Author: G.O.

Lajme pozitive se Ukraina mund ta njohë pavarësinë e Kosovës, kanë ardhur ditëve të fundit nga Kievi. Ligjvënësit ukrainas janë pro njohjes së Kosovës.

Mes tyre kreu i Komisionit për politikë të jashtme të Ukrainës a Oleksandr Merezhko, tha për RTK-në se vendimi final i takon presidentit Volodymyr Zelensky.

“Para se të marrim një vendim të tillë duhet të peshojmë pluset dhe minuset për t’i marrë në konsideratë dhe pasojat politike. Por, vendimi përfundimtar i takon vetëm presidentit, jo parlamentit. Ne deputetët nuk vendosim për këtë çështje, megjithatë, ne përfaqësojmë popullin, ne kemi zërin e popullit të Ukrainës, dhe njerëzit në Ukrainë e shohin shumë qartë se Kosova është në anën e Ukrainës dhe për Serbinë ju e dini se Serbia nuk ka vendosur sanksione kundër Rusisë. Në Serbi shohim simpati ndaj Rusisë. Në Serbi, për fat të keq, shohim një zhvillim të marrëdhënieve me Rusinë, i cili është shqetësues për ne, dhe sigurisht që ka ndikim tek votuesit tanë”, ka deklaruar deputeti Merezhko.

Se a do të ndodhë njohja nga Ukraina pas përfundimit të luftës atje, Merezhko derisa thotë se është vështirë të pretendohet qysh tani, megjithatë shprehet optimist se kjo mund të ndodhë.

“Shumë çështje që duken problematike ose të diskutueshme në Ukrainë, priren të shtyhen deri në fund të luftës. Tani ne jemi të shqetësuar për mbijetesën tonë, po luftojmë kundër një armiku shumë të fuqishëm dhe për këtë arsye, ne priremi të shtyjmë disa çështje të vështira dhe të ndërlikuara, por në të njëjtën kohë e shohim, përsëri po flas nga një këndvështrim politik këtu, ne mund të shohim se aleatët tanë që na ndihmuan për të mbijetuar, ata e mbështesin Kosovën, ata tashmë e kanë njohur Kosovën dhe është një nga argumentet në favor të njohjes. Por, një çështje tjetër, shumë do të varet nga politika e Bashkimit Evropian. Ukraina është një kandidate për t’u anëtarësuar në BE, po ashtu, ne duhet të koordinojmë politikën e jashtme me BE-në. Shumë do të varet nga qëndrimi i BE-së në lidhje me Kosovën”, deklaroi ai.

Për njohjen e pavarësisë së Kosovës po punojnë edhe gazetarët ukrainas në Kosovë.

Gazetarja Lyudmila Makey, tha se populli dhe politikanët në Ukrainë janë të interesuar të mësojnë më shumë për Kosovën pasi që sipas saj Serbia kishte bërë shumë propagandë.

“Para se të vinim në Kosovë kemi pasur një vakuum, kemi pasur shumë pak informata, ka qenë e mbuluar e gjitha me filtrim të Serbisë. Qytetarët ukrainas kanë shumë interes për Kosovën dhe kur postojë materiale për Kosovën kam parë se ka shumë interesim që Ukraina ta njohë Kosovën. Materialet tona lexohen edhe nga politikanët në Ukrainë, të cilët kanë shumë interesim për këtë shtet dhe në njëfarë forme ne ua hapim sytë për çka ndodhë dhe çka është Kosova. Para një jave kemi pasur bashkëbisedim me një profesor shumë të njohur nga Kievi, që i ka vlerësuar materialet tona nga Kosova dhe këto materiale u shpërndanë në media shumë të njohura atje. Ai është i bindur që Ukraina do ta njohë Kosovën, menjëherë pas luftës”, tha Makey, gazetare nga Ukraina, në Kosovë

Ndërkaq, kryeministri I Kosovës, Albin Kurti në fjalën e tij para kabinetit qeveritar tha se Ukraina është përfshirë në letrën që mbi 50 deputetë ia dërguan kryediplomatëve të BE-së, SHBA-së dhe Mbretërisë së Bashkuar, duke kërkuar qasje më të ekuilibruar dhe më proporcionale të bashkësisë ndërkombëtare me Kosovën dhe Serbinë”.

