Nënkolonel Meriman Suka, ka pranuar kredencialet si Atashe Ushtarak me të drejta të plota i Republikës së Kosovës në Turqi.
Kështu ka njoftuar ministria e Mbrojtjes duke thënë se kjo ngjarje shënon një moment të rëndësishëm në forcimin e lidhjeve dypalëshe në fushën e mbrojtjes.
“Shteti i Kosovës do të vazhdojë bashkëpunimin e ngushtë me Turqinë, ndërsa eksploron projekte të reja ushtarake për të ardhmen”, thuhet në njoftim.
Presidenti i Federatës Shqiptare të Futbollit Armand Duka ka folur për herë të parë në lidhje me kalimin e Etnik Brrutit nga Kosova tek Shqipëria që ngjalli reagime të shumta në Kosovë.
I pari i FSHF-së ka thënë se dera e kombëtares është e hapur për të gjuthë.
“Kalimi i lojtarëve nga Kosova te Shqipëria (rasti i Brrutit) – Pashë një status të babait të lojtarit dhe mendoj që ishte i duhuri. Akuza për mua apo FSHF-në ka në të dyja drejtimet, pse e keni marrë këtë lojtar apo pse nuk e keni marrë. Edhe kur i merr, edhe kur nuk i merr, gjysma e njerëzve janë pro dhe gjysma kundër. Nëse je i bindur që ke bërë më të mirën, duhet të vazhdosh ta bësh. A e kam marrë unë Brrutin? Unë jam një nga ata që vendos për politikat e FSHF-së dhe një nga politikat tona është që dera e Kombëtares është e hapur për këdo. Ne marrim vetëm futbollistët shqiptarë, kushdo që ndihet shqiptar luan për ne”, ka thënë Duka në një intervistë për RTSH-në, përcjellë KosovaPress.
Marrëdhënia me FFK?
“Kam marrëdhënie të mira me të gjitha federatat e Evropës, kurse me Federatën e Kosovës kam marrëdhënie vëllazërore”, ka thënë Duka.
Dialogu i ndërmjetësuar nga Bashkimit Evropian mbetet e vetmja rrugë drejt stabilitetit të qëndrueshëm, tha ambasadori i BE-së në Kosovë, Aivo Orav, përcjellë KP.
Ai njoftoi se e ka takuar të martën sekretarin e përgjithshëm të NATO-s, Mark Rutte.
“Përballë sfidave gjeopolitike, qëndrimi në rrugën drejt BE-së është vendimtar”, shkroi Orav në X.
Gjatë vizitës së tij në Prishtinë më 11 mars, Mark Rutte tha se do të vazhdojnë të mbështesin procesin e normalizimit të marrëdhënieve mes Kosovës dhe Serbisë, raporton KosovaPress.
“Për ta shtyrë përpara këtë dialog, të dyja palët duhet të bëjnë kompromise. Kjo kërkon vendime të vështira, normalizomi sjell stabilitet më të madh dhe siguri me afatgjatë për gjithë rajonin. Ky është mesazhi që unë do të vazhdojë te theksojë para të gjitha palëve në rajon”, tha Rutte të martën në konferencë për media me presidenten e Kosovës, Vjosa Osmani.
Ai shtoi se zgjidhja për një paqe afatgjatë është politike.
“Prania sot këtu është një demonstrim i qartë i përkushtimit për siguri afatgjatë në Kosovë. NATO ka mbështetur paqen dhe stabilitetin në Ballkanin Perëndimor. Ekipet e ndërlidhjes së KFOR-it vazhdojnë të mbështesin institucionet e tjera të sigurisë. Një rajon më i sigurt nënkupton më shumë siguri për zonën e NATO-s. NATO do të vazhdojë të luaj rolin e vet, këtë e bëjmë në bashkërendim me Policinë dhe Eulexin”, tha ai, transmeton KosovaPress.
Antidroga e Policisë së Kosovës ka realizuar operacionin ‘Befasia’, ku janë sekuestruar lëndë narkotike dhe është arrestuar i dyshuari për trafikim të substancave narkotike.
“Më datë 11 mars 2025, Policia e Kosovës, konkretisht hetuesit e Drejtorisë për Hetimin e Trafikimit të Narkotikëve-Mitrovicë Jug, në bashkëpunim me Njësinë e Reagimit të Shpejtë-Mitrovicë Jug, kanë realizuar një kontroll të planifikuar në një shtëpi dhe objektet përcjellëse në lagjen Koloni në qytetin e Mitrovicës. Ky kontroll u realizua si pjesë e planit taktik të quajtur ‘Befasia’, në kuadër të luftës kundër krimeve të organizuara dhe trafikimit të substancave narkotike”, thuhet në njoftim, raporton KosovaPress.
