Një grua është kanosur nga pronari i një restoranti në Drenas pas mosmarrëveshjes lidhur me shfrytëzimin e hapësirës së stacionit të autobusëve.
Rasti po hetohet.
“Gllogoc / 28.12.2024 – 13:50. Është raportuar se pas mosmarrëveshjeve lidhur me shfrytëzimin e hapësirës së stacionit të autobusëve, ankuesja f/k, është kanosur nga i dyshuari pronar i një restoranti. Rasti është duke u hetuar.”
Kroatët më 29 dhjetor zgjedhin presidentin e ri, teksa presidenti aktual Zoran Millanoviq, po prin sipas sondazheve.
Rivali i tij kryesor në zgjedhjet presidenciale, ku garojnë tetë persona për këtë post gjerësisht ceremonial, është Dragan Primorac, i cili mbështetet nga partia konservatore HDZ, që aktualisht qeverisë me Kroacinë.
Zgjedhjet po mbahen në kohën kur shteti, që është anëtar i Bashkimit Evropian dhe NATO-s, po përballet me inflacion të lartë, korrupsion dhe mungesë të fuqisë punëtore.
Sipas një sondazhi të publikuar të premten, Millanoviq ka mbështetjen e 37 për qind të elektoratit, ndërkaq Primorac ka mbështetjen e 20 për qind të votuesve.
Megjithatë, asnjë nga kandidatët nuk pritet të fitojë më shumë se 50 për qind të votave dhe presidenti i ri pritet të zgjidhet në rundin e balotazhit, që do të mbahet pas dy javësh.
Gjatë fushatës, dy rivalët kryesorë kanë këmbyer akuza, me Millanoviqin që është tallur me Primoracin, duke e quajtur “të mërzitshëm”.
Presidenti në Kroaci është komandant i forcave të armatosura dhe ka fjalë sa u përket vendimeve për politikën e jashtme.
Por, pavarësisht fuqive të kufizuara, shumë besojnë se ky post është kyç për balancën e pushtetit politik në shtetin që kryesisht është udhëhequr nga HDZ-ja që prej pavarësisë më 1991.
Millanoviq, 58 vjeç, politikan i krahut të majtë në të kaluarën ka qenë edhe kryeministër dhe është një nga figurat kryesore politike të shtetit për pothuajse dy dekada.
Gjatë mandatit të tij si president, ai e ka shfrytëzuar këtë post për të sulmuar kundërshtarët politikë dhe zyrtarët e BE-së, shpesh duke përdorur retorikë fyese dhe populiste.
Millanoviq, ka dënuar pushtimin rus të Ukrainës, por ka kritikuar ndihmën perëndimore ushtarake për Kievin. Kjo ka shtyrë kryeministrin, Andrej Pllenkoviq, që ta quajë atë prorus, i cili “po shkatërron besueshmërinë e Kroacisë në NATO dhe BE”.
Megjithatë, Millanoviq ka arsyetuar qëndrimet e tij, duke thënë se dëshiron që ta mbrojë Kroacinë nga “futja në luftë”.
Ndërkaq, rivali i tij politik, Primorac, 59 vjeç, ka bërë fushatë dhe e ka paraqitur veten si “unifikues” dhe person që promovon vlerat e familjes dhe patriotizmit.
Zgjedhjet do të tregojnë “nëse Kroacia po kthehet nga Lindja apo Perëndimi…. nga përçarjet apo nga uniteti”, ka deklaruar ai.
Qendrat e votimit janë hapur në orën 07:00 dhe do të mbyllen në orën 19:00, kur pritet të publikohen edhe sondazhet. Ndërkaq, rezultatet zyrtare pritet të bëhen publike në orët e vona të së dielës. /REL/
Autoriteti i Aviacionit Civil të Kosovës ka njoftuar se udhëtarët e fluturimit Hamburg-Prishtinë, të cilët për shkaqe teknike u detyruan të ateronin në aeroportin “Nikola Tesla” në Beograd, janë sjellë në Prishtinë paraditen e sotme, në ora 10:00, me operatorin ajror “Eurowings”.
AACK ka thënë se në bord ishin 155 udhëtarë, raporton Ekonomia Online.
“Gjatë ditës së djeshme, fluturimi i planifikuar nga Hamburg për në Prishtine nga operatori ajror ‘Eurowings’ (Flt.Nr. EW5704), i nisur në ora 14:30 me 155 udhëtarë ne bord, për shkaqe teknike është detyruar të aterrojë ne aeroportin ‘Nikola Tesla’ në Beograd në ora 16:27.
“Operatori ajror Eurowings, menjëherë ka organizuar dhe ka dërguar një aeroplan alternativ (Flt. Nr. EW6005) për të marrë marrë udhëtaret e mbetur në aeroportin e Beogradit, dhe në ora 22:56 ky aeroplan ka fluturuar me udhëtarët e njëjtë për në qytetin e Köln në Gjermani, ku ka aterruar në 00:45 pas mesnatë”, thuhet në njoftimin e AACK-së.
Tutje thuhet se “Autoriteti i Aviacionit Civil dhe institucione tjera shtetërore të Kosovës bashkë me aeroportin e Prishtinës, kanë qenë në komunikim dhe koordinim të vazhdueshëm me operatorin ajror Eurowings për sigurinë dhe mirëqenien e udhëtarëve tanë që ishin në këtë fluturim.
Udhëtarët e kthyer në Köln, operatori ajror Eurowings i ka sjellur në Prishtinë paraditën e sotme në ora 10:00 (Flt. Nr. EW6006)”, thuhet në reagimin e AACK-së.
Nasim Haradinaj, ish i burgosur nga Gjykata Speciale me seli në Hagë, ka thënë se është ankuar në Strasburg, pasi që mendon se i janë shkelur të drejtat njerëzore në Gjykatën Speciale me seli në Hagë.
Haradinaj tha se është ankuar në Strasburg pasi është dënuar pa argumentim dhe që Gjykata Speciale s’i ka pranuar provat materiale.
“E drejta njerëzore, prandaj avokati im është ankuar edhe në Strasburg, pasi e kam shfrytëzuar të drejtën që jam edhe shtetas suedez. Lënda ime ka shkuar në Strasburg, sepse kam të drejt dhe e falënderoj Toby Cadman që ma ka bërë këtë falas, pasi sa për financa që i kanë ndalur këta, unë s’do të mund as të mbrohesha”, ka thënë Haradinaj në Klan Kosova.
Ai më tej ka thënë se në Gjykatën për të drejtat e njeriut në Strasburg janë ankuar edhe për faktin se askush nga Specialja nuk është dënuar për rrjedhjen e dosjeve që patën shkuar në zyrat e OVL-së së UÇK-së.
Të paktën 151 persona kanë vdekur kur një avion pasagjerësh teksa po ulej preku pistën, u kaplua nga flakët dhe u përplas për një mur në Aeroportin Ndërkombëtar Muan të Koresë së Jugut, thanë autoritetet.
Avioni shkoi në Korenë e Jugut nga Bangkoku i Tajlandës me 181 persona në bord dhe tentoi të ulej pak pas orës 09:00, sipas kohës lokale, në aeroportin në jug të Seulit, tha Ministria jugkoreane e Transportit.
Në mesin e pasagjerëve ishin dy shtetas të Tajlandës, ndërkaq pjesa tjetër besohet se janë nga Koreja e Jugut, tha Ministria e Transportit në Seul.
Ky është aksidenti më i rëndë ajror ku është përfshirë një kompani ajrore jugkoreane në tri dekadat e fundit.
BREAKING: Video shows crash of Jeju Air Flight 2216 in South Korea. 181 people on board pic.twitter.com/9rQUC0Yxt8
— BNO News (@BNONews) December 29, 2024
Kryetari i Forumit Intelektual Europa 2030, Artan Nimani, ka deklaruar se Kosova është ndër vendet më të varfra në Evropë.
Ai ka theksuar se vetëm Ukraina, për shkak të luftës, ndodhet pas Kosovës në këtë renditje.
Nimani ka bërë thirrje për përpjekje të mëdha që të përmirësohet gjendja ekonomike e vendit, duke adresuar sfidat që pengojnë zhvillimin dhe rritjen e mirëqenies për qytetarët e Kosovës.
“Kosova mbetet ndër vendet më të varfra të Evropës, e tejkaluar vetëm nga Ukraina, një shtet që po përballet me një luftë shkatërruese. Ky fakt demanton propagandën e qeverisë Kurti për zhvillim dhe stabilitet ekonomik“, ka shkruar ai.
Postimi i plotë:
Zhvillimi imagjinar – Varfëria reale!
