Author: ATVLive

Pikërisht në Ditën e Gruas, 8 Marsin, tri raste të dhunës në familje janë raportuar në Policinë e Kosovës.

Tri gra, dy në Gjakovë dhe një në Pejë, u rrahën ditën e djeshme nga burrat e tyre.

Që të tre janë dërguar në mbajtje me vendim të prokurorit.

Njoftimi:

DHUNË NË FAMILJE

. Pejë / 08.03.2025 – 15:00. Është arrestuar i dyshuari mashkull kosovar pasi që i njëjti kishte sulmuar fizikisht bashkëshorten e tij duke tentuar ta godas me një mjet të mprehtë-thikë. Pas intervistimit të të dyshuarit dhe viktimës, me urdhër të prokurorit i dyshuari është dërguar në mbajtje.

· Gjakovë / 08.03.2025 – 13:15. Është arrestuar i dyshuari mashkull kosovar pasi që i njëjti ka sulmuar fizikisht bashkëshorten e tij viktimën femër shqiptare shtetase e huaj. Nuk raportohet për të lënduar ndërsa me vendim të prokurorit i dyshuari është dërguar në mbajtje.

· Gjakovë / 08.03.2025 – 17:00. Është arrestuar i dyshuari mashkull kosovar pasi që i njëjti kishte ushtruar dhunë ndaj viktimës (gruas së tij) shtetase e huaj. Pas intervistimit, me urdhër të prokurorit i dyshuari është dërguar në mbajtje.

Kryeministri i Shqipërisë, Edi Rama, ka ndarë pamjet e rrugës së re Shëngjin-Velipojë, e cila po shkon drejt përfundimit.

Ai ka publikuar një video në Facebook, duke shkruar:

“Mirëmëngjesi dhe pamjet e rrugës së re Shëngjin-Velipojë, e cila po shkon drejt përfundimit, duke ofruar një tjetër spektakël të bukurive shqiptare në vazhdën e zbulimit të Shqipërisë Turistike, ju uroj të diel të qetë”.

Ç’mund të ndryshojë me një qeveri të koalicionit CDU/CSU dhe SPD? Dokumenti i hartuar nga partitë gjatë bisedimeve paraprake jep një orientim për temat e migracionit, financave, punës, sociale si dhe ekonominë.

CDU/CSU dhe SPD po hedhin hapin tjetër drejt një qeverie të përbashkët. Bisedimet paraprake kanë përfunduart, e së shpejti forumet partiake mund të japin sinjali e gjelbër për bisedimet e koalicionit, gjatë të cilave temat do të diskutohen në detaje. Në një dokument prej 11 faqesh ndërkohë janë përcaktuar disa detaje.

Taksa për energjinë: Për të lehtësuar sipërmarrjet dhe ekonomitë shtëpiake taksa për energjinë do të ulet në vlerë minimale. Kjo do të lehtësojë me një kuotë prej të paktën pesë cent për kilovat/orë. Unioni konservator (CDU/CSU) dhe socialdemokratët (SPD) duan të përgjysmojnë tarifën për rrjetin e transmetimit, një komponente kjo e çmimit të energjisë.

Reforma tatimore: Shtresa e mesme, sipas dokumentit të bisedimeve paraprake, duhet të çlirohet nga barra e tatimeve. Eshtë planifikuar të reformohet sistemi i tatimit mbi të ardhurat. Po ashtu do të rritet kuota e parashikuar të lehtësohet prej tatimit për kostot e udhëtimit që kanë njerëzit, të cilëve u duhet të udhëtojnë në distanca të gjata nga shtëpia për në vendin e punës.

Automjetet elektrike: Për të fuqizuar sërish kërkesën në rënie për automjetet me elektrik, unioni dhe SPD parashikojnë sërih një „stimul për blerjet”. Më 2023 ky stimul u ndërpre nga koalicioni qeverisës për shkak të vështirësive buxhetore, paas kësaj pati rënie të ndjeshme të kërkesës për këto automjete.

