Author: ATVLive

Dhoma e Tregtisë dhe Industrisë Kosovë ka ngritur alarmin se bizneset e sektorit minerar janë afër falimentimit shkaku i bllokadave të krijuara me hyrjen në fuqi të Ligjit për Pronën Publike.

Në një konferencë për medie DhTIK bëri thirrje për zhbllokim të situatës politike dhe hapa konkret në drejtim të përmirësimit të gjendjes, raporton KosovaPress.

Drejtori i Dhomës së Tregtisë dhe Industrisë Kosovë, Kushtrim Ahmeti tha se Ligji për Pronën Publike ka shkaktuar telashe jashtëzakonisht të mëdha duke bllokuar funksionimin edhe të shumë institucioneve.

“Ligji për Pronën Publike i cili ka shkaktuar telashe jashtëzakonisht të mëdha ka bllokuar shumë institucione në funksionimin e tyre, për shkak se ky ligj ka shkelur ta quajmë ligjet e tjera, ka bllokuar ligje të tjera për të funksionuar dhe ka shkaktuar një bllokadë totale tek një numër i madh i institucioneve në vendin tonë. Janë një numër i madh i kompanive në sektorin minerar dhe jo vetëm të cilat janë bllokuar në pamundësi për të kryer aktivitetin e tyre punues shkaku i mos funksionimit në këtë rast të Komisionit të Pavarur për Miniera dhe Minerale dhe Agjencisë së Pyjeve të Kosovës të cilat janë bllokuar shkaku i futjes së ligjit të Pronës Publike rreth fundit të vitit 2023 dhe që nga ajo kohë e deri më sot numri i këtyre bizneseve po vazhdon të rritet sepse koha po vazhdon dhe nuk ka ndonjë lëvizje të zhbllokohet kjo situatë deri më tani”, theksoi ai.

Ahmeti tha se përkundër përpjekjeve të Dhomës, nuk ka pas ndonjë lëvizje adekuate në drejtim të përmirësimit të kësaj situate, prandaj përsëri kërkoi që sa më shpejt të ketë formim të institucioneve shtetërore.

“Nuk ka pas një lëvizje adekuate që do të ndikonte në zhbllokimin e situatës. Kemi dhënë kontribut të madh në aspektin e tri rregulloreve që kanë bërë të mundur formimin e njësisë në kuadër të zyrës së kryeministrit pra njësisë për menaxhimin e pronave publike e cila ka qenë e paraparë edhe me Ligjin për Pronën Publike. Kjo njësi aktualisht nuk është siç duhet e funksionalizuar, i kemi dy ose tre persona që kanë filluar punë aty, sipas ligjit duhet të jenë 10 punëtor… Kemi bërë thirrje gjithë kastës politike që të ulen dhe të gjejnë një zgjidhje që të zhbllokohet Kuvendi i Kosovës, që të gjendet një zgjidhje që të formohet edhe Qeveria e Kosovës sepse çdo vonesë ka humbje të mëdha për bizneset në Kosovë”, u shpreh ai.

Krijim të institucioneve shtetërore kërkoi edhe Bujar Avdyli jurist i grupit punues për sektorin minerar në kuadër të DhTIK-së, i cili tha se si pasojë e gjendjes së krijuar bizneset e sektorit minerar janë në kolaps total dhe buzë shuarjes.

“Bizneset në përgjithësi në veçanti që merren me sektorin minerar kanë kohë që e kanë të pamundur vazhdimin e licencave shkaku i mos marrjes së kontratave të qirasë nga Agjencia Pyjore e Kosovës, ky problem ka nisur gati para 1 viti në qershor të vitit të kaluar. Agjencia Pyjore e Kosovës ka marr një vendim që ka pezulluar neni 1 thotë ‘pezullohen të gjitha kërkesat që janë parashtruar nga personat fizik apo juridik për marrje të tokës pyjore me qira apo vazhdim të kontrata aktive’….Shkaku i hyrjes në fuqi të ligjit për Pronën Publike APK e ka pezulluar punën me arsyetimin se ka një kolezion midis ligjit për Pronën Publike dhe ligji për Pyje… Mbi 100 biznese që janë vetëm të sektorit minerar që nuk kanë pas mundësi me vazhdu aktivitetin e tyre me bë vazhdimin e licencës shkaku i mos marrjes së kontratës nga APK-ja…E shohim si bllokadë totale të institucioneve e të vendit tonë bizneset e sektorit minerar dhe veprimtaritë përcjellëse janë në kolaps total pranë shuarjes në tërësi”, tha ai.

Tafil Shala investitor nga diaspora në sektorin minerar tha se për shkak të situatës së krijuar pas futjes së fuqi të ligjit për Pronë Publike biznesi i tij është buzë falimentimit.

Ai kërkoi përkrahje nga institucionet qendrore.

“Kemi disa probleme në ato probleme na janë shfaqur rrugës tani kërkojnë nga institucionet, qeveria të bëjmë diçka të zhbllokoj situata në këtë gjendje që është të na mundësoj të paktëntë zhbllokohemi dhe të zhvillojmë veprimtarinë e të punojmë se përndryshe ne jemi buzë falimentimit. Dhe shpresoj se me mirëkuptim dhe mirësi të janë mirënjohës ndaj neve që kemi ardhur të kontribuojmë dhe sa do pak që investimet tona mos të jenë të bllokuara. Mos të hasim në burokraci në këso procese dhe këso bllokada se përndryshe nuk do të rrimë kështu ”, tha ai.

Ligji për Pronën Publike ka hyrë në fuqi në dhjetor të vitit 2023./KP

Varrimi i Papa Françeskut do të bëhet të shtunën në bazilikën e Santa Maria Maggiore në Romë, njoftoi sot Vatikani, pas një takimi të kardinalëve.

Më heret, papa Françesku shprehu dëshirën e tij për t’u varrosur në kishë, një nga vendet e tij të preferuara, dhe jo në Bazilikën më të madhe të Shën Pjetrit, siç ndodh zakonisht, raporton ATSH.

Liderët globalë pritet të marrin pjesë në funeral.

Trupi i papa Françeskut është aktualisht i vendosur në një arkivol të hapur në kapelën e bujtinës Santa Marta, ish-rezidenca e tij, ku kardinalët, zyrtarët dhe punonjësit e Vatikanit mund t’i japin lamtumirën e tij, përcjell KP.

Papa Françesku, i cili ishte 88 vjeç, vdiq dje nga një goditje në tru dhe dështimi i zemrës.

Kosova ka bërë përparim të moderuar në zbatimin e Planit të Veprimit për Tregun e Përbashkët Rajonal të Procesit të Berlinit.

Kështu thuhet në raportin e Institutit Demokratik të Kosovës (KDI), i cili u publikua të martën.

Hulumtuesja në KDI, Violeta Haxholli, tha se fokusi i raportit është në fushën e digjitalizimit dhe agjendës së gjelbër, raporton KosovaPress.

Sipas saj, në kuadër të agjendës së reformave evropiane, Kosova ka bërë përparim në zhvillimin e rrjetit 5G si pjesë e agjendës digjitale 2030, mirëpo shtoi se duhet angazhim më i madh në kuadër të agjendës së gjelbër.

Si mangësi ajo përmendi mungesën e aftësive digjitale, sidomos në sektorin e arsimit.

Në anën tjetër, ajo tha se Kosova ka vendosur objektivat për energjinë dhe klimën deri në vitin 2030, ku përfshinë rritjen e pjesës së energjisë së ripërtërishme deri 32 për qind dhe reduktimin e gazrave serë deri në 16.3 për qind.

