Author: ATVLive

Në kuadër të planit operativ për luftimin e kontrabandës dhe formave të tjera të krimit, Njësitë Antikontrabandës së Doganës së Kosovës kanë parandaluar tri raste të tentativave të kontrabandimit në pikë-kalimin kufitar të Merdares.

Në rastin e parë të këtij operacioni, Njësitë Antikontrabandë kanë zbuluar një sasi të konsiderueshme të barnave dhe steroidëve të pa deklaruar.

Mallrat identifikuar janë përfshirë në mbi 600 paketime të llojeve të ndryshme. Procedura kundërvajtëse është iniciuar ndaj personit përgjegjës dhe mallrat janë konfiskuar, duke ndaluar tentativën e kontrabandimit të këtyre substancave të rrezikshme.

Në rastin e dytë është parandaluar kontrabandimi i preparateve kimike për dysheme/epoksit. Operacioni ka vazhduar me zbulimin e sasisë së preparateve kimike për dysheme, që arrijnë një peshë prej rreth 35 kilogramë. Mallrat janë konfiskuar dhe është nisur procedura kundërvajtëse për personin përgjegjës.

Ndërsa rasti i tretë ka të bëjë me tentativë të kontrabandës së 10 telefonave të markës iPhone Pro Max 13 dhe 12. Këto mallra janë konfiskuar, duke parandaluar tentativën e paligjshme për t’u futur në territorin e Kosovës.

Dogana e Kosovës është vendosur të vazhdojë përpjekjet e saj të ndihmojë në ruajtjen e sigurisë kombëtare dhe të ndalojë aktivitetet e paligjshme të kontrabandës në kufirin e vendit, thuhet në një komunikatë për media.

Kritika e ambasadorit gjerman në Kosovë, Jorn Rohde drejtuar opozitës për mos miratimin e marrëveshjeve ndërkombëtare, po konsiderohet si e njëanshme nga deputeti i Partisë Demokratike të Kosovës, Mërgim Lushtaku. Ai u shpreh i habitur se përse kritika të ngjashme nuk po i drejtohen edhe pozitës, derisa shton se pavarësisht miratimit të disa marrëveshjeve nga opozita, ato nuk janë implementuar.

Në një postim në rrjetin social X, Rohde ka shkruar se me mosmiratimin e marrëveshjeve ndërkombëtare po vihen në rrezik projekte të mëdha energjetike e bujqësore.

Në një intervistë për KosovaPress, Lushtaku thotë se janë mbi 800 milionë euro që janë në marrëveshje ndërkombëtare, të cilat janë aprovuar me shumicë parlamentare dhe nga vetë ata si opozitë. Derisa potencon se të njëjtat nuk po implementohen dhe që nuk po gjejnë zbatim.

“Është mirë që ambasadori ka bërë një kritikë, sepse ndonjëherë na kanë munguar, por për çudi këto kritika janë vetëm për opozitën, nuk janë për pozitën, gjë që më bën të habitem edhe më shumë. Pse më bën të habitem? Ne i dimë shumë marrëveshje ndërkombëtare që i kemi votuar si opozitë, pavarësisht a na kanë dhënë meritën apo jo. Nuk janë implementuar dhe nuk po implementohen. Janë mbi 800 milionë euro që realisht janë në marrëveshje ndërkombëtare që janë aprovuar me shumicë parlamentare edhe nga ne si deputetë të opozitës dhe që nuk po implementohen, janë të ngathët dhe realisht nuk po gjejnë zbatim. Kritika të ngjashme ishte dashur të jepen edhe qeverisë dhe pozitës në përgjithësi. Ndërsa, ne e dimë shumë mirë që edhe kur kemi dhënë mbështetje në marrëveshjet ndërkombëtare ka pasur kritika nga ana jonë dhe nuk kanë reflektuar”, tha Lushtaku.

Në intervistën për KosovaPress, Lushtaku foli edhe për qëndrimin e Bashkimit Evropian karshi Serbisë lidhur me sulmin terrorist të 24 shtatorit në Banjskë të Zveçanit, duke thënë se është për t’u habitur fakti që Serbia ende nuk është sanksionuar.

“Ne çuditemi edhe me Bashkësinë Evropiane, pas ngjarjes dhe sulmit, aktit terrorist të Serbisë në Kosovë, është e habitshme që nuk ka sanksione ndaj Serbisë. Ajo ka bërë një akt lufte në Kosovë. Pavarësisht sanksioneve që ka dhënë Kosovës BE-ja dhe SHBA-ja për shkak të “aventurave” të Albin Kurtit. Ne duhet të jemi të gjithë se bashku kritikë edhe ndaj bashkësisë evropiane pse nuk po sanksionon Serbinë për aktin terrorist që po bën ndaj Kosovës”, potencoi Lushtaku.