Gastronomia: Tatimi mbi xhiron e të ardhurave për ushqimet në sektorin e gastronomisë do të ulet afatgjatë deri në shtatë përqind. Tatimi mbi vlerën e shtuar në gastronomi është ulur qysh në kohën e pandemisë së koronavisurit nga 19 në shtatë përqind, por kjo ishte vetëm si një masë e përkohshme.

Bujqësia: Vendimi i koalicionit të mëparshëm për të ndërprerë subvencionimin e naftës për sektorin e bujqësisë do të anulohet.

Çështje të punës dhe sociale

Paga minimale: Zhvillimi i pagës minimale duhet të kontribuojë për fuqizimin e fuqisë blerëse si dhe për një kërkesë të qendrueshme në tregun e brendshëm në Gjermani. Në vitin 2026, sipas dokumentit nga bisedimet paraprake të koalicionit, duhet të jetë e mundur arritja e një page minimale me 15 euro për orë pune.

Pensionet: Kush dëshiron të vazhdojë vullnetarisht pasi ka mbushur moshën e pensionit, mund të punojë me të ardhura deri në 2.000 euro në muaj plus pensionit pa tatim. Të ashtuquajturit pension i mëmësisë do të zgjerohen. Edhe për fëmijët e lindur përpara vitit 1992 do të llogariten tre vite nga d vite e gjysmë që llogariteshin deri tani si vite kujdesi për fëmijën në vitet e pensionit.

Ndihma sociale (Bürgergeld): Sistemi i ndihmës sociale (Bürgergeld) do të rikonceptohet. “Ne do ta rikonceptojmë sistemin e deritanishëm të Bürgergeld, drejt një sigurimi bazë për ata që janë në kërkim të një vendi pune”, tha kryetari i CDU-së Friedrich Merz. “Për njerëzit, që mund të punojnë dhe në mënyrë të përsëritur refuzojnë një vend pune të ofruar, do të merret si masë pezullimi i ndihmës sociale.”

Kujdestaria: Në sfondin e rritjes së kostove në miliarda unioni konservator dhe socialdemokratët duan të hapin rrugën për “një reformë të madhe në sistemin e përkujdesjes”.

Koha e punës: Duhet të krijohet mundësia për një kohë maksimale pune javore në vend të kohës maksimale ditore të punës. “Në këtë mënyrë orët shtesë do të paguhen me një suplement përtej të arudhurave sipas kontratës për një punë me nornë të plotë. Të ardhurat nga orët shtesë të punës do të jenë të çliruara nga tatimi.”

Migracioni

E drejta e shtetësisë: E drejta e shtetësisë e reformuar nga koalicioni i mëparshëm qeverisës do të vazhdojë të mbetet në fuqi. Afatet e shkurtuara të pritjes për marrjen e shtetësinë dhe shtetësia e dyfishtë për ata që janë jo shtetas të BE-së do të mbeten gjithashtu në fuqi.

Kthimet në kufi: Në kufijtë e Gjermanisë në të ardhmen mund të kthehen pa u lejuar të hyjnën ëvend edhe njerëzit, që paraqesin kërkesë për azil – por kjo vetëm në marrëveshje me vendet fqinjë. Kthimet në kufi janë parimisht të mundshme vetëm, aty ka kontrolle kufitare. Këto kontrolle faktikisht i ka udhëzuar ministrja e Brendshme Nancy Faeser (SPD)në mënyrë suksesive për të gjithë kufijtë e vendit – kush dëshiron të paraqesë kërkesë për azil normalisht lejohet të hyjë në vend.

Bashkimi familjar: Bashkimi i pjestarëve të familjes për ata që kanë nevojë për mbrojtje do të pezullohet përkohësisht, por për këtë nuk përmend ndonjë afat. Gjithashtu do të ketë një të ashtuquajtur ofensivë kthimi: Gjatë dëbimeve nuk do të ketë më mbrojtje të detyrueshme ligjore, policia federale do të lejohet të udhëzojë ndalimin për dëbim- Po ashtu do të zgjerohet lista me vendet e klasifikuara të sigurta të origjinës.