Gjatë kontrollit të realizuar në këtë operacion policor, janë sekuestruar: 24 qese me substancë të dyshuar narkotike e llojit kokainë, me peshë totale 7.5 gram, 6 qese me substancë narkotike të llojit marihuanë, me peshë totale 68.7 gram, 4 tableta Ekstazi, me peshë totale 2.2 gram, qese të zbrazëta, që shërbejnë për paketimin e substancave narkotike në sasi të vogla dhe 1 telefon mobil që dyshohet të jetë përdorur për aktivitetet e paligjshme.
“Në vendin e ngjarjes ka dalë një ekip i Krimteknikës Rajonale, i cili ka kryer fotografimin, evidentimin, matjen dhe sekuestrimin e të gjitha provave materiale. Hetuesit e DHTN-së, pas realizimit të veprimeve operative, kanë arrestuar të dyshuarin, i cili është intervistuar në prani të avokatit mbrojtës. Në bazë të urdhrit të arrestit të lëshuar nga Gjykata Themelore e Mitrovicës, i dyshuari ka një dënim të formës së prerë prej 2 vitesh burgim për veprën penale ‘Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge’, nga neni 267 i Kodit Penal të Republikës së Kosovës”, thuhet në njoftim.
Lidhur me këtë rast, është informuar Prokurori Kujdestar pranë Prokurorisë Themelore të Mitrovicës – Departamenti i Krimeve të Rënda, i cili sipas policisë ka urdhëruar që i dyshuari pas intervistimit të dërgohet në vuajtje të dënimit.
“Rasti është duke u hetuar nga Drejtoria për Hetimin e Trafikimit të Narkotikëve – Mitrovicë Jug. Pas intervistimit, i dyshuari është dorëzuar në Stacionin Policor Mitrovica Jug, ku është dërguar për të vuajtur dënimin në Qendrën e Paraburgimit në Prishtinë”, thuhet në njoftim.
Ky aksion sipas policisë është një tjetër hap në luftën e vazhdueshme kundër krimeve të organizuara dhe trafikut të narkotikëve, dhe dëshmon angazhimin e institucioneve të rendit dhe sigurisë për mbrojtjen e qytetarëve dhe parandalimin e aktiviteteve kriminale.
Policia e Kosovës ka njoftuar se në fshatin Prapashticë të komunës së Prishtinës është vërejtur transport i kundërligjshëm i drunjve.
Patrulla policore ka ndaluar të dyshuarin mashkull kosovar, i cili drejtonte kamionetën me targa vendore, në të cilën kishte ngarkesë drunore për të cilat nuk posedonte letërpërcjellëse.
Sipas policisë, në vendin e ngjarjes kanë dalë zyrtarët e Agjencisë së Pyjeve dhe ata ia kanë konfiskuar drutë.
“Drutë janë deponuar në SPMK Keqekollë, ndërsa rasti procedohet në procedurë të rregullt,” thuhet në njoftim.
Policia e Kosovës ka njoftuar për një vjedhje të rëndë në Prishtinë që është kryer të martën më 11 mars në një shtëpi.
Sipas policisë persona të panjohur dyshohet se me forcë kishin depërtuar në brendinë e shtëpisë së viktimës m/k dhe nga aty kishin vjedhur: një TV në vlerë 500 euro, një pushkë ajrore dhe dy kamerat e sigurisë në vlerë prej 200 euro, raporton KP.
“Rasti vazhdon të hetohet”, thuhet në njoftim.
Shtatë argjentinas dolën në gjyq të martën të akuzuar për vrasje për rolin e tyre të dyshuar në atë që prokurorët e quajtën “teatri horror” i vdekjes së legjendës së futbollit Diego Maradona katër vjet më parë.
Maradona vdiq më 25 nëntor 2020, në moshën 60-vjeçare, teksa po shërohej në shtëpi nga operacioni në tru, pas dekadash duke luftuar me varësinë nga kokaina dhe alkooli.
Në gjyq janë një neurokirurg, një psikiatër, një psikolog, një koordinator mjekësor, një koordinator infermierie, një mjek dhe një infermiere e natës të akuzuar për neglizhencë kriminale në kujdesin që i kanë ofruar futbollistit në ditët e tij të fundit, transmeton KosovaPress.
Në një deklaratë hapëse, prokuroria tha se synonte të paraqiste prova “të forta” se asnjë anëtar i ekipit mjekësor “nuk bëri atë që duhej të bënte” në “teatrin e tmerrit” që ishte shtrati i vdekjes së Maradonës.
“Shiko, kështu vdiq Maradona!” Prokurori Patricio Ferrari bërtiti në sallën e gjyqit, duke mbajtur lart një foto pas vdekjes të Maradonës, i shtrirë në shpinë në shtrat, me trupin e tij groteskisht të fryrë.
Fotoja rrëqethëse përloti tre vajzat e Maradonës, Jana, Dalma dhe Gianinna, të cilat morën pjesë në seancën gjyqësore, përcjellë KosovaPress.
