Author: ATVLive

Në shënimin e 74-vjetorit të themelimit të Arkivit të Kosovës, ka nisur edhe aktiviteti “Java e Arkivit të Hapur”, ku është lansuar sistemi elektronik i menaxhimit të materialit arkivor.

Kryeministri i Kosovës, Albin Kurti u shpreh se arkivat janë gardian të trashëgimisë dokumentare, prandaj tha se si qeverisjes i kanë dhënë vëmendjen që meriton.

Kurti teksa listoi gjashtë aspektet që përmirësuan funksionimin e arkivit, ofroi rritje të mbështetjes institucionale për Arkivin e Kosovës.

“Arkivat janë gardian të trashëgimisë dokumentare, kjo lloj trashëgimie është një testament themelor i kulturës dhe i kujtesës sonë historike që duhet tu transmetohet brezave të ardhshëm në gjendjen më të mirë të mundshme….13’19E para ligji, e dyta strategjia, e treta kushtet e punës, e katërta digjitalizimi masiv, e pesta qasje dhe menaxhimi elektronik i materialeve arkivor dhe e gjashta struktura e re me shumë profesionistë… Në këtë edicion të radhës javës së arkivit të hapur në emër të qeverisë sonë gjejmë rastin të theksojmë faktin se sikurse rrjetin e kulturës, trashëgimisë kulturore, bibliotekave, teatrove, kinemave…edhe arkivave ua kemi kthyer edhe vëmendjen dhe dinjitetin që e meritojnë sepse u kemi kthyer investimet e gjithanshme jo vetëm infrastrukturore….Mbështetja e qeverisë sonë jo vetëm që do të vazhdoj por edhe do të rritet”, tha ai.

Ushtruesi i detyrës së drejtorit të Arkivit të Kosovës, Bislim Bislimi u shpreh se kanë digjitalizuar miliona dokumente.

Sipas tij, vetëm në vitin 2024 Arkivi i Kosovës ka digjitalizuar 2.5 milionë dokumente, derisa u shpreh se deri në fund të këtij vitit presin t’i bashkohen trendit të rajonit.

Si sfidë të radhës, Bislimi tha se mbetet krijimi i kushteve për pranimin e më shumë se 25 kilometrave apo mbi 250 milionë dokumenteve arkivore që ndodhet jashtë Agjencisë.

“Arkivi i Kosovës, në 15 vite, në mungesë të kushteve por me përkushtim të jashtëzakonshëm të stafit të brendshëm, kishte digjitalizuar afër 1,090.000 dokumente arkivore. Vetëm në vitin 2024, pasi filluam realizimin e projektit të digjitalizimit masiv ne kemi digjitalizuar 2.5 milionë dokumente, ndërsa pa përfunduar ende 3 mujori i parë i vitit 2025, këtij 3.6 milionëshit të digjitalizuar tashmë, i është shtuar edhe 1 milion tjetër duke na afruar kështu me numrin prej 5 milionë dokumentesh në regjistrin tonë digjital apo e shprehur në përqindje të materialit arkivor që e kemi në regjistra të inventarit hyrës, mbi 7% e sasisë së përgjithshme. Për të sqaruar trendin, Kosova ka qenë e fundit në rajon sa i përket digjitalizimit të materialit arkivor ku në këto vende, kjo përqindje varion ndërmjet 10 dhe 17%. Me investimet që po bëhen dhe me dinamikën aktuale të digjitalizimit tek ne, në fund të vitit 2025 ne veçse përafrohemi trendit të rajonit”, tha ai.

Ushtruesi i detyrës së drejtorit të Arkivit të Kosovës, Bislim Bislimi tha se vitin e kaluar nga komunat veriore kanë rikthyer material arkivor nën kontroll të Arkivit të Kosovës.

