ATV

Author: ATVLive

  • Stacioni i autobusëve në Prishtinë, i pamirëmbajtur

    Stacioni i autobusëve në Prishtinë, i pamirëmbajtur

    Përgatiti: Sara Shehu

    Ndonëse stacioni i autobusëve është një prej zonave më të frekuentuara në kryeqytet, hapësirat e gjelbra nuk po mirëmbahen gjatë sezonit pranveror.

    Drejtues të Ndërmarrjes Lokale Publike “Gjelbër”, të cilës para një muaji i kaloi në përkujdesje edhe kjo pjesë e Prishtinës, arsyetohen me mungesë të punëtorëve.

    “Nuk i mirëmbajmë për çdo ditë, për shkak se kemi më shumë punë nëpër hapësira gjelbëruese nëpër kryeqytet, andaj ato pasi janë në qendër po i mirëmbajmë më shumë, kemi një numër të vogël të stafit, që është edhe problem. Ndërkaq, ne kemi marrë përsipër ta mirëmbajmë stacionin një muaj më parë”, tha Andi Belegu, sekretar i Ndërmarrjes “Gjelbër”.

    Deri më tani, këto hapësira janë mirëmbajtur vetëm nga dy punëtorë të stafit të Shërbimit Teknik të Ndërmarrjes së Stacionit të Autobusëve.

    Përpos hapësirave të gjelbra, të pakalueshme për shkak të infrastrukturës së dobët, janë edhe shkallët që dërgojnë te stacioni i autobusëve, të cilat frekuentohen në masë të madhe nga qytetarët.

    “Është shumë e rrezikshme, fakti se këtu mund të ketë gjarpërinj dhe më shumë kalojnë edhe të rinjtë, andaj do të duhej që komuna t’i mirëmbajë këto pjesë edhe shkallët të rregullohen”, thotë një qytetar.

    “Kjo gjendje është shumë e keqe, pasi që do të duhej të kishte mirëmbajtje, kështu rrezikohemi të gjithë kalimtarët e kësaj pjese”, thotë një tjetër qytetar.

    Për këtë gjendje të shkallëve, ATV-ja ka kontaktuar Drejtorin e Shërbimeve Publike në Prishtinë, Bekim Bestrovci, i cili tha se në koordinim me Drejtorinë e Transformimit Urban, kanë në plan që së shpejti t’i rregullojnë ato.

  • Hetimet rreth grupit “Albkings”, arrestohen shtatë persona

    Hetimet rreth grupit “Albkings”, arrestohen shtatë persona

    Përgatiti: Nora Luta

    Në shtatë ka arritur numri i të arrestuarve në rastin Albkings.

    Më 23 maj, Prokuroria e Prishtinës thotë se ka arritur të arrestojë administratorin kryesor të grupit, i cili dyshohet për vjedhje të identitetit dhe kredencialeve në bashkëkryerje.

    Prokuroria, të enjten, njoftoi se grupi është mbyllur përfundimisht, pasi ishte hapur dy herë tjera.

    Në kuadër të hetimeve u përdorën edhe masa të fshehta të vëzhgimit.

    “Në kuadër të hetimeve, kemi lëshuar masat e fshehta teknike të vëzhgimit dhe hetimit, si dhe kemi ndërmarrë disa veprime të tjera hetimore, me ç’rast këto kanë rezultuar me identifikimin e personit të parë të dyshuar dhe arrestimin e tij. Më datë 16 prill është lëshuar aktvendim për ndalimin e të pandehurit E.N., njëri prej administratorëve të këtij grupi”, tha prokurorja e rastit, Erza Bajrami – Kastrati.

    Për rastin, që shkaktoi pasiguri te qytetarët, në konferencën për media u paraqit edhe kryeprokurori Zejnullah Gashi.

    Teksa tha se hetimet janë duke vazhduar dhe po zgjerohen edhe në drejtim të personave të tjerë, kërkoi mirëkuptim nga gazetarët për mosparashtrim të pyetjeve.

    “Andaj, falë bashkëpunimit të ngushtë me qytetarët e Republikës së Kosovës kemi arritur që këtë rast delikat, sa i përket identifikimit të kryerësve të veprës penale, kemi arritur t’i arrestojmë brenda një afati të shkurtër kohor dhe ky rast si i tillë, target i së cilës kanë qenë qytetarët e Republikës së Kosovës, duke cenuar rëndë integritetin moral të tyre, sa i përket shpërndarjes së fotografive, video-incizimeve intime të cilat kanë krijuar pasiguri te qytetarët e Republikës së Kosovës”, tha Gashi.

    I dyshuari i parë i arrestuar lidhur me këtë rast është Edin Nevzadi, i cili që nga prilli është në paraburgim.

    Sipas dosjes së Prokurorisë, ai vazhdimisht nga muaji nëntor i vitit 2023 e deri më 12 shkurt 2024, në Obiliq dhe qytete të tjera të ndryshme të Kosovës, në cilësi të njërit nga administratorët e grupit “Albkings”, në aplikacionin Telegram, e duke vepruar në bashkëkryerje, ka ofruar dhe shpërndarë fotografi intime dhe ua merrte identitetet qytetarëve të Kosovës.

  • Arrestohet gruaja në Gjilan, dyshohet se gënjeu se u dhunua

    Arrestohet gruaja në Gjilan, dyshohet se gënjeu se u dhunua

    Përgatiti: Kastriot Tahiri

    Një grua në Gjilan është arrestuar dhe është dërguar në mbajtje për 48 orë, për shkak se dyshohet se bëri kallëzim të rremë në polici, duke e bërë veten dhe të birin e saj, viktima të tri veprave penale.

    Të shtunën e kaluar, ajo raportoi në polici se u grabit e u dhunua seksualisht nga dy persona, në rrugën “Skifter Arifi”, afër varrezave të Gjilanit. Ndërsa, për djalin e vet 17 vjeç, tha se është rrahur po nga ata persona të maskuar.

    “Prokuroria Themelore në Gjilan ju njofton se në koordinim të plotë me Policinë e Kosovës – Drejtorinë Rajonale në Gjilan, pas hetimeve intensive, ka ndaluar të dyshuarën N.R., për shkak të veprës penale ‘Lajmërimi apo kallëzimi i rremë’”, thuhet në përgjigjen e Prokurorisë Themelore në Gjilan.

    Prokurorisë dhe policisë rajonale të Gjilanit iu deshën 5 ditë që ta zbulojnë këtë. Në bazë të provave që kanë siguruar nga hetimet, ato thanë se bëhet fjalë për inskenim.

    “Bazuar në provat e marra, deklarimet e palëve të përfshira në rast, raportet mjekësore nga Instituti i Mjekësisë Ligjore, analizimit të shumë materialeve me video-incizime janë siguruar dëshmi se gjithë ngjarja ka qenë një inskenim dhe ajo ka raportuar rrejshëm me rastin e lajmërimit të saj në polici”, thuhet më tej në përgjigjen e Prokurorisë Themelore në Gjilan.

    Por, në përgjigjen e Prokurorisë nuk përmenden plagët e gruas e as gjendja e të birit, të treguara në raportin fillestar të Spitalit të Gjilanit.

    Drejtori i spitalit Rajonal të Gjilanit, Arsim Emini, i tha të dielën ATV-së, se gruaja kishte pasur gërvishtje dhe gjakderdhje. Por televizioni mëson se më 25 maj, ekzaminimi gjinekologjik në QKUK nuk qe i mundur për shkak të gjakderdhjes.

    Një ekzaminim i tillë u bë tek pas 3 dite, më 29 maj, e që rezultoi se gjakderdhja përkon me gjakun menstrual dhe se nuk ka pasur shenja dhunimi.

    I pyetur gjatë të enjtes nga ATV-ja, Drejtori i Spitalit, përmes telefonit pa dhënë detaje, tha se e dyshuara në emergjencë ka ardhur me ato plagë, që janë shkruar në raportin mjekësor, të cilin e posedon edhe policia.

    Ngjarja që tash po cilësohet si kallëzim i rremë, u raportua se kishte ndodhur në një rrugë, që është vetëm 1.5 kilometra larg qendrës së Gjilanit.

  • Depërtimi i “furishëm” i Inteligjencës Artificiale në rajon

    Depërtimi i “furishëm” i Inteligjencës Artificiale në rajon

    Nga Klesiana Omeri dhe Nora Luta

    E veshur me xhaketë të zezë, e kuruar në detaje “Tokyo Tirana” u shfaq në Euroneës Albania në 2 tetor, 2023, teksa përcillte çdo informacion me shumë saktësi, pa pasur nevojë as për letër dhe as për promter. Në pamje të parë nuk ka asnjë element që mund të krijoj habi, derisa mëson se Tokyo është krijimi i Inteligjencës Artificiale që flet për herë të parë shqip.

    I gjithë ky revolucion ngriti shqetësimet e para për manipulimin e informacionit, që dukshëm kishte depërtuar në rajon. Shqipëria dhe Kosova nuk i shpëtuan pasojave të para.

    Në Shqipëri, të parët që u përballën me efektet negative ishin personazhet e shoëbiz-it. Një video erotike me pretendimin se ishte e moderatores Luana Vjollca qarkulloi masivisht në rrjetet sociale, dhe vetëm pas analizës së ekspertëve u vertetua se bëhej fjalë për një prodhim të Inteligjencës Artificiale.

    Eksperti i Teknologjisë, Tomi Kallanxhi e sheh Inteligjencën Artificiale si burim rreziku, kryesisht për materialet që qarkullojnë në disa aplikacione online dhe që sipas tij janë më të vështira për tu evidentuar si të rreme.

    “Inteligjenca artificiale mund të manipulojë informacionin, sidomos në rrjetet sociale, si psh Tik Tok ku në mënyrë të vetëdijshme lejohet që të postohet çdo informacion i mundshëm dhe nëpërmjet Inteligjencës Artificiale mund të prodhojmë video ose audio dhe prodhime zërash pafund, dhe pikërisht këto materiale janë më të vështira për tu kontrolluar” , shprehet Kallanxhi.

    Teksa në Shqipëri targeti ishin personazhet e “botës rozë”, në Kosovë Inteligjenca Artificiale kishte depërtuar edhe më thellë.

    Një video që shfaqte presidentin e Shteteve të Bashkuara të Amerikës Joe Biden, duke thënë se “Nëse Serbia nis agresionin kundër fqinjëve të saj, Kosovës ose Bosnjë e Hercegovinës, SHBA-ja do të hezitoj të përdor të gjithë forcën e nevojshme në përgjigje”, mori hov pothuajse në të gjitha rrjetet sociale në Kosovë, duke nxitur një impakt pozitiv te publiku kosovar, i cili njihet për lidhjen e veçantë me shtetin amerikan. Video mori mbi 70 mijë klikime e qindra komente.
    Por pas verifikimit nga Hibrid, doli se deklarata e presidentit amerikan është e rreme, dhe se për përmbajtjen e saj u përdor Intelegjenca Artificiale.

    Nga Hibrid.info, e cila merret me verifikimin e lajmeve të rreme, thonë se kanë hasur në dhjetëra raste të tilla vetëm muajve të fundit. Sipas tyre paportimet përmes AI-së kanë marrë hov, sidomos në rrjetet sociale si TikTok, Instagram e Facebook.

    Mediat aspak gati për vrullin e Inteligjencës Artificiale.

    Ky revolucion teknologjik duket se gjen më të papërgatitur mediat në Shqipëri dhe Kosovë, të cilat në shumë raste kanë dështuar në evidentimin e lajmeve dhe imazheve të rreme të prodhuara nga Inteligjenca Artificiale.

    Në Shqipëri, një fakt të tillë e konfirmoi eksperimenti i gazetarit Emirjon Senja, i cili me vetëdije prodhoi një lajm të rremë me imazhe të krijuara nga kjo teknologji.

    Imazhet qarkulluan masivisht nëpër media të tjera sociale, duke u marrë si të mirqëna, pa bërë asnjë përpjekje për verifikim.
    Për gazetarin dhe ekspertin e komunikimit Emirjon Senja, Inteligjenca Artificiale ka hequr edhe pengesën e fundit për lajmet e rreme, që ishte kostoja e prodhimit.

    “Kostoja e prodhimit deri më tani pengonte shumë të tjerë që të futeshin në treg pasi të prodhojë duhej të paguaje. Sot, mund të prodhosh tekst, foto apo video përmes aplikacioneve të AI pa asnjë kosto. Zerimi i kostos së shpërndarjes përmes rrjeteve sociale më herët dhe zerimi i kostos së prodhimit tani përmes AI e ka bërë më të lehtë pëhapjen e lajmeve të pavërteta”, thotë ndër të tjera Senja.

