Author: G.O.

Një rast i personit të zhdukur është raportuar në Gjakovë, ku një burrë është larguar nga shtëpia dhe që prej asaj dite nuk ka asnjë gjurmë të tij, mëson Sinjali.

Bëhet fjalë për Muharrem Pozhegun, rreth 59-vjeçar, i cili sipas burimeve të afërta me familjen është larguar më 20 prill 2026 rreth orës 13:00 nga banesa e tij në rrugën “14 Qershori”, duke marrë me vete disa gjëra personale.

Që nga ai moment, ai nuk i është përgjigjur telefonatave të familjarëve, përfshirë djalin, vëllain dhe motrën, duke shtuar shqetësimin për fatin dhe gjendjen e tij.

Familja ka raportuar rastin në Polici, ndërsa me udhëzim të Prokurorit kujdestar është iniciuar rasti si “Person i zhdukur”.

Policia ka nisur hetimet për gjetjen e tij dhe apelon për bashkëpunim nga qytetarët që mund të kenë ndonjë informacion.

Ministri i Punëve të Brendshme, Xhelal Sveçla, ka reaguar pas vendimit të gjykatës për rastin e sulmit terrorist në Banjskë, ku dy nga të akuzuarit janë dënuar me burgim të përjetshëm, ndërsa i treti me 30 vite burg.

Përmes një postimi në Facebook, Sveçla e ka cilësuar këtë vendim si një moment të rëndësishëm për drejtësinë në Republikën e Kosovës, duke theksuar se dënimet maksimale duhet të vlejnë për të gjithë të përfshirët në këtë rast, përfshirë edhe pjesëtarët e një rrjeti më të gjerë prej 45 personash të identifikuar.

“Sulmi i 24 shtatorit 2023 nuk ishte një akt i izoluar, por një operacion i organizuar me mbështetje shtetërore nga Serbia, me synim cenimin e rendit kushtetues dhe aneksimin e një pjese të territorit të Kosovës”, tha ministri.

Ai ka theksuar se përballimi i këtij sulmi nga Republika e Kosovës ndali një skenar të rrezikshëm për ndarje, duke shtuar se faktet dhe provat dokumentojnë përfshirjen e drejtpërdrejtë të Serbisë.

Sveçla ka bërë të ditur gjithashtu se strukturat kriminale dhe paramilitare në veri janë çmontuar dhe se rendi kushtetues është mbrojtur.

Ai i ka bërë thirrje Serbisë që të mbahet përgjegjëse për rolin e saj politik, financiar dhe logjistik në këtë agresion.

Ministri ka theksuar se ky vendim nuk mund ta kthejë heroin Afrim Bunjaku, por përbën një hap drejt drejtësisë për sakrificën e tij dhe dhimbjen që mbetet te familja, kolegët dhe qytetarët.

“Drejtësia për Banjskën nuk përfundon këtu. Ajo përmbyllet vetëm kur të gjithë përgjegjësit të dalin para drejtësisë, me në krye Milan Radoiçiqin”, ka shkruar Sveçla.

Në Kolegjin AAB është hapur edicioni i pestë i Panairit të Karrierës dhe Punësimit, duke mbledhur mbi 85 kompani nga industri të ndryshme, përfshirë edhe ATV Media.

Ky panair synon të lidhë studentët me tregun e punës, duke ofruar mundësi konkrete për praktikë, punësim dhe zhvillim profesional, si brenda ashtu edhe jashtë vendit. Organizimi ka bashkuar studentë, institucione dhe kompani për të krijuar ura bashkëpunimi mes arsimit dhe sektorit privat.

Vlen të theksohet se interesimi i studentëve ka qenë shumë i lartë, veçanërisht për t’u bërë pjesë e ATV Media, duke reflektuar kërkesën në rritje për mundësi në fushën e medias dhe komunikimit.

Për të gjithë ata që dëshirojnë ta vizitojnë këtë panair, panairi do të zgjasë edhe të shtunën e 25 prillit.

Detarët malazezë, që ndodhen në anijen e sekuestruar nga Irani në Ngushticën e Hormuzit, janë në gjendje të mirë, tha ministri i Detarisë i Malit të Zi, Filip Radulloviq.

Ata ndodhen në anijen MSC Francesca, e cila lundron nën flamurin e Panamasë, njëra nga dy anijet që u kapën nga marina e Gardës Revolucionare Islamike të Iranit, nën akuza se kishin shkelur rregullat dhe kishin tentuar të “largoheshin fshehurazi” nga Ngushtica e Hormuzit.