“Kur jemi tek komunat veriore, vitin e kaluar, falë bashkëpunimit me Policinë e Kosovës, rikthyem nën kontrollin ligjor të Agjencisë materialin arkivor që mbahej nga strukturat e paligjshme në veri që financoheshin e organizoheshin nga Serbia. Me sasinë e dakorduar, me Agjencinë Kosovare të Privatizimit, për dorëzim në Arkiv të materialit të ish ndërmarrjeve shoqërore në Kosovë, tashmë mund të themi se Agjencia e Arkivave vetëm në vitin e fundit ka rritur sasinë e përgjithshme të materialit, afër 35%”, tha ai./KP

Politikanë e bashkëpunëtorë kanë vizituar të hënën familjen e ish-presidentit Hashim Thaçi në Burojë, pas vdekjes së babait të tij, Haxhi Thaçi. Ata kanë shprehur ngushëllime dhe e kanë kujtuar atë si njëri me vlera të larta.

Kryetari i Partisë Demokratike e Kosovës, Memli Krasniqi tha se Haxhi Thaçi ka udhëhequr jo vetëm familjen e tij por ka kontribuar edhe në edukimin e brezave.

Ai nënvizoi se dhimbja ishte edhe më e madhe për shkak të mungesës së Hashim Thaçit, i cili ndodhet në Hagë duke u përballur me një proces të tejzgjatur gjyqësor.

“Do ta kujtojmë gjithmonë për vlerat e jashtëzakonshme që i ka pasur. Ka qenë një njeri që vërtetë i them më shumë se një prind i njeriut që ka udhëhequr edhe procesin e çlirimit dhe pavarësimit të vendit, por një karakter epik, ashtu siç e kemi mësuar edhe në të kaluarën, dhe në traditën tonë, ata shqiptarët e mirë, të vërtetë që kanë ditur të edukojnë jo vetëm familjet e tyre, por gjithë brezat. Ka qenë një njeri që gjithmonë ka qenë i buzëqeshur, dashamirës, një njeri që na ka përkrahur gjithmonë. Fjalët dhe këshillat e tij dhe kujtimet me të do t’i mbajmë gjithmonë si shumë të veçanta. Na vjen keq se kjo është një vdekje që bëhet edhe më e rendë për shkakun e mungesës së presidentit Thaçi. Së paku ai pati mundësinë që para ka ditësh ta takojë për herën e fundit babain e tij, por vërtetë kjo dhembje shkon e rritet për familjen, e neve të gjithëve për shkakun e mungesës së presidentit Thaçi. Kujtimi për bacën Haxhi do të jetë i përhershëm”, tha Krasniqi.

Kryetari i Aleancës për Ardhmërinë e Kosovës, Ramush Haradinaj, gjatë vizitës së tij në Burojë për ta ngushëlluar familjen e presidentit Hashim Thaçi, tha se është padrejtësi që ai nuk është afër familjes.

“Para një kohe kam qenë këtu në familje. Në atë kohë kam ardhur se nëna ishte e sëmurë dhe në gjendje jo të mirë. Kuptohet, ishte edhe takimi i fundit, biseda e fundit që kam pasur me babën Haxhi. Dhimbja po rritet, ne jemi shqiptarë, na vjen keq kur familjet tona kalojnë këto dhimbje, kuptohet edhe kur bëhen këto padrejtësi, si rasti i presidentit që nuk është këtu me familjen. Besoj shumë që nga ajo vuajtje, dhimbje e sakrificë do të nxjerren mësimet më të mira të shqiptarëve me ia kushtu atdheut, lirisë në vazhdimësi”, tha Haradinaj.

Ish nënkryetari i OVL-UÇK-së, Nasim Haradinaj gjatë vizitës së tij për ngushëllime është shprehur se dhimbjen e familjes po e shton fakti që Hahsim Thaçi ndodhet në Hagë.

“Vet fakti që ka një djalë, i dha një djalë Kosovës, i cili kaloi në të gjitha proceset dhe të gjitha i përfundoi me nderë, është një vepër, që edhe nga ana fetare thuhet se jeton dhe të cilit i bënë lavdi e përjetshme. Këtë dhimbje e shton sot, vet pozita e Hashim Thacit ku gjendet sot dhe djemve të tjerë që janë atje”, është shprehur Haradinaj.

E kushëriri i familjes Thaçi, Milazim Thaçi rrëfeu kujtimet me të ndjerin.

“Tash së fundmi, unë kam qenë shumë me të, po qysh nuk jemi rritë, jemi plakur [bashkë]. Ai ka qenë njeri i urtë, punëtor, ka punuar shumë, i ka rritur fëmijët me skamje të rënda. Kohën e luftës shumë ka qenë i fortë edhe na jepke gajret shumë ‘hiç mos u mërzitni se Kosova ka me u çliru’. Ligsht, u mërzitke shumë, thoshte “ Hashimi, Hashimi, sikur të vinte, ma po dua ta pres”. Po ja nuk e priti”, tha ai.

Varrimi i Haxhi Thacit do të bëhet nesër në ora 15:00 ne varrezat e fshatit Burojë.

Lajmi për vdekjen e Haxhi Thaçit u bë i ditur të dielën vonë. Ai ishte i shtruar në Qendrën Klinike Universitare pasi ishte në gjendje të rëndë shëndetësore, raporton KosovaPress.

Ende nuk dihet nëse Gjykata Speciale do t’i jap leje Hashim Thaçit për të ardhur nga Haga në Kosovë.

“Korniza ligjore e Dhomave të Specializuara të Kosovës u mundëson personave të paraburgosur që t’u bëjnë kërkesa gjyqtarëve kompetentë për arsye detyruese humanitare. Gjyqtarët do të vendosin për kërkesa të tilla”, tha për KosovaPress, Michael Doyle, pa treguar nëse do t’i mundësohet Thaçit të marrë pjesë në varrimin e babait të tij.

Haxhi Thaçi ishte i shtruar në Qendrën Klinike Universitare pasi ishte në gjendje të rëndë shëndetësore, raporton KosovaPress.

Të enjten ai u vizitua nga Hashim Thaçi, të cilit leje për vizitë i tha Gjykata Speciale, e cila po gjykon për krime të pretenduara të luftës, transmeton KosovaPress.

Specialja u kritikua në Kosovë për mos realizim të kërkesave të Thaçit për të vizituar babain e vet të sëmurë, duke theksuar se vendime të tilla të gjykatës ishin të pabazuara dhe jo humane, shkruan KosovaPress.

Pas vizitës rreth tre orësh nën masa të rrepta të sigurisë, Thaçi u rikthye sërish në Hagë – qytetin holandez ku e ka selinë kjo gjykatë.

Hashim Thaçi po përballet me një proces të tejzgjatur gjyqësor pranë Dhomave të Specializuara të Kosovës – të njohura si Gjykata Speciale.

Ai po qëndron në paraburgim prej nëntorit të vitit 2020 nën akuzat për krime të pretenduara të luftës, shkruan KosovaPress.

Gjykimi ndaj tij ka nisur në prill të vitit 2023.

Bashkë me Thaçin, po gjykohen edhe Kadri Veseli, Jakup Krasniqi e Rexhep Selimi. Ish-krerët e UÇK-së janë deklaruar të pafajshëm për të gjitha pikat e aktakuzës.

Ministri i Punëve të Jashtme Timço Mucunski deklaroi se Qeveria do të mbulojë shpenzimet e udhëtimit dhe qëndrimit jashtë vendit për anëtarët e familjeve të pacientëve që po trajtohen jashtë vendit, shkruan Alsat.

Ai njoftoi se është aktivizuar gjithashtu mekanizmi për mbrojtjen civile të BE-së i cili është një sistem për koordinimin e ndihmës midis të gjitha vendeve anëtare të BE-së dhe vendeve të tjera nga të cilat pritet ndihmë në ditët në vijim.

Ministri i Jashtëm tha se pas një komunikimi me 12 homologë të tij, ka marrë mbështetje edhe nga krerët rajonalë botërorë, përcjell KosovaPress.

“Më lejoni të përmend se në çdo shtet ku janë dërguar pacientët për shërim, Ministria e Jashtme ka caktuar person për kontakt i cili është i qasshëm 24 orë për prindërit dhe familjarët e pacientëve për çfarëdo ndihme ose mbështetje. Lista e kontakteve është e publikuar në ueb faqen e Ministrisë. Në mënyrë plotësuese, në Seancë të Qeverisë do të kërkojë nga shërbimet për punë të përgjithshme të përbashkëta të mbulohen shpenzimet për rrugë dhe qëndrim jashtë vendit, për anëtarët e familjeve të pacientëve që po kurohen jashtë”, tha Timço Mucunski, ministër i Jashtëm.

