Author: G.O.

Iranianët thonë se do të vazhdojnë bisedimet në Islamabad për sa kohë që SHBA-të heqin bllokadën.

Pra, zgjatja e armëpushimit është një sinjal pozitiv, por ende nuk po merren sinjale pozitive dhe as sinjale negative nga Teherani për zhvillimin e negociatave ne SHBA-në.

Situata mund të karakterizohet nga tre faktorë, së pari, paqartësia. Koha po kalon dhe tani ka një zgjatje, por mundësia e një raundi tjetër konfrontimi mbetet ende i paqartë.

Së dyti, thyeshmëria. Të gjithë presin të papriturën dhe e vetmja pikë e sigurt tani për tani është pasiguria.

Së treti, kompleksiteti. Po flasim për zgjatjen e armëpushimit dhe angazhimin e mundshëm diplomatik, ndërkohë që e dimë se ka shumë pika ngërçi. Ngushtica e Hormuzit, dosja bërthamore, lehtësimi i sanksioneve, asetet e ngrira, raketat balistike të Iranit, dëmshpërblimet e luftës dhe marrëdhëniet rajonale të Iranit. Qëndrimet e të dy palëve janë shumë të ndryshme për këto çështje.

Burimet thonë se nuk është më thjesht mosbesim, por dyshim në lidhje me çdo afrim me SHBA-në.

Komisioni për Ekonomi dërgon në seancë për shqyrtim në lexim të dytë projektligjin për masat e përkohshme të produkteve themelore
Komisioni për Ekonomi me të gjitha votat për ka miratuar dhe ka dërguar për në seancë projektligjin për masat e përkohshme të produkteve themelore në raste të veçanta të destabilizimit në treg për shqyrtim në lexim të dytë, raporton Ekonomia Online.

Rozeta Hajdari kryetare e komisionit falënderoi deputetët që morën pjesë për ta arritur kuorumin.

“Faleminderit për pjesëmarrje që mundësuat kuorumin për mbajtjen e kësaj mbledhje. Sot kemi vetëm një pikë të rendit të ditës, që është shqyrtimi i raportit për lexim të dytë për Projektligjin nr.10/L-030 për Masat e përkohshme të produkteve themelore në raste të veçanta të destabilizimit në treg”, tha Hajdari.

Kryetari i Lidhjes Demokratike të Kosovës, Lumir Abdixhiku, ka pritur në takim shefen në detyrë të Bashkimit Evropian në Kosovë, Eva Palatova.

Gjatë takimit u diskutua për zhvillimet e fundit politike në vend, me theks të veçantë në proceset negociuese dhe situatën aktuale institucionale.

“Kryetari Abdixhiku theksoi se, përkundër angazhimit maksimal dhe qëndrimeve të qarta të LDK-së në mbrojtje të parimeve demokratike, këto procese nuk kanë prodhuar rezultat. Në këtë kontekst kryetari Abdixhiku nënvizoi nevojën urgjente për stabilitet institucional, përgjegjësi politike dhe ndërtimin e një alternative të qëndrueshme, që i përgjigjet pritjeve të qytetarëve për zhvillim dhe mirëqenie.
Kryetari Abdixhiku shprehu mirënjohje për mbështetjen e vazhdueshme që Bashkimi Evropian i ka dhënë Kosovës, duke vlerësuar rolin e BE-së si të rëndësishëm në forcimin e demokracisë, sundimit të ligjit dhe avancimin e agjendës evropiane të vendit”, thuhet në njoftimin e LDK-së.

Një nxënës 15-vjeçar në Shtime ka dorëzuar në polici një shumë parash që e kishte gjetur në rrugën “Tahir Sinani”.

Sipas një njoftimi për media nga Policia, bëhet fjalë për 180 euro, të cilat i riu i kishte hasur rastësisht gjatë lëvizjes në këtë zonë.

Pas ndërmarrjes së veprimeve të shpejta verifikuese nga ana e zyrtarëve policorë, është bërë e mundur identifikimi i pronares së parave, qytetarja me inicialet F.H., nga Shtimja.