Ndërkaq, kryeministri i Kosovës Albin Kurti, dhe presidenti i Serbisë, Aleksandar Vuçiq, pritet të zhvillojnë takime të ndara me katër liderët evropianë më 26 tetor në Bruksel.

Bashkimi Evropian konfirmoi se Kurti dhe Vuçiq janë ftuar në Bruksel në margjinat e samitit të Këshillit Evropian të enjten.

Lidhur me këtë, deputeti i PDK-së, Mërgim Lushtaku konsideroi se kryeministri Kurti po bën hapa të gabueshëm në këtë drejtim. Ai thotë se Kurti dalëngadalë po kthehet në hapat e liderëve të mëparshëm që vetë i ka kritikuar.

“Sigurisht që pas ngjarjeve të fundit ka ndryshuar tërësisht rrethanat dhe për normalitet. Edhe pse në gjithë duhet të synojmë paqen mbi luftën, duhet të më shumë të konsiderojmë jetën mbi humbjen e jetëve. Sigurisht që një përgjegjësi e madhe i takon dy udhëheqësve të shteteve të Kosovës dhe Serbisë. Në këtë drejtim duhet të jemi të vëmendshëm se çfarë veprojmë. Besoj që Albin Kurti ka bërë hapa shumë të gabueshëm në këtë drejtim, dalëngadalë po kthehet në hapa të liderëve të mëparshëm që vetë i ka kritikuar, por a është vonë, mbetet të shihet”, theksoi Lushtaku.

Ndryshe, burimet diplomatike thonë se plani është që në margjinat e këtij samiti, Kurti dhe Vuçiq të kenë takime të ndara me katër liderët evropianë, përfaqësuesit e të cilëve vizituan Kosovën dhe Serbinë më 21 tetor.

Sipas burimeve, plani është që “katër liderët, presidenti i Francës, Emmanuel Macron, kryeministrja e Italisë, Giorgia Meloni, kancelari i Gjermanisë, Olaf Scholz, dhe përfaqësuesi i lartë i BE-së Josep Borrell, të kenë takim të përbashkët me kryeministrin e Kosovës, Albin Kurti, në margjinat e samitit të BE-së të enjten”.

Kryetari i Komunës së Podujevës, Shpejtim Bulliqi, së bashku me Drejtorin e Sportit, Pajtim Balaj, i kanë pritur sot në takim drejtuesit e klubit të futbollit Llapi, të udhëhequr nga trajneri Tahir Batatina, drejtori sportiv Mentor Zhdrella, sekretari Muhamet Rexhepi dhe disa futbollistë të prirë nga kapiteni Benjamin Emini.

Kryetari Bulliqi i ka përgëzuar drejtuesit dhe futbollistët e klubit për paraqitjet dhe ndeshjet e mira që i kanë zhvilluar në këtë fillim kampionati.

Ndërsa, klubi llapjan njofton se qëllim i kësaj vizite ishte shpalosja e projektit të ri të Arenës “Zahir Pajaziti” ku parashihet vendosja e mbulojës së stadiumit, rritja e kapacitetit të ulëseve dhe ndërtimi i tribunës lindore, me ç’rast Kryetari Bulliqi u zotua se së bashku me Ministrinë për Kulturë, Rini e Sport do ta mbështesin idenë që Arena “Zahir Pajaziti” të marrë pamje edhe më të bukur.

Serbia insiston që vetëm pjesëtarët e misionit paqeruajtës të NATO-s në Kosovë, KFOR, të dislokohen në kufi, në anën e Kosovës.

Kështu u tha pas takimit që ministri serb i Mbrojtjes, Millosh Vuçeviq, zhvilloi më 25 tetor me homologun e tij turk, Jashar Guler.

Turqia ka marrë komandën e KFOR-it në tetor.

“Ne fuqishëm inkurajojmë një komunikim të drejtpërdrejtë mes shefit të Shtabit të Përgjithshëm të Ushtrisë së Serbisë dhe komandantit të KFOR-it dhe ne insistojmë që vetëm pjesëtarët e KFOR-it të jenë të pranishëm përgjatë vijës administrative nga ana e ‘Kosovës dhe Metohisë’. Po ashtu të vazhdojnë patrullimet e përbashkëta të pjesëtarëve të Ushtrisë Serbe me ata të KFOR-it përgjatë vijës administrative”, tha Vuçeviq.

Serbia, që nuk e njeh Kosovën, e quan vijë administrative vijën kufitare me Kosovën.

