Author: G.O.

Presidenti i Serbisë, Aleksander Vuçiq, tha se nga 9 deri më 12 qershor do të zhvillojë bisedime me serbët në Kosovë, teksa protestuesit serbë në Leposaviq, Zubpin Potok dhe në Zveçan vazhdojnë të protestojnë kundër kryetarëve shqiptarë të dalë nga zgjedhjet e 23 prillit.

Gjatë një adresimi në Beograd, Vuçiq nuk la pa shfrytëzuar rastin për të manipuluar me opinionin se gjoja “protestuesit serbë po luftojnë për të drjetat e tyre”, ndërkohë që ishte vet ai që nxiti serbët të mos dalin në zgjedhjet e jashtëzakonshme komunale në veri të Kosovës.

Madje, ai ka akuzuar Kosovën duke pretenduar se përmes “provokimeve” po synon të zgjidhë problemet, kur dihet se ishin protestuesit serbë, policë e ushtarë të Serbisë e njerëz të BIA-s që sulmuan Policinë e Kosovës, KFOR-in dhe gazetarët në veri të Kosovës.

“Sa i përket Kosovës, mbrëmë patëm bisedime shumë komplekse dhe komplekse, duke vazhduar sot fola edhe me ndërmjetësuesin britanik për Ballkanin Perëndimor Stuart Peach, sot do të vazhdoj me serbët nga Kosova nga e premtja deri të dielën. Nesër kemi një ditë të tërë bisedimesh me presidenten e Indisë, një nder i madh për vendin tonë, pas zëvendës-presidentit të Indisë dhe kryeministrit të Indisë që vizitova në Gujarat dhe Ahmadabad, do të presim edhe presidenten e Indisë, dhe besoj se kjo do të kontribuojë në përmirësimin e mëtejshëm të marrëdhënieve tona dhe bashkëpunimit ekonomik dhe në forumet e mëdha të biznesit këto janë gjëra të rëndësishme. Dua të falënderoj njerëzit tanë në Kosovë që në mënyrë paqësore dhe dinjitoze po luftojnë për të drejta e veta, për t’u thënë se shteti i Serbisë është gjithmonë me ta dhe se është e rëndësishme që ta ruaj paqen dhe të tregojmë se mund të bisedojmë me të gjithë ndryshe nga disa që mendojnë se provokimet mund t’i zgjidhin problemet e tyre”, tha ai.

Ndërkaq për zgjedhjet në Serbi foli kryeministrja serbe Ana Brnabiq, e cila paralajmëroi se do të dorëhiqet.

Ajo ka shtuar se daljen nga kriza të cilën e ka kapluar Serbinë janë zgjedhjet paramentare deri në fund të vitit.

“Jam e gatshme në çdo moment të jap dorëheqjen nga posti i kryetarit të Qeverisë. Nderi më i lartë për mua ka qenë çdo gjë që kam kryer dhe që e kryej këtë detyrë, nderi më i madh, kënaqësia më e madhe, lumturia më e madhe që kam pasur mundësinë të punoj për vendin tim dhe të jap më të mirën. Por sigurisht në këtë moment, e dini kur shoqëria gjendet në një situatë të tillë në një krizë të tillë, mënyra e vetme në shoqëritë demokratike për ta zgjidhur janë bisedimet, fatkeqësisht ata bisedime nuk duan. Kështu që e përsëris edhe sot, jam gati dhe llogarisni që dorëheqjen time e keni në tavolinë, llogarisni në atë dorëheqje kjo hap hapësirë për disa diskutime teknike. Besoj dhe kam folur edhe me kryetarin e Partisë Progresive Serbe, Millosh Vuçeviq, si kryetar i partisë më të madhe në Serbi, besoj dalja nga kjo krizë janë zgjedhjet parlamentare deri në fund të vitit. Presidentit të republikës që përfundimisht të marrë një vendim të tillë, por në këtë kuptim ai mund të llogarisë në dorëheqjen time dhe pastaj do të vazhdojë, çfarëdo që të ndodhë”, ka thënë ajo.

Porse, ishte Vuçiq ai që tha se nuk do të ketë qeveri tranzitore në Serbi. Ai tha se kurrë nuk do ta marrë një vendim të tillë.

“Dhe nuk ka as bisedime dhe as negociata për këtë çështje”, ka thënë ai.

Presidenti i Ukrainës, Volodymyr Zelensky vizitoi rajonin e goditur nga përmbytjet Kherson-in, pas shkatërrimit të digës, Nova Kakhovka.

Ai ka potencuar në Telegram se zyrtarët diskutuan situatën operacionale në rajon, duke përfshirë evakuimin e njerëzve nga zonat e mundshme të përmbytjeve dhe ofrimin e mbështetjes për zonat tashmë të përmbytura.

Zelensky u shpreh gjithashtu se zyrtarët diskutuan “perspektivat për rivendosjen e ekosistemit të rajonit dhe situatën ushtarake operacionale në zonën e fatkeqësive të shkaktuara nga njeriu”, shkruan BBC, përcjell KosovaPress

“Është e rëndësishme të llogaritet dëmi dhe të ndahen fonde për të kompensuar banorët e prekur nga fatkeqësia dhe të zhvillohet një program për të kompensuar humbjet ose për të zhvendosur bizneset brenda rajonit Kherson”, ka shkruar ai.

Të paktën 600 kilometra katrorë (232 milje katrorë) të rajonit jugor, Kherson të Ukrainës janë përmbytur pas shembjes së digës Nova Kakhovka të martën, sipas një komandanti ushtarak rajonal.

Ujërat e përmbytjeve janë rritur në një nivel mesatar prej 5.61 metrash, është shprehur Oleksandr Prokudin, kreu i administratës ushtarake rajonale Kherson, në një deklaratë në Telegram.

Shembja e digës dhe hidrocentralit ka dërguar rrëke uji që derdhen poshtë lumit Dnipro, shkruan CNN.

Gati 2 mijë njerëz tani janë evakuuar nga “zona e rrezikut”.

Në Kuvendin e Kosovës ka nisur shqyrtimi i parë i Projektligjit për Zgjedhjet e Përgjithshme në Republikën e Kosovës, i cili para deputetëve të Kosovës është prezantuar si një ligj i ri dhe për të cilin grupet parlamentare kanë pas konsensus gjatë hartimit.

Ky projektligj ka sjell si risi mundësinë e votimit për mërgatën e cila do të mund të votojë edhe në ambasadat e Kosovës në vendet ku jetojnë, por edhe është rritur vota preferenciale për kandidatë, nga 5 në 10.

Në emër të përfaqësuesit të kësaj nisme legjislative, Abelard Tahiri, u shpreh se për këtë projektligj ka pasur një konsensus politik.

Ky projektligj ka gjithsej 130 nene dhe prej tyre 91 janë rishkruar.

“Pra, bashkërisht gjatë kësaj periudhe kemi arritur me ndërtuar një konsensus, frymë politike jashtëzakonisht të rëndësishme në mënyrë që të gjitha këto propozime që janë para jush janë si propozim i këtij Komisioni Ad-hock për trajtimin e reformës zgjedhore dhe assesi si propozime të ndara të grupeve parlamentare… Nga këto 130 nene, 91 janë hartuar dhe rishkruar komplet, ndërsa pjesa tjetër ka pas intervenime. Pra, sot nuk është plotësim-ndryshimi i ligjit për zgjedhjet nacionale, por është miratimi i një ligji të ri për zgjedhjet nacionale. Ky projektligj po ashtu përbëhet nga 21 kapituj. Si Komision punë e kemi ndarë në dy faza….Nga BE kemi marr rreth 40 rekomandime të cilat lidhet kryekëput me ligjin për zgjedhjet nacionale dhe jemi të lumtur që kemi arritur këto rekomandime t’i nënshtrojmë në normale ligjore”, tha ai.

Po ashtu, mërgata mund të votoj edhe përmes fahut postar që KQZ do ta hap në vendet ku jetojnë ata, por edhe përmes dërgimit të votës në Kosovë.

“ Tashmë diaspora do të ketë mundësinë të votoj në tri mënyra,. Pra, përmes këtij ligji diaspora do të ketë mundësi edhe fizikisht në ambasadat e përfaqësitë diplomatike të vendit tonë kudo që i kemi të hapura. Ky është një hap i madh jashtëzakonisht i rëndësishëm i cili që padyshim e forcon lidhjen tonë si shtet me mërgatën tonë të fuqishme….Që për herë të parë u kemi lejuar dhe mundësuar KQZ që të hap fahun postal edhe jashtë Kosovës pra kryesisht në vendet ku janë të përqendruar në diaspor. Pra qytetarët në diasporë do ta kenë mundësinë që mos të shpenzojnë shumë marramendëse për dërgimin e votës në Kosovës sepse tashmë me këtë ligj KQZ u ka mundësuar këtyre ta votën në vendet e BE aty ku do të hapet fahu postal nga KQZ. Forma e tretë është ajo e vjetra që qytetarët tanë të mërgatës mund ta dërgojnë votën e tyre edhe në Republikën e Kosovës”, tha ai.

Përmes projektligjit të rido të mund të votohet për 10 kandidatë dhe votat e kandidatëve do të numërohen në qendrat komunale të votimit.

“Vota preferenciale, pra tash e tutje me këtë projektligj vota preferenciale nuk do të jetë më 5 siç ka qenë në 10 vitet e fundit por do të jetë 10, pra 110 kandidatë sa janë në listë të propozuar nga partitë politike qytetarët do të kenë një mundësi ta bëjnë një përzgjedhje më të madhe pra numri i tyre do të shkoj në 10…për herë të parë përmes këtij ligji kemi mundësuar që votat e kandidatëve do të numërohen në qendra komunale në ditën e nesërme dhe në ditën e votimit do të nxirren rezultati përfundimtar për partitë politike ndërsa të njëjta vota do të barten në qendra komunale ku do të filloj numërimi për kandidat. Mendoj se kjo do ta përshpejtoj procesin dhe do ta ul numrin e ankesave”, theksoi deputeti Tahiri.

Në kuadër të këtij projektligji për zgjedhjet nacionale, PZAP do të jetë në kuadër të KGJK-së.

Në seancën ku po shqyrtohet në lexim të parë Projektligjit për zgjedhjet e përgjithshme në Republikën e Kosovës janë të pranishëm edhe përfaqësues nga Zyra e Bashkimit Evropian dhe Ambasada Amerikane të cilët kanë ndihmuar ligjvënësit e Kosovës për hartimin e këtij projektligji.

“Mënyra më e përshtatshme që një qeveri mund të shprehë falënderimet e saj ndaj një organizate të huaj ndihmëse është t’ia dëshmojë asaj se nuk është më e nevojshme. Dhe gjithashtu, komplimenti më i lartë që mund t’i bëj ambasadorit Wigemark, teksa mbylli tri vjet e gjysmë shërbim të shquar, është se nën udhëheqjen e tij, Misioni i Bashkimit Evropian për Sundimin e Ligjit është bërë, në pjesën më të madhe, më shumë e panevojshme se kurrë më parë”,kështu u shpreh Kryeministri i Kosovës, Albin Kurti, mbrëmë në pritjen lamtumirëse për nder të shefit të EULEX-it, z. Lars Gunnar Wigermark, në përfundim të mandatit të tij.

Duke shprehur mirënjohje të thellë për punën e tij në krye të kësaj organizate, kryeministri tha se qëllimi përfundimtar i institucioneve të huaja të ndihmës nuk është të qëndrojnë përgjithmonë në vendet që ata ndihmojnë. Përkundrazi, është për t’i përgatitur ato vende që të qëndrojnë në këmbët e tyre.

Sipas kryeministrit Kurti, sundimi i ligjit në Kosovë nuk ka qenë kurrë më i fortë dhe se Kosova ka bërë përparim të dukshëm në këtë fushë, veçanërisht në dy vitet e fundit.

Megjithatë, kryeministri Kurti e veçoi rëndësinë e EULEX-it dhe praninë e tij në javët e fundit në Mitrovicën e veriut, ku sundimi i ligjit ende nuk është vendosur plotësisht. Ai falënderoi gratë dhe djemtë e guximshëm të EULEX-it për shërbimin e tyre, së bashku me Policinë e Kosovës dhe paqeruajtësit e KFOR-it, për të ndihmuar në ruajtjen e rendit dhe ligjit kundër milicisë së dhunshme dhe grupeve kriminale të nxitura dhe sponsorizuara nga Beogradi.

Kryeministri përmbylli fjalën e tij duke ngritur një dolli për ambasadorin Wigemark për gjithçka që ai ka bërë për vendin tonë dhe popullin tonë, duke shpresuar që Ambasadori Lars, të vijë e ta vizitojë Kosovën sa më shpejtë dhe aq shpesh sa e lejojnë angazhimet e tij të ardhshme.

Gjykata Themelore në Prishtinë, ka shpallur aktgjykim dënues ndaj të akuzuarit Besnik Bedrolli, duke e dënuar me dënim unik prej 11 vjet burgim lidhur me akuzën se në shkurt të vitit 2015, në restorantin “Agoni” në fshatin Banullë të Lipjanit, ka privuar nga jeta tani të ndjerin U.D. Kurse, të akuzuarin Bajram Bedrolli, gjykata e liroi nga akuza.

Aktgjykimin ndaj dy të akuzuarve u shpall të enjten, nga kryetari i trupit gjykues Ngadhnjim Arrni, raporton “Betimi për Drejtësi”.

Sipas aktgjykimit, i akuzuari Besnik Bedrolli shpallet fajtor dhe nga provat e administruara në këtë shqyrtim gjyqësor dhe vërejtjet në dy vendimet paraprake të Gjykatës së Apelit, ka nxjerrë përfundimin se për veprën penale nga dispozitivi 1, dënohet me burgim në kohëzgjatje prej 10 vitesh. Kurse, për veprën penale nga dispozitivi 2 të armëmbajtjes pa leje, dënohet me burgim në kohëzgjatje prej 1 vit e 4 muaj.

Ndaj të akuzuarit Besnik Bedrolli, gjykata shpalli dënim unik me burgim në kohëzgjatje prej 11 vitesh, i cili dënim do të ekzekutohet në afat prej15 ditëve pas plotfuqishmërisë së aktgjykimit.

Të njëjtit do t’i llogaritet koha e kaluar në paraburgim nga 15 shkurti 2015.

Po ashtu, gjykata konfiskon armën (pistoletën), me të cilën është kryer vepra penale.

I akuzuari Besnik, obligohet që në emër të shpenzimeve të procedurës, të paguajë paushallin gjyqësor në shumën prej 200 eurove, ndërsa për kompensimin e viktimave të krimit, shumën 50 euro, të gjitha këto në afat prej 15 ditësh pas plotfuqishmërisë së këtij aktgjykimi.

Sa i përket të akuzuarit Bajram Bedrolli, nga provat e administruara gjatë shqyrtimit gjyqësor dhe vërejtjet dhe konkludimet e Gjykatës së Apelit, gjykata nuk ka vërtetuar se i njëjti dhënë kontribut në kryerjen e vrasjes së tani të ndjerit. Andaj, të njëjtin përkitazi me këto veprime e liron nga akuza.

Po ashtu, gjykata nuk ka arritur të vërtetojë me asnjë provë se i akuzuari ka kryer veprën penale të “Mbajtjes në kontroll ose posedim të paautorizuar të armëve”.

Kurse, sa i përket veprimeve të tani të akuzuarve Bajram dhe Bedri Bedrolli, në drejtim të lëndimeve të lehta trupore të shkaktuara ndaj të dëmtuarve Eroll Qyqalla dhe Skender Ademi, gjykata konstaton se tani këto veprime inkriminuese janë parashkruar.

Të dëmtuarit lidhur me kërkesën pasurore-juridike, udhëzohen në kontest të rregullt juridiko-civil.

Ndryshe, për këtë rast është vendosur dy herë, herën e parë Gjykata Themelore në Prishtinë më 27 nëntor 2018, të akuzuarin Besnik Bedrolli, për vrasje të rëndë e kishte dënuar me 14 vjet e 6 muaj burgim, ndërsa për armëmbajtje pa leje, me 1 vit burgim. Ndaj tij, gjykata kishte shqiptuar dënim unik prej 15 vjet burgim efektiv.

Ndërsa, i akuzuari Bajram Bedrolli, për ndihmë në kryerjen e veprës penale “Vrasje e rëndë”, ishte dënuar me 9 vite e 6 muaj burgim, kurse për armëmbajtje pa leje ishte dënuar me 1 vit burgim, mirëpo ndaj tij kjo gjykatë kishte shqiptuar dënimin unik prej 10 vite burgim.

Mirëpo, Gjykata e Apelit këtë rast e kishte kthyer në rigjykim, duke anuluar aktgjykimin e shkallës së parë.

Pas kthimit në rigjykim, Gjykata Themelore në Prishtinë më 24 korrik 2020 të akuzuarin Besnik Bedrolli për veprën penale “Vrasje e rëndë” e kishte dënuar me 11 vjet burgim, ndërsa për veprën penale të “Armëmbajtjes pa leje” me një vit e gjysmë burgim. Të njëjtit, gjykata i ka shqiptuar dënim unik me burgim në kohëzgjatje prej 12 vitesh.

Për të akuzuarin Bajram Bedrolli, gjykata ka bërë ricilësimin e veprës penale nga “Vrasje e rëndë” të kryer në bashkëkryerje, në veprën penale “Lëndim i lehtë trupor”, në dëm të të dëmtuarve Eroll Qyqalla dhe Skender Ademi.

“Nuk kemi gjetur që Bajram Bedrolli ka kryer veprën penale të vrasjes së rëndë nga neni 179, paragrafi 1 lidhur me paragrafin 1.5 të KPRK-së, në bashkëkryerje, nga neni 31. Në vështrim të nenit 360, gjykata ka gjetur se i njëjti ka kryer veprën penale “Lëndim i lehtë trupor”, nga neni 188, paragrafi 2 të KPRK-së, në dëm të të dëmtuarve Eroll Qyqalla dhe Skender Ademi”, kishte thënë gjykatësja Krasniqi- Jashanica.

Të akuzuarit Bajram Bedrolli, për kryerjen e veprës penale “Lëndim i lehtë trupor”, nga neni 188, paragrafi 2 të KPRK-së, i ishte shqiptuar dënim me burgim në kohëzgjatje prej 2 vite e 10 muaj. Pas ankesës së ushtruar nga Prokuroria Themelore në Prishtinë, Gjykata e Apelit me aktvendimin e 11 marsit 2021, e ka anuluar vendimin e shkallës së parë dhe lëndën e ka kthyer në rigjykim.

Këtë vendim, Apeli e ka marrë me arsyetimin se vendimi i shkallës së parë është i përfshirë në shkelje esenciale të dispozitave të procedurës, i njëjti nuk është i përpiluar në pajtim me dispozitat e nenit 370, par. 7 të KPPK-së, si dhe për shkak të vërtetimit të gabuar dhe jo të plotë të gjendjes faktike.

Ndryshe, sipas aktakuzës së ngritur më 12 tetor 2015, pretendohet se Besnik Bedrolli dhe Bajram Bedrolli, më 14 shkurt 2015, në restorantin “Agoni” në fshatin Banullë të Lipjanit pas një mosmarrëveshje mes tyre, në bashkëkryerje e kanë privuar nga jeta tani të ndjerin U. D.

Sipas aktakuzës, të njëjtit fillimisht ishin fjalosur e pastaj e kishin sulmuar tani të ndjerin D. dhe të dëmtuarit Eroll Qyqalla dhe Skënder Ademi me mjete të forta, i ndjeri e kishte përdorur armën e tij për ta evituar sulmin, mirëpo i pandehuri Besnik Bedrolli, me revolen e tij në afërsi rreth një metër ka shtënë në drejtim të D. katër herë dhe nga plagët e marra, ai ka vdekur në vendin e ngjarjes, ndërsa të pandehurit kishin ikur nga vendi i ngjarjes.

Me këto veprime, prokuroria i ngarkonte të akuzuarit me veprën penale të “Vrasjes së rëndë” nga neni 179 i Kodit Penal dhe për “Mbajtja në pronësi, kontroll ose posedim të paautorizuar të armëve” nga neni 374 i Kodit Penal.

Pas 30 minuta vonesë, në Kuvendin e Kosovës ka nisur seanca plenare në të cilën pritet të shqyrtohet vetëm Projektligji për zgjedhjet e përgjithshme në Republikën e Kosovës.

Pas kësaj seance, do të vazhdojë seanca e radhës e cila në rend dite ka gjithsej 22 pika, ndër to edhe 5 marrëveshje ndërkombëtare për të cilat nevojiten dy të tretat e votave të deputetëve.

Po ashtu, në seancën e dytë të Kuvendit të Kosovës do të shqyrtohen edhe projekt Deklarata për antisemitizmin, shqyrtimi i kërkesës së Komisionit Ad-Hoc për Zhvillimin e Procesit të Vlerësimit Kalimtar, për zgjatjen e mandatit, votimi për emërimin e drejtorit dhe zëvendësdrejtorit të Sekretariatit Ekzekutiv të Agjencisë për Krahasim dhe Verifikim të Pronës, votimi në parim i Projektligjit nr.08/L-212 për shëndet riprodhues dhe fertilizim të asistuar mjekësor, shqyrtimi i dytë i Projektligjit nr.08/L-192 për ndryshimin dhe plotësimin e Ligjit nr.06/L-034 për Mbrojtjen e Konsumatorit, shqyrtimi i dytë i Projektligjit nr.08/L-176 për ndryshimin dhe plotësimin e ligjeve që përmbajnë procedura të veçanta administrative dhe harmonizimin e tyre me Ligjin nr. 05/L-031 për procedurën e përgjithshme administrative.

Kuvendi i Kosovës edhe gjatë ditës së djeshme ka mbajtur seancë plenare në të cilën janë shqyrtuar pikat e papërfunduara nga seancat e muajit shkurt, mars, prill e maj.