ATV

Author: ATVLive

  • Përkujtohet 25 vjetori i dëbimit të shqiptarëve për në Maqedoninë e Veriut

    Përkujtohet 25 vjetori i dëbimit të shqiptarëve për në Maqedoninë e Veriut

    Përgatiti: Kastriot Tahiri

    Vite më parë karriget e këtij treni u mbushën plot me shqiptarë të cilët me forcë dëboheshin nga tokat e tyre. Pos frikës e trishtimit sigurimi i një vendi brenda trenit ishte sfide tjetër.

    25 vjet më parë pikërisht në të, një vend arriti ta zë, Sabit Jaha, i cili thotë se kujtimet e tmerrshme i kthehen së bashku me prillin.

    “Kam hipur në Prishtinë në stacionin e trenit mezi kemi arritë me u kacavirr ne tren. Aty s’ka pas as këmba ku të vendoset, disa herë në ditë ka ardhë nga fushë Kosova Kaçaniku deri këtu. Ka pas njerëz që kanë pritur edhe dy ditë të plota po s’kanë pas mundësi me zënë një vend se me mijëra e mijëra njerëz kanë kërkuar që sa më herët të gjejnë një vend”, tha Jaha.

    Në trenin që i çoi drejt Bllacës ishte edhe Ruzhdi Berisha në atë kohë vetëm 15 vjeçar, së bashku me nënën.

    “Isha adoleshent kur na qitën me dhunë forcat serbe, deri në Fushë Kosovë kemi ardhë në kam e kemi hip në tren. Kemi pas shumë vështirësi sepse ne shumë vende u ndalke treni, e forcat serbe na thonin se kemi me iu vra”, tha Berisha.

    Rrëfime si këto u përmblodhën të gjitha në librin e titulluar Bllaca 99, të shkruar nga Jahja Lluka.

    “Ne po e shënojmë sikur vite rresht nga dita kur e kemi sjellë trenin këtu e kur e kemi kriju edhe murin e kujtesës. Sakrifica e nënës shqiptarët na ka mundësua që të jemi këtu e sakrifica e UÇK-së, na mundësoi që ta shijojmë lirinë”, tha Lluka.

    Në kujtim të kësaj ngjarje i pranishëm ishte edhe shefi i grupit parlamentar të AAK-së, Besnik Tahiri.

    “Një ngjarje e shënuar në historinë kombëtare shqiptare, dhe pa asnjë dyshim subjekt i hulumtimeve akademikë për qëndresën e shqiptarëve. Kjo është një ngjarje e cila duhet të vazhdohet të trajtohet me ndjen më të madh”, tha Tahiri.

    25 vjet më parë rreth gjysmë milioni shqiptarë u dëbuan nga Kosova.
    Gjatë luftës së viteve 98-99, ata u detyruan nga forcat serbe të shpërngulen gjetiu.

    Përveç të shpërngulurve në Shqipëri dhe Maqedoni, mijëra shqiptarë kanë kaluar kufirin edhe me Malin e Zi, ndërsa qindra mijëra janë zhvendosur nga shtëpitë e tyre për të gjetur strehim në malet e Kosovës.

  • Kundërshtimi i Projektkodit Civil dhe Projektligjit për Fertizilimin e Asistuar

    Kundërshtimi i Projektkodit Civil dhe Projektligjit për Fertizilimin e Asistuar

    Përgatiti: Fatlum Jashari

    Familja ishte në qendër të lutjeve dhe ligjëratës së myftiut Naim Tërnava, në faljen e Fitër Bajramit në Xhaminë e Madhe, në kryeqytet.

    Pa i përmendur me emër, Tërnava iu referua si kërcënime Projekt-kodit Civil dhe Projekt-ligjit për Fertizilimin e Asistuar, nisma këto të mbetura pezull në Kuvend, si pasojë e kundërshtimit nga një grup deputetësh.

    “Kushdo prej nesh që sjellë diskutimet por edhe debatet e shumta që po zhvillohen kohëve të fundit në vendin tonë për aprovimin e disa ligjeve rreth familjes, sheh që këto përpjekje bien ndesh me identitetin, fenë dhe vlerat morale që posedon shoqëria jonë. Përpjekjet në këtë drejtim janë për shkak të shkatërrimin e familjes, zhdukjen apo dobësimin e moralit të lartë që bart ky popull”, tha Tërnava.