Kufiri i Kosovës me Serbinë ruhet nga Policia Kufitare e Kosovës dhe pjesëtarët e KFOR-it.

Vuçeviq tha se siguria në Kosovë “ishte tema kryesore e bisedës” me homologun e tij turk.

“Ne jemi të inkurajuar nga garancitë që morëm nga zoti Guler lidhur me sigurinë e komunitetit serb”, shtoi ai.

Sipas njoftimit, Vuçevi ka përsëritur qëndrimin e Beogradit se serbët në Kosovë “nuk kanë problem me praninë e pjesëtarëve të KFOR-it dhe prania e tyre ulë tensionet dhe çon drejt shtensionimit”. /REL/

Ministria e Industrisë, Ndërmarrësisë dhe Tregtisë përmes Agjencisë për Investime dhe Përkrahjen e Ndërmarrjeve në Kosovë (KIESA) ka filluar zbatimin e Politikës Industriale sipas analizës së përformancës industriale dhe studimeve të zinxhirëve të vlerës për zhvillim industrial, duke mbështetur bizneset për certifikimin e produkteve, që kanë për qëllim eksportin përmes skemës financiare të granteve.

Në komunikatë thuhet se në fazën e parë të kësaj skeme përfituan gjithsej 10 biznese derisa vlera e granteve të dhëna është 400 mijë euro.

“Nga marrëveshjet e nënshkruara përmes kësaj skeme bizneset do të përfitojnë menjëherë 80% të mjeteve, derisa pjesa tjetër prej 20% do të realizohet atëherë kur bizneset të përfundojnë procesin e certifikimit të produkteve për eksport”, thuhet në komunikatë.

Grantet u nënshkruan nga sekretari i MINT, Daut Latifaj, ndërkaq për një fjalë rasti ministrja e MINT Rozeta Hajdari para përfaqësuesve të bizneseve tha se Politika Industriale, zbatimi i së cilës po nis suksesshëm, ka krijuar një momentum të ri për bizneset tona, duke i përgatitur prodhimet vendore për tregun ndërkombëtar.

“Vitin e ardhshëm planifikohet që vlera e granteve vetëm për certifikim do të jetë mbi 1 milionë euro. Në kuadër të Politikës Industriale, bizneset do të bëhen të konkurrueshme në tregun rajonal dhe ndërkombëtar dhe do të jenë shtytës kryesor i zhvillimit social, ekonomik dhe mjedisor për Republikën tonë”, theksoi Ministrja Hajdari.

Izraeli duhet të përmbahet nga nisja e një ofensive tokësore në Gaza dhe bisedimet diplomatike duhet të ringjallen për një zgjidhje me dy shtete, tha një ish-ambasador i njohur gjerman të martën vonë.

Christoph Heusgen, i cili shërbeu gjithashtu si këshilltar i politikës së jashtme për kancelaren e gjatë Angela Merkel, paralajmëroi se një ofensivë tokësore mund të pengojë normalizimin midis Izraelit dhe vendeve arabe dhe të shkaktojë një zjarr më të gjerë në Lindjen e Mesme.

“Kjo është gjithashtu ajo për të cilën po paralajmërojnë të tjerët, si ata që janë të përfshirë në bisedimet për lirimin e pengjeve, këtë po thotë Katari, këtë po thotë Egjipti,” i tha Heusgen transmetuesit publik ZDF dhe bëri thirrje për një de-përshkallëzimin e konfliktit.

“Presidenti i SHBA-së (Joe) Biden, ish-presidenti (Barack) Obama, po e thonë gjithashtu këtë, bazuar në përvojat e tyre me operacionet ushtarake amerikane pas 11 shtatorit dhe pasojat e tyre, se Izraeli nuk duhet të reagojë shumë tani nga zemërimi dhe urrejtja,” tha ai.

Heusgen ishte këshilltari kryesor i Merkelit për sigurinë dhe politikën e jashtme midis 2005 dhe 2017 dhe shërbeu si ambasador i Gjermanisë në OKB nga 2017 deri në 2021. Ai aktualisht është kryetar i Konferencës së Sigurisë së Munihut.

Diplomati me përvojë tha se të gjitha palët tani duhet të punojnë për të ringjallur diplomacinë dhe për të mundësuar rifillimin e bisedimeve për një zgjidhje me dy shtete të konfliktit izraelito-palestinez.

“Duhet të ketë një zgjidhje diplomatike. Sigurisht, së pari duhet bërë gjithçka tani për të mundësuar lirimin e pengjeve. Atëherë ju duhet të parandaloni që kjo të kthehet në një zjarr të përhapur dhe për këtë trupat izraelite nuk duhet të bëjnë një inkursion në Rripin e Gazës,” tha Heusgen.

