Author: G.O.

Ushtruesja e detyrës së presidentes së Kosovës, Albulena Haxhiu ka pritur në takim kryetarin e Komisionit Qendror të Zgjedhjeve (KQZ), Kreshnik Radoniqin, ku po diskutohet për zgjedhjet e parakohshme raporton Ekonomia Online.

Mediat janë lejuar të marrin pamje vetëm në fillim të takimit.

Ndryshe, Kosova dështoi ta zgjedhë presidentin e ri, brenda afatit të përcaktuar nga Gjykata Kushtetuese, e që ishte data e djeshme, 28 prilli.

Partia e Albin Kurtit nuk arriti të bëjë marrëveshje me opozitën për këtë çështje dhe si rezultat i kësaj vendi shkon në zgjedhje të parakohshme.

Të paktën 21 persona janë ekzekutuar në Iran dhe 4,000 të tjerë janë arrestuar që nga fillimi i luftës së tij me SHBA-në dhe Izraelin, sipas Zyrës së Kombeve të Bashkuara për të Drejtat e Njeriut, UNHCR.

Ekzekutimet u kryen në mes të shtypjes së Iranit ndaj disidentëve, veçanërisht përmes “akuzave që lidhen me sigurinë kombëtare”, tha sot Shefi i të Drejtave të Njeriut të OKB-së, Volker Turk.

Të paktën nëntë persona u ekzekutuan në lidhje me protestat e janarit 2026, dhjetë për anëtarësim të dyshuar në grupe opozitare dhe dy për akuza spiunazhi, tha agjencia.

Ai vazhdoi duke thënë se, që nga 28 shkurti, “vlerësohet se më shumë se 4.000 individë janë arrestuar për akuza që lidhen me sigurinë kombëtare në Iran”.

Shumë prej të arrestuarve janë zhdukur me forcë, janë torturuar ose i janë nënshtruar “trajtimit mizor, çnjerëzor dhe degradues”, thuhet në deklaratë, shkruan Euronews.al.

“Jam i tmerruar që, përveç ndikimeve tashmë të rënda të konfliktit, të drejtat e popullit iranian vazhdojnë t’i privohen nga autoritetet, në mënyra të ashpra dhe brutale”, tha Turk.

Dogana e Kosovës ka njoftuar se ka konfiskuar mbi 122 mijë euro dhe valutë e huaj te pikëkalimi kufitar Dheu i Bardhë.

Sipas njoftimit në bhyrje të pikës kufitare është paraqitur një automjet me targa të huaja, i drejtuar nga një shtetas i huaj i Republikës së Rumanisë me gjithsejt 4 udhëtarë.

“Gjatë pyetjes standarde doganore lidhur me posedimin e mjeteve monetare mbi pragun e lejuar ligjor prej 10,000 euro për person, pala është deklaruar se nuk posedon mjete për deklarim.

Pas përzgjedhjes për kontroll fillestar nga zyrtarët doganorë, janë gjetur një çantë dore në të cilën ishin të fshehura 32,500 euro.

Pas konstatimit të kësaj parregullsie dhe pyetjes së zyrtarit doganor mbi mosdeklarimin e mjeteve monetare, pala është përgjigjur se “kanë të drejtë deri në 10,000 euro për person””, thuhet mes tjerash në njoftim.

Njoftimi i plotë:

ë ë ë ë ë
Dheu i Bardhë, 29 prill 2026 Dogana e Kosovës, në bashkëpunim me Policinë Kufitare, ka parandaluar një rast të tentimit të mosdeklarimit të mjeteve monetare në pikëkalimin kufitar Dheu i Bardhë, gjatë hyrjes në territorin e Republikës së Kosovës.
Rreth orës 09:15, në hyrje të PKK Dheu i Bardhë është paraqitur një automjet me targa të huaja, i drejtuar nga një shtetas i huaj i Republikës së Rumanisë me gjithsejt 4 udhëtarë.
Gjatë pyetjes standarde doganore lidhur me posedimin e mjeteve monetare mbi pragun e lejuar ligjor prej 10,000 euro për person, pala është deklaruar se nuk posedon mjete për deklarim.
Pas përzgjedhjes për kontroll fillestar nga zyrtarët doganorë, janë gjetur një çantë dore në të cilën ishin të fshehura 32,500 euro.
Pas konstatimit të kësaj parregullsie dhe pyetjes së zyrtarit doganor mbi mosdeklarimin e mjeteve monetare, pala është përgjigjur se “kanë të drejtë deri në 10,000 euro për person”.
Bazuar në dyshimet e ngritura, automjeti është dërguar në vijën e dytë të kontrollit, ku në bashkëpunim me Policinë Kufitare është kryer kontroll i detajuar. Gjatë këtij kontrolli, në bagazhin e automjetit, përkatësisht në hapësira të fshehura në pjesën e akumulatorit dhe nën plastikën e gomës rezervë, janë zbuluar edhe 90,100 euro shtesë, si dhe 4,187 lei rumunë (rreth 800 euro).
Në total, janë zbuluar dhe sekuestruar mjete monetare të padeklaruara në vlerë prej:
• 122,600 euro
• 4,187 lei rumunë (rreth 800 euro)
Rasti është përcjellur për hetime të mëtejme, derisa Dogana e Kosovës rikujton se, në përputhje me legjislacionin në fuqi, çdo person që hyn ose del nga territori doganor i Kosovës dhe bart mjete monetare në vlerë mbi 10,000 euro është i obliguar t’i deklarojë ato.
Mosdeklarimi i mjeteve monetare përbën shkelje ligjore dhe i nënshtrohet procedurave përkatëse administrative dhe ligjore.

Dogana e Kosovës ka zbuluar produkte dentare të padeklaruara në Aeroportin e Prishtinës.

Sipas njoftimit, një udhëtar i selektuar për kontroll pas kalimit në kanalin e gjelbër iu nënshtrua verifikimit të detajuar nga zyrtarët doganorë të aeroportit në bashkëpunim me Njësinë Antikontrabandë.

Gjatë kontrollit të valixhes u gjetën produkte dentare të pa deklaruara dhe pa licencë për import.

“Sipas Kodit Doganor Nr. 08/L‑247, importi i mallrave pa dokumentacionin dhe licencimin e nevojshëm përbën kundërvajtje dhe mund të pasohet me masa administrative, përfshirë konfiskimin e mallrave dhe gjoba, si dhe procedura të mëtejshme ligjore sipas përcaktimeve në fuqi”, thuhet ndër të tjera në njoftim.

Ish-inspektori i përgjithshëm i AKI-së, Burim Ramadani, ka thënë se shteti ynë duhet të jetë funksional dhe stabil.

Përmes, një postimi në profilin e tij në rrjetin social Facebook, Ramadani ka shkruar aktivizimi i secilës e i secilit do të sjellë ndryshim dhe kjo jo vetëm në emra e mbiemra, por edhe në kulturën politike.

Postimi i tij i plotë:

Koha është tash.

Shteti ynë duhet të jetë funksional dhe stabil. Aktivizimi i secilës e secilit do të sjellë ndryshim. Jo vetëm në emra e mbiemra, por në kulturën politike.

Ky ndryshim është i domosdoshëm. Nuk bëhet fjalë për individë më, por për shtetin tonë të përbashkët!

Komisioni Qendror i Zgjedhjeve është në pritje të vendimit për caktimin zyrtar të datës për mbajtjen e zgjedhjeve të radhës.Kështu ka deklaruar për Ekonomia Online, zëdhënësi i KQZ-së Valmir Elezi.