”Na ktheni Statujën e Lirisë”, është kërkesa e çuditshme e bërë nga socialisti francez Raphaël Glucksmann, sipas të cilit Parisi duhet të marrë mbrapsht monumentin sepse Shtetet e Bashkuara nuk përfaqësojnë më vlerat që e shtynë Francën të bëjë këtë dhuratë.

“Amerikanëve që kanë zgjedhur të qëndrojnë në anën e tiranëve, të cilët pushojnë studiuesit sepse kërkojnë liri shkencore, ne u themi: na ktheni statujën”, theksoi eurodeputeti dhe themeluesi i ”Place Publique”, në një konventë.

“Ne ua dhamë, por ju duket se e përbuzni. Kështu që do të jetë mirë këtu në shtëpi”, shtoi ai.

Statuja e Lirisë u zbulua në portin e qytetit të Nju Jorkut më 28 tetor 1886, në 100-vjetorin e Deklaratës Amerikane të Pavarësisë si një dhuratë nga populli i Francës për Amerikën.

Është projektuar nga francezi Auguste Bartholdi.

Parisi ka një kopje shumë më të vogël të statujës në një ishull të vogël në Paris.

Glucksmann, një mbrojtës i vendosur i Ukrainës, ka kritikuar ashpër ndryshimin rrënjësor të presidentit Donald Trump në politikën e SHBA-së për luftën.

Ai gjithashtu synoi shkurtimet e Trump në institucionet kërkimore të SHBA-së, të cilat tashmë kanë nxitur qeverinë franceze të nisë një iniciativë për të tërhequr disa prej tyre për të punuar në Francë.

“Gjëja e dytë që do t’u themi amerikanëve është se nëse doni të pushoni studiuesit tuaj më të mirë, nëse doni të pushoni të gjithë njerëzit që, përmes lirisë së tyre dhe ndjenjës së tyre të inovacionit, shijes së tyre për dyshim dhe kërkime, e kanë bërë vendin tuaj fuqinë kryesore botërore, atëherë ne do t’i mirëpresim ata”, shtoi ai.

Bashkimi Evropian i hapur ndaj modelit të Shqipërisë, të adaptuar nga Italia, për çështjen e emigrantëve, sipas iltempo.it.

”Ne po hapim mundësinë që shtetet anëtare të krijojnë nyje riatdhesimi në vendet e treta. Ishte një element i rëndësishëm i diskutimit tonë mbi zgjidhjet inovative për të trajtuar me vendosmëri migrimin e paligjshëm, duke vepruar në bashkëpunim me vendet partnere dhe duke siguruar që të drejtat themelore të individëve të interesuar të garantohen në përputhje me të drejtën ndërkombëtare”, shkruan presidentja e Komisionit Evropian Ursula von der Leyen në letrën e saj dërguar liderëve të BE-së.

Një samit i BE-së, që do të zhvillohet më 20 mars, do të trajtojë gjithashtu këtë çështje, megjithëse nuk është planifikuar një diskutim i thelluar për këtë çështje, shkruan ATSH.

”Për të kompletuar qasjen e re të përbashkët për kthimet, Komisioni po përgatit gjithashtu një propozim për dixhitalizimin e menaxhimit të rasteve të kthimit për fund të vitit. Qasja e re do të kontribuojë gjithashtu në rishikimin e ardhshëm të Frontex-it, ku do të jetë e rëndësishme të sigurohet që operacionet e kthimit mund të organizohen drejtpërdrejt nga Frontex me vendet e treta, ndërkohë që përmirëson rolin e Agjencisë në parandalimin e migrimit të parregullt”, shtoi ajo.

”Një element kyç i Paktit na lejon të thjeshtojmë procedurat e azilit është përdorimi i koncepteve të vendit të sigurt. Komisioni aktualisht po përgatit një listë të BE-së të vendeve të sigurta të origjinës. Për këtë qëllim, ne po mbështetemi në një analizë nga Agjencia e BE-së për Azilin dhe burime të tjera të disponueshme informacioni për të vlerësuar një përzgjedhje të parë të vendeve të zgjedhura bazuar në kritere objektive, siç janë normat e ulëta të njohjes së azilit”, shtoi ajo.

