Author: A.M.

Julian Alvarez ka kërkuar një takim urgjent me drejtorin e përgjithshëm të Atletico Madridit, Miguel Ángel Gil Marín, në përpjekje për të shtyrë përpara transferimin e tij te Barcelona.

Sulmuesi argjentinas vazhdon të mbajë qëndrimin e tij për t’u larguar nga Atletico Madridi, pavarësisht se klubi madrilen ka refuzuar ofertën fillestare të Barcelonës prej 100 milionë eurosh.

Sipas ESPN, Alvarez është rikthyer në stërvitje këtë javë, por nuk ka kërkuar falje publikisht apo para shokëve të skuadrës për deklaratat e tij gjatë Kupës së Botës, ku shprehu dëshirën për të ndryshuar ekip.

26-vjeçari pretendon se Gil Marín i kishte premtuar në shkurt të vitit 2026 se do ta lehtësonte largimin e tij nëse do të mbërrinte një ofertë zyrtare. Pikërisht mbi këtë premtim lojtari dhe përfaqësuesit e tij po bazojnë kërkesën për largim.

Alvarez ka zhvilluar gjithashtu një bisedë kokë më kokë me trajnerin Diego Simeone. Edhe pse argjentinasi është informuar se trajneri llogarit në të për sezonin 2026/27, dëshira e tij për t’u transferuar te Barcelona dhe për të luajtur në Camp Nou mbetet e pandryshuar.

Sipas TyC Sports, përfaqësuesit e Alvarez kanë kërkuar zyrtarisht një takim me drejtuesit e Atletico Madridit për të tentuar zhbllokimin e situatës.

Barcelona, ndërkohë, po pret zhvillimet përpara se të vendosë nëse do të paraqesë një ofertë të dytë zyrtare, pasi propozimi i parë prej 100 milionë eurosh u refuzua nga klubi madrilen.

Atletico Madridi vazhdon të mbajë qëndrimin se nuk dëshiron të negociojë shitjen e sulmuesit dhe kërkon që të paguhet klauzola e plotë e lirimit. Megjithatë, Alvarez nuk ka hyrë në grevë dhe vazhdon të përmbushë detyrimet e tij profesionale me klubin.

Përfaqësuesit e argjentinasit pritet të takohen me Miguel Ángel Gil Marín gjatë kësaj fundjave, më 15 dhe 16 gusht, për të diskutuar të ardhmen e lojtarit.

Në rast se drejtuesi i Atletico Madridit refuzon të negociojë, Barcelona do të duhet të vendosë nëse do ta rrisë ofertën financiare apo do të tërhiqet nga gara përpara mbylljes së afatit kalimtar të verës.

UEFA, CONCACAF dhe Konfederata Aziatike e Futbollit (AFC) po mbështesin një propozim për të ndryshuar në mënyrë rrënjësore mënyrën e drejtimit të FIFA-s, sipas një dokumenti pune të parë nga mediumi francez Le Monde.

Sipas propozimit, modeli aktual i presidencës do të zëvendësohej me një presidencë rotative, përfaqësuese dhe ceremoniale, me një mandat të përcaktuar prej dy vitesh. Ndërkohë, pushteti ekzekutiv do t’i kalonte një drejtori ekzekutive dhe një bordi drejtues.

Propozimi vjen në një periudhë kur kundërshtimi ndaj presidentit aktual të FIFA-s, Gianni Infantino, është rritur. Tre konfederatat kërkojnë ndryshime në strukturën drejtuese të organizatës, pas polemikave të krijuara rreth planit të braktisur për shitjen e një pjese të të drejtave komerciale të ardhshme të Kupës së Botës.

Koalicioni synon që rishikimi i strukturës së qeverisjes së FIFA-s të bëhet përpara zgjedhjeve presidenciale të marsit 2027.

Modeli i propozuar bazohet pjesërisht në sistemin zviceran të presidencës me rotacion, ndonëse Presidenca Federale e Zvicrës aktualisht funksionon me një mandat njëvjeçar.

Megjithatë, Infantino vazhdon të jetë në detyrë dhe gëzon mbështetje të konsiderueshme nga një numër federatash anëtare të FIFA-s. Për këtë arsye, çdo ndryshim i madh në strukturën drejtuese të organizatës do të kërkonte mbështetje më të gjerë nga anëtarët e saj.

Nëse propozimi do të ