Author: ATVLive

Ambasadori i Francës, Olivier Guerot, ka uruar Kosovën në Ditën e Kushtetutës.

Ai ka thënë se respektimi i vlerave dhe i dispozitave, njashtu edhe pavarësia e vendimeve të Gjykatës Kushtetuese është çelësi për një shtet ligjore efektiv.

“Gëzuar Ditën e Kushtetutës Kosovë! Respektimi i vlerave dhe dispozitave të Kushtetutës, pavarësisë dhe vendimeve të Gjykatës Kushtetuese, si autoriteti përfundimtar për interpretimin e saj, është çelësi për një shtet ligjor efektiv. Në Kosovë si në çdo shtet tjetër demokratik”, ka shkruar në platformën X Guerot.

Sekretari i Përgjithshëm i NATO-s, Jens Stoltenberg, në një intervistë për të përditshmen gjermane Bild të premten, deklaroi se vitet e fundit, shumë punonjës të misionit rus janë dëbuar nga selia e NATO-s për shkak të dyshimeve për spiunazh.

“Ne kemi parë që shërbimet e inteligjencës ruse kanë operuar nëpër vendet europiane për shumë vite. Ne po shohim gjithashtu përpjekje për të rritur aktivitetet e tyre, por sigurisht, aleatët e NATO-s po monitorojnë, duke e ndjekur situatën nga afër,” shtoi ai.

Ai tha se NATO “përzuri, për shembull, personelin rus nga selia e NATO-s, sepse kuptuam se ata po kryenin aktivitete që nuk ishin punë diplomatike, por punë inteligjente”. Në tetor 2021, NATO dëboi tetë diplomatë rusë që konsideroheshin oficerë të inteligjencës.

Që nga 1 nëntori 2021, Rusia ka pezulluar aktivitetet e delegacionit të saj në NATO, misionin ndërlidhës ushtarak të NATO-s, si dhe zyrën e informacionit të Aleancës në Moskë.

Nikollë Gegaj, anëtar i bordit drejtues të Partisë Demokratike të Socialistëve (DPS), në një intervistë për gazetën malazeze “Pobjeda” tha se anëtarësimi i Kosovës në Këshillin e Evropës është fakt i kryer, ndërsa shtoi se vota kundër Kosovës në Komitetin për Politikë dhe Demokraci dëshmoi se pushteti ekzekutiv në Mal të Zi devijoi nga kursi euroatlantik.

“Në fund të fundit, anëtarësimi i Kosovës në Këshillin e Evropës – dhe goditja e ulët ndaj rrugës evropiane të Malit të Zi – është bërë fakt. Kjo do t’u mundësojë të gjithë qytetarëve të Kosovës, pra edhe serbëve që jetojnë atje, të kenë një shkallë më të madhe të mbrojtjes së të drejtave të tyre, pikërisht para Gjykatës Evropiane për të Drejtat e Njeriut”, deklaroi Gegaj.

Mali i Zi, përveç shteteve mosnjohëse brenda Këshillit të Evropës, doli në skenë duke votuar kundër Kosovës në rrugën drejt anëtarësimit në këtë organizatë evropiane që është ngritur mbi parimin e demokracisë, të drejtave të njeriut dhe sundimin e ligjit. Maja Vukiçeviç, deputete nga radhët e Partisë Demokratike Popullore (PDP) në pushtet në Mal të Zi votoi kundër.

“Kam frikë se me këtë procedurë i është dërguar mesazh ndërkombëtarëve se Mali i Zi ka devijuar nga kursi euroatlantik. Dua të shtoj se dikush dëshiron qëllimisht që vendi ynë të prishë marrëdhëniet e mira fqinjësore, gjë që është në kundërshtim me interesat e përcaktuara të politikës së jashtme të vendit tonë”, nënvizoi Gegaj, ndonëse shtoi se nuk habitet nga akti.

Duke komentuar mungesën e reagimit të presidentit dhe kryeministrit të Malit të Zi – Jakov Milatoviç dhe Millojko Spajiç – ndaj deputetes malazeze që votoi kundër anëtarësimit të Kosovës në Këshill të Evropës, ai vlerësoi se të krerët aktual të shtetit synojnë t’i shkaktojnë Malit të Zi dëme të pariparueshme vetëm për të siguruar qëndrimin në pushtet.

“Nuk mendoj se gjithçka në politikë ka të bëjë me fitimin e pikëve të lira politike. Nëqoftëse do të ishte kështu, Millo Gjukanoviç, i cili ishte në krye të qeverisë, nuk do ta kishte marrë kurrë vendimin që Mali i Zi ta njohë Republikën e Kosovës si shtet të pavarur dhe sovran. Ai vendim ishte i vështirë, por me kalimin e kohës u vërtetua se ishte shumë i mençur”.

Komiteti për Politikë dhe Demokraci në Këshillin e Evropës, më 27 mars, miratoi raportin e raportueses për Kosovën, Dora Bakoyannis, ku rekomandohet që Kosova të anëtarësohet në këtë organizatë – pro votuan 31 përfaqësues të shteteve anëtare, katër kundër dhe një abstenoi.

Do të duhen 2/3 e votave të deputetëve nga parlamentet e shteteve anëtare për t’i rekomanduar Këshillit të Ministrave – organit vendimmarrës – që ta ftojë Kosovën të bëhet anëtarja më e re e Këshillit të Evropës Kjo, nëse gjithçka shkon sipas planit, pritet të ndodhë në mes të majit.

