Author: ATVLive

Ministri i Jashtëm i Shqipërisë, Igli Hasani, duke cituar ambasadoren amerikane në OKB mbrëmë gjatë Këshillit të Sigurimit që ka kërcënime të vazhdueshme që vijnë nga jashtë Kosovës, tha se s’mjafton që sulmi terrorist në Banjskë të dënohet, por duhet të sigurohet që ai të mos ndodhë më.

“Siç e theksoi ambasadorja e SHBA-së në OKB, Linda Thomas-Greenfield, dje në takimin e Këshillit të Sigurimit të OKB-së, se ka “kërcënime akute ndaj sigurisë dhe stabilitetit që vijnë nga jashtë Kosovës”. Nuk mjafton vetëm të dënojmë Banjskën. Ne duhet të sigurohemi që kjo të mos ndodhë më kurrë”.

Kryediplomati shqiptar përsëriti qëndrimin e vendit të tij që qëndron me Kosovën dhe kërkoi nga udhëheqësit e saj të koordinohet me aleatët.

“Ndërsa qëndrojmë në krah të Kosovës në parandalimin e çdo kërcënimi të jashtëm, Shqipëria do të vazhdojë t’i nënvizojë udhëheqjes së Kosovës rëndësinë e koordinimit të ngushtë me aleatët e saj kryesorë”.

Fourth Wave sot ka mbajtur një aksion protestues në sheshin e Klinës për të dënuar qëndrimin skandaloz të klubit futbollistik “Dukagjini”. Bëhet fjalë për futbollistin Solomon, i cili kërkohet nga Interpol për veprën penale “Dhunim” ndaj të dashurës së tij. Poashtu, ai u arrestua nga Policia e Kosovës për mosrespektimin e rregullit për tu lajmëruar cdo tre muaj në Polici.

Pavarësisht situatës, ajo që na duket vërtet e tmerrshme është mbështetja e palëkundur e shprehur nga presidenti i klubit të futbollit, i cili me guxim deklaroi: “Do të qëndrojmë pranë tij deri në fund”.

Kjo deklaratë nuk është vetëm një akt solidariteti por një përforcim i një mendësie që i jep përparësi reputacionit të një individi mbi sigurinë dhe mirëqenien e të tjerëve. Duke qëndruar pranë Solomonit, kryetari i klubit të futbollit dërgon një mesazh të rrezikshëm, se veprat penale si dhunimi mund të justifikohen dhe madje të miratohen për sa kohë që kryesi i veprës ka një status të caktuar.

Protesta jonë e sotme nuk ishte thjesht akt revolte, por thirrje për veprim. I bëjmë thirrje klubit të futbollit “Dukagjini” që të tërheqin deklaratën e tyre dhe ta përjashtojnë Solomonin.

Ne refuzojmë të mbyllim sytë përballë një sistemi që mbron abuzuesit në kurriz të viktimave dhe do të vazhdojmë të flasim kundër padrejtësisë e t’i mbajmë përgjegjës autorët.

Biznesi i hotelerisë çdo muaj është duke realizuar profit, pasi duket se hotelet janë mjaft të frekuentuara.

Sipas të dhënave të ASK-së, vetëm në muajin dhjetor numri i vizitorëve nëpër hotele ishte për 40 për qind më i lartë sesa në po të njëjtin muaj të vitit 2022.

Sipas të dhënave në këtë periudhë hotelet patën mbi 54 mijë vizitorë.

“Në dhjetor 2023, numri i vizitorëve (vendorë dhe të huaj) në hotele ishte 54 832, prej tyre 40.1%, ishin vendorë dhe 59.8% ishin të jashtëm.

Krahasuar me muajin dhjetor të vitit 2022 (sa ishin 42 042 vizitorë) kishte rritje të numrit të përgjithshëm të vizitorëve në hotele për 30,4%.

