Author: ATVLive

Me të filluar vizitën e tij të parë zyrtare në Irlandë, kryeministri i Kosovës, Albin Kurti, takoi e bashkëbisedoi me mërgatën e Kosovës.

Ky takim i parë me diasporën tonë atje, u karakterizua nga diskutime për shtetin tonë, për të tashmen e të ardhmen.

Në komunikatë thuhet se kryeministri Kurti theksoi se diaspora jonë janë ambasadorët tanë më të mirë, që shpërfaqin atë se çfarë përfaqëson Kosova, vlerat unike dhe zellin e punës.

“U trajtuan në hollësi programet, planet e objektivat e Qeverisë, të cilat synojnë kthimin e trurit dhe bashkatdhetarëve tanë në atdhe. Diaspora ka kontribuar e vijon të kontribuojë për Kosovën, dhe si Qeveri e kemi obligim që ta vendosim mërgatën në pozicion më të volitshëm e të eksplorojmë format e mundësitë për bashkëpunim. Mes shumë iniciativash, kryeministri përmendi edhe Fondin Sovran”, thuhet në komunikatë.

Më tej thuhet se duke shprehur ngazëllimin e mirënjohjen e thellë për të gjithë pjesëmarrësit, për diasporën tonë dhe për dashurinë e tyre për Kosovën, kryeministri Kurti i falënderoi ata për bisedat e frytshme e produktive.

Dronët turk Bayraktar kanë mbërritur këtë të premte në territorin shqiptar. Lajmi është bërë me dije nga ministri i Mbrojtjes Niko Peleshi, i cili ka ndarë dhe pamjet e mbërritjes së mjeteve fluturuese.

Peleshi thekson se pajisja e Forcave të Armatosura me dronët Bayraktar rrit aftësinë e mbrojtjes së Shqipërisë dhe është një dëshmi e angazhimit për të garantuar sigurinë kombëtare.

“Dronët Bayraktar, të njohur për efikasitetin dhe teknologjinë e tyre të avancuar, tashmë janë në Shqipëri!

Prej dy ditësh, ka filluar montimi dhe paralelisht po kryhet instalimi i infrastrukturës mbështetëse për operimin dhe kontrollin e tyre.

Ky zhvillim jo vetëm që rrit aftësitë e mbrojtjes së Shqipërisë, por shërben edhe si dëshmi e angazhimit të vendit për të garantuar sigurinë kombëtare dhe për të përmbushur standardet më të larta të mbrojtjes.

Kjo arritje, simbol i dedikimit tonë drejt modernizimit dhe inovacionit në Forcat tona të Armatosura”, shkruan Peleshi në facebook. /Euronews/

Në Gjykatën Themelore në Prishtinë ka dështuar të mbahet seanca ndaj ministrit të Punëve te Brendshme, Xhelal Sveçla dhe ndaj deputetëve të Lëvizjes Vetëvendosje, Fitore Pacolli, Sali Zyba dhe Drita Millaku për hedhjen e gazit lotsjellës në mbledhjen e kuvendit në vitin 2019.

Në mungesë të cd-incizimeve nga ana e te pandehurve dhe mungesës së deputetes, Drita Millaku seanca e sotshme nuk ka vazhduar. Seanca e ardhshme do të mbahet me 26 mars në ora 10:00.

Sveçla dhe deputetët e Vetëvendosjes akuzohen se kanë kryer veprën penale “Përdorimi i armës apo mjetit të rrezikshëm ” si dhe “Pengim të personave zyrtarë në kryerjen e detyrës zyrtare”.

Shtetet e Bashkuara (SHBA) nuk kanë parë ndonjë shenjë se Rusia është duke u përgatitur për ta përdorur ndonjë armë bërthamore dhe do të vazhdojnë ta vëzhgojnë atë me kujdes, tha të enjten vonë zëdhënësi i Departamentit të Shtetit, Matthew Miller.

Miller i bëri këto komente pasi më herët gjatë ditës, presidenti i Rusisë, Vladimir Putin, paralajmëroi se Moska ka armë për t’i goditur caqet në Perëndim.

“Kjo nuk është hera e parë që dëgjojmë retorikë të papërgjegjshme nga Vladimir Putin. Kjo nuk është mënyra se si duhet të flasë lideri i një shteti të armatosur me armë bërthamore”, tha Miller.

Duke folur mëngjesin e së enjten gjatë një fjalimi para kombit në Moskë, Putini tha se vendet e Perëndimit rrezikojnë nxitjen e një lufte bërthamore, nëse dërgojnë trupa për të luftuar në Ukrainë.

“Ne gjithashtu kemi armë me të cilat mund t’i godasin caqet në territorin e tyre”, tha Putin. “A nuk e kuptojnë këtë ata?”

Perëndimi duhet “patjetër, në fund, ta kuptojë se e gjithë kjo rrezikon nxitjen e një konflikti me përdorimin e armëve bërthamore, dhe si përfundim shkatërrimin e qytetërimit”, tha ai.

“Ne e mbajmë mend fatin e atyre të cilët dikur dërguan kontingjentet e tyre në territorin e vendit tonë. Por, pasojat e ndërhyrjeve të mundshme do të jenë shumë më tragjike tani”, shtoi ai.

Në fillim të kësaj jave, presidenti i Francës, Emmanuel Macron, pas një samiti të liderëve të Evropës të mbajtur në Paris, tha se pavarësisht se tani për tani nuk ka konsensus, nuk duhet të përjashtohet asnjë mundësi për ta ndihmuar Ukrainën, përfshirë edhe dërgimin e trupave perëndimore për të luftuar përkrah Kievit, në mënyrë që të parandalohet një fitore e Rusisë.

Shtetet e Bashkuara dhe aleatët kyçë evropianë thanë gjatë kësaj jave se nuk kanë plane që të dërgojnë trupa tokësore në Ukrainë.

Fjalimi i Putinit u mbajt para zgjedhjeve presidenciale ruse të parapara më 15-17 mars, të cilat Kremlini shpreson t’i përdorë për të treguar unitetin e kombit në mbështetje të Putinit dhe pushtimit të Ukrainës, të cilin Moska e nisi në shkurt 2022.

Zgjedhjet ruse kontrollohen ashpër nga Kremlini dhe as nuk janë të lira, e as të drejta, por shihen nga Qeveria si nevojë për të përçuar një ndjenjë të legjitimitetit.

Gjykata Themelore në Prishtinë ka ndjekur me shqetësim publikimin e postimeve të datës 26 shkurt 2024 me etiketime dhe fjalor fyes ndaj gjykatës dhe gjyqtares së kësaj gjykate znj. Edita Çanta, në lidhje me shpalljen e Aktgjykimit të datës 26 shkurt 2024, ku i akuzuar ishte Glauk Konjufca.

Gjykata, konsideron se këto publikime cenojnë rëndë figurën e gjyqtarit, pavarësinë e tyre dhe besimin e publikut ndaj sistemit gjyqësor dhe si të tilla ndikojnë negativisht në pavarësinë dhe paanësinë e gjyqtarëve në misionin e tyre për dhënien e drejtësisë.

Gjykata Themelore Prishtinë, fton opinionin publik që të përmbahen në komentimin e vendimeve gjyqësore pasi që gjykata vendimet i merr në bazë të provave të administruara në shqyrtim gjyqësor dhe si të tilla vendimet e gjykatës së shkallës së parë nuk janë përfundimtare, mund të vlerësohen nga gjykata e shkallëve më të larta sipas mjeteve të goditjes.

Ambasadori i Shteteve të Bashkuara të Amerikës, Jeffrey Hovenier, në një bashkëbisedim me gazetarë kosovarë të enjten, ka thënë se Kosova duhet t’i zbatojë obligimet e saj nga Marrëveshja e Bazike dhe Aneksi i Ohrit, pavarësisht se çfarë bën Serbia.

Sipas tij, në këtë mënyrë Kosova do të përfitonte në rrugën e saj drejt NATO’s, BE’së dhe anëtarësimit në Këshill të Evropës.

“Ne duam ta shohim Kosovën përpara. Por ne do të kemi dhe do të vazhdojmë të ngremë shqetësime reale kur të ndiejmë se qeveria po ndjek së bashku politika që pengojnë këtë vizion. Kështu që unë mund të flas vetëm tani për këto çështje nën dialogun e lehtësuar nga BE. Kosova do të përfitonte kaq shumë nga ecja përpara me zbatimin e plotë dhe të plotë të zotimeve që janë lidhur në marrëveshjen bazë në aneksin e vjetër, duke përfshirë pa marrë parasysh atë që bën Serbia. Ne të gjithë e pranojmë se Serbia ka absolutisht detyrime që duhet t’i bëjë gjithashtu, nga të cilat do të përfitojë Kosova. Por të gjitha këto gjëra që duam t’i shohim për Kosovën, ecja drejt NATO-s, ecja drejt BE-së, arritja e anëtarësimit në Këshillin e Evropës duke avancuar në këtë trajektore, bëhen më të lehta duke u përgjigjur ndaj angazhimeve që ajo ka marrë, siç është krijimi i asociacionit të komunave me shumicë serbe, ose të paktën duke marrë seriozisht këtë draft statut që ne kemi dhënë që besojmë se respekton plotësisht vijat e kuqe, që mos të ketë asnjë autoritet ekzekutiv, asnjë ndryshim në Kushtetutën e Kosovës, pa Republika Sprskan. Dhe tani kalojmë në Gjykatën Kushtetuese”, tha Hovenier. /atvlive.tv

Ambasadori i Shteteve të Bashkuara të Amerikës, Jeffrey Hovenier, në një bashkëbisedim me gazetarë, ka folur për takimin e fundit në Bruksel, në të cilin mori guvernatori i BQK-ë, Ahmet Ismaili.

