Specialisti i mjekësisë emergjente sportive, Dr. Bastri Lenjani, ka lavdëruar Kryetarin e Federatës së Futbollit të Kosovës, Agim Ademi, për iniciativën e tij për blerjen e defibrilatoreve, një hap i rëndësishëm për sigurimin e shëndetit të lojtarëve dhe stafit sportiv.
I ftuar në emisionin ‘A PLAY’ në ATv me Ylber Kelmendin, Dr. Lenjani vlerësoi këtë iniciativë si një veprim të rëndësishëm për të parandaluar rreziqet e mundshme gjatë aktiviteteve fizike dhe për t’u ofruar ndihmë të shpejtë në raste emergjente.
Megjithatë, ai theksoi se një nismë e tillë, që ka të bëjë me shëndetin publik dhe sigurinë mjekësore, duhet të mbështetet dhe të koordinohet nga Ministria e Shëndetësisë. Sipas tij, përhapja e defibrilatoreve në çdo qendër sportive dhe institucione shëndetësore është përgjegjësi e institucioneve shtetërore dhe duhet të jetë pjesë e një strategjie të koordinuar.
Dr. Lenjani kërkoi që autoritetet përkatëse të marrin më shumë iniciativë për të siguruar që të gjitha institucionet sportive, si dhe hapësirat publike, të jenë të pajisura me aparatura të nevojshme për mbrojtjen e shëndetit të individëve.
Trajneri i njohur dhe kandidati i Lëvizjes Vetëvendosje për deputet, Bylbyl Sokoli, në emisionin COMPASS në ATV, ka folur për kohën kur ka shërbyer si këshilltar për sportin pranë ish-kryeministrit Hashim Thaçi në vitin 2007.
Sokoli tha se në atë kohë ishte pjesë e një ekipi profesionistësh që përgatitën programin e qeverisjes në fusha të ndryshme.
“Kam qenë këshilltar për sportin në vitin 2007, si pjesë e një ekipi profesionistësh, ku përfshiheshin Tom Gashi për jurisprudencë, Dukagjin Gorani për ekonomi dhe Ylber Hysa për kulturë. Ne kontribuuam për përpilimin e programit të zgjedhjeve” tha Sokoli.
Ai shtoi se pas përfundimit të zgjedhjeve, nuk ishte më pjesë e qeverisë dhe vazhdoi angazhimet e tij si trajner trajner dhe pedagog.
Intervistën e plotë të Bylbyl Sokolit në emisionin COMPASS e gjeni në videon më poshtë:
Pas dorëzimit nga PDK-ja të 16 ligjeve për interpretim në Gjykatën Kushtetuese, shefja e Grupit parlamentar të Lëvizjes Vetëvendosje Mimoza Kusari-Lila tha se kjo po bëhet me qëllim për mbrojtjen e interesave të tyre.
Ajo në një konferencë për media tha se Kuvendi nuk ka bërë shkelje ligjore me miratimin e ligjeve me procedurë të përshpejtuar.
Kusari-Lila ka “treguar” edhe arsyet e dërgimit të ligjeve në Kushtetuese nga partia më e madhe opozitare.
“Pamë se kjo parti është pozicionuar qartë kundër qytetarëve të Kosovës. Ata çfarë kanë përvetësuar kundërligjshëm duan ta mbrojnë. Prapa çdo ligji, ruhet një interes. Dy herë e kanë kontestuar Këshillin Prokurorial, sepse donin të mbronin njerëzit brenda këshillit. Gjithashtu tashmë e kontestuar Ligjin për Byronë, sepse janë të vetëdijshëm qe kjo pasuri nuk mund të justifikohet”, deklaroi ajo.
Ajo shtoi se LVV ka bërë dërgimin e ligjeve në Gjykatën e Kushtetuese për të parandaluar një të keqe për vendi.