Kosova aplikoi për anëtarësim në Këshill të Evropës në maj të vitit 2022, por moszbatimi i vendimit të Gjykatës Kushtetuese për Manastirin e Deçanit u kthye në pengesë që vendi i vogël ballkanik të vazhdojë rrugëtimin drejt anëtarësimit në organizatë, posaçërisht sepse të drejtat e njeriut dhe sundimi i ligjit janë dy vlerat themelore mbi të cilat bazohet Këshilli i Evropës.

Komisioni për Liri Qytetare dhe Punë të Brendshme i Parlamentit Evropian miratoi të martën raportin për liberalizimin e vizave për bartësit e pasaportave të Serbisë që jetojnë në territorin e Kosovës.

Raporti, i përpiluar nga deputeti slloven, Matjazh Nemec, u miratua me 34 vota për, 7 kundër dhe 12 abstenime.

Votimi i sotëm është një hap drejt vendimit për heqjen e vizave për bartësit e pasaportave serbe.

Këto pasaporta i lëshon Drejtoria Koordinuese në Beograd, e cila punon në kuadër të Ministrisë së Punëve të Brendshme të Serbisë.

Liberalizimi i vizave për qytetarët që posedojnë pasaporta biometrike të Kosovës, ka hyrë në fuqi më 1 janar të këtij viti.

Propozimin për t’ua hequr vizat edhe bartësve të pasaportave serbe në Kosovë, e ka dhënë Komisioni Evropian në nëntor të vitit të kaluar, duke argumentuar se me një vendim të tillë, të gjithë qytetarët e rajonit të Ballkanit Perëndimor do të përfshiheshin në procesin e liberalizimit të vizave.

Përveç qytetarëve të Kosovës që e siguruan lëvizjen e lirë këtë vit, qytetarët e vendeve të tjera të rajonit e kishin atë për më shumë se dhjetë vjet.

Por, kur janë hequr vizat për shtetasit e Serbisë, është vendosur që liberalizimi të mos vlejë për ata që kanë pasaporta të Serbisë e që banojnë në territorin e Kosovës.

Qeveria e Kosovës e ka kritikuar dhe kundërshtuar propozimin për përfshirjen e tyre në liberalizimin e vizave, duke e cilësuar atë si “shkelje të integritetit territorial të Kosovës” dhe duke pohuar se të gjithë shtetasit e Kosovës, përfshirë edhe ata me përkatësi etnike serbe, mund të pajisen me pasaporta biometrike të Kosovës.

Për Qeverinë e Kosovës, problematik është edhe fakti se në pasaportat që i lëshon Drejtoria Koordinuese e Serbisë, vendbanimet në territorin e Kosovës shkruhen sikur të jenë në Serbi.

Pas votimit të sotëm pritet që i njëjti raport të votohet edhe në seancë plenare nga i tërë Parlamenti Evropian, që do të zhvillohet prej 22 deri më 25 prill.

Kjo seancë plenare do të jetë edhe e fundit në këtë përbërje të Parlamentit Evropian, pasi nga data 6 deri më 9 qershor do të zhvillohen zgjedhjet e reja për Parlamentin Evropian në 27 vendet anëtare të BE-së.

Raportuesi Nemec ka shprehur qëllimin që procedura për poseduesit e pasaportave serbe në Kosovë të kryhet gjatë këtij mandati të PE-së, në mënyrë që Këshilli Evropian ta formalizojë vendimin dhe ai të hyjë në fuqi. /REL/

Sipas Ligjit për festat zyrtare, të punësuarit në Kosovë, gjatë vitit 2024, do të pushojnë në 12 prej ditëve të punës shkaku i festave zyrtare. Ata pushojnë më 1, 2 dhe 8 janar, 19 shkurt, 1 dhe 9 dhe dhjetë prill, 1, 6 dhe 9 maj, 17 qershor dhe 25 dhjetor.

Në vitet paraprake, me vendim të Qeverisë, nuk është punuar as më 28 nëntor, edhe pse kjo datë që shënon Ditën e Pavarësisë së Shqipërisë, nuk hyn në listën e festave zyrtare. Në shumë kompani private punohet edhe në ditët e festave zyrtare.

Edhe në vendet e tjera të Ballkanit Perëndimor pushohet thuajse njëjtë. Në Maqedoni të Veriut, janë 11 ditë pushim, në Serbi 12, në Shqipëri 15, në Mal të Zi 17 ditë, derisa në Bosnje e Hercegovinë janë dy ditë, por përvec dy festave të përbashkëta, njësitë administrative shpallin ditët e pushimit në mënyrë të pavarur.

Ndërkohë, në botë, më së shumti ditë pushimi ka në Nepal, apo 35 ditë. Pas Nepalit renditet Indonezia me 28 ditë dhe India me 26.

Në Itali janë 12 ditë pushim, në Francë 11 ditë, në Shtetet e Bashkuara të Amerikës 10 ditë, në Gjermani 9 ditë, derisa në Angli 8 ditë.

Në shumë vende të botës dhe të Ballkanit Perëndimor – por jo edhe në Kosovë – në ditët e festave fetare pushojnë vetëm besimtarët e atij religjioni. Praktika e zëvendësimit të ditëve të pushimit kur ato bien në fundjavë, si në Kosovë, zbatohet edhe në shumë vende të tjera në botë. Në Nepal, Ligji i Punës përcakton gjashtë ditë pune në javë./REL