Author: ATVLive

Gjatë 24-orëve të fundit në Kosovë janë zhdukur dy vajza të mitura.

Policia ka njoftuar për dy raste, një në Viti dhe tjetra në Rahovec, rastet vazhdojnë të jenë nën hetime.

“Smirë, Viti/28.09.2024-12:30. Ankuesi mashkull kosovar ka njoftuar policin se vajza e tij e mitur ka dal nga shtëpia dhe nuk është kthyer. Rasti në hetime”, thuhet në njoftim.

“Rahovec / 28.09.2024-23:00. Me 29.09.2024 ankuesja femër kosovare ka raportuar se vajza e saj viktima femër kosovare –e mitur është larguar nga shtëpia dhe nuk dihet për vendndodhjen e saj, rasti në procedurë hetimore”.

Është arrestuar një person në Pejë, pasi i njëjti ishte miratuar me një të mitur, raporton EO.

Sipas raportit të Policisë së Kosovës, thuhet se i dyshuari është intervistuar dhe me vendim të prokurorit viktima është kthyer tek prindërit e saj.

Ndërsa i dyshuari është liruar në procedurë të rregullt.

“Pejë / 28.09.2024-10:30. Është arrestuar i dyshuari mashkull kosovar pasi që i njëjti ishte martuar me viktimën femër kosovare të moshës së mitur. I dyshuari dhe viktima janë intervistuar dhe me vendim të prokurorit, viktima ka shkuar te prindërit saj, ndërsa i dyshuari është liruar në procedurë të rregullt”, thuhet në njoftimin e Policisë.

Ministri i Punëve të Brendshme, Xhelal Sveçla ka thënë se qeveria vazhdon t’i ketë planet e njëjta për hapjen e Urës së Ibrit.

Për të parin e MPB-së, për Urën e Ibrit të gjithë kanë qenë në dijeni, dhe se sipas tij vet prezenca e KFOR-it aty tregon se ata e kanë ditur një gjë të tillë.

“Nuk ka ndodhur hapja. Vazhdojmë ti kemi planet për ta hapur. Për Urën të gjithë kanë qenë qenë në dijeni, është edhe vet prezenca e KFOR-it është dëshmitar. Ne kemi marrë të gjitha hapat për hapjen e Urës, është një proces, të gjitha janë transparente”, tha Ministri.

Ministri Sveçla tha se janë duke bashkëbiseduar me aleatët dhe se pjesë e diskutimeve s’është çështja se a duhet hapur apo jo, por kur është momenti për ta bërë një gjë të tillë.

“Jemi duke bashkëbiseduar me aleatët dhe KFOR-inë. Nuk është çështje e diskutimeve a duhet të hapur apo jo, por e momentit se kur duhet të hapet ura”, tha Sveçla në “Kallxo Përnime“.

Kryetari i Nisma Socialdemokrate, Fatmir Limaj, ka thënë për Ekonomia Online se keqqeverisja e Albin Kurtit do të ketë pasoja të rënda në 100 vitet e ardhshme.

Limaj ka thënë se shkak i kësaj situate janë vendimet në veri të vendit, ndërsa i quan vendime populiste.

“Keqmenaxhimi, mosqeverisja, njerëzit e paaftë, mos zhvillimi ekonomik, dhe këto kanë pasoja por vjen dikush nesër dhe i përmirëson, dhe me politikat që është duke i bërë qeveria në veri janë politika që neve do të na kushtojnë me qindra vjet, kemi me jetu me ato vendime të këqija të kësaj qeverie me 100 vjet dhe nuk mundet nesër dikush me i ndryshu, dhe mendoj që ko qeveri dështimin më të madh e ka veriun”, ka thënë fillimisht Limaj.

“Këto janë politika populliste dhe gjithçka që ka ndodhë në këtë qeveri është politika populliste, është një mendim i përgjithshëm edhe ata që e kanë mbështetur këtë qeveri dhe ata që kanë pasur rezerva ndaj kësaj qeverie është një mendim i përgjithshëm që kjo qeveri ka dështuar në të gjitha planet e brendshme të qeverisjes edhe planin ekonomik edhe atë shëndetësore edhe në arsimor në të gjitha drejtimet brenda për brenda Kosovës është një dështim total i kësaj qeverisje, nuk ka arritur të bëjë një projekt një reformë, kështu është mendimi i përgjithshëm dhe kur vjen puna te veriu ka të tillë që thonë këndej ka dështuar me të gjitha por tek veriu është mirë, unë mendoj ndryshe se dështimi më i madh i kësaj qeverie është sjellja e saj në drejtim të veriut dhe dëmin më të madh që e ka shkaktuar Kosovës është pikërisht mënyra se si i është qasur veriut dhe çekun më të madh që e kanë paguar Kosova edhe paguan sot, është pikërisht me sjelljen e saj në veri”, u shpreh Limaj.

Kreu i Nismas ka thënë se situata në veri ka prodhuar sanksione nga Bashkimi Evropian, ndërkaq ka thënë se për katër vite pozicioni i Kosovës në arenën ndërkombëtarë është zero.

“Kosova është keq, për mua është alarmante se ne si njerëz po na duket normale me jetu me sanksione, dhe vetë fakti që Kosova është e ndëshkuar nga Bashkimi Evropian, kjo është skandaloze, me e keqja është që po na duket normale me qenë nën sanksione, dhe që do duhej që Serbia të ishte, nëse për asgjë tjetër por për Banjskë. Që katër vite pozicioni jonë ndërkombëtarë është zero, dhe është rrezik që një vend si Kosova e pa mbyllur me jetu nën sanksion, në vend që të luftojmë me pesë vende që të n’a njohin, në vende që të bëjmë marrëveshje me NATO-n drejt anëtarësimit të partneritetit, në vende që të bëjmë hapa drejt bashkimit Evropian, dhe ne kemi marrë ndëshkim prej tyre”, u shpreh Limaj.

Limaj ka thënë se fitorja e partisë në pushtet me një dallim kaq të madhe të përqindjes është e dëmshme për demokracinë. Konsideron se dallimi ndërmjet partisë së parë dhe të dytës nuk duhet të jetë më shumë se shtatë për qind.

“Në Kosovë duhet që pozitë dhe opozitë dallimi mos të jetë i madh, dhe na duhet opozitë e fuqishme pavarësisht se kush vjen, dhe ata që vijnë nesër jo me ardh kështu sepse secili ka tendencë dhe kur ka një shumicë të tillë me shku dhe me kontrollu çdo gjë por nuk e lejojnë organet e pavarura, ne duhet ti ruajmë institucionet e pavarura, duhet t’a ruajmë potencialin opozitarë dhe të arriturat tona demokratike, dhe besoj që duhet të jemi krenarë që jetojmë në një shtet ku opozita ka fituar 50 për qind, dhe kjo ndodhë vetëm në një shtet demokratik, sepse këtu është krijuar një vlerë demokratike në shoqërinë e hapur dhe prandaj duhet ta ruajmë, dhe tash duhet t’i themi këtij sistemi që ka fituar 50 për qind që ka tendenca me rrënua institucionet e pavarura dhe demokratike”.

“Na duhet që zëri opozitar të jetë i fuqishëm dhe përtej garave partiake ne kemi diçka më të shenjtë, vlerat që kemi ndërtuar dhe nuk e lejojmë që askush me i cenua dhe kjo do të bëhet kur kthehemi në normalitet që partia e parë me të dytën nuk duhet të ketë 5 ose 7 për qind më shumë dallim, nuk mundet me qenë dallimi aq i madh sepse njerëz të këtij vendi jemi dhe i trajtojmë të njëjtat probleme, dikush më mirë me aftësi më të larta dhe jo një balancë kaq e madhe”, ka deklaruar Limaj.

Deputetet e Kuvendit të Kosovës kanë bërë thirrje që organet kompetente të ndryshohet udhëzimi administrativ i Ministrisë së Arsimit, që ndalon bartjen e uniformave fetare në shkolla.

Ligjvënësit thonë se ky Udhëzim Administrativ duhet të ndryshojë për shkak se bartja e shamisë nuk është simbol fetar.