Ndryshe, PDK ka proceduar në Kushtetuese ligjet e miratuara në seancën maratonike të Kuvendit të Kosovës më 5 dhjetor.
Në një konferencë për media shefi i Grupit parlamentar të Partisë Demokratike të Kosovës, Abelard Tahiri tha se kishin paralajmëruar t’i dërgojnë 20 projektligje në Kushtetuese, por në konsultim me ekspertët kanë proceduar 16 prej tyre.
Ai ka thënë se ligji i cili është i kontestuar në këtë rast edhe Ligji për Byronë Shtetërore për Verifikim dhe Konfiskimin e Pasurisë së Paluajtshme.
Ndërsa ka thënë se projektligjet tjera që i kanë dorëzuar sot për procedurë në Gjykatën Kushtetuese janë: Ligji për ndryshimin dhe plotësimin e ligjit për kontabilitet, raportim financiar dhe auditim, ligji për bankat, ligji për inspektoratin qendror për mbikëqyrjen e tregut, ligji për ndryshimin dhe plotësimin e ligjit për parandalimin e pastrimit të parave, luftimin e financimit të terrorizimit, ligji për ndryshimin dhe plotësimin e ligjit për prokurori speciale, ligji për shërbimet e pagesave, ligji për provimin e maturës shtetërore, ligji për lojërat mesdhetare Prishtina 2030. /kp
Aktivitetet e prokurimit në nivel vendi janë përcjellë me kritere diskriminuese në dosjet e tenderëve, planifikim të dobët të vlerave të kontratave, procedura të negociuara në kundërshtim me kushtet ligjore dhe aneks-kontrata pa u plotësuar kriteret.
Këto problematika, në fakt, sipas Iniciativës për Progres, ndikojnë negativisht në integritetin e prokurimit publik.
VOX: ARBËR KABASHI, INPO
Edhe nëse janë ndjekur të gjitha procedurat gjatë një aktiviteti të prokurimit, problematik po del të jetë menaxhimi i dobët i kontratave të nënshkruara.
“Ne kemi parë shumë storje në rrjete sociale, por edhe në televizione, e kemi pasur edhe përvoja tona që në një vend të caktuar është shtruar një rrugë teksa pas një jave ajo ka filluar të prishet. Pra këtu kemi të bëjmë me dështim të menaxhimi të asaj kontrate.”, tha Hykmete Bajrami, kryetare e komisionit për mbikëqyrje të financave.
Për të gjitha këto praktika, Zyra Kombëtare e Audimit ka qenë e njoftuar vazhdimisht.
“Kemi raporte të veçanta të performancës të cilat trajtojnë fushën e Prokurimit Publik. Shumica e gjetjeve janë gjetje të njohura edhe nga Zyra Kombëtare e Auditimit, po ashtu shohim dhe shkaqet e ndodhura në mënyrë që të japim rekomandime dhe të eliminohen ato fusha. Si mekanizëm është mjaft e mirë për të përmirësuar fushën e prokurimit. Edhe Ligji i Prokurimit Publik nuk po arrin të finalizohet dhe të konkretizohet. Janë njerëzit që udhëheqin këtë procedurë, nëse ai ligj nuk zbatohet, do të ketë probleme.”, deklaroi Arben Selimi, specialist i Auditimit.
Sidoqoftë, në tryezën e organizuar nga INPO, ku u bë publikimi i raportit “Katalizatorët e Korrupsionit” u theksua nevoja për Ligjin e ri të Prokurimit Publik. Raporti që përmend praktikat që cenojnë integritetin e prokurimit, u publikua në kuadër të javës kundër korrupsionit.
Dy ulëse kanë mbetur të zbrazëta të mërkurën, në klasën 9/1 të shkollës fillore “8 Marsi” në Pejë.
