Author: G.O.

Punëtorët e “Prishtina Parkingut”, kanë protestuar për të tretën herë para zyreve të kësaj ndërmarrjeje, duke kërkuar përmirësimin e kushteve të punës.

Rritja e pagës, pagesa e shujtës, pagesa e sigurimit shëndetësor, shlyerja e borxhit për muajin shtator dhe pagesa e kontributit të sindikatës janë kërkesat kryesore që këta punëtorë kërkojnë nga ndërmarrja dhe Komuna e Prishtinës.

E, në rast se këto kërkesa nuk u plotësohen, të njëjtit kanë paralajmëruar grevë të përgjithshme, raporton Ekonomia Online.

Safet Zuka, anëtar i kryesisë së punëtorëve të “Prishtina Parkingut”, deklaroi se kjo është protesta e tretë dhe se ende nuk ka pasur reagim nga pala tjetër.

“Sot ndodhemi në protestën e tretë me radhë. Deri në këtë moment, nuk ka pasur asnjë lëvizje konkrete drejt arritjes së ndonjë marrëveshjeje për përmbushjen e kërkesave tona legjitime.Ne, punëtorët e ndërmarrjes, mbetemi të palëkundur në qëndrimet tona. Përkundër kërkesave tona dhe refuzimit të tyre, që nga fillimi i grevës e deri më tani, nuk jemi ftuar në asnjë takim dhe nuk na është ofruar asnjë alternativë për tejkalimin e gjendjes së krijuar. Me pak fjalë, nuk ka pasur asnjë reflektim nga pala tjetër. Kjo situatë është e papranueshme dhe na detyron të vazhdojmë protestën, por tashmë në forma të tjera. Fillimisht, do të angazhojmë një ndërmjetësues ligjor për të negociuar kërkesat tona. Nëse nuk arrihet një zgjidhje, do të fillojmë me bojkot në vendin e punës. Nëse as kjo masë nuk sjell reflektim, do të detyrohemi të hyjmë në grevë të përgjithshme – ndonëse kjo është një masë që nuk e dëshirojmë.

Gjithashtu, ju informojmë se jemi në pritje të një përgjigjeje nga kryetari Rama, i cili, sipas detyrimit të tij kushtetues, duhet të takohet me qytetarët për t’i dëgjuar shqetësimet e tyre. Për këtë qëllim, i kemi dërguar dy e-maile zyrtare. Tani do t’i paraqesim kërkesat tona:

• Rritja e pagës mujore, si kusht i domosdoshëm për vazhdimin e punës;

• Pagesa e shujtës;

• Pagesa e sigurimit shëndetësor;

• Shlyerja e borxhit për muajin shtator;

• Pagesa e kontributit të sindikatës”, tha ai.

Ndërsa, kryetari i sindikatës së “Prishtina Parking”, Flamur Hajdari, foli për hapat e mëtejmë të sindikatës nëse kërkesat nuk plotësohen.

“Sot jemi mbledhur këtu, kjo është protesta e tretë që e kemi bërë dhe është java e tretë. Po shpresojmë që kjo të jetë e fundit. Do të hyjmë në një ndërmjetësim dhe, nëse edhe aty nuk ka rezultat, do të fillojmë me grevë. Qëllimi ynë janë kërkesat që i kemi adresuar: rritja e pagës dhe shujta, të cilat janë gjërat më kryesore që kërkojmë për momentin. Po shpresojmë që do të bëjmë diçka. Për momentin kushtet janë shumë të vështira. Presim një ndërmjetësim. Nëse nuk ka rezultat, do të vazhdojmë me grevë. Nuk na ka mbetur tjetër”, tha ai.

Kurse, kryetari i Sindikatës së Pavarur të SH.A. KOSTT, Arben Pllana, shprehu mbështetje për kërkesat e punëtorëve.

“Mbështetja jonë është që t’i përkrahim çdo sindikatë, pavarësisht, përfshirë edhe sindikatën e ‘Prishtina Parking’, që t’u paguhet shujta, anëtarësia, sigurimi shëndetësor dhe të gjitha benefitet e tjera që u takojnë si punëtorë të një ndërmarrje publike”, theksoi ai.

Kisha Katolike nuk ka kundërshtime për përdorimin e kafshëve si burim organesh, indesh ose qelizave për transplantim te qeniet njerëzore dhe bën thirrje për të njëjtat standarde bioetike që zbatohen për të gjitha ndërhyrjet mjekësore.

Ndërsa procedurat mjekësore që përfshijnë kafshët përparojnë dhe bëhen më të përhapura, Vatikani prezantoi të martën, më 24 mars, një dokument të ri nga Akademia Papnore për Jetën që përshkruan konsideratat mjekësore dhe etike të këtyre procedurave.

“Teologjia katolike nuk ka përjashtime, mbi baza fetare apo rituale, në përdorimin e ndonjë kafshe si burim organesh, indesh apo qelizave për transplantim te qeniet njerëzore”, thuhet në dokument.

Vatikani shtoi se pyetjet etike në lidhje me ksentransplantimin, transplantimin e organeve, indeve ose qelizave nga një specie në tjetrën, nuk mund të përgjigjen pa reflektuar mbi personin njerëzor dhe kafshët që bëjnë transplantin.

Udhëzimet, të hartuara me kontributin e ekspertëve nga Austria, Italia, Holanda dhe Shtetet e Bashkuara, u nxitën nga zhvillimi i bioteknologjisë gjatë dekadave të fundit, duke i afruar risitë me qëndrueshmërinë klinike.

Ndërsa transplantimi i organeve përdoret gjithnjë e më shumë si trajtim mjekësor, numri i procedurave është i kufizuar nga mungesa e organeve, indeve dhe qelizave njerëzore, vuri në dukje Vatikani.

Hulumtimet kanë zbuluar se vëllimi i transplanteve të organeve përbën ndërmjet pesë dhe 10 për qind të kërkesës globale.

Ksenotransplantimi do të ofronte një furnizim të pakufizuar të organeve, indeve dhe qelizave për transplantim, duke lehtësuar mungesën “kronike” të donatorëve njerëzorë, thuhet në dokument.

Megjithatë, në përdorimin e kafshëve, Vatikani nënvizoi disa kushte: procedurat duhet të kryhen vetëm kur është e nevojshme dhe e arsyeshme, modifikimet gjenetike që mund të ndryshojnë biodiversitetin duhet të shmangen dhe vuajtjet e panevojshme të kafshëve duhet të parandalohen.

Ksenotransplantet duhet të minimizojnë çdo shans që gjenomi i marrësit të ndryshohet ose të ndikohet qëllimisht, thuhet në dokument.

“Për shembull, është me rëndësi të madhe të refuzohet ksentransplantimi i atyre qelizave të trurit që lidhen me njohjen nga kafshët në trurin e njerëzve nëse identiteti personal i pacientit nuk mund të mbrohet”, shkruajnë autorët.

Nga ana tjetër, trajtimet e qelizave në tru që synojnë korrigjimin e defekteve fiziologjike, të tilla si sëmundja e Parkinsonit, me injektim të qelizave mbiveshkore të derrit, nuk kanë gjasa të përbëjnë një kërcënim të tillë dhe mund të konsiderohen të justifikueshme nga ana etike nga Kisha Katolike.

Shtetet e Bashkuara kanë finalizuar rregulla të reja për Programin e Vizave të emigrantëve të Diversitetit, e njohur ndryshe si Lotaria Amerikane, duke futur kërkesa më të rrepta për verifikimin e identitetit për aplikantët.

Departamenti i Shtetit i SHBA-së publikoi rregulloren përfundimtare në Regjistrin Federal nën titullin “Vizat: Përmirësimi i Verifikimit dhe Luftimi i Mashtrimit në Programin e Vizave të emigrantëve të Diversitetit”.

Sipas njoftimit zyrtar ky rregull do të hyjë në fuqi më 10 prill 2026 dhe sipas rregullores së përditësuar, individët që hyjnë në programin e Lotarisë duhet të japin informacion më të detajuara.

Nis që me një pasaportë të vlefshme dhe e paskaduar si pjesë të formularit të tyre elektronik të regjistrimit.

Aplikantët gjithashtu do të duhet të ngarkojnë një skanim të faqes/faqeve biografike dhe të nënshkrimit të pasaportës kur dorëzojnë regjistrimin e tyre.

Zyrtarët thonë se ndryshimi është hartuar për të forcuar verifikimin e identitetit dhe për të zvogëluar hyrjet përmes mashtrimeve në program.

Çdo vit, deri në 55,000 viza emigrantësh vihen në dispozicion përmes një procesi të kompjuterizuar përzgjedhjeje të rastësishme.

Megjithatë, autoritetet thonë se programi është përballur prej kohësh me sfida që lidhen me regjistrime mashtruese, aplikime të dyfishta dhe dorëzime të bëra nga palë të treta pa dijeninë e individëve të përfshirë.

Sipas Departamentit të Shtetit, kërkesa për dokumentacion pasaporte do të ndihmojë në sigurimin që pjesëmarrjet në Lotari të jenë të lidhura me individë të vërtetë dhe do ta bëjë më të vështirë për agjentët ose ndërmjetësit të paraqesin aplikime të shumëfishta duke përdorur informacionin e personave të tjerë. Zyrtarët kanë vënë në dukje më parë se skemat e organizuara në disa vende kanë përfshirë paraqitjen e një numri të madh aplikimesh në emër të individëve të pasigurt.

Sipas rregullit përfundimtar, aplikantët që hyjnë në programin e Vizave të Diversitetit duhet të përfshijnë të dhënat e pasaportës dhe të ngarkojnë një skanim dixhital të faqeve biografike dhe të nënshkrimit të pasaportës kur plotësojnë formularin e regjistrimit online.

Informacioni i kërkuar përfshin:

Numri i pasaportës

Vendi ose autoriteti që ka lëshuar pasaportën

Data e skadimit të pasaportës

Një kopje e skanuar e faqes biografike dhe të nënshkrimit të pasaportës

Regjistrimet që nuk përfshijnë dokumentacionin e kërkuar të pasaportës mund të skualifikohen.

Rregullorja gjithashtu parashikon përjashtime të kufizuara. Individët që janë pa shtetësi, që nuk janë në gjendje të marrin pasaportë për shkak të kufizimeve qeveritare ose që marrin përjashtime specifike nga autoritetet amerikane mund të përjashtohen nga kërkesa për pasaportë.

Rregulli gjithashtu prezanton disa përditësime teknike në udhëzimet e programit. Midis tyre, Departamenti i Shtetit do ta zëvendësojë termin “gjini” me “seks” dhe do ta zëvendësojë “moshën” me “datën e lindjes” në mënyrë që të pasqyrojë më mirë informacionin e mbledhur në sistemet e aplikimit për vizë.

Zyrtarët thonë se këto ndryshime kanë për qëllim përmirësimin e qëndrueshmërisë dhe saktësisë në mbledhjen e të dhënave të vizave.

Sipas Departamentit të Shtetit, kërkesat e reja do të zbatohen duke filluar me Lotarinë DV e vitit 2027.

Departamenti ka shtyrë nisjen e periudhës së regjistrimit për DV-2027 dhe ende nuk ka njoftuar datat kur do të hapen regjistrimet. Ky pezullim u bë në muajin janar për 75 vende, përfshirë Shqipërinë dhe Kosovën.

Me rregulloren e fundit të finalizuar, aplikantët do të duhet të sigurohen që ta kenë gati pasaportën gjatë plotësimit të aplikimit, pasi procesi i verifikimit të pasaportës ka të ngjarë të bëhet një pjesë e rëndësishme e procesit të aplikimit për Lotarinë Amerikane. /Tch/

Ministri francez për Evropën, Benjamin Haddad, ka deklaruar se procesi i zgjerimit me anëtarësimin e shteteve të Ballkanit Perëndimor, Moldavisë dhe Ukrainës është një domosdoshmëri gjeopolitike e BE-së.

“Tani duhet të flasim më tepër për ribashkimin e familjes evropiane. Në Evropë është i nevojshëm stabiliteti, kështu që zgjerimi është i domosdoshëm. Duhet të kini parasysh se procesi i zgjerimit është i gjatë dhe i vështirë, sepse shtetet kandidate duhet të përmbushin kërkesat që lidhen me sundimin e ligjit”, tha Benjamin Haddad, ministër për çështjet evropiane i Francës.

Franca premton ekspertizë.

“Franca dëshiron t’i ndihmojë vendet e Ballkanit Perëndimor në rrugën e integrimit. Ne kemi ekspertë të cilët do të dërgohen në shumicën e këtyre vendeve pikërisht për të ofruar mbështetje për reformën e drejtësisë dhe për çështjet ekonomike. Aktualisht ka një reflektim brenda Bashkimit Evropian mbi reformën e procesit të zgjerimit. Jemi të hapur për të zhvilluar diskutime rreth mënyrës në të cilën ndoshta mund të mendojmë në mënyrë krijuese për një status të ri të ndërmjetëm”, shtoi ai.

Haddad ka vlerësuar mbajtjen e Komunitetit Politik Evropian në Tiranë vitin e kaluar.

“Ndonjëherë mjafton të bësh një shëtitje në Mal të Zi, në Shqipëri, në Moldavi dhe gjetkë për të parë se çfarë vazhdon të përfaqësojë Bashkimi Evropian për këto shtete që duan të anëtarësohen në të”, tha më tej Benjamin Haddad.

Franca ka qenë vitet e fundit skeptike për procesin e zgjerimit, por së fundmi ka dhënë sinjale politike për përshpejtimin e integrimit evropian të shteteve ballkanike.

Shifrat nga Qendra Klinike Universitare e Kosovës (QKUK) tregojnë se kanceri mbetet një nga sëmundjet më të shpeshta në Kosovë, me rreth 2,100 raste të reja në vit, kështu ka bërë të ditur Drejtori i Klinikës së Onkologjisë, Ilir Kurtishi.

Sipas tij, vetëm gjatë periudhës janar – 20 mars, rreth 500 pacientë janë diagnostikuar dhe trajtuar për herë të parë në Klinikën e Onkologjisë.

Kurtishi ka theksuar se ngarkesa në këtë klinikë është e lartë, ku çdo ditë pune trajtohen rreth 250 deri në 300 pacientë në shërbimin e Onkologjisë mjekësore, ndërsa rreth 140 pacientë në ditë i nënshtrohen rrezatimit në shërbimin e Radioterapisë.

“Ne Kosove regjistrohen rreth 2100 raste të reja në vit, kjo përkthehet në afërsisht 170 -190 raste në muaj,pra për periudhën janar – 20 mars:rreth 500 pacientë të rinje te ekzaminuar/diagnostikuar dhe trajtuar ne Kliniken e Onkologjise per here te pare.Cdo dite pune rreth 250-300 pacient trajtohen ne sherbimin e Onkologjise mjekesore dhe rreth 140 pacient ne dite rrezatohen ne Sherbimin e Radioterapise, pra mbi 450 pacient ne total cdo trajtohen ne Kliniken e Onkologjise.”, ka thënë Kurtishi në një prononcim për IndeksOnline.

Kanceri mbetet një nga sfidat më të mëdha të sistemit shëndetësor në Kosovë, si për nga numri i rasteve të reja ashtu edhe për nga ngarkesa e vazhdueshme në trajtimin e pacientëve.