    Neni 8 i Kushtetutës saktëson se “Republika e Kosovës është shtet laik dhe neutral në çështje të besimeve fetare”, derisa rregullimi i legjislacionit për të drejtat të njeriut dhe shëndetin riprodhues vlerësohen si kyçe për proceset euro-integruese.

    Krahas lutjeve për solidaritet e mirëqenie, në festën që pason agjërimin një mujor, në përputhje me rregullat e fesë islame, myftiu bëri thirrje për angazhim shtetëror e shoqëror kundër dukurive shqetësuese.

    “Nga viti 2002 deri më 2023, fatkeqësisht kemi 1230 vetëvrasje në Kosovë, 151 vëllavrasje, 2933 raste humbje jetë në komunikacion. Vërtet shifra rrëqethëse , andaj kërkohet nga ne si shoqëri të mobilizohemi duke përfshirë të gjitha mekanizmat në parandalimin e këtyre dukurive ngase nëse qëndrojmë pasiv vetëvrasjet pro edhe vrasjet do të jenë fatale për ardhmërinë tonë”, tha Tërnava.

    Krahas agjërimit, shpërndarja e lëmoshës dhe solidarizimi me të varfrit gjatë muajit të Ramazanit, i paraprijnë kremtes së Fitër Bajramit, e cila zgjatë tri ditë.

  • Korporata Energjetike e Kosovës i ka borxh asaj të Shqipërisë edhe mbi 44 mijë megavatë energji

    Korporata Energjetike e Kosovës i ka borxh asaj të Shqipërisë edhe mbi 44 mijë megavatë energji

    Përgatiti: Haris Ademi

    Afër nëntë mijë e 500 megavatë energji elektrike, i ka marrë Korporata Energjetike e Kosovës, nga ajo e Shqipërisë, në periudhën shtator-shkurt. Ndërsa, i ka dërguar matanë kufirit mbi 25 mijë megavatë.

    Por, pavarësisht këtij bilanci nga shkëmbimi energjetik, KEK-u ende i mbetet borxh KESH-it. Sipas të dhënave dërguar ATV-së, prodhuesit kosovar të rrymës i duhet t’i kthejë edhe mbi 44 mijë megavatë, që i ka marrë nga Shqipëria kur ka pasur nevojë për energji shtesë.

    Sipas KEK-ut, borxhi ndaj KESH-it do të kthehet në muajt vijues, varësisht nga mundësitë.

    Njohësi i energjisë nga Shqipëria, Azmer Duleviç, thotë se ky borxh do të ishte ideal të kthehej gjatë verës, kur atje bie prodhimi.

    “Shqipëria ka specifikë, duke qenë se prodhimin e energjisë e ka hidro. Në periudhën e verës, që vjen pas disa javësh, të fillojë marrja mbrapshtë e energjisë që i ka dhënë KEK-ut”, tha Duleviç.

    Në anën tjetër, njohësit kosovarë nuk i shohin problem shifrat e borxhit. Vetëm se Lulzim Syla thotë se varet sa do të ketë mbulim të konsumit vendor, gjatë muajve të nxehtë.

    “Shumë çon peshë kapaciteti konsumues, sepse gjatë verës, me ardhjen e diasporës, rritet konsumi i energjisë, industria punon më tepër. Varësisht nga këto parashikime, unë besoj se do të ketë mundësi të kthimit të një pjese që të zvogëlohet ky disbalanc i shkëmbimit energjetik”, tha Syla.

    Këmbimi i rrymës ka efekt pozitiv financiar, sipas Naim Bujupit, meqë nuk ka nevojë për shpenzime.

    “Varësisht nga marrëveshja, kur na nevojitet, ata na e kthejnë, megavatë për megavatë. Nuk kemi të bëjmë me çmim të energjisë, por një megavat na japin, një e kthejmë”, tha Bujupi.

    Korporatat e Kosovës dhe Shqipërisë kanë marrëveshje që ta huazojnë energjinë, kur njëra ka mungesë, e tjetra tepricë. Ky bashkëpunim, e kishte ndihmuar Kosovën gjatë krizës energjetike, për t’i shmangur reduktimet.

  • Falja e Fitër Bajramit në Gjakovë, nga xhamia e Hadumit thirrje të mos braktiset vendi

    Falja e Fitër Bajramit në Gjakovë, nga xhamia e Hadumit thirrje të mos braktiset vendi

    Përgatiti: Arian Hajdaraj

    Me lindjen e diellit, gjakovarët myslimanë iu drejtuan xhamisë së Hadumit për faljen e namazit të Fitër Bajramit.

    Me kalimin e minutave raftet mbusheshin me këpucë, e brenda objektit të ndërtuar në vitin 1595, nuk mbeti vend i lirë.

    Derisa të tjerë u rehatuan jashtë, në orën 06:30, imami nisi faljen.

    Pas ritualit fetar që zgjati 20 minuta, erdhi momenti që besimtarët t’ia urojnë festën njëri-tjetrit, pasi shumica prej tyre kishin agjëruar për 30 ditë.

    Krahas lutjeve për paqe e harmoni, imami e besimtarët bënë thirrje kundër migrimit.

    “Të qëndrojmë në vendin tonë. Të punojmë këtu. Siç e kryem faljen e agjërimin, e mira e përgjithshme është të gëzohesh në vendin tënd. Aty është bereqeti. Veni ynë ka nevojë për ne e ne kemi nevojë për të”, tha Safet Hoxha, imam në xhaminë e Hadumit.

    Sipas vlerësimit të popullsisë, në vitin 2022, më shumë se 2300 gjakovarë u larguan nga vendi.

  • KOSTT-i i kërcënuar nga sulmet kibernetike, ME-ja hap tender për E-Cert

    KOSTT-i i kërcënuar nga sulmet kibernetike, ME-ja hap tender për E-Cert

    Përgatiti: Armand Hoti

    Operatori i Sistemit, Transmisionit dhe Tregut të Energjisë Elektrike në Kosovë – KOSTT, sulmet kibernetike, i vendosi lart në listën e kërcënimeve potenciale për vitin aktual.

    “Sulmet në rrjetin energjetik po ndodhin vazhdimisht dhe raporti i fundit i Agjencisë Ndërkombëtare të Energjisë, tregon se nga viti 2020 në vitin 2022, janë shumëfishuar sulmet kibernetike”, tha profesori i inxhinierisë kompjuterike, Blerim Rexha.

    Me qëllim të mbrojtjes së rrjetit energjetik, Ministria e Ekonomisë synon që në kuadër të KOSTT-it, të aktivizojë Ekipin e Reagimit ndaj Emergjencave Kompjuterike për sektorin e energjisë.

    Tashmë, tenderi me vlerë të parashikuar prej 1 milion e 800 mijë eurosh për formimin e kësaj trupe është hapur.

    “Ministria e Ekonomisë po mbështet Operatorin Kosovar të Transmisionit, Sistemit dhe Tregut të Energjisë Elektrike- KOSTT, për të krijuar Ekipin e Reagimit ndaj Emergjencave Kompjuterike për sektorin e energjisë (E-CERT), për: t’u siguruar që incidentet e sigurisë kibernetike të kenë reputacion negativ minimal, si dhe ndikim operacional dhe financiar sa më të vogël për sektorin e energjisë, përmirësimin e qëndrueshmërisë për digjitalizimin e vazhdueshëm e të shpejtë të sektorit të energjisë”, thuhet në dosjen e tenderit.

    Profesori i inxhinierisë kompjuterike, Blerim Rexha, thotë se proceset e dixhitalizuara brenda ndërmarrjes, krijojnë terren të përshtatshëm kibernetik, për sulme të kësaj natyre.

    “Tani kjo jo vetëm që është e domosdoshme por kjo kërkohet edhe me rregullativën me direktivën e Bashkimit Evropian, e cila i kërkon kompanive të sektorit të energjisë, të kenë të paktën nga një zyrtar për siguri kibernetike, të kenë në strategjinë e tyre masa gjithëpërfshirëse për parandalimin, detektimin, por edhe përgjigjen ndaj sulmeve kibernetike”, tha Rexha.

    Me aktivizimin e Bursës ALPEX, ku KOSTT është bashkaksionar, kësaj ndërmarrjeje publike, i shtohen ndërveprimet energjetike.

    Referuar dosjes së tenderit, afati për fillimin e kontratës është 22 maji i këtij viti, teksa afati për përfundimin e saj është 22 nëntori i 2026-ës.

  • Krerët e shtetit urojnë për paqe, tolerancë e respekt të ndërsjellë

    Krerët e shtetit urojnë për paqe, tolerancë e respekt të ndërsjellë

    Përgatiti: Fatlum Jashari

    Në kremten e Fitër Bajramit, Bashkësia Islame priti krerët e shtetit, atë partiakë, ambasadorë e përfaqësues të komuniteteve tjera fetare në Kosovë.
    Pas takimit me kreun e BIK-ut, presidentja Vjosa Osmani uroi për paqe, tolerancë e respekt të ndërsjellë.

    “Shpresojmë që lutjet përgjatë muajit të shenjtë të Ramazanit të jenë lutje të pranuara dhe për t’i falënderuar për rolin që Bashkësinë Islame e Kosovës në mënyrë që shteti ynë, qytetarët tanë të ecin përpara”, tha Osmani.

    Në urimin e tij, kryeparlamentari Glauk Konjufca dha mesazhe barazie e fisnikërie shpirtërore.

    “Të jemi më së afërmi me ata që kanë nevojë e që nuk kanë atë që dëshirojnë, përkundrazi ne përmes kësaj afrohemi me njëri-tjetrin, me familjet tona, harmoni brenda familjeve tona, harmoni në shoqëri e në popullin tonë, duke dëshiruar më të mirën për të gjithë”, tha Konjufca.

    Pasi foli për solidaritetin dhe sakrificën e besimtarëve në muajit e Ramazanit, kryeministri Albin Kurti vuri theksin te kontributi i hoxhallarëve në çështjen kombëtare.

    “Në këtë pranverë për çdo ditë po përkujtojmë 25 vjetor të masakrave të tmerrshme të kryera mbi popullin tonë, në vendin tonë, por njëkohësisht beteja të lavdishme të UÇK-së. Andaj me këtë rast duhet përkujtuar edhe 37 hoxhallarë, imamë që janë dëshmorë të kombit nga lufta e fundit. Lavdi të gjithë atyre, edhe një herë gëzuar Fitër Bajramin”, tha Kurti.

    Lutjet dhe urimet e tyre në këtë festë i shpalosën edhe krerët e partive opozitare.

    “Nga këtu dëshiroj në mënyre të veçantë urojë edhe miqve tonë, bashkë-luftëtarëve të Ushtrisë Çlirimtare të Kosovës, liderëve të UÇK-së, që ende po mbahen në Hagë, Hashim Thaçi, Kadri Veseli, Rexhep Selimi, Jakup Krasniqi, duke uruar që sa më parë festat e ardhshme të bajramave të tjerë t’i presin bashkërisht me familjet e tyre dhe me popullin e tyre”, tha kryetari i PDK-së, Memli Krasniqi.

    “Le të shpresojmë se lutjet, sakrifica dhe veprat e mira gjatë muajit të shenjët të Ramazanit të jenë pranuar nga krijuesi, por mbi të gjitha le të punojmë që këto vlera të jenë të përditshme që lidhja me njëri-tjetrin, familjen dhe kontributi për vendin të jenë pjesë normale e jona”, tha kryetari i LDK-së, Lumir Abdixhiku.

    “Urime, ta gëzojmë të gjithë bashkë në Kosovë, ta gëzojnë shqiptarët të gjithë së bashku. Vërtet gjatë këtij muaji u dëshmua përkushtim, sakrificë, solidaritet dhe njëkohësisht humanizëm. I falënderojmë që gjatë këtij muaji kanë bërë shumë që të jemi bashkë dhe të kalojmë më së miri e në këto ndjenja gëzimi, na përcjell gëzimi gjithnjë”, tha kryetari i AAK-së, Ramush Haradinaj.