“Gjetjet kryesore te pjesa e digjitalizimit mund të them se ka pasur progres në përmirësimin e infrastrukturës dhe konektivitetit. Kosova ka arritur një shtrirje të internetit 100 për qind që e tejkalon edhe mesataren e BE-së. Ky është zhvillimi më pozitiv nga pjesa e digjitalizimit, ndërkaq pjesa e siç kemi marrë obligime dhe që kërkohet nga BE-ja që Kosova të bëjë përpjekje për të zbatuar edhe teknologjinë 5G që është duke zhvilluar por duhet edhe tutje. Hap tjetër pozitiv është miratimi i Strategjisë së Agjendës Digjitale i cili ngërthen shumë aspekte të zhvillimit digjital dhe objektivave që Kosova ia ka vendosur vetës për të arritur tutje në avancim drejt zhvillimit digjital të vendit… Kosova ka vendosur objektivat për energjinë dhe klimën deri në vitin 2030, ku përfshinë rritjen e pjesës së energjisë së ripërtërishme deri 32 për qind dhe reduktimin e gazrave serë deri në 16.3 për qind. Ka miratuar edhe ligje që duhet të vijnë në Kuvend dhe të miratohen sa më parë, po ashtu janë edhe marrëveshje që duhet të ratifikohen në Kuvend”, tha ajo.

Pjesë e tryezës së diskutimit ishte edhe ministrja në detyrë e Ekonomisë, Artane Rizvanolli, e cila tha se Procesi i Berlinit është kyç në bashkëpunimin rajonal.

Ajo tha se Kosova është vendi më proaktiv në rajon kuadër të Procesit të Berlinit, mirëpo vuri në pah destruktivitetin e Serbisë, sidomos në moslejimin e alokimit të kapaciteteve në linjat e transmisionit.

“Kosova është ndër vendet më aktive dhe proaktive në Procesin e Berlinit. Këtë e kemi parë edhe me ratifikimin shumë të shpejtë të gjitha marrëveshjeve dhe sëfundmi edhe në ratifikimin e njëanshëm të marrëveshjes për lëvizje të lirë me Bosnjë Hercegovinën…Kur është pjesë e proceseve të tilla të bashkëpunimit rajonal nënshkruan marrëveshje të reja, synon thellim të bashkëpunimit. Por nga ana tjetër në realitet, Kosova ka probleme specifike politike që të bëjnë të mos shpresosh shumë edhe për marrëveshjet e reja. Nëse flasim për energjinë një gjë që e kemi përjetuar gjatë gjithë kohës është se në kemi votuar në Proces të Berlinit, nga ana tjetër sot jemi në një situatë kur qe 5 vjet Serbia nuk lejon alokimin e kapaciteteve në linjat e transmisionit. Kjo është një tregti bazike që i kushton qytetarëve të Kosovës me miliona euro”, theksoi Rizvanolli.

Mes tjerash në raport janë adresuar rekomandime ndaj institucioneve, veçmas në zgjerimin e rrjetit të internetit të lartë në shkolla. Po ashtu të sigurojë burime të mjaftueshme për implementimin e infrastrukturës digjitale./KP/

Një vinç ndërtimi është rrëzuar sot pasdite në lagjen e Spitalit, mbrapa Spitalit Amerikan në Prishtinë.

Pamjet nga vendi i ngjarjes tregojnë se pjesa metalike e vinçit ka përfunduar poshtë ndërtesës e cila është në ndërtim.

ATV mëson se nuk ka të lënduar, ndërsa shkaqet që çuan në këtë incident ende nuk janë bërë të ditura.

Pamjet pas rrëzimit të vinçit i gjeni në videon më poshtë:

Presidenti amerikan, Donald Trump tha sot se ai dhe bashkëshortja e tij Melania kanë planifikuar të udhëtojnë në Romë për të marrë pjesë në funeralin e Papa Françeskut, në atë që do të ishte udhëtimi i tij i parë jashtë vendit që nga marrja e detyrës në janar.