”Synimi ynë është të paraqesim një propozim për një listë të parë të BE-së të vendeve të origjinës të sigurta në javët e ardhshme. Pasi të miratohet nga Parlamenti Evropian dhe Këshilli, kjo listë do të jetë dinamike dhe mund të zgjerohet ose rishikohet më tej me kalimin e kohës”, përfundon letra.

“Fillim i mirë”, tha përfaqësuesi i Bashkimit Evropian për dialogun Kosovë-Serbi, Peter Sorensen, pasi zhvilloi takime me krerët e shtetit.

Ai, në vizitën e tij të parë në Kosovë, tha se objektivi kryesor është që të ecë përpara ky proces, mirëpo paraprakisht tha se do të zhvillojë biseda me palët dhe të bëjë një vlerësim se ku ndodhet dialogu.

Sorensen, pas takimit të hënën me kryeministrin Albin Kurti dhe kryenegociatorin kosovar për dialogun, Besnik Bislimi, tha para gazetarëve se bisedat ishin të mira dhe se është interes i tij të kuptojë qëndrimet e secilit.

“Ishte një takim hyrës dhe po bisedonim se si mund të vazhdojë dhe të ecë përpara ky proces. Si i tillë, është një fillim i mirë. Po, objektivi është, sigurisht, që procesi të vazhdojë dhe të ecë përpara. Tani për tani, objektivi im është të flas me njerëzit dhe të kuptoj se ku qëndrojnë ata në lidhje me këtë çështje. Kam bashkëbisedues këtu në Prishtinë, por gjithashtu duhet të shkoj edhe në Beograd. Dhe pasi t’i kem zhvilluar këto biseda, mund të ulem dhe të vlerësoj se ku ndodhemi. Por është shumë e qartë që procesi i dialogut ka sjellë disa zhvillime të rëndësishme dhe ne duhet të ndërtojmë mbi to”, tha ai.

I pyetur se a nevojitet kompromis në dialog, ai tha se këtë e përcaktojnë palët.

“Dialogu ka të bëjë me sigurimin që palët të takohen. Nëse kjo do të thotë kompromis apo jo, këtë e përcaktojnë palët. Por dialogu, ky është qëllimi i tij. Dhe kjo është ajo që kemi bërë që nga viti 2011”, shtoi Sorensen.

I pyetur se a do të ketë një fillim të ri në dialog, ai tha se ai do të punojë sipas mënyrës së tij.

“Jo, ajo që tha është se ajo është e re, unë jam i ri. Dhe për këtë arsye, si ndërmjetësues, po punoj në mënyrën time, kështu që kjo është situata”, deklaroi ai.

Krahas kësaj, ai tha se vizita e tij në Kosovë nuk përkon me asnjë simbolikë, mirëpo është përcaktuar nga kalendari i tij dhe institucioneve në Kosovë.

Ndërkaq, i pyetur për mbylljen e komunave paralele serbe në Kosovë, Sorensen tha se duhet siguruar që “njerëzit në Kosovë të marrin shërbimet në mënyrën më të mirë të mundshme”.

“Koha e mbërritjes këtu është përcaktuar nga kalendari. Është kur njerëzit janë të disponueshëm, ata me të cilët kam nevojë të takohem, janë këtu. Unë sapo kam filluar, erdha sa më shpejt që munda. Kjo është përgjigja për pyetjen tuaj të parë. Sa i përket pyetjes së dytë mbi institucionet, ne duhet të punojmë dhe të sigurohemi që njerëzit të marrin shërbimet në mënyrën më të mirë të mundshme. Dhe kjo është ajo që do të përpiqemi të bëjmë”, tha Sorensen.

Sorensen gjatë ditës është takuar edhe me presidenten Vjosa Osmani.

Diplomati danez do të qëndrojë deri më 19 mars në Kosovë, ku nesër pritet të takojë liderët e partive politike dhe shoqërinë civile.

Më pas ai do të shkojë për vizitë në Serbi.

Sorensen ka marrë detyrën në shkurt të vitit 2025, duke pasuar ish emisarin e BE-së për dialog, Mirosalv Lajçak./KosovaPress.

Oda Ekonomike e Kosovës ka kërkuar që të shtyhet kërkesa e Zyrës së Rregullatorit për Energji (ZRrE) që konsumatorët me mbi 50 punëtorë ose që kanë një qarkullim mbi 10 milionë euro të dalin në një treg të hapur energjetik.