Gjatë javës që lamë pas ka pasur kërkesa për shfuqizimit të këtij udhëzimi administrativë, kjo pas përjashtimit të një nxënëses nga gjimnazi “Bedri Pejani”, në Pejë, për shkak të bartjes së shamisë.

Kryetari i Komisioni për Arsim, Shkencë, Teknologji, Inovacion, Kulturë, Rini dhe Sport, Ardian Gola, ka thënë se ky udhëzim nuk duhet që të shfuqizohet, por që institucionet shkollorë duhet që të kenë kujdese që me uniformë dhe simbol fetar nuk nënkupton bartja e shamisë.

Gola, i cili është deputet i Lëvizës Vetëvendosje, ka theksuar se në momentin që ka përjashtime të nxënësve nga shkolla për bartje të shamisë, duhet që në këto raste të ketë inspektime pasi nuk po respektohet e drejta e saj për shkollim.

“Para se gjithash unë nuk mendoj që një udhëzim administrativ që normon ndalesën e përdorimit të uniformave dhe simboleve fetare do të shfuqizohet. Po duhet pasur kujdes që me uniform dhe simbol fetar nuk nënkuptohet shamia, vetëm simbolet dhe uniformat fetare. Mendoj që është krejtësisht e logjikshme që në një shtet sekular të mos përdoren në institucione publike simbolet fetare, aq më tepër që ne po flasim për një kontekst kulturalisht jo vetëm të ndjeshëm çfarë është Kosova, me këtë rast komponenta fetare din nganjëherë me elektrizuar raportet shoqërore, din nganjëherë me polarizuar raportet shoqërore prandaj mendoj që është plotësisht e logjikshme. Mirëpo me sa e di unë nuk ka as një shkollë në Kosovë që shfaq pengesa juridike që një vajzë të përdor shaminë në shkollë. Tash nëse ka raste që ka ndalesa, ku një vajzë ndalohet që të përdor shaminë atëherë duhet që të thirren instancat përkatëse, inspektorati, që nuk po respektohet e drejta e saj për shkollim”.

“Jo për shkak se shamia nuk mund të interpretohet si uniformë fetare, nuk është uniform fetare. Është një veshje e një religjioni edhe aq. Tash në këtë rast do të duhej që të inspektohet rasti edhe instancat përkatëse të marrin vendimin se sa ky vendim i shkollës ka qenë në përputhshmëri me normat ligjore në fuqi”.

E kryetarja e Komisionit për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, Duda Balaj, ka thënë se ky udhëzim administrativë duhet të ndryshohet pasi nuk është i specifikuar, dhe në këtë formë sipas saj, është duke lënë hapësirë që vetë drejtorët e shkollave të vendosin se a duhet që një vajzë që bart shami të përjashtohet nga shkolla apo jo.

Për këtë ajo ka thënë se shamia nuk është uniformë dhe se udhëzimi administrativ nuk mundet me qenë me i fuqishëm se Kushtetuta, e cila garanton të drejtët e çdo qytetari për shkollim.

“Çdo fillim vit shkollorë ne kemi problemin e njëjtë, nuk kanë nevojë që të komplikojnë situatën. E para shamia nuk është uniformë dhe secila vajzë që është me shami dhe pa shami ka të drejt që të shkollohet. Udhëzimi administrativ nuk mundet kurrë me qenë me i fuqishëm se Kushtetuta e para kjo. E dyta, udhëzimi administrativ nuk është i specifikuar dhe është duke lënë mundësi që secili drejtor në nivelin lokal, në nivel shkolle me vendos a do të shkojë një vajzë me shami në shkollë a jo. Ne me këtë udhëzim administrativ kemi lënë një drejtor të shkollës me vendos për këtë. Ne kemi ligj, ne kemi Kushtetutë edhe tash nëse je duke folur me drejtor thonë se ne kemi udhëzimin administrativ i cili nuk ka të përcaktuar për veshjen e simbolit fetar”, ka thënë ajo.

Balja, ka thënë se kanë pasur kërkesa të vazhdueshme nga ministrja e Arsimit, Arbërie Nagavci, që të ketë ndryshime, por pavarësisht premtimeve tash e katër vite nuk është ndërmarr ndonjë hap për të ndryshuar udhëzimin administrativ.