Të tjera plane

Frena e qirave: Frena e qirave do të zgjatet edhe për dy vjet. Për stabilizimin e tregut të strehimit ndërtimi i banesave do të zgjerohet si një komponente thelbësore për garantimin e mjediseve të banimit.

Qarkullimi urban: Vazhdimi i afatit përtej këtij viti i biletës së preferuar, Deutschlandticket, për autobusë dhe trena rajonalë do të shtrohet gjithashtu për diskutim në tryezën e bisedimeve të koalicionit.

Ligji elektoral: Do të shqyrtohet sërish një reformim i ligjit elektoral të sapon dryshuar për zgjedhjet e 23 shkurtit. Ka pasur kritika, që disa kandidatë për mandatet direkte, edhe pse kanë fituar në zonat e tyre elektorale, nuk kanë mundur të marrin një mandat parlamentar.

Mbrojtja e klimës: Për mbrojtjen e klimës thuhet: “Ne duam të krijojmë produkte neutrale ndaj klimës p.sh. përmes kuotave për çelik neutral ndaj klimës ose për kuotën e gazit ekologjik. (…) Ne u përmbahemi objektivave gjermane dhe europiane për klimën. (…) Ne punojmë me vendosmëri, që t’i realizojmë objektivat për klimën.

Financimi

Një fond i posaçëm: CDU dhe SPD duan të krijojnë një fond të posaçëm për financimin e ripërtëritjes së infrastrukturës së federatës, landeve dhe komunave, që arrin një volum prej 500 miliard eurosh dhe me një afat dhjetë vjeçar. Ky fond i posaçëm duhet të shërbejë për investime në infrastrukturë. Këtu përfshihen kryesisht investimet për mbrojtjen civile dhe të popullsisë, qarkullimit rrugor, spitaletz, investimet për infrastrukturën energjetike, në arsim, kudjestari dhe infrastrukturën shkencore, në kërkimet shkencore, zhvillim dhe digjitalizim. /DW/

Zona e Kullës së Qelisë në Bjeshkët e Deçanit është përfshirë nga zjarri që nga dita e djeshme.

Në lidhje me këtë, kreu i Deçanit, Bashkim Ramosaj, ka njoftuar se që nga mëngjesi një numër i madh i njerëzve kanë dalë në terren për të shuar zjarrin.

“Sot është aktivizuar një ekip i madh i njerëzve dhe i vullnetarëve, zjarrfikësve dhe punëtorëve të parkut, dhe po besoj që jemi në rrugë të duhur për të shuar zjarrin, i cili na ka shqetësuar që nga dita e djeshme, sidomos në orët e mbrëmjes, sepse edhe frynte një erë që e ndihmonte më shumë zjarrit. Ndërsa sot dita është më e qetë, nuk ka erë.” – ka thënë Ramosaj në një lidhje direkte për RTK.

Ai gjithashtu ka njoftuar se kanë kapacitete të mjaftueshme dhe se afër zjarrit nuk ka vendbanime dhe as biznese.

“Po, kemi kapacitete të mjaftueshme. E mira e gjithë kësaj është se nuk ka vendbanime afër këtij zjarri, nuk ka ndonjë biznes, as shtëpi, dhe nuk rrezikohet jeta e njerëzve. Mirëpo, është një brez i gështenjëve dhe i ahishtës që është e dhimshme me u djegur në këtë kohë. Po besoj që gjatë ditës do të lokalizohet ky zjarr, edhe pse është e vështirë, por do të mundohemi që pjesën më vitale të këtij pylli ta hekim nga rreziku.” – ka thënë Ramosaj.

I pyetur për rrethanat që kanë shkaktuar zjarrin, Ramosaj ka supozuar se mund të jetë pakujdesi e njeriut.

