Author: E.R.

PWRGATITI: NORA LUTA

Mbrojtja e Hashim Thaçit ka kërkuar sqarime nga Gjykata Speciale rreth raportimeve në media rreth pretendimeve se janë kërkuar katër dëshmitarë katolikë kundër ish presidentit kosovar, që po akuzohet për krime lufte, për çka nuk komentoi Prokuroria. Në seancën e mbajtur të hënën pas pushimit të verës, ka nisur dëshminë dëshmitari i 16 i mbrojtur i Prokurorisë, i cili ka thënë se pjesëtarët e LDK-së nuk ishin të mirëpritur në UÇK, dhe për disa nga anëtarët sipas tij pengesë ishte Ibrahim Rugova.

Raportimet në media rreth pretendimeve lidhur me kërkimet për të gjetur dëshmitarë katolikë kundër Hashim Thaçit janë kthyer në çështje diskutimi mes mbrojtjes dhe Prokurorisë në gjykimin që po zhvillohet në Hagë ndaj tij, Rexhep Selimit, Kadri Veselit, e Jakup Krasniqit.

Qysh në fillim të seancës avokati i Thaçit, ka kërkuar nga Gjykata sqarime rreth këtyre pretendimeve, që sipas tij janë tepër shqetësuese, e nëse vërtetohen paraqesin ndërhyrje në drejtësi.

Mbrojtja ka përmendur edhe disa raportime të zyrtarëve rusë se ish liderët e UÇK-së janë të përfshirë në trafikim organesh, duke kërkuar nga gjykata që të theksoj me njoftim publik se ata nuk janë duke u akuzuar për këtë vepër penale.

“Është shumë shqetësuese ndikimi në dëshmitarë. Ka shumë artikuj të botuar në Prishtinë që pretendojnë për një person shqiptar në Gjermani që thuhet që citohet të ketë thënë që i është kërkuar të gjejë 4 dëshmitarë katolikë kundër Thacit. Kjo është ndërhyrje në drejtësi. Gjykata duhet të kërkoj sqarime nëse janë kërkuar dëshmitarë nga dikush që është i pranishëm në këtë sallë gjyqi. Do ta bëjmë parashtresën edhe me shkrim”

“Kjo është një çështje e cila nuk është diskutuar me neve interpartes, asnjë prej të çështjeve që u ngrit nga z.Kehoe, nuk ka të bëjë me dëshmitarin i cili do të vijë për të dëshmuar në sallën e gjyqit, kështu që ju kërkojmë që mbrojtja e zotit Thaçi t’i parashtrojë me shkrim këto shqetësim”

Ndërkohë seanca ka vazhduar me dëgjimin e dëshmitarit të 16-të në këtë rast.  Dëshmitari ish pjesëtar i UÇK-së në zonën e Llapushnikut, e mbështetës i Lidhjes Demokratike ka dëshmuar nën masa mbrojtëse, derisa disa herë seanca është mbyllur për publikun.

Ai është përgjigjur në pyetjet e Prokurorisë rreth strukturës dhe zinxhirit komandues të kësaj zone, teksa ka thënë se ishte ndier nën presion kur dëgjonte se pse përkrahësit e LDK-së i janë bashkuar UÇK-së.

Sipas tij gjatë vitit 1998, u fliste se pjesëtarët e LDK-së nuk duhej pranuar në ushtri.

Ushtarëve a u thuhej që LDK ishte armiku, a i përhapte këto mesazhe edhe komanda e UÇK-së?

E kuptova që pengesë e tyre paska qenë Rugova..

Ndërsa Gjykata e ka refuzuar propozimin e Prokurorisë që të merret si provë një video në cilën shihej Fatmir Limaj, e Ismet Jashari, e që ZPS-ja pretendonte se aty paraqiste ceremoninë e betimit të ushtarëve UÇK-së.

Gjykimi për krime lufte ndaj Thaçit e të tjerëve nisi në prill të këtij viti, ndërsa deri tash janë dëgjuar 15 dëshmitarë të ZPS-së, shumica e të cilëve në seanca të mbyllura për publikun.

PËRGATITI: DONISA FAZLIU

Një vit më parë, Komuna e Prishtinës dhe ajo e Gracanicës kishin nënshkaruar marrëveshje për funksionalizimin e linjës Prishtinë-Gracanicë. Mirëpo, kjo linjë e premtuar nuk është ende funksionale. Derisa nga komuna e Gracanicës thonë se s’ka autobusë, në atë të Prishtinës bëjnë të ditur që në muajin shtator do të funksionalizohet linja e transportit publik, Prishtinë-Gracanicë.

