Author: ATVLive

Përgatiti: Sara Shehu

“Më të forta se frika” është motoja e organizimit të radhës, në kuadër të aktiviteteve sensibilizuese për parandalimin dhe luftimin e kancerit të gjirit.

Drejtoresha e organizatës “Have Hope Kosova” tha se mbetet ende shqetësues fakti që gratë interesohen për mamografi vetëm gjatë muajit tetor.

“Realisht gratë interesohen më shumë për mamografi gjatë muajit rozë, por ne fushata vetëdijesuese kemi bërë e vazhdojmë të bëjmë në të gjithë muajt, për rritjen e vetëdijesimit që gratë t’i kushtojnë vëmendje më shumë kontrolleve të mjekut, sesa një grimi në përditshmëri, andaj interesimi duhet të rritet edhe muajve të tjerë”, tha Arnisa Osmani nga OJQ “Have Hope Kosova”.

Ndërsa, duke bërë thirrje për kujdes, anëtarja e bordit të kësaj organizate, Saranda Bujupi-Ramaj, tha se këtë vit aktiviteti është organizuar për gratë që vdiqën nga kanceri në gji.

“Ne mendojmë për përkrahjen e grave me kancer, por këtë vit po i kujtojmë më shumë edhe ato gra që vdiqën nga kjo sëmundje. Mbështesim gratë të cilat po luftojnë, u bëjmë thirrje pa masë që të mos anashkalohen kontrollet”, tha Saranda Bujupi-Ramaj, anëtare e OJQ “Have Hope Kosova”.

Derisa në Klinikën e Onkologjisë në QKU, për shtatë muaj janë regjistruar mbi 270 raste me kancer të gjirit, nga 1 tetori, institucionet e vendit dhe organizata të ndryshme joqeveritare, kanë realizuar aktivitete të ndryshme vetëdijesuese për këtë sëmundje.

Përgatiti: Kastriot Tahiri

Po e përgatit kafenë e parë.

Por, këtë punë Qëndresa do ta bëjë edhe ditëve në vazhdim, në kafenenë e cila u hap në qendrën e Down Syndrome Kosova në Mitrovicë.

“Unë jam shankiste këtu, do të përgatis kafe. Jam shumë e lumtur”, tha Qëndresa Sylejmani, anëtare në DSK në Mitrovicë.

Bashkë me Qëndresën do të punojë edhe shoku i saj me down syndrom, Gentrit Ahmeti.

“Unë do të punoj si kamerier. Kam me shërbye pije, ushqim…”, tha Gentrit Ahmeti, anëtar në DSK në Mitrovicë.

Hapja e lokalit dhe punësimi i personave me Down Syndrom po vlerësohet pozitive për këtë kategori të shoqërisë.

“Kjo do t’iu shërbejë atyre për t’u pavarësuar….”, tha kryetarja e DSK-së, Sebahate Hajdini.

Qendra down syndrom Kosova në Mitrovicë, numëron rreth 100 anëtarë.

Radio Televizioni ATV ka realizuar një dokumentar ekskluziv të titulluar “Dritëhijet e 24 shtatorit”, përmes të cilit ka vënë në dritë detaje të padëgjuara deri më tani për sulmin terrorist në Banjskë të Zveçanit, përmes rrëfimit të policit Fahri Shala, i cili mori komandën në natën kritike pas rënies së rreshterit Afrim Bunjaku.

Shala, në rrëfimin e tij për këtë dokumentar, tregon se sa herë që bënin plane për ndonjë aksion, heroi Afrim Bunjaku i motivonte kolegët me një thënie të cilën e përdorte shpesh.

“Kur është bërë plani për me pasë aksione, Afrimi e ka pasë gjithmonë një thënie: “Neve mundet me na vra gjithkush, po me na frikësu nuk mundet askush”. Me këtë motiv edhe kemi vazhdu”, rrëfen Shala. /atvlive.tv

Për më shumë detaje se çfarë ndodhi në orët e hershme të 24 shtatorit, ndiqni dokumentarin e plotë në videon e mëposhtme:

Sot bëhet një muaj nga sulmi terrorist serb ndaj Policisë së Kosovës në Banjskë të Zveçanit. Radio Televizioni ATV ka realizuar një dokumentar ekskluziv të titulluar “Dritëhijet e 24 shtatorit” kushtuar kësaj ngjarje, përmes të cilit ka vënë në dritë detaje të padëgjuara deri më tani, përmes rrëfimit të policit Fahri Shala, i cili mori komandën në natën kritike pas rënies së rreshterit Afrim Bunjaku.

Ai tregon se pas shpërthimit, kishin një përleshje të armatosur me terroristët, ku këta të fundit kishin përdorur artileri të rëndë.

