Author: G.O.

Policia e Danimarkës është duke shtrënguar kontrollet kufitare pas djegieve të fundit të Kuranit, të cilat kanë ndikuar në situatën e sigurisë, ka thënë Ministria e Drejtësisë në këtë shtet.

Vendim të ngjashëm ka marrë edhe Suedia më herët gjatë javës.

Aktivistët kundër-islamit në Danimarkë dhe Suedi i kanë dëmtuar dhe djegur disa kopje të Kuranit – libër i shenjtë për myslimanët – dhe diçka e tillë e ka zemëruar botën myslimane dhe janë rritur kërkesat që qeveritë t’i ndalojnë këto veprime.

“Autoritetet besojnë se është e nevojshme në këtë kohë që ta rrisim fokusin se kush hyn në Danimarkë, në mënyrë që t’iu përgjigjemi kërcënimeve specifike”, ka thënë Ministria e Danimarkës përmes një deklarate.

Kontrollet më të ashpra kufitare do të zbatohen fillimisht deri më 10 gusht.

“Djegiet e fundit të Kuranit, siç kanë thënë edhe zyrtarët e sigurisë, kanë ndikuar në situatën aktuale të sigurisë”, ka thënë ministri i Drejtësisë, Peter Hummelgaard, përmes një deklarate.

Si Danimarka, ashtu edhe Suedia, i kanë dënuar aktet e djegies së Kuranit dhe kanë thënë se janë duke shqyrtuar mundësinë e hartimit të ligjeve të reja që do të ndalonin diçka të tillë.

Mirëpo, kritikët kanë thënë se vendime të tilla e rrezikojnë lirinë e shprehjes, që u garantohet qytetarëve me kushtetutë.

Myslimanët e konsiderojnë Kuranin si fjalë të Zotit dhe dëmtimi i qëllimshëm i librit është shumë ofendues për ta.

Sot do të hapet konkursi për 27 inspektorë të rinj të tregut. Lajmin e ka bërë të ditur kryeministri Albin Kurti, i cili I ka ftuar të interesuarit me kualifikimet e nevojshme që të aplikojnë.

Kurti ka thënë se deri tani kanë qenë 15 inspektorë të tregut dhe me këtë konkurs ky numër do të shkojë në 42.

“15 ka qenë numri i inspektorëve deri të tani. Me thirrjen që po e hapim sot, këtë numër po e ngrisim në 42, duke e rritur për gati 3-fish ose 180% numrin e përgjithshëm të inspektorëve të tregut. Angazhimi në fushën e inspektimit bartë përgjegjësi të lartë dhe kontribut të veçantë për vendin, prandaj i inkurajojmë të gjithë të interesuarit me kualifikimet e nevojshme që të aplikojnë”, ka shkruar Kurti.

Kërkesat e përgjithshme për pranim:

-Të jetë shtetas i Republikës së Kosovës;

-Të ketë zotësi të plotë për të vepruar;

-Të zotërojë njërën nga gjuhët zyrtare, në pajtim me Ligjin për Gjuhët;

-Të jetë i aftë në pikëpamje shëndetësore për të kryer detyrën përkatëse;

-Të mos jetë i dënuar me vendim të formës së prerë për kryerjen e një vepre penale me dashje;

-Të mos ketë në fuqi një masë disiplinore për largim nga një pozitë e zyrtarit publik, të pushuar sipas këtij ligji.

Kërkesat e përgjithshme formale

-Arsimimi i kërkuar: Diplomë/a e arsimit të lartë më së paku 3 vite të studimeve në fushat: Arsim i larte i paspecifikuar.

-Kualifikime të posaçme formale:

-Përvoja e punës e kërkuar: Së paku dy (2) vite përvojë pune profesionale në fushën për të cilën

zhvillohet procedura për plotësimin e pozitës së lirë të punës.

Kërkesat (Njohuri, Aftësi dhe Cilësi) e përgjithshme të nevojshme

-Njohuri të thella dhe të specializuara në fushën profesionale specifike;

– Nivel të lartë të njohurive profesionale ose teknike të fushës përkatëse dhe të kuptuarit e fushave që

ndërlidhen me detyrat dhe përgjegjësitë;

-Njohuri të gjëra të fushës, të metodave kërkimore, që ndihmojnë në përgatitjen e raporteve bazike ose analitike;

– Aftësi të arsyetimit logjik dhe analizës;

-Aftësi për të bërë gjykime profesionale të pavarura dhe për të ushtruar diskrecion mbi çështjet dhe

për të dhënë një kontribut të rëndësishëm në zhvillimin dhe zbatimin e politikave;

– Shkathtësi hulumtuese, analitike, vlerësuese dhe formulim të rekomandimeve dhe këshillave profesionale;

-Aftësi komunikimi dhe ndikim personal, përfshirë aftësi për të përfaqësuar.

Partia Demokratike e Kosovës (PDK) dhe Lidhja Demokratike e Kosovës (LDK), kanë thirrur konferencë për media për ditën e sotme. Njëra e mban konferencën në ora 10:30, ndërsa tjetra në ora 14:00.

Në një njoftim për media, PDK ka njoftuar se sot mban konferencë për media në selinë qendrore të partisë.

Konferenca fillon nga ora 14:00.

Konferencë ka thirrur edhe LDK, në selinë qendrore të saj.

LDK ka bërë të ditur se kjo konferencë fillon në ora 10:30.

Në njoftimin për media, asnjë parti opozitare nuk ka njoftuar se për çfarë është thirrur kjo konferencë.

Mërgimtarët janë duke pritur deri në dy orë te pikëkalimi kufitar Merdarë për të dalë nga Kosova.

Ndërsa për të hyrë te kjo pikë kufitare, pritjet zgjasin deri në një orë e gjysmë.

Pritje ka edhe në pikën kufitare te Dheu i Bardhë.

Mërgimtarët janë duke pritur deri në 50 minuta për të hyrë në Kosovë, ndërsa për të dalë ata po presin deri në një orë e gjysmë.

Në të gjitha pikat e tjera kufitare, pritjet maksimale për të hyrë në Kosovë janë 5 minuta, aq sa janë edhe pritjet për të dalë nga Kosova.

Një grua ka vdekur, pasi dyshohet se ka rënë nga lartësia e një objekti në Prishtinë.

“Prishtinë 03.08.2023 – 20:34. Është raportuar se viktima femër kosovare ka rene nga lartësia e njeh objekti dhe si pasojë e plagëve te marra ka ndërruar jete”, thuhet në raportin 24-orësh të Policisë.

Tutje, Policia njoftoi se me vendim të prokurorit trupi i pa jetë i viktimës është dërguar në Institutin e Mjekësisë Ligjore, për obduksion.

Një pushues nga Kosova është therur me thikë mbrëmjen e të enjtes në Kune të Shëngjinit.

Ngjarja ndodhi pas një sherri mes dy personave, të dy nga Kosova, për shkaqe dhe në rrethana momentalisht të paqarta.

I plagosuri, i identifikuar si Selim Bllaca, 59-vjeç, është dërguar në spitalin e Lezhës për ndihmë mjekësore.

Ai raportohet se për shkak gjendjes të rëndë shëndetësore është nisur drejt spitalit të Traumës në Tiranë.

Ndërsa policia njofton se është arretuar edhe një 66 vjecar, si i dyshuar për therjen e 59 vjecarit.

Të njëjtit iu është sekuestruar në cilësimë e provës materiale, arma e ftohtë – thikë.

Kolektivi për mendim dhe veprim feminist ka bërë thirrje për protestë, në seancën përfundimtare për rastin e vrasjes të Marigona Osmanit, akt të cilin e kreu i dashuri i saj, Dardan Krivaqa, i shoqëruar nga shoku i tij, Arbër Sejdiu.

Me këtë veprim synohet që të sigurohet drejtësia duke i dhënë të akuzuarve ndëshkimin maksimal.

“Për t’u siguruar që kërkesa jonë për drejtësi të jehojë edhe sot ditw e premte para Gjykatës Themelore në Ferizaj, ne mblidhemi nga ora 10:30 para dyerve të Gjykatës, për të kërkuar drejtësi për Marigonën dhe ndëshkim maksimal për vrasësit”. – thuhet në njoftim.

Vrasja e Marigona Osmanit ndodhi në gusht të vitit 2021, ndërsa aktgjykimi do të shpallet sot nga ora 11:00.

LEXONI EDHE:

Vrasja e Marigona Osmanit, sot merret vendimi për Krivaqën dhe Sejdiun