Sëmundjet malinje kërkojnë diagnostikim të hershëm dhe trajtim të specializuar, ndërsa institucionet shëndetësore po përballen me një fluks të lartë pacientësh që kërkojnë shërbime onkologjike gjatë gjithë vitit

Kryeministri i Hungarisë, Viktor Orban, ka njoftuar të mërkurën se vendi i tij do të ndalojë gradualisht furnizimin me gaz natyror drejt Ukrainës, duke ruajtur gazin e mbetur për përdorim të brendshëm.

Ky vendim ndërpret një nga rrugët kryesore të furnizimit me energji për Ukrainën dhe thellon tensionet mes Budapestit dhe Kievit lidhur me ndërprerjen e furnizimeve me naftë ruse.

“Ne do të ndalojmë gradualisht furnizimin me gaz natyror nga Hungaria drejt Ukrainës dhe do ta ruajmë gazin e mbetur në vend”, tha Orban në një video të publikuar në rrjetet sociale.

Ai shtoi: “Për sa kohë që Ukraina nuk furnizon me naftë, nuk do të marrë gaz nga Hungaria”.

Furnizimet me naftë ruse drejt Hungarisë dhe Sllovakisë janë ndërprerë prej gati dy muajsh, pas dëmtimeve që sulmet e dronëve rusë shkaktuan në tubacionin Druzhba, i cili kalon përmes territorit të Ukrainës. Liderët e Hungarisë dhe Sllovakisë, të cilët vazhdojnë të importojnë lëndë djegëse fosile ruse, kanë akuzuar Ukrainën për pengesë të qëllimshme të furnizimeve.

Zyrtarët ukrainas kanë theksuar se sulmet e vazhdueshme ruse e bëjnë të rrezikshme riparimin e tubacioneve për teknikët, ndërsa presidenti Volodymyr Zelensky ka deklaruar këtë muaj se heziton të lejojë vazhdimin e tranzitit të naftës ruse nëpër vendin e tij.

Ukraina importon një pjesë të madhe të nevojave të saj për gaz përmes Hungarisë, që vitin e kaluar përbënte rreth 45% të totalit të importeve, sipas kompanisë këshilluese ExPro. Kjo shifër ra në 38% deri në janar 2026.

Vendimi i Orbanit vjen si pjesë e një serie masash hakmarrëse ndaj Ukrainës, pas ndërprerjes së furnizimeve me naftë ruse. Javën e kaluar, ai bllokoi një kredi prej 90 miliardë eurosh të Bashkimit Evropian për Ukrainën dhe u zotua të vendosë veto ndaj çdo vendimi të mëtejshëm pro-Ukrainës derisa të rifillojnë furnizimet me naftë.

Më herët, lideri hungarez kishte ndalur edhe dërgesat e naftës dizel drejt Ukrainës dhe kishte vendosur veto ndaj një rundi të ri sanksionesh të BE-së kundër Rusisë.

Udhëheqësi i Koresë së Veriut, Kim Jong Un, ka përdorur luftën në Iran për të justifikuar mbajtjen e armëve bërthamore nga regjimi i tij.

Në një fjalim para Asamblesë Popullore të këtij vendi autoritar, Kim tha:

“Realiteti i sotëm tregon qartë legjitimitetin e zgjedhjes strategjike dhe vendimit tonë për të refuzuar fjalët e ëmbla të armiqve dhe për të siguruar përgjithmonë arsenalin tonë bërthamor.”

Ai shtoi se Korea e Veriut “nuk është më një vend nën kërcënim” sepse ka “fuqinë për të paraqitur kërcënim”.

“Qeveria jonë do të vazhdojë të konsolidojë me vendosmëri statusin e saj si fuqi bërthamore,” shtoi Kim.

Programi bërthamor i Koresë së Veriut ka qenë objekt i negociatave ndërkombëtare që prej vitit 2003, kur vendi deklaroi se posedonte armë bërthamore. Megjithatë, bisedat janë shembur përsëri dhe përsëri.