Në prani të policisë, shuma prej 180 eurosh iu kthye pronares, e cila shprehu mirënjohje dhe falënderim për nxënësin.

Komunikata e plotë:

Me datën 22.04.2026, në stacionin policor në Shtime, është shënuar një akt i lartë ndershmërie dhe përgjegjësie qytetare nga një i mitur.

Nxënësi 15-vjeçar me inicialet N.SH., ndërsa po lëvizte në rrugën “Tahir Sinani” në Shtime, ka gjetur një shumë parash prej 180 eurosh. Pa hezituar, ai është paraqitur në stacionin policor për t’i dorëzuar të hollat e gjetura.

Pas veprimeve të menjëhershme verifikuese nga ana e zyrtarëve policorë, është arritur të identifikohet pronarja e këtyre parave, qytetarja me inicialet F.H., nga Shtimja.

Në prezencën e policisë, shuma prej 180 eurosh i është kthyer pronares, e cila falënderoi nxënësin për gjestin e tij.

Drejtoria Rajonale e Policisë në Ferizaj, falënderon nxënësin N.SH. për këtë veprim human dhe shembullor.

Ky akt dëshmon jo vetëm edukatën e tij familjare, por edhe besimin e qytetarëve te policia.

Me këtë rast, policia i uron nxënësit shumë shëndet dhe suksese në procesin mësimor dhe në të ardhmen, duke inkurajuar të gjithë qytetarët që për raste të tilla të bashkëpunojnë me policinë.

Prokuroria e Shtetit dhe Administrata Tatimore e Kosovës (ATK) kanë nënshkruar një Memorandum Bashkëpunimi, me synim forcimin e bashkëpunimit ndërinstitucional dhe rritjen e efikasitetit në luftën kundër korrupsionit, krimit të organizuar dhe shpëlarjes së parasë.

Sipas komunikatës, memorandumi parasheh krijimin e mekanizmave të drejtpërdrejtë dhe të vazhdueshëm të komunikimit ndërmjet institucioneve, duke mundësuar shkëmbim të shpejtë dhe të sigurt të të dhënave relevante për hetime.

“Përmes këtij bashkëpunimi, ATK do të ofrojë informacione dhe analiza të detajuara për Prokurorinë e Shtetit, të cilat do të shërbejnë për nisjen dhe zhvillimin e hetimeve penale, veçanërisht në rastet kur evidentohen shpërputhje ndërmjet të hyrave dhe shpenzimeve”, thuhet në komunikatë.

Memorandumi përfshin gjithashtu përdorimin e analizës së riskut dhe teknologjisë moderne për identifikimin e parregullsive, si dhe raportimin e rregullt të rasteve të dyshimta, duke synuar kalimin nga një qasje reaktive në një qasje proaktive në luftimin e veprave penale.

Drejtori i Përgjithshëm i ATK-së, Mentor Hyseni, theksoi rëndësinë e këtij bashkëpunimi, duke e cilësuar si vazhdimësi të një angazhimi të ndërtuar ndër vite.“Ky memorandum nuk është një fillim i ri, por një vazhdim i një bashkëpunimi të ndërtuar me vite. Sot po e thellojmë këtë bashkëpunim duke e ngritur në një nivel më të avancuar, sepse bashkëpunimi ndërinstitucional nuk është dëshirë, por obligim shtetëror dhe profesional. Ky memorandum krijon mekanizma konkrete që na mundësojnë të kalojmë nga një qasje reaktive në një qasje proaktive, të bazuar në analizë risku dhe përdorim të teknologjisë moderne”, tha ai.

Hyseni shtoi se të dhënat që disponon ATK-ja përbëjnë një burim të rëndësishëm për mbështetjen e hetimeve dhe identifikimin e parregullsive, kur përdoren në mënyrë të koordinuar dhe në përputhje me ligjin.

