Author: G.O.

Për vetëm katër muaj, në Kosovë janë importuar mbi 1 mijë e 300 vetura të reja.

Sipas të dhënave të Doganës së Kosovës, gjatë periudhës nga janari prill të këtij viti në Kosovë janë importuar gjithsej 1,310 vetura të reja, me një vlerë të përgjithshme prej 15,511,065 euro.

Të dhënat katërmujore tregojnë se muaji mars dominon dukshëm, me 700 vetura të importuara dhe vlerë mbi 7.6 milionë euro.

Në muajin shkurt janë importuar 241 vetura (mbi 4 milionë euro), në janar 163 vetura (rreth 2.7 milionë euro), ndërsa në prill, deri më 7, janë regjistruar 206 vetura me vlerë mbi 1 milion euro.

Struktura e tregut tregon një dominim të qartë të veturave me benzinë, të cilat përbëjnë 1,128 njësi me vlerë mbi 8.6 milionë euro.

Ndërkohë, 178 vetura janë me motor dizel me vlerë rreth 6.7 milionë euro, ndërsa vetëm 4 mjete të veçanta janë importuar në këtë periudhë.

Sa i përket origjinës, tregu kosovar furnizohet kryesisht nga vendet evropiane, por me një prani të madhe edhe nga Azia. Në aspektin e sasisë, bie në sy numri i lartë i veturave nga Kina (773 njësi) në kategorinë e benzinës. Nga Evropa, numër të konsiderueshëm kanë Republika Çeke (132 vetura) dhe Spanja (88 vetura).

Në kategorinë e veturave me motor dizel, Gjermania prin me 89 vetura, ndërsa në përgjithësi mbetet vendi me vlerën më të madhe të importit, duke kaluar 3.4 milionë euro vetëm në këtë segment. Pas saj renditen edhe shtete si Shtetet e Bashkuara të Amerikës, Italia, Spanja dhe Republika Çeke./Indeksonline/

Sot është shënuar përvjetori i rënies së 280 martirëve nga Verboci dhe fshatrat përreth, si dhe i 42 dëshmorëve që dhanë jetën për lirinë e vendit.

Në këtë ditë përkujtimore është nderuar edhe figura e Ilaz Kodra, i cili ka dhënë një kontribut të rëndësishëm në rezistencën për çlirim.

Në kompleksin memorial në Verboc prehen 73 martirë, ndërsa pjesa tjetër e të rënëve janë varrosur në fshatrat përreth, ku kujtimi për ta vazhdon të ruhet me respekt dhe nderim.

SHBA-të synojnë të formojnë një koalicion ndërkombëtar për të rivendosur lirinë e lundrimit në Ngushticën e Hormuzit, sipas raporteve.

Sekretari i Shtetit i SHBA-së, Marco Rubio, ka miratuar krijimin e Ndërtimit të Lirisë Detare (MFC), i përshkruar si një iniciativë e përbashkët nga Departamenti i Shtetit i SHBA-së dhe Pentagoni, transmeton Telegrafi.

Plani, i raportuar nga The Wall Street Journal dhe agjencia e lajmeve Reuters, është detajuar në një dokument të dërguar ambasadave amerikane në përpjekje për të mbledhur mbështetje ndërkombëtare për projektin.

Irani “nuk do të tolerojë” zgjatjen e bllokadës, thotë këshilltari i lartë ushtarak

“MFC-ja përbën një hap të parë kritik në krijimin e një arkitekture sigurie detare pas konfliktit për Lindjen e Mesme. Ky kuadër është thelbësor për të siguruar sigurinë afatgjatë të energjisë, për të mbrojtur infrastrukturën kritike detare dhe për të ruajtur të drejtat dhe liritë e lundrimit në korridoret detare jetësore”, thuhej në kabllogram.

