Instituti Hidrometeorologjik i Kosovës, ka njoftuar se të dielen mbi vendin tonë do të mbajë mot parashikohet me vranesira të shpërndara dhe me intervale me diell.
Sipas IHMK-së, temperaturat minimale do të jenë ndërmjet një dhe tre gradë Celsius, derisa ato maksimalet e ditës do të lëvizin ndërmjet shtatë dhe 11 gradë Celsius.
Era do të fryjë nga jugperendimi me shpejtësi një deri në dy metër për sekond.
Presidentja e Kosovës, Vjosa Osmani ka pritur gjatë ditës së premte, shefat e misioneve diplomatike dhe përfaqësues të organizatave ndërkombëtare në Kosovë të cilët janë të angazhuar në fushën e drejtësisë.
Sipas një njoftimi nga ana e Presidencës, në këtë takim u diskutua rreth përgatitjeve për procesin e themelimit të Komisionit Presidencial për Drejtësinë Tranzicionale.
“Nisma për themelimin i këtij Komisioni buron nga Strategjia për Drejtësinë Tranzicionale e Republikës së Kosovës. Presidentja Osmani shprehu mirënjohje për mbështetjen dhe angazhimin e të pranishmëve ndaj këtij procesi, si dhe njoftoi se gjatë javëve në vijim do të vazhdojnë takimet edhe me përfaqësues të tjerë nga organizatat përfaqësuese të viktimave, shoqërisë civile dhe komunitetit ndërkombëtar, me qëllim të finalizimit të fillimit sa më të shpejtë të punës së këtij komisioni”, thuhet tutje në këtë njoftim.
Ish-kryetari i Këshillit Kombëtar Shqiptar në Serbi, Nevzad Lutfiu, ka njoftuar të shtunën se ka marrë ftesë nga Prokuroria e Shtetit në Serbi për vendosjen e billbordeve për protestën e organizuar në Bujanoc në gusht të vitit të kaluar.
Në një shkrim në Facebook, ai ka bërë të ditur se më 25 dhjetor ishte ftuar të paraqitej në stacionin policor në Bujanoc, e se aty kishte kuptuar për nisjen e procedurave ndaj tij me pretekstin se s’ka pasur leje për organizim të protestës.
Ka thënë se ka refuzuar përgjigjen në stacion policor për shkak të mosrespektimit të procedurës së thirrjes dhe se tani është ftuar direkt nga Prokuroria për paraqitje për intervistë më 14 shkurt.
“Protesta jonë është parë me llupë, ndërsa thirrjet e huliganëve për të na likuiduar nuk i bëjnë përshtypje sistemit të drejtësisë. Kjo përndjekje nuk më demotivon aspak, përkundrazi më motivon që të vazhdoj rrugën e qëndresës dhe organizimit”, ka shkruar ai.
Shqiptarët në Luginë të Preshevës i kanë zhvilluar disa protesta, duke kërkuar që të mos diskriminohen nga autoritetet e Serbisë.
Organizata e Veteranëve të Luftës së UÇK-së ka njoftuar se ka zgjedhur Kryesinë e re të kësaj organizate.
Përmes një njoftimi në Facebook, OVL e UÇK-së ka publikuar emrat e anëtarëve.
Tutje, kjo organizatë ka treguar edhe misionin e saj.
“Të vetëdijshëm për punën dhe detyrat që presin kryesinë e OVL – UÇK-së, të gjithë u zotuan për angazhimin, bashkëpunimin për mbrojtje të vlerave të luftës së Ushtrisë Çlirimtare të Kosovës, tani kur lufta e drejtë e UÇK-së po përballet më procese gjygjësore të padrejta, çdo herë misoni i OVL – UÇK-së do jetë mbrojtja dhe lufta kundër Gjykates Speciale dhe këtyre gjygjeve të montuar, të padrejta dhe politike”, thuhet në njoftim.
Gjykata e Apelit e ka vërtetuar aktgjykimin e Gjykatës Themelore në Mitrovicë, ku Shukri dhe Rexhep Rexhepi ishin dënuar se, në bashkëkryerje, pas një fjalosjeje, kishin vrarë B.M. në Baks të Skenderajt në vitin 2022, ndërsa Fiton Musliu ishte dënuar për vrasje të mbetur në tentativë.
