Author: ATVLive

Komisioni për Ekonomi, Industri, Ndërmarrësi dhe Tregti, ka miratuar raportin me rekomandime për lexim të dytë për Projektligjin për Mbrojtjen e konsumatorit si dhe raportin me rekomandime për lexim të dytë të Projektligjit për Kripto-asetet, raporton EO.

Në mbledhjen e mbajtur të enjten, komisioni rishpalli edhe një herë konkursin për zgjedhjen e Kryesuesit të Komisionit Shqyrtues në Autoritetin Rregullator për Shërbimet e Ujit (ARrU).

Kryetari i këtij komisioni, Ferat Shala, tha se rishpallja e këtij konkursi po bëhet për shkak të mospjesëmarrjes të asnjë kandidati.

“Tani ky është si me thënë pjesa e dytë sepse e kemi pasur një shpallje por për shkak të mospjesëmarrjes të asnjë kandidati, ka dështuar konkursi dhe ne jemi të obliguar që ta rishpallim konkursin. Këtu nuk kemi më çka të diskutojmë përveç me votu fillimin e konkursit”, tha Shala.

Të enjten ka nisur seanca fillestare në gjykimin ndaj ish-kryeshefit të Korporatës Energjetike të Kosovës, Nagip Krasniqi, i cili dyshohet për veprën penale “Keqpërdorim i detyrës zyrtare”.

Krasniqi ishte arrestuar më 19 prill të vitit të kaluar, pas bastisjeve që janë kryer nga Njësia e Veçantë e Hetimeve, në zyrën e tij në KEK dhe dy banesat e tij. Deri në shtator qëndroi në paraburgim. Pas lirimit, iu ndalua t’i afrohej objektit të KEK-ut në 50 metra.

Krasniqi ishte emëruar në krye të KEK-ut në tetor të vitit 2021.

Aktakuza e ngritur ndaj ish-kryeshefit të KEK-ut është plotësisht e ndarë nga hetimi për të cilin u arrestua vitin e kaluar.

Pas arrestimit për dyshime për keqpërdorim të detyrës zyrtare në dy kontrata, Prokuroria e Shtetit ka filluar ta hetojë Krasniqin për tregti të energjisë me një kompani sllovene që nuk kishte licencë nga Zyra e Rregullatorit të Energjisë, për të vepruar në Kosovë. Nga dokumentet që ka sekuestruar hetuesia vitin e kaluar dhe nga ekzaminimi i komunikimeve online, është parë që Krasniqi ka qenë i njoftuar se kompania që po i shiste rrymë Kosovës nuk kishte licencë, por ka vazhduar punën me të.

Deputeti i Lidhjes Demokratike të Kosovës, Abdullah Hoti, tha se Kosova është nën masa financiare nga BE-ja për më shumë se një vit, të cilat sipas tij i kanë bllokuar reformat ekonomike e institucionale të Kosovës drejt BE-së, siç përcaktohet me Marrëveshjen e Stabilizim Asocimit Kosovë-BE të vitit 2016.

Ndërsa sipas tij Shtetet e Bashkuara të Amerikës nënshkruajnë marrëveshje me Serbinë për bashkëpunim strategjik shumëvjeçar në fushën e energjisë, fushë që është bërë çështje e sigurisë kombëtare.

Sipas Hotit qytetarët duhet ti bëjnë një varg pyetjesh për kryeministrin Albin Kurti dhe presidenten Vjosa Osmani.

Postimi i plotë i Avdullah Hotit:

Në anën tjetër, Kosova është nën masa financiare nga BE-ja për më shumë se një vit, të cilat i kanë bllokuar reformat ekonomike e institucionale të Kosovës drejt BE-së, siç përcaktohet me Marrëveshjen e Stabilizim Asocimit Kosovë-BE të vitit 2016. Së fundmi, Kosova po kërcënohet nga vendet kryesore të BE-së me përjashtim nga Procesi i Berlinit, i cili është mekanizmi formal i përgatitjes së Ballkanit Perëndimor për integrim evropian. Po ashtu, kanë ardhur paralajmërime nga SHBA-ja se mund të ndërpritet bashkëpunimi me Policinë e Kosovës.

Çdo qytetar sot duhet të pyes Kurtin dhe Osmanin: Përse nuk u zbatua Marrëveshja e Uashingtonit e 4 shtatorit 2020, e cila pritej të zgjidhte problemin e furnizimit me energji në Kosovë? Përse u anulua projekti i gazit? Përse nënçmohej partneriteti me SHBA për gaz duke iu referuar “aleanca e gypave”? Përse nuk u nis me amerikanët hekurudha për Durrës? Përse nuk u zbatua “Marrëveshja Kosovë-SHBA e 31 dhjetorit 2020 për nxitjen e investime”, e cila pritej të mobilizonte investimet amerikane në Kosovë? Kujt i përshtatet moszbatimi i Marrëveshjes së Uashingtonit nga ana e Kosovës?

