Author: A.M.

FC Barcelona pritet të jetë aktive gjatë afatit kalimtar të verës, me synimin kryesor për të përforcuar krahun e majtë të sulmit. Megjithatë, klubi katalanas ende nuk ka marrë një vendim përfundimtar mbi profilin e lojtarit që do të transferojë.

Në fillim të vitit 2026, dukej pothuajse e sigurt se marrëveshja e huazimit të Marcus Rashford do të bëhej e përhershme. Barcelona ka mundësinë të aktivizojë opsionin e blerjes për rreth 30 milionë euro, por së fundmi janë shtuar dyshimet mbi këtë vendim. Drejtuesit e klubit pritet të zhvillojnë një takim me agjentin dhe vëllain e lojtarit për të sqaruar situatën.

Paralelisht, Barcelona po shqyrton edhe alternativa të tjera më të reja dhe më ekonomike, si Andreas Schjelderup, Ez Abde dhe Jan Virgili, duke reflektuar një strategji më të kujdesshme financiare dhe afatgjatë.

Sipas raportimeve nga mediat italiane, të cituara nga shtypi katalanas, Rafael Leão i është ofruar Barcelonës si një opsion për këtë verë. Sulmuesi i AC Milan nuk e ka më të garantuar vendin si titullar dhe klubi italian është i hapur për ta shitur, pavarësisht kontratës që zgjat deri në vitin 2028.

Vlera e tij mund të zbresë deri në 50 milionë euro, një shumë që konsiderohet më e përballueshme krahasuar me të kaluarën, kur çmimi i tij arrinte deri në 100 milionë euro. Megjithatë, drejtori sportiv Deco ka shprehur rezerva për angazhimin defensiv të lojtarit, ndërsa presidenti Joan Laporta besohet se e vlerëson profilin e tij.

Këtë sezon, Leão ka regjistruar 10 gola dhe 2 asistime në 25 paraqitje, por vetëm në 20 prej tyre ka qenë titullar, një tregues i rënies së rolit të tij në skuadër.

Barcelona mbetet në fazë vlerësimi për opsionet në dispozicion, ndërsa vendimi përfundimtar për repartin ofensiv pritet të merret në muajt në vijim.

Kombëtarja e Kosovës në futsall ka publikuar listën e lojtarëve të ftuar për raundin paraeliminues të Kupës së Botës, dhe tashmë “Dardanët” janë gati për tri sfida vendimtare brenda vetëm tre ditëve.

Përzgjedhësi Agon Ramadani ka zgjedhur 14 futbollistët që do të japin gjithçka për të shkruar historinë e Kosovës si:Bajram Ramadani, Eduard Drenica, Ramadan Alaj, Jeton Rukovci, Drilon Haxhijaj, Shefki Kameri, Shqiprim Imeri, Fitim Krasniqi, Melos Kelmendi, Drilon Maxharraj, Lirigzon Xhinovci, Diar Deliu, Yll Mazreku, Malush Qerimi.

Kosova nis aventurën ndaj Gjibraltarit, më pas përballet me Austrinë, dhe në përfundim do të sfidojë Malin e Zi. “Dardanët” duhet të renditen të paktën në dy vendet e para të grupit për të avancuar tutje në garë për kualifikim në botëror.

Disfata përballë Mallorca-s, dhe goli i Muriqit, kanë ndezur sërish debatet në Madrid mbi të ardhmen e Alvaro Arbeloa-s. Pa titullin në Spanjë, i cili tani duket edhe më i vështirë për t’u fituar, e ardhmja e spanjollit është në “fije të perit”. Në fakt, duket se ka vetëm një rrugë për të qëndruar në krye të Real Madrid: triumfi në Champions League.

E përditshmja spanjolle AS, një media shumë pranë klubit, raporton se e ardhmja e Arbeloa-s lidhet fillimisht me ndeshjen kundër Bayern Munich. Në rast eliminimi, fati i tij do të vendoset menjëherë. Megjithatë, Bayern përbën vetëm pengesën e parë, pasi rruga drejt finales është ende shumë e gjatë.

Deri në këtë pikë të sezonit, presidenti Perez kishte një qëndrim pozitiv lidhur me të ardhmen e Arbeloa-s, por disfata ndaj Mallorca-s duket se nuk është pritur mirë. Shto këtu edhe shifrat: në 18 ndeshje në krye të Realit, Arbeloa ka regjistruar 5 humbje.

Kjo nuk është hera e parë që stoli i Arbeloa-s vihet në dyshim. Stafi teknik po shqyrton tregun për të gjetur një trajner tjetër, një profil që mund t’i japë fund periudhës së tranzicionit pas largimit të Carlo Ancelotti-t.