Njëra nxënëse është e plagosur, pasi një ditë më parë u ther me thikë nga shoku i klasës tjetër, 14 vjeç. Ai ndodhet në mbajtje, i dyshuar për dy vepra penale, “lëndim i lehtë trupor” dhe “Mbajtja në pronësi, kontroll ose posedim të paautorizuar të armëve”.
E mitura është jashtë rrezikut për jetë, prandaj qëndroi vetëm një natë në Spitalin e Pejës.
E gjithë ngjarja ndodhi në orën e Edukatës Fizike, kur shumica e nxënësve ishin në sallën sportive. Ndërsa, motivet nuk dihen ende.
“Arsimtarja i ka dërgu në sallë, nxënësja me shoqet kanë kërku leje të mësuesi, pasi që shkon këta dy nxënës hynë në klasë, dhe sipas informatave të nxënësve nuk ka pasur konflikt verbal vetëm është ulë. Shkolla ka sigurim në hyrje, veç nëse ka ndonjë rast të dyshimtë, po nuk ka mundësi me u kontrollu të gjithë brenda 20 minutave”, deklaroi drejtoresha e shkollës.
Ndërsa drejtori i Arsimit, Naser Gega, tregon se do ta suspendojnë nxënësin e dyshuar, i njohur edhe më herë si problematik.
“Nxënësi ka pasë sjellje jo të hijshme, por jo të kësaj natyre, nxënësi u ndalua, në të njëjtën kohë janë. Tre vajza kanë shku në polici janë intervistu. Kontrollet janë shumë mirë, po ligjërisht nuk kemi të drejtë me i kontrollu nxënësit”, tha Gega.
Therja me thikë brenda institucionit arsimor i ka shqetësuar prindërit.
Policia tashmë e ka sekuestruar thikën me të cilën dyshohet se është kryer therja, të martën.
Nga shembja e dheut pësoi vetëm kjo shtëpi, por pa banorë mbetën edhe disa të tjera, në rrugën “Lidhja e Prizrenit” në Prishtinë.
“Sipas banorëve përreth, të cilët nuk pranuan që të prononcohen para kamerës, familja që jetonte në këtë shtëpi së bashku me familjarët e 7 shtëpive të tjera përreth që rrezikohen të shemben për shkak të rrëshqitjes së dheut, janë larguar prej këtu”.
Dheu rrëshqiti gjatë gërmimeve që po bëheshin për shtrimin e rrugës A, punimet për të cilën filluan në prill të vitit të kaluar.
Familjeve të shpërngulura, Komuna e Prishtinës u ka garantuar mbulim financiar për banimin me qira, por vetëm për tre muajt e ardhshëm.
“Drejtoritë kompetente kanë qenë në vendin e ngjarjes, kanë marrë shënimet e përgatitura, procesverbalin zyrtar dhe mbi bazën e gjetjeve dhe analizës profesionale nga zyrtarët përkatës do të intervenojnë për sanim të gjendjes dhe vazhdim të punimeve pa ndonjë pengesë”, thanw nga Komuna e Prishtinws.
Pavarësisht se gjetjet e drejtorive nuk janë shqyrtuar ende, puna vazhdonte si zakonisht. Të mërkurën u panë makineri që vazhdonin gërmimet për shtrimin e rrugës A.
Mospezullimi i punimeve dhe gërmimi i tokës deri në afërsi të shtëpive, sipas ekspertëve të ndërtimit Driton Tafallari, nuk është korrekte.
Andaj, që të evitohet ndonjë rrezik tjetër eventual, po kërkohet ndërhyrje urgjente.
Realizimi i projektit për rrugën A kap shifrën prej rreth 22 milionë euro – 45 për qind financohet nga komuna e Prishtinës, kurse 55 për qind nga Ministria e Infrastrukturës.
Tre veteranë nga Skenderaj paditën Ministrinë e Financave në muajin nëntor.
Bazuar në Ligjin për Skemat Pensionale, nga ky institucion kërkonin kompensim financiar në emër të inflacionit.
