Author: A.M.

Vetëm pak pasi la altarin, Cristiano Ronaldo iu rikthye fushës dhe bëri atë që di më mirë: shënoi.

Ylli portugez e nis sezonin e ri në Arabinë Saudite në të njëjtën mënyrë siç e mbylli të kaluarin, duke gjetur menjëherë rrugën e rrjetës me fanellën e Al Nassr.

Ronaldo u aktivizua në minutën e 62-të, në një moment kur Al Nassr kryesonte 0-3. Pavarësisht se u fut në pjesën e dytë, portugezi pati kohë të linte gjurmën e tij në këtë takim. Në minutën e 85-të, pasi mori një pasim në zonë, Ronaldo goditi saktë dhe vulosi golin e katërt për skuadrën saudite.

Me këtë realizim, Cristiano Ronaldo regjistroi golin e 977-të në karrierën e tij, duke hedhur një tjetër hap drejt objektivit madhor prej 1000 golash. Një shifër që tashmë duket gjithnjë e më pranë për legjendën portugeze.

Është mësuar shorti për edicionin e ri 2026/27, i cili do të nisë më 19 shtator 2026.

Java e parë e kampionatit do të sjellë disa përballje interesante, ku vëmendjen më të madhe e marrin duelet mes skuadrave të njohura të basketbollit kosovar.

Në ndeshjet hapëse të sezonit do të përballen:

• Rahoveci 029 – Trepça
• Bashkimi – Golden Eagle Ylli
• Bora – Vëllaznimi
• Sigal Prishtina – Peja

Skuadrat tashmë kanë mësuar kundërshtarët e parë të sezonit të ri, ndërsa gara pritet të jetë e fortë me synimin për titullin kampion dhe pozitat sa më të larta në tabelë.

Feronikeli 74 ka vazhduar përforcimin e skuadrës para sezonit të ri, duke zyrtarizuar transferimin e portierit Agron Kolaj.

Skuadra nga Drenasi ka bërë të ditur se ka arritur marrëveshje me gardianin, i cili i bashkohet klubit pas aventurave te Besa e Pejës, Llapi, FC Prishtina dhe SC Gjilani.

Kolaj ka qenë gjithashtu pjesë e Përfaqësueses së Kosovës U21, ndërsa tashmë do të jetë pjesë e projektit të Feronikelit 74.

“Mirë se erdhe në familjen tonë, Agron! Të urojmë shumë suksese me fanellën e FC Feronikeli 74”, thuhet në njoftimin zyrtar të klubit.

Me këtë transferim, Feronikeli synon të rrisë konkurrencën në repartin e portierëve dhe të ndërtojë një skuadër sa më të kompletuar për edicionin e ri.

Manchester City ka identifikuar mesfushorin e Barcelonës, Frenkie de Jong, si një nga objektivat kryesorë për përforcimin e skuadrës para mbylljes së afatit kalimtar.

Mesfushori holandez, 29-vjeçar, është një profil që prej kohësh pëlqehet nga drejtuesit e klubit anglez. Me nevojën për të shtuar alternativat në mesfushë, City ka bërë transferimin e një lojtari në këtë repart një nga prioritetet kryesore të ditëve të fundit të afatit.

Drejtuesit e Manchester Cityt kanë përshpejtuar aktivitetin në merkato pas disa ndryshimeve të rëndësishme në skuadër. Klubi ka arkëtuar rreth 70 milionë euro nga shitja e Rodrit te Barcelona, ndërsa Tijjani Reijnders është transferuar në Arabinë Saudite për rreth 61 milionë euro.

Ndërkohë, Bernardo Silva është larguar si lojtar i lirë drejt Real Madridit, ndërsa City është në negociata të avancuara me Newcastle për Nico González.

Në këtë situatë, Frenkie de Jong shihet si një alternativë e rëndësishme për mesfushën e Pep Guardiolës. Megjithatë, mbetet për t’u parë nëse Barcelona do të jetë e gatshme të negociojë për një nga lojtarët e saj kryesorë dhe nëse City do të arrijë të finalizojë një marrëveshje para mbylljes së afatit kalimtar.

Kombëtarja e Kosovës në volejboll për vajza ka regjistruar fitoren e parë në Lojërat Mesdhetare “Taranto 2026”.

“Dardanet” kanë mposhtur Algjerinë me rezultat të pastër 3-0, në ndeshjen e dytë të Grupit B.

Kosova e nisi takimin në mënyrë të shkëlqyeshme, duke fituar setin e parë me rezultat 25-19. Dominimi i vajzave kosovare vazhdoi edhe në setin e dytë, ku ato nuk i dhanë shumë hapësirë kundërshtares dhe triumfuan bindshëm 25-10.

Në setin e tretë, Kosova vazhdoi me paraqitje të sigurt dhe e mbylli ndeshjen me rezultat 25-14, duke siguruar fitoren e parë në këtë edicion të Lojërave Mesdhetare.