Numri i net qëndrimeve ishte 145 619, prej tyre 43,9% nga vendorët dhe 56,0% nga të huajt”, thuhet në raport.

Ndërsa, numri i vizitorëve të jashtëm dhe net qëndrimet e tyre në hotele, sipas shteteve nga vijnë.

“Sa u përket vizitorëve të huaj, krahasuar me periudhën paraprake (dhjetor 2022) ka rritje të vizitoreve për 25,1%. Në total 32 835 vizitorë të huaj, nga të cilët numri më i madh është nga Shqipëria, Zvicra, Gjermania, Turqia etj.”, thuhet në raport.

Disa Organizata për të drejtat e njeriut i janë drejtuar me një letër publike kryetarit të Kuvendit të Kosovës, Glauk Konjufcës, në të cilën i kanë kërkuar shkarkimin e menjëhershëm të Duda Balje nga pozita e kryetares së Komisionit për të Drejta të Njeriut.

Në një letët publike të publikuar në Facebook, CEL Kosovo, ka thënë se mund të lejojmë që një person me qëndrime diskriminuese të drejtojë një institucion kaq të rëndësishëm për mbrojtjen e të drejtave themelore të njeriut në Kosovë.

“Me këtë rast, kërkojmë shkarkimin e menjëhershëm të Duda Balje nga pozita e kryetares së Komisionit për të Drejta të Njeriut. Nuk mund të lejojmë që një person me qëndrime diskriminuese të drejtojë një institucion kaq të rëndësishëm për mbrojtjen e të drejtave themelore të njeriut në Kosovë. Njëherit, kërkojmë edhe shkarkimin e Labinotë Demi Murtezi nga ky komision për gjuhën e saj shpifëse dhe të urrjetjes ndaj personave LGBTIQ+”, kanë shkruar në letrën publike dërguar Konjufcës.

“Ne kërkojmë që Kuvendi i Republikës së Kosovës të reagojë menjëherë dhe të ndërmerr masa për të garantuar se pozitat publike janë të mbajtura nga persona që respektojnë dhe promovojnë të drejtat e njeriut pa dallim për të gjithë ashtu siç e përcakton Kushtetuta e Kosovës”, thuhet aty tutje.

Dogana e Kosovës njofton se në pikë kalimin kufitar të Merdares u zbulua një sasi e konsiderueshme e cigareve elektronike të padeklaruara gjatë tentimit për kontrabandim.

Në komunikatë thuhet se në pikën kufitare (PKK) Merdare, ka arritur autobusi i linjës së rregullt nga Gjermania për në Kosovë.

“Në pyetjen e oficerëve doganorë se a kishte diçka për të deklaruar, shoferi është përgjigjur se ka sasi minimale. Oficerët doganorë kanë kërkuar hapjen e të gjitha bagazheve, derisa drejtuesi i mjetit ka deklaruar se bagazhet në pjesën e majtë të autobusit nuk hapen”, thuhet në njoftim.

Sipas njoftimit oficerët doganorë së bashku me oficerët e policisë kanë hapur bagazhet, ku janë gjetur sasi prej 17 mijë e 290 pako cigaret elektronike të shijeve të ndryshme, së bashku me 10 mijë thithje (puffs) në sasi prej 20 ml secila, fillimisht në pjesën e majtë të bagazhit.

“Pas kësaj, autobusi është selektuar për kontroll të vijës së dytë, respektivisht për kontroll detal. Kontrolli ka rezultuar me gjetjen edhe të një sasie të konsiderueshme të cigareve elektronike në fund të autobusit dhe nën karrigen e mbuluar me valixhe dhe gjësende të udhëtarëve. Drejtuesi i autobusit ka pranuar verbalisht se malli i takon atij. Tërë sasia është konfiskuar derisa veprimet në lidhje me këtë rast do të vazhdojnë në përputhje me procedurat dhe rregulloret relevante të doganës”, thuhet njoftim.