Para objekteve komunale të komunave të veriut janë mbledhur qytetarë serbë për të penguar nisjen e punës së kryetarëve të rinj të zgjedhur. Në Zveçan, është tensionuar situata.
Ministri i Administrimit të Pushtetit Lokal, Elbert Krasniqi, ka reaguar para pak minutash, duke thënë se është obligim i institucioneve qëndrore që t’ua mundësojnë kryetarëve të rinj të katër komunave veriore, që të kryejnë detyrat e tyre.
“Dje u betuan edhe kryetarët e komunës së Zveçanit, Zubin Potokut dhe Leposaviqit. Për ta sot është dita e parë e punës. Punë dhe shërbim të cilin duhet ta kryejnë nga zyret e Komunave bashkë me shërbyesit civilë”, ka shkruar Krasniqi.
Turmat para objekteve komunale kanë nisur të bëhen, pasi në Zveçan, Leposaviq, Mitrovicë të Veriut dhe Zubin Potok, u dëgjuan sirena. Derisa në Zveçan janë dëgjuar krisma dhe është hedhur gaz lotsjellës, në komunat e tjera nuk është raportuar për tensionim të situatës.
Reagimi i plotë i ministrit:
Pas mbajtjes së zgjedhjeve të datës 23 prill, janë mbajtur seancat konstituive në Mitrovicën Veriore, Zveçan, Zubin Potok dhe Leposaviq.
Dje u betuan edhe kryetarët e komunës së Zveçanit, Zubin Potokut dhe Leposaviqit. Për ta sot është dita e parë e punës. Punë dhe shërbim të cilin duhet ta kryejnë nga zyret e Komunave bashkë me shërbyesit civilë.
Ata janë zotuar që do t’i shërbejnë të gjithë qytetarëve pa dallim. Si ministri dhe institucione qendrore japim mbështetjen tonë të plotë në përmbushjen e obligimeve kushtetuese dhe ligjore të kryetarëve të rinj. E si institucione qendrore e kemi obligim që t’ua sigurojmë dhe mundësojmë përmbushjen e këtyre obligimeve.
Komuna është e qytetarëve. Qytetarët nuk mund të mbeten pa komunë.
Shoqëria civile në vend shprehet e shqetësuar me prolongimin e emërimit të guvernatorit të ri në Bankën Qendrore të Kosovës (BQK).
Konsorciumi i organizatave të shoqërisë civile i përberë nga Grupi për Studime Juridike dhe Politike (GLPS), Instituti GAP dhe Instituti për Politika Zhvillimore (INDEP), në kuadër të projektit: “Mbështetje për Shoqërinë Civile për të Rritur Mbikëqyrjen Publike dhe Llogaridhënien e Institucioneve Publike të Kosovës”, nëpër mjete një njoftimi kanë shprehur shqetësimin e thellë lidhur me prolongimin e emërimit të Guvernatorit/es të Bankës Qendrore të Republikës së Kosovës(BQK) në pajtim me ligjin.
Sipas këtij njoftimi, konkursi të kthehet në pikën zero, pa dhënë asnjë arsyetim ligjor për këtë.
Shoqëria civilie konsideron se përderisa kishte një proces të ligjshëm dhe transparent i cili ka prodhuar një listë me emrat e kandidatëve të cilët i janë dorëzuar Kuvendit të Republikës së Kosovës, i njëjti të vendos sa më parë në pajtim me rregullat ligjore dhe të marrë vendim në lidhje me pozitën e Guvernatorit të BQK-së.
“Thënë këtë, konsiderojmë që përderisa kishte një proces të ligjshëm dhe transparent i cili ka prodhuar një listë me emrat e kandidatëve të cilët i janë dorëzuar Kuvendit të Republikës së Kosovës, i njëjti të vendos sa më parë në pajtim me rregullat ligjore dhe të marrë vendim në lidhje me pozitën e Guvernatorit të BQK-së”, thuhet në njoftim.
Që nga nëntori i vitit 2022, BQK, kishte publikuar shpalljen për plotësimin e pozitës së Guvernatorit. Pas mbajtjes së intervistave në janar të vitit 2023 nga komisioni përzgjedhës të njëjtit kishin njoftuar më pas se katër (4) kandidatë kishin hyrë në listën e ngushtë.
“Lista me emrat e kandidatëve e rekomanduar ishte prezantuar në Komisionin për Buxhet, Punë dhe Transfere në mbledhjen e datës 07.04.2023. Anëtarët e Komisionit me shumicë votash i kanë rekomanduar Kuvendit të Republikës së Kosovës se konkursi për guvernator të BQK-së, nuk i ka përmbushur kriteret ligjore respektivisht nenet 38 dhe 40 të Ligjit për Bankës Qendrore të Republikës së Kosovës. Rrjedhimisht kanë kërkuar që konkursi të kthehet në pikën zero. Ndonëse të njejtit nuk kanë dhënë asnjë arsyetim ligjor për këtë”, thuhet në njoftim.
Po ashtu, neni 38, paragrafi 6 i Ligjit për Bankës Qendrore të Republikës së Kosovës, thekson se “Procedurat e emërimit të referuara në paragrafët 1 deri 5 të këtij neni përfundojnë brenda dyzetepesë (45) ditëve kalendarike para përfundimit të mandatit të anëtarit përkatës të Bordit të Bankës Qendrore apo Bordit Ekzekutiv”.
Ky konkurs ka qenë i hapur që nga nëntori i vitit 2022 dhe mandati i guvernatorit ka përfunduar afërsisht që dy muaj. Vlen të theksohet se detyrat dhe kompetencat e guvernatorit janë të rëndësisë së lartë pasi që i njëjti është përgjegjës për drejtimin dhe kontrollin e administrimit dhe operacioneve të Bankës Qendrore.
Mes tensioneve, kryetari i ri i Zveçanit ka arritur të hyjë në objektin e komunës.
Peci në një prononcim për Telegrafin ka treguar se aktualisht është brenda objektit të kësaj komune. Ai tha se është dita e parë e punës së tij dhe është duke e ushtruar funksionin e tij si kryetar në këtë komunë.
Policia ka arritur ta sigurojë derpërtimin e kryetarit Ilir Peci brenda objektit.
Sot para objektit komunave veriore, janë mbledhur qytetarë serbë për të penguar hyrjen e kryetarëve të rinj. Situata është tensionuar në Zveçan, ku turma ishte më e madhe dhe pati konfrontim me Policinë.
Policia ka hedhur gaz lotsjellës për ta shpërndarë turmën, ndërkaq janë dëgjuar edhe krisma, që mediat raportojnë se ishin të shok-bombave.
Janë publikuar edhe pamjet e një veture të djegur të Policisë së Kosovës.
Shef i Stafit në Kabinetin e Presidentes të Republikës së Kosovës, Blerim Vela, ka thënë se strukturat ilegale dhe kriminale të Serbisë në veri të Kosovës kanë marrë urdhër për përshkallëzimin e situatës.
Vela thotë se Serbia mban përgjegjësi të plotë për gjendjen që është krijuar në veri të vendit.
“Strukturat ilegale dhe kriminale të Serbisë në veri të Kosovës kanë marrë urdhër për përshkallëzimin e situatës në terren”, shkroi Vela në Twitter.
“Protestues “paqësor” që përdorin veprime hibride dhe të dhunshme kundër forcave të rendi”.
“Dhuna nuk do të mbizotërojë. Serbia mban përgjegjësi të plotë për përshkallëzimin”.
Prishtina International Theatre Festival po vazhdon suksesshëm edicionin e saj të shtatë me radhë, që ka filluar që nga data 22 maj.
Për të gjithë dashamirësit e artit dhe kulturës, mrëmë u dha shfaqja “Club Albania” me regjinë e Fatos Berishës.