“Melania dhe unë do të shkojmë në funeralin e Papa Françeskut, në Romë”, shkroi Trump në “Truth Social”.

“Papa Françesku vdiq dje në mëngjes në moshën 88-vjeçare, pasi pësoi një goditje në tru dhe si pasojë dështim të zemrës”, sipas Vatikanit.

Papa Françesku, i cili drejtoi Kishën Katolike për 12 vjet, ka zgjedhur të varroset jashtë mureve të Vatikanit, në bazilikën e Romës të Santa Maria Maggiore, në një ceremoni funerali modeste.

Funerali i tij do të jetë megjithatë një ngjarje globale, ku priten të marrin pjesë krerët e shteteve dhe qeverive nga e gjithë bota.

Kardinalët do të takohen të martën në Vatikan për të diskutuar organizimin e funeralit, pasi varrimi zakonisht bëhet katër deri në gjashtë ditë pas vdekjes.

Vetëm disa orë para vdekjes së tij, papa Françesku u takua dje shkurtimisht me zëvendëspresidentin e Trump, JD Vance, i cili ka bërë një sërë udhëtimesh jashtë vendit që kur administrata e re mori detyrën.

Për Trump, megjithatë, do të ishte udhëtimi i parë jashtë vendit që nga kthimi në Shtëpinë e Bardhë më 20 janar.

Fillimisht, ishte e paqartë nëse Trump do të udhëtonte në Itali vetëm për të marrë pjesë në funeral, apo edhe për të vizituar vende të tjera.

Kryeministrja italiane Giorgia Meloni e ftoi Trump në Romë kur ajo vizitoi Shtëpinë e Bardhë javën e kaluar, duke thënë se ai kishte pranuar.

Tregjet evropiane të aksioneve janë në rënie këtë mëngjes, pasi investitorët po ndjekin shembullin e shitjes së madhe që ndodhi në Wall Street mbrëmë, raporton The Guardian.

Indeksi DAX i Gjermanisë ka rënë me 0.4%, ndërsa CAC i Francës është ulur me 0.6% dhe FTSE MIB i Italisë ka humbur 1.1%.

Në Danimarkë, gjiganti farmaceutik Novo Nordisk ka rënë me më shumë se 6% pasi një studim zbuloi se pilula eksperimentale për humbje peshe nga rivali amerikan Eli Lilly ishte po aq efektive sa ilaçi i suksesshëm i Novo-s, Ozempic, përcjell KosovaPress.

Në anën tjeter, dollari amerikan ka rënë në nivelin më të ulët të tre viteve të fundit, ndërsa largimi nga asetet amerikane po përshpejtohet.

Tregtarët janë të shqetësuar pasi Donald Trump ndërmori një tjetër sulm të ashpër ndaj kryetarit të bankës qendrore amerikane, duke e quajtur Jerome Powell “Z. Shumë Vonë” dhe “një dështak i madh”, ndërkohë që presidenti amerikan shtoi presionin për uljen e normave të interesit në SHBA.

Kjo ka çuar në rënien e dollarit kundrejt një shporte valutash në nivelin më të ulët që nga marsi i vitit 2022. Kundrejt jenit japonez, dollari ka arritur në nivelin më të ulët të shtatë muajve të fundit, duke u këmbyer në 140 jen për herë të parë që nga shtatori i kaluar.

Javën e kaluar, Trump shprehu se po pret me nxitim largimin e Powell, sipas The Guardian.

Tony Sycamore, analist në IG, thotë se sulmet e Trump ndaj Powell-it po dëmtojnë besimin në tregje. Marrëdhënia e tyre ka qenë gjithnjë e tensionuar – megjithëse Trump e emëroi në 2017, më pas e ka kritikuar ashpër për vendime të këqija dhe vonesa. Ndërkohë, Powell ka paralajmëruar se tarifat e Trump rrezikojnë të rrisin inflacionin dhe të ngadalësojnë ekonominë, duke sfiduar pretendimet e presidentit.