Kjo ishte ndeshja e dytë e Kosovës në Grupin B. Në debutim, “Dardanet” ishin mposhtur nga Greqia me rezultat 0-3.

Në Grupin B, përveç Kosovës dhe Algjerisë, bëjnë pjesë edhe Greqia dhe Maqedonia e Veriut.

Sezoni i ri i Premier League, 2026/27, nis sot (e premte) me përballjen mes kampionit në fuqi, Arsenalit, dhe Coventry City, e cila zhvillohet nga ora 21:00. Edicioni i ri sjell edhe një sërë ndryshimesh të rëndësishme në rregullat e lojës.

Masat e reja synojnë të përshpejtojnë ritmin e ndeshjeve dhe të vendosin ndëshkime më të rrepta për vonesat, ndërsa ndryshimet prekin ndërprerjet e lojës, trajtimin e lëndimeve, zëvendësimet dhe përdorimin e VAR-it.

Ndryshe nga Kupa e Botës 2026, Premier League nuk do të aplikojë rregullin që parashikon ndëshkimin e lojtarëve për mbulimin e gojës me duar gjatë komunikimit. Gjithashtu, nuk do të ketë pushime të detyrueshme për hidratim.

Lojtarët do të kenë vetëm pesë sekonda për të kryer një rivënie anësore ose për ta rikthyer topin në lojë.

Nëse gjyqtari vlerëson se lojtari po vonon qëllimisht, do të nisë një numërim mbrapsht prej pesë sekondash. Në rast se afati përfundon, kundërshtari do të fitojë zotërimin e topit, ndërsa në situatat kur topi duhet të rikthehet në lojë nga portieri, mund të akordohet goditje nga këndi.

Një lojtar që merr trajtim për një dëmtim në fushë dhe shkakton ndërprerjen e lojës do të duhet të qëndrojë jashtë saj për një minutë, në vend të 30 sekondave sa ishte më parë.

Megjithatë, do të ketë përjashtime. Për shembull, rregulli nuk do të zbatohet nëse dëmtimi është shkaktuar nga një faull për të cilin kundërshtari është ndëshkuar me karton të verdhë.

Nëse një portier rrëzohet dhe shkakton një ndërprerje të lojës që gjykohet se është përdorur nga skuadra si një lloj pushimi taktik, trajneri do të duhet të zgjedhë një lojtar nga ekipi i tij për të lënë fushën për një minutë.

Procesi i zëvendësimit duhet të përfundojë brenda maksimumi 10 sekondave.

Nëse lojtari që po largohet nga fusha vonon në mënyrë të tepruar, zëvendësuesi nuk do të lejohet të hyjë menjëherë dhe skuadra do të duhet të luajë me një lojtar më pak për një minutë.

Një nga ndryshimet më të rëndësishme lidhet me VAR-in. Për herë të parë, teknologjia do të mund të ndërhyjë në raste që lidhen me kartonin e dytë të verdhë.

VAR-i mund të përdoret nëse kartoni i dytë i verdhë është dhënë për një gabim të qartë, për shembull kur nuk ka pasur fare faull. Megjithatë, VAR-i nuk mund t’i kërkojë gjyqtarit t’i japë një lojtari kartonin e dytë të verdhë nëse arbitri nuk e ka ndëshkuar fare me të.

Gjithashtu, VAR-i do të ketë mundësi të ndërhyjë në rastet kur një faull në sulm ka ndodhur para një ndërprerjeje dhe aksioni pasues përfundon me gol, penallti ose një masë tjetër disiplinore.

Me këto ndryshime, Premier League synon të reduktojë vonesat dhe ndërprerjet e panevojshme, duke e bërë lojën më të shpejtë dhe më dinamike.

Federata e Basketbollit të Kosovës (FBK) ka vendosur të shtyjë afatin për përfundimin e procesit të licencimit të klubeve për edicionin garues 2026/27.

Afati i ri për përfundimin e këtij procesi është 26 gushti, ndërsa FBK ka bërë të ditur se kjo është data përfundimtare dhe nuk do të ketë shtyrje të tjera.

Vendimi është marrë pasi vetëm një numër i kufizuar i klubeve kanë arritur të përmbushin dhe dorëzojnë të gjithë dokumentacionin e kërkuar gjatë afatit të rregullt të licencimit, i cili ishte nga 5 deri më 14 gusht.

Klubet që nuk i përmbushin kriteret dhe nuk e kompletojnë dokumentacionin deri më 26 gusht do të trajtohen në përputhje me Rregulloren për Licencimin e Klubeve. Sipas FBK-së, klubet që nuk pajisen me licencë nuk do të kenë të drejtë të marrin pjesë në garat e basketbollit.

Ndërkohë, Bordi i FBK-së ka vendosur të shtyjë edhe afatin kalimtar veror në të gjitha garat deri më 28 gusht.

Kjo shtyrje do t’u mundësojë klubeve që, pas përfundimit të procesit të licencimit, të përfundojnë procedurat për regjistrimin dhe transferimin e lojtarëve.

