Author: A.M.

Jose Mourinho ka vendosur të mos paraqitet në konferencën për shtyp pas fitores 1-0 të Real Madridit ndaj Villarrealit në “Santiago Bernabeu”.

Sipas mediumit “El Mundo”, trajneri portugez ka zgjedhur të heshtë nga frika se deklaratat e tij për gjykimin mund t’i kushtonin me pezullim në ndeshjet e ardhshme ndaj Sevillas dhe Barcelonës.

Vendimi erdhi pas një përballjeje të tensionuar, e cila u shoqërua me polemika për vendimet e gjyqtarit. Në qendër të vëmendjes ishte edhe kartoni i kuq i Vinicius Juniorit, pas një incidenti me një lojtar kundërshtar.

Ndërkohë, sipas raportimeve, Real Madridi po shqyrton mundësinë e paraqitjes së një ankese zyrtare për gjykimin.

Mourinho, në këtë mënyrë, ka shmangur komentet publike në një moment delikat, me synimin për të qenë në stol në dy sfidat e rëndësishme që e presin skuadrën madrilene.

Arda Turan mund të marrë një detyrë të re në karrierën e tij si trajner, pasi raportohet se është pranë emërimit në krye të Kombëtares së Turqisë.

Lajmi është bërë i ditur nga gazetari i njohur i merkatos, Nicolo Schira, i cili ka raportuar në rrjetet sociale për mundësinë që ish-futbollisti i Atletico Madridit dhe Barcelonës të drejtojë përfaqësuesen turke.

Aktualisht, 39-vjeçari është trajner i Shakhtar Donetskut, skuadër që e mori në drejtim në vitin 2025.

Gjatë karrierës si futbollist, Turan ishte një nga emrat më të njohur të futbollit turk, duke luajtur për klube të mëdha evropiane si Atletico Madridi dhe Barcelona.

Megjithatë, deri më tani nuk ka konfirmim zyrtar për emërimin e tij. Kombëtarja e Turqisë drejtohej nga italiani Vincenzo Montella, i cili mori detyrën në shtator të vitit 2023.

Nëse realizohet, emërimi i Turanit do të shënonte një hap të rëndësishëm në karrierën e tij si trajner.

Barcelona e Hansi Flickut po vazhdon me rezultate pozitive, duke e mposhtur Getafen me rezultat 3-0 në La Liga, pas rikthimit nga pushimi i ndeshjeve ndërkombëtare.

Pas ndeshjes, trajneri gjerman u shpreh i kënaqur me paraqitjen e skuadrës, duke theksuar rëndësinë e golit të hershëm dhe kontrollin që Barcelona pati gjatë gjithë takimit.

“Shënimi i golit shumë herët ishte i rëndësishëm për vetëbesimin. Nuk është e lehtë të rikthehesh pas pushimit ndërkombëtar, por ne bëmë një punë shumë të mirë”, deklaroi Flick.

Ai vlerësoi gjithashtu Gerard Martinin, duke përgëzuar mbrojtësin për paraqitjet dhe zhvillimin e tij, si dhe Anthony Gordonin për kontributin në fazën ofensive.

Flick foli edhe për Gabriel Jesusin, i cili shënoi në ndeshjen e tij të parë si titullar me Barcelonën, duke theksuar se skuadra ka nevojë për kontributin e të gjithë lojtarëve, si në sulm, ashtu edhe në mbrojtje.

Trajneri gjerman vlerësoi edhe profesionalizmin e Jules Koundes, ndërsa atmosferën brenda skuadrës e cilësoi si një nga pikat e forta të ekipit.

Tashmë, vëmendja e Barcelonës zhvendoset te Liga e Kampionëve, ku të martën e pret përballja ndaj Galatasarayt në Turqi.

Flick paralajmëroi se skuadrën e pret një sfidë e vështirë, duke theksuar se atmosfera në stadium do të jetë krejtësisht ndryshe nga ajo e ndeshjeve në kampionat.

Marco Bezzecchi ka fituar Çmimin e Madh të Indonezisë në MotoGP, në pistën e Mandalikës, duke i dhënë Italisë fitoren e 300-të në klasën mbretërore të motoçiklizmit. Gara ishte historike edhe për Aprilian, e cila dominoi katër pozitat e para.

Bezzecchi fitoi duelin me spanjollin Raul Fernandez, ndërsa Jorge Martin u rendit i treti. Ai Ogura përfundoi në vendin e katërt, duke kompletuar dominimin e Aprilias.

