Author: ATVLive

Kryetari i Partisë Demokratike të Kosovës, Memli Krasniqi ka thënë se Lëvizja Vetëvendosje nuk është e interesuar për zhbllokimin e krizës politike në vend.

Pas dështimit për herë të tetëmbëdhjetë të konstituimit të Kuvendit, Krasniqi tha se legjislatura e nëntë do të mund të konstituohej për 24-orë nëse LVV-ja tërhiqet nga kandidatura e Albulena Haxhiut për këtë post.

Megjithatë, ai ritheksoi pozicionin e tyre se nuk votojnë asnjë deputetë të LVV-së që ka qenë pjesë e kabinetit qeveritar në katër vitet e kaluara.

“Lëvizja Vetëvendosje nuk është e interesuar që të zhbllokojë situatën. Shpreh keqardhjen ndaj gjithë qytetarëve që është bërë e tepërt dhe po dëmton vendin tonë dhe jetën e përditshme të qytetarëve. Bëj thirrje që LVV-ja dhe lideri i saj Albin Kurti të ndryshojnë kandidatin dhe të vijnë me një kandidat që mund të merr shumicën dhe të shkojmë tutje për konsitutimin e Kuvendit dhe themelimin e qeverisë”, theksoi ai.

Duke folur për mundësinë e dërgimit të kësaj çështjeje në Gjykatë Kushtetuese, ai tha se nëse vazhdohet bllokda në Kuvend atëherë presidentja mund të dërgojë pyetje kushtetuese.

Sipas tij, një gjë e tillë është diskutuar në takimin e javës së kaluar me presidenten Vjosa Osmani.

“Ne s’kemi krizë juridike por krizë politike. Në këtë situatë edhe përgjigja duhet të ishte politike dhe zgjidhja e tillë. Nëse një gjë tillë mungon atëherë duhet dikush të merret me një adresim në Gjykatën Kushtetuese siç e ka bërë AAK-ja me mbështetjen e deputetëve të partive të tjera për mënyrën e votimit. Presidentja është brenda kompetencave që ia lejojnë një gjë të tillë dhe kam kërkuar në takimin me të që në zbatim të këtyre përgjegjësive t’i drejtohet me pyetje kushtetuese. Ajo vullnetin e ka shpreh që në një moment apo pikë të caktuar të kësaj bllokade të bëjë një gjë të tillë, por se kur nuk e di”, tha ai.

Kurse sa i përket zgjedhjeve të reja, Krasniqi tha se nëse vjen ky rast atëherë PDK-ja e ka rolin e vet, mirëpo sipas tij, edhe për shkuarjen në zgjedhje nevojitet një marrëveshje politike.

“Nëse vijnë zgjedhjet dhe është diçka e pashmangshme atëherë PDK-ja e ruan rolin e vet dhe do të jetë e gatshme. Mirëpo edhe për zgjedhje nevojitet marrëveshje politike, pasi duhet të konstatohet Kuvendi në çdo rrethanë”, përfundoi ai.

I pyetur për një diskutim mes Albulena Haxhiut dhe deputetit të PDK-së Nait Hasani pas dështimit të sotëm të konstituimit të Kuvendit, Krasniqi tha se asnjë deputetë i PDK-së nuk lëvizë nga qëndrimet partiake.

“Asnjë deputetë i PDK-së asnjë milimetër nuk lëvizë nga qëndrimet. Ne nuk jemi armiq këtu. Po më vjen keq që partia parë po mundohet me krijuar një narracion të përçarjes dhe ndarjes. Në kuptimin njerëzor asnjë deputet s’ka raporte armiqësore me askënd por jemi këtu me përfaqësu qëndrimet tona politike”, tha Krasniqi./KosovaPress

Deputetja e Aleancës për Ardhmërinë e Kosovës, Time Kadrijaj bëri të ditur se sot do të dorëzojnë komentet në Gjykatën Kushtetuese. Ditë më parë, është kërkuar interpretim nga Kushtetuesja lidhur me votimin e fshehtë, për çka partitë që deri më tani kanë qenë në opozitë e kanë konsideruar anti-kushtetuese.

Pas dështimit të 18-të për konstituim të Kuvendit, Kadrijaj tha se ky është skenar i njëjtë, teksa tha se “E mira është veç të propozohet Albulena Haxhiu për Çmim Nobel”.