Radulloviq për Radio Televizionin e Malit të Zi tha se përfaqësuesit e Ministrisë së Detarisë janë në kontakt me kapitenin e anijes “MSC Francesca”, i cili është shtetas malazez, dhe se ai ka konfirmuar se të gjithë në bord janë mirë dhe në gjendje stabile.

“Anija është e ankoruar nëntë milje detare larg bregdetit iranian. Negociatat mes kompanisë MSC dhe Iranit po shkojnë mirë. Detarët tanë janë mirë, Ministria e Punëve të Jashtme është e informuar për zhvillimet. Jemi në kontakt edhe me kompaninë MSC Francesca. Sot në mëngjes patëm një bisedë me kapitenin e anijes, i cili është shtetas malazez”, tha Radulloviq të mërkurën në mbrëmje, njofton rel.

SHIKONI EDHE:

Irani thotë se i ka kapur dy anije në Ngushticën e Hormuzit

Ai tha se familjarëve të detarëve u është premtuar se shteti do të bëjë gjithçka për t’i kthyer ata në shtëpi.

Ministria e Punëve të Jashtme e Panamasë, sipas raportimeve të mediave, ka njoftuar se anija MSC Francesca është zhvendosur “me forcë” në ujërat iraniane.

Panamaja e ka akuzuar Iranin për shkelje të së drejtës ndërkombëtare, duke thënë se ky veprim përbën një “sulm serioz ndaj sigurisë detare” dhe një “përshkallëzim të panevojshëm” të tensioneve.

Sipas njoftimit të Gardës Revolucionare Islamike, anija MSC Francesca dhe anija greke Epaminondas janë ndaluar nën akuzën se kanë tentuar të dalin “fshehurazi” nga Ngushtica e Hormuzit “pa autorizim” dhe për “shkelje të shumta dhe manipulim të sistemeve të ndihmës në navigim, duke rrezikuar sigurinë detare”.

Marina e Gardës njoftoi se këto anije janë transferuar në ujërat territoriale iraniane për inspektim të ngarkesës dhe dokumenteve.

Menjëherë pasi Shtetet e Bashkuara dhe Izraeli nisën sulmin ndaj Iranit më 28 shkurt, Irani praktikisht bllokoi Ngushticën e Hormuzit, përmes së cilës para luftës kalonte një e pesta e furnizimeve globale me naftë dhe gaz.

Pavarësisht armëpushimit, Irani vazhdon të bllokojë kalimin përmes Ngushticës së Hormuzit, ndërsa SHBA-ja ka vendosur një bllokadë ndaj porteve iraniane.

Vdekja e akademik Rexhep Qosjes ka nxitur reagime të shumta në Kosovë dhe Shqipëri, ku figura e tij po nderohet nga liderë politikë e institucionalë, si dhe nga njerëz të kulturës, letërsisë dhe artit.

Në mesin e tyre është edhe kryeministri i Kosovës, Albin Kurti, i cili përmes një postimi në Facebook ka vlerësuar lart jetën dhe veprën e akademikut të ndjerë.

Kurti ka shkruar se vepra e Qosjes do të vazhdojë të jetojë edhe pas vdekjes së tij, duke marrë një dimension të ri leximor pa autorin.

Sipas tij, librat e shumtë të akademikut, nga studimet gjuhësore, kritika letrare, ditarët historikë e deri te veprat letrare, do të vazhdojnë të lexohen dhe të interpretohen nga gjeneratat e ardhshme, duke mbetur burim i rëndësishëm dijeje dhe inspirimi.

Postimi i plotë:

Ngushëllimi na vjen prej jetës së tillë

Rexhep Qosja ndërroi jetë sot. Vepra e tij padyshim që do të jetojë shumë më gjatë se shekulli i tij. Mirëpo, fillimisht, vepra e tij nis një jetë të re sot: jetën pa autorin.

Dhjetëra libra të Rexhep Qosjes tash fitojnë një tjetër lloj leximi dhe sigurisht edhe lexues të rinj. Nga studimet gjuhësore dhe kritika letrare te ditarët historikë, nga tregimet e dramat te romanet voluminoze, tani do të mund të ripërjetohen ndryshe. Dhe nga ai rilexim i yni dhe i gjeneratave në vijim do të varen mësimet e insiprimet e së ardhmes. Është fat i madh për një komb të ketë regjistrues të këtillë të kohëve të veta, të mendimit dhe të situatave.