    Urime vëllazërore nga selia e Bashkësisë Islame përcolli ipeshkvi, Dodë Gjergji.

    “Urojmë njëri tjetrin dhe bashkë ndajmë gëzimin e festave si vëllezër sepse këtë zjarr dashurie e kanë ndeshur të parët tanë ndër ne dhe që moti, por nuk është një zjarr që qet tym, as të bardh dhe as të zi por është një zjarr që përhap aromë dashurie, lirie, paqe, mirësie, vëllazërimi dhe uroj që të gjithë shqiptarët kudo që janë të përjetojnë këtë moment të urimit të festave të ndërsjellëta, që të konfirmojnë edhe një herë paqen, lirinë dhe vëllazërinë në mes vete”, tha Dodë Gjergji.

    Krahas shumë mysafirëve, në atë që njihet si Bajrami i Madh, për vizitë në BIK qëndroi edhe ambasadori i Shqipërisë, Petrit Malaj.

  • Në një fshat të komunës së Gjakovës, myslimanë e katolikë festojnë bashkë Fitër Bajramin me kombin në mendje

    Në një fshat të komunës së Gjakovës, myslimanë e katolikë festojnë bashkë Fitër Bajramin me kombin në mendje

    Përgatiti: Arian Hajdaraj

    Punët i la në gjysmë, e Luan Dedë Marku u bë gati të marrë rrugë brenda fshatit Korenicë të Gjakovës.

    Fqinjët e tij myslimanë kanë festë, andaj 64 vjeçari që është i besimit katolik niset t’i vizitojë.

    Rruga përfundon shpejtë. Ndër të fundit të fisit Marku, ia zë derën njërës nga familjet e fisit Haxhija.

    Kështu, pas urimit për festën e Fitër Bajramit, Luani e Lirimi mes vete fqinj me diferencë në moshë tri dekada, i drejtohen odës për ta vazhduar bisedën.

    “64 vjet I kam tash, kurrë skena pasë asnjë problem. Jemi 12 fise në fshat, po kurrëfarë telashe skena pasë”, tha Luan Dedë Marku.

    “Festat gjithmonë i kemi kalu mirë. Për neve në rend të parë është kombi. Pastaj vjen feja që është një bindje. Po na gjithmonë jena kanë bashkë, si në festa si në të pame”, tha Lirim Haxhija, besimtar mysliman.

    Respekti për njëri tjetrin pavarësisht besimeve, thonë se i mbajti të fortë edhe në kohëra të vështira.

    “Nuk ka sen më të madhe për popullin tonë. Në kohëra të vështira kjo na ka majtë – besimi e dashnia për njani tjetrin. Nuk mund të bëhemi turq e as italianë. Jemi shqiptarë”, tha Luan Dedë Marku.

    “Edhe në kohë të luftës I kemi dalë krah njëri tjetrit. Unë e kam të vrarë babain xhaxhain dhe nipin”, tha Lirim Haxhija, besimtar mysliman.

  • Krasniqi: Uroj që festat e ardhshme liderët e UÇK-së t’i presin me popullin e tyre

    Krasniqi: Uroj që festat e ardhshme liderët e UÇK-së t’i presin me popullin e tyre

    Përfaqësues të Partisë Demokratike të Kosovës me rastin e festës së Fitër Bajramit, kanë vizituar Bashkësinë Islame, ku nga aty kanë uruar të gjithë besimtarët myslimanë, por njëkohësisht kanë uruar edhe liderët e UÇK-së, që ende po mbahen në Hagë.

    Kryetari i PDK-së, Memli Krasniqi tha se ka përgëzuar edhe myftiun Tërnava për ndihmën që ka bërë BIK për nevojtarët.

