Asociacioni i Gazetarëve të Kosovës, sot nga ora 13:00, do të publikojë raportin vjetor ‘Treguesit e nivelit të lirisë së medieve dhe sigurisë së gazetarëve’.
Po ashtu do të publikohet dhe ‘Indeksi i Sigurisë së Gazetarëve në Ballkanin Perëndimor’ – me autore Getoarbë Mulliqin dhe ass. hulumtuesen, Leonita Morina, në kuadër të Platformës Rajonale SafeJournalists.
Eventi do të mbahet afër Qeverisë së Republikës së Kosovës.
Jahtëzakonisht interesante duket renditja tabelare e Supelrigës së Kosovës në futboll pas gjashtë xhirove të zhvilluara në këtë edicion garues. Disa prej ndeshjeve derbi janë zhvilluar gjatë këtyre javëve të para, por renditja është mjaftë interesante.
Në fakt, befasia e madhe është sepse lider momental është klubi i sapo inkuadruar në Superligë, Suhareka me 13 pikë, aq sa ka edhe Malisheva në vendin e dytë, raporton KosovaPress.
Tri prej skuadrave më të mëdha kosovare, Prishtina, Ballkani dhe Llapi kanë mbledhur nga dhjetë pikë duke ndarë pozitat tre, katër dhe pesë.
Tutje, në vendin e gjashtë pozicionohet Drita më nëntë pikë, e ndjekur nga Dukagjini me gjashtë, kurse në tri pozitat e fundit renditen Gjilani me pesë pikë, Ferizaj me katër dhe e fundit është Feronikeli 74 pa pikë.
Friedrich Merz, lideri i CDU-së (Unionit Kristian Demokrat), ka pasur një rrugëtim të vështirë dhe të mbushur me pengesa në ambiciet e tij për të arritur postin e kancelarit të Gjermanisë.
Sipas një artikulli nga prestigjiozja “The Economist”, ambiciet e Friedrich Merz për të arritur pozitat e larta politike janë penguar vazhdimisht nga situata, rivalë, apo edhe nga vetë ai.
Pas mbështetjes së rëndësishme nga Markus Söder, lideri i CSU-së (Unionit Kristian Social) të Bavarisë, Merz duket se tani ka një mundësi reale për të realizuar këtë qëllim.
“Për mbështetësit e Merz, dorëzimi i qetë i Söder, një vit para zgjedhjeve, flet për evoluimin e aftësive politike të tij”, thekson “The Economist”.
Megjithatë, rruga e Merz ka qenë e mbushur me vështirësi.
Pas fillimeve të tij të suksesshme në politikë, ai u përball me një goditje të rëndë kur Angela Merkel, liderja e re e CDU-së, e hoqi nga posti i tij në vitin 2002.
Pas kësaj, ai u tërhoq nga politika për një karrierë të suksesshme në botën juridike të korporatave.
Rikthimi i tij në politikë në vitin 2018, kur kandidoi për lider të CDU-së pas dorëheqjes së Merkelit, e vendosi atë në qendër të vëmendjes.
Megjithatë, ai humbi ndaj Annegret Kramp-Karrenbauer, dhe pas një periudhe të vështirë, arriti të merrte postin e liderit të CDU-së në janar 2022.
“Pas dështimeve të Kramp-Karrenbauer dhe një humbjeje katastrofike të Armin Laschet në zgjedhjet e vitit 2021, kjo ishte hera e tretë me fat për Merz”, shkruan “The Economist”.
Që nga atëherë, Merz është përpjekur të balancojë qëndrimet e moderuara me ato më konservatore brenda partisë.
Ai ka pasur disa momentet problematike, siç ishte komenti i tij mbi refugjatët dhe vizitat e tyre te dentisti, që ngjalli polemika.
Pavarësisht kësaj, ai është ri-zgjedhur lehtësisht si lider i CDU-së në maj të këtij viti, dhe partia duket se është e bashkuar përballë një qeverie jo të pëlqyeshme nën udhëheqjen e Olaf Scholz.
Merz tani përqendrohet në çështjet ekonomike, duke kritikuar qeverinë për menaxhimin e dobët të emigracionit dhe duke theksuar nevojën për të ndihmuar industrinë gjermane, veçanërisht automobilat, duke luftuar propozimet e BE-së për t’i dhënë fund motorëve me djegie të brendshme.
Ai shpreh mbështetje për NATO-n dhe ka kritikuar Scholz për refuzimin e dërgimit të raketave Taurus në Ukrainë.
Megjithatë, sfidat e Merz janë të shumta.
Sondazhet tregojnë se, pavarësisht përmirësimit të CDU-së në krahasim me qeverinë aktuale, shumë gjermanë nuk e shohin si një kandidat më tërheqës për kancelar sesa Scholz.
Një përqindje e konsiderueshme e votuesve të tij nuk e mbështesin dhe ai ka përballë një opinion të dobët mes grave dhe votuesve më të rinj.
Gjithashtu, Merz do të duhet të përballet me ndarjet brenda partisë, sidomos në lidhje me partneritetet e mundshme me partitë e tjera.
Disa anëtarë të CDU-së kanë një antipati të fortë ndaj të Gjelbërve, partnerët e Scholz, por Merz mund të ketë nevojë për ata për të formuar një qeveri.
Pavarësisht sfidave të shumta, rruga e Merz drejt kancelarisë mbetet interesante.
Ndonëse ka arritur të konsolidojë mbështetje, ai duhet të tregojë se është i gatshëm për të përballuar sfidat e ardhshme dhe të fitojë besimin e një elektorati të ndryshëm.
Koha do të tregojë nëse ai do të arrijë të realizojë ambiciet e tij.
Sipas “The Economist”, ndonëse pak e prisnin që ai të arrinte kaq larg, prova më të vështira e presin ende Merz.
Një furgon është kapluar nga zjarri në Leposaviq.
Sipas policisë, automjeti i takonte një fabrike.
Policia e Kosovës ka nisur hetimet mbi rastin.
“Raportohet se është përfshirë nga zjarri një automjet kombi pronë e një fabrike. Në vendin e ngjarjes kanë dalë njësitet përkatëse. Rasti nën hetime”, thuhet në raportin e policisë.
Përkundër bisedimeve me vite, Kosova dhe Serbia duket se nuk mund të gjejnë gjuhë të përbashkët. Ato jo vetëm që e kanë të vështirë të komunikojnë, por akuzojnë vazhdimisht njëra-tjetrën se nuk duan paqe.
Për presidentin e Serbisë, Aleksandar Vuçiq, autoritetet e Kosovës ushtrojnë “dhunë” ndaj komunitetit serb në veri, shkruan Radio Evropa e Lirë.
Me “lëvizjet arrogante dhe ilegale, Prishtina rrezikon sigurinë e popullatës serbe”, ka thënë ai, kur Kosova ka mbyllur disa institucione paralele të Serbisë në veri të vendit.
Brenda një jave, kryeministri i Kosovës, Albin Kurti, ka tërhequr vërejtjen së paku dy herë për rrezikun e konflikteve të reja nga Serbia.
I pyetur nga gazetarët më 17 shtator se si i komenton disa kërkesa të Vuçiqit për serbët e veriut që të riintegrohen në institucionet e Kosovës, Kurti ka thënë se ato “nuk janë racionale”.
“[Kërkesat e Vuçiqit] nuk janë aspak paqësore, por, përkundrazi, janë pjesë e fushatës agresive për konflikte të reja, të cilat padyshim se nuk kanë vend as në Kosovë, as askund”, ka thënë Kurti.
Katër ditë përpara kësaj deklarate, Kurti ka bërë një paralajmërim të ngjashëm edhe përmes llogarisë së tij në Facebook, ku ka siguruar, po ashtu, se Kosova është e gatshme për mbrojtjen e qytetarëve të saj.
“Serbia e drejtuar nga ministri i Millosheviqit, në bashkëpunim me Rusinë, po përgatit kërcënime dhe ultimatume të reja në drejtim të Kosovës… Sot, Kosova është më e fortë se kurrë më parë, nuk trembet nga kërcënimet. Ne mbrojmë të gjithë qytetarët tanë dhe liritë e të drejtat e tyre”, ka shkruar Kurti.
Në frymë të ngjashme është shprehur edhe presidentja e Kosovës, Vjosa Osmani. Por, sipas saj, “assesi” nuk duhet pasur frikë nga Vuçiqi.
Me armatimin që ka blerë Kosova dhe me forcimin e përditshëm të institucioneve të sigurisë, “ne jemi shumë më të fortë seç kemi qenë më parë”, ka thënë Osmani më 17 shtator në një adresim para gazetarëve.