Ai shtoi se ambasadat amerikane duhet t’ua dorëzojnë kërkesën diplomatike kombeve deri më 1 maj, por jo Rusisë, Kinës, Bjellorusisë, Kubës dhe “kundërshtarëve të tjerë të SHBA-së”.

Pjesëmarrja mund të jetë në formën e diplomacisë, ndarjes së informacionit, zbatimit të sanksioneve, pranisë detare ose formave të tjera të mbështetjes, shtoi ai. /Telegrafi/

Koreja e Jugut do të udhëheqë forcat detare shumëkombëshe për herë të parë në një stërvitje detare të udhëhequr nga SHBA-të që fillon në qershor, tha marina të enjten.

Një admiral i Koresë së Jugut do të komandojë forcat e kombinuara detare në Stërvitjen Rim of the Pacific (RIMPAC), e planifikuar në dhe përreth Hawaiit nga 24 qershori deri më 31 korrik, sipas raportimeve.

Kjo është hera e parë që Koreja e Jugut ka marrë këtë rol në këtë stërvitje. Ajo shërbeu si zëvendëskomandante në vitin 2024.

RIMPAC, që mbahet çdo dy vjet, synon të nxisë bashkëpunimin midis vendeve pjesëmarrëse për të mbrojtur linjat detare të komunikimit dhe për t’iu kundërvënë kërcënimeve të mundshme të sigurisë detare.

Koreja e Jugut ka marrë pjesë në stërvitje që nga viti 1990.

Stërvitja e këtij viti do të përfshijë një forcë shumëkombëshe me mbi 25 mijë personel, si dhe rreth 40 anije sipërfaqësore, pesë nëndetëse dhe 140 avionë, shkruan Euronews.al.

Koreja e Jugut pritet të vendosë shkatërruesin e saj Aegis Jeongjo the Great, aeroplanin e patrullimit detar P-9 dhe nëndetësen 3 mijë tonëshe Dosan Ahn Chang-ho për këtë stërvitje.

Ushtruesja e Detyrës së Presidentes së Republikës së Kosovës, Albulena Haxhiu, së bashku me kryeministrin në detyrë Albin Kurti kanë nisur homazhet në fshatin Gllobar të Drenasit, në kuadër të nderimit të dëshmorëve, raporton Ekonomia Online.

Në orën 10:15, Haxhiu pritet të bëjë homazhe në varrezat e dëshmorëve në Verboc, në orën 10:45 në Shtuticë, ndërsa në orën 11:15 do të qëndrojë në Kompleksin Memorial në Marinë.

Reporterët pa Kufij (RSF) kanë publikuar Indeksin e 25-të Botëror të Lirisë së Shtypit.

Këtë vit, analiza nxjerr në pah një përkeqësim alarmues të kushteve për gazetarinë në shumë pjesë të botës, pavarësisht disa përmirësimeve të izoluara, pasi 100 nga 180 vende dhe territore kanë parë rënie të rezultatit të lirisë së shtypit.

Kosova ka shënuar përparim në lirinë e medias, sipas Indeksit Botëror të Lirisë së Shtypit të Reporterëve pa Kufij, duke u renditur në vendin e 84-të, 15 vende më mirë sesa vitin paraprak.

“Me përjashtim të Kosovës, që shënoi përparim pavarësisht se mbetet një nga shtetet me renditjen më të ulët në Evropë, liria e shtypit në Ballkanin Perëndimor në përgjithësi po përkeqësohet”, thanë Reporterët pa Kufij.

Por, pavarësisht përparimit të shënuar, nga vendet e Ballkanit Perëndimor, Kosova nuk qëndron më së miri sa i përket lirisë së shtypit.

Mali i Zi renditet në vendin e 41-të (nga 37 sa ishte vitin e kaluar) në Indeksin Botëror të Lirisë së Shtypit të Reporterëve pa Kufij.