Gara nisi me Fernandez në pole position, ndërsa Marc Marquez tentoi të merrte kryesimin që në start. Megjithatë, piloti i Ducatit humbi terren dhe nuk arriti të luftonte për fitoren. Në garë pati edhe dy braktisje të rëndësishme, pasi Fermin Aldeguer dhe Francesco Bagnaia u rrëzuan.

Në xhirot e fundit, Bezzecchi realizoi parakalimin vendimtar ndaj Fernandezit dhe siguroi fitoren, ndërsa Martin plotësoi podiumin.

Marc Marquez u rendit i gjashti, duke humbur pozita në luftën për titullin. Jorge Martin kryeson klasifikimin e përgjithshëm me 355 pikë, ndërsa Marquez ndodhet vetëm dy pikë prapa tij. Bezzecchi renditet në vendin e tretë.

Debatik Curri nuk është më trajner i Gjilanit. Klubi gjilanas ka njoftuar të dielën për ndërprerjen e bashkëpunimit me trajnerin, pas humbjes 1-0 ndaj Vushtrrisë në kuadër të Albi Mall Superligës së Kosovës.

Përmes një njoftimi zyrtar, Gjilani e ka falënderuar Currin për angazhimin dhe kontributin e dhënë gjatë periudhës në krye të skuadrës, duke i uruar suksese në vazhdim të karrierës profesionale.

Sport Club Gjilani njofton opinionin publik, tifozët dhe mediat se ka mbyllur bashkëpunimin me kryetrajnerin Debatik Curri.

Pas përmbylljes së këtij bashkëpunimi, klubi shpreh vlerësimin për angazhimin dhe kontributin e trajnerit Curri gjatë periudhës në krye të skuadrës, duke i dëshiruar suksese të mëtejshme në karrierën e tij profesionale.

Ndërkohë, klubi ka bërë të ditur se për zhvillimet e ardhshme lidhur me organizimin e shtabit teknik do të njoftojë me kohë përmes kanaleve zyrtare.

Vinicius Junior rrezikon të dënohet me dy deri në katër ndeshje pezullim pas kartonit të kuq të marrë ndaj Villarrealit, bëjnë të ditur mediat spanjolle.

Sulmuesi i Real Madridit u përjashtua në minutën e 71-të, pasi tërhoqi nga flokët një kundërshtar. Sipas raportit të gjyqtarit Isidro Díaz de Mera, braziliani vazhdoi të protestonte edhe pas përjashtimit, duke e komplikuar më tej situatën e tij.

Komiteti i Disiplinës do të shqyrtojë incidentin dhe reagimin e futbollistit për të përcaktuar masën e dënimit.

Në rastin më të rëndë, Vinicius mund të mungojë në katër ndeshje, duke rrezikuar të mos jetë i gatshëm për El Clásicon ndaj Barcelonës, të planifikuar për 25 tetor.

Vendimi përfundimtar pritet të merret nga organet disiplinore të futbollit spanjoll.

Inter Miami ka shënuar fitore bindëse me rezultat 4-0 ndaj DC Unitedit, në ndeshjen e zhvilluar të shtunën mbrëma në kuadër të Major League Soccer (MLS).

Protagonistët kryesorë të skuadrës nga Florida ishin Lionel Messi dhe Luis Suarez, të cilët realizuan nga dy gola secili, duke i dhuruar ekipit të tyre një fitore të rëndësishme.

Inter Miami e nisi takimin në mënyrë perfekte, duke kaluar në epërsi që në minutën e tretë. Luis Suarez zhbllokoi rezultatin pas asistimit të German Berterames, duke i dhënë skuadrës vendase avantazhin e hershëm.

Sulmuesi uruguaian shënoi sërish në minutën e 39-të, duke realizuar golin e dytë personal dhe duke thelluar epërsinë e Inter Miamit. Pjesa e parë u mbyll me avantazhin e vendasve.

Në pjesën e dytë, Lionel Messi mori skenën kryesore. Ylli argjentinas realizoi në minutën e 47-të, duke e çuar rezultatin në 3-0 dhe duke regjistruar golin e 933-të në karrierën e tij profesionale.

Vetëm 13 minuta më vonë, Messi shënoi edhe golin e dytë personal. Pas një harkimi nga krahu i djathtë, argjentinasi reagoi shpejt dhe e dërgoi topin në rrjetë, duke vulosur rezultatin përfundimtar 4-0.

Me nga dy gola secili, Messi dhe Suarez ishin vendimtarë në këtë sukses të Inter Miamit, që konfirmoi forcën sulmuese të skuadrës në këtë përballje të MLS-së.

Për Messin, kjo ishte ndeshja e parë zyrtare me klubin pas lamtumirës nga Kombëtarja e Argjentinës.