Më 24 të këtij muaji bëhet saktësisht një vit që kur një grup i armatosur serbësh ka sulmuar policinë e Kosovës në Banjskë afër Zveçanit dhe ka vrarë një polic. Gjatë shkëmbimit të zjarrit që ka pasuar, janë vrarë edhe tre sulmues serbë.
Në aktakuzën që ka ngritur Prokuroria Speciale e Kosovës për rastin, thuhet se “grupi, përmes përdorimit të armëve të rënda, ka tentuar ta ndante pjesën veriore të territorit të Republikës së Kosovës dhe t’ia bashkonte atë territorit të Republikës së Serbisë”.
Kurti dhe Osmani, në disa deklarime, e kanë fajësuar direkt udhëheqjen shtetërore të Serbisë për sulmin, edhe pse ajo e ka mohuar.
Serbia karakterizohet si “kërcënim kryesor” për sigurinë e Kosovës edhe në Strategjinë e vendit për Sigurinë, për vitet 2022-2027.
Kosova dhe Serbia ndajnë një vijë kufitare të gjatë rreth 400 kilometra. Përgjegjës për sigurinë e kufijve të Kosovës me Serbinë është misioni paqeruajtës i NATO-s, KFOR, ndërsa për pjesën tjetër të vijës kufitare është Policia e Kosovës.
I kontaktuar nga Radio Evropa e Lirë, KFOR-i thotë se situata në terren është e qetë, por mbetet e brishtë.
“Misioni ynë ka një prani të dukshme dhe fleksibile, si dhe është i dislokuar mirë për të adresuar çdo zhvillim të rëndësishëm të sigurisë, në përputhje me mandatin e tij nga OKB-ja. Është e rëndësishme të shmangen veprimet që mund të krijojnë tensione të panevojshme”, thotë një zëdhënës i misionit.
Ish-zyrtari i NATO-s, Jamie Shea, kujton se KFOR-i, pas sulmit në Banjskë, e ka rritur praninë në Kosovë dhe kjo, sipas tij, ka dhënë “shumë mësime për sigurinë”.
Duke folur për programin Expose të Radios Evropa e Lirë, Shea thotë se është e rëndësishme që palët të angazhohen në dialogun për normalizimin e marrëdhënieve.
“Mendoj se nuk është në rregull të flitet për kërcënime ushtarake. Unë nuk shoh ndonjë tension të veçantë në kufi. Serbia nuk i ka shtuar trupat e saj në kufi. KFOR-i e ka rritur po ashtu praninë në veri të Kosovës, pas sulmit të vitit të kaluar në Banjskë. Pra, marrëveshjet e sigurisë janë të qarta. Unë mendoj se duhet të ndalojmë së foluri për kërcënime dhe të kthehemi në tryezën e bisedimeve”, thotë Shea.
Marko Prelec, nga Grupi Ndërkombëtar i Krizave, vlerëson po ashtu se situata e sigurisë në Kosovë është stabile. Sipas tij, sulmi në Banjskë ka qenë “zile zgjimi” për rrezikun që mund t’i kanoset veriut të Kosovës, të banuar me shumicë serbe.
Për rrjedhojë, thotë Prelec, është rritur edhe bashkëpunimi mes KFOR-it, por edhe SHBA-së dhe Britanisë me Kosovën, për të gjurmuar dhe parandaluar aktivitetet ushtarake.
“Ky lloj i deklaratave [të Kurtit] duhet të merret si përpjekje për të tërhequr vëmendjen ndërkombëtare dhe për të fituar simpatinë ndërkombëtare. Shumica e aleatëve perëndimorë janë të shqetësuar me Rusinë. Dhe për Kurtin, çfarëdo që mund të bëjë për t’u rreshtuar me Perëndimin dhe për ta nxjerrë Serbinë si proruse, duket se ka kuptim”, thotë Prelec.
Rusia e mbështet fuqishëm Serbinë në kundërshtimin e pavarësisë së Kosovës, ndërsa edhe vetë e konsideron si “gabim”. Ajo shpesh akuzohet për aktivitete që ndikojnë gjeopolitikën në përgjithësi në Ballkanin Perëndimor.
Jeta Loshaj, hulumtuese në Qendrën Kosovare për Studime të Sigurisë, thotë se Kosova nuk është imune ndaj ndikimit rus.
Sipas saj, Rusia, përmes propagandës, lajmeve të rreme, mbështetjes për figura të caktuara qoftë në Serbi, apo në Republikën Sërpska, arrin të depërtojë në Kosovë, në një mënyrë ose tjetër.