Maqedonia e Veriut sivjet u radhit në vendin e 45-të (ka shënuar rënie pasi vitin e kaluar ishte në vendin e 42-të), Shqipëria është vetë një pozitë më lart se Kosova, pra në vendin e 83-të (vitin e kaluar ishte në vendin e 80-të), Bosnjë dhe Hercegovina në vendin e 90-të (vitin e kaluar ishte në pozitën e 86-të) dhe Serbia më së keqi, duke u radhitur e 104-ta (vitin e kaluar ishte në vendin e 96-të).

Sipas raportit, rajoni i Evropës Lindore dhe Azisë Qendrore vazhdon të jetë në vendin e parafundit në radhitje në indeksin e këtij viti, ndërkaq zona e BE-së dhe Ballkanit është në vendin e parë pavarësisht rënies së kushteve në gazetari.

Në indeksin e organizatës, në vendin e parë sa i përket lirisë së shtypit është Norvegjia, ndërsa në vendin e 180-të është Eritrea.

Presidenti i SHBA-së, Donald Trump, ka ashpërsuar tonet ndaj Iranit, duke paralajmëruar se Teherani duhet “të bëhet i zgjuar së shpejti”, në një kohë kur bisedimet për programin bërthamor kanë ngecur dhe pasiguria për armëpushimin mbetet e lartë.

Në një reagim në rrjetin e tij social, Trump kritikoi propozimin e Iranit për shtyrjen e një marrëveshjeje, duke theksuar se pala iraniane “nuk po arrin të marrë masa” dhe nuk di si të finalizojë një marrëveshje që shmang zhvillimin e armëve bërthamore, shkruan A2CNN. 

Deklaratat e tij vijnë vetëm pak ditë pasi u anulua raundi i fundit i negociatave mes dy vendeve. Shtëpia e Bardhë ka bërë të qartë se SHBA nuk do të pranojë një marrëveshje të dobët dhe se Irani nuk mund të lejohet të zotërojë armë bërthamore.

Ekspertët e sigurisë ndërkombëtare e përshkruajnë situatën si një fazë “konkurrence të fortë”, ku të dyja palët po përpiqen të tregojnë se kanë më shumë qëndrueshmëri dhe avantazh strategjik. Ndërkohë, propozimi i Iranit synon shtyrjen e çështjeve më të vështira dhe fokusimin te përfundimi i konfliktit dhe rihapja e rrugëve kyçe tregtare.

Paralelisht, SHBA ka shtuar presionin ekonomik ndaj Iranit. Autoritetet amerikane kanë goditur rrjetet financiare të Teheranit, përfshirë bankat në hije, aksesin në kriptovaluta dhe rrjetet e furnizimit me armë. Sanksionet e fundit kanë synuar edhe kompani dhe anije që dyshohet se ndihmojnë Iranin të anashkalojë kufizimet ndërkombëtare.

Si pasojë e këtyre zhvillimeve, monedha iraniane ka pësuar rënie të fortë, duke arritur nivele rekord të ulëta kundrejt dollarit amerikan.

Ndërkohë, situata e brendshme në Iran mbetet e tensionuar. Sipas të dhënave të OKB-së, autoritetet kanë shtuar represionin ndaj protestuesve dhe disidentëve, me mijëra arrestime dhe dhjetëra ekzekutime që nga fillimi i konfliktit.

Zhvillimet e fundit tregojnë se përplasja mes SHBA-së dhe Iranit po thellohet, duke mbajtur të paqartë perspektivën për një marrëveshje dhe duke rritur rrezikun e përshkallëzimit të mëtejshëm në rajon.

Policia britanike arrestoi një burrë pasi dy persona u therën me thikë në një zonë të Londrës veriore me një popullsi të madhe hebraike.

Sulmi me thikë po trajtohet si një incident terrorist, tha Policia Metropolitane e Londrës.

Një burrë 45-vjeçar u arrestua me dyshimin për tentativë vrasjeje.

“Po punojmë për të përcaktuar kombësinë dhe prejardhjen e tij”, thuhet në një deklaratë nga Policia Metropolitane.