Dje (kur tregjet evropiane ishin të mbyllura), pati humbje të mëtejshme në Wall Street, ku indeksi Dow Jones Industrial Average ra me 2.5%, ose gati 1,000 pikë.

Ndërsa investitorët e shqetësuar po vazhdojnë të investojnë në ar, duke e çuar atë në nivele rekord sot.

Ari arriti për herë të parë në $3,500 për ons këtë mëngjes, duke zgjatur një rritje të madhe që ka nisur nga $2,623/ons në fillim të vitit.

Matt Britzman, analist i lartë në Hargreaves Lansdown, thotë se:

“Lufta e tarifave vazhdon pa fund në horizont, dhe tani përplasja për pushtet me Powell po e tensionon më tej situatën. Tregjet po kërkojnë progres konkret në marrëveshjet tregtare – postimet në Truth Social apo X nuk mjaftojnë më. Investitorët duan veprim, jo vetëm fjalë”.

Kjo pasiguri po i shtyn investitorët drejt aseteve të sigurta si ari dhe jeni japonez.

Akademikët e Oksfordit kanë pirë për dekada nga një gotë e bërë prej kafkës së një njeriu, sipas librit të ardhshëm të Prof. Dan Hicks, “Çdo Monument Do Të Bie”, që eksploron historinë koloniale të mbetjeve njerëzore të grabitura, sipas The Guardian.

Kupa, e bërë nga pjesa e sipërme e kafkës, e zbukuruar me argjend, u përdor në darka formale në Kolegjin e Worcester deri më 2015. Kur filloi të pikonte, u përdor për çokollata. Pakënaqësia në rritje e kolegëve e ndaloi përdorimin, dhe në 2019, kolegji i kërkoi Hicks të hetonte origjinën e saj, përcjell KP.

Datimi me karbon e vendos kafkën rreth 225 vjeçare, me gjasa nga Karaibet dhe ndoshta e një gruaje të skllavëruar. Pronësia britanike është e dokumentuar: George Pitt-Rivers, një eugjenist dhe mbështetës i fashizmit, ia dhuroi kupën kolegjit në 1946. Kjo ishte pjesë e koleksionit të gjyshit të tij, themeluesit të Muzeut Pitt Rivers, i cili e bleu në një ankand të Sotheby’s më 1884.

Deputetja Bell Ribeiro-Addy tha se është “neveritëse” që profesorët britanikë pinin nga kafka e një njeriu të skllavëruar në një institucion të pasuruar nga kolonializmi.

Kolegji tha se përdorimi i saj u ndërpre pas 2011 dhe u hoq plotësisht para 10 vitesh. Tani ruhet në arkiv “në mënyrë të respektueshme dhe pa qasje publike”.

Libri i Hicks përshkruan gjithashtu praktika të tjera viktoriane, si marrja e kafkave nga fushëbeteja koloniale për koleksione private apo muze, përfshirë edhe rastin e një komandanti Zulu, kafka e të cilit u gërmua nga një oficer britanik dy vite pas vdekjes.

Në qendër të Beogradit në Serbi, përballë Kuvendit Popullor skenat e ditëve të fundit duken të njohura për ata që e kujtojnë fundin e regjimit të Slobodan Millosheviqit. Simbolika politike, retorika ndaj opozitës dhe shfaqja publike e forcës janë pothuajse njësoj si tri dekada më parë. Por kësaj radhe, protagonisti është Aleksandar Vuçiq.

“Nga djepi deri në varr, gjysmë Vuçiq, gjysmë Slloba” – ky është slogani që po përhapet në rrjetet sociale dhe protestat qytetare, duke nënvizuar ngjashmëritë e frikshme mes dy liderëve autoritarë që, me vite, kanë dominuar jetën politike në Serbi, shkruan N1, transmeton KosovaPress.