Natyrisht që askush nuk do të mund të thotë që ky apo ai shkrimtar a veprimtar ishte rilindasi ynë i fundit. Por sigurisht që të gjithë duhet ta themi që askush nuk i ka njohur dhe ditur më thellë si dhe çmuar e afirmuar më lart rilindasit tanë sa akademik Rexhep Qosja.

Në akademi ishte gjuhëtar e në gjuhë ishte historian, në publik ishte shkrimtar e në shkrim ishte mendimtar, në shoqëri ishte politikan e në politikë dijetar. Midis trashëgimisë së iluminizmit evropian dhe jetëshkrimit të Gjergj Kastriotit Skënderbeut, sikurse edhe midis romantizmit dhe postmodernes, qarkullonte mahnitshëm dhe frymëzonte parreshtur.

Shkruante edhe për shkak se kishte lexuar shumë. Shkruante shumë sidomos për shkak se kishte çfarë të thoshte. Jetën e kaloi midis librave, jo pak prej të cilëve e kanë për autorë vetë atë, në bibliotekën e secilit prej nesh.

Populli shqiptar nuk ka një akademik tjetër bashkëkohor i cili kaq shumë kontribuoi për gjuhën dhe kombin tonë e njëkohësisht aq shumë u sulmua nga politika dhe kolegët e tij. Do të mbahet mend siç ishte dhe ishte siç mbeti – i paepur.

Dy muaj pa i mbushur nëntë dekada që ia kanë vlejtur fort për shqiptarët mbarë. U nda nga jeta, por i rron gjallë vepra.

Është mbajtur sot seanca gjyqësore në Gjykatën Themelore në Prishtinë ndaj të akuzuarës Jelena Gjukanoviq, e cila ngarkohet për veprën penale të spiunazhit.

Në fjalën përfundimtare, Prokuroria ka kërkuar dënimin maksimal prej 25 vjetësh burgim, duke e cilësuar rastin si një ndër më të rëndësishmit në fushën e sigurisë kombëtare.

Prokurori theksoi se çështja nuk është vetëm individuale, por prek drejtpërdrejt sigurinë e shtetit dhe besimin e qytetarëve në institucionet e Republikës së Kosovës.

“Dënimi i drejtë dhe proporcional në këtë rast është dënimi maksimal i paraparë me nenin 124, paragrafi 3 të Kodit Penal, me qëllim që të mbrohet rendi kushtetues dhe siguria e zyrtarëve dhe qytetarëve të Republikës, si dhe për të dërguar një mesazh të qartë se veprimtari të tilla nuk do të tolerohen në shtetin tonë”, ka thënë ndër të tjera prokurori gjatë seancës.

Aktgjykimi për këtë rast pritet të shpallet më 27 prill 2026, në ora 13:15.

Ky është rasti i radhës i hetuar dhe realizuar nga Agjencia e Kosovës për Inteligjencë (AKI) në kuadër të luftës kundër spiunazhit.

Serbja Jelena Gjukanoviq, punonjëse e Organizatës për Siguri dhe Bashkëpunim në Evropë (OSBE), ishte arrestuar më 28 shkurt të vitit 2025 në pikën kufitare të Jarinjës, në veri të Kosovës, dhe që atëherë ndodhet në paraburgim.

Gjukanoviq dyshohet për spiunazh në bashkëpunim me një tjetër person, i cili po ashtu është nën hetime.

Sipas Kodit Penal të Kosovës, spiunazhi konsiderohet krim i rëndë dhe, në rast të konfirmimit të fajësisë, dënohet me minimum pesë vjet burg.

Gjukanoviq dyshohet të ketë bashkëpunuar me Agjencinë Serbe të Sigurisë dhe Inteligjencës (BIA).

Një 53-vjeçar ka humbur jetën si pasojë e një aksidenti në aksin Thumanë-Mamurras.

Siç raporton Euronews.al, aksidenti ndodhi ndërmjet dy veturave, ndërsa viktima nuk mundi të iu bëjë ballë plagëve të marra.

I përfshirë në aksident raportohet të jetë edhe një 20-vjeçar që drejtonte njërën veturë dhe një pasagjere, ku të dy janë në kujdesin e mjekëve dhe jashtë rrezikut për jetën.

Policia arrestoi 20-vjeçarin si shkaktar i aksidentit me pasojë vdekjen.

Një aksident po ashtu me fatalitet është regjistruar edhe të mërkurën në Thumanë, ku një person mbeti i vdekur.