Por, kjo padi u hodh poshtë nga Gjykata Themelore e Prishtinës.
Avokati i palëve, vendimin e konsideron si të padrejtë për disa arsye.
Njohës të ekonomisë vlerësojnë se ligji parasheh kompensime në raste të tilla.
Refuzime të tilla ka disa, andaj juristi Rrecaj beson se nuk janë të rastësishme.
Por, kjo mohohet nga ky institucion.
“Këshilli Gjyqësor i Kosovës (KGJK), është organ kushtetues, i cili ka mandat ligjor për të administruar gjyqësorin, por jo që të interferojë në Gjykata në aspektin e vendimmarrjes”, njoftoi KGjK-ja.
Sipas nenit 13 të ligjit për skemat pensionale, i miratuar në vitin 2014, varësisht nga mundësitë buxhetore, kostoja e jetesës dhe inflacioni eventual, në fund të çdo viti, Qeveria e Kosovës me propozimin e Ministrisë së Financave, me vendim të veçantë, vendos për lartësinë e shumës së pensioneve të përcaktuara me këtë ligj për vitin e ardhshëm./atvlive.tv
Një rrugë e shpejtë për anëtarësimin e Kosovës në NATO është përmendur nga liderë shtetërorë e partiakë viteve të fundit, veçmas ndërlidhur aspekte të sigurisë rajonale e globale.
Megjithatë, një proces i përshpejtuar duket vështirë i arritshëm, pa i përmbushur kërkesat e shteteve anëtare të aleancës veri-atlantike.
Mbështetja vetëm nga Shtetet e Bashkuara të Amerikës, vlerësohet e pamjaftueshme nga ambasadori në Prishtinë, Jeffrey Hovenier.
“Qëndrimi i SHBA-së është i qartë. Ne e shohim Kosovën si anëtare të NATO-s në të ardhmen. Ne e mbështesim këtë dhe e mbështesim fuqimisht. Dëshirojmë ta shohim Kosovën duke përparuar. Ka anëtarë të NATO-s që nuk e kanë atë pikëpamje tani. Ne besojmë se mënyra më e mirë për t’u treguar atyre se kjo është rruga e duhur përpara, është të adresohen shqetësimet e tyre”, tha Hovenier.
Krahas lëvdatave për FSK-në dhe përmendjes së asaj që duhet të arrihet ende, në njërën anë, ambasadori përmendi edhe aspektet politike në anën tjetër.
“Një marrëdhënie e ripozicionuar mes Kosovës dhe Serbisë, adreson disa nga shqetësimet e shteteve anëtare të NATO-s që nuk e kanë njohur Kosovën ose kanë shqetësime të tjera. Pra, kjo do të thotë që kërkohet durim. Do të thotë që kërkohet punë e vështirë. Por, nuk ka asnjë mundësi të shpejtë që vetëm pse po përballeni me një kërcënim, atëherë duhet të bëheni anëtar i NATO-s. Thjesht, nuk funksionon kështu. Ne po kërkojmë përparim në dialog. Po kërkojmë përparim të mëtejshëm në reforma”, shtoi tutje ai.
Derisa komentet e diplomatit amerikan i vlerësoi realiste, eksperti i sigurisë Nuredin Ibishi, duke thënë se krahas kritereve ushtarake për anëtarësim është i pashmangshëm edhe aspekti i konsensusit politik.
“Kemi shtete anëtare të aleancës që nuk na kanë njohur, pastaj çështjet politike janë aspekti i sigurisë në përgjithësi dhe qëndrueshmërisë së institucioneve. Por, edhe raporti me Serbi, ngase ato duan që anëtarësimin ta kenë pa probleme politike, qoftë edhe me fqinj, në këtë rast me Serbinë”, tha njohësi i sigurisë, Nuredin Ibishi.
