Author: A.M.

Kupa e Botës 2026, e cila do të zhvillohet në SHBA, Kanada dhe Meksikë, pritet të shënojë fundin e një epoke për Didier Deschamps në krye të kombëtares së Francës, duke përmbyllur një periudhë 14-vjeçare të mbushur me suksese.

Sipas raportimeve të RMC Sport, trajneri francez nuk ka ndërmend të tërhiqet nga futbolli dhe është i hapur për një rikthim në nivel klubesh. Një nga opsionet e mundshme për të ardhmen e tij mund të jetë Real Madrid.

Deschamps ka udhëhequr Francën drejt triumfit në Kupën e Botës 2018 dhe deri në finalen e Kupës së Botës 2022. Ai ka njoftuar më herët se turneu i vitit 2026 do të jetë i fundit i tij në drejtimin e kombëtares.

Sipas të njëjtit raport, ai ndodhet në listën e ngushtë të kandidatëve për të zëvendësuar trajnerin aktual të Real Madridit, për shkak të përvojës së tij të madhe, aftësive në menaxhimin e grupit dhe suksesit në garat madhore.

Një tjetër faktor që e bën Deschamps një emër tërheqës për klubin madrilen është edhe marrëdhënia e tij me lojtarë si Kylian Mbappé, Aurélien Tchouaméni dhe Eduardo Camavinga, të cilët tashmë janë pjesë e skuadrës së “Los Blancos”.

Megjithatë, e ardhmja e tij mbetet e hapur, pasi për të interesim kanë shprehur edhe klube të tjera evropiane, si dhe disa skuadra nga Arabia Saudite

E ardhmja e mesfushorit të Bernardo Silva te Manchester City vazhdon të jetë në dyshim, pasi trajneri Pep Guardiola ka pranuar se ende nuk ka marrë asnjë njoftim zyrtar nga lojtari për një largim të mundshëm.

Guardiola u shpreh se, pavarësisht marrëdhënies së mirë me Silvën, ai nuk ka marrë asnjë sinjal të qartë për vendimin e tij, duke theksuar se dëshiron të jetë i pari që informohet nëse lojtari vendos të largohet nga klubi.

Kontrata e Silvës skadon në fund të sezonit, çka ka shtuar spekulimet për një transferim të mundshëm gjatë verës. Në media janë përmendur klube si FC Barcelona dhe Juventus, si dhe interesa nga liga të tjera jashtë Evropës.

Silva, i cili është pjesë e Cityt që nga viti 2017, ka qenë një nga lojtarët kyç të suksesit të klubit në vitet e fundit, duke fituar trofe të shumtë në Angli dhe Evropë.

Për momentin, e ardhmja e tij mbetet e hapur, ndërsa vendimi pritet të qartësohet në javët ose muajt në vijim.

Sezoni i rregullt në Superligën e Kosovës në basketboll u mbyll pas 28 xhirove të mbushura me ndeshje dramatike, emocione dhe paraqitje të forta individuale që e bënë këtë edicion një nga më të veçantët e viteve të fundit.

Në xhiron e fundit, spikati Jericole Hellems i Vëllaznimit, i cili në ndeshjen ndaj Pejës realizoi 22 pikë, 8 kërcime dhe 8 asistime, duke arritur indeksin më të lartë të javës (30). Ai ka qenë një nga lojtarët kryesorë të skuadrës gjakovare gjatë gjithë sezonit.

Trepça arriti fitore ndaj Sigal Prishtinës, ku u dalluan Akili Vining dhe Drilon Hajrizi. Vining regjistroi 22 pikë, 3 kërcime dhe 9 asistime, ndërsa Hajrizi kontribuoi me 19 pikë, 7 kërcime dhe 1 asistim.

Bashkimi triumfoi ndaj Borës, në një ndeshje pa ndikim në renditje, me Jalen Riley që ishte më i miri në parket me 22 pikë, 5 kërcime dhe 5 asistime.

Rahoveci 029 siguroi një nga fitoret më të rëndësishme të sezonit, duke mposhtur Golden Eagle Yllin pas vazhdimeve. Në këtë duel u dallua Kentrell Pulliam me 25 pikë, 7 kërcime dhe 6 asistime.

Në përfundim të javës, Jericole Hellems u shpall lojtari më i mirë (MVP), falë paraqitjes së tij të kompletuar me 22 pikë, 8 kërcime dhe 8 asistime, si dhe indeksit 30.

Top 5-shja e javës u plotësua nga Jalen Riley, Akili Vining, Drilon Hajrizi dhe Kentrell Pulliam, të cilët gjithashtu patën performanca shumë të mira në ndeshjet përkatëse

Kupa e Botës ende nuk ka filluar, por debati për çmimet e biletave po bëhet gjithnjë e më i nxehtë. Sipas raportimeve të Associated Press, FIFA ka rritur sërish kostot për ndjekjen e ndeshjeve nga stadiumi, duke shtuar një kategori të re biletash më ekskluzive.