Ndërkaq, përfaqësuesi i përhershëm i UNDP në Kosovë, Nuno Queiros, vlerësoi se ky memorandum shënon një hap të rëndësishëm në forcimin e bashkëpunimit ndërinstitucional.

“Nënshkrimi i këtij memorandumi shënon zgjerimin e bashkëpunimit ndërinstitucional për ndarjen e të dhënave ndërmjet Prokurorisë dhe ATK-së, si një mjet efektiv kundër korrupsionit dhe krimit financiar”, tha ai.

Ai shtoi se ky bashkëpunim pritet të ndikojë në rikthimin e fondeve të paligjshme dhe në rritjen e të ardhurave për mirëqenie dhe zhvillim.

Presidenti Donald Trump planifikon t’u japë iranianëve një afat kohor të kufizuar për të dalë me një propozim të unifikuar për të rikthyer në rrugën e duhur negociatat diplomatike, thanë për CNN dy burime të njohura me diskutimet e brendshme.

Nuk ishte menjëherë e qartë nëse mesazhi i Trump kishte mbërritur te iranianët, transmeton Telegrafi.

Administrata nuk dëshiron ta zgjasë armëpushimin për një kohë të pacaktuar, thanë burimet, dhe nuk dëshiron t’i japë Iranit kohë për të zvarritur më tej bisedimet.

Presidenti ishte i kujdesshëm për zgjatjen e armëpushimit fillestar përtej afatit të së mërkurës, thanë burimet.

Ai dëshiron që një marrëveshje të finalizohet sa më shpejt të jetë e mundur, dhe kishte shpresuar se presioni i një afati kohor do t’i detyronte iranianët të uleshin në tryezë para se të skadonte armëpushimi.

Stoqet amerikane të armëve në nivele të ulëta shkaku i luftës në Iran

Megjithatë, ndihmësit kryesorë të Trump besojnë se ka përçarje brenda udhëheqjes iraniane dhe se iranianët nuk kanë konsensus mbi qëndrimin e tyre për të fuqizuar negociatorët për të finalizuar një marrëveshje, raportoi më parë CNN.

Vendimi i Trump për t’i dhënë Teheranit më shumë kohë për të paraqitur një “propozim të unifikuar”, siç e karakterizoi ai, pasqyron dëshirën e administratës për ta zgjidhur luftën në mënyrë diplomatike, si dhe hezitimin e saj për të rinisur sulmet kinetike, thanë burimet.

Ndërkohë, presidenti beson se bllokada amerikane e Ngushticës së Hormuzit do të vazhdojë të ushtrojë presion mbi iranianët ndërsa negociatat vazhdojnë.

Por ekziston gjithashtu pranimi midis ekipit të Trump se sa më gjatë të vazhdojë bllokada, aq më shumë dëme do të shkaktojë ekonomia botërore, thanë burimet. /Telegrafi/

Kryeministri në ardhje i Hungarisë, Peter Magyar, ka deklaruar se Hungaria do ta arrestonte kryeministrin e Izraelit, Benjamin Netanyahu, nëse ai do ta vizitonte vendin nën udhëheqjen e re.

Magyar ka thënë se vendi do të respektonte detyrimin e tij për të ndaluar udhëheqësit në territorin e tij, nëse ata janë të kërkuar nga Gjykata Penale Ndërkombëtare (ICC).

Magyar gjithashtu ka thënë se do të anulojë vendimin e paraardhësit të tij Viktor Orban për të dalë nga gjykata me seli në Hagë.

ICC-ja ka lëshuar një urdhër arresti për Netanyahun për krime të dyshuara kundër njerëzimit, në lidhje me luftën në Gazë.

Hungaria, nën udhëheqjen e Orbanit, është bërë vendi i parë evropian që ka sfiduar urdhrin e ICC-së, duke refuzuar të arrestojë liderin izraelit kur ai mbërriti në aeroportin e Budapestit vitin e kaluar.

Ekspertët ligjorë kanë thënë se kjo lëvizje mund ta shndërrojë Hungarinë në një strehë për kriminelë ndërkombëtarë lufte.