Elezi deklaroi se meqenëse këto janë zgjedhje të parakohshme, organizimi i tyre bëhet me afate të shkurtëra kohore dhe një nga vendimet e para të KQZ-së për këtë proces zgjedhor do të jetë ndryshimi i afateve kohore të aktiviteteve zgjedhore apo përshtatja e tyre sipas nevojës dhe në pajtim me rrathanat.

“Ligji për Zgjedhjet e Përgjithshme ia jep të drejtën KQZ-së që afatet kohore të aktiviteteve zgjedhore të përshtaten me ditët në dispozicion të KQZ-së për organizimin e këtyre zgjedhjeve”, deklaroi ai.

Ai theksoi se me planin e aktiviteteve, KQZ rregullon çështjet mbi të cilat ndërtohet i gjithë procesi zgjedhor dhe që kanë të bëjnë me votuesit, subjektet politike dhe vëzhguesit.

“Pra, këtu përcaktohen afati për partitë politike për të formuar koalicione dhe deklaruar mospjesëmarrjen në zgjedhje; afatin për subjektet politike për t’u certifikuar e për të dorëzuar listën e kanidatëve për deputetë; dhe periudhën e fushatës zgjedhore”, shtoi zëdhënësi i KQZ-së.

Zëdhënësi i Komisionit Qendror të Zgjedhjeve, shtoi se po ashtu, me anë të këtij plani, KQZ cakton edhe kohën për regjistrimin e votuesve jashtë Kosovës, votimin përmes postës dhe në përfaqësi diplomatike, si dhe regjistrimin e votuesve me nevoja të veçanta.

“Pjesë e këtij plani është edhe vendosja e afateve për akreditimin e vëzhguesve dhe mediave”.

Admirali Giuseppe Cavo Dragone, një nga figurat e larta ushtarake të NATO-s dhe Kryetar i Komitetit Ushtarak të Aleancës, ka deklaruar se nuk ka plane për reduktimin e trupave të NATO-s në Kosovë.

Sipas tij, misioni i NATO-s në Kosovë mbetet shumë i rëndësishëm për stabilitetin e gjithë rajonit.

“Misioni në Kosovë është sigurisht shumë i rëndësishëm për stabilitetin e gjithë zonës, për përkushtimin që NATO-ja ka për sigurimin e një ambienti të sigurt e të rregullt për gjithë Kosovën. Kam ardhur këtu me gjithë Komitetin Ushtarak, pra 32 gjeneralë dhe admiralë nga të 32 vendet anëtare të NATO-s, që ata të kenë kontakt të drejtpërdrejtë me realitetin në terren. Tani ata i dinë gjërat për vendin tuaj, atë që ndodh këtu, kjo sigurisht do të jetë shumë e dobishme kur ne takohemi dhe marrim vendimet tona”, ka thënë ai për televizionin publik.

Duke folur për kapacitetet ushtarake, Dragone ka përmendur edhe angazhimin e shtuar të personelit në zona të caktuara operimi, si dhe përforcimin e trupave gjatë incidentit në veri në vitin 2023.

“NATO-ja bën rishikimin e misioneve çdo vit për të vlerësuar se si funksionojnë, si angazhohet personeli në zona të caktuara operimi, e këtë e bëjmë në baza periodike, pra nuk ka ndonjë befasi. Për t’ju dhënë një shembull, në anën tjetër, në vitin 2023, në fund të vitit, kur ndodhi ai incidenti në pjesën veriore, NATO-ja vendosi që të zgjerojë, të rrisë misionin me 1000 trupa shtesë. Kjo do të thotë që jemi fleksibilë në këtë kuptim, por sinqerisht, për aq sa kuptoj unë deri më sot, nuk ka ndonjë plan reduktimi të trupave”, është shprehur ai.

Rreth një në katër të rinj në Kosovë nuk janë të punësuar, nuk ndjekin arsim dhe as nuk janë të përfshirë në trajnime profesionale. Kështu thuhet në studimin e organizatës Demokracia për Zhvillim (D4D) mbi Indeksin e Pjesëmarrjes së të Rinjve, raporton EO.