Më 24 korrik 2024, Shukri Rexhepi ishte dënuar me 23 vjet burgim për vrasje të rëndë dhe armëmbajtje pa leje, Rexhep Rexhep me 13 vjet burgim për ndihmë në kryerjen e vrasjes së rëndë, dhe Fiton Musliun me 3 vjet e 6 muaj burgim për vrasje të mbetur në tentativë dhe armëmbajtje pa leje.
Në aktgjykimin e siguruar nga “Betimi për Drejtësi”, Gjykata e Apelit thekson se Prokuroria Themelore kishte apeluar aktgjykimin e Themelores, duke pretenduar se ka pasur gabime në vërtetimin e gjendjes faktike dhe shkelje të ligjit Penal, dhe kërkon ndryshimin e aktgjykimit me dënim më të lartë për të akuzuarit.
Përfaqësuesi i palës së dëmtuar, avokati Amir Bunjaku kishte mbështetur ankesën e Prokurorisë për dënimin dhe kërkon një dënim më të lartë për të akuzuarit, duke kundërshtuar ricilësimin e veprës penale të Rexhep Rexhepit, pasi sipas tij, vrasja e B.M është kryer në bashkëkryerje.
Në anën tjetër, mbrojtësi i të akuzuarit Shukri Rexhepi, avokati Mahmut Halimi kishte paraqitur ankesë për shkelje të procedurës penale dhe kërkon anulimin e aktgjykimit, lirimin e të akuzuarit nga akuza e vrasjes dhe dënim më të butë për armëmbajtje pa leje.
Edhe mbrojtësi i të akuzuarit Rexhep Rexhepi, avokati Shyqyri Syla kishte paraqitur ankesë për shkelje të procedurës penale, duke kërkuar ndryshimin ose rivendosjen e aktgjykimit dhe lirimin e të akuzuarit nga akuza, ose shqipton dënim më të butë nëse Apeli konstaton veprim të drejtë nga Themelorja.
Ndërsa, mbrojtësi i të akuzuarit Fiton Musliu, avokati Gani Rexha kishte paraqitur ankesë për gabime në vërtetimin e gjendjes faktike, duke kërkuar ndryshimin e aktgjykimit për të shpallur të akuzuarin fajtor për vrasje në gjendje tronditjeje mendore dhe dënim më të butë.
Gjykata e Apelit, pasi shqyrtoi të gjitha shkresat e kësaj çështjeje penale, dhe pasi vlerësoi pretendimet e cekura në ankesa gjeti se ankesat nuk janë të bazuara.
Sipas vendimit të Apelit, kolegji i gjyqtarëve ka gjetur se Themelorja me rastin e marrjes së aktgjykimit nuk është përfshirë në shkelje esenciale të dispozitave të procedurës penale, të cilat do ta kushtëzonin anulimin e aktgjykimit të ankimuar.
Apeli po ashtu ka vlerësuar se aktgjykimi i Themelores është në harmoni me vetveten, me një arsyetim të kuptueshëm dhe të qartë duke përfshirë të gjitha faktet vendimtare që karakterizojnë veprat penale për të cilat ngarkohen të akuzuarit.
Në vendimin e Apelit, thuhet se Themelorja vlerësimin e provave e ka bërë në pajtim me dispozitat ligjore, duke dhënë arsye të qarta dhe konkrete për vendin, kohën dhe mënyrën se si ka ardhur deri të kryerja e veprave penale nga ana e të akuzuarve.
Lidhur me ankesën e Prokurorisë për ricilësimin juridik të bërë nga Themelorja nga vepra penale “Vrasje e rëndë e mbetur në tentativë” në veprën penale “Ndihma në kryerjen e veprës penale të vrasjes së rëndë” për të akuzuarin Rexhep Rexhepi, sipas Apeli një ricilësim i tillë ka qenë i drejtë dhe i bazuar në prova të administruara gjatë këtij procesi gjyqësorë.
Ndërsa, aty thuhet se nuk është vërtetuar se i akuzuari Rexhep Rexhepi e ka ka kryer veprën penale të armëmbajtjes pa leje.
Apeli ka vlerësuar se Gjykata e shkallës së parë drejtë dhe në mënyrë të plotë e ka vërtetuar gjendjen faktike dhe në këtë çështje penale nuk ka mbetur pa u vërtetuar asnjë fakt vendimtar.