    Gazetari i grupit “Koha” në Kosovë, Fitim Gashi përmend një rast në Kosovë, sikurse është publikimi i një audio-incizimi, ku pretendohej për një bisedë mes kryeministrit të Kosovës, Albin Kurti dhe Ambasadorit të ShBA-së, Jeffrey Hovenier.

    “Pra, ishte marrë zëri dhe fotoja e dy protagonistëve ku nëpërmjet tyre janë prodhuar fjali sikur ata i kanë thënë. Sipas bisedës së fabrikuar që nuk është bërë asnjëherë, Kurti i thotë ambasadorit se “do t’i arrestojnë të gjithë serbët në veri, pa marrë parasysh nëse janë fajtor apo jo”, rrëfen Gashi.

    Kjo audio u publikua pas shpërthimit të tensioneve në veriun e populluar me shumicë serbe më 26 maj 2023, kur u vendosën kryetarët shqiptarë në objektet komunale, me ndihmën e njësive speciale të Policisë së Kosovës.

    Për gazetarin Fitim Gashi, një ndër rreziqet e Inteligjencës Artificiale është mënyra paragjykuese dhe ndonjëherë mungesa e saktësisë së informacioneve që ofron.

    “Prandaj është me rëndësi që gazetarët ta njohin kontekstin e çështjes për të cilën raportojnë duke bërë gjithmonë verifikim të fakteve dhe informacioneve. Nga ajo që kemi arritur të identifikojmë është se informatat e rrejshme nuk po shpërndahen vetëm përmes përmbajtjes nëpërmjet raportimeve gazetareske, por gjithnjë e më shumë ka edhe video dhe audio të manipuluara të cilat nxirren nga konteksti dhe përdoren për të dezinformuar”, thotë Gashi.

    Fatbardh Dema, që është përgjegjës në HIBRID për kontrollimin e fakteve, thotë se tashmë parandalimi i përdorimit të AI-së edhe në gazetari është teknikisht i pamundur. “Ne jemi të fokusuar tek edukimi i audiencës për njohjen dhe identifikimin e përmbajtjeve të gjeneruara me inteligjencë artificiale, në mënyrë që të mos bien pre e tyre”, thotë Dema.

    Ndërkohë nga Asociacioni i Gazetarëve të Kosovës kanë treguar se deri tani nuk kanë të dhënë se sa përdorët AI nga gazetarët në shtetin kosovar, por pohojnë se është një revolucion i jashtëzakonshëm, që nëse përdoret në formë të përgjegjshme, mund të shkurtojë kohën e punës së gazetarëve sa i përket transkriptimit, përkthimit deri në një masë, dhe të tjerave punë kryesisht teknike.

    “Tashmë e kemi parë këtë të përdoret, sidomos sa i përket luftës në Ukrainë dhe asaj mes Izraelit dhe Hamasit. Ndërsa ajo cfarë kemi parë në Kosovë e që ka qenë shumë shqetësuese është përdorimi i një fotografite të Liridona Ademajt, të shndërruar në video pas vrasjes së saj, në të cilën duket sikur ajo po flet. Kjo është bërë nga një faqe online në Shqipëri”, thotë kryetari i AGK-së, Xhemajl Rexha.

    Një tjetër këndvështrim vjen nga i Asosacionit të Gazetarëve të Shqipërisë, Kryetari Isa Myzyraj thotë se roli i gazetarit është i pazëvëndësueshëm, por vendos para përgjegjësisë mediat që duhet të shtojnë kapacitetet e identifikimit.

    “Gazetarët nuk janë të rrezikuara nga AI, pasi askush, asgjë dhe kurrë nuk mund ta zëvendësojë rolin e gazetarit nē gjetjen e lajmit apo kontaktit me burime. Ndërkohë mediat janë në rrezik për shkak se duhet të shtojnë kapacitetet sa i perket identifikimit te vertetesise së lajmeve, imazheve dhe videove. Pra, AI sot është e gatshme të prodhoje mjaft imazhe në dukje të vërteta, dhe mediat mund te bien pre e ketyre imazheve dhe ti transmetojne si të verteta”, thotë Myzyraj.