Në konferencën e mbajtur me drejtoreshën e festivalit, Doruntina Alshiqi, u mirëprit regjisori i shfaqjes nga Kosova, Fatos Berisha.
“Sot do të vazhdojmë me një shfaqje tjetër, me shfaqjen e Fatos Berishës “Club Albania”, që vjen nga Teatri Kombëtar i Kosovës e që do të jetë në sallën në teatrin “Faruk Begolli”, edhe po i mirëpresim të gjithë ata që dëshirojnë me ardhme pa një komedi të zezë mund të themi ashtu edhe me shiu përgjatë kësaj nate”, tha Alshiqi.
Aty u dhanë detajet e shfaqjes ku regjisori e përshkruan si një komedi të zezë, e cila hedh dritë mbi aktualitetin e një shoqërie, e cila prej vitesh është në ndihen e reflektimit.
“Realisht, bazuar në komedinë e njohur të Andon Zakon Çajupit të pas vdekjes, por që e kemi mbindërtu, pra duke marrë për bazë atë tekst, dramaturgu Shpetim Selmani e ka bërë një lloj dramatizimi te këtij teksti dhe realisht, nga një komedi, siç ishte e Çajupit, doli një komedi e zezë. E kemi ngjyrosë pak me të tonë e zeza, por duke qenë si motiv shfaqja e Çajupit, flet për realitetin tonë, pak për neve, përmes një grupi të aktorëve, të cilët mundohen me bo shfaqjen e Çajupit edhe përmes personazheve të aktorëve, ata përveç që janë aktorë janë edhe njerëz, qytetarë, edhe kanë hallet e tyre, edhe përmes fatit të tyre e shohim si me thanë një shoqëri të tërë. Kur shihet shfaqja, është e kapshme, e lehtë. Ka situata komike, pastaj bëhet ma e errët, por si proces nuk ka qenë i lehtë, sepse ka qenë një punë me shumë drafte të shkruara të tekstit edhe mënyra ka qenë pak si të themi, si një lloj punëtorie, ku gjithkush prej ekipit ka pasë mundësi e të drejtë me kontribu për shfaqjen, me dhanë ndihmën e vet”, tha regjisori Fatos Berisha.
Teatri Faruk Begalli në Kolegjin AAB mblodhi pasionantët e teatrit që nga ora njëzetë.
Për dy orë të plota, gjashtë aktorët e shfaqjes kosovare, sollën shumë të qeshura për publikun.
“Për mua ishte hera e parë që luajta në këtë skenë, u ndiva mirë edhe dhe dhanë të drejtën tash vonë e kam marrë vesh që emri i festivalit është në emrin e Burbuqe Berishës. Me Burbuqen kemi ba shumë shfaqje edhe sonte mu duk që ia dedikuam diqysh asaj edhe bash ke ndjenjë e mirë. Në fakt kjo premierën e ka pasë tash e disa muaj shfaqja, nëse nuk gaboj, në nëntor veç bëhet një vit që e kemi luajt për shfaqjen në Teatrin Kombëtar. Po them për shkak të respektit ndoshta të emrit të festivalit që ia ka lanë Burbuqes edhe që e kemi pasë kolege edhe në teatër atje, e vendosëm kështu edhe me kënaqësi e luajtëm në këtë skenë edhe ke një publik shumë i mirë. Gjithë është ndjenjë e mirë me luajtë një shfaqje të caktume me një skenë të re ku s’e ke luajtë asnjëherë edhe po më vjen mirë që kjo pjesë e Prishtinës e ka edhe një skenë teatrore, është shumë mirë”, tha aktori Armend Smajli.
“Publiku ke shumë i mirë, shfaqja është pritë mirë. Ne, në fakt e kemi që prej nëntorit shfaqen repertor dhe na bjen nga katër-pesë herë në muajt me e me shfaqë, kështu gjë ato emocionet e fillimit veç i kemi kry, por natyrisht që secila herë është ndjenja e përgjegjësisë, publiku është tjetër, tash jemi edhe në festival ,që është njëfarë përgjegjësie e dyfishtë, po ke publik shumë i mirë dhe kaluam jashtëzakonisht mirë”, tha aktorja Teuta Krasniqi.
Ajo tha se nuk është e lehtë me e mbajt shfaqen dy orë dhe publiku mos me ndje monotoni.
“Me thënë të drejtën vetë pak probleme me zë kam pasur, kështu që kur je në skenë, gjithmonë thojmë që edhe kur jemi të sëmurë, e ke e ka skena njëfarë magjie që të shënosh. Kështu që unë për ato dy orë u ndjeva shëndosh, veç ia nisa me vazhdu me i ndi pak pasojat, mirëpo e mira e shfaqjes është që me të vërtetë e ka një një kontinuitet, që të paktën ashtu thonë publiku, pavarësisht sa është e gjatë nuk kalon në monotoni dhe kjo besoj që është e rrallë, sepse dy orë është me të vërtet me qenë në komoditetin e shtëpisë, tu hangër e t’u pi, e t’u ia lëshu zanin sa dushe, është pak e gjatë e lëre më, me qenë në teatër, por kjo është magjia e skenës”, tha aktorja Teuta Krasniqi.
Edhe aktori Armond Morina, tha se si për shfaqjen ashtu edhe për aktorët, është shumë e rëndësishme pjesëmarrja në një festival ndërkombëtar.
“Shumë kënaqësi me marrë pjesë në festivale edhe për ne aktorë janë shumë të rëndësishme festivalet ndërkombëtare, se mos me e pa vetëm vetveten, domethënë ishin edhe trupa të tjera, jo turqit, që ishin nga Shqipëria, tash vjen Maqedonia e Veriut edhe për atë e përgëzoj festivalin, sepse me i bë shtatë edicione, festivali i teatrit është shumë i kushtueshëm, se duhet me ardhë skenografia, trupat, është shumë më vështirë se çdo festival tjetër. Është shumë i rëndësishëm, ne sidomos që kemi qenë si shoqëri e mbyllur, më në fund po hapemi. Është e vetmja dritare ku mundemi me pa edhe kultura tjera. Ne e dimë që teatrot tona janë në kushte shumë jo të volitshme, Teatri Kombëtar ende ka me shku renovim. Jemi duke improvizu me një me një skenë të vogël. Këtu skena ishte e dinjitetshme dhe ke shumë kënaqësi me luajtë. I patë reagimet e publikut, ata e kënaqen me autokritikën se një shoqëri nëse don me qenë i shëndoshë duhet, kur e kritikojmë shtëpinë tonë më së pari, jemi shumë më të shëndetshëm me kritiku edhe fenomenet tjera”, tha aktori Armond Morina.
Sipas publikut, përmes komedisë u tregua realiteti shqiptar dhe nevoja për ndryshime në shoqërinë tonë.
“Më erdh mirë që e pash shfaqjen në këtë festival edhe ajo që më ka fascionu edhe ajo që kam pritë realisht, është loja e mrekullueshme e aktorëve. Ka pasë kohë që Armendin s’e kemi pa në skenë, ka qenë brilant së bashku me krejt kolegët tjerë. Mendoj një punë e jashtëzakonshme e Fatas Berishës edhe një shfaqje me të vërtet e gjatë, por e cila për në asnjë moment nuk u bë monotone edhe me shumë mesazhe për ata që duan ta kuptojnë”, tha Linda Shala, e cila kishte ardhur ta shikojë shfaqjen.
Pas shfaqjes, të pranishmit patën mundësinë të shijojnë muzikën e përgatitur nga Dj Nird, ndërkaq të premten, në ditën e pestë të këtij edicioni, do të jepet shfaqja garuese “Lungs” nga Maqedonia e Veriut që nga ora 20:00. /atvlive.tv
Strukturat ilegale kanë aktivizuar alarmin rreth orës 12:00 në komunën e Mitrovicës së Veriut dhe në të njëjtën kohë mësohet se alarmi është aktivizuar edhe në tri komuna t tjera veriore.