As pas një viti, nuk ka transport publik për banorët e Graçanicës, ndonëse një marrëveshje ishte nënshkruar në gusht të vitit të kaluar mes Komunës së Prishtinës dhe asaj të Graçanicës.
Mosfunksionimi i kësaj linje, sipas Nënkryetarit për Komunitete në Komunën e Graçanicës, Leutrim Ajeti, është për shkak të mungesës së autobusëve.

“Arsyeja e deritashme ka qenë për shkak të mungesës së autobusëve siç kanë thënë edhe nga Komuna e Prishtinës, mirëpo në bashkëpunim gjatë këtyre ditëve jemi dakorduar me kryetarin dhe nënkryetarin që ta gjejmë një zgjidhje që kjo linjë më në fund të funksionalizohet.”

Ajeti për më tepër thotë se edhe qytetarët e Graçanicës janë të shqetësuar për mungesën e kësaj linje.

“Ankesa nga qytetarët janë shumë të mëdha dhe meqenëse nuk kemi ndërmarrje duhet të shfrytëzohen linja të ndërurbane që vijnë nga komuna e Gjilanit dhe ka raste kur autobusi është i mbushur plot me pasagjer dhe nuk ka vend për qytetarët tanë, pra një linjë Graçanicë-Prishtinë është e nevojshme pasi që edhe nxënësit e komunitetit shqiptar të shkollave të mesme, shkollimin e kryejnë në Prishtinë”.

Ndërkaq, nga Komuna e Prishtinës, bëjnë të ditur se kjo linjë pritet të funksionalizohet në muajin shtator.

“Fillimisht kemi nënshkruar marrëveshjen me Komunën e Graçanicës, ku Kryeqyteti ofron autobusët e tij për ketë linje dhe e subvencionon atë. Pastaj, meqenëse linja kalon ne rruge magjistrale, Ministria e Transportit ka bere analizat e saj dhe ka dhëne lejen për këtë linje, ky proces ka zgjatur disa muaj. Pas marrjes se lejes nga Ministria e Infrastrukturës, ekipet tona ne Komunën e Prishtinës, kane bere analizat se nga cilat linja aktuale mund te marrim autobusët për t’i dedikuar për linjën e re! Dhe, ne fund, tani për Shtator do te jemi gati për te filluar linjën. Kemi bere te gjitha përgatitjet e duhura.”

Marrëveshja për funksionimin e Linjës Prishtinë-Graçanicë është nënshkruar në gusht të vitit të kaluar ndërmjet Nënkryetarit të Komunës së Prishtinës, Alban Zogaj dhe kryetarit për Komunitete në Komunën e Graçanicës, Leutrim Ajeti.

PËRGATITI: ARMAND HOTI

Mungesa e investimeve si dhe diskriminimi në baza etnike, po lë pa punë shumë shqiptar në Luginën e Preshevës. Ata që përfaqësojnë shqiptarët në Serbi, thonë se banorët, si pasojë e papunësisë po detyrohen ta lëshojnë vendin.

“Ne jemi komuna më e papunësuar në Serbi. Shkalla e papunësisë është dikur rreth 40 deri në 45 për qind”.

Shqiptarët, të cilët përbëjnë mbi 94 për qind të popullsisë në Preshevë, nuk po arrin të gjejnë vend pune në vendin ku shumë nga ta janë lindur e rritur.

Qeveria e Serbisë, e udhëhequr nga presidenti Aleksandër Vuçiç, nuk e ka për synim ta zhvillojë Preshevën, komunën më të re në territorin e saj.

“Ne bëjmë presion në insitucionet e Serbisë por ata vazhdojnë të mos bëjnë investime këtu dhe i largojnë investitorët”.

Në Serbi, shqiptarët po hasin vështirësi të gjejnë një vend pune edhe në institucionet publike të vendit.

“Përfaqësimi i shqiptarëve në institucionet e Serbisë është vetëm simbolik. Shumë më drastik është përfaqësimi jonë në sistemin e gjyqësorit, ku nga 13 prokuror, në një vend me 62 për qind shqiptar që janë në komunën e Bujanocit, janë vetëm tre shqiptar. Marrë parasysh se kjo komunë e mbulon edhe komunën e Preshevës që ka 95 për qind shqiptar”.