Në një diskutim të OEK me rreth 100 biznese dhe me zyrtarë të ZRrE-së, bizneset kanë kërkuar që vendimi i lartpërmendur të shtyhet për të paktën një vit, në mënyrë që “të marrin kohën e nevojshme për të filluar përgatitjet, në të kundërtën do të dëmtohen”.

Kryetari i OEK-ut, Lulzim Rafuna ka thënë se sipas të dhënave nga Administrata Tatimore, sipas këtij vendimi, në tregun e hapur duhet të dalin 1 mijë e 294 biznese, derisa 61 biznese kanë të punësuar më shumë se 50 punëtorë.

“Ishte një numër shumë i madh i bizneseve, afër 100 biznese më të mëdha dhe dominuan ato prodhuese. Është një shqetësim i bizneseve për vendimin e ZRrE-së, i cili kërkon që bizneset me mbi 50 punëtorë, ose mbi 10 milionë euro që kanë qarkullim, prej 1 qershorit të dalin në tregun e hapur. Patën mundësi edhe zyrtarët e ZRrE-së t’i dëgjojnë shqetësimet e biznesit, në këtë rast më të theksuara ishin, edhe shqetësimet më të mëdha, tek sektori i prodhimit, për arsye se dihet se dalja në treg parashihet që të ketë edhe rritje të çmimit të energjisë elektrike, ku do të ketë efekt zingjiror tek prodhuesi, do ta rritë koston e prodhimit, ose produktit, e cila me pas, kosto do t’i bartet konsumatorit dhe produkti jonë brenda tregut të Kosovës nuk do të jetë konkurrent me produktin e importuar siç ka qenë deri më tani, por do të jetë më i shtrenjtë sesa produkti i importuar. Mos të flasim se edhe në tregun e huaj do të humb mundësinë që të jetë prezent, për arsye se janë kontratat e lidhura shumë më herët me çmime të caktuara, dhe në moment që ngritet çmimi ekziston frika dhe paralajmërimi që nuk do të blihet më në tregun e huaj produkti i Kosovës”, theksoi Rafuna.

Ai ka thënë se në takimin me zyrtarë të ZRrE është theksuar që kërkesa të shtyhet për të paktën një vit.

“Për këtë arsye, pas diskutimeve të shumta që patëm me zyrtarë të ZRrE-së ishte kërkesë e të gjithëve që të parashihet mundësia të shtyhet së paku një vit ky vendim, për të filluar të implementohet, që bizneset e mëdha të dalin në tregun e hapur, dhe e dyta ishte t’i drejtohemi institucioneve të vendit, se në rast se nuk gjendet mirëkuptim që të shtyhet ky vendim, që sidomos sektori prodhimit të subvencionohet. Sipas të dhënave nga Administrata Tatimore, sipas këtij vendimi në tregun e hapur duhet të dalin 1 mijë e 294 biznese, pra janë 61 biznese që kanë të punësuar më shumë se 50, ndërsa janë 318 biznese të cilat kanë qarkullim më shumë se 10 milionë. Kurse, sipas sektorëve këtu hyn tregtia me shumicë dhe pakicë, janë 439 kompani, prodhimi vjen me 197 kompani, ndërtimtaria është me 35 kompani, informacioni dhe komunikimi me 67 kompani dhe vinë të tjerat. Kërkesa e të gjithëve ishte që të shtyhet së paku për 1 vit implementimi i këtij vendimi për shkak se biznesi është përballur me sfida të shumta dhe kjo sfidë është shtesë që vë në pikëpyetje, sidomos sektorin e prodhimit”, ka nënvizuar Rafuna.

Sipas tij, vështirësi tjetër, në rast se nuk shtyhet kërkesa e ZRrE-së, është edhe sjellja e investitorëve të huaj.