Në qendër të këtyre paraleleve qëndron nevoja për të projektuar një mbështetje masive, plebishitare, përmes tubimeve të organizuara, flamujve, duartrokitjeve të koreografuara dhe retorikës nacionaliste. Pikërisht si Millosheviqi në vitin 1997, edhe Vuçiq ka parakaluar së fundmi mbi qilimin e kuq, duke përshëndetur turmën, në një tentativë për të imituar legjitimitetin popullor.

Sipas historianit serb, Srgjan Millosheviq, kjo është natyra e regjimeve autoritare që, në kohë krize, përpiqen të krijojnë iluzionin e mbështetjes masive. Skenat e shfaqura në Beograd nuk janë autentike, por më tepër përpjekje të dëshpëruara për të vonuar fundin e pashmangshëm politik.

Ngjashmëritë nuk ndalen vetëm në imazhe, por përfshijnë edhe gjuhën politike dhe mënyrën e trajtimit të kundërshtarëve. Millosheviqi i quante opozitarët “mercenarë të huaj”, ndërsa Vuçiq përdor etiketime si “bllokues” dhe “terroristë të brendshëm”, duke kërkuar armik në çdo kritik të brendshëm apo ndërkombëtar.

“Nuk sulmojnë Serbinë për shkak të Vuçiqit, por Vuçiqin për shkak të Serbisë” – kjo fjali e Vuçiqit është thuajse kopje e asaj që Millosheviqi deklaroi pak para se të humbiste pushtetin: “Nuk sulmojnë Serbinë për Millosheviqin, por Millosheviqin për Serbinë.”

Për analistin politikë serb, si Aleksandar Popov, kjo është shenjë e qartë e frikës nga fundi politik. “Vuçiq, si Millosheviqi, kërkon të krijojë tensione të brendshme dhe të jashtme për të shpërqendruar vëmendjen nga dështimet e tij dhe për të ruajtur pushtetin.”

Në kontrast me vitet ’90, ku dhuna policore ishte e institucionalizuar, sot në Serbi ajo shpesh vjen nga figura pa uniformë, grupe të dyshimta paramilitare apo zyrtarë të partisë SNS në pushtet, duke reflektuar format moderne të represionit të maskuar.

Në kontekstin e sigurisë rajonale këto zhvillime janë alarmante. Regjimi i Vuçiqit i cili është shndërruar në simbol të autoritarizmit hibrid, ndjek modelin e Millosheviqit jo vetëm në retorikë, por edhe në strategjinë e polarizimit shoqëror, kontrollit të mediave dhe krijimit të realiteteve alternative përmes propagandës.

“A ka ardhur fundi i kësaj makinerie të përçarjeve shoqërore që po përsëritet prej dekadash? Kjo mbetet për t’u parë – por paralelizmat janë tepër të qarta për t’u injoruar”, shkruan n1.

Agjencia e Menaxhimit Emergjent ka hapur javën e aktiviteteve, ku janë ekspozuar pajisjet e zjarrfikësve, ekipit të barrierave dhe ekipit për shuarjen e zjarreve malore nga toka, raporton KosovaPress.

Drejtori i AME-së, Genc Metaj tha se misioni i tyre është udhëheqja dhe koordinimi i përpjekjeve shtetërore në parandalim, gatishmëri, reagim dhe rimëkëmbje në rastet e emergjencave.

“Qëllimi ynë është që të ndikojmë në vetëdijesim dhe ndërgjegjësim, që të jemi afër qytetarëve, të promovojmë rolin dhe rëndësinë e agjencisë, të njësive profesioanle të zjarrfikjes dhe shpëtimit, strukturave të mbrojtjes, shpëtimit dhe ndihmës, si dhe masat që duhet të ndërmerren në rast të fatkeqësive, e veçanërisht të fokusohemi në parandalimin e tyre”, deklaroi ai.