Author: ATVLive

Organizata e Veteranëve të Luftës së Ushtrisë Çlirimtare të Kosovës ka bërë thirrje për hetimin e gjyqtarit Agim Kuçi i cili vitin e kaluar e liroi nga masa e arrestit shtëpiak Enver Sekiraqën.

Sipas një reagimi publik të organizatës së veteranëve të luftës, Enver Sekiraqa dyshohet se ka dëshmuar në Gjykatën Speciale në Hagë.

Nga OVL e UÇPK-së, thuhet se, dyshohet se Sekiraqa nga lirimi i tij ka përfituar ‘‘për të dhënë dëshmi në Gjykatën Speciale në Hagë, në procese që zhvillohen kundër ish-pjesëtarëve të Ushtrisë Çlirimtare të Kosovës’’.

Tutje, nga OVL kërkohet që të ketë hetim të menjëhershëm ndaj gjyqtarit në fjalë dhe të gjithë atyre që kanë kontribuar në këtë vendim skandaloz, dhe që gjithashtu të qartësohet urgjentisht nëse Enver Sekiraqa ka dëshmuar në Hagë.

Komunikata:

Organizata e Veteranëve të Luftës së Ushtrisë Çlirimtare të Kosovës shpreh shqetësimin e thellë dhe indinjatën publike lidhur me veprimet e papërgjegjshme të gjyqtarit Agim Kuçi, i cili mori vendim të njëanshëm për lirimin nga masa e arrestit shtëpiak të Enver Sekiraqës, person i dënuar për nxitje të vrasjes së heroit të policisë, Triumf Riza, dhe me histori të përsëritur të veprave kriminale.

Vendimi i gjyqtarit Kuçi jo vetëm që bie ndesh me parimet e drejtësisë dhe sigurisë publike, por ka ngritur dyshime serioze se me këtë veprim është lehtësuar ikja e Sekiraqës jashtë Kosovës. Sipas raportimeve të shumta mediatike, ekziston dyshimi se ky individ ka përfituar nga ky vendim i paprecedent për të dhënë dëshmi në Gjykatën Speciale në Hagë, në procese që zhvillohen kundër ish-pjesëtarëve të Ushtrisë Çlirimtare të Kosovës,bashkëluftëtarëve tanë.

Organizata e Veteranëve të UÇK-së e sheh këtë si një akt të rëndë dhe të qëllimshëm që mund të interpretohet si pjesë e një skenari të mirëkoordinuar kundër luftës sonë çlirimtare dhe vlerave që përfaqëson ajo. Të japësh liri një personi me të kaluar kriminale, i cili më herët ka shkelur masat e arrestit, është jo vetëm papërgjegjësi profesionale, por edhe cenim i drejtësisë dhe sigurisë kombëtare.

OVL e UÇK-së kërkon hetim të menjëhershëm dhe të plotë ndaj gjyqtarit në fjalë dhe të gjithë atyre që kanë kontribuar në këtë vendim skandaloz. Gjithashtu, kërkojmë nga institucionet përgjegjëse të qartësojnë urgjentisht nëse Enver Sekiraqa ka dëshmuar në Hagë dhe çfarë ndikimi kanë pasur veprimet e tij në proceset që zhvillohen kundër bashkëluftëtarëve tanë.

Lufta e Ushtrisë Çlirimtare të Kosovës ka qenë e drejtë, e pastër dhe mbështetur në vullnetin e popullit. Nuk do të lejojmë që ajo të njolloset përmes manovrave të tilla të ulëta që dëmtojnë besimin në drejtësi dhe cenojnë nderin e atyre që luftuan për liri.

Organizata e Veteranëve të Luftës së UÇK-së

Pakistani të enjten ua anuloi vizat të gjithë shtetasve indianë, e mbylli hapësirën e vet ajrore për të gjitha kompanitë ajrore në pronësi indiane ose të operuara nga India si dhe e pezulloi tërë tregtinë me vendin fqinj, përfshirë edhe atë që kryhet përmes vendeve të treta.

Masat hakmarrëse vijnë pas vendimit të Indisë për t’ua pezulluar vizat shtetasve pakistanezë pas një sulmi vdekjeprurës nga persona të armatosur në Kashmir, ku u vranë 26 njerëz, kryesisht turistë, raporton agjencia e lajmeve “Associated Press”.

Tensionet mes Indisë dhe Pakistanit ishin të larta të enjten, përderisa New Delhi po zhvillon një ofensivë diplomatike kundër Islamabadit, duke e fajësuar për sulmin në Kashmir. Ky rast bie ndesh me pretendimin e Indisë për qetësi në një rajon të kontestuar, ku kryengritja e përgjakshme kundër pushtetit indian ka qenë duke vazhduar me dekada.

Sulmi ndaj civilëve e tmerroi Indinë dhe nxiti thirrje për veprim kundër fqinjit rival. Qeveria indiane nuk paraqiti publikisht ndonjë dëshmi që e lidh këtë sulm me Pakistanin, por tha se rasti ka lidhje “matanë kufirit” me Pakistanin. Pakistani ka mohuar se ka ndonjë lidhje me sulmin.

Përgjegjësinë për këtë sulm e mori një grup që deri më tani ishte i panjohur. Grupi e quan veten Rezistenca e Kashmirit.

Në një deklaratë të lëshuar të enjten, Ministria e Jashtme e Indisë tha se të gjitha vizat që u janë lëshuar shtetasve pakistanezë do të shfuqizohen me efekt nga dita e diel. Kjo ministri gjithashtu i këshilloi shtetasit indianë që të mos udhëtojnë në Pakistan.

India dhe Pakistani administrojnë nga një pjesë të Kashmirit, por të dyja vendet pretendojnë se i tërë rajoni është i tyre. India e përshkruan tërë militantizmin në Kashmir si terrorizëm të mbështetur nga Pakistani, i cili mohon një gjë të tillë./Nacionale

Disa banorë të Stambollit e kanë kaluar natën jashtë, nga frika e kthimit në shtëpitë e tyre, pas një tërmeti të fortë dhe mbi 180 pasgoditje.

Emriye Toklu dhe familja e saj kanë fjetur në një tendë në një park pranë shtëpisë së tyre.

“Ne ishim shumë të frikësuar nga tërmeti. Tepër të frikësuar. Nuk ishim në gjendje të ktheheshim brenda”, ka thënë ajo për Associated Press, duke shtuar se po përpiqej të bindte nipërit e saj të ktheheshin në shtëpi nga frika e goditjeve të mëtejshme, raporton AP.

Lëkundjet e tërmetit me magnitudë 6.2 që ka goditur të mërkurën kanë krijuar panik në qytetin më të madh të Turqisë, me 16 milionë banorë, ndërkohë që nuk ka pasur raportime për dëme serioze.

Tërmeti kishte një thellësi prej 10 kilometrash, sipas Shërbimit Gjeologjik të Shteteve të Bashkuara, me epiqendrën e tij rreth 40 kilometra në jugperëndim të Stambollit, në Detin Marmara.

Është ndjerë në disa krahina fqinje.

Të paktën 236 persona janë trajtuar për lëndimet që kanë pësuar ndërsa përpiqeshin të hidheshin nga ndërtesat ose për sulme paniku. Shumica e të lënduarve ishin në Stamboll, ku banorët mbeten të shqetësuar për shkak se qyteti konsiderohet në rrezik të lartë për një tërmet të madh.

Nga frika e një tërmeti më të fortë që mund të shkatërronte shtëpitë, banorët kanë kërkuar strehim duke fjetur në veturat e tyre ose duke ngritur tenda në parqe dhe hapësira të tjera të hapura. Shumë prej tyre kishin ndezur zjarre kampi për t’u ngrohur pas uljes së temperaturës.

Turqia përshkohet nga dy linja të mëdha thyerjeje dhe tërmetet janë të shpeshta.

Për shumë njerëz, kujtimi i një tërmeti shkatërrues që ka goditur 11 provinca jugore dhe juglindore dy vjet më parë, mbetet i gjallë.

Tërmeti 7.8 ballë i 6 shkurtit 2023, ka marrë më shumë se 53,000 jetë dhe ka dëmtuar ose shkatërruar qindra mijëra ndërtesa. 6.000 njerëz të tjerë kanë vdekur në pjesët veriore të Sirisë fqinje.

Agjencia e menaxhimit të fatkeqësive dhe emergjencave, AFAD, ka thënë se tërmeti i së mërkurës është pasuar nga 184 pasgoditje, shtatë prej tyre me magnitudë 4 ose më të fortë.

Zyra e BE-së në Kosovë dhe WeBalkans kanë organizuar nisjen e konkursit rajonal për fotografi rinore “Përgatitu Gati Evropa jonë!”, raporton EO.

Shefi i Zyrës së BE-së, ambasadori Aivo Orav, e ka quajtur këtë konkurs, një ftesë të hapur për të treguar se si sporti i lidh njerëzit.

Ai ka thënë se është i lumtur që ky konkurs nisi në Kosovë, “një vend që ka shumë talent dhe kreativitet”.

I bindur se shumë nga fotot do të vijnë nga rinia, Orav, pati edhe një porosi për ta: “dijeni se ajo ka potencialin që të shfaqet në gjithë Evropën”.

“Po lansojmë një kampanjë që reflekton se kush jemi dhe Evropën që po e formësojnë së bashku, gjithëpërfshirëse, të bashkuar dhe plot me potencial. Të gatshme dhe të qëndrueshme – Evropën tonë.

Ky konkurs është një ftesë e hapur për të treguar se si sporti i lidh njerëzit, si ndërton ura, lartëson komunitetet. Duam t’i shohim storjet tuaja.

Fotot flasin më shumë se fjalët! Jam i lumtur që Kosova po e mban këtë lansim sot, një vend që ka shumë talent dhe kreativitet. Jam i bindur se shumë nga fotot do të vijnë nga rinia.

Kur ta dërgoni foton tuaj, dijeni se ajo ka potencialin që të shfaqet në gjithë Evropën”, tha Orav.

Komuna e Mitrovicës Veriore, ka njoftuar se ka filluar aplikimi për legalizimin e ndërtimeve pa leje.

Kjo komunë ka ftuar të gjithë qytetarët që kanë ndërtime pa leje të kategorisë I dhe II të paraqesin aplikimin e tyre brenda afateve të përcaktuara.

“Komuna është organi kompetent për pranimin dhe trajtimin e aplikimeve për legalizimin e ndërtimeve të kategorisë I dhe II. Ftohen të gjithë qytetarët që kanë ndërtime pa leje të kësaj kategorie, të paraqesin aplikimin e tyre brenda afateve të përcaktuara”, thuhet në njoftim.

Në këtë njoftim janë publikuar edhe linqet nga faqja zyrtare e Komunës së Mitrovicës Veriore.

Kosova mbetet një shembull i mundësisë për të ndërtuar një shtet demokratik nga hiri i luftës, me institucione të forta dhe vlera euroatlantike, tha presidentja e vendit, Vjosa Osmani para studentëve të Universitetit të Helsinkit derisa po qëndron në vizitë zyrtare në Finlandë.

Ajo nderoi kontributin e ish-presidentit finlandez, Martti Ahtisaari dhe popullit të Finlandës në rrugëtimin e Kosovës drejt pavarësisë, duke theksuar se “ata qëndruan përkrah në momentet kyçe historike”.

“Ndër zërat që qëndruan përkrah nesh ishte një nga liderët më të mëdhenj të Finlandës, presidenti Ahtisaari, i cili qëndroi krah për krah me ne ndërsa shkruanim historinë tonë si shtet sovran, demokratik dhe i pavarur. Dhe nuk ishte vetëm ai. Populli i Finlandës qëndroi me ne, duke kuptuar shumë mirë se çfarë do të thotë të luftosh dhe të sakrifikosh për lirinë tënde. Prandaj Kosova gjithmonë do ta nderojë këtë trashëgimi vizionare, sepse siç besonte dhe dëshmoi presidenti Ahtisaari, të gjithë kanë të drejtën të shihen dhe të dëgjohen. Sot, përballemi me shumë nga të njëjtat sfida si çdo demokraci tjetër evropiane. Por Kosova ende qëndron si një fener i asaj që është e mundur. Ajo që është e mundur kur një popull e drejton vështrimin nga e ardhmja. Ne kemi ndërtuar institucione të forta demokratike, një ekonomi të udhëhequr nga të rinjtë dhe një politikë të jashtme të ankoruar fort në vlerat euroatlantike. Kemi treguar se nga hiri i luftës, një popull mund të ngrihet, ashtu siç e dëshmoi dikur edhe Finlanda se qëndrueshmëria është më e fuqishme se shtypja”, tha Osmani.

