Author: G.O.

Zëdhënësja e Prokurorisë Speciale, Nora Luta, ka deklaruar se gërmimet që po zhvillohen në Zubin Potok janë pjesë e një procesi të ndjeshëm hetimor për kërkimin e personave të zhdukur gjatë luftës, duke kërkuar nga mediat të shmangin raportimet e pakonfirmuara, raporton Ekonomia Online.

Ajo tha se rasti është ende në fazën e hetimeve dhe se veprimet e deritanishme janë rezultat i një pune disa vjeçare të Policisë së Kosovës dhe Prokurorisë Speciale.

“Në lidhje me gërmimet që janë duke u zhvilluar në kuadër të procesit të kërkimit për personat e zhdukur, ajo çfarë mund t’ju them është se bëhet fjalë për një rast që është ende në fazën e hetimeve. Kjo është një proces i ndjeshëm dhe kompleks, është rezultat i një pune hetimore disa vjeçare të Policisë së Kosovës dhe Prokurorisë Speciale. Deri më tani janë bërë mbi 10 urdhra për zhvarrosje, krejt kjo në kuadër të këtyre veprimeve hetimore pra që janë ndërmarrë. Ajo çfarë mund të them gjithashtu dhe të theksoj është se nuk mund të flasim ende për rezultate pa përfunduar procesi hetimor”, u shpreh Luta.

E pyetur për raportimet lidhur me numrin e mbetjeve mortore që pretendohet se janë gjetur në lokacion, Luta tha se është ende herët për të konfirmuar shifra.

“Dëshirojmë, ju lusim për mirëkuptim dhe për shmangje të çfarëdo raportimi të pakonfirmuar nga institucionet kompetente. Ende është herët të flitet në këtë fazë me numra, pra duhet të presim të gjitha verifikimet dhe analizat e nevojshme për të ardhur deri te një rezultat i tillë. Në momentin që do të kemi të drejtë pra nga aspekti ligjor të japim informacione, publiku, ju mediat do të keni qasje që të keni informacione në gjithë procesin hetimor. Por deri në këtë fazë kërkojmë mirëkuptim, pra me qëllimin krejt kjo që të mbrohet integriteti i procesit hetimor, të presim një rezultat, gjithashtu edhe në nderim të dinjitetit të viktimave dhe familjarëve të tyre”.

Numri i viktimave në krizën kufitare mes Spanjës dhe Marokut, në enklavën spanjolle të Ceutës, ka arritur në 67, njoftoi të shtunën qeveria spanjolle.

Sipas autoriteteve, disa prej viktimave u mbytën në det, ndërsa të tjerë humbën jetën pasi u shtypën gjatë përpjekjeve për të kaluar barrierën kufitare.

Pas hyrjes së rreth 60 mijë emigrantëve në territorin e Ceutës nga e enjtja deri të premten, Spanja ka vendosur të ndërtojë një barrierë mbrojtëse prej 500 metrash, e cila do të shtrihet përgjatë digës në det për të parandaluar kalime të tjera të paligjshme, raporton AP.

Të shtunën në mëngjes, një numër i vogël emigrantësh të rraskapitur, të cilët arritën me not në plazhin Tarajal të Ceutës, u pritën nga ushtarët spanjollë, të cilët i shoqëruan sërish drejt kufirit me Marokun.

Ministria e Brendshme e Spanjës bëri të ditur se shumica e emigrantëve që hynë në territorin spanjoll në Afrikën e Veriut janë kthyer tashmë në Marok.

Pas disa ditësh kaosi dhe rrugëve të mbushura me njerëz që shpresonin të gjenin një jetë më të mirë në Spanjë, banorët e Ceutës u zgjuan të shtunën në një atmosferë më të qetë.

Megjithatë, autoritetet theksojnë se situata e sigurisë në qytetin autonom me rreth 84 mijë banorë mbetet ende e brishtë.

“Jeta në këtë qytet është tronditur si pasojë e incidentit në kufi”, deklaroi presidenti i Ceutës, Juan Jesus Vivas.

“Procesi i kthimit të emigrantëve ka nisur në mënyrë të kënaqshme, por duhet të përfundojë plotësisht. Qyteti ende nuk i është kthyer normalitetit”, shtoi ai.

Pavarësisht zhvillimeve, disa emigrantë kanë vendosur të qëndrojnë në Ceutë. Mes tyre është edhe 23-vjeçari maroken Mohamed Hatri.

“Ata kanë mbyllur gjithçka që të mos mund të blejmë ushqim, për të na detyruar të kthehemi në vendin tonë”, tha ai.

“Por edhe nëse mbyllin gjithçka, ne do të qëndrojmë këtu, pavarësisht nëse kemi ushqim apo jo”.

Nafta është shtrenjtuar edhe për 3 centë në çmimet tavan të derivateve për 24 orët e ardhshme.

Sipas Ministrisë së Industrisë, Ndërmarrësisë dhe Tregtisë, një litër naftë mund të shitet deri në 1 euro e 77 centë, që është çmimi më i lartë që nga fillimi i majit.

Ndërsa çmimi maksimal i benzinës mund të shitet deri në 1 euro e 51 centë për litër, ashtu siç edhe gazi mbetet me çmim të pandryshuar, deri në 60 centë për litër.

Rusia e ka goditur kryeqytetin e Ukrainës me raketa balistike në mëngjes herët të shtunën, ndërkohë që presidenti ukrainas, Volodymyr Zelensky, po vazhdon t’i lutet Uashingtonit ta lejojë Kievin të prodhojë vetë raketat e mbrojtjes ajrore të tipit Patriot.

Ukraina ka kohë të gjatë që i kërkon SHBA-së t’i lëshojë licencë për prodhimin e Patriotëve, por presidenti amerikan Donald Trump po tregon tani shenja të reja ngurrimi.

Shërbimet emergjente në Kiev njoftuan se të paktën nëntë njerëz u vranë dhe 23 të tjerë u plagosën nga një sulm rus me raketa. Sipas tyre, disa njerëz mbetën të ngujuar brenda një ndërtese pjesërisht të shembur në kryeqytet.

“Shpërthime në qytet. Kievi është nën sulm me raketa balistike. Qëndroni në strehimore!” shkroi në Telegram kryetari i Kievit, Vitaliy Klitschko, ndërsa sulmet po godisnin qytetin.

Agjencia e lajmeve Reuters, duke cituar dëshmitarë, shkroi të shtunën herët se u dëgjuan më shumë se një duzinë shpërthimesh në gjithë qytetin.

Moska i ka shtuar sulmet me raketa ndaj kryeqytetit ukrainas, në një kohë kur Ukraina po përballet me mungesa të mëdha të sistemeve të mbrojtjes ajrore që janë në gjendje t’i rrëzojnë raketat balistike me shpejtësi të lartë.

Lutjet e Zelenskyt
Zelensky i është lutur vazhdimisht aleatëve perëndimorë t’i dërgojnë Ukrainës më shumë ndihmë ushtarake dhe i ka kërkuar Uashingtonit të zbatojë premtimin për t’i dhënë vendit të tij licenca për prodhimin e sistemeve të mbrojtjes ajrore Patriot.

Më 9 korrik, Zelensky tha se Kievi dhe Uashingtoni kishin arritur marrëveshje për licencat e prodhimit të raketave interceptuese PAC-3 Patriot, duke shtuar se pjesët për këto raketa pritej të mbërrinin brenda pak ditësh.

Megjithatë, të premten, Trump ndryshoi qendrimin e mëhershëm se Uashingtoni ishte gati t’i jepte Kievit licencë për t’i prodhuar vetë raketat Patriot.

“Këto armë janë të jashtëzakonshme. Duhet të jemi shumë të kujdesshëm kur bëhet fjalë për t’i lejuar dikujt t’i prodhojë ato”, u tha Trump gazetarëve gjatë një mbledhjeje të kabinetit në Camp David, duke shtuar se administrata e tij “ende nuk është pajtuar” për një gjë të tillë.

“Po diskutojmë për këtë. Por, është e vështirë ta dhurosh një teknologji të tillë”, tha ai.

Zelensky u kthye në Kiev nga Uashingtoni, ku dy liderët kishin biseduar për këtë mundësi gjatë një takimi që u përshkrua si “i mirë” në Shtëpinë e Bardhë.

Duke shkruar në Telegram të premten, pas një bisede telefonike me nënpresidentin amerikan JD Vance, Zelensky tha se, “ndërsa sulmet ajrore ruse ndaj vendit tonë vazhdojnë pa ndërprerje, mbrojtja ajrore – veçanërisht raketat Patriot – mbetet prioriteti jonë kryesor”.

Sulmet e fundit ndaj Kievit vijnë pas goditjeve shkatërruese ruse në pjesë të tjera të Ukrainës.

Duke raportuar të premten nga fshati Radushne në rajonin ukrainas të Dnipropetrovskut, Shërbimi ukrainas i Radios Evropa e Lirë dokumentoi banorët vendas teksa vajtonin anëtarët e një familjeje që pothuajse ishte shuar tërësisht nga një sulm shkatërrues rus me raketa një ditë më parë.

“Kjo është tragjedi e jashtëzakonshme për të gjithë ne, për të gjithë komunitetin tonë”, tha një fqinje e familjes, e quajtur Luchia, pasi gjashtë nga dhjetë anëtarët e familjes u vranë kur raketa shkatërroi shtëpinë e tyre.

Të premten, dronët ukrainas vazhduan sulmet ndaj objektivave në Rusi, përfshirë edhe ndaj objekteve të tjera që i përkasin shitësit më të madh online në vend, Wildberries. Zyrtarë rajonalë dhe kanale monitorimi në Telegram raportuan sulme në të paktën dy rajone.

Kompania njoftoi se sulmet shkaktuan zjarr në depon e saj në rajonin e Volgogradit, por tha se nuk pati të lënduar.

Një tjetër sulm ndaj një objekti të Wildberries u raportua në Zelenodolsk, në republikën e pasur me naftë të Tatarstanit.

Banorët vendas raportuan gjithashtu shpërthime në Kazan, kryeqytetin e Tatarstanit, ndërsa autoritetet e republikës thanë se ishin vendosur kufizime të përkohshme në aeroportet e rajonit për shkak të alarmit për dronë, duke shtuar se nuk ishte raportuar për dëme apo viktima.

Që nga fillimi i vitit 2025, kur Trump mori detyrën si president, Shtëpia e Bardhë ka kërkuar gjithnjë e më shumë gjetjen e një zgjidhjeje përmes bisedimeve për t’i dhënë fund luftës në Ukrainë.

Megjithatë, pavarësisht një sërë takimesh të zhvilluara gjatë vitit të kaluar, Kievi dhe Moska vazhdojnë të ketë mospajtime të mëdha për kushtet e një marrëveshjeje të mundshme.

Derisa Kremlini vazhdon të mbajë qëndrim të ashpër, duke kërkuar, ndër të tjera, kontroll të plotë mbi rajonin kyç lindor ukrainas të Donjeckut, Trump deklaroi gjatë një takimi në Camp David më 31 korrik se të dyja palët “do të duhet të bëjnë lëshime” për t’i dhënë fund luftës që ka zgjatur më shumë se katër vjet./REL

Policia e Kosovës ka arrestuar një person në Lipjan për lëndim të lehtë trupor.

Rasti ka ndodhur të premten, në ora 16:00.

“Është arrestuar i dyshuari mashkull kosovar, nën dyshimin se i njëjti pas një mosmarrëveshje me viktimën mashkull kosovar, të njëjtin e ka sulmuar me një shufër metalike dhe i ka shkaktuar lëndime”, thuhet në raport.

Viktimës i është ofruar tretman mjekësor, ndërsa i dyshuari pas intervistimit, me vendim të prokurorit është dërguar në mbajtje. /Telegrafi/

Policia e Kosovës në raportin 24-orësh ka bërë të ditur se janë paraqitur katër raste të raportimit për persona të zhdukur.

Rastet janë raportuar në Lipjan, Shtërpcë, Ferizaj dhe Gjakovë.

Raporti i plotë:

Fsh. Vrellë e Magures, Lipjan 30.07.2026-09:45. Më datë 31.07.2026 ankuesi mashkull kosovar, ka raportuar se, motra e tij me datën e cekur ka dalë nga shtëpia dhe ende nuk dihet vendndodhja e saj. Lidhur me rastin është informuar edhe prokurori, ndërsa njësitet policore janë duke hetuar rastin.

Shtërpce 31.07.2026 – 11:00. Ankuesi mashkull kosovar, ka raportuar se, viktima-bashkëshortja e tij, ka dalë nga shtëpia dhe nuk dihet vendndodhja e saj. Lidhur me rastin është informuar edhe prokurori, ndërsa njësitet policore janë duke hetuar rastin.

Fsh. Dubravë, Ferizaj 31.07.2026 – 12:00. Ankuesi mashkull kosovar, ka informuar se motra e tij e mitur është larguar nga shtëpia dhe nuk është kthyer më. Rasti është duke u hetuar.

Rr. Abdullah Bablija, Gjakovë 30.07.2026 – 20:00. Më 31.07.2026 ankuesi mashkull kosovar, ka raportuar se vajza e tij e mitur ka dalë nga shtëpia dhe nuk dihet vend ndodhja e saj. Lidhur me rastin është informuar edhe prokurori, ndërsa njësitet policore janë duke hetuar rastin. /Telegrafi/

Zviceranët sot festojnë ditën kombëtare të tyre. 1 Gushti përkujton krijimin e Konfederatës Zvicerane që ne njohim sot.

Në vitin 1291 tre kantone malore u bashkuan dhe firmosën Kartën Federale e cila ishte baza e Konfederatës së sotme Zvicerane me 26 kantone.

Një grup burrash liridashës u betuan për besnikëri në livadhin e Rutli në bregun e liqenit të Lucernit, në kantonin e Urit.

Megjithatë, kjo kartë u zbulua në vitin 1758 dhe Qeveria zvicerane e konsideroi zyrtarisht atë si dokument mbi të cilin ngrihej shteti i tyre nga fundi i viteve 1800.

Për herë të parë, 1 Gushti u festua në vitin 1891, ndërsa nga viti 1899 u bë festë vjetore.

Në vitin 1993, zviceranët votuan në masë që 1 Gushti të jetë festë kombëtare dhe kështu nga viti pasardhës, pra 1994, ajo u bë edhe ditë pushimi.

Rreth 60 mijë emigrantë nga Maroku janë futur në enklavën spanjolle të Ceutës, duke shkaktuar një krizë të madhe humanitare dhe të sigurisë.

Të paktën 57 persona kanë humbur jetën gjatë kalimit të kufirit, sipas mediave lokale.

Kryeministri spanjoll Pedro Sanchez fajësoi rrjetet e trafikimit të emigrantëve, duke e cilësuar ngjarjen si shkelje të integritetit territorial të Spanjës.

Autoritetet spanjolle njoftuan se mbi 48 mijë persona janë kthyer vullnetarisht në Marok.

Përndryshe, Spanja ka dërguar ushtrinë për të forcuar sigurinë në Ceuta dhe Melilla.

Kriza ka nxitur reagime të forta nga disa vende evropiane, ndërsa Italia pezulloi përkohësisht zbatimin e marrëveshjes Schengen me Spanjën.

Bashkimi Evropian bëri thirrje për ndalimin e menjëhershëm të kalimeve të paligjshme dhe forcimin e kontrollit kufitar.