Orban gjithashtu ka sugjeruar se ishte i gatshëm të mirëpriste Vladimir Putinin, gjithashtu subjekt i një urdhri arresti nga ICC-ja për krime të dyshuara lufte në Ukrainë, për bisedime paqeje me Donald Trumpin.

Por Magyar, i cili fitoi zgjedhjet e 12 prillit me një shumicë të thellë dhe është bërë kryeministri më i ri i Hungarisë pas 16 vjetësh të Orbanit në pushtet, e sheh përmbysjen e këtyre vendimeve si pjesë të planit për të rikthyer marrëdhëniet e Hungarisë me BE-në.

Duke rikthyer aleancat në Bruksel, ai shpreson të sigurojë miliarda euro financim nga BE-ja.

Në një konferencë për shtyp të hënën, Magyar është pyetur për një ftesë që i kishte bërë Netanyahut për të marrë pjesë në një ngjarje që përkujton kryengritjen e dështuar të vitit 1956 kundër Bashkimit Sovjetik.

“Çdo lider është i mirëpritur të marrë pjesë në këtë përkujtim të rëndësishëm”, ka thënë Magyar për gazetarët.

Duke iu referuar urdhrit të arrestimit të ICC-së ndaj liderit izraelit, ai ka shtuar se: “Ne kemi detyrim ligjor të zbatojmë vendimet e gjykatës, dhe jam i sigurt se ai e di këtë”.

11 prilli ishte afati i fundit kur duhej të emërohej anëtari i fundit në Komisionin Qendror të Zgjedhjeve (KQZ), raporton Ekonomia Online.

Por, edhe pse kanë kaluar të gjitha afatet emërimi i tij nuk ka ndodhur ende.

Ushtruesja e detyrës së presidentes së vendit, Albulena Haxhiu ka folur sot për këtë çështje duke thënë se ky proces është dashur të përmbyllet nga presidentja Vjosa Osmani-Sadriu.

Ajo, ka shtuar se për këtë çështje do të veprohet në përputhje me përgjegjësitë.

“Në raport me këtë çështje, janë tejkaluar të gjitha afatet, mendoj që ka qenë një proces kushtetues që është dashur të përmbyllet nga Presidentja Vjosa Osmani-Sadriu. Do të veprohet në përputhje me përgjegjësitë. Unë kam thënë që proporcionaliteti, përfaqësimi dhe fuqia politike nuk mund të shkelen. Nuk mund unë që ta mohoj vullnetin e qytetarëve, nuk mund që ta shtyp atë, ose që me një vendim timin të veproj në kundërshtim”, ka shtuar Haxhiu.

Janë duke u zhvilluar komunikime “për të zgjatur afatin e armëpushimit” mes Izraelit dhe Libanit, ka thënë presidenti i Libanit, Joseph Aoun.

Kjo vjen para raundit të dytë të bisedimeve në Uashington DC të enjten mes dy vendeve, të cilat ndodhen në një armëpushim të përkohshëm 10-ditor që hyri në fuqi në orën 17:00 EST (21:00 GMT, mesnatë sipas kohës lokale) më 16 prill.

Në një postim në X, Aoun thotë se bisedimet që po përgatiten janë “të bazuara në ndalimin e plotë të agresioneve izraelite, arritjen e tërheqjes së Izraelit nga territoret libaneze, kthimin e të burgosurve, vendosjen e ushtrisë në kufijtë ndërkombëtarë dhe fillimin e rindërtimit të asaj që u shkatërrua gjatë kësaj lufte”.

Aoun thotë se qëndrimi i Libanit për “negociatat është i qartë: pa lëshime, pa pazare dhe pa dorëzim, përveç asaj që garanton sovranitetin e Libanit dhe interesat e të gjithë libanezëve”.

Mbështetja nga SHBA-ja i ka ofruar Libanit një “mundësi që nuk duhet ta humbasim”, thuhet në postimin e zyrës së tij.