Drejtoresha ekzekutive në Demokracia për Zhvillim (D4D), Rezarta Krasniqi shpjegoi mënyrën e realizimit të këtij hulumtimi.

Ajo, tha se është hera e dytë që Kosova vendoset si pjesë e këtij indeksi.

“Për të realizuar sa më mirë hulumtimin, ne kemi organizuar edhe takime validuese me profesorë dhe ekspertë të ndryshëm në këtë drejtim. Andaj është hera e dytë që Kosova vendoset pjesë e indeksit të pjesëmarrjes së të rinjve, ku nga 25 indikatorë të cilët janë indikatorë rajonalë dhe bëhet një matje e institucioneve të ndryshme me këto të dhëna, kemi arritur që si Kosovë t’i mbledhim 21 indikatorë që janë të dhëna mjaft solide në këtë drejtim dhe na tregojnë shumë mirë se cilat janë sfidat e të rinjve për t’u orientuar në politika publike dhe si të jemi mjaft të informuar në këtë drejtim. Paralelisht kësaj kemi punuar dhe kontribuar edhe në hulumtimin rajonal të të rinjve në këtë drejtim që të kemi të dhëna të krahasueshme. Pra, përveç që kemi mbledhur të dhëna të vendit ku synojmë të nxisim politikat publike, kemi mbledhur të dhëna që të krahasojmë se ku qëndrojmë edhe me rajonin në këtë drejtim. Andaj kjo ka kontribuar mjaft shumë në transparencën, krahasueshmërinë edhe të tregojmë mjaft mirë bashkëpunimin rajonal të organizatave, mirëpo edhe të rinjve në këtë drejtim.

Një element shumë i rëndësishëm i gjithë këtij procesi ka qenë përfshirja e akterëve të ndryshëm në këtë drejtim apo palët e interesit dhe gjithashtu ka qenë çështje kritike niveli i lartë i të rinjve në NEET (të rinjtë që nuk janë në punë, arsim apo trajnim). Gjithashtu kemi hapur një thirrje ku kemi mbështetur 5 organizata në këtë drejtim për të forcuar ekosistemin e shoqërisë civile dhe për të rritur besueshmërinë në nivel lokal në këtë drejtim. Mirëpo për t’u përzgjedhur 5 organizata që kemi mbështetur, kemi pasur një thirrje dhe një vullnet mjaft të madh të shumë organizatave ku kemi pasur deri 31 aplikime në këtë fushë, që tregon një interesim mjaft të lartë të organizatave që të punojnë me të rinjtë në nivel lokal dhe kemi parë që të rinjtë ende kanë interesim mjaft të lartë që të merren me aktivitete jashtë sistemit kurrikular që tashmë e kanë”, tha Krasniqi.

Zëvendësshef i Bashkëpunimit nga Zyra e Bashkimit Evropian në Kosovë, Alessandro Bianciardi foli për rëndësinë e pjesëmarrjes së të rinjve, duke shtuar se të rinjtë janë ende të nën-përfaqësuar në jetën politike dhe shpesh përballen me pengesa në qasjen në arsim cilësor dhe punësim.