“I dyshuari u përpoq të godiste me thikë oficerët e policisë dhe iu bë një sulm me elektroshok para se të arrestohej. Asnjë oficer nuk u lëndua”, thuhet në deklaratë.

“Dy burra – njëri në të 70-at dhe tjetri në të 30-at – u trajtuan në vendngjarje për plagë me thikë. Ata janë dërguar në spital dhe të dy janë në gjendje të qëndrueshme”, tha policia.

Organizata hebraike, Shomrim, tha në X se një burrë u pa duke vrapuar me një thikë në Golders Green dhe duke u përpjekur të godiste me thikë anëtarë hebrenj të publikut, përpara se të ndalohej.

Policia në Gjakovë ka arrestuar në flagrancë një person të dyshuar për vjedhje të rëndë.

Sipas njoftimit zyrtar, rasti ka ndodhur gjatë ditës së mërkurë në rrugën “Yll Morina”.

“Me datën 29 prill 2026, përmes kanaleve zyrtare të Policisë së Kosovës, është pranuar informata për një vjedhje në rrugën “Yll Morina” në Gjakovë. Njësitë patrulluese i janë përgjigjur thirrjes menjëherë, mirëpo personi i dyshuar (mashkull, i moshës madhore) ishte larguar nga vendi i ngjarjes. Zyrtarët policorë kanë nisur menjëherë grumbullimin e informacioneve dhe përshkrimit të personit për të bërë të mundur identifikimin dhe lokalizimin e tij”, thuhet në njoftim.

Megjithatë, në njoftim thuhet se falë reagimit të shpejtë dhe punës operative hetimore, pas një kohe të shkurtër, u arrit të ndalohej i dyshuari në një lokacion tjetër të qytetit.

Gjatë kontrollit, Policia ka gjetur dhe sekuestruar mjetet që dyshohet se janë përdorur për kryerjen e veprës penale, së bashku me mjetet monetare të vjedhura.

I dyshuari B. K., i cili dyshohet se është i përfshirë edhe në disa raste të tjera të vjedhjeve, është intervistuar nga zyrtarët e Sektorit të Hetimeve dhe në koordinim me prokurorin e Shtetit, ndaj tij është iniciuar rasti “Vjedhje e rëndë” dhe i njëjti është dërguar në mbajtje për 48 orë.

Prokuroria Themelore në Ferizaj, njofton opinionin publik se ka kërkuar nga Gjykata Themelore në Ferizaj, caktimin e masës së paraburgimit ndaj të pandehurve: F.U., N.S., J.M., B.L., dhe G.H.,- për shkak të dyshimit të veprave penale “Keqpërdorimi i pozitës apo autoritetit zyrtar “ ,“Falsifikimi i dokumenteve”, “Legalizimi i përmbajtjes së rreme” dhe “Blerja, pranimi ose fshehja e sendeve të përfituara me kryerjen e veprës penale” sipas Kodit Penal të Republikës së Kosovës.

Sipas Prokurorisë, ekziston dyshimi i bazuar se të pandehurit: F.U., J.M., B.L., G.H., dhe i pandehuri NN., në bashkëkryerje kanë falsifikuar dokumentin, në atë mënyrë që të pandehurit F.U., J.M., B.L., dhe i pandehuri NN, kanë ardhur në një restorant afër zyrës së noterit G.H., dhe i pandehuri NN, me letërnjoftim të falsifikuar është paraqitur me emër të S.V., i cili kishte vdekur në vitin 1986, e pastaj me ndihmën e noterit, kanë përpiluar autorizimin kinse S.V., autorizon F.U., në shitjen e parcelave, të cilën e kanë përdorur për legalizimin e përmbajtjes së pavërtetë në zyrën kadastrale në Ferizaj, për ti regjistruar pronat në emër të A.L., L.S dhe N.S., andaj me këto veprime do të kenë kryer veprën penale “Falsifikimi i dokumenteve” në bashkëkryerje nga neni 390 paragrafi 1 lidhur me nenin 31 të KPRK-së.