    “E përgëzova dhe urova myftiun për punën e jashtëzakonshëm që Bashkësia Islame ka bërë edhe ndihmën ndaj nevojtareve, ndaj familjeve skamnore, ndaj gjithë atyre që kanë nevojë se këto festa marrin edhe një dimension më të rëndësishëm, dhe po ashtu ne shfrytëzojmë rastin t’ia urojmë të gjithë atyre që kanë agjëruar muajin e Ramazanit, përfundimin me sukses të këtij muaji me urimin që krejt ato adhurime dhe ky agjërim t’iu jetë pranuar dhe t’iu shpërblehet dhe po ashtu, nga këtu dëshiroj në mënyre të veçantë urojë edhe miqve tonë, bashkëluftëtarëve të Ushtrisë Çlirimtare të Kosovës, liderëve të UÇK-së, që ende po mbahen në Hagë, Hashin Thaçi, Kadri Veseli, Rexhep Selimi, Jakup Krasniqi, duke uruar që sa më parë festat e ardhshme të bajramave të tjerë t’i presin bashkërisht me familjet e tyre dhe me popullin e tyre” ka thënë Krasniqi.

    Pas vizitës së PDK-së, Bashkësinë Islame e kanë vizituar edhe drejtues të Aleancës për Ardhmërinë e Kosovës.

  • Osmani falënderon BIK-un për rolin dhe kontributin në shoqëri

    Osmani falënderon BIK-un për rolin dhe kontributin në shoqëri

    Presidentja Vjosa Osmani ka falënderuar Bashkësinë Islame të Kosovës për rolin dhe kontributin në shoqëri.

    Gjatë vizitës në BIK për nder të Fitër Bajramit, Osmani ka thënë se BIK-u ka qenë gjithmonë bashkëpunues për sfidat me të cilat është përballur vendi.

    “Ishim këtu për të nderuar kryemyftiun dhe bashkëpunëtorët e tij, dhe nëpërmjet tyre, edhe shumë qytetarë për këtë festë të bekuar. Lutjet përgjatë Ramazanit të jenë të pranuara. Faleminderit për rolin që luan BIK-u në mënyrë që qytetarët tanë të ecin përpara. Dua t’i falënderoj për bashkëpunimin për sfidat me të cilat përballet vendi ynë. Për kontributin e dhënë gjatë Ramazanit. Të punojmë së bashku për qytetarët dhe shtetin tonë”, ka thënë Osmani.

  • ​Dodë Gjergji uron besimtarët myslimanë por ia huq me festën

    ​Dodë Gjergji uron besimtarët myslimanë por ia huq me festën

    Me rastin e festës së Fitër Bajramit, kryesia e Bashkësisë Islame të Kosovës, si tradicionalisht ka organizuar pritje përurimi në selinë e kryesisë, ku i pari që i vizitoi ishte ipeshkvi i Kosovës, Dodë Gjergji.

    Gjergji iu uron të gjithë besimtarëve myslimanë duke thënë se të dy fetë bashkëndajnë gëzimin e festave si vëllezër. Megjithatë, ai gaboi duke uruar myslimanëve festën e Pashkëve.

    Uroj që të gjithë shqiptarët të përjetojnë këtë moment të urimit të festave të ndërsjellëta

    “Jam këtu për të uruar kryetarin e Bashkësisë Islame, Bashkësinë Islame dhe të gjithë besimtarët myslimanë për Festën e Pashkëve sepse dalim pas një agjërimi që është një përpjekje e jona për të mbizotëruar shpirti në të gjitha sferat e jetës dhe mbi trupin. Ne urojmë njëri tjetrin dhe bashkëndajmë gëzimin e festave si vëllezër sepse këtë zjarr dashurie e kanë ndeshur të parët tanë ndër ne dhe që moti, por nuk është një zjarr që qet tym, as të bardh dhe as të zi por është një zjarr që përhap aromë dashurie, lirie, paqe, mirësie, vëllazërimi dhe uroj që të gjithë shqiptarët kudo që janë të përjetojnë këtë moment të urimit të festave të ndërsjellëta, që të konfirmojnë edhe një herë paqen, lirinë dhe vëllazërinë në mes vete”, tha ai.

    BIK-un e ka vizituar edhe kryeministri Albin Kurti. Ndërkohë, pritet ta vizitojnë edhe liderët e partive politike dhe përfaqësues të tjerë t ëinstitucioneve.