Para studentëve, Osmani rikujtoi rrugëtimin e vështirë të Kosovës drejt një shteti të lirë dhe demokratik, të formuar përmes sakrificave dhe rezistencës kundër regjimit gjenocidal të Millosheviqit.

Vizionin e Kosovës e përshkroi si të lidhur ngushtë me integrimin në BE dhe NATO, si pjesë e një Evrope të bashkuar dhe paqësore.

“Të qenit këtu në Finlandë më kujton sa shumë kemi të përbashkëta si popuj. Edhe nëse historitë tona janë shkruar në gjuhë të ndryshme, ato janë të lidhura nga aspirata universale: e drejta e çdo kombi, e çdo qytetari për të jetuar në liri dhe dinjitet. Është po kjo aspiratë që e përkufizon historinë e Kosovës dhe që ka frymëzuar gjithmonë vizionin tonë. Një vizion për një Kosovë të integruar plotësisht në Bashkimin Evropian dhe NATO si sisteme të bazuara në vlera. Një Kosovë që kontribuon aktivisht për paqen, stabilitetin dhe prosperitetin, jo vetëm në rajonin tonë, por në shtëpinë tonë të përbashkët evropiane. Ky rrugëtim drejt lirisë, dinjitetit dhe demokracisë u formësua nga sakrifica afatgjatë, jo nga fati. Ai u farkëtua përmes vuajtjeve të paimagjinueshme gjatë regjimit brutal gjenocidal të Millosheviqit dhe shumë viteve të pushtimit dhe shtypjes. Ai u farkëtua kur fëmijët dhe të rinjtë e Kosovës u mohuan sistematikisht qasjen në arsim. Kur shkollat dhe universitetet u mbyllën për ne, dhe vetë mësimi e studimi u bënë një akt rezistence. Kjo ishte historia e të gjithëve në Kosovë dhe ishte po ashtu edhe historia ime”, tha Osmani.

E para e vendit nënvizoi rikthimin e ideologjive agresive dhe theksoi rëndësinë e unitetit dhe angazhimit të përbashkët për një Evropë të lirë dhe paqësore.

“Sot, ndërsa jemi dëshmitarë të rikthimit të ideologjive agresive, ekspansioniste dhe imperialiste, duhet të riafirmojmë të gjithë angazhimin tonë për një Evropë të lirë dhe në paqe. Kjo është e mundur vetëm nëse vende si Kosova dhe Finlanda vazhdojnë të flasin. Duhet, siç tashmë bëjmë, të ngremë zërin kundër ambicieve gjithnjë në rritje territoriale të Rusisë. Kundër mendësisë së saj gjenocidale dhe kundër përpjekjeve të saj për të destabilizuar arritjet tona demokratike të përbashkëta dhe mënyrën tonë të jetesës. Sigurisht, pikërisht sepse të dyja vendet tona e dinë çmimin e lartë që paguhet për lirinë, kemi qëndruar përkrah Ukrainës që nga dita e parë e agresionit të Rusisë. Por, po aq e rëndësishme sa është të luftojmë ambiciet e Rusisë, është të kuptojmë se ajo përdor edhe shtete proxy për t’i ndjekur ato qëllime. Në rajonin tonë, Rusia po përdor aktivisht Serbinë si një proxy për të minuar gjithçka që ne, bashkë me aleatët tanë, kemi ndërtuar me aq mund dhe gjithçka që vazhdojmë të ndërtojmë çdo ditë”, theksoi Osmani.

Vizita e Osmani në Helsinki ka nisur të mërkurën më 23 prill. Ajo është pritur me nderime nga homologu i saj finlandez, Alexander Stubb.

Gjatë këtij takimi, ata diskutuan për forcimin e partneritetit Kosovë-Finlandë dhe avancimin e bashkëpunimit në dobi të qytetarëve të dy vendeve.

Osmani theksoi se ky angazhim i përbashkët është i rëndësishëm për rrugëtimin euroatlantik të Kosovës./kp

Presidenti rus Vladimir Putin vendosi të mos marrë pjesë në funeralin e Papa Françeskut në sheshin e Shën Pjetrit në Romë.