Për të pandehurin F.U., dhe N.S.,ekziston dyshimi i bazuar se në bashkëkryerje me të pandehurat A.L., dhe L.S., në zyrën e noterit G.H., me qëllim të tjetërsimit të ngastrave kadastrale, ka përdorur dokumentin e falsifikuar, me këtë do të kenë kryer veprën penale “Legalizimi i përmbajtjes së rremë” nga neni 395, paragrafi 1 lidhur me nenin 31 të Kodit Penal të Republikës së Kosovës Nr. 06/L-074 .

Ndërsa, sipas Prokurorisë, për të pandehurin G.H., ekziston dyshimi i bazuar se i pandehuri si person zyrtar- noter në Ferizaj, ka keqpërdorur detyrën e tij zyrtare, me qëllim të përfitimit të dobisë pasurore për të pandehurit tjerë, me këtë ka kryer veprën penale “Keqpërdorimi i pozitës apo autoritetit zyrtar” nga neni 414 paragrafi 1 të KPRK-së.

Po ashtu, ekziston dyshimi i bazuar se 09 Mars 2023, në zyrën noteriale në Ferizaj, si person zyrtar ka keqpërdorur detyrën zyrtare me qëllim të përfitimit të dobisë pasurore për personin tjetër në atë mënyrë që ka hartuar kontratën në gjuhën serbe mbi shitblerjen e pajuajtshmërisë, në mes të personave D.R., dhe D.R., si shitës, të cilët i ka përfaqësuar sipas autorizimit H.R., dhe personit N.R., si blerës, për shitblerjen e ngastrave kadastrale në Zonën Kadastrale Babushi serb, në të cilën kontratë është përfshirë edhe ngastra kadastrale në sipërfaqe prej 1724 m2. Andaj me këto veprime ka kryer veprën penale “Keqpërdorimi i pozitës apo autoritetit zyrtar” nga neni 414 paragrafi 1 të KPRK-së.

Kurse, për të pandehurit: J.M., B.L., dhe i pandehuri NN, ekziston dyshimi i bazuar se në bashkëkryerje kanë ndihmuar personin zyrtar, të pandehurin G.H.,- noter në Ferizaj, në kryerjen e veprës penale keqpërdorimi i pozitës apo autoriteti zyrtar nga neni 414 par.1 të KPRK-së, në atë mënyrë që i ka ndihmuar në hartimin e Autorizimit të datës 14.03.2024 , me të cilin është autorizuar i pandehuri F.U., për shitblerjen e ngastrave kadastrale të pronarit S.V., edhe pse kanë qenë në dijeni se i pandehuri NN nuk ka qenë S.V., i cili kishte vdekur në vitin 1986, i cili autorizim pastaj është përdorur në zyrën e noterit për shitblerjen e ngastrave kadastrale, me këtë do të kenë kryer veprën penale “Keqpërdorimi i pozitës apo autoritetit zyrtar” në bashkëkryerje në ndihmë nga neni 414 paragrafi 1 lidhur me nenin 31 dhe 33 të KPRK-ës.

Ndërsa, sipas kërkesës së parashtruar nga Prokuroria, ekziston dyshimi i bazuar se i pandehuri N.S., në bashkëkryerje me të pandehurën L.S., në zyrën e noterit G.H., kanë blerë sendin e përfituar nga vepra penale, me këtë do të kenë kryer veprën penale në bashkëkryerje “Blerja, pranimi ose fshehja e sendeve të përfituara me kryerjen e veprës penale” nga neni 333 paragrafi 1 të Kodit Penal të Republikës së Kosovës Nr. 06/L-074.

Të pandehurit e lartëcekur, që nga data 28 Prill 2026, me vendim të Prokurorit të Shtetit gjenden nën masën e ndalimit 48-orësh për veprat penale të lartëcekura.