“Dhe më pas ne duhet t’i kthehemi bisedimeve për një zgjidhje diplomatike të konfliktit. Ne duhet të ringjallim zgjidhjen me dy shtete, që është kuadri ligjor i zbatueshëm, dhe Izraeli gjithashtu duhet të kontribuojë në këtë. Ndoshta askush nuk mund ta imagjinojë këtë për momentin, por kjo është e vetmja rrugëdalje nga kjo trazira”, shtoi ai.

I pyetur për kritikat e mprehta të Izraelit ndaj sekretarit të Përgjithshëm të OKB-së Antonio Guterres, pas komenteve të tij për Gazën, diplomati gjerman tha se ajo që tha Guterres ishte e drejtë.

“Guterres është një njeri shumë i niveluar,” tha Heusgen, duke shtuar se Sekretari i Përgjithshëm gjithashtu dënoi ashpër Hamasin për sulmet e 7 tetorit.

“Guterres ka të drejtë kur tha se kjo nuk ndodhi në vakum dhe kur vuri në dukje pushtimin e territoreve palestineze për 56 vjet,” tha ai.

“Kjo është pikërisht ajo që është në të drejtën aktuale ndërkombëtare dhe në rezoluta. Rezoluta e fundit thotë se pushtimi është një shkelje flagrante e ligjit ndërkombëtar”, shtoi Heusgen.

Konflikti në Gaza, i cili ka qenë nën bombardimet izraelite që nga 7 tetori, filloi kur Hamasi nisi Operacionin “Al-Aksa Flood”, një sulm i papritur i shumanshëm që përfshinte një breshëri lëshimesh raketash dhe infiltrimesh në Izrael nga toka, deti dhe ajri. Hamasi tha se inkursioni ishte në hakmarrje për sulmin ndaj xhamisë “Al-Aksa” dhe dhunës në rritje nga kolonët izraelitë.

Ushtria izraelite më pas nisi një fushatë të pamëshirshme ajrore kundër Rripit të Gazës.

Gati 7.200 njerëz janë vrarë në konflikt, duke përfshirë të paktën 5.791 palestinezë dhe 1.400 izraelitë.

2.3 milionë banorë të Gazës kanë mbetur pa ushqim, ujë, ilaçe dhe karburant, dhe autokolonat e ndihmave të lejuara në Gaza kanë bartur vetëm një pjesë të asaj që nevojitet. /AA

Albi Mall në bashkëpunim me Spitalin Amerikan në Kosovë dhe YessPharma me datat 27 dhe 28 tetor, nga ora 16:00 deri në orën 19:00, ju mundësojnë të bëni Echo të gjirit falas!

Tetori, në të gjithë botën është muaji i ndërgjegjësimit për zbulimin e hershëm të kancerit të gjirit. Muaji i ndërgjegjësimit për kancerin e gjirit është një fushatë vjetore ndërkombëtare që synon të shpërndajë informacion dhe të edukojë njerëzit për rëndësinë e shëndetit të gjirit, për zbulimin e hershëm të kancerit të gjirit te gratë dhe vajzat në të gjithë botën.

Edhe Albi Mall si pjesë e pandashme e shoqërisë, duke krijuar vend dhe hapësira pothuajse për çdo gjë, qoftë argëtim, festë apo edhe ndërgjegjësim si në këtë rast, ka marrë iniciativë që muajin tetor të mos e lë pa e shënuar duke dashur t’i dalë në ndihmë gruas, për të shpëtuar jetë.

Albi Mall në bashkëpunim me Spitalin Amerikan në Kosovë si dhe me YessPharma kanë marrë iniciativën që të krijojnë hapësira përbrenda qendrës duke mundësuar që falas të bëni Echo të gjirit.
Nga Dr. Arta Kamberi do të kryhen falas Echo të gjirit dhe gjithashtu mund të bëhen falas edhe matjet e glicemisë (sheqerit në gjak) dhe tensionit.

Vendi ku do të jenë të lokalizuar për t’i kryer këto shërbime falas do të jetë në katin -1,

(afër Hipermarketit) ndërsa ditët e ndara janë datat 27 dhe 28 tetor me orare si vijon:

16:00 – 19:00!

Për të shpëtuar jetë, për të mirën tuaj, gjatë këtyre datave, ne do të jemi në shërbim tuajin në orarin e lartëpërmendur, prandaj ejani dhe së bashku të bëhemi pjesë e ndërgjegjësimit për zbulimin e hershëm të kancerit të gjirit.