“Në qoftë se është më i shtrenjtë dhe na del më shtrenjtë se rajonit, do të kemi vështirë t’i sjellim investitorët e huaj. Nuk jemi kundër vendimit, as të mos dalim në tregun e hapur, por është një periudhe e shkurtë, nuk është momenti, nuk ka as dialog publiko-privat, një kohë më të gjatë në mënyrë që biznesi të përgatitet. Dhe kërkesa tjetër qe vjen për partitë politike është që sa më shpejtë t’i kemi të themeluara institucionet e vendit, në mënyrë të kemi mundësi të adresojmë. Ka mirëkuptim sa i përket sidomos sektorit prodhues, mirëpo kushti prej 50 punëtorë është ligjor, mirëpo ZRrE është përkrahëse e bizneset që të gjejë me qeverinë dhe komisionin për ekonomi që të gjendet mundësi në rastin e arsyeshëm të shtyhet vendimi për një periudhë të caktuar, që t’i jepet mundësinë të përgatitet biznesi”, përfundoi Rafuna.

Kërkesa e Zyrës së Rregullatorit për Energji (ZRRE) që konsumatorët me mbi 50 punëtorë ose që kanë një qarkullim mbi 10 milionë euro të dalin në një treg të hapur energjetik, ka shkaktuar shqetësime të shumta në radhët e bizneseve të Kosovës.

Kompanitë paralajmërojnë për rritje të kostove dhe çrregullime ekonomike, nëse ndodhë shpejt ky liberalizim i tregut energjetik, raporton KosovaPress.

Duke filluar nga 1 qershori, bizneset e mëdha në Kosovë kërkohet t’i zgjedhin vetë furnizuesit e tyre me energji elektrike.

Derisa ZRRE ka pranuar se kjo kërkesë mund të sjellë shqetësime tek bizneset dhe ka theksuar nevojën për një proces të kujdesshëm dhe mbështetje gjatë këtij kalimi. /KP

Gjykata Kushtetuese e Maqedonisë së Veriut vendosi të hënën të shtyjë seancën përgatitore për Ligjin për përdorimin e gjuhëve, e cila ishte caktuar të mbahet për datën për 20 mars.

“Gjykata merr parasysh periudhën e shpallur zi shtatë-ditore për viktimat e tragjedisë në Koçan dhe traumën që po kalon shoqëria, qytetarët dhe shteti”, tha të hënën Gjykata Kushtetuese në një njoftim.

Të paktën 59 persona kanë vdekur në orët e hershme të mëngjesit të djeshëm në Koçan, si pasojë e shpërthimit të zjarrit gjatë një koncerti me mbi 500 pjesëmarrës në një klub nate.

Sipas gjykatës, do të përcaktohet më vonë se kur do të mbahet seanca përgatitore.

Ligji për përdorimin e gjuhëve në Maqedoni të Veriut i detyron institucionet shtetërore të lejojnë përdorimin zyrtar të gjuhëve që fliten nga të paktën 20 për qind e qytetarëve. Këtu bëhet fjalë edhe për gjuhën shqipe.

Në Maqedoni të Veriut, rreth 30 për qind e popullsisë janë shqiptarë.

Debati për këtë temë është rritur pas ardhjes në pushtet të VMRO-DPMNE, parti maqedonase e cila e kishte kundërshtuar këtë ligj.

Kjo parti tani bashkëqeverisë me koalicionin shqiptar VLEN.

Ligji për gjuhët ka mbetur në Kushtetuese tash e pesë vjet, pas disa iniciativave që u parashtruan nga parti politike, shoqata dhe qytetarë.

Kryetari i Komunës së Koçanit, Ljupço Papazov ka dorëzuar dorëheqje të parevokueshme nga detyra pas aksidentit tragjik në Koçan ku humbën jetën 59 persona.

“Kjo humbje është e madhe. Nuk ka fjalë që mund të përshkruajnë dhimbjen që ndjejmë të gjithë. Ata fëmijë ishin fëmijët tanë. Unë i njihja shumicën prej tyre, i njihja familjet e tyre dhe disa prej tyre ishin miq të familjes”, ka thënë ai, raporton Alsat M.

“Tronditja dhe thyerja e zemrës që ndjej do të zgjasë gjithë jetën time. Kjo tragjedi e ka lënë në errësirë Koçanin dhe Maqedoninë, dhe boshllëku që ka mbetur është i padurueshëm”, ka shkruar Papazov në Facebook.

Ai ka kërkuar nga institucionet kompetente që të hetojnë përgjegjësinë e të gjithë të përfshirëve, duke shtuar se është plotësisht në dispozicion të institucioneve.