Të dhënat e FMN-së për vitin 2024 zbulojnë një realitet tronditës: Kosova mbetet ndër vendet më të varfra të Evropës, e tejkaluar vetëm nga Ukraina, një shtet që po përballet me një luftë shkatërruese.
Ky fakt demanton propagandën e qeverisë Kurti për zhvillim dhe stabilitet ekonomik. Mungesa e reformave efektive dhe zbatimi i politikave joadekuate kanë lënë Kosovën në një pozicion të turpshëm në hartën ekonomike të Evropës.
Tabela 1: Vendet më të varfra në Evropë sipas GDP-së për frymë (2024)
Renditja Shteti Statusi Ekonomik dhe Politik
1 
Ukraina-Në luftë aktive dhe krizë të rëndë ekonomike
2 
Kosova-Pa konflikt, por me ekonomi të dobët strukturore
3 
Moldavia-Vendi i varfër për nga zhvillimi
4 
Bjellorusia-Regjim autoritar dhe sanksione ndërkombëtare
5 
Azerbajxhani-Varësi nga burimet natyrore, mungesë diversifikimi
6 
Bosnja dhe Hercegovina-Pasiguri politike dhe tensione etnike
7 
Armenia -Konflikte të vazhdueshme me fqinjët
8 
Gjeorgjia-Tranzicion i ngadalshëm ekonomik
9 
Maqedonia e Veriut-Zhvillim i kufizuar ekonomik
10 
Shqipëria-Ekonomi e bazuar në remitanca dhe turizëm
11 
Serbia-Përballje me stagnim ekonomik
(Burimi: FMN, 2024)
Zhvillimi ekonomik i premtuar nga qeveria aktuale ka rezultuar në stagnim dhe zhgënjim. Është koha për ndryshim dhe për t’i dhënë vendit një udhëheqje të re që mund të sjellë rritje ekonomike dhe mirëqenie.
Qytetarë të Kosovës, nuk mund të mbetemi më viktima të mashtrimeve dhe propagandës boshe!
Zgjedhjet e ardhshme janë një mundësi për të ndalur mashtrimet dhe për të hapur rrugën për zhvillim të qëndrueshëm.Koha për të shpëtuar Kosovën është tani!Ndryshimi është në duart tuaja!
Në aeroportin e Prishtinës është arrestuar një person nën dyshimin se përmes rrjeteve sociale e kanosi një prokuror shteti.
Ai është dërguar në mbajtje.
“Prishtinë / 12.12.2024 – NN. Është arrestuar në ANP i dyshuari kosovar nën dyshimin se përmes rrjeteve sociale ka kanosur viktimën (prokuror i shtetit). Me vendim të prokurorit, i dyshuari është dërguar në mbajtje.”
Një person është arrestuar në Podujevë pasi dyshohet se ka ushtruar dhunë fizike në familjen e tij.
“DHUNË NË FAMILJE- Podujevë / 28.12.2024 – 17:30. Është arrestuar i dyshuari mashkull kosovar, pasi që ka ushtruar dhunë fizike në familjen e tij. Me vendim të prokurorit, i dyshuari është dërguar në mbajtje.”
Mbi 728 mijë euro është shuma e paguar nga Këshilli Gjyqësor i Kosovës për personat e arrestuar ose dënuar pa arsye në procedurë të rregullt para Komisionit për Kompensim Dëmi. Ndërsa 142 mijë euro është shuma e përgjithshme që janë kompensuar personat gjatë këtij viti përmes procedurës gjyqësore.
Nga Këshilli Gjyqësor i Kosovës kanë bërë të ditur për Ekonomia Online se gjatë këtij viti, 227 qytetarë të dënuar ose arrestuar pa arsye, kanë bërë kërkesë për kompensim dëmi. Gjatë këtij viti, ky institucion i ka shqyrtuar 197 kërkesa, ndërsa të tjerat janë të vitit paraprak.
Shuma më e madhe gjatë vitit 2024, është 34,812.00 €, ndërsa shuma më e vogël që është kompensuar për një person është 405 euro
“Gjatë vitit 2024, janë shqyrtuar dhe vendosur 247 kërkesa për kompensim dëmi. Janë shqyrtuar 197 kërkesa të ushtruara gjatë vitit 2024, ndërsa tjerat janë të vitit paraprak. Kanë mbetur të pa shqyrtuara 29 kërkesa për kompensim, 11 janë të pa kompletuara, ndërsa 18 janë ushtruar pas datës 15 dhjetor 2024, e të cilat do të shqyrtohen gjatë muajit janar 2025”, thuhet në përgjigjën e KGjK-së.