Klubet janë të obliguara që të gjitha procedurat për regjistrimin dhe transferimin e lojtarëve t’i përfundojnë brenda afatit të ri, më 28 gusht.

Lionel Messi është vënë nën hetim nga Komiteti Disiplinor i Major League Soccer (MLS) pas një incidenti me Quinn Sullivan gjatë ndeshjes mes Inter Miamit dhe Philadelphia Union, e cila përfundoi në barazim 2-2.

Kapiteni i Inter Miamit mund të përballet me masa disiplinore pasi pamjet televizive e tregojnë duke goditur me shuplakë Sullivanin në pjesën e pasme të kokës gjatë një përplasjeje mes dy lojtarëve.

Ndeshja ishte e tensionuar, veçanërisht në pjesën e dytë. Messi kishte shënuar më herët në takim, ndërsa Inter Miami po kërkonte të rikthente epërsinë kur situata mes tij dhe Sullivanit u përshkallëzua.

Tensionet u shtuan edhe më shumë pasi Philadelphia Union arriti të barazojë rezultatin. Ndërkohë, Cavan Sullivan, vëllai më i vogël i Quinn, u ndëshkua me karton të kuq pas një përplasjeje me Yannick Bright.

Incidenti mes Messit dhe Quinn Sullivan nuk u ndëshkua gjatë ndeshjes nga gjyqtari. Megjithatë, pamjet e përplasjes u bënë virale në rrjetet sociale, duke bërë që Komiteti Disiplinor i MLS-së të nisë shqyrtimin e rastit.

Komiteti do të analizojë pamjet dhe do të vendosë nëse sjellja e Messit meriton ndonjë masë disiplinore. Nëse incidenti cilësohet si sjellje e dhunshme, argjentinasi mund të përballet me gjobë ose edhe me një ndeshje pezullim.

Barcelona ka bërë një hap të rëndësishëm në përpjekjen për të transferuar sulmuesin e Interit, Lautaro Martínez. Sipas raportimeve nga mediat spanjolle, klubi katalanas ka arritur një marrëveshje paraprake me përfaqësuesit e sulmuesit argjentinas për kushtet personale të një kontrate të mundshme.

Drejtori sportiv i Barcelonës, Deco, së bashku me Bojan Krkić, kanë zhvilluar takime me stafin e Lautaros dhe palët kanë gjetur gjuhën e përbashkët për aspektet financiare të marrëveshjes.

Pas këtij hapi, Barcelona pritet të përqendrohet te negociatat me Interin. Klubi italian nuk ka ndërmend të heqë dorë lehtë nga kapiteni i tij, i cili ka kontratë deri në vitin 2029 dhe mbetet një nga lojtarët më të rëndësishëm të skuadrës zikaltër.

Megjithatë, një ofertë e konsiderueshme mund të ndryshojë situatën. Barcelona po përgatit një propozim fillestar që pritet të jetë nën shifrën 100 milionë euro, ndërsa Interi do të vlerësojë çdo ofertë që do të mbërrijë për sulmuesin argjentinas.

Lautaro Martínez është identifikuar nga drejtuesit katalanas si objektivi kryesor për repartin ofensiv, pasi klubi ka hequr dorë nga gara për sulmuesin e Atletico Madridit, Julián Álvarez.

Tashmë mbetet për t’u parë nëse Barcelona do të arrijë të bindë Interin për të lënë të lirë “El Toron” dhe për ta sjellë atë në Camp Nou.

Neil Magny mori një tjetër fitore të rëndësishme në karrierën e tij, duke mposhtur Ramiz Brahimajn me TKO në raundin e dytë të përballjes së tyre në UFC 330.

Përballja nuk nisi në mënyrën më të mirë për veteranin amerikan. Brahimaj përdori me efikasitet mundjen dhe kontrollin në tokë, duke e mbajtur Magnyn nën presion gjatë pjesës më të madhe të raundit të parë. Megjithatë, shqiptari nuk arriti të përfitonte maksimalisht nga dominimi i tij, pasi nuk shkaktoi dëme të konsiderueshme.

Situata ndryshoi në raundin e dytë. Magny nisi të gjente hapësirat e duhura dhe gradualisht mori kontrollin e duelit. 38-vjeçari e çoi Brahimajn pranë kafazit dhe filloi të godiste në seri, duke mos i lënë kundërshtarit shumë mundësi për të reaguar.

Pas një breshërie të vazhdueshme goditjesh, arbitri vendosi të ndërpresë përballjen në minutën 3:20 të raundit të dytë, duke i dhënë Magnys fitoren me nokaut teknik.

Kjo ishte fitorja e 31-të e Magnys në karrierë, kundrejt 14 humbjeve, ndërsa veterani amerikan vendosi gjithashtu një rekord të ri në divizionin welterweight të UFC-së.

Për Brahimajn, kjo ishte humbja e dytë radhazi. Shqiptari tani ka një bilanc prej 5 fitoresh dhe 5 humbjesh në UFC, ndërsa rekordi i tij profesional shkon në 13 fitore dhe 7 humbje.