Author: ATVLive

Situata e krijuar sot në Veri ka nxitur plot reagime në rrjetet sociale. Nga Prishtina, jo pak gazetarë janë deklaruar përmes statuseve të tyre për situatën e atjeshme. Dikush e sheh si vendosje të sovranitetit, e dikush si “fillim i vendosjes së autonomisë për Veriun”.

Sikur për çdo gjë tjetër, edhe situata e sotshme në Veri të Kosovës është çështje interpretimesh në Prishtinë.

Lajmi është se kryetarët e zgjedhur të komunave të veriut kanë provuar të futen në objektet e tyre, ndërkohë që serbët lokalë i kanë penguar ata. Dhe, në përleshje me policinë, janë djegur disa vetura – mes tyre edhe një veturë e policisë, si dhe janë vendosur disa pengesa në Zveçan, kurse të tjerat duket se po përgatiten të vendosen.

Dhe, analistët janë të ndarë në leximin e kësaj situate.

Rron Gjinovci e sheh si vendosje sovraniteti.

“Nuk mujnë bandat me diktu jetën institucionale të Republikës”, shkruan ai.

Gjinovci tutje i përgjigjet edhe Vucicit, i cili urdhëroi Ushtrinë që t’i afrohet kufirit me Kosovën.

“Vuçiçi e paska urdhnu ushtrinë serbe me kanë në gjendje gatishmërie. Poget ju ka bo marak me i provu dronat e Kosovës”.

Ndryshe e sheh Mentor Shala, ish-Drejtor i RTK’së.

“Ky është çmimi i zgjedhjeve të fundit në veri! Autonomia e veriut është rezultati final”, thotë ai.

“Kjo është shfaqja teatrale e Kurtit, Vuçiqit e Lajçakut! Mos u çuditni nëse këto ditë serbët në këtë pjesë e shpallin Republikë, e kompromisi është Autonomia e pjesës veriore!”, vazhdoi ai.

Ngjashëm e komentoi edhe Artan Behrami, gazetar.

“Ndezja e veriut (pavarësisht arsyes, fajtorit) në çdo rrethanë përfundon fatkeqësisht në protektorat ndërkombëtar të kësaj pjese të Kosovës”, shkroi Behrami në Facebook.

Bregdeti i Dhërmiut do të presë nga 31 maji deri më 6 qershor “Kala Festival”, ku qindra të rinj të huaj dhe shqiptarë do të shijojnë aventurën verore mes riteve të muzikës dhe mrekullive të peizazhit që ofron riviera shqiptare.

Ministrja e Turizmit dhe Mjedisit, Mirela Kumbaro ndau sot në rrjetet sociale një video promovuese të këtij festivali, i cili është kthyer në traditë vitet e fundit.

“Në Dhërmi po bëhet gati të fillojë një tjetër festë ndërkombëtare si Kala Festival, që sjell mbi 3000 vizitorë nga Britania dhe shumë të tjerë nga gjithë Evropa për të festuar në bregdetin tonë prej 31 majit deri më 6 qershor”, tha Kumbaro.

“Kala Festival”, përveç atmosferës për adhuruesit e muzikës elektronike, është edhe një promovim i mirë për turizmin e Shqipërisë.

Përgjatë ditëve në festival marrin pjesë edhe DJ të famshëm ndërkombëtarë. Një tjetër qëllim i organizimit të këtij festivali në Shqipëri është edhe promovimi i turizmit dhe kulturës shqiptare në botë, ku gjatë ditëve të tij do të zhvillohen ekskursione ditore për të eksploruar mrekullitë natyrore të Rivierës shqiptare.

Ministrja e Drejtësisë, Albulena Haxhiu, ka thënë se janë të përkushtuar për realizimin e reformave në drejtësi. Sipas saj, vetëm në këtë formë fuqizohet sistemi i drejtësisë dhe kthehet besimi i qytetarëve në këto institucione.

Megjithatë, ajo shtoi se kjo është sfiduese, por është rruga e vetme që Kosova të bëhet shtet i së drejtës.

“Si ministri e Drejtësisë ne jemi të përkushtuar për reformat në drejtësi, pasi vetëm kështu mund të fuqizojmë sistemin tonë të drejtësisë dhe vetëm kështu mund të kthejmë besimin e qytetarëve në institucionet e drejtësisë. Është punë sfiduese, këtë e ndjerë gjatë këtyre dy viteve, por është rruga e vetme që kemi përpara që Kosova të jetë shtet i së drejtës”, theksoi ajo, transmeton KP.

Këto komente Haxhiu i bëri të premten, gjatë shpërndarjes së certifikatave për kandidatët që kanë kaluar Provimin e Jurisprudencës.

Ajo pati edhe një porosi për të gjithë kandidatët, që detyrën e tyre në të ardhmen të ushtrojnë me përkushtim dhe profesionalizëm.

“Certifikimi i sotëm hap mundësi të reja në veçanti, në atë të ushtrimit të pozitave publike, pesha e së cilit do të përkthehet në kontributin tuaj të çmueshëm në përmirësimin dhe avancimin e infrastrukturës dhe legjislacionit të sistemit tonë të drejtësisë. Çfarëdo përzgjedhje që do të bëni, shpresoj që të njëjtin do të ushtroni me përkushtim dhe profesionalizimin e tuaj maksimal”, shtoi Haxhiu.

Ndërkaq, shtoi se kandidatët që kanë kaluar provimin e jurisprudencës do të jenë vlerë e shtuar e shoqërisë në Kosovë.

Kryetari i Aleancës për Ardhmërinë e Kosovës (AAK) Ramush Haradinaj, ka akuzuar Qeverinë e Kosovë, duke thënë se jo vetëm që nuk bëri projekte të reja por bllokoi edhe ato ekzistuese.

Haradinaj ka shkruar në Facebook se sot kanë mbetur keq e për faqe të zezë, jo vetëm rruga për Mitrovicë, për Gjilan, për Pejë, për Gjakovë, por edhe projektet tjera infrastrukturore, duke i zbritur investimet kapitale në kuota qesharake.

“Kur ishte vendosur të merrte udhë projekti i autostradës së Dukagjinit si një investim strategjik, meqenëse do ta lidhte pothuaj një të tretën e territorit të Kosovës me pjesën tjetër, pati filluar një fushatë e egër e Vetëvendosjes kundër meje, me arsyetimin se nuk duhej të shpenzoheshin paratë në asfalt. Autostrada e Dukagjinit nuk u ndërtua sepse Qeveria që udhëhiqja unë ishte ndërprerë në mes, kurse qeveria e Vetëvendosjes, jo vetëm që nuk hapi projekte të reja infrastrukturore, por i bllokoi edhe ato ekzistuese. Sot kanë mbetur keq e për faqe të zezë, jo vetëm rruga për Mitrovicë, për Gjilan, për Pejë, për Gjakovë, por edhe projektet tjera infrastrukturore, duke i zbritur investimet kapitale në kuota qesharake. Sikur kjo të bëhej me qëllim të rritjes së mirëqenies së popullit, në këto dy vjet të një krize globale ekonomike, edhe do ta kishte një derë, por për fat të keq nuk ka ndodhur as kjo. Sot, Kosova e ka mesataren e pagave më të ulët në rajon, pensionet më të ulta, paga minimale më e ulta në kontinent, ndërkohë që tatimi në pronë është rritur dy e trefish, energjia është rritur të paktën dy herë e të mos flasim për rritjen e çmimeve të artikujve elementarë, apo të inflacionit i cili ka qenë më i larti në këto 20 vjet. Sikur të mos u mjaftonte kjo, qeveritarët e rinj u janë turrur edhe mjeteve vetanake të komunave dhe dojnë me i marrë edhe ato! Ose kanë fytyrë e deklarojnë se do të ketë harrnime e zgjerime dhe prapë lidhen të Autostrada e Dukagjinit dhe thojnë se ajo nuk do të ndërtohet. E unë e kam një porosi për ta. Po, autostrada e Dukagjinit do të ndërtohet, sapo ju të ikni nga pushteti. Shpresoj shumë shpejt”, ka shkruar ai.

Gjykata Themelore në Ferizaj, ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të pandehurit Sh.B., për shkak të dyshimit të bazuar se në bashkëkryerje kanë kryer veprën penale grabitje.

Sipas GJykatës, pas mbajtjes së seancës dëgjimore dhe analizimit të shkresave të lëndës, gjyqtari i procedurës paraprake i Departamentit për Krime të Rënda, ka vlerësuar se ekziston dyshimi i bazuar mirë, se i pandehuri më 20 shtator 2022 në një rrugë në Ferizaj, në bashku me të pandehurin K.B. dhe A.Z., me qëllim të përvetësimit të pasurisë së luajtshme të personit tjetër, e që vetës t`i sjellë përfitime pasurore të kundërligjshëm, kanë kryer grabitje në dëme të dëmtuarit A.S.

“Derisa ishin duke lëvizur me veturën e tyre, në momentin që e takojnë të dëmtuarin e detyrojnë të hyjë në veturë, duke sulmuar fizikisht gjatë rrugës, pastaj vazhdojnë tek vendi i panjohure në pyll, ku me të arritur aty e kishin zbritur dhe e kishin sulmuar fizikisht duke i shkaktuar lëndime trupore, duke përdorë forcë arrijnë që t`ia marrin portofolin, në të cilën kishte shumën e të hollave rreth 327 euro dhe të njëjtit janë larguar në drejtim të panjohure. Gjyqtari i procedurës paraprake, kërkesën e prokurorit të shtetit për caktimin e masës së paraburgimit kundër të pandehurit e ka aprovuar si të bazuar konform dispozitave të KPPRK-së, dhe të njëjtit i është caktuar masa e paraburgimit në kohëzgjatje prej një muaj”, thuhet në njoftim.

Me këtë rast palët njoftohen se ankesa kundër këtij aktvendimi nuk e shtynë ekzekutimin e tij.