“Shkaktari, po supozojmë, është faktori njeri, mund të jetë ndonjë pakujdesi e njeriut dhe kaq.” – ka thënë ai.

Presidentja e Kosovës, Vjosa Osmani zgjodhi ta uronte 8 marsin – Ditën e Gruas në një mënyrë të veçantë.

Ajo zgjodhi që urimin ta bënte me gratë që punojnë në Agjencinë e Kosovës për Inteligjencë, me të cilat publikoi edhe një fotografi ku i quajti “heroinat e fshehta”.

Një veprim i tillë i presidentes Osmani nxiti reagime të shumta, duke thënë se ajo i ka vënë në rrezik agjentet, të cilat ndonëse në fotografi shihen të kthyera me shpinë.

Ish-inspektori i përgjithshëm i Agjencisë Kosovare për Inteligjencë (AKI), Burim Ramadani, e quajti të paprecedent këtë veprim të presidentes Osmani.

Ai tha se ekspozimi i punonjësve të AKI-së përbënë shkelje serioze ligjore.

“E paprecedent, si asnjëherë më parë! Ekspozimi i punonjësve të AKI (qoftë pjesë të caktuara identifikuese) përbën shkelje serioze ligjore! Rrëzimi i investimit shumëvjeçar në mos-ekspozim të stafit rrezikon sigurinë e punonjëseve dhe sigurinë kombëtare! Kur kjo vjen nga kreu i shtetit, po flasim për një shkelje mëse serioze”, ka shkruar Ramadani.

E nga Presidenca e Kosovës i kanë thënë Telegrafit se publikimi i fotografisë me gratë e inteligjencës u bë me vlerësimin e AKI-së dhe u realizua nga ky institucion.

Bekim Kupina, këshilltar për media i presidentes Vjosa Osmani, theksoi se në këtë foto nuk cenohet asnjë standard i sigurisë.

“Publikimi i fotos së Presidentes me gratë e inteligjencës ka pasur për qëllim të vlerësojë punën dhe përkushtimin e tyre në shërbim të sigurisë kombëtare. Në këtë foto, identiteti i tyre nuk ekspozohet dhe nuk cenohet asnjë standard i sigurisë. Për më tepër, kjo foto është bërë dhe dërguar nga AKI-ja dhe pas vlerësimit të tyre se nuk përbën ekspozim të identitetit”, tha Kupina.

Tutje Kupina shtoi se praktika të tilla ka pasur edhe më herët në Kosovë dhe në shtete të tjera, derisa tha se është për keqardhje që po bëhet fushatë me komente fyese e të padrejta ndaj këtyre grave.

“Presidenca vazhdon të mbetet e përkushtuar ndaj ruajtjes së standardeve më të larta të konfidencialitetit dhe profesionalizmit. Është për të ardhur keq që pikërisht në Ditën Ndërkombëtare të Gruas, në vend që të vlerësohet roli dhe kontributi i grave në një fushë sfiduese si inteligjenca, po bëhet fushatë me komente fyese dhe të padrejta ndaj tyre. Gratë që shërbejnë me përkushtim në sigurinë kombëtare meritojnë respekt dhe mbështetje, jo paragjykime”, theksoi ai.

Kupina përmes disa fotografive ka treguar edhe disa shembuj të tillë që kanë ndodhur në të kalurën. /Telegrafi/

Shtëpia e Bardhë e paralajmëroi përsëri Teheranit të dielën se do të përballet me përgjigje ushtarake, nëse nuk pranon arritjen e një marrëveshjeje për programin e saj bërthamor.

Një ditë më herët, lideri suprem i Iranit, Ayatollah Ali Khamenei, e hodhi poshtë kërkesën e Shteteve të Bashkuara për bisedime.