Ai tha se ka disa çështje politike që duhet të bisedohen, andaj sips tij, Kosova duhet të ketë individë që ta përfaqësojnë në këto takime.

“Përveç asaj që ka thënë Miroslav Lajçak, i cili është i dërguari i posaçëm për dialogun Kosovë – Serbi, ajo çfarë kam kuptuar nga takimi është se ishte respektues, dhe se u bënë disa biseda të rëndësishme. Por mendoj se ka disa çështje politike që duhet të diskutohen po ashtu. Andaj unë shpresoj se qeveria e Kosovës, përderisa kemi respektin më të lartë për guvernatorin e Bankës Qendrore, duhet të ketë individë të cilët përfaqësojnë Kosovën në këto diskutime të cilët janë të fuqizuar dhe që kanë aftësinë dhe autoritetin që të adresojnë disa prej çështjeve politike të cilat janë pjesë e madhe e kësaj çështjeje”, tha Hovenier. /atvlive.tv

Ambasadori i Shteteve të Bashkuara të Amerikës, Jeffrey Hovenier, në një bashkëbisedim me gazetarë, ka folur për çështjen e dinarit dhe qëndrimin e Shteteve të Bashkuara të Amerikës në raport me Rregulloren e re të BQK-së.

Hovenier ka sqaruar pozicionin e SHBA-së, duke thënë se nuk janë duke e sfiduar përgjegjësinë apo autoritetin e Bankës Qendrore të Kosovës dhe as s’janë duke e mbrojtur dinarin, por se qëndrimi amerikan për këtë çështje lidhet vetëm me shqetësimin e Washingtonit zyrtar për ndikimin që Rregullorja e BQK-së ka tek minoritetet, në mënyrë të veçantë tek serbët lokalë dhe për mënyrën se si ajo rregullore është implementuar.

“Më lejo të sqaroj atë që mendoj që është keqkuptuar apo atë se për çfarë komuniteti ndërkombëtar shqetësohet. Siç kam thënë unë disa herë dhe zyrtarë të tjerë amerikanë kanë thënë, ne nuk jemi duke sfiduar përgjegjësinë apo autoritetin e BQK, ne s’po provojmë të mbrojmë dinarin, SHBA-ja s’merr qëndrim se cila monedhë qarkullon në Kosovë, është për autoritetet e Kosovës të vendosin”, ka thënë Ambasadori Amerikan.

Diplomati amerikan ka sqaruar se pse SHBA-ja mendon që çështja e dinarit duhet te diskutohet në kuadër të dialogut, duke përmendur këtu edhe Planin e Ahtisarit dhe zotimet e bëra nga Kosova, zotimet të cilat Hovenier thotë se kanë qenë edhe arsye pse SHBA ka përkrahur pavarësinë e Kosovës, e që lidhen me kujdesin e veçantë të Kosovës për minoritetet.

“Ajo çfarë ne shqetësohemi është krejtësisht ndryshe, që e kemi thënë disa herë dhe që kërkon diskutim në dialog, dhe është çështja se si Rregullimi I BQK-së ka hyrë në fuqi dhe ndikimi i një Rregulloreje të tillë tek minoritetet dhe minoritetet e prekshme në Kosovë, përfshirë serbët etnik në Kosovë. Pse kemi thënë që është çështje e dialogut është shumë e qartë, sepse është.

Nën Planin e Ahtisarit, nën kushtet nën të cilat Kosova ka marrë përkrahjen tonë për pavarësi, janë bërë zotime për lidhur me mbrojtjen speciale dhe rregullimet specifike për minoritetet në Kosovë, një nga to ka qenë që Serbia do të jetë në gjendje që të ushtrojë të drejtën për të dhënë përkrahje sociale për individët dhe për shërbime sociale, si arsimi dhe shëndetësi. Mënyra se si e bën këtë Serbia është çështje bilaterale e rëndësishme. Shqetësimi ynë ka qenë me mënyrën se si Qeveria e ka miratuar këtë Rregullim. Ka qenë në mënyrë të ngutshme”, ka thënë Hovenier.