“Jam këtu sot për të reflektuar mbi një çështje që është thelbësore për të ardhmen e Evropës, e cila është pjesëmarrja e të rinjve. Në të gjithë kontinentin, përpjekjet për të fuqizuar të rinjtë udhëhiqen nga Strategjia e BE-së për Rininë 2019–2027, e cila promovon angazhimin, lidhjen dhe fuqizimin brenda Bashkimit Evropian dhe në rajonet partnere. Kjo është veçanërisht e rëndësishme në Kosovë, që është shtëpia e një prej popullsive më të reja në Evropë. Ky realitet demografik mbart premtime të mëdha, por gjithashtu nxjerr në pah pengesat që ende kufizojnë aftësinë e shumë të rinjve për të marrë pjesë plotësisht në shoqëri. Gjetjet e fundit nga Indeksi i Pjesëmarrjes së të Rinjve tregojnë një tablo të përzier. Ndërsa është bërë njëfarë përparimi, pjesëmarrja mbetet e pabarabartë. Të rinjtë janë ende të nën-përfaqësuar në jetën politike dhe shpesh përballen me pengesa në qasjen në arsim cilësor dhe punësim. Të kombinuara me rrezikun e vazhdueshëm të varfërisë, këta faktorë kufizojnë ndjeshëm aftësinë e tyre për t’u angazhuar dhe për të kontribuar. Përjashtimi ekonomik është një pjesë e madhe e kësaj realiteti. Nivelet e larta të papunësisë tek të rinjtë dhe numri i atyre që nuk janë në punësim, arsim apo trajnim vazhdojnë të ngushtojnë mundësitë e disponueshme për ta”, tha ai.

Zëvendësministri i Ministrisë së Sportit dhe Rinisë, Sylejman Elshani tha se indeksi përbën pasqyrë për nivelin e përfshirjes së të rinjve në fusha të ndryshme.

“Indeksi i pjesëmarrjes së të rinjve përbën një instrument të rëndësishëm analitik, i cili përmes një metodologjie të standardizuar dhe indikatorëve të qartë, ofron një pasqyrë të thellë mbi nivelin e përfshirjes së të rinjve në dimensionin politik, ekonomik dhe social. Ky indeks shërben si një bazë e fuqishme për vlerësimin e progresit, identifikimin e sfidave dhe orientimin e politikave drejt nevojave reale të të rinjve. Të dhënat dhe të gjeturat e prezantuara sot janë thelbësore për të kuptuar më mirë pozitën e të rinjve në shoqërinë tonë dhe për të ndërmarrë politika të gjithëpërfshirëse, të qëndrueshme dhe efektive. Në këtë drejtim, bashkëpunimi ndërmjet institucioneve, organizatave të shoqërisë civile dhe partnerëve ndërkombëtarë mbetet kyç për avancimin e agjendës rinore”, tha ai.

Sekretarja e Përgjithshme e PDK-së, Vlora Çitaku, përmes një postimi në Facebook i është drejtuar kryeministrit Albin Kurti, duke i thënë se 51% e votave nuk janë 100%.

Ajo ka shkruar se Kurti nuk njeh bashkëpunim e as kompromis, por sipas saj kërkon nënshtrim.

Çitaku tutje ka thënë se Partia Demokratike e Kosovës nuk nënshtrohet.

Madje, deputetja e PDK-së e ka quajtur Kurtin shkelës serik të Kushtetutës, duke shtuar se ai nuk e ka problem ta përmbysë edhe rendin kushtetues.

Postimi i plotë:

Albin,

Nëse ka një njeri që nuk e njeh rezultatin zgjedhor në Kosovë, ai je ti. Falë atij rezultati, ti e udhëheq Qeverinë dhe Kuvendin. Po 51% nuk janë 100%.

Kush është shtetar, institucionalist dhe respekton Kushtetutën, nuk dëshmohet vetëm nga e kaluara e largët, por mbi të gjitha nga veprimet e sotme.

Si opozitë, pa asnjë kusht, kemi votuar zgjatjet buxhetore dhe marrëveshjet ndërkombëtare, përfshirë edhe dje, madje edhe me procedurë të përshpejtuar.

Ti, Albin, nuk e njeh bashkëpunimin, as kompromisin. Ti kërkon nënshtrim. Dhe PDK nuk nënshtrohet.

Si shkelës serik i Kushtetutës, nuk e ke problem ta përmbysësh edhe rendin Kushtetues. Por këtë nuk do ta lejojmë.

Ky vend dhe kjo Republikë janë ndërtuar me mund e me gjak. Dhe nuk do të lejojmë që të shkatërrohen.