“Frika për eskalimin e situatës është rritur në tre vjetët e fundit, për dy arsye. E para është lufta e plotë që ka nisur Rusia në Ukrainë në shkurt të vitit 2022 dhe e dyta ka të bëjë me aktin terrorist në Banjskë, vitin e kaluar”.
“Kur e dimë që zëvendëskryeministri i Serbisë [Aleksandar] Vulin takohet me [presidentin rus, Vladimir] Putin dhe me udhëheqësit e tjerë të Federatës Ruse dhe i dimë edhe aspiratat ekspancioniste dhe hegjemoniste të Serbisë në Kosovë, atëherë frika për eskalim sigurisht se ekziston”, thotë Loshaj.
Ish-zyrtari i NATO-s, Shea, pranon se Rusia luan rol negativ në rajon, sidomos përmes dezinformimit. Sipas tij, Rusia i shfrytëzon tensionet, andaj mënyra më e mirë për të reduktuar ndikimin e saj, është ulja e tensioneve, duke i zbatuar marrëveshjet që Kosova dhe Serbia kanë arritur në dialogun për normalizimin e marrëdhënieve.
Planin e Serbisë për të rikthyer shërbimin e detyrueshëm ushtarak, e që ka shkaktuar habinë e disave, Shea nuk e sheh si diçka që do t’i rriste kërcënimet në rajonin e Ballkanit, ku tensionet mbeten të larta që nga shpërbërja e përgjakshme e ish-Jugosllavisë në vitet 1990.
“Rekrutët do të shërbejnë vetëm për 75 ditë. Kjo nuk është kohë e mjaftueshme për t’u dhënë atyre ndonjë trajnim serioz ushtarak. Duket se ky rekrutim është më shumë pasojë e pamundësisë për të rekrutuar ushtarë profesionistë në Serbi”.
“Rreth 12.000 ushtarë profesionistë serbë janë larguar nga forcat e armatosura gjatë dekadave të fundit, për shkak të pagave të dobëta, kushteve të këqija, pajisjeve të dobëta e të tjera. Pra, duket më shumë si përpjekje për të kompensuar rënien e numrit të profesionistëve”, thotë Shea.
Serbia e ka hequr shërbimin e detyrueshëm ushtarak në vitin 2011, por Vuçiq ka miratuar rikthimin e tij më 14 shtator. Kroacia fqinje ka njoftuar, po ashtu, se nisur nga 1 janari i vitit 2025 do ta rikthejë shërbimin e detyrueshëm ushtarak me një kohëzgjatje prej dy muajsh.
Prelec, nga Grupi Ndërkombëtar i Krizave, thotë se qëllim i tyre, mesa duket, është të paraqesin imazhin e një mbrojtjeje të fortë kombëtare.
Por, përderisa NATO-ja është aq e pranishme në rajon, është vështirë të imagjinohet ndonjë konflikt i drejtpërdrejtë, sipas tij. Megjithatë, shton se gjërat mund të bëhen më të komplikuara në një afat më të gjatë.
Për të shmangur rrezikun e tillë, Loshaj, nga Qendra Kosovare për Studime të Sigurisë, thotë se përpjekjet e Kosovës dhe të aleatëve të saj perëndimorë duhet të bashkërendohen.
Së paku, BE-ja ia ka bërë të qartë edhe Kosovës, edhe Serbisë se integrimi që synojnë në këtë organizatë, varet nga normalizimi i marrëdhënieve. Por, derisa tensionet mes tyre ziejnë, përparimi duket si një ëndërr e largët.
Përfaqësuesi i posaçëm i BE-së në dialogun Kosovë-Serbi, Mirosllav Lajçak, ka thënë në një intervistë për Radion Evropa e Lirë më 30 gusht se shoqëritë në këto dy vende nuk janë ende gati për normalizimin.
E, me fjalët e Jamie Sheas, “gjërat mund të lëvizin vetëm me mega-presion ndërkombëtar. Ballkani Perëndimor nuk ka dinamikë autonome”.
Deputeti i PDK-së Enver Hoxhaj ka bërë sot homazhe bashkë me bashkëpartiakët te varret e Xhevë dhe Fehmi Lladrovci, në përvjetorin e 26 të rënies së tyre.