“Sa herë kemi thirrur ministren e Arsimit për të diskutuar për këtë, që të ndryshohet udhëzimi administrative, kemi pas premtime që do të ndryshohet, por që katër vite as një hap konkret nuk kemi pasur. Moralisht jemi duke ndikuar sepse ata kanë frikë tash sepse nuk janë të sigurta se a do të ju ndihmoj shteti, këtu do të thotë secilin vit kemi problem unë shpresoj që ministria do të gjejë zgjidhje për këtë”, ka thënë ajo.

Që nga viti 2014 ekziston një udhëzim administrativ i Ministrisë së Arsimit, që ndalon bartjen e uniformave fetare në shkolla, i njëjti madje është kundërshtuar disa herë edhe nga Bashkësia Islame e Kosovës.

Zyra për Qeverisje të Mirë/Zyra e Kryeministrit dhe Shoqata Kosovare e të Shurdhërve, ka organizuar të premten konferencën për shënimin e Javës Ndërkombëtare të Shurdhërve dhe Ditës Ndërkombëtare të Gjuhës së Shenjave, me moton “Me shenja për të drejtat e gjuhës së shenjave”, raporton Ekonomia Online.

Qëllimi i këtij takimi është që të theksohet rëndësia e përdorimit të gjuhës së shenjave si një mënyrë për arritjen e të drejtave për gjuhën e shenjave, duke përfshirë përmirësimin e legjislacionit, si dhe procesin e zhvillimit të koncept-dokumentit për gjuhën e shenjave në Republikën e Kosovës.

Drejtori i Zyrës për Qeverisje të Mirë nga Zyra e Kryeministrit, Habit Hajredini, ka thënë se në këtë takim do të diskutohet edhe për konceptdokumenti që ka të bëjë me ofrimin e gjuhës së shenjave për personat e shurdhër.

“Sot ne jemi këtu për të shënuar këtë ditë ndërkombëtare dhe për të diskutuar për progresin, sfidat dhe vështirësitë që kemi në fushën e të drejtave për personat me aftësi të kufizuar, ne veçanti për peronat e shurdhër. Natyrisht për të ju informuar me procesin e ri që e kemi marr si qeveri, për të zhvilluar koncept dokumentin që ka të bëjë me lehtësimin apo ofrimin e gjuhës së shenjave në përgjegjësi për personat e shurdhër për të diktuara për progresin e sfidat që kemi në edukim, shëndetësi e mirëqenie sociale”, ka thënë ai.

Zëvendëskryeministrja e Kosovës Emilija Rexhepi, ka thënë se prioritet i qeverisë së Kosovës është që të siguroj mundësi dhe të drejta të barabarta e qasje për të gjithë qytetarët pa dallime.

“Qëllimi i qeveris është që të siguroj mundësi të barabartë për të gjithë, qasje për të gjithë. Qeveri është e përkushtuar për zbatimin e kornizës politike dhe politikave që janë në fuqi që janë në respektim e personave me aftësi të kufizuara. Duhet të punohet edhe më shumë, të bëhen reformat në shkolla, duke filluar me personelin. Jemi në proces të përfundimit të strategjisë për personat me aftësi të kufizuar… Zotohemi në përmbushjen e të gjitha obligimeve që kemi si qeveris jemi të gatshme që duhet të punohet më shumë, institucionet duhet të organizohen. Në çdo institucion do të ofrojmë shërbime për personat me aftësi të kufizuar. Vetëm bashkë mund ti zgjidhim problemet tona”, ka thënë ajo.

Besnik Parduzi, kryetar i Shoqatës Kosovare të Shurdhërve, ka thënë se shpreson që koncept-dokumenti për këta persona i hartuar nga qeveria të kaloj deri ne dhjetor të këtij viti.

“Sot mblidhem që të reflektojmë se cilat janë sfidat që përballemi. Koncept dokumentin është dorëzuar një draft dhe shpresojmë që deri në fund të dhjetori kjo të aprovohet dhe të kemi hapa të tjerë për komunitetin e shurdhërve. Shpresoj që kjo të arrihet deri në dhjetor, që koncept-dokumenti të kaloj”, ka thënë ai.