se i dërguari i Donald Trumpit, që viziton rajonin, duhet të shkojë në spitalin e tij për të parë nga afër shkallën e vërtetë të urisë në Gaza.

    Pediatri Dr. Tom Adamkiewicz, që punon në Spitalin Nasser në Gaza, tha se pretendimet se nuk po përhapet një zi buke në enklavë janë “një gënjeshtër absolute”.

    Mjeku nga Atlanta theksoi: “Kjo nuk është absolutisht e vërtetë, sepse e kam parë me sytë e mi.”

    Ai i bëri thirrje Zotit Witkoff, i dërguarit të Trumpit, të vizitojë Gaza dhe të flasë me të ballë për ballë:
    “Dhe do të doja që z. Witkoff të vinte këtu dhe të fliste me mua, ballë për ballë, dhe unë do t’ia tregoj, në rregull?”.

    “Z. Witkoff, ejani këtu tani.”

    “Në fakt, do t’ju takoj në zonën e dekonfliktuar jashtë spitalit dhe do t’ju shoqëroj në spital,” shtoi mjeku.

    Fjalët e tij vijnë pas paralajmërimeve nga autoritetet kryesore për mungesën e ushqimit në Gaza, të cilat thanë se po zhvillohej një zi buke.

    Klasifikimi i Integruar i Fazës së Sigurisë Ushqimore (IPC) e ka vlerësuar situatën si “skenarin më të keq” që po zhvillohej në Gaza.

    “Kam qenë këtu për tre ditë tani dhe është shumë e vështirë të shpjegoj se çfarë po ndodh këtu,” tha Adamkiewicz, duke shtuar se “shumica e njerëzve” që kishte parë në spitalin e tij kishin shenja të kequshqyerjes.

    “Shumë fëmijë po humbasin ndjenjat gjatë ditës dhe po lëndohen,”, vazhdoi mjeku, duke theksuar se “këta fëmijë vuajnë nga kequshqyerja ekstreme e rëndë sepse ekziston një kombinim i sëmundjes kronike dhe kequshqyerjes.”

    Dr. Adamkiewicz gjithashtu foli për çmimet e larta të ushqimeve në Gaza, duke thënë se 1 kg mish ose sheqer kushtonte “100 dollarë”.