    Eksperti , Tomi Kallanxhi evidenton aplikacionet më problematike dhe ato të cilat kanë më shumë filtra mbrojtës, ku më së shumti qarkullojnë lajmet online.

    Në rrjetet sociale të tjera, si puna e “Meta”- s, është thuajse e pamundur të mos evidentohet materiali i rremë sepse çdo artikull që postohet në facebook apo Instagram kontrollohet nga sektori i censurës. Psh: Facebook ka mbi 50 mijë “content menager” që kontrollojnë çdo artikull që hidhet. Në facebook është më e vështirë të prodhosh një fake neës se sa në Tik Tok”, thotë Kallanxhi.

    Inteligjenca artificiale dhe zgjedhjet
    Teksa nëpërmjet Inteligjencës Artificiale janë prodhuar shumë lajme të rreme në SHBA, Europë por dhe Azi, është ngritur alarmi në shumë shtete të tjera, që do t’i organzojnë zgjedhjet vitin e ardhshëm. Sfidë mbetet edhe për Shqipërinë, e cila pranverën e ardhshme do të ketë garën parlamentare.

    Rrjetet sociale çdo vit e më shumë po përfitojnë terren nga politikanët në vendin tonë, si një avantazh i fuqishëm për të komunikuar me zgjedhësit e tyre sidomos në kushtet e një gare. Katër muaj më parë, kryeministri Edi Rama hapi siparin e politikanëve që shfrytëzojnë Inteligjencën Artificiale për të përcjellë mesazhe, pasi zgjodhi që urimin tradicional të fundvitit ta përcillte nëpërmjet një video të krijuar nga kjo teknologji.

    Kjo ishte një dëshmi e qartë se ky progres teknologjik po shënonte një fazë të rëndësishme në vendin tonë. Drejtuesja e AKSH dha këtë argumentim për krijimin e kësaj video.

    “Ne morëm një foto nga urimi juaj i vitit të kaluar, bashkëpunuam me zyrën e shtypit, dhe pastaj e mori koka e Departamentit të Inteligjencës artificiale në AKSH dhe pastaj krijoi videon që pamë”, tha ajo.

    Për gazetarët që mbulojnë aktivitetin politik, përdorimi i kësaj teknologjike rrit ndjeshëm rrezikun për dezinformim në zgjedhjet e ardhshme parlamentare.

    “Shumëkush as nuk e kuptoi videon e kryeministrit Rama të prodhuar nëpërmjet Inteligjencës Artificiale, dhe nëse do të shihje komentet e audiencës, shumica nuk ishin as të habitur dhe as të impresionuar që për herë të parë urimin tradicional nuk po e merrnin nga vetë kryeministri, por uronin dhe vlerësonin punën dhe ato çfarë imazhi i prodhuar nga AI thoshte. Kjo tregon mundësitë e shumta për të manipuluar audiencën nëpërmjet imazhit të prodhuar nga kjo teknologji edhe gjatë një periudhe të ndjeshme siç është ajo e fushatave zgjedhore”, shprehet gazetari i News 24 në Shqipëri, Osman Stafa.
    Për reporterin në Kosovë, Fitim Gashi, i cili së fundmi udhëheq edhe projektin kundër dezinformit në “Sbunker”, rrjetet sociale janë një element i rëndësishëm për shpërndarjen e lajmeve të rreme gjatë periudhës së zgjedhjeve.

    “Dezinformimet që prodhohen përmes inteligjencës artificiale në kohë zgjedhjesh në përgjithësi mund të përfshijnë shpifjen, përdorimin e fotove apo videove duke i nxjerrë nga konteksti me qëllimin që të ndikohet në orientimin e votuesve. Kjo kryesisht bëhet përmes mediave sociale, të cilat në kohë zgjedhjesh përdoren nga partitë politike. Ato krijojnë faqe të ndryshme për të shpërndarë informacione të rrejshme, me synim krijimin e një perceptimi të pavërtetë rreth kandidatëve, partive politike, ose vetë procesit zgjedhor”, thekson Gashi.

    Kjo është konstatuar edhe në raportet e ndryshme ndërkombëtare, si në atë të Misionit të Vëzhguesve të Bashkimit Evropian sipas të cilit në zgjedhjet e kaluara në Kosovë aktorët politikë shpesh përdornin portalet e lajmeve si faqe dezinformimi dhe duke gjeneruar dezinformata me synimin që të arrihen qëllimet politike.