“Ata [të akuzuarit] po ju gënjejnë kur thonë se nuk kanë marrë pjesë në vrasje,” akuzoi Ferrari. Fernando Burlando, avokat për Dalma dhe Gianinna, e përshkroi ekipin mjekësor të Maradonës si “djallëzor”.
Të pandehurit përballen me burgim nga tetë deri në 25 vjet nëse dënohen për akuzat e “vrasjes me dashje të mundshme” – ndjekja e një kursi veprimi pavarësisht se e dinë se mund të shkaktojë vdekjen.
Jashtë gjykatës, dhjetëra tifozë mbanin pankarta duke bërë thirrje për “drejtësi”.
Maradona u gjet i vdekur dy javë pas operacionit, në një shtëpi me qira në një lagje ekskluzive të Buenos Aires ku u soll pasi doli nga spitali.
Qeveria e Kosovës sot do ta mbaj mbledhjen e radhës ku në rend dite janë paralajmëruar 18 pika.
Në njërën nga pikat e rendit të ditës pritet të shqyrtohet nisma për lidhjen e Marrëveshjes Kornizë për bashkëpunim në Fushën e Mbrojtjes, ndërmjet Republikës së Kosovës dhe Shteteve të Bashkuara të Amerikës, të përfaqësuar nga Departamenti i Mbrojtjes, raporton KosovaPress.
Në mbledhje pritet të shqyrtohet edhe nisma për lidhjen e Marrëveshjes së Përgjithshme të Sigurisë ndërmjet Republikës së Kosovës dhe Republikës së Sllovenisë, për Shkëmbim dhe Mbrojtje të Ndërsjellë të Informacionit të Klasifikuar.
Ministrat e Mbrojtjes nga pesë shtetet kryesore të NATO-s në Evropë do të diskutojnë mbështetjen e mëtejshme për Ukrainën në një takim sot pasdite në Paris.
Takimi i tyre pason njoftimin e përbashkët të Shteteve të Bashkuara të Amerikës dhe Ukrainës për një rifillim të menjëhershëm të ndihmës ushtarake dhe të shërbimeve sekrete amerikane dhe një marrëveshje ukrainase për një armëpushim 30-ditor – nëse Rusia pranon. Ky ishte rezultati i takimit të nivelit të lartë midis dy vendeve në Xhedah të Arabisë Saudite, shkruan ATSH.
Takimi i Parisit përfshin përfaqësues nga Franca, Gjermania, Italia, Polonia dhe Britania e Madhe, përcjell KosovaPress.
Ministri ukrainas i Mbrojtjes, Rustem Umerov, i cili ishte në takimin e Xhedahut, do të marrë pjesë përmes një lidhjeje me video.
Gjithashtu, do të marrin pjesë përfaqësues nga BE-ja dhe NATO-ja.
“Bisedimet do të fokusohen në forcimin e mbrojtjes evropiane”, sipas Ministrisë franceze të Mbrojtjes.
Dje në mbrëmje, shefat e ushtrive të 36 vendeve u takuan në Paris për të diskutuar për dislokimin e trupave paqeruajtëse në Ukrainë.
Trajneri i Paris St Germain, Luis Enrique tha se skuadra e tij dhe Liverpool meritonin një vend në çerekfinale të Ligës së Kampionëve. Spanjolli u ndie krenar për mënyrën sesi skuadra e tij u rikthyer nga një gol në disavantazh pas ndeshjes së parë të javës së kaluar për eliminuar Liverpoolin pas fitores 4-1 në penallti në “Anfield Road”, transmeton KosovaPress.
“Të dyja skuadrat e merituan të shkonin në fazën tjetër, ata luajnë më mirë se ne këtu, por mendoj se skuadra ime në “Anfield”, në një stadium të veçantë, tregoi personalitet dhe karakter të madh ”, tha ai.
“Ne u përpoqëm të luanim më të mirën tonë, por ishte e vështirë pasi ato janë kaq intensiv. Të dyja skuadrat meritonin të kualifikoheshin”, shtoi Enrique pas ndeshjes, përcjellë KosovaPress.
Liderët e Ligue 1 PSG nuk e kanë fituar kurrë Ligën e Kampionëve, duke humbur nga Bayern Munich në finalen e vitit 2020, ndërsa fituesi i 2019-ës Liverpool u konsiderua si favorit për të avancuar pasi kryesoi tabelën në fazën e ligës me tetë ndeshje.
“Kur shorti na tregoi për ndeshjen kundër Liverpool-it dhe PSG-së, të dy trajnerët menduan të njëjtën gjë – një nga ndeshjet më të mira që mund të shikoni në Evropë ”, tha Luis Enrique. “Mendoj se të dyja skuadrat ishin të shkëlqyera .