Të dhëna publike nuk posedojnë, por, nga Këshilli Kombëtar Shqiptar pohojnë se Lugina e Preshevës, dita ditës po humbet njerëzit. Shkas për këtë janë pikërisht mundësitë e pakta për punësim.

“Kuadrot tona po përjashtohen. Ne jemi plotësisht jashtë institucioneve të Serbisë”.

Sipas kryetarit të Këshillit për të Drejtat e Njeriut në Preshevë, këto zhvillime kundër shqiptarëve të Luginës, pasqyrojnë përfundimin e procesit të integrimit të shqiptarëve në institucionet e Serbisë.

“Kjo është produkt i ndërprerjes së një procesi që filloi në vitin 2002, pra procesit të integrimit të shqiptarëve në institucionet e Serbisë”.

Përfaqësuesit e shqiptarëve në Luginën e Preshevës po ashtu shprehen kritik edhe me qasjen e qeverisë së Kosovës dhe Shqipërisë kundrejt këtyre trojeve. Ndërsa, kritika dhe zhgënjim shprehin edhe për faktorin ndërkombëtar.

Policia e Kosovës ka konfirmuar rastin se në rrugën “Bajram Kelmendi”, në Prishtinë, një person është gjetur pa shenja jete.

Zëdhëndësja e Policisë për rajonin e Prishtinës, Flora Ahmeti i ka thënë KosovaPress-it se sot rreth orës 19:00, nga një ekip mjekësor kanë pranuar informatën për një person pa shenja jete në rrugën “Bajram Kelmendi”, në Prishtinë.

“Policia menjëherë ka dalë në vendin e ngjarjes dhe në koordinim me prokurorin ka nisur hetimin e rastit si vdekje e dyshimtë dhe po ndërmerr të gjitha veprimet e duhura hetimore dhe ato forenzike – të ekzaminimit, që do të ndihmonin hetimin e ngjarjes si dhe sqarimin dhe ndriçimin e plotë të rastit”, tha ajo.

Përndryshe, KosovaPress mëson se viktima është i moshës së re.

Një person i moshës së re dyshohet se është gjetur pa shenja jete në Prishtinë.

Sipas banorëve në rrugën “Abdurraman Shala”, afër 4 llullave.

KosovaPress ka kontaktuar Policinë e Kosovës dhe do t’i mbaj të informuar.

Kryeministri i Kosovës, Albin Kurti, ka thënë se ndjekja e rregullave të regjistrimit nga ana e bizneseve është detyrë ligjore e jo “teknalitet”.

Këtë deklarim Kurti e ka bërë teksa ka komentuar vendimin e Ministrisë së Industrusë, Ndërmarrësisë dhe Tregtisë (MINT), e cila ka refuzuar ankesën e Klan Kosovës duke ia pezulluar veprimtarinë.

Kryeministri i ka dhënë mbështetje të plotë MINT-it “për kryerjen e detyrave përballë interesave të fuqishme të biznesmenëve të pasur”.

“Kosova ka 468 biznese të regjistruara, aktiviteti primar i të cilave është media dhe 114 kompani të licencuara audio apo audiovizive. Ndjekja e rregullave të regjistrimit është detyrë ligjore, jo një “teknikalitet”. Dhe zbatimi i rregullave të tilla kundër një shkelësi të vetëm nuk kërcënon pluralizmin mediatik”, ka shkruar ai në Twitter.

Kreu i ekzekutivit tutje ka thënë se demokracia sulmohet kur biznesmenë të fuqishëm shkelin ligjin për përfitime financiare. Dhe sipas tij, zbatimi i ligjit kundër shkeljeve të njerëzve të tillë – në asnjë mënyrë – nuk përbën sulm ndaj lirisë së medias.

“Në demokraci, organet e autorizuara për të vendosur për raste të tilla nuk qëndrojnë në Zyrën e Kryeministrit. Megjithatë, këto organe kanë mbështetjen e plotë të Zyrës sonë në kryerjen e detyrave të tyre, përballë interesave të fuqishme të biznesmenëve të pasur të rreshtuar kundër tyre. Liritë e medias janë jetike: sulmi ndaj tyre është sulm ndaj demokracisë. Por, demokracia gjithashtu sulmohet kur biznesmenë të fuqishëm shkelin ligjin për përfitime financiare. Dhe zbatimi i ligjit kundër shkeljeve të njerëzve të tillë – në asnjë mënyrë – nuk përbën sulm ndaj lirisë së medias”, ka përfunduar Kurti.