Cenimi i partneritetit strategjik të Kosovës me SHBA-në duhet të jetë alarm shqetësues për secilin qytetar që e do Kosovën në BE dhe NATO, e në partneritet të ngushtë me SHBA-në.

Më 9 shkurt 2025 qytetarët vendosin për qeverisjen e ardhshme. Kjo është dita kur duhet të marrë fund kjo qeverisje e dëmshme për Kosovën, si dhe për aleatët e Kosovës që duan ta shohin popullin e Kosovës pjesë të familjes së popujve në BE dhe NATO.

Kryetari i Prishtinës, Përparim Rama ka prezantuar programin e Konferencës së dytë të investitorëve “Prishtina 2030”.

Në një konferencë për media, Rama potencoi se një numër i madh i investitorëve kanë shprehur interesim serioz për projektet.

Projekti i tregut të ri tek pjesa e rrethit të Flamurit, projekti i Tulltores, ndërtimi i një stacioni të ri të autobusëve, parku i ri që e lidhë Dardaninë me Kalabrinë dhe renovimi i Pallatit të Rinisë janë disa nga investimet që kryetari i Prishtinës, Përparim Rama prezantoi të enjten, raporton KosovaPress.

Në kuadër të investimeve Rama përmendi ndërtimin e Parkut të Shëndetit dhe Mirëqenies.

I pari i kryeqytetit theksoi se të gjitha këto investime do të bëhen pa shpenzuar asnjë cent nga buxheti i komunës.

Rama shtoi se të gjitha këto projekte janë të avancuara në aspketin arkitektonik dhe ndërlidhën me vizionin për transformimin e kryeqytetit.

Në konferencë, Rama u pyet lidhur me dështimin për miratimin e buxhetit të komunës për vitin 2025, për çka tha se opozita po bën gjithçka për ta bllokuar procesin për arsye siç tha ai ‘puro politike’.

Është shtyrë seanca e Kuvendit Komunal të Drenasit, e cila ishte thirrur për të votuar Propozim-vendimin për miratimin paraprak të vendimit për dhënien e 54 pronave të paluajtshme të Komunës së Drenasit për shfrytëzim afatgjatë nga persona fizikë/juridikë, për një periudhë prej 99 vjetësh, raporton ATV.

Kjo ndodhi pasi aktivistët e Lëvizjes Vetëvendosje, përmes një aksioni simbolik para komunës, i cili vazhdoi edhe brenda kuvendit komunal të Drenasit, kundërshtuan këtë projekt-vendim.

Me këtë rast, kryetari i Drenasit, Ramiz Lladrovci, kërkoi largimin e aktivistëve nga seanca e kuvendit komunal. Aktualisht, seanca është shtyrë dhe ende nuk dihet nëse do të vazhdojë punimet sot.

“Nuk kthehemi pa u largu aktivistët, nuk kanë të drejtë të jenë këtu”, ka deklaruar Lladrovci.

Mbledhja ishte paraparë të fillojë në orën 10:00, me 13 pika në rendin e ditës. /atvlive.tv

Kryeministri Albin Kurti ka udhëtuar sot për në Bruksel për të marrë pjesë në drekën e punës me liderë të Ballkanit Perëndimor, të ftuar nga presidentja e Komisionit Europian, Ursula von der Leyen, ka konfirmuar sot Zyra e Kryeministrit.

Pjesëmarrjen në këtë takim e kanë konfirmuar kryeministrat e Kosovës, Shqipërisë, Maqedonisë së Veriut, Malit të Zi dhe Bosnje e Hercegovinës, ndërsa Serbia do të përfaqësohet me presidentin e saj.

Pritet që në takim temat kryesore të jenë “agjenda e reformave dhe rritjes”, të cilat tashmë i kanë dorëzuar në Komisionin Europian të gjitha vendet e rajonit të Ballkanit, si parakusht për të pranuar pagesat e para nga Plani i Rritjes për Ballkanin Perëndimor.

Asambleistët e Lëvizjes Vetëvendosje sot kanë zhvilluar një aksion simbolik para nisjes së seancës në Kuvendin Komunal të Drenasit.

Përmes këtij aksioni, LV ka kundërshtuar Propozim vendimin për miratimin paraprak të Vendimit për dhënien e pronave të paluajtshme të Komunës së Drenasit për shfrytëzim afatgjatë personave fizik/juridik.

ATV mëson se nëse ky propozim kalon, janë gjithsej 54 prona që do të jepen për shfrytëzim. /atvlive.tv