“Ne shpresojmë se regjimi i Iranit i zgjedh interesat e veta më të mira dhe popullin e vet në vend të terrorit”, tha zëdhënësi i Sigurisë Kombëtare të Shtëpisë së Bardhë, Brian Hughes, në një komunikatë të dielën, duke i përsëritur deklaratat e presidentit Donald Trump, që tha se “nëse detyrohemi të futemi ushtarakisht, do të jetë e tmerrshme”.

Në një intervistë me Fox Business, Trump tha: “Ka dy mënyra për të trajtuar Iranin: ushtarakisht, ose duke bërë një marrëveshje” për ta parandaluar Teheranin nga sigurimi i armëve bërthamore.

“Ua kam shkruar një letër atyre, ku thashë, ‘shpresoj që do të negocioni sepse, nëse duhet të veprojmë ushtarakisht, do të jetë e tmerrshme’”, tha Trump.

“Po të isha në vendin e tyre, do të bisedoja për një marrëveshje. Nuk jam i sigurt se të gjithë pajtohen me mua, por ne mund ta arrijmë një marrëveshje që do të ishte po aq e mirë sa një fitore ushtarake”, shtoi ai.

“Por, koha po afron. Diçka do të ndodhë në një mënyrë ose tjetrën”, theksoi ai.

Pjesë nga intervista u transmetuan më 7 mars, por intervista e plotë do të shfaqet më 9 mars, tha Fox.

Ndërkohë, Ali Khamenei tha më 8 mars gjatë një fjalimi para një grupi zyrtarësh iranianë – pa përmendur drejtpërdrejt Trumpin apo Shtetet e Bashkuara – se “bisedimet e tyre nuk synojnë zgjidhjen e problemeve”.

“Ato bëhen për… ‘le të flasim për të imponuar atë që duam mbi palën tjetër që është ulur përballë nesh’”, tha Khamenei.

“Këmbëngulja e disa qeverive ngacmuese për bisedime nuk ka qëllim zgjidhjen e çështjeve… Bisedimet për ta janë një rrugë për të paraqitur kërkesa të reja; nuk kanë të bëjnë vetëm me çështjen bërthamore të Iranit… Irani nuk do t’i përmbushë pritshmëritë e tyre”, u citua të ketë thënë Khamenei nga mediat shtetërore.

Ministri i Jashtëm i Iranit, Abbas Araghchi, tha më 8 mars se Teherani ende nuk ka pranuar ndonjë letër nga Trumpi.

“Kemi dëgjuar për të [letrën e Trumpit], por nuk kemi marrë asgjë”, tha Araghchi në televizionin shtetëror.

Shtetet e Bashkuara dhe Izraeli kanë thënë prej kohësh se nuk do ta lejojnë kurrë Teheranin të fusë në dorë armë bërthamore, ndërsa Irani vazhdon ta pasurojë uraniumin në nivele pranë atyre të përdorura për prodhimin e armëve bërthamore.

Teherani ka këmbëngulur se programi i tij është vetëm për qëllime paqësore.

Gjatë mandatit të tij të parë, Trumpi i tërhoqi Shtetet e Bashkuara nga marrëveshja bërthamore e vitit 2015 mes Iranit dhe fuqive botërore dhe rivendosi sanksionet që ishin hequr sipas kushteve të saj.

Trump argumentoi se kushtet e asaj marrëveshje nuk ishin mjaftueshëm të forta për të parandaluar Iranin nga sigurimi i armëve bërthamore dhe e akuzoi gjithashtu Teheranin për nxitjen e dhunës ekstremiste në rajon – akuza që Irani i ka mohuar pavarësisht provave të shumta.

Muajin e kaluar, Khamenei deklaroi se ishte kundër bisedimeve të drejtpërdrejta me Trumpin, duke argumentuar se ai nuk është i besueshëm pasi braktisi marrëveshjen e vitit 2015.

Pas kthimit në Shtëpinë e Bardhë në janar, Trump e riktheu fushatën e “presionit maksimal” – që ishte gur themeli i politikës së tij ndaj Iranit gjatë mandatit të parë – me qëllimin për t’i ulur eksportet e naftës së Iranit në “zero.”

Ekspertët thonë se Shtetet e Bashkuara më gjasë nuk do të jenë në gjendje të ndalojnë plotësisht shitjet e naftës nga Irani, por do të mund t’i kufizojnë ato në mënyrë të konsiderueshme./REL

Ish shefi i Grupit Parlamnetar të LDK-së, Arben Gashi, i cili duket se nuk ka arritur të sigurojë votat për të marrë ulëse në Kuvendin e Kosovës, ka dalë me reagim, ku ka hedhur akuza se procesi i numërimit në Qendrat e Numërimit Komunal ka dështuar.

Gashi tha se KQZ duhet të vendosë për rinumërimin e të gjitha votave.

“Siç po duket, procesi i numërimit në Qendrat e Numërimit Komunal ka dështuar. Ky dështim ka dëmtuar gjithashtu rëndë besimin në vërtetësinë e rezultatit zgjedhor. Për hir të ruajtjes së besimit në procesin demokratik, KQZ duhet të vendosë për rinumërimin e të gjitha votave në Qendrën e Numërimit dhe të Rezultateve në Prishtinë.” – ka thënë Gashi.

Ai tutje është shprehur se në këto zgjedhje ka pasur manipulim masiv me votat e diasporës, dhe sipas tij, manipulimi më i madh ka ndodhur brenda partive politike.

“Një fenomen tjetër i vërejtur në këto zgjedhje është manipulimi masiv me votën e diasporës. Këto vota, siç po shihet, janë manipuluar sidomos brenda partive politike. Demokracia, ndër të tjera, është edhe besim në institucionet e zgjedhura. Vendi ka nevojë për institucione përfaqësuese dhe të besueshme.” – ka përfunduar Gashi.

Më shumë se 1 mijë persona janë vrarë, pas dy ditësh përplasjes me forcave siriane të sigurisë dhe besnikëve të presidentit të rrëzuar Bashar al-Assad.

Numri i të vdekurve në dy ditët e fundit nga këto përplasje mes forcave siriane të sigurisë dhe të “besueshmëve” të Assadit, ka shkuar në më shumë se 1 mijë, duke e bërë kështu ditën më vdekjeprurëse pas më shumë se një dekade, transmeton Telegrafi.

Observatorit sirian për të Drejtat e Njeriut me seli në Britani të Madhe ka njoftuar se të paktën 750 civilë janë vrarë – kryesisht nga një distancë e afërt, ku 125 pjesëtarë të forcave siriane të sigurisë si dhe 150 militantët të lidhur me grupe të armatosura që kanë lidhje me Assadin, janë vrarë gjithashtu.

Monitoruesit kanë theksuar se energjia elektrike dhe uji i pijshëm është ndërprerë në masë të madhe, rreth brigjeve perëndimore të qytetit të Latakias.

Përplasjet shpërthyen të enjten që shënoi një eskalim të madh dhe një sfidë e madhe për qeverinë e re në Damask – tre muaj pasi arritën të largojnë nga pushteti Assadin.

Ndryshe Assad ishte rrëzuar nga pushteti pasi Hayat Tahrir al-Sham (HTS) organizoi një ofensivë befasuese në fillim të dhjetorit – duke rrëzuar qeverinë dhe duke i dhënë kështu fund 24 viteve torturë – dhe më shumë se pesë dekada të familjes së Assadit që është në pushtet.

Policia e Kosovës ka njoftuar se një grua është gjetur pa shenja jete në Kamenicë.

Trupi i pajetë i viktimës është dërguar për obduksion në IML.

“HETIM I VDEKJES- Kamenicë / 08.03.2025 – NN. Raportohet se është gjetur trupi i pa jetë i viktimës femër kosovare. Në vendin e ngjarjes kanë dalë njësitet përkatëse, ku ekipi mjekësor ka konstatuar vdekjen e viktimës. Me vendim të prokurorit, trupi i pajetë është dërguar në IML për obduksion.”

Zbatimi i Marrëveshjes Bazë të Brukselit dhe aneksit të Ohrit mes Kosovës dhe Serbisë nuk duket në horizont edhe dy vjet pas dakordimit të saj. Megjithatë, ky dokument nga njohësit e këtij procesi konsiderohet se mbetet i detyrueshëm për të dyja palët dhe bazë për negociatat e mëtejme për normalizimin e marrëdhënieve dhe rrugën drejt integrimit në Bashkimin Evropian.

Kosova dhe Serbia, me ndërmjetësimin e Bashkimit Evropian, në shkurt të vitit 2023 kanë arritur marrëveshjen bazë në Bruksel, ndërkaq pas një muaji, më 18 mars janë pajtuar për aneksin e zbatimit të saj në Ohër të Maqedonisë së Veriut.

Kur po bëhen dy vjet nga aneksi i Ohrit, Serbia, rishtas shkeli këtë ujdi me rastin e heqjes nga rendi i ditës për të qenë mysafire speciale në Komitetin për Çështje Politike dhe Demokraci të Asamblesë Parlamentare të KiE-së. Një gjë e tillë u dënua edhe nga Bashkimi Evropian.

Megjithatë, në Bashkimin Evropian e as Qeverinë e Kosovës nuk kthyen përgjigje për KosovaPress se pse nuk është zbatuar marrëveshja dhe si do të ecet tutje për këtë ujdi.

Ish ambasadori i Kosovës në Gjermani, Skender Xhakaliu, thotë për KosovaPress se marrëveshja e Brukselit nuk ka gjetur zbatim deri tani, mirëpo ajo është e obligueshme për palët.
Ai shton se në bazë të emrave të rinj në Bruksel pret iniciativa konkrete nga ndërmjetësuesit në dialog.

Bashkimi Evropian këtë vit ka emëruar Peter Sorensen si përfaqësues të ri special për dialogun Kosovë-Serbi, i cili pason Miroslav Lajçakun.

Sorensen do të punojë nën ombrellën e përfaqësueses së lartë të Bashkimit Evropian për Politikë të Jashtme dhe të Sigurisë, Kaja Kallas.

Pavarësisht moszbatimit të deritanishëm të marrëveshjes së Brukselit, sipas politologut, Artan Muhaxhiri, kërkesat ndaj palëve nga Bashkimi Evropian do të jenë të njëjta.

Ai thotë se unioni evropian pas formimit të qeverisë se re në Kosovë do të insistojë për zbatim të marrëveshjes.
Sipas tij, çdo avancim i Kosovës në arenën ndërkombëtare do të kushtëzohet nga respektimi i marrëveshjeve dhe suksesi në dialog.

Kosova gjatë kësaj jave nuk mundi të jetë mysafire speciale në Komitetin për Çështje Politike dhe Demokraci të Asamblesë Parlamentare të KiE-së, pasi kërkesa e saj u hoq nga rendi i ditës.

Kosova dështoi të anëtarësohet në Këshill të Evropës vitin e kaluar, pasi nuk përmbushi kërkesën e aleatëve për dërgimin e draft-statutit të Asociacionit të komunave me shumicë serbe, të hartuar nga Bashkimi Evropian në Gjykatë Kushtetuese.

Kosova vazhdimisht ka akuzuar Serbinë se po shkel marrëveshjen e Brukselit dhe aneksin e Ohrit, duke penguar Kosovën në anëtarësimin në organizata ndërkombëtare.

Madje, sipas institucioneve kosovare, Serbia praktikisht është tërhequr nga kjo ujdi në dhjetor të vitit 2023, kur i ka dërguar letër Brukselit zyrtar se ka vija të kuqe kur është fjala për zbatimin e Marrëveshjes për rrugën drejt normalizimit të raporteve me Kosovën.