Tutje, Apeli ka theksuar se Themelorja ka vendosur drejtë lidhur me lartësinë e dënimit me burgim pasi që me një dënim të tillë të tjerët dhe të akuzuarit do të parandalohen nga kryerja e veprave penale në të ardhmen.
“Prandaj, kjo gjykatë vlerëson se dënimi i shqiptuar ndaj të akuzuarve nga ana e Gjykatës së shkallës së parë është në harmoni me intensitetin e rrezikshmërisë shoqërore të veprave penale të kryera dhe shkallën e përgjegjësisë penale të të akuzuarve, intensitetin e rrezikimit apo pasojave të shkaktuara dhe se me të do të parandalohen të akuzuarit nga kryerja e veprave penale në të ardhmen, si dhe do të parandalohen personat tjerë nga kryerja e veprave penale.”, thuhet në aktgjykimin e Apelit i nxjerr më 15 janar 2024, nga kolegji i përbërë nga
gjyqtarët Hashim Çollaku, kryetar i kolegjit, Kadrije Goga Lubishtani dhe Valbona M Selimaj, anëtarë të kolegjit.
Ndryshe, i akuzuar në këtë rast ka qenë edhe Agim Musliu, ndaj të cilit ishte veçuar procedura pas pranimit të fajësisë për armëmbajtje pa leje.
Prokuroria Themelore në Mitrovicë më 19 qershor 2023 ka ngritur aktakuzë kundër Shukri Rexhepit, Rexhep Rexhepit, Fiton Musliut dhe Agim Musliut.
Shukri dhe Rexhep Rexhepi akuzohen se më 23 korrik 2022, në fshatin Baks, Komuna Skenderaj, në bashkëkryerje, kanë privuar nga jeta viktimën B.M, si dhe kanë plagosur të dëmtuarin Labinot Ademi. Rasti thuhet se ka ndodhur pas një fjalosjeje. Kurse, Fiton Musliu akuzohet se me dashje ka filluar kryerjen e veprës penale të vrasjes mirëpo që e njëjta ka mbetur në tentativë, pasi i njëjti ka shkrepur me pushkë të gjuetisë me qëllim që ta privojë nga jeta Shukri Rexhepin. Kurse, Agim Musliu thuhet se ka mbajtur në posedim armë të zjarrit- pushkë e gjuetisë në kundërshtim me Ligjin për Armë.
Presidenti amerikan, Donald Trump, ka vizituar sot Kaliforninë, specifikisht zonën e Los Angelesit ku zjarret shkaktuan dëme masive në njerëz dhe aso material gjatë janarit.
Bahskë me të ishte Zonja e Parë, Melania Trump, si dhe emisari Richard Grenell.
Trumpi kritikoi kryebashkiaken e Los Angelesit, Karen Bass, që nuk ka përdodur fuqitë e saj të emergjencës për të reaguar ndaj zjarreve.
“Ju keni fuqi për emergjenca sikurse unë…ju duhet t’i përdorni ato”, i tha Trumpi Bassit, e cila u përgjigj se e ka bërë një gjë të tillë.
I pari i Amerikës tha që do të nënshkruajë një urdhër ekzekutiv për të hapur valvulat e ujit në këtë zonë.
Ai po ashtu shtoi se do t’i shmangë lejet federale për rindërtimin e zonës pasi që ato marrin vite, dhe nevoja është urgjente.
Pep Guardiola është kundërpërgjigjur ndaj kritikëve të shpenzimeve të Manchester Cityt, duke theksuar se skuadrat e suksesshme në vitet e fundit kanë tejkaluar vazhdimisht ata për sa i përket shpenzimeve.
Manchester City ka bërë tri nënshkrime këtë afat kalimtar, duke sjellë Omar Marmoush, Abdokhadir Khusanov dhe Victor Reis për të forcuar skuadrën e tyre.
Transferimet e kampionit anglez kanë bërë që rivalët të kritikojnë strategjinë e klubit nga Etihad, por kjo nuk i pengon trajnerit Guardiola.
Guardiola ka thënë se çdo ekip i suksesshëm në 20 vitet e fundit ka shpenzuar më shumë se ta.
“Njerëzit thonë: Man City po shpenzon përsëri! Çdo ekip i suksesshëm në këtë vend në dy ose tre dekadat e fundit ka shpenzuar më shumë se klubet e tjera. Në pesë vitet e fundit ne jemi në vendin e 11-të në shpenzime neto”.
“Të gjitha klubet që kanë qasje dhe mundësi shkojnë në merkato, çdo klub”, ka thënë Guardiola.
Me një nga aktet e tij të fundit në detyrë, ish-presidenti amerikan, Joe Biden mori pjesë në traditën presidenciale të shkrimit të një letre për pasardhësin e tij, Donald Trump.
Tradita filloi me Ronald Reagan duke i lënë një letër zëvendëspresidentit të tij George H.W. Bush në 1989, me Bush që vazhdoi traditën katër vjet më vonë pasi humbi zgjedhjet e 1992 nga Bill Clinton.
Çdo president që atëherë – përfshirë Trump në 2021 – ka lënë një letër për pasardhësin e tyre.
Bëhet e ditur se Trump e gjeti letrën e shkruar me dorë në tavolinë të hënën teksa po firmoste urdhra ekzekutivë në Zyrën Ovale, të nxitur nga një gazetar që e pyeti nëse kishte marrë një mesazh nga Biden.
Pasi gjeti letrën, Trump e mbajti atë për kamerat, duke treguar një “47” të shkruar me dorë, për presidentin e 47-të.
Ai tha se do ta lexonte para se të vendoste nëse do të ndajë atë që letra thoshte, shkruan the Independent.
E shënimi i shkurtër, të cilin Trump e përshkroi si “frymëzues” dhe “shumë të këndshëm”, u nda më vonë i plotë me Fox News.
“Ishte paksa një letër frymëzuese. Shijojeni, bëni një punë të mirë. E rëndësishme, shumë e rëndësishme. Sa e rëndësishme është puna”, u tha Trump gazetarëve.
Ja çfarë thoshte letra:
I nderuar President Trump,
Ndërsa largohem nga kjo detyrë e shenjtë, ju uroj ju dhe familjen tuaj çdo të mirë në katër vitet e ardhshme. Populli amerikan – dhe njerëzit në mbarë botën – kërkojnë nga kjo shtëpi për qëndrueshmëri në stuhitë e pashmangshme të historisë dhe lutja ime është që në vitet e ardhshme të ketë prosperitet, paqe dhe hir për kombin tonë.
Zoti ju bekoftë dhe ju udhëzoftë ashtu siç e ka bekuar dhe udhëhequr vendin tonë të dashur që nga themelimi.
Joe Biden 1-20-25.
Rrahman Jasharaj, kryetar i SBAShK-ut, ka thënë se Qeveria Kurti nuk ka punuar sa duhet për arsimin dhe sindikalistët.
Në tryezën “Fuqizimi i kapaciteteve të sindikatave të Kosovës për të përballuar sfidat e demokracisë sociale”, ai ka thënë se qeveria e ardhshme duhet të zgjedh mes dialogut dhe protestave me sindikalistët.
“Në vend që të mësojmë të gjithë nga greva e shtatorit 2022 ata haptazi i shpallën luftë sindikatave. Edhe tek ministritë, besoj pajtoheni, se nuk i kemi punët mirë, ngase e kanë shkollën e njëjtë e Kurtit dhe i kanë mbyllur dyert për dialog”.
“Premtimet për digjitalizim nuk u bënë kurrë, as nuk u bënë kushtet e punës, ne punojmë me shkumës dhe shpuzë dhe pastaj na qesin atje në shenjë për të na gjuajtur populli fjalë. Sepse më shkumës dhe shpuzë e kemi të vështirë të bëjmë gara për dije me Gjermaninë dhe shtetet tjera”.
“Pra si SBAShK, katër vitet i kemi vlerësuar si vitet më të vështira. I mbetet qeverisë që vjen të zgjedh dialog apo protesta dhe greva”, ka thënë Jasharaj.
Robert Lewandowskit i është ofruar një kontratë e madhe për t’u transferuar në Arabinë Saudite.
El Nacional raporton se sulmuesi i Barcelonës do t’i jepet një marrëveshje 50 milionë euro në vit nëse ai kalon në një klub të paidentifikuar në Ligën Pro të Arabisë Saudite.
Kontrata e Lewandowskit me Barcelonën skadon në vitin 2026, por ai mund të largohet këtë verë.
Lewandowksi është pjesë e Barçës që nga viti 2022, kur u transferua nga Bayern Munchen.