Nënkryetari i Kuvendit, Enver Hoxhaj, përmes rrjetit social Facebook, ka shkruar se Xhevë dhe Fehmi Lladrovci do të mbeten përjetësisht figura emblematike të luftës sonë çlirimtare.
Tutje, ai ka shpërndarë disa fotografi nga homazhet.
“Xhevë dhe Fehmi Lladrovci do të mbeten përjetësisht figura emblematike të luftës sonë çlirimtare. Sot, ishim për homazhe te varret, për t’i kujtuar dhe nderuar çdo ditë për përkushtimin për lirinë e Kosovës, për të cilën sakrifikuan edhe jetën.”, ka shkruar Hoxhaj.
Paneli për Lirim me Kusht i përbërë nga Valdete Daka- kryesuese dhe anëtarët- Burim Ademi dhe Besim Zllashi, më 24 korrik 2024 kishin marrë vendim për lirimin e Vesel Bunjakut me kusht, dy vite, dy muaj e pesë ditë para përfundimit të dënimit. Bunjaku ishte në vuajtje të dënimit për shkak të veprës penale “Ndihmë në kryerjen e veprës penale vrasje e rëndë”.
Por, vetëm 34 ditë pasi u lirua, ndodhi ngjarja mes familjeve “Sekiraqa” dhe “Gashi”- të njohur si Capat, ku mbeti i vdekur Premtim Gashi, raporton “Betimi për Drejtësi“.
Vesel Bunjakut, i është caktuar masa e paraburgimit prej 30 ditësh nga Gjykata Themelore e Prishtinës më 12 shtator 2024 nën dyshimin se ka manipuluar me prova në rastin e vrasjes së Premtim Gashit, pas të shtënave me armë zjarri mes familjeve “Sekiraqa” dhe “Gashi” – të njohur si Capat, më 1 shtator në lagjen “Aktash” në Prishtinë. Dyshohet se kishte fshehur dy armë pas të shtënave mes dy grupeve.
Por, lidhur me rastin për të cilin ishte në vuajtje të dënimit, në vendimin e Panelit të siguruar nga “Betimi për Drejtësi”, thuhet se ishte vendosur që Bunjaku të lirohej nga 29 korriku 2024 dhe do të ishte nën mbikëqyrje të Shërbimit Sprovues të Kosovës deri më 29 shtator 2026.
Po ashtu, me aprovimin e kërkesës së Bunjakut për lirim me kusht, i njëjti ishte obliguar që brenda pesë ditëve nga data e lirimit nga institucioni korrektues, të lajmërohet në Drejtorinë Rajonale të Policisë së Kosovës, përkatësisht në Shërbimin Sprovues nën disa kushte.
“1. të raportojë rregullisht në Shërbimin Sprovues deri me datën 29.09.2026; 2. në rast të ndërrimit të vendbanimit ta njoftoj Policinë dhe Shërbimin Sprovues; 3. të mos tentojë që të udhëtojë jashtë shtetit, pa miratimin e Panelit për Lirim me Kusht; 4. të jetë me i kujdesshëm me sjelljet e tij në të ardhmen”, thuhet në vendimin e PLK-së.
Fillimisht, në vendim të Panelit theksohet se Bunjaku më 30 nëntor 2018 ishte shpallur fajtor dhe dënuar me 5 vite e 6 muaj burgim nga Gjykata Themelore në Prishtinë për veprën penale “Ndihmë në kryerjen e veprës penale vrasje e rëndë” nga neni 179, par.1, pika 1.4 dhe 1.6 lidhur me nenin 33 të Kodit Penal.
Mirëpo, Gjykata e Apelit më 28 mars 2019, kishte ndryshuar aktgjykimin e shkallës së parë sa i përket cilësimit juridik të veprës penale dhe vendimin mbi dënimin, ashtu që i shqiptoi dënim me burgim në kohëzgjatje prej 11 vite e 6 muaj dhe gjeti se në veprimet e të dënuarit qëndrojnë elementet e veprës penale “Ndihmë në kryerjen e veprës penale vrasjë e rëndë” nga neni 179, par.1, pika 1.6 lidhur me nenin 33 të Kodit Penal.
Më pas, thuhet se në seancën Panelit, ishte shqyrtuar raporti i ekipit profesionist të Shërbimit Korrektues të Kosovës dhe pas vlerësimit të të dhënave të paraqitura në këtë raport, Paneli ka gjetur Bunjaku, është dënuar me 11 vite e 6 muaj burgim dhe se i kanë mbetur edhe 2 vite, 2 muaj e pesë ditë burgim.
