Author: ATVLive

I pari i LDK-së, Lumir Abdixhiku ka thënë se ideja e tij për qeveri nacionale të tranzicionit është për zgjidhje politike, pasi që Kosova është në krizë të madhe.

‘‘Qëndrimi i LDK-së është pa ndryshueshëm, mos e ngritni si temë, nuk do të ndryshojë ky qëndrim pavarësisht se a vjen një letër a sa letra vijnë. Nuk e kam ndërmend as ta tradhtojë votuesin e LDK-së. Votuesit tanë le të qëndrojnë të qetë, unë po flas për një zgjidhje politike në një krizë të madhe në të cilën është Kosova’’, ka thënë ai.

I njëjti ka thënë se kjo qeveri do të zgjasë deri në zgjedhjen e Presidentit të ri, dhe se Vv-ja s’ka zgjidhje për këtë krizë.

‘‘Deri në zgjedhjen e Presidentit, e kam fjalën për periudhë, presidentit të ri. Jemi në krizë, dhe partia e parë nuk ka zgjidhje për krizë, ka tendencë bllokuese. Zgjedhjet nuk përjashtohen, nëse janë të gatshëm për zgjedhje shkojmë edhe në zgjedhje’’, ka thënë ai.

Kryetari i LDK-së Lumir Abdixhiku ka thënë se kreu i AAK-së, Ramush Haradinaj, e ka pranuar ftesën e tij, raporton EO.

Abdixhiku doli me propozimin për krijimin e qeverisë së tranzicionit. Këtë qëndrim e paraqiti në konferencë për media pasdite.

Në 28-vjetorin e rënies së heroit të kombit, Luan Haradinaj, janë mbajtur homazhe në kompleksin memorial në Gllogjan.

Aty morën pjesë kryetari i AAK-së, Ramush Haradinaj, kryetari i Deçanit, Bashkim Ramosaj, kryetari i BDI-së, Ali Ahmeti, kryetari i Drenasit, Ramiz Lladrovci dhe të tjerë.

“Gjeneralmajor Luan Haradinaj, brezi i ri i luftëtarëve, ishte ndër të parët në organizimet çlirimtare, duke vënë themelet e UÇK-së, në të cilën u bashkuan mijëra të rinj të frymëzuar nga sakrifica e tij dhe e shumë të tjerëve,” theksoi Haradinaj në fjalën e tij.

Ai gjithashtu përkujtoi veprimtarin dhe atdhetarin e madh, Smajl Haradinaj, si simbol i përkushtimit dhe qëndresës kombëtare ndër breza.

“Dhembja dhe malli për të dashurit që humbëm nuk shuhet kurrë, por sakrifica e tyre është çmimi i lirisë sonë – dhe ajo na obligon të jetojmë me dinjitet dhe krenari,” u shpreh Haradinaj.

Në fund, ai falënderoi të gjithë ata që, me përkushtim, i shërbyen atdheut dhe nderoi kujtimin e përjetshëm të të rënëve për liri.

Ende nuk dihet se a po mbahet mbledhja e anëtarëve të Lidhjes Demokratike të Kosovës.

Ndonëse disa deputetë janë prononcuar për media, nuk kanë bërë të ditur se a po zhvillohet kjo mbledhje.

Në këtë mbledhje pritet të diskutohet rreth letrës që ka dërguar kryetari i Lëvizjes Vetëvendosje, Albin Kurti për një koalicion të përbashkët.

Ndërkaq pritet që të prononcohen nga LDK-ja, pas kësaj mbledhjeje.

Prokuroria Speciale e Republikës së Kosovës, pas zhvillimit të hetimeve disa mujore dhe aplikimit të masave të veçanta hetimore, ka arrestuar sot një person H.S. shtetas i Republikës së Kosovës, i dyshuar për kryerjen e veprës penale “Spiunazhi”.

Sipas njoftimit, aksioni dhe arrestimi është zhvilluar në bashkëpunim me Policinë e Kosovës – Drejtorinë për Hetimin e Krimit të Organizuar dhe Krimeve të Rënda, si dhe asistencën e Agjencisë së Kosovës për Inteligjencë, raporton KP.

“Po ashtu, në bazë të urdhëresës së gjykatës kompetente, është kryer edhe bastisje në dy lokacione në Kosovë, ku janë sekuestruar prova materiale, përfshirë edhe disa telefona, që dyshohet se janë përdorur nga i dyshuari gjatë kryerjes së veprës penale. Prokurori i shtetit nga PSRK-ja, ndaj të dyshuarit ka nxjerrë aktvendim për ndalim prej 48 orësh dhe ndaj të njëjtit do të ndërmerren të gjitha veprimet e nevojshme hetimore për zhvillimin e suksesshëm të procedurës penale”, thuhet në njoftimin e prokurorisë.

Policia e Trafikut në Prishtinë, në bashkëpunim me Ministrinë e Infrastrukturës, ka filluar zbatimin e një plani operativ për kontrollin e mjeteve të rënda – kamionëve në rajonin e Prishtinës.

Sipas një komunikate, ky plan ka për qëllim rritjen e sigurisë në trafikun rrugor, parandalimin e aksidenteve që përfshijnë mjete të rënda dhe sigurimin e respektimit të kritereve ligjore dhe teknike që rregullojnë këtë kategori të automjeteve.

“Kontrollet po zhvillohen në pika të përcaktuara me rëndësi, ku po verifikohet gjendja teknike e mjeteve, pesha e ngarkesës, dokumentacioni i nevojshëm, si dhe respektimi i orarit të drejtimit nga ana e shoferëve. Policia e Kosovës dhe Ministria e Infrastrukturës kërkojnë nga të gjithë pjesëmarrësit në trafik që të jenë të kujdesshëm, të respektojnë rregullat dhe të kontribuojnë në sigurinë e përgjithshme rrugore”, thuhet në njofitm.