Qytetarë me numër të vogël janë tubuar rreth objekteve komunale në Zubim Potok dhe Zveçan, ndërsa nuk dihet arsyeja e tubimet e tyre.
KosovaPress ka provuar ta kontaktojë zëvendësdrejtori i policisë në veri të Mitrovicës, Veton Elshanin por ai ka qen i paqasshëm.
Shqipëria dhe Shtetet e Bashkuara të Amerikës mblodhën bashkë vendet anëtare të Këshillit të Sigurimit dhe ekspertë të njohur ndërkombëtarë për të diskutuar mbi sigurinë kibernetike.
Duke folur mbi sfidat që ka sjellë siguria kibernetike, ministrja për Evropën dhe Punët e Jashtme e Shqipërisë, Olta Xhaçka, e cila bashkëdrejtoi takimin me Përfaqësuesen e Përhershme e SHBA në OKB, Linda Thomas-Greenfield, theksoi se interneti dhe teknologjia nuk janë dhe nuk duhet të përdoren si armë, por se ato duhet të mbeten mjete dhe forca për të mirën e përbashkët.
“Na takon ne të përcaktojmë rrugën që duhet të marrë teknologjia. Duke identifikuar dhe dënuar sjelljen në kundërshtim me normat ligjore të shtetit dhe duke inkurajuar veprime pozitive për të përmirësuar sigurinë dhe stabilitetin e hapësirës kibernetike, Këshilli i Sigurimit mund të zvogëlojë rrezikun e konfliktit që rrjedh nga veprimet keqdashëse. Shqipëria rithekson pozicionin e saj në favor të një hapësire kibernetike globale, të hapur, të lirë, të qëndrueshme dhe të sigurt, ku respektohen ligjet ndërkombëtare, të drejtat e njeriut dhe liritë themelore, në dobi të zhvillimit social, politik dhe ekonomik”, tha kryediplomatja shqiptare.
Përfaqësuesja e Përhershme e SHBA në OKB, Linda Thomas-Greenfield u shpreh se siguria ndërkombëtare kibernetike mbetet një prioritet global, teksa nënvizoi se Këshilli i Sigurimit duhet të marrë një rol udhëheqës në ngritjen e ndërgjegjësimit, dënimin dhe mbajtjen përgjegjës të aktorëve për aktivitete keqdashëse kibernetike.
“Është koha që vullnetin e mirë ta kthejmë në veprime konkrete. Ne mezi presim të punojmë me të gjitha shtetet anëtare për të realizuar qëllimin tonë të përbashkët për një hapësirë kibernetike të hapur, të sigurt dhe të qëndrueshme, nga e cila përfitojmë të gjithë ne”, deklaroi ajo.
Nënsekretarja e Përgjithshme dhe Përfaqësuesja e Lartë e Zyrës së OKB për Çarmatimin (UNODA), Izumi Nakamitsu, deklaroi se, parimi i llogaridhënies është thelbësor për të trajtuar shqetësimet mbi besimin dhe mosbesimin në hapësirën kibernetike.
“Detyra kryesore për shtetet anëtare është të marrin në konsideratë se si të zbatojnë normat e sjelljes së përgjegjshme të shtetit në mënyrë që ato të bëhen funksionale”, shtoi ajo.
Takimi ‘Arria Formula’ me temë “Përgjegjësia dhe reagimi i shteteve ndaj sulmeve kibernetike” u bashkëorganizua nga Shqipëria dhe Shtetet e Bashkuara, shkruan Atsh. Takimi kishte në thelb trajtimin e sigurisë kibernetike, si një çështje kyçe në përgjegjësinë e Këshillit të Sigurimit për ruajtjen e paqes dhe sigurisë ndërkombëtare.