“Në raportin ligjor për të dënuarin vërtetohet se të dënuarit, data e përfundimit të dënimit i është caktuar më 29.09.2026 dhe nga llogaritja e dënimit rezulton se nga dënimi prej 11 vite, 6 muaj të dënuarit i kanë mbetur edhe 2 vite, 2 muaj, 5 ditë, të cilat do të mbikëqyren dhe kontrollohen nga Shërbimi Sprovues i Kosovës”, thuhet në vendimin e Panelit.
Në vendim thuhet se nga raportet e përpiluara nga ekipi profesionist i Qendrës Korrektuese, rezulton se Bunjaku ka treguar sjellje të mirë, përkatësisht nuk ka të dhëna për shkelje të reja disiplinore. Po ashtu, ky ekip vlerësoi se “procesi i risocializimit është duke u arritur”.
Paneli gjatë seancës konstatoi se të dënuarit i është refuzuar dy herë kërkesa për lirim me kusht.
“Nga shqyrtimet paraprake të kërkesave për lirim me kusht rezulton se i dënuari ka përmirësuar sjelljet e tij, përkatësisht nga shqyrtimi i parë i kërkesës për lirim me kusht nuk ka të dhëna për shkelje të reja disiplinore. Në të dhënat për realizimin e programit për trajtimin e të dënuarit, është konstatuar se i dënuari është shfrytëzues i pushimit jashtë institucionit”, thuhet në vendimin e Panelit.
Gjatë shqyrtimit të kërkesës, Paneli ka vlerësuar edhe premtimin që Bunjaku ia ka dhënë zyrtarit të Shërbimit Sprovues se do të bashkëpunojë me ta deri në përfundimin e mbikëqyrjes së lirimit me kusht dhe se me një mbikëqyrje efektive i njëjti me lehtësi do të ri-integrohet në familje dhe shoqëri në pajtim me ligjin.
Në fund, Paneli kishte konstatuar që mbajtja e dënimit kishte arritur qëllimin e dënimit, pasi Bunjaku kishte mbajtur më shumë se 2/3 e dënimit që nga data 29 nëntor 2022.
Andaj, Vesel Bunjaku u lirua me kusht më 29 korrik 2024 nën kushtet e lartrpërmendura.
Ndryshe, Gjykata Themelore e Prishtinës më 3 shtator 2024 ka caktuar masën e paraburgimit prej 30 ditësh ndaj Korab Gashit, Valdrin Ademit, Robert Llumnicës, Salih Sekiraqës dhe Fatos Abazit, të dyshuar për rastin e vrasjes së Premtim Gashit, më 1 shtator në lagjen Aktash në Prishtinë.
E viktimën e vrasjes në Aktash, tani të ndjerin Premtim Gashi, PLK-ja e kishte liruar 19 ditë para ditës kritike.
Kryetar i Partisë Demokratike të Kosoves (PDK) Memli Krasniqi kujton heronjtë Fehmi dhe Xhevë Lladrovci, dhe thotë se për ta, më e shtrenjtë ishte liria sesa jeta.
Krasniqi përmes një postimi në “Facebook” ka thënë se ata u bënë themel i horizontit të lirisë dhe shtetit tonë sovran
Postimi i plotë:
“Sot, në 26 vjetorin e rënies në altarin e lirisë, kujtojmë me nderim heronjtë Fehmi dhe Xhevë Lladrovci, së bashku me bashkëluftëtarët e pandashëm Fatime Hetemi, Behxhet Karaxha, Milazim Karaxha, Hamit Lladrovci dhe Shefqet Zeka.
Nga organizimi dhe rezistenca politike, burgjeve jugosllave, e deri në betimin për luftë e liri deri në vdekje, Fehmiu dhe Xheva ishin gjithmonë bashkë. Të dy kishin lidhur fatin e tyre personal me fatin e Kosovës.
Për ta, më e shtrenjtë ishte liria sesa jeta. Për të parën do të vdisnin me një buzëqeshje në fytyrë – sepse e dinin se kjo ishte rruga e vetme drejt nderit dhe përjetësisë.
Përgjithmonë mirënjohës ndaj tyre dhe mijëra burrave e grave të Ushtrisë Çlirimtare të Kosovës, që me sakrificë e vetëmohim, u bënë themel i horizontit të lirisë dhe shtetit tonë sovran.
Lavdi! 🌹”, shkroi Krasniqi.
Zgjedhje shtetërore po mbahen në Brandenburg të Gjermanisë më 22 shtator, tri javë pas një rritjeje të partisë së ekstremit të djathtë në dy shtete të tjera në pjesën lindore të Gjermanisë.
Rreth 2.1 milion njerëz janë të regjistruar për të votuar për një parlament të ri shtetëror në Brandenburg, shtetin që përfshin kryeqytetin gjerman, Berlinin.
Zgjedhjet e së dielës po vëzhgohen me kujdes për shkak të asaj që mung të tregojnë në lidhje me drejtimin politik të Gjermanisë.
Anketat e fundit tregojnë se Partia Alternativa për Gjermaninë (AfD) është në garë të ngushtë me Social Demokratët, partinë që ka qeverisur Brandenburgun pandërprerë që nga ribashkimi i Gjermanisë në vitin 1990.
Social Demokratët, partia më e madhe në qeverinë e kancelarit Olaf Scholz, shpresojnë të mbajnë kontrollin mbi bastionin e tyre përballë rritjes së mbështetjes për partitë të ekstremit të djathtë dhe të majtë.
Nëse Social Demokratët humbin në Brandenburg, kjo do të shihej si një shenjë e keqe për Scholzin një vit para zgjedhjeve federale që do të mbahen më 28 shtator 2025. Scholz jeton në Potsdam, kryeqytetin e Brandenburgut, dhe vëzhguesit politikë gjermanë besojnë se e ardhmja politike e kancelarit do të varet nga rezultatet e votës së së dielës në Brandenburg.
Fati i guvernatorit të Brandenburgut, Dietmar Woidke, gjithashtu është në rrezik. Ai e bëri qëllim të tij që Social Demokratët ta mposhtin Alternativën për Gjermaninë dhe zotoi se do të dorëhiqet nëse AfD-ja fiton.
“Nëse humbas ndaj AfD-së, unë do të largohem”, tha Woidke.
Alternativa për Gjermaninë fitoi më shumë vota në shtetin e Thuringisë dhe gjithashtu pati rezultate të mira në zgjedhjet në Saksoni më 1 Shtator.
Një parti e re e themeluar nga një figurë e njohur e majtë gjithashtu pati rezultate të mira, ndërsa partitë në qeverinë kombëtare të Scholzit shënuan rezultate shumë të dobëta.
Kjo ishte hera e parë që ekstremi i djathtë fitoi zgjedhje në Gjermani që nga Lufta e Dytë Botërore, dhe kjo i dha një goditje të rëndë koalicionit qendror të Scholz. Ajo gjithashtu ngjalli shqetësime në Gjermani dhe jashtë saj për mbështetjen në rritje për ekstremin e djathtë në vendin më të madh të Bashkimit Evropian dhe anëtaren e NATO-s.
Partia e ekstremit të djathtë ka fituar mbështetje shkaku i pakënaqësive me migrimit masiv në Gjermani gjatë dekadës së kaluar. Ekonomia e Gjermanisë ka filluar të dobësohet, duke shtuar ndjenjën e përgjithshme të pakënaqësisë.
Vota e së dielës vjen pas një fushate zgjedhore të nxehtë të përqendruar në çështjet e migrimit, sigurisë së brendshme dhe paqes. Si ekstremi i djathtë ashtu edhe lëvizja e re e majtë, Aleanca Sahra Wagenknecht, ose BSW, dëshirojnë të ndalojnë dërgesat e armëve në Kiev ndërsa Ukraina përpiqet ta mbrojë veten nga pushtimi i plotë i Rusisë.
Madje edhe nëse Alternativa për Gjermaninë fiton në Brandenburg, ajo ka pak gjasa të qeverisë pasi partitë e tjera refuzojnë të punojnë me të./REL/
Policia e Kosovës ka bërë të ditur se gjatë 24 orëve të fundit ka shqiptuar 2292 tiketa për pjesëmarrësit e trafikut për shkak të shkeljeve të rregullave të komunikacionit.
Gjatë kësaj periudhe nuk ka pasur asnjë aksident me fatalitet, derisa kanë ndodhur 12 aksidente me të lënduar dhe 33 aksidente me dëme materiale.
Gjatë 24 orëve të kaluara janë arrestuar 20 persona, 2 persona janë dërguar në vuajtje të dënimit, derisa 11 persona janë dërguar në mbajtje.