    Gazmend Syla, drejtor i informacionit në Klan Kosova, me përvojë shumë vjeçare në gazetarinë kosovare thotë se çfarëdo zhvillimi tjetër teknologjik mund të rrezikoj raportimin profesional, të dinjitetshëm dhe etik.

    “Mund të ndikojë në raportim vetëm për ato raste kur dikush i beson qorrazInteligjences artificiale. Përndryshe, për çdo gazetare, përfshirë atë që ka nisur punen para dy jave, e di se gjithcka duhet kontrolluar e verifikuar të paktën dy herë para se të publikoj diçka. AI mund ta propozojë një super raport, për një filan ngjarje ose temë, por kurrë nuk do të jete në gjendje ta bëjë atë sikur një gazetar që ka qenë fizikisht në atë ngjarje, ose që merret shume kohë e profesionalisht me një temë të caktuar”, thotë Syla, i cili përmend që intelegjenca artificiale mund të përdoret nga gazetari, por jo të ketë kontroll mbi të dhe raportimin professional. “ Që AI mund t’i hyjë në pune një gazetari, kjo është shume e vërtete, por unë, si një dashamir i gazetarisë që bëhet prej gazetarit njeri, besoj se ky i fundit duhet ta kete kontrollin mbi AI-se dhe jo e kunderta”, thekson ndër të tjera drejtori i Informacionit në Klan Kosova.

    Eksperti i teknologjisë, Tomi Kallanxhi evidenton sfidën e madhe që mediat dhe gazetarët mund të hasin gjatë zgjedhjeve të ardhshme nëse materialet e rreme do të prodhohen nga vende ku BE e ka të pamundur kontrollin.

    “Zgjedhjet e ardhshme do jenë ndoshta më agresive, ku Inteligjenca Artificiale mund të prekë majat, pasi këto lloj mjetesh të Inteligjencës Artificiale nuk lejohen në BE, sepse çdo përdorues duhet të verifikohet. Por kemi një problem tjetër, sepse shumica e këtyre start ap- eve që prodhojnë lajmet fake ndodhen në Rusi, Pakistan dhe Bangladesh, gjë që e bën më të vështirë dhe thuajse të pamundur kontrollin e tyre”, shpjegon Kallanxhi.

    Sipas të dhënave nga “Oxford Insights” në vitin 2022, Indeksi i Gatishmërisë së Inteligjencës Artificiale në Shqipëri dhe Kosovë ka pësuar rritje.

    Të gjitha këto të dhëna dhe këndvështrime janë një tregues se Inteligjenca Artificiale është një sfidë për tregun mediatik në të dyja vendet, të cilat i gjen të papërgatitura. Teksa kanë një “luftë” të hapur me dezinformimin, metoda të reja për shpërndarjen e tij shfaqen në horizont.
    Aq sa konsiderohet një mundësi për gazetari efikase, po aq i përball mediat dhe gazetarët me kërcënimin e integritetit të informacionit.

  • Hapja e Urës së Ibrit, Zyra e BE-së: Çdo vendim duhet të bëhet në kuadër të dialogut

    Hapja e Urës së Ibrit, Zyra e BE-së: Çdo vendim duhet të bëhet në kuadër të dialogut

    Hapja e Urës së Ibrit është bërë temë diskutimi së fundmi në vend.

    Lidhur me këtë janë deklaruar nga Zyra e Bashkimit Evropian në Prishtinë.

    Në një përgjigje për Klankosova.tv, zëdhënësja Ioanna Lachana tha se çdo vendim lidhur me urën në fjalë duhet të bëhet në kuadër të dialogut në Bruksel .

    Ajo deklaroi se hapja e urës është marrëveshje e arritur në dialogun Kosovë-Serbi.

    “Hapja e urës së Mitrovicës është temë e dy marrëveshjeve të arritura nga palët në kuadër të dialogut të lehtësuar nga BE-ja në vitin 2015 dhe 2016. Pavarësisht përpjekjeve të BE-së për lehtësimin ndër vite, ura mbetet e mbyllur për trafik. Duke qenë se kjo është një çështje që i përket dialogut të ndërmjetësuar nga BE-ja, negociatat dhe çdo vendim lidhur me urën duhet të bëhen në kuadër të dialogut me pjesëmarrjen e delegacioneve zyrtare të Kosovës dhe Serbisë”, tha Lachana.

    Zëdhënësja e Zyrës së BE-së në Kosovë i ftoi palët që të zbatojnë çdo marrëveshje të arritur në dialogun e lehtësuar nga BE-ja.

    “BE-ja mbetet e gatshme për të lehtësuar bisedimet. BE-ja gjithashtu u kërkon të gjithëve që të përmbahen nga çdo veprim provokues që mund të rrezikojë stabilitetin e terrenit dhe të largojë palët nga zbatimi i Marrëveshjes për Rrugën e Normalizimit të Marrëdhënieve – që duhet të jetë prioriteti i tyre kryesor”, deklaroi Lachana.

    Lidhur me këtë është deklaruar edhe policia.

    Zëvendësdrejtori për rajonin e veriut Veton Elshani, i pyetur në lidhje me mundësinë e hapjes së Urës së Ibrit për trafik, tha për Klankosova.tv se “policia është e gatshme të zbatojë çdo vendim të Qeverisë së Kosovës”.

  • Komuna e Zveçanit e shkarkon nënkryetaren serbe

    Komuna e Zveçanit e shkarkon nënkryetaren serbe

    Kryetari i Zveçanit, ka shkarkuar sot nga detyra nënkryetaren e Komunës, Natasha Tomaniq.

    Vendimi është marrë sot në mbledhjen e Kuvendit Komunal të Zveçanit që ështa mbajtur në orën 10:00.

    Aty është votuar për shkarkimin e nënkryetares, ku 17 vota kanë qenë pro shkarkimit, asnjë kundër dhe asnjë abstenim.

    Shkarkimin e nënkryetares e ka konfirmuar edhe kryetari i Zveçanit, Ilir Peci.

    Ai ka thënë se vendimi është marrë sot në seancën e Kuvendit Komunal ku 17 asambleistë votuan pro shkarkimit të nënkryetares.

    Sipas tij, nënkryetarja ka kaluar disa herë kompetencat e saj në punë.

    Përveç kësaj ka bërë presion të vazhdueshëm ndaj zyrtarëve serbë në komunë te Zveçanit, ku si rrjedhojë tre zyrtarë serbë kanë dhene dorëheqje ditëve të fundit.

    Ndërsa si shkas i fundit për shkarkimin e saj ka qenë një marrëveshje që nënkryetarja ka bërë me një kompani italiane për një objekt që është në pronësi të komunës se Zveçanit.

    Vendimi është duke u protokolluar dhe pastaj do t’i përcillet nënkryetares Natasha Tomaniq./RTK

  • Vitia takon ambasadorin e ri të Anglisë, e falënderon për ndihmën në fushën e shëndetësisë

    Vitia takon ambasadorin e ri të Anglisë, e falënderon për ndihmën në fushën e shëndetësisë

    Ministri i Shëndetësisë Arben Vitia, priti në takim Ambasadorin e ri të Anglisë në Kosovë, z. Jonathan Hargreaves, duke i uruar mirëseardhje dhe suksese në detyrën e tij të re.

    Gjatë takimit, diskutuan për marrëdhëniet e shkëlqyera mes dy vendeve dhe përkushtimin e ndërsjellët për forcimin e bashkëpunimit.

    Ambasadori Hargreaves shprehu kënaqësinë e tij për të qenë në Kosovë dhe për të kontribuar në thellimin e bashkëpunimit mes dy vendeve mike.

    Ministri Vitia falënderoi Ambasadorin Hargreaves për bashkëpunimin e ngushtë në fushën e shëndetësisë dhe ndihmën e dhënë nga Anglia. Ministri gjithashtu falënderoj Royal College of General Practitioners për mbështetjen e tyre mbi dy dekada të Mjekësisë Familjare në Kosovë. Programi i Mjekësisë Familjare, i akredituar ndërkombëtarisht nga ky kolegj, ka ndikuar në ngritjen e cilësisë së shërbimeve të kujdesit parësor shëndetësor për qytetarët.

    Ambasadori Hargreaves në këtë takim ishte i shoqëruar nga Zyrtari për Politika Ekonomike dhe Tregtare në Ambasadën Britanike në Kosovë, Blond Gerqari.