Bëhet fjalë për vendet “e rreshtit të parë”, të cilat konsiderohen si më premium në stadium dhe ofrojnë pozicionin më të afërt me fushën. Çmimi i tyre shkon deri në 4.105 dollarë, duke e bërë këtë një nga opsionet më të shtrenjta ndonjëherë për një ndeshje të Kupës së Botës.

Më herët, biletat e klasit të parë kishin arritur deri në 2.735 dollarë, por me këtë përditësim të ri, kostoja për tifozët që duan përvojën më të afërt me lojën është rritur ndjeshëm.

Rritja e çmimeve ka shtuar debatet rreth aksesueshmërisë së turneut për tifozët e zakonshëm.

Bayern Munich është përballur me një lajm jo të mirë në prag të ndeshjeve të rëndësishme të sezonit. Talenti i ri i skuadrës bavareze, Lenart Karl, ka pësuar një lëndim muskulor gjatë seancave stërvitore, duke vënë në pikëpyetje praninë e tij në sfidat e ardhshme.

Sipas informacioneve të para, Karl ka ndjerë shqetësime gjatë stërvitjes dhe pas ekzaminimeve mjekësore është konfirmuar një dëmtim në muskuj. Edhe pse stafi mjekësor i klubit ende nuk ka bërë të ditur kohëzgjatjen e saktë të rikuperimit, është pothuajse e sigurt se ai do të mungojë në ndeshjen e radhës ndaj St. Pauli, si dhe në përballjen shumë të rëndësishme kundër Real Madrid.

Mungesa e tij konsiderohet një goditje për Bayernin, pasi Karl është parë si një nga lojtarët më premtues të akademisë dhe një opsion i vlefshëm për trajnerin në rotacionin e skuadrës së parë. Aftësitë e tij teknike, shpejtësia dhe vizioni në lojë e kanë bërë atë të dallohet në paraqitjet e fundit, duke fituar besimin e stafit teknik dhe tifozëve.

Në një periudhë kur ndeshjet janë të ngjeshura dhe çdo detaj ka rëndësi, mungesa e një lojtari të ri me potencial si Karl mund të ndikojë në thellësinë e skuadrës. Megjithatë, Bayern Munich mbetet një ekip me alternativa të shumta dhe pritet që trajneri të bëjë rregullimet e nevojshme për të përballuar këto sfida.

Tani vëmendja është përqendruar te rikuperimi i lojtarit, me shpresën që ai të kthehet sa më shpejt në fushë dhe të vazhdojë zhvillimin e tij si një nga yjet e së ardhmes për klubin bavarez.

Skuadra e Los Angeles Lakers është rikthyer te fitorja në NBA pas tri humbjeve radhazi, duke mposhtur 119-103 Golden State Warriors në transfertë. LeBron James ishte më i miri në parket për Lakers, me 26 pikë të shënuara.

Fitore të lehtë siguroi edhe Houston Rockets, që falë 29 pikëve të Kevin Durant mposhti 113-102 Philadelphia 76ers.

Në Konferencën e Lindjes, New York Knicks triumfuan 112-106 ndaj Boston Celtics, në një përballje direkte për vendin e dytë. Dyshja Josh Hart – Jalen Brunson realizoi së bashku 51 pikë për ekipin nga Nju Jorku.

Ndërkohë, Toronto Raptors mundën 128-114 Miami Heat, në një sfidë ku shkëlqeu Brandon Ingram me 38 pikë.

Fitore në transfertë arriti edhe Chicago Bulls, që mposhtën 119-108 Washington Wizards. Më i dalluari për Bulls ishte Tre Jones me 31 pikë.

Pa shumë ndikim në renditje ishte edhe fitorja e Indiana Pacers, që mundën 123-94 Brooklyn Nets. Obi Toppin ishte realizuesi më i mirë me 26 pikë.

Real Madridi po planifikon një lëvizje të madhe në tregun e verës, duke vendosur në shënjestër talentin ofensiv Michael Olise. Drejtuesit e klubit besojnë se ai është profili ideal për të forcuar sulmin dhe për t’i dhënë skuadrës më shumë kreativitet dhe balancë në fazën ofensive.

Sipas burimeve pranë klubit, madrilenët janë të gatshëm të paraqesin një ofertë që kap shifrën e 150 milionë eurove, duke përfshirë edhe kartonin e Brahim Diaz si pjesë të marrëveshjes. Kjo lëvizje synon të bindë klubin aktual të lojtarit që të pranojë transferimin.

Ideja e drejtuesve është ndërtimi i një tresheje të frikshme sulmi, ku Olise do të bashkohej me Kylian Mbappé dhe Vinícius Junior. Një kombinim i tillë shihet si çelësi për dominim në arenën evropiane në vitet e ardhshme.

Nga ana tjetër, për të balancuar skuadrën dhe financat, priten edhe largime të rëndësishme gjatë verës. Disa lojtarë që nuk kanë bindur plotësisht mund të sakrifikohen për të hapur rrugë për afrime të reja.

Nëse kjo marrëveshje realizohet, do të ishte një nga transferimet më të bujshme të viteve të fundit dhe një sinjal i qartë i ambicieve të Real Madridit për të qëndruar në majën e futbollit evropian.

Albi Mall Superliga e Kosovës rikthehet me ndeshjet e xhiros së 28-të, duke premtuar emocione dhe përballje të forta në garën për titull dhe mbijetesë.

Programi hapet të shtunën me duelin mes Prishtinës së Re dhe Malishevës, një ndeshje ku të dyja skuadrat synojnë pikë të rëndësishme për objektivat e tyre sezonale.

Të dielën zhvillohen tri përballje njëkohësisht. Kampioni në fuqi Ballkani pret Gjilanin në një sfidë që pritet të jetë vendimtare për kreun e tabelës. Ndërkohë, Drita përballet me Ferizajn në Gjilan, ndërsa Llapi do të ketë punë me Drenicën në Podujevë, në një duel që mund të ndikojë ndjeshëm në pjesën e poshtme të renditjes.

Xhiroja mbyllet të hënën me ndeshjen mes Prishtinës dhe Dukagjinit në stadiumin “Fadil Vokrri”, ku vendasit synojnë rikthimin te fitorja para tifozëve të tyre.

Me sezonin që po hyn në fazën vendimtare, çdo pikë ka peshë të madhe dhe kjo xhiro pritet të sjellë zhvillime të rëndësishme në renditje.

Sipas mediave italiane si Gazzetta dello Sport dhe Tuttosport, trajneri italian ka rënë dakord për një kontratë të re dyvjeçare që do ta mbajë në Torino deri në verën e vitit 2028.

Spalletti, i cili iu bashkua Juventusit në muajin tetor me një marrëveshje afatshkurtër deri në fund të sezonit 2025/26, ka bindur drejtuesit e klubit me rezultatet dhe stabilitetin e sjellë në ekip.

Raportohet se ai do të përfitojë një pagë që varion nga 5 deri në 6 milionë euro në sezon, në varësi të bonuseve, ndërsa për pjesën e mbetur të këtij sezoni do të arkëtojë rreth 3 milionë euro.

Vendimi për rinovimin e kontratës u forcua pas rezultateve pozitive të Juventusit, përfshirë edhe fitoren bindëse ndaj Sassuolos në janar, e cila shënoi një moment kyç në ecurinë e ekipit.

Tashmë, përveç Spallettit, në fokusin e klubit janë edhe rinovimet e mundshme të kontratave për disa lojtarë kyç të mesfushës.

Vinicius Jr mund të jetë në rrugë drejt Premier League këtë verë, pas raportimeve mbi zhvillimet më të fundit lidhur me të ardhmen e tij.

Ylli i Real Madrid ka qenë prej kohësh në bisedime për rinovimin e kontratës, pa arritur ende një marrëveshje përfundimtare.

Kontrata aktuale skadon në vitin 2027, por për shkak të mungesës së progresit në negociata, raportohet se Manchester United është ndër klubet që synojnë të përfitojnë nga kjo situatë, duke përgatitur një lëvizje të bujshme për brazilianin.

Sipas TEAMTalk, përfaqësuesit e Vinicius Jr kanë kontaktuar Manchester United, si dhe Manchester City, Arsenal, Chelsea dhe Liverpool lidhur me një transferim të mundshëm gjatë verës për 25-vjeçarin. Gjithashtu, ndërmjetësit e tij kanë kontaktuar edhe gjigantë evropianë si Paris Saint-Germain dhe Bayern Munich, të cilët mund të përballojnë financiarisht një transferim të tillë. Vinicius pritet të kërkojë një pagë shumë të lartë, rreth 580,000 euro në javë.

Edhe pse Vinicius nuk është i vendosur të largohet nga kampionët 15-herë të Evropës, ai po mban të gjitha opsionet e hapura për të ardhmen e tij.

Kylian Mbappe është aktualisht lojtari më i paguar te Real Madrid pas transferimit të tij me parametra zero në vitin 2024, por kampi i Vinicius thuhet se po kërkon një pagë më të lartë për rinovimin e kontratës. Në nëntor, The Athletic raportoi se Real Madrid i kishte ofruar një kontratë me vlerë 20.3 milionë euro në vit gjatë bisedimeve në fund të sezonit të kaluar, duke rritur pagën e tij vjetore me pak më pak se 2.3 milionë euro. Megjithatë, pala e lojtarit nuk ishte e kënaqur me këtë ofertë dhe, kur klubi kërkoi të propozonin një shifër, ata thuhet se kërkuan rreth 30.2 milionë euro në vit.

Një kontratë e tillë do të përfaqësonte marrëveshjen më të shtrenjtë në historinë e Real Madridit, në të njëjtin nivel me atë që fitonte fituesi pesë herë i Topit të Artë, Cristiano Ronaldo, në sezonin e tij të fundit përpara transferimit te Juventus.