“Shuma më e madhe gjatë vitit 2024, është 34,812.00 €. Gjatë vitit 2024 shuma më e madhe që është kompensuar për një person, është 405 euro. Gjatë vitit 2024, shuma që është kompensuar ndaj kësaj kategori është 728,048.00 euro në procedurë të rregullt para Komisionit për Kompensim dëmi. Shuma më e madhe gjatë vitit 2024, është 34,812.00 €. Gjatë vitit 2024 shuma më e vogël që është kompensuar për një person është 405 euro”, thuhet në përgjigjën e këtij institucioni për Ekonomia Online.
E lidhur me këtë çështje, avokati Ardian Bajraktari ka thënë se rastet ku më së shpeshti konstatohen shkelje, është masa e paraburgimit.
“Masa e paraburgimit është masa më e ashpër për sigurimin e prezencës të pandehurit në procedurë, përcaktuar me dispozitat respektive të kodit të procedurës penale dhe në rrjedhë të kësaj në jo pak raste është konstatuar në instanca të mëvonshme gjyqësore që këta persona kanë qëndruar duke mos i plotësuar kriteret përkatësisht shkaqet e caktuara të përcaktuara për këtë çështje. Prandaj në rrjedh të kësaj si rezultat i qëndrimit në këtë masë iu është dhënë e drejta në fazat e mëvonshme të procedurës të kërkojnë kompensim”, u shpreh Bajraktari, teksa zbatimin e Ligjit për mbikëqyrje elektronike të personave, të cilëve u kufizohet lëvizja me vendim të gjykatës, e sheh të mirëseardhur.
“Vlen të theksohet që sa i përket çështjes së paraburgimit dhe caktimit të paraburgimit dhe vazhdimit të tij edhe Gjykata Kushtetuese në linjë me standardet që kanë vendose Gjykata Evropiane për të drejtat e njeriut ka konstatuar që këto kushte e rrethana duhet të shikohet në mënyrë permanente në raste se plotësohen ose jo. Sa i përket kësaj vlen të theksohet që së fundmi kemi fillimin e zbatimit të vonuar të ligjit për mbikëqyrje elektronike sipas të cilët, natyrisht do të ketë impakt edhe në këtë drejtim për faktin se do të mundësojë gjykatave shqiptimin dhe të masave të tjera alternative përmes së cilave natyrisht që sigurohet prezenca e të pandehurit në procedurë përkatësisht vazhdimi ose rrjedha e procedurës e pa penguar e cila është njëra prej shkaqeve që mund të caktohet paraburgimi”, deklaroi Bajraktari.
Avokati Bajraktari ka treguar edhe arsyet që shpesh herë këto raste përfundojnë edhe në instanca më të larta. Për këtë, ai ka kërkuar që të bëhet rishikimi i kritereve në aspektin e kompensimit.
“Nuk vlerësoj sepse ndërmarrje e këtyre vendimeve natyrisht është brenda parametrave ligjore megjithatë çka vlerësoj është që në lidhje me këtë çështje Këshilli Gjyqësor të shikojë mundësin e rishikimit të kritereve përkatësisht të aspektit të kompensimit për faktin se një numër i konsiderueshëm i personave të cilët iu drejtohet KGJK për kompensim janë të pakënaqur me vlerat e kompensimeve edhe pastaj natyrisht i drejtohet gjykatës, pa çka edhe e zvarrit procedurën por edhe është ngarkesë shtresë për sistemin gjyqësor”, u shpreh tutje Bajraktari.
Një burrë në Viti dyshohet se derisa ishte në një restorant i është përkeqësuar gjendja, e si pasojë ka humbur dhe jetën.
Sipas policisë, viktima pasi është dërguar në emergjencë e qytetit, mjeku ka konstatuar vdekjen e tij.
“Viktima mashkull kosovar derisa ishte duke pirë kafe në një restorant (sipas dëshmitarëve), i është keqësuar gjendja shëndetësore dhe ka mbetur pa shenja jete. Viktima pasi është dërguar në emergjencë e qytetit, mjeku ka konstatuar vdekjen e tij. Me vendim të prokurorit, trupi i pa jetë i viktimës u është liruar familjarëve për ceremoni mortore”, thuhet në njoftimin e policisë.