“Po përsëritet skenari i njëjtë, ishte një kërkesë e kryesuesit të seancës që të konsultohemi që seanca të mbahen çdo javë. Normal që u refuzua nga të gjitha partitë opozitare për shkak se është shkelje e Kushtetutës. Me Kushtetutë thuhet që çdo 48 orë, andaj ne nuk e pranuam…. E mira është s’po di veç me propozu për Çmim Nobel Albulena Haxhiun edhe pse Çmimi Nobel është për të arriturat dhe sukseset në ndonjë fushë apo lëmi, e tash veç me propozu për Çmim Nobel për dështimet e njëpasnjëshme me plot seanca dhe vazhdimi i Lëvizjes Vetëvendosje me të njëjtin kandidat”, deklaroi Kadrijaj.

Nënkryetarja e Aleancës për Ardhmërinë e Kosovës (AAK), Time Kadrijaj tha se sot do të dorëzojnë komentet në Kushtetuese.

“Tash po nisem për në Gjykatën Kushtetuese, është afati i fundit për dërgimin e komenteve. I kemi hartuar edhe disa komente në përkrahje dhe mbështetje të asaj që kemi dërguar dhe arsyetimin se pse duhet të trajtohet me seriozitet. Ne tash po fillojmë të shkojmë në Gjykatën Kushtetuese, do i dorëzojmë komentet dhe normal që dëshirojmë që të fuqizohet kërkesa paraprake”, shtoi ajo para mediave./KP/

Qendra Kinematografike e Kosovës po përfaqëson sërish industrinë filmike të vendit në një nga ngjarjet më prestigjioze të kinemasë botërore – Festivalin e Filmit në Kanë të Francës.

Ashtu si në vitet e kaluara, QKK ka ngritur shtandin e saj në Marketin e Festivalit, këtë vit përsëri në bashkëpunim me Shqipërinë, duke dëshmuar përkushtimin për prezantimin dhe zhvillimin ndërkombëtar të kinematografisë shqiptare.

Kryeministri i Kosovës, Albin Kurti, përmes një postimi, ka theksuar rëndësinë e përkushtimit të gjatë që qëndron pas një filmi të realizuar:

“Shumë vite punë në prapaskena kalohen në bashkëpunim, rrjetëzim, ngritje fondesh, përshtatje vizioni artistik për distribuim dhe promovim ndërkombëtar e vendor, në mënyrë që produkti kinematografik një orësh e gjysmë të shfaqet i përfunduar në ekranin e madh.”

Në Kanë, përveç prezencës institucionale, tre kineastë nga Kosova – Samir Karahoda, Kaltrina Krasniqi dhe Sami Mustafa – janë të angazhuar në zhvillimin e projekteve të tyre filmike:“Imazhe të Humbura” – Samir Karahoda, “Bleach” – Kaltrina Krasniqi, “Symphony of Season” – Sami Mustafa

Kjo pjesëmarrje përfaqëson një mundësi të rëndësishme për rrjetëzim, bashkëpunime të reja dhe avancim të mëtejshëm të projekteve filmike kosovare në skenën ndërkombëtare.

Shtandin e QKK-së mund ta vizitoni në International Village Riviera, Pavijoni nr. 137, deri më 21 maj 2025 (e mërkurë).

Për Kosovën, prania në Kanë nuk është vetëm simbolike – është një dëshmi e rritjes së vazhdueshme të kinemasë vendore dhe përkushtimit për ta vendosur atë në hartën e filmit botëror.

Kreu i LDK-së, Lumir Abdixhiku ka folur pas dështimit të 18-të të VV’së për ta bërë Albulena Haxhiun kryetare të Kuvendit.

Abdixhiku thotë se deklarata e Kurtit se “s’ka urgjencë”, është lajm i keq për Kosovën. Sipas Abdixhikut, është e pakuptimtë si një parti me 48 deputetë të mos arrijë të bëjë një shumicë minimale.

“Mungesa e urgjencës ështrë vërtetë lajm i keq për Kosovën. Ka nevojë për institucione, ka nevojë për veprime politike të partisë së parë.

Është e pakuptueshme se si një parti me 48 deputetë të mos arrijë të bëjë një shumicë minimale”, deklaroi Abdixhiku.

Kryetari i Nisma Socialdemokrate, Fatmir Limaj, ka akuzuar partitë e mëdha parlamentare (LVV, PDK, LDK) për papërgjegjësi politike në lidhje me krizën institucionale në vend.

Limaj ritheksoi nevojën për arritjen e një marrëveshje politike që do t’i jepte mundësi vendit për t’i formuar institucionet e reja pas zgjedhjeve të 9 shkurtit.

“Vazhdon një papërgjegjësi e forcave politike për t’u ulur dhe bërë një marrëveshje politike që do t’i jepte mundësi vendit me pas institucione dhe shumicë parlamentare. Mendoj që secili duhet t’i thirrë përgjegjësisë së vet. Forcat të tjera politike nuk ka tjetër në Kosovë dhe janë këto. Nëse nesër ka zgjedhje prapë do të jenë këto forca politike. Rruga e vetme që Kosova si shtet serioz është përmes bisedimeve dhe marrëveshjeve politike”, tha ai.

Limaj duke hyrë në objektin e Kuvendit për vazhdimin e tetëmbëdhjetë të seancës konstituive të Kuvendit, tha se deri tani s’ka asnjë hap konkret për zgjidhjen e krizës politike.

Limaj: Deri tani s’ka asnjë hap konkret për zgjidhjen e krizës politike

Video:
“Tani për tani nuk ka ndonjë hap konkret serioz përveç ato që kemi pa në media. Por hap konkret dhe ftesë rreth atyre propozimeve Nisma s’ka pasur”, përfundoi ai./KP/

Deputeti i Aleancës për Ardhmërinë e Kosovës(AAK), Daut Haradinaj ka ritheksuar se do të votojnë për kryetare të Kuvendit nëse propozohen nga Lëvizja Vetëvendosje njëra nga dy deputetet, Shqipe Selimi ose Saranda Bogujevci.

Ai para mbajtjes së seancës së 18-të për konstituimit të Kuvendit, tha se nëse LVV-ja ka qëndrimet e njëjta do të vazhdohet skenari i dështimit në Kuvend.

“Unë shpresoj që do të kemi kohë të propozojmë kandidatin që jemi thirrë në të. Shqipen (Selimi) ose (Saranda) Bogujevcin. Kemi ofruar këtë favor edhe si opozitar dhe mendoj se është i mjaftueshëm”, theksoi ai./KP/

Kryetari i Prishtinës, Përparim Rama ka pritur sot në takim përfaqësuan e sindikatës së punëtorëve të Kompanisë “Pastrimi” pas gjendjes së rëndë të krijuar në Prishtinë në mes komunës dhe kompanisë.

Përparim Rama me këtë rast tha se po u bëhet shantazh, por se s’do e lejojnë këtë.

Sipas tij, sabotazhi ka marrë fund dhe s’do të lejohet assesi.

“Kanë dashtë për përfitime të tyne me lënë me gjithë bërllok gjithë kryeqytetin, por ne sot e kurrë s’do e lejojmë. Ne kemi me i mbrojtë të drejtat e juve si punëtorë, s’keni me qenë pa punë. Kontrata janë që kanë qenë të gatshme, e janë të gatshme sot. Kanë qenë në dhjetor, në shkurt e sot që me qenë pjesë kompania Pastrimi e proceseve, e mos me iu cenu as pagesat, as pagat e punëtorëve. Por ja që për çështje puro-politike e sabotojnë punën e me qit keq kryetarin e kryeqytetin”,tha Rama.

Rama tha se kjo s’do të kalojë dhe se kanë përdorur mekanizma të tjerë sa i përket pastrimit dhe se gjendja tashmë është nën kontroll.

“Kjo normal që nuk kalon, ne kemi mekanizma të tjerë që i kemi shfrytëzu dhe sot e kemi nën kontroll kryeqytetin. Falë iniciativës sonë dhe nuk e cenojmë shëndetin as të familjeve të juaja.E jo me lënë në dorë të një menaxhmenti puro-politik e të paskrupull. Zgjidhje ka, por ata kanë kalkulu ndryshe e ja kanë bërë vetit”.

Ministria e Infrastrukturës njofton qytetarët dhe pjesëmarrësit në trafik se nesër, në kuadër të punimeve për zgjerimin e rrugës nacionale N9, segmenti Kijevë–Dollc, do të realizohet minimi i masave shkëmbore.

Për këtë arsye, do të ketë ndërprerje të qarkullimit të trafikut në këtë segment rrugor.

“Nga udhëkryqi i Gjakovës në Klinë deri te udhëkryqi i rrugës për Gjurgjevik. Ndërprerja do të hyjë në fuqi nga ora 16:00 dhe do të zgjasë deri në përfundimin e pastrimit dhe hapjen e rrugës. Ministria e Infrastrukturës u bën thirrje të gjithë qytetarëve dhe drejtuesve të automjeteve që planifikojnë të qarkullojnë në këtë drejtim gjatë këtij intervali kohor, të përdorin rrugë alternative”, thuhet në njoftim.