  • Kurti nderon dëshmorët Rasim Kiçina e Ragip Halilaj në 25-vjetorin e rënies

    Kurti nderon dëshmorët Rasim Kiçina e Ragip Halilaj në 25-vjetorin e rënies

    Kryeministri i Kosovës, Albin Kurti, ka bërë homazhe në Marinë të Skenderajt, në 25 vjetorin e rënies së Rasim Kiçinës dhe Ragip Halilajt.

    “Në nderim të rënies heroike të dëshmorëve Rasim Kiçina dhe Ragip Halilaj, Kryeministri i Republikës së Kosovës, Albin Kurti, bëri homazhe në Kompleksin Memorial në Marinë të Komunës së Skenderajt. Kryeministri Kurti vendosi lule të freskëta në përkujtim të rënies heroike të dy luftëtarëve të Ushtrisë Çlirimtare të Kosovës në betejën e ashpër me forcat serbe.”

    Siç njofton ZKM, Kurti ka thënë se përjetë duhet të jemi falënderues dhe mirënjohës dëshmorëve, veteranëve e invalidëve të luftës.

    “Duke ju falënderuar luftës së tyre e shokëve të tyre, dëshmorëve, veteranëve e invalidëve të luftës, dhe popullit mbarë, gëzojmë lirinë dhe e kemi shtetin, tha Kryeministri, duke ritheksuar se u jemi përjetë mirënjohës dhe falënderues.”

    Kurti ka thënë se kjo duhet bartur brez pas brezi dhe institucionalizuar në muze në mënyrë që të mësohet historia e dëshmorëve.

    “Në bashkëbisedim me familjarët e dëshmorëve, Kryeministri Kurti vlerësoi kontributin e këtyre dy familjeve patriotike dhe i falënderoi për qëndresën e tyre.”

  • Haxhiu e mirëpret arrestimin e shtatë administratorëve të “Albkings”

    Haxhiu e mirëpret arrestimin e shtatë administratorëve të “Albkings”

    Ministrja e Drejtësisë, Albulena Haxhiu, ka thënë se e mirëpret angazhimin institucional të policisë dhe prokurorisë në mbylljen dhe arrestimin e administratorëve të grupit famëkeq në rrjetin social Telegram, “Albkings”.

    Haxhiu tha se “Albkings” mund të jetë një lajm i pasdites apo mbrëmjeve, por për shumë vajza dhe gra, viktima të këtij grupi do të mbetet plagë dhe traumë jetësore.

    “Si institucione e kemi për obligim që të mos lejojmë individë apo grupe njerëzish me mendësi kriminale që përmes rrjeteve sociale apo formave të tjera të shkatërrojnë jetët e vajzave dhe grave”, tha Haxhiu.

    Sot, prokuroria përmes një konference për media ka njoftuar se janë arrestuar shtatë persona të cilët administronin me grupin famëkeq “Albkings”.

  • Reali planifikon ta zyrtarizojë Mbappen para Euro 2024

    Reali planifikon ta zyrtarizojë Mbappen para Euro 2024

    Real Madridi po planifikon ta kompletojë dhe ta zyrtarizojë transferimin e Kylian Mbappes para fillimit të Kampionatit Evropian.

    “Los Blancos” nuk besojnë se do të kenë telashe nga klubi aktual i futbollistit, Paris Saint-Germain, njofton gazetari sportiv italian Fabrizio Romano.

    Edhe pse ka kontratë me PSG-në deri në fund të qershorit, Mbappé mund të zyrtarizohet nga “Los Blancos” para “Euro 2024”.

    Reali aktualisht është i fokusuar totalisht tek finalja e Wembleyt, që do të luhet këtë fundjavë ndaj Borussia Dortmundit, ku synon ta fitojë trofeun e 15-të të Championsit.

    E më pas, “Mbretërit” mund ta bëjnë publik transferimin e njërit prej futbollistëve më të mirë në botë.

    Vetë ish-futbollisti i Monacos foli mbrëmë rreth të ardhmes duke thënë se klubi i tij i ardhshëm do të zyrtarizohet së shpejti, por nuk përmendi emrin.

    “Ekipi im i ardhshëm do të zyrtarizohet shpejt, është çështje ditësh. Mezi po pres, jam i lumtur. Duhet vetëm të presim për disa ditë”, tha Mbappe.