Një nga arsyet kryesore që qëndron pas këtij bojkoti ishte frika nga një arrestim i mundshëm për shkak të urdhrit ndërkombëtar të lëshuar kundër tij nga Gjykata Penale Ndërkombëtare (GJNP) në mars të vitit 2023.

Megjithatë, në praktikë, presidenti rus rrezikonte shumë pak. Ministria italiane e Drejtësisë nuk ka ndërmarrë asnjë hap për të zbatuar urdhrin e gjykatës së Hagës.

Urdhri i arrestimit ka mbetur i bllokuar në zyrat e Via Arenula dhe nuk i është përcjellë Prokurorisë së Përgjithshme të Romës, një procedurë e nevojshme për ta bërë atë të vlefshëm për ekzekutim. Kjo e ka kthyer dokumentin në një “copë letre” pa efekt ligjor.

Precedenti i mëparshëm me arrestimin dhe lirimin e gjeneralit libian Osama Najeem Almasri në janar të këtij viti ka rritur më tej dyshimet për moszbatim të qëllimshëm të urdhrave nga Italia. Në atë rast, autoritetet italiane nuk morën një vendim të qartë dhe për pasojë, Almasri u kthye në atdhe me një fluturim zyrtar, megjithë akuzat për krime lufte dhe krime kundër njerëzimit.

Tani, për këtë rast, ministri italian i Drejtësisë, Carlo Nordio, përballet me një hetim nga gjykata e ministrave – bashkë me Kryeministren Giorgia Meloni dhe disa zyrtarë të tjerë të lartë – për moskryerjen e detyrës zyrtare.

Një vendim i qëllimshëm politik?

Sipas raportimeve, bllokimi i urdhrit të GJNP-së ndaj Putinit është një zgjedhje e qëllimshme politike. Qeveria italiane ka deklaruar se shefat e shteteve dhe qeverive gëzojnë imunitet diplomatik për aq kohë sa janë në detyrë – një qëndrim që bie ndesh me interpretimin e Gjykatës së Hagës, e cila nuk e njeh imunitetin për krime lufte, krime kundër njerëzimit apo gjenocid.

Përveç Putinit, në listën e të kërkuarve të GJNP-së janë edhe disa zyrtarë të lartë rusë, përfshirë Komisioneren për të Drejtat e Fëmijëve Maria Lvova-Belova dhe ish-ministrin e Mbrojtjes Sergei Shoigu. Por edhe këto urdhra kanë mbetur të pazbatuar në Itali.

Akuza të rënda ndaj Putinit

Presidenti rus akuzohet për deportimin dhe ndalimin e paligjshëm të fëmijëve ukrainas drejt Rusisë – veprime që klasifikohen si krime lufte sipas Statutit të Romës, që themeloi GJNP-në. Për zyrtarët e tjerë, akuzat lidhen me sulme me raketa kundër infrastrukturës civile në Ukrainë gjatë viteve 2022–2023.

Ndërkohë, Italia vijon të mos i zbatojë kërkesat e Gjykatës Penale Ndërkombëtare, duke rrezikuar përkeqësimin e marrëdhënieve me Hagën dhe reputacionin e saj në arenën ndërkombëtare të drejtësisë.

Emisari i Bashkimit Evropian për dialogun Kosovë-Serbi, Peter Sorensen tha se vizita e tij në Kosovë është në kuadër të ushtrimit të mandatit të tij. Pas takimit me kreun e ekipit negociator të Kosovës, zëvendëskryeministrin në detyrë, Besnik Bislimi, diplomati danez tha se do udhëtojë për në Beograd.

“Sot jam në Prishtinë si pjesë e ushtrimit të mandatit. Ekipi im dhe unë jemi duke zhvilluar vizita në nivel pune – kjo është një pjesë e zakonshme e misionit tonë, dhe do të shihni edhe vizita të tjera të ngjashme në të ardhmen. Jam shumë i lumtur që jam këtu. Nga këtu do të vazhdoj për në Beograd, dhe më pas do të kthehem në Bruksel. Kaq për tani”, tha Sorensen.

Takimi i Sorensenit me Bislimin është zhvilluar në ndërtesën e Qeverisë së Kosovës dhe ka zgjatur më shumë se një orë./

Dënimi i “revolucionit me ngjyra” dhe “pushteteve perëndimore”, bashkë me dëshirën që Serbia t’i bashkohet botës ruse, ishin mesazhet që kreu i Kishës Ortodokse Serbe, Porfirije, ia përcolli presidentit të Rusisë, Vladimir Putin.

Porfirije, përveç falënderimeve ndaj Putinit për mbështetjen, foli edhe për Kosovën, Republikën Sërpska dhe Malin e Zi, duke thënë se qëndrimi i Serbisë varet nga qëndrimi i Rusisë.

Gjatë takimit në Kremlin, më 22 prill, ku morën pjesë edhe kreu i Kishës Ortodokse Ruse, Kirilli, dhe mitropoliti i Baçkës, Irineji, u fol për dashurinë ndaj Rusisë që është “e ngulitur gjenetikisht në popullin serb” dhe për “punët djallëzore” të Perëndimit.

Ai ia përcolli Putinit përshëndetjet e Aleksandar Vuçiqit dhe konfirmoi se presidenti i Serbisë do të jetë në Moskë më 9 maj.

Analisti i politikës së jashtme, Boshko Jakshiq, vlerëson për Radion Evropa e Lirë se vizita e kreut të Kishës Ortodokse Serbe në Moskë është “shumë më tepër sesa një gjest”.

“Konfirmimi i tij se Vuçiqi do të vijë në Moskë nënkupton se ai është takuar me të para se të nisej dhe se, me gjasë, ka marrë udhëzime, kërkesa ose lutje që të ndërhyjë tek Vladimir Putini për ta shpëtuar Vuçiqin nga ajo që ai e quan ‘revolucion me ngjyra’”, tha Jakshiq.

Ai shtoi se vizita e Vuçiqit në Moskë do të ketë “pasoja serioze për pozicionin gjeostrategjik të vendit”.

Pavarësisht paralajmërimeve të shpeshta nga Brukseli dhe synimit të deklaruar për anëtarësim në BE, Beogradi vazhdon bashkëpunimin me Moskën dhe refuzon t’i bashkohet sanksioneve kundër Rusisë për shkak të pushtimit të Ukrainës.

Çfarë u tha në Moskë për protestat studentore?

Kreu i Kishës Ortodokse Serbe përsëriti mesazhet e pushtetit në Beograd, i cili protestat studentore disa mujore – që kërkojnë përgjegjësi për vdekjen e 16 personave në një aksident në Novi Sad – i quan “revolucion me ngjyra”.

“Shpresoj që ta kalojmë këtë sprovë. Sepse e dimë dhe e ndiejmë se qendrat e pushteteve nga Perëndimi nuk dëshirojnë zhvillimin e identitetit dhe kulturës së popullit serb. Lutjet tona janë gjithmonë me ju dhe shpresoj që Zoti do t’ju ndihmojë”, i tha Porfirije presidentit rus.

Për “përpjekjet për rrëzim të shtetit”, autoritetet në Serbi fajësojnë shërbime të paemëruara perëndimore, ndërsa nga Moska ka ardhur disa herë mbështetje për t’iu kundërvënë “revolucionit me ngjyra”.

Me këtë term përshkruhen protestat që rrëzuan regjime autoritare në republikat ish-sovjetike.

Mbështetje për autoritetet serbe kanë dhënë edhe hetues të Shërbimit Federal të Sigurisë së Rusisë (FSB).

Pas akuzave se gjatë protestës masive më 15 mars në Beograd u përdor top zanor, i cili është i ndaluar në protesta, FSB-ja pas një hetimi në Serbi erdhi në përfundim se autoritetet nuk e kishin përdorur atë.

Në videon e takimit të publikuar në faqen zyrtare të Kremlinit, vetë Putini nuk iu përgjigj drejtpërdrejt komenteve të patriarkut për “revolucionin me ngjyra”, por tha se “e di që situata në Ballkan nuk është e thjeshtë” dhe se Rusia është e vetëdijshme për përpjekjet e kreut të Kishës Ortodokse Serbe për ta “forcuar pozicionin e Serbisë”.

Teologu Vukashin Milliqeviq vlerëson se gjuha e përdorur nga patriarku tregon se ai nuk shkoi në Moskë si përfaqësues i Kishës Ortodokse Serbe apo popullit serb, por “vetëm si përfaqësues i regjimit”.

“Ka gjithnjë më shumë zëra brenda vetë kishës që dalin hapur, të udhëhequr nga ndërgjegjja dhe besnikëria ndaj vlerave të krishtera, dhe besoj se vala e ndryshimeve që falë studentëve ka prekur Serbinë, do të prekë edhe Kishën Ortodokse Serbe”, tha Milliqeviq.

Protestat studentore kanë ndarë zyrtarët e Kishës Serbe.

Ndërsa drejtuesit e kishës me mesazhet nga Moska dolën hapur në krah të pushtetit, një pjesë e klerikëve të Kishës Ortodokse Serbe mbështeti studentët.

“Dihet që gjithmonë ka përvëluar ajo përplasja mes krahut konservator dhe atij liberal të kishës. Konservatorët ishin tani në Moskë. Krahu liberal u dëgjua në Munih kur peshkopi Grigorije mbajti fjalimin e mirëseardhjes për studentët që shkuan me biçikleta”, thotë Boshko Jakshiq.

Vuçiq në vizitën e parë në Moskë që nga pushtimi i Ukrainës

Presidenti rus deklaroi se Kisha Ortodokse Serbe jep një kontribut të rëndësishëm për forcimin e marrëdhënieve mes popullit rus dhe atij serb, duke thënë se ato gjithmonë kanë “karakter të veçantë”.

“Kjo është, ndër të tjera, sepse na lidhin rrënjë të fuqishme, të thella të përbashkëta shpirtërore. Gjithmonë na vjen mirë t’ju shohim”, tha Putini.

Ai tha se presidenti i Serbisë, Aleksandar Vuçiq, pritet në Moskë më 9 maj në ceremonitë për Ditën e Fitores.

Porfirije, përmes përshëndetjeve të presidentit serb, konfirmoi se Vuçiq do të jetë më 9 maj në Moskë “pavarësisht rrethanave në Evropë dhe gjetkë”.

Vizitën e parë në Rusi që nga nisja e agresionit ushtarak të Kremlinit ndaj Ukrainës, presidenti i Serbisë e njoftoi në fillim të marsit, pas një bisede telefonike me Putinin.

Në deklaratat e mëvonshme, Vuçiq këmbënguli se nuk do ta ndryshojë vendimin për të udhëtuar, pavarësisht se Perëndimi, siç tha, mund të përgjigjet me ndonjë lloj sanksionesh.

“Është një çështje e madhe nëse Vuçiq me të vërtetë e dëshiron Serbinë në BE, apo dëshiron ta afrojë më shumë me Lindjen dhe nesër të na ofrojë BRIKS-un në vend të Bashkimit Evropian”, thotë analisti Boshko Jakshiq.

Ai shton se presidenti i Serbisë “do të kishte shmangur kritikat edhe nga Perëndimi edhe nga Lindja” nëse, në vend të udhëtimit në Moskë, do të organizonte kremtimin e Ditës së Fitores mbi fashizmin në Beograd.

“Por, ai zgjodhi Lindjen”, thotë Jakshiq.

Si kandidat për anëtarësim në BE, Serbia që nga dhjetori 2021 nuk ka hapur asnjë kapitull negociues.

Procesi ka ngecur për shkak të refuzimit për të harmonizuar politikën e jashtme me atë të BE-së dhe për të vendosur sanksione ndaj Rusisë për pushtimin e Ukrainës.

Brukseli i kërkon Beogradit edhe përparim në sundimin e ligjit dhe në dialogun me Kosovën.

“Bota serbe dhe ajo ruse” në sytë e kreut të Kishës Serbe

Kreu i Kishës Ortodokse Ruse, Kirilli, tha gjatë takimit në Kremlin se dashuria ndaj popullit dhe Kishës ruse është “organikisht e përfshirë në kulturën e Serbisë, në popullin serb”.

“Disa vende sllave, pa i përmendur, nën ndikimin e fuqive të fuqishme militariste perëndimore, përkohësisht e ndryshuan orientimin, pastaj u penduan, por e ndryshuan. Serbët nuk e kanë ndryshuar kurrë”, tha Kirilli.

Ai shtoi se ajo që po ndodh me moralin dhe etikën njerëzore në Perëndim është një “punë djallëzore”.

Pasi Porfirije u pajtua, Kirilli sqaroi se “qëllimi i djallit është që njeriu të humbasë dallimin mes të mirës dhe të keqes”.

Patriarku Porfirije, i cili foli në rusisht në Kremlin me ndihmën e mitropolitit të Baçkës Irinejit, deklaroi se populli serb e sheh popullin rus si të vetin.

Ai citoi fjalët e patriarkut të mëparshëm Irinej, i cili thoshte se “barka e vogël serbe, duke lundruar në një det të trazuar, duhet të jetë gjithmonë e lidhur pas anijes së madhe ruse”.

“Qëndrimi ynë për Kosovën, Republikën Serbe dhe Malin e Zi, e konsideroj dhe e ndiej se varet edhe nga qëndrimi i Federatës Ruse në nivel global. Dëshira ime, dhe e shumicës në Kishën tonë, është që në të ardhmen, nëse ndodh një rigrupim i ri gjeopolitik, të jemi pranë atij rrethimi rus, në botën ruse”, tha Porfirije.

Këtë mesazh e komentoi zyrtarisht edhe Prishtina edhe Podgorica.

Ministrja në detyrë e Punëve të Jashtme të Kosovës, Donika Gërvalla, tha se deklaratat e Porfirijes në Moskë cenojnë sovranitetin e Kosovës dhe nxisin përçarje në të gjithë rajonin.

“Fjalët e Porfirijes nuk janë fjalë pa peshë – ato përçojnë një vizion për të kaluarën, jo për të ardhmen. E ardhmja e rajonit nuk ndërtohet mbi nostalgjinë për dominim e konflikt, por mbi respektin dhe bashkëjetesën”, shkroi ajo ne Facebook.

“Presim reagim të qartë nga Bashkimi Evropian, si ndërmjetësues i dialogut Kosovë–Serbi. Heshtja ndaj deklaratave që minojnë paqen dhe nxisin urrejtje nuk është neutralitet — është normalizim i gjuhës së urrejtjes”, shtoi Gërvalla.

Ministria e Punëve të Jashtme të Malit të Zi i cilësoi deklaratat e patriarkut serb si “të papërshtatshme dhe të papranueshme”.

Nga ministria u tha se çështjet shtetërore janë ekskluzivisht kompetencë e institucioneve të Malit të Zi, që është shtet laik, anëtar i NATO-s dhe kandidat për anëtarësim në BE.

“Porfirije i përcolli Putinit lavde për mbështetjen ndaj Kosovës, Republikës Serbe dhe popullit serb në Mal të Zi, dhe më pas, më duket se hyri drejtpërdrejt në një territor që duhej t’i ishte i ndaluar në një vend nominalisht laik. Ai nuk ishte mesazh i një njeriu të Zotit, por i një njeriu të Vuçiqit”, vlerëson Boshko Jakshiq.

Teologu Vukashin Milliqeviq mesazhet e kreut të Kishës Serbe në Moskë i cilëson si të papërgjegjshme.

“Kur bëhet fjalë për mënyrën se si politika e jashtme ruse dhe ndikimi i tyre në përgjithësi reflektohet në rajonin tonë, nuk ka asnjë dyshim se ai është destruktiv, sepse është e qartë që Rusisë i konvenon hapja e sa më shumë pikave të konfliktit”, tha Milliqeviq.

Parlamenti Evropian në mars 2022 shprehu shqetësimin për “përpjekjet e Kishës Ortodokse në Serbi, Mal të Zi dhe në entitetin e Bosnjë-Hercegovinës, Republika Serbe, për ta promovuar Rusinë si mbrojtëse të vlerave tradicionale familjare dhe për të forcuar lidhjet mes shtetit dhe Kishës”.

Eurodeputetët e dënuan me një rezolutë përpjekjen e Rusisë për të shfrytëzuar tensionet etnike në Ballkanin Perëndimor “për të nxitur konflikte dhe ndarje mes komuniteteve”. /Radio Evropa e Lirë