Përkundër përparësisë se FSK-ja, që nga themelimi, është në mbikëqyrje dhe koordinim me NATO-n, Ibishi vlerësoi se rruga nuk është e shkurtër.
“FSK-ja është në fazën të tranzicionit, në vitin 2028 përfundon fazën e tretë të tranzicionit dhe duhet edhe çështja tjetër, e anëtarësimit në Partneritetin për Paqe, që i paraprin anëtarësimit të plotë, e që ne ende nuk jemi”,deklaroi tutje Ibishi.
Në fund të muajit Maj, Asambleja Parlamentare e NATO-s avancoi statusin e Kosovës nga vëzhguese në anëtare të asociuar të këtij forumi të aleancës./atvlive.tv
Vetëm ish-ministri i Drejtësisë, Hajredin Kuçi, nga pesë të akuzuarit e fundit për pengim të drejtësisë nga Zyra e Prokurorit të Specializuar, është në liri.
Madje, Kuçit Gjykata Speciale ia ka lejuar pjesëmarrjen online nga Kosova, në seancat e ardhshme përgatitore.
Por, siç thuhet në urdhrin rreth seancës së ardhshme përgatitore, nëse nuk paraqitet pa miratimin e gjykatës, ajo menjëherë do të urdhërojë paraburgimin.
Megjithatë, Gjykata Speciale nuk ka treguar nëse tashmë ka marrë vendim rreth kërkesës të ZPS-së, që Kuçit t’i ndalohet komunikimi me Thaçin, të akuzuarit e tjerë dhe persona, emrat e të cilëve nuk janë bërë publikë.
Sipas juristëve, kur parashtrohet kërkesa për masën e sigurisë, organi i akuzës i vlerëson disa kushte.
Në këtë rast, sipas tyre, ZPS-ja ka vlerësuar se prezenca e Kuçit mund të sigurohet në këtë mënyrë.
Derisa për çdo të akuzuar kur nuk i bindet masave të urdhëruara nga Gjykata, ka pasoja.
Ish-ministri i Drejtësisë është deklaruar i pafajshëm rreth akuzave të Speciales, për pengim të drejtësisë dhe ndikim të dëshmitarëve.
Përveç Kuçit, ZPS-ja për të njëjtat akuza po i ngarkon edhe ish presidentin Hashim Thaçi, ish-shefin e AKI-së, Bashkim Smakaj, Isni Kiljan dhe Fadil Fazliun.
Seanca e radhës, gjatë së cilës pritet të deklarohen Smakaj dhe Thaçi do të mbahet më 17 dhjetor./ATVLIVE.TV/
Zëvendësministri i Administrimit të Pushtetit Lokal, Arbër Vokrri, në një intervistë për emisionin COMPASS në ATV, deklaroi se banorët serbë të veriut, çdo ditë e më shumë po e humbin mbështetjen për Listën Serbe.
Ai tha prej kohësh, ata janë të zhgënjyer nga regjimi i Beogradit dhe vegla e tij politike, Lista Serbe.
“Qytetarët e veriut, shumica absolute serbë janë të zhgënjyer që një kohë të gjatë me regjimin e Beogradit dhe me instrumentin e tij që ka qenë i pranishëm këtu, Lista Serbe, bashkë me ato grupet e bandat para ushtarake e kriminale të cilat kanë bashkëpunuar ose kanë qenë pjesë e të njëjtin formacion dhe në të njëjtën kohë, me të parë kjo popullatë që prania institucionale e Republikës së Kosovës edhe në formën e sigurisë, pra Policisë së Kosovës, është për të mirën e tyre, pra nuk është për t’iu bërë dhunë as për një represion, por përkundrazi për ta shtuar sigurinë e vetë këtyre qytetarëve, sentimenti i tyre ka pësuar ndryshim radikal, ata i besojnë shumë Policisë së Kosovës”, tha Vokrri.
Intervistën e plotë të tij në COMPASS në ATV, e gjeni në videon më poshtë:
