ATV

Author: G.O.

  • Reuters: Varri i një romaku të pasur zbulohet në Shqipëri

    Reuters: Varri i një romaku të pasur zbulohet në Shqipëri

    Arkeologët në Shqipëri kanë zbuluar një dhomë të madhe varri romak që daton nga shekulli i tretë deri në të katërt pas Krishtit, e para e këtij lloji e gjetur në vendin ballkanik që dikur ishte pjesë e Perandorisë Romake, shkruan Reuters.

    Të njoftuar nga vendasit që kishin vënë re disa gurë të pazakontë në një pllajë pranë kufirit me Maqedoninë e Veriut, stafi i Institutit të Arkeologjisë filloi gërmimet në fillim të gushtit dhe gjeti strukturën nëntokësore, pllakat e mëdha prej guri gëlqeror të së cilës ishin të gdhendura me shkronja greke, transmeton Telegrafi.

    “Mbishkrimi na tregon se personi i varrosur këtu quhej Gelliano, një emër tipik i periudhës romake. Jemi të pasigurt për identitetin e individit të dytë, por ka të ngjarë të jetë një anëtar i familjes”, tha Erikson Nikolli, arkeologu kryesor i projektit.

    Varri, i cili mat nëntë metra me gjashtë, është zbulimi i parë në Shqipëri i asaj që ekspertët besojnë se është vendi i prehjes së një personi të pasur, më madhështor se vendet e tjera të varreve të gjetura në zonë.

    Autoritetet lokale në Shqipëri, ku turizmi po lulëzon, tashmë po planifikojnë ta zhvillojnë vendin në një atraksion turistik, ndërsa banorët u dyndën në zonë pasi dëgjuan lajmin e zbulimit.

    Javën e kaluar, ekipi i Nikollit përdori furça për të zbuluar skajet e gdhendura me hollësi të gurëve të bardhë të çatisë dhe mureve të varrit.

    “Ne zbuluam gjithashtu një copë pëlhure të qëndisur me fije ari, e cila konfirmon bindjen tonë se kemi të bëjmë me një anëtar të klasës së lartë”, tha ai.

    Gjetje të tjera përfshijnë pllaka qelqi dhe thika. Nikolli tha se varri ishte plaçkitur të paktën dy herë – një herë në antikitet dhe më vonë kur makineri të rënda u përdorën për të lëvizur një shkëmb masiv në majë të dhomës.

    Ai shpjegoi se emri i banorit ishte shkruar me shkronja greke, por mbante një kuptim latin, ndërsa një mbishkrim i dytë tregon se varri i ishte kushtuar perëndisë Jupiter.

    Ekspertët ende nuk kanë deshifruar mbishkrime shtesë në gurët e gjetur aty pranë, të cilat besohet se i përkisnin një monumenti tjetër tani të rrethuar nga fusha misri dhe një gurore.

  • Moti i ditës – Çfarë na pret sot?

    Moti i ditës – Çfarë na pret sot?

    Instituti Hidrometeorologjik i Kosovës njofton se moti sot në vendin tonë do të jetë me diell dhe me vranësira të pjesshme.

    Temperaturat minimale do të jetë 11– 14°C ndërsa maksimalja 27-32°C

    Era do të fryjë nga veriperëndimi me shpejtësi 1–4 m/s.

  • KQZ kundërpërgjigjet ndaj akuzave të Listës Serbe

    KQZ kundërpërgjigjet ndaj akuzave të Listës Serbe

    Komisioni Qendror i Zgjedhjeve u është kundërpërgjigjur akuzave të bëra nga Lista Serbe lidhur me përbërjen e këshillave të vendvotimeve dhe për listën e votuesve për zgjedhjet lokale të 12 tetorit.

    Më herët gjatë 8 shtatorit, Lista Serbe – partia më e madhe e serbëve që gëzon mbështetjen e Beogradit – e akuzoi KQZ-në për “manipulim politik” për shkak të përbërjes, siç tha “të pabarabartë” të këshillave të vendvotimeve për numërimin e votave për zgjedhjet lokale.

    “KQZ sqaron se vendimi për përcaktimin e formulës për përbërjen e këshillave të vendvotimit që do të angazhohen në ditën e zgjedhjeve, është i mbështetur në Ligjin për zgjedhjet e përgjithshme dhe rregulloret zgjedhore. Në këtë proces zgjedhor, ashtu si në të kaluarën, KQZ ka ndjekur edhe parimin e gjithëpërfshirjes, duke krijuar hapësirë përfaqësimi edhe për subjektet e reja politike, si iniciativat qytetare dhe kandidatët e pavarur. Përgjigjet e detajuara për formulën e përbërjes së këshillave të vendvotimit, KQZ do t’i dërgojë brenda afatit në Panelin Zgjedhor për Ankesa dhe Parashtresa [PZAP]”, u tha në reagimin e KQZ-së të lëshuar mbrëmjen e së hënës.

    Lista Serbe tha se i është drejtuar me ankesë PZAP për këtë çështje.

    Ky subjekt pretendoi se KQZ-ja i ka shkaktuar dëm kësaj partie edhe sa i përket përbërjes të këshillave të vendvotimeve.

    “Në komunën e Novobërdës ka 23 vendvotime. Lista Serbe në zgjedhjet parlamentare fitoi 60 për qind të votave, por ne nuk kemi asnjë kryesues në vendvotim [në këtë komunë]. Dhe jo vetëm kaq, na mungojnë nëntë anëtarë të këshillave të vendovotimeve, që do të thotë se në nëntë klasa Lista Serbe nuk do të mund të kontrollojë këtë proces zgjedhor”, tha zyrtari i Listës Serbe, Igor Simiq, gjatë një konference për media.

    Si shembull të “shkeljes së ligjit” dhe të ashtuquajturit “manipulim politik”, Lista Serbe përmendi edhe komunën e Parteshit, ku kjo parti tha se ka vetëm një kryesues në një nga shtatë vendvotimet, edhe pse, siç tha Simiq, në zgjedhjet parlamentare kishte fituar afërsisht 90 për qind të votave.

    Kjo po ashtu pati kritika për listën zgjedhore në komunat me shumicë serbe. Simiq tha se krahasuar me zgjedhjet parlamentare të mbajtura në shkurt të këtij viti, është vërejtur një numër më i vogël i votuesve në disa komuna, veçanërisht në Leposaviq dhe Mitrovicën e Veriut.

    Lidhur me këto kritika të Listës Serbe, KQZ-ja tha se të gjitha veprimet e bëra për krijimin e listës së votuesve për zgjedhjet lokale dhe pastrimin e listës nga emrat e personave të vdekur janë bërë në mënyrë transparente dhe në përputhje me Ligjin për zgjedhjet e përgjithshme.

    “Zvogëlimi i listës së votuesve prej 6.770 votuesve, krahasuar me zgjedhjet për Kuvendin e Kosovës, është i shprehur në 30 komuna të Republikës së Kosovës dhe nuk ndodh vetëm në ndonjë komunë të caktuar. Ndërkaq, në tetë komuna të tjera numri i votuesve është më i lartë në krahasim me zgjedhjet e kaluara dhe këto ndryshime vijnë për shkak të aktivizimit të sistemit të adresave nga Agjencia për Regjistrimin Civil. Ky proces ka reflektuar natyrshëm në caktimin e qendrës së votimit sipas adresës së banimit të secilit qytetar”, tha KQZ-ja.

    Sipas pretendimeve të Simiqit, në Leposaviq në listën e votuesve janë rreth 1.500 më pak votues, ndërsa në Mitrovicën e Veriut rreth 1.200.

    “Arritëm të konstatojmë se votuesit në Mitrovicën e Veriut janë fshirë nga qendra e votimit në shkollën fillore ‘Sveti Sava’, ku votojnë qytetarët serbë. Ky është një numër i madh votuesish që mund të ndikojë në mënyrë drastike në rezultatet e zgjedhjeve si për asamblistë, ashtu edhe për kryetar komune”, deklaroi Simiq.

    Ai shtoi se në komunën e Graçanicës, afër Prishtinës, është “rritur në mënyrë drastike” numri i votuesve, përkatësisht se ka mbi 2.000 votues më shumë krahasuar me zgjedhjet parlamentare të shkurtit.

    Lidhur me përbërjen e këshillave të vendvotimeve, Lista Serbe kishte pasur pakënaqësi edhe para zgjedhjeve të shkurtit, duke e akuzuar KQZ-në se i kishte shkaktuar dëm, pasi në shumë komuna nuk kishte anëtarë “për të kontrolluar ligjshmërinë, legjitimitetin dhe karakterin demokratik të zgjedhjeve”.

    Komisioni Qendror i Zgjedhjeve i Kosovës më 6 shtator konfirmoi listën e votuesve për zgjedhjet lokale të 12 tetorit, sipas së cilës do të kenë të drejtë vote 2.069.098 persona.

    “Sipas të dhënave nga lista e votuesve, numri i qytetarëve me të drejtë vote në vendvotime në Republikën e Kosovës është 2.025.105 votues, ndërsa numri i qytetarëve që janë regjistruar për të votuar me postë jashtë Kosovës është 43.993 votues”, u tha në njoftim.

    KQZ gjithashtu bëri të ditur se për zgjedhjet lokale do të hapen 938 qendra votimi me gjithsej 2.625 vendvotime.

    Për këto zgjedhje janë certifikuar 93 subjekte – 32 parti politike, 32 iniciativa qytetare, dy koalicione dhe 27 kandidatë të pavarur.

    Kosova i ka mbajtur zgjedhjet e fundit lokale në tetor të vitit 2021.

  • Osmani: Kushtetuta e Kaçanikut, shkëndija e shpresës dhe qëndresës

    Osmani: Kushtetuta e Kaçanikut, shkëndija e shpresës dhe qëndresës

    Presidentja e Kosovës, Vjosa Osmani, ka kujtuar sot 35-vjetorin e Kushtetutës së Kaçanikut, duke e cilësuar atë si një akt guximi, besimi dhe themel i shtetësisë së Kosovës.

    Në një komunikatë për media, Osmani theksoi se Kushtetuta e Kaçanikut, e miratuar më 7 shtator 1990, shënon një nga momentet më të rëndësishme në historinë e re të vendit.

    “Më 7 shtator 1990, delegatët e Kuvendit të Kosovës i dhanë jetë Kushtetutës së Kaçanikut, aktit më të lartë të guximit politik dhe besimit në lirinë dhe pavarësinë tonë. Kjo Kushtetutë ishte shkëndija që mbajti gjallë shpresën dhe qëndresën, si dhe themeli mbi të cilin u ngrit Republika e Kosovës”, ka thënë ajo.Presidentja shtoi se ky akt nuk ishte vetëm një dokument juridik, por një premtim për lirinë e vendit:“Ishte betim që Kosova do të jetë e lirë dhe e pavarur në mesin e kombeve të tjera të lira. Sot, përulemi me nderim para atyre që guxuan atëherë kur duhej të rrezikonin gjithçka dhe me krenari vazhdojmë rrugën që ata trasuan”.

  • Protesta para shtëpisë së Netanyahut në Izrael: Ky makth duhet të marrë fund

    Protesta para shtëpisë së Netanyahut në Izrael: Ky makth duhet të marrë fund

    Protestuesit izraelitë marshuan drejt shtëpisë së kryeministrit Benjamin Netanyahu në Kudsin e pushtuar për të kërkuar një marrëveshje shkëmbimi të të burgosurve me Hamasin, ndërsa mijëra të tjerë u mblodhën në Sheshin e Pengjeve në Tel Aviv.

    Protestat vijnë disa orë pasi familjet e robërve izraelitë në Rripin e Gazës i dërguan një mesazh Shefit të Shtabit Eyal Zamir, duke paralajmëruar se plani për të pushtuar Qytetin e Gazës “nuk do t’i kthejë pengjet, por do t’i vrasë ata”.

    “Netanyahu duhet t’i japë fund këtij makthi dhe t’i kthejë të gjithë pengjet në shtëpi”, u citua të ketë thënë Vicky Cohen, nëna e të burgosurit Nimrod Cohen.

    Protestuesit mbanin pankarta që kërkonin një marrëveshje, duke theksuar kërkesat për të ndaluar luftën në Gaza dhe kthimin e robërve.

    Ndërkohë, gazeta Yedioth Ahronoth raportoi se mijëra njerëz u mblodhën në Sheshin e të Burgosurve në Tel Aviv.

    Ajo tha se rreth 1.000 izraelitë demonstruan gjithashtu në kryqëzimin Karkur në Haifa, duke kërkuar një marrëveshje shkëmbimi të të burgosurve.

    Ndryshe, rreth 250 robër u morën në Gaza pas një sulmi ndërkufitar nga Hamasi ndaj Izraelit më 7 tetor 2023.

    Tel Avivi vlerëson se gati 50 pengje izraelite po mbahen në Gaza, përfshirë 20 që janë gjallë. /AA/

  • Ngrihet aktakuzë ndaj katër shtetasve të huaj për shpëlarje parash dhe keqpërdorim të kartelave bankare

    Ngrihet aktakuzë ndaj katër shtetasve të huaj për shpëlarje parash dhe keqpërdorim të kartelave bankare

    Prokuroria Themelore në Prishtinë ka ngritur aktakuzë ndaj katër personave – tre shtetasve të Turqisë dhe një shtetasi të Maqedonisë së Veriut – për veprat penale “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit” si dhe “shpëlarja e parave”.

    Sipas Prokurorisë, të pandehurit A.S., A.S., S.O. dhe S.E., gjatë periudhës 11 nëntor 2024 – 20 shkurt 2025, në intervale të ndryshme kohore dhe në bashkëkryerje, kanë regjistruar biznese në Agjencinë e Regjistrimit të Bizneseve të Kosovës (ARBK) dhe kanë hapur llogari bankare të këtyre bizneseve dhe individuale në banka të Kosovës. Përmes POS terminaleve, ata kanë keqpërdorur qindra kartela bankare ndërkombëtare, duke klonuar kartela të shtetasve të Danimarkës dhe shteteve të tjera, me ç’rast kanë kryer transaksione në llogaritë e tyre personale. Nga kjo veprimtari, sipas aktakuzës, ata kanë përfituar në mënyrë të kundërligjshme 372,900.42 euro.

    Gjithashtu, të pandehurit akuzohen se kanë shpëlarë paratë e përfituara nga aktiviteti kriminal, duke i tërhequr ato në para të gatshme nga bankomatet e bankave në Kosovë dhe duke i transferuar jashtë vendit, kryesisht në Turqi, me qëllim të fshehjes së origjinës së mjeteve dhe shmangies nga pasojat ligjore.

    “Të akuzuarit ndodhen në masën e paraburgimit. Prokuroria ka propozuar që kjo masë të vazhdohet deri në përfundim të procedurave gjyqësore”, ka njoftuar Prokuroria.

  • Hoti: Shteti s’arriti t’ia ofrojë mbrojtjen e nevojshme Policisë, atyre iu mungojnë shujtat e rregullta, veshmbathjet cilësore për verë e dimër

    Hoti: Shteti s’arriti t’ia ofrojë mbrojtjen e nevojshme Policisë, atyre iu mungojnë shujtat e rregullta, veshmbathjet cilësore për verë e dimër

    Deputeti i LDK-së, Avdullah Hoti, në 26-vjetorin e themelimit të Policisë së Kosovës tha se shteti ende s’ka arritur të ofrojë mbrojtjen e nevojshme për pjesëtarët e këtij institucioni, përfshirë këtu sigurimin shëndetësor dhe sigurimin e jetës, pensionin dinjitoz, të parakohshëm dhe të rregullt.

    Hoti tha se përveç këtyre, policëve iu mungojnë shujtat e rregullta, veshmbathje cilësore për verë e dimër, transport adekuat, vetura pune të përshtatshme dhe të mjaftueshme për të gjithë.

    ”Respekt dhe mirënjohje të jashtëzakonshme ndaj institucionit simbol dhe identitar të Republikës së Kosovës – Policisë. Mirënjohje dhe përulje ndaj të gjithë atyre policëve që ranë në krye të detyrës dhe atyre që u lënduan në mbrojtje të jetës dhe pronës së qytetarëve. Ndjehem keq që pas kaq vitesh shteti i Kosovës ende nuk ka arritur të ofrojë mbrojtjen e nevojshme për pjesëtarët e këtij institucioni, përfshirë këtu sigurimin shëndetësor dhe sigurimin e jetës, pensionin dinjitoz, të parakohshëm dhe të rregullt. Është e papranueshme edhe fakti se ju mungojnë kushtet dhe mjetet e punës adekuate, siç janë: shujta e rregullt dhe e plotë,veshmbathje cilësore për verë e dimër, transport adekuat, vetura pune të përshtatshme dhe të mjaftueshme për të gjithë”, ka shkruar Hoti.

  • Bajrami: Kurti po e zhyt vendin në krizë, është bërë aleat me Listën Serbe në bllokimin e institucioneve

    Bajrami: Kurti po e zhyt vendin në krizë, është bërë aleat me Listën Serbe në bllokimin e institucioneve

    Shefja e deputetëve të LDK-së në Kuvendin e Kosovës, Hykmete Bajrami, thotë se Kosova po zhytet drejt një krize të thellë ekonomike. Bajrami thotë se e gjithë kjo po ndodh derisa institucionet po vazhdojnë të jenë të bllokuara nga Kurti dhe aleatët e tij.

    Bajrami në reagim thotë se norma e inflacionit sipas Agjencisë së Statistikave të Kosovës është 4.3%, derisa për shportën bazë të konsumit ai kap numra dyshifror.

    Shefja e Grupit Parlamentar dhe ish-ministrja Bajrami ka përmendur edhe ngritjen e çmimit të rrymës për bizneset dhe mungesën e investimeve kapitale nga Qeveria.

    Bajrami ka akuzuar Kurtin se ka faktorizuar Listën Serbe dhe sipas saj, Kurti dhe Lista Serbe janë bërë aleatë në bllokimin e institucioneve të Kosovës.

  • Haradinaj: Policia e Kosovës, një nga arritjet më të mëdha të shtetit

    Haradinaj: Policia e Kosovës, një nga arritjet më të mëdha të shtetit

    Me rastin e 26-vjetorit të themelimit të Policisë së Kosovës, kryetari i AAK-së, Ramush Haradinaj ka vlerësuar lartë kontributin e këtij institucioni, duke e cilësuar atë si një nga sukseset më të mëdha të shtetit të Kosovës.

    “Policia e Kosovës është një nga arritjet më të mëdha të shtetit tonë, institucion ky që konsiderohet model edhe për vendet e rajonit”, ka shkruar Haradinaj, duke theksuar përkushtimin dhe guximin e pjesëtarëve të saj ndër vite. Ai ka shtuar se është detyrë e shtetit të sigurojë kushte dinjitoze për këtë institucion jetik.

    “Në këto 25 vjet, policët tanë kanë dëshmuar përkushtim dhe uguxim në shërbim të qytetarëve dhe rendit publik. Andaj, është detyrë e shtetit që t’u krijojë kushte dinjitoze, në përputhje me misionin e rëndë e fisnik që mbajnë”, ka shkruar Haradinaj.

  • Policia përdori gaz lotsjellës për t’i shpërndarë protestuesit në Novi Sad

    Policia përdori gaz lotsjellës për t’i shpërndarë protestuesit në Novi Sad

    Policia ka hedhur gaz lotsjellës dhe mjete tjera për t’i shpërndarë protestuesit kundër Qeverisë në qytetin serb të Novi Sadit të premten, teksa mijëra persona vazhdojnë të kërkojnë zgjedhje të parakohshme.

    Protesta e 5 shtatorit është pjesë e serisë së organizimeve të udhëhequra nga studentët në Serbi, të cilët protestojnë kundër keqmenaxhimit qeveritar.

    Protestat janë nxitur pas rrëzimit të një strehe betoni në stacionin hekurudhor të Novi Sadit në nëntor të vitit të kaluar, duke lënë të vdekur 16 persona. Protestuesit kërkojnë nga institucionet përgjegjësi politike dhe penale për këtë rast.

    Ata besojnë se ka pasur korrupsion në projektin e rindërtimit të stacionit. Ndërkohë i kanë rritur kërkesat, duke kërkuar zgjedhje të parakohshme.

    Organizimet kanë qenë kryesisht paqësore deri në mesin e muajit gusht kur protestuesit i kanë akuzuar zyrtarët policorë për taktika të ashpra kundër protestuesve.

    Në protestën e së premtes janë përsëritur thirrjet për zgjedhje të parakohshme.

    Disa agjenci lajmesh në Serbi kanë raportuar se protestuesit kanë hedhur shishe dhe gjësende tjera në drejtim të policisë.

    Presidenti serb, Aleksandar Vuçiq i ka akuzuar protestuesit se kanë tentuar të “kërcënojnë stabilitetin dhe sigurinë e Serbisë” dhe “t’i zaptojnë objektet universitare në Novi Sad”.

    Ai ka thënë në një konferencë për media se 11 zyrtarë policorë janë plagosur në hyrje në Fakultetit Filozofik.

    Sipas tij, dhjetëra persona janë arrestuar dhe disa prej tyre do të jenë në mbajtje.

    “Njerëzit në Serbi duhet ta dinë se shteti është më i fuqishëm se cilido, dhe që kështu do të jetë gjithmonë”, ka thënë presidenti serb, duke paralajmëruar se marshe pro Qeverisë do të organizohen ditën e diel.

    Të hënën kanë marshuar mijëra njerëz në Beograd, Novi Sad dhe qytete tjera për të shënuar 10 muaj prej tragjedisë në Novi Sad.

    Vuçiqi i ka hedhur poshtë kërkesat për zgjedhje të parakohshme dhe i akuzon protestuesit se janë të nxitur nga faktorë të jashtëm.

    Partia e tij, Partia Përparimtare Serbe, është në pushtet prej vitit 2012.