“Jam dalë mbrapa kamionit, dhe kom shti në drejtim të tyre, për me parandalu gjuajtjen e tyre. Ata kanë përdorë artileri të rëndë, që është përdorë kundër autoblindave. Ka pasë pushkomitrolez dhe armatim të rëndë. Prej kamionit të parë, menjëherë kam dalë në kamionin e dytë, sepse pati shumë të shtëna në drejtim timin. Edhe Kur dola mbrapa, e kam vërejt rreshterin. Nuk kam dashtë me ba asnjë veprim tjetër, veç me e tërheqë rreshterin. Nuk e kishim lënë kurrë. Kanë mujt me na vra edhe neve, po nuk e kishim lanë aty. Qëllimi kryesor ka qenë me u tërheq rreshteri. Pika e parë tu shpresu që po shpëton, por pika e dytë, edhe me e ditë që ka vdekë, e kishim tërheqë prapë. Ishim vra të gjithë, po prapë e kishim tërheqë”, rrëfen Shala.

Ai zbulon se kishte bërë një plan për tërheqjen e trupit të rreshterit Afrim Bunjaku, pa i menduar pasojat

“E kam ba një plan shumë të shpejtë për me mendu qysh me tërheqë dhe mos me pasë pasoja më të mëdha. Më ka shku në mendje me e thy ndriçimin publik. Aty ju kam thanë kolegëve me i gjuajtë (dritat) kush afër. i kemi thy të trija dritat, dhe është bë erresim si për neve, edhe pë rata (sulmuesit). Ata kanë vazhdu me na gjujtë, por nuk kanë mundur ta vërejnë ku po gjuajnë. Më nuk kanë mundur të na marrin në cak. Atëherë kam kërku nga kolegtët, vetura e NJRSH-së (Njësitit të Reagimit të Shpejt), që ka qenë afër tyre, distancë rreth 15 metra. Janë mundu me e ndezë atë veturë. Por ajo është goditë nga predhat, dhe nuk është ndezë dhe ka mbetur në mes të udhëkryqit. Atëherë, kolegu që është mundu me e ndezë veturën, ka njoftu që çelësat janë në veturën tjetër, dhe mundësh me shku me i marrë. Ka vrapu, i ka marrë. Unë e kam ba mbulimin me zjarr, derisa kolegët, e kanë vendosë (Afrimin) në veturë për me u nisë”, rrëfen Shala. /atvlive.tv

Për më shumë detaje se çfarë ndodhi në orët e hershme të 24 shtatorit, ndiqni dokumentarin e plotë në videon e mëposhtme:

Përgatiti: Nora Luta

Në mëngjesin e hershëm të 24 shtatorit, në këtë vend, në krye të detyrës u vra rreshteri Afrim Bunjaku e u plagos polici Alban Rashiti, pas të shtënave nga një grup personash të nacionalitetit serb. Ky grup më vonë nga institucionet e Kosovës u quajt terrorist.

Një muaj pas sulmit edhe dy kamionët e vendosur në hyrje të fshatit, dyshimet pas të cilëve e sollën Policinë aty, janë larguar. Aty, megjithatë, vazhdon të qëndrojë Policia e Kosovës e banorët i janë kthyer normalitetit.

Policia është e vendosur në disa pika në Banjskë.

Autoritetet e Kosovës vazhdojnë të thonë se do të kërkojnë ekstradimin e Radojicicit por, ende nuk kanë ndërmarrë asgjë. E vetëm disa ditë pas sulmit, si pjesë e një aksioni të Policisë dhe Prokurorisë Speciale, pasuria e ish-nënkryetarit të Listës Serbe është sekuestruar, përfshirë vila milionëshe buzë liqenit të Ujmanit.

Ndërkaq, gjatë këtij muaji Policia kreu edhe disa aksione të tjera nëpër komunat veriore, që ndërlidhen me sulmin duke paralajmëruar të tjera ditëve në vijim.

Situata e sigurisë tani është e qetë, ndërkaq Policia thotë se banorët e Banjskës e kanë kuptuar se ndodhet aty për të kryer punën e saj. Po ashtu, një polic serb që kishte dhënë dorëheqje, tash është kthyer në detyrë.

Gjatë shkëmbimit të zjarrit në Banjskë, u vranë edhe tre sulmues, kurse disa të tjerë që s’ia dolën të arratisen, u arrestuan.

Një ditë pas sulmit u sekuestrua sasi e madhe e armatimit, e cila u ekspozua në kampin “Enver Zymeri”, bashkë me shumë dëshmi të tjera, nga ministri i Punëve të Brendshme, Xhelal Sveçla, i cili ndër të tjera kishte thënë se Serbia gjatë këtij sulmi tentoi ta aneksonte veriun.

Hetimet Prokuroria Speciale është duke i vazhduar, megjithatë të dhëna në këtë fazë nuk janë publikuar për shkak të ndjeshmërisë së rastit.

Tre të arrestuarve muajin e kaluar, Dushan Maksimoviç, Vladimir Toliç dhe Blagoje Spasojeviç, nën dyshimet për pjesëmarrje në sulm terrorist, e vrasjen e rreshterit Bunjaku, u është vazhduar masa e paraburgimit nga Gjykata Themelore e Prishtinës edhe për dy muaj.