Scott Bamforth ishte ylli i javës së 27-të në ProCredit Superligë, duke u shpallur MVP i javës falë një paraqitjeje të jashtëzakonshme me fanellën e Golden Eagle Ylli.

Basketbollisti në fjalë shkëlqeu në përballjen ndaj Borës, ku realizoi 38 pikë, katër kërcime dhe tetë asistime, duke arritur indeksin më të lartë të javës – 45.

Edhe pse Peja u mposht nga Bashkimi, Cesare Edwards pati një paraqitje shumë të mirë me 29 pikë dhe 14 kërcime. Në anën tjetër, te “Portokallezinjtë” u dallua Jalen Riley me 27 pikë, shtatë kërcime dhe tri asistime.

Fitore shumë të rëndësishme arriti Vëllaznimi ndaj Sigal Prishtina, ku më i miri ishte Jericole Hellems me 23 pikë, gjashtë kërcime dhe tetë asistime.

Ndërkohë, Trepça vazhdoi formën e mirë duke regjistruar fitoren e 19-të radhazi. Në përballjen ndaj Rahoveci 029, u dallua Drilon Hajrizi me 18 pikë, dhjetë kërcime dhe pesë asistime.

Java e 27-të solli paraqitje të nivelit të lartë dhe garë të fortë mes skuadrave në elitën e basketbollit kosovar.

Bayern Munich ka marrë një lajm shumë pozitiv në prag të ndeshjes çerekfinale të UEFA Champions League kundër Real Madrid, pasi Harry Kane është rikthyer në stërvitje.

Sulmuesi anglez kishte qenë në dyshim për përballjen e së martës në Spanjë, pasi mungoi në ndeshjen miqësore të Anglisë ndaj Japonisë për shkak të një dëmtimi të lehtë. Problemi fizik u konfirmua fillimisht nga stafi i kombëtares, ku u bë e ditur se Kane ndërpreu stërvitjen pas vetëm 15 minutash dhe nuk ishte në gjendje të luante.

Më pas, trajneri i Bayern-it, Vincent Kompany, sqaroi se bëhej fjalë për një shqetësim në kyçin e këmbës, i cili e detyroi sulmuesin të mungonte edhe në ndeshjen e Bundesligës ndaj Freiburgut.

Megjithatë, optimizmi në kampin bavarez nuk mungoi. Kompany kishte shprehur besimin se dëmtimi nuk ishte serioz dhe se rikthimi i lojtarit do të ishte i shpejtë.

Ky optimizëm tashmë është konfirmuar, pasi Kane mori pjesë në seancën stërvitore të së hënës dhe pritet të jetë i gatshëm për t’u përfshirë në listën e ndeshjes ndaj Real Madridit.

E përditshmja e njohur spanjolle Mundo Deportivo ka raportuar se sulmuesi kosovar Fisnik Asllani është futur në radarët e FC Barcelona për merkaton e ardhshme.

Sipas këtij burimi, paraqitjet e shkëlqyera të 23-vjeçarit me TSG Hoffenheim gjatë këtij sezoni, ku ka realizuar 10 gola dhe ka dhuruar 6 asistime, kanë tërhequr vëmendjen e drejtuesve të klubit katalanas, të cilët po e konsiderojnë si një opsion serioz për repartin ofensiv.

Megjithatë, pavarësisht interesimit nga Spanja, vetë Asllani ka qëndruar i përqendruar dhe me këmbë në tokë. Pas ndeshjes së fundit ndaj 1. FSV Mainz 05, ai deklaroi se fokusi i tij mbetet te fusha e lojës dhe jo te spekulimet për transferime.

“Mundo Deportivo” thekson se sulmuesi ka kërkuar qetësi rreth këtyre zërave, duke nënvizuar se vendimi për të ardhmen e tij do të merret vetëm pas përfundimit të sezonit aktual.

Kampionët në fuqi, Oklahoma City Thunder, arritën një fitore të thellë 146-111 ndaj Utah Jazz, duke konfirmuar formën e shkëlqyer edhe këtë sezon në NBA. Të gjithë lojtarët titullarë të Oklahoma realizuan mbi 10 pikë, një tregues i qartë i dominimit të tyre në parket.

Ndërkohë, Los Angeles Lakers pësuan humbjen e dytë radhazi, pasi u mundën 134-128 nga Dallas Mavericks. Protagonist për skuadrën teksane ishte Cooper Flagg, i cili realizoi plot 45 pikë.

Në një ndeshje dramatike, Houston Rockets fituan 117-116 ndaj Golden State Warriors në sekondat e fundit. Kevin Durant udhëhoqi Houston me 31 pikë, ndërsa Stephen Curry, në rikthimin e tij pas dëmtimit, realizoi 29 pikë.

Fitore jashtë fushe arriti edhe Phoenix Suns, që mposhti 120-110 Chicago Bulls, falë 30 pikëve të Devin Booker dhe 25 të Jalen Green.

Detyrën e bëri edhe Boston Celtics, që fitoi 115-101 ndaj Toronto Raptors, në një ndeshje ku u dallua Jaylen Brown me 26 pikë.

Fitore të rëndësishme arriti edhe Los Angeles Clippers, që mundi 138-109 Sacramento Kings, me Kawhi Leonard autor të 26 pikëve. Ndërsa Cleveland Cavaliers triumfuan 117-108 ndaj Indiana Pacers, falë 38 pikëve të Donovan Mitchell.

Drita ka shënuar një fitore të rëndësishme 2-0 ndaj Malishevës, duke u rikthyer në krye të Superligës së Kosovës. Goli i Blerton Shejit në minutën e 32-të dhe ai i Kristal Abazajt në minutën e 65-të sigurojnë tre pikë të vlefshme për skuadrën e trajnerit Xhevdet Shabani.

Pas golit të Shejit, Drita mbajti plotësisht posedimin e topit, ndërkohë që Malisheva rrezikoi disa herë me kundërsulme. Megjithatë, Abazaj shënoi për t’i dhënë fund çdo shprese për Malishevën, duke realizuar një gol pas driblimeve të mrekullueshme.

Me këtë fitore, Drita arrin në 51 pikë, duke lënë pas Ballkanin me 48 pikë. Malisheva mbetet në vendin e pestë me 40 pikë.

Prishtina nuk ka arritur të arkëtojë më shumë se një pikë në udhëtim te Drenica, në kuadër të xhiros së 27-të në Superligën e Kosovës.

Pavarësisht se “bardhëkaltërit” ishin favoritë të padiskutueshëm, Drenica arriti të nxjerrë një pikë të madhe me rezultat 2-2.

Drenica mori epërsinë falë golit të Ronaldos nga pika e bardhë, pasi Dren Zeqiri faulloi Jan Solerin. Përdorimi i VAR-it ishte i nevojshëm, para se gjyqtari të jepte vendimin përfundimtar për 11-metërsh (30’).

Megjithatë, Prishtina u rikthye në lojë falë Mario Ilievskit, i cili shënoi një gol të bukur pas asistimit të Leotrim Kryeziut (50’).

Në një kundërsulm të bukur të Drenicës, Kreshnik Uka e riktheu epërsinë për vendasit dhe, si shenjë respekti për ish-klubin, nuk festoi (61’).

Përkundër kësaj, Prishtina nuk u dorëzua dhe gjeti barazimin falë Leotrim Kryeziut, i cili realizoi me kokë pas intervenimit të portierit vendas (85’).

Prishtina mbetet në vendin e katërt me 42 pikë, ndërsa Drenica renditet në pozitën e parafundit me 29 pik

Lionel Messi konfirmoi formën e tij të shkëlqyer në fillim të sezonit të MLS, duke shënuar një gol në barazimin 2-2 të Inter Miami kundër Austin në xhiron e gjashtë. Ky ishte goli i tij i gjashtë në shtatë paraqitje këtë sezon.

Goli i tij ka një rëndësi të veçantë: është i pari i shënuar në stadiumin e ri “Nu Stadium”, i cili ka kapacitet 26,700 vende dhe një vlerë prej një miliard dollarësh. Messi e realizoi golin me një goditje të rrallë me kokë, duke shënuar golin e tij të 903-të në karrierë dhe të 31-tin me kokë, një arritje e veçantë për një lojtar 1.70 metra i gjatë. Ai gjithashtu shënoi nën tribunën që mban emrin e tij, “Leo Messi”.

Myrto Uzuni ishte protagonist për Austin, duke goditur shtyllën dy herë, por duke kontribuar me një asistim që siguroi barazimin për ekipin e tij.

Messi ka qenë temë kryesore në futbollin botëror kohët e fundit, pasi nuk është e sigurt nëse do të marrë pjesë në Kupën e Botës që zhvillohet së shpejti. Argjentina po mbron titullin kampion bote, por raportimet sugjerojnë se ylli që ka luajtur 198 ndeshje për përfaqësuesen dhe ka shënuar 116 gola mund të mos jetë i pranishëm në këtë ngjarje.