Edhe ambasadori i Ukrainës në Beograd, Volodymyr Tolkach, një ditë më parë tha se gjithnjë e më shumë në Ukrianë po rriten zërat për njohjen e pavarësisë së Kosovës, dhe se disa deputetë të Parlamentit të Ukrainës po e përkrahin qëndrimin për njohjen e mundshme të Kosovës.

Ai po ashtu e pranoi se kjo nuk është befasi pasi që lidershipi i Kosovës “ka marrë qëndrim të qartë për dënimin e agresionit rus ndaj Ukrainës, posaçërisht duke e sanksionuar agresorin”.

Deputeti gjerman nga CDU, Knut Abraham, e ka mbështetur letrën e ligjvënësve evropianë e amerikanë, dërguar Shteteve të Bashkuara, Bashkimit Evropian dhe Britanisë së Madhe, ku kërkohet ndryshim i qasjes në raport me Kosovën dhe Serbinë.

Ai ka thënë se kjo është një nismë shumë e mirë dhe në kohë.

Abraham e ka shpërndarë shkrimin e deputetes britanike, Alicia Kearns, derisa ka shkruar se “kjo letër e ka mbështetjen time të plotë”.

Të hënën, për letrën e dërguar te sekretari amerikan i Shtetit, shefi i diplomacisë së BE-së, dhe sekretari i Jashtëm britanik, kishte shkruar deputetja në Londër, Alicia Kearns.

Letra ishte nënshkruar nga deputetë dhe kryetarë të komiteteve për punë të jashtme.

Senatori amerikan, Jack Reed, i cili po qëndron në Kosovë për vizitë zyrtare sot ka shkuar në një vizitë te komandanti i KFOR-it, Angelo Michele Ristuccia.

Për këtë vizitë ka njoftuar KFOR në Tëitter, duke thënë se në takim Ristuccia e ka informuar senatorin për situatën në rajon.

“Senatori i Shteteve të Bashkuara për Rhode Island Senatori Jack Reed i bëri një vizitë te komandanti i KFOR-it, në Camp Film City në Prishtinë. Gjatë takimit gjenerali Ristuccia e informoi mysafirin e nderuar për situatën e përgjithshme në terren dhe aktivitetet e KFOR-it”.

Gjatë vizitës së djeshme që pati në Kosovë, senatori amerikan Jack Reed, ka thënë se mbështetja e SHBA-së ndaj Kosovës në vitin 1999 për çlirim dhe pavarësim, ka qenë një nga veprimet më të çmueshme të Shteteve të Bashkuara të Amerikës. Ai i bëri këto komente gjatë takimit me kryeministrin Albin Kurti.

Reed është takuar edhe me presidenten Vjosa Osmani, e cila e ka kërkuar ndihmën e Shteteve të Bashkuara për përshpejtimin e procesit të anëtarësimit të Kosovës në Organizatën e Traktatit të Atlantikut Verior (NATO).

Lokali “Bon Vivant”, në të cilin javën e kaluar si pasojë e plagosjes, ka ndërruar jetë një person, ka dalë sot me reagim.

Në njoftim është potencuar se janë të tronditur nga ngjarja tragjike që ka ndodhur në “Bon Vivant” dhe se janë thellësisht të pikëlluar dhe të shqetësuar që kjo ka sjellë humbje jete, lëndime dhe trauma ndaj njerëzve.

“Shprehim ngushëllimet tona më të sinqerta për këtë ngjarje të trishtë. Me një thirrje të fuqishme, i drejtohemi sipërmarrësve, stafit dhe çdo qytetari: dhuna dhe krimi nuk kanë qenë dhe as nuk duhet të jenë modeli i jetesës në Prishtinë ose kudo në Kosovë. BonVivant, një vend si shumë të tjerë në kryeqytet dhe në gjithë Kosovën, ka 40 puntorë në stafin e tij, të cilët janë të përkushtuar për të promovuar kulturën e civilizuar, ku njerëzit vijnë jo për të takuar dhe përballuar me të panjohurën e frikshme, por për të argëtuar dhe për të shijuar përparësitë e një jete kulturore të mirëfilltë, ku hapësirat, muzika, shërbimi dhe produktet krijojnë mundësi për ndërveprim dhe harmoni. Kohët e fundit, dhe veçanërisht këto ditë, po shohim një përshkallëzim të dhunës që po prek çdo sferë të jetës, pa dallim moshë dhe vendndodhje. Kjo po ndodh në lokale, në rrugë, në trafik, praktikisht kudo.”, është bërë e ditur nga faqja zyrtare e lokalit “Bon Vivant” në facebook.

Po ashtu, është theksuar se “Bon Vivant” do të nisë fazën e parë të fushatës kundër dhunës “Bon Vive”.

“BonVivant ka ndjekur me vëmendje debatin dhe kritikat publike, që në disa raste kanë ofruar reagime të shpejta dhe radikale për zgjidhjen e kësaj situate. Në disa raste, kritika është shndërruar në një lojë ku fajësia shpërndahet pa ndonjë qëllim konstruktiv. Ky lloj reagimi nuk sjell zgjidhje dhe kulturë të qëndrueshme. Ne duam të ndryshojmë këtë model dhe të krijojmë një jetë të pasur dhe të diversifikuar kulturore në Prishtinë.

Të dashur lexues, klientë dhe bashkëqytetarë, Me qëllim që të mos qëndrojmë pasivë ndaj kësaj situate dhe të mos jemi indiferent ndaj atyre që e shohin të panjohurën në lokale, rrugë dhe sheshe si diçka të frikshme dhe kriminale, BonVivant do të nisë fazën e parë të fushatës kundër dhunës, “Bon Vive”.”, ësht% bërë e ditur tutje.

Në thelb të fushatës “Bon Vive”, sipas njoftimit, do të jenë tri veprime të CSR (Corporate Social Responsibility) të BonVivant, si një pjesë e pandarë e identitetit të kulturës dhe jetës civile në kryeqytet.

“* Do të krijojë një fond donacioni, i cili do të mbushet me një pjesë të fitimit të disa produkteve dhe shërbimeve, si dhe nga kontributet e klientëve. Lokalet të tjera të gastronomisë në Prishtinë që kanë vullnet dhe besim do të inkurajohen të bashkohen me këtë fond.

* Një ditë të caktuar në vit, BonVivant do të ofrojë falas një program të pasur për një numër të kufizuar të studentëve nga Shkolla e Mesme e Kryeqytetit, të cilët kanë treguar sjellje të mirë dhe arritje të shkëlqyera.

* Do të inkurajojë Shoqatat Joqeveritare të Rinjëve që të menaxhojnë fondin donacioni, me synimin që të ardhurat të shkojnë tek ata që japin shembull të tolerancës dhe kundër-dhunës.

Për fund, dikur në kryeqytetin tonë, si dhe në shumë qytete të Evropës, kafeteritë, restorantet ishin vende ku njerëzit komunikonin lirisht me të njohurit dhe të panjohurit, duke ndarë mendime dhe krijuar mundësi të reja. E panjohura nuk ishte sinonim i dhunës dhe frikës.Prandaj, BonVivant do të vazhdojë të promovojë një kulturë ku njerëzit mblidhen për të shijuar jetën dhe për të pasur një eksperiencë të mirëfilltë gastronomike . BonVivant, së bashku me shumë lokale të tjera të gastronomisë, kanë bërë Prishtinën një destinacion tërheqës për qytetarët nga e gjithë Kosova dhe për vizitorët nga jashtë, pa dallime. E panjohura nuk duhet të përshkruhet si frikësuese në Prishtinë dhe në Kosovë nuk do të jetë kurrë!”, është bërë e ditur tutje nga lokali “Bon Vivant”.

Ndryshe, një person ka vdekur sot si pasojë e plagosjes të premten (4 gusht) në lokalin “Bon Vivant” në Prishtinë. Sipas Policisë, në “Bon Vivant” katër persona janë plagosur nga arma e zjarrit, ndërsa, 17 janë lënduar nga thyerja e gotave-shishave të qelqit. Lidhur me rastin, një person i dyshuar gjendet në arrati./KosovaPress

Organizata Botërore e Shëndetësisë (OBSH) tha të mërkurën se është duke gjurmuar variante të shumta të koronavirusit, duke përfshirë llojin e quajtur EG.5 që po përhapet në SHBA dhe Mbretërinë e Bashkuar.

“OBSH aktualisht po gjurmon disa variante të COVID-19 duke përfshirë EG.5, për të cilin po publikojmë një vlerësim të rrezikut sot,” tha shefi i OBSH-së Tedros Adhanom Ghebreyesus në një konferencë për shtyp në Gjenevë.

“Mbetet rreziku i shfaqjes së një varianti më të rrezikshëm që mund të shkaktojë një rritje të papritur të rasteve dhe vdekjeve”, shtoi Tedros.

EG.5 është një nënvariant i variantit Omicron shumë të transmetueshëm.

Për më tepër, ai njoftoi një seri rekomandimesh të cilat janë në fuqi për të gjitha shtetet nga e mërkura deri më 30 prill 2025.

Rekomandimet i nxisin kombet që të vazhdojnë të publikojnë të dhëna për COVID-19, duke përfshirë vdekjet dhe rastet, duke iu përmbajtur programeve të vaksinimit dhe duke siguruar qasje të barabartë në vaksina të sigurta dhe efektive./AA/

Kursi i këmbimit mes euros dhe lekut po zhvendoset përsëri në rënie gjatë kësaj jave. Sipas kursit zyrtar të Bankës së Shqipërisë, euro u këmbye të mërkurën me 103.21 lekë. Kursi ka pësuar rënie me afërsisht 1.2 lekë që nga enjtja e kaluar, kur u shënua rritja e fundit domethënëse, pas sinjaleve të dhëna nga Banka e Shqipërisë.

Javën e kaluar, guvernatori Gent Sejko, paralajmëroi ndërhyrjen e Bankës së Shqipërisë për të frenuar mbiçmimin e lekut në kursin e këmbimit valutor. Në vijim, Banka e Shqipërisë zyrtarizoi rritjen e blerjeve të valutës të planifikuara këtë vit, në një kufi të ri prej 300 milionë eurosh, nga 220 milionë euro që ishte limiti i mëparshëm.

Blerjet e Bankës së Shqipërisë realizohen nëpërmjet ankandeve të programuara dhe zyrtarisht nuk kanë si qëllim ndërhyrjen në kursin e këmbimit, por rritjen e rezervës valutore. Megjithatë, duke parë forcimin e shpejtë të lekut këtë vit, Banka e Shqipërisë po e përdor këtë mekanizëm për të tërhequr një pjesë të prurjeve të mëdha të valutës në treg.

Sidoqoftë, sipas ekspertëve, shuma shtesë prej rreth 80 milionë eurosh që do të blihet nga Banka e Shqipërisë nuk ka shumë të ngjarë të sjellë ndryshime të rëndësishme të raporteve të kursit të këmbimit. Javën e kaluar, Banka e Shqipërisë bleu 18 milionë euro, por megjithatë tendenca rënëse e kursit të këmbimit ka vijuar, shkruan Oranews.

Agjentët mendojnë se prurjet valutore këtë vit janë mjaft të mëdha, kryesisht për shkak të numrit rekord të turistëve të huaj që po vizitojnë Shqipërinë këtë vit. Nga ana tjetër, edhe rritja më e ngadaltë e kreditimit dhe politika fiskale shtrënguese që po ndjek qeveria shqiptare favorizojnë forcimin e lekut.

Ka ndërruar jetë Zenel Kelmendi, ish-Rektor i Universitetit të Prishtinës dhe një nga profesorët më të vjetër të Fakultetit të Mjekësisë të Universitetit të Prishtinës.

Për vdekjen e tij ka njoftuar ish-ministri i Arsimit, Arsim Bajrami, i cili ka shkruar se ka pasur përgjegjësinë si prorektor dhe rektor të bashkëpunojë me profesorin Kelmendin në udhëheqjen e UP-së.

Ai në këtë postim ka ngushëlluar edhe familjen e të ndjerit.

“Paska ndërruar jetë Prof. Zenel Kelmendi, ish Rektor i Universitetit të Prishtinës dhe një nga profesorët më të vjetër të Fakultetit të Mjekësisë të Universitetit të Prishtinës. Profesor Kelmendi ishte një udhëheqës i vendosur i Universitetit në vitet e para pas luftës 1999-2004. Kisha përgjegjësinë si prorektor dhe rektor të bashkëpunojë me Prof. Kelmendin në udhëheqjen e Universitetit të Prishtinës. U prehesh në paqen e merituar Rektor dhe profesor i nderuar. Ngushëllime gjithë familjes Kelmendi”, ka shkruar ai në Facebook.

Ministri i Bujqësisë, Faton Peci, ka thënë se niveli i rendimenteve të grurit për këtë vit është rreth 4 ton për hektar, nga 66 mijë sosh sa kanë qenë të mbjella. Ai shtoi se nëse kalkulojnë me numrin e popullsisë ky nivel i grurit mund të mbulojë rreth 70 për qind të tregut vendor.

Peci, në konferencë për media pas mbledhjes së qeverisë tha se s’ka vend për shqetësim sa i përket furnizimit me grurë, pasi edhe ka stabilizim të tregjeve ndërkombëtare.

“Këtë vit Kosova ka rekordin e të mbjellave në të gjitha kulturat, posaçërisht në sektorin e drithërave. Mbi 66 mijë hektar janë të mbjella vetëm me grurë, niveli i rendimentit sillen diku afër 4 ton për hektar Nëse i kalkulojmë me numrin e popullsisë dhe standardet ndërkombëtare sa kërkon konsumimi ditor, ne me këto të mbjella nëse e gjithë sasia e grurit dedikohet vetëm për konsum të qytetarëve, mund të themi se kemi diku rreth 70 për qind të mbuleshmërisë së tregut. Mirëpo, ka shumë raste kur fermerët nuk zgjedhin të deponojnë sasinë e grurit, por e përdorin për kafshë ose shpezë. Ajo çka mund të them është se nuk ka vend për shqetësim, tashmë kur kemi edhe një stabilizim të tregjeve ndërkombëtare”, theksoi ai.

Në anën tjetër, zëvendësministrja e Punëve të Jashtme dhe Diasporës, Liza Gashi tha se forcimi i subjektivitetit ndërkombëtar të Kosovës është pikë strategjike e tyre.

Ajo tha se nuk është përfaqësuese e Bashkimit Evropian për të ditur se kur mund të largohen masat ndëshkuese ndaj Kosovës, por nënvizoi se Kosova i ka ndërmarrë të gjitha hapat që burojnë nga marrëveshja e Bratisllavës për shtensionimin e situatës në veri dhe se tashmë po presin përgjigje nga BE-ja.

“Një prej pikave kryesore në rrugëtimin tonë strategjik është forcimi i subjektivitetit tonë ndërkombëtar dhe avokimit për të mbrojtur Republikën e Kosovës. Kjo është puna jonë e përditshme në baza ditore që ne komunikojmë me të gjitha shtetet, njohëse dhe jo njohëse që me avancu rolin e Kosovës, por edhe të njëjtën kohë me plasu qëndrimin e Kosovës përmes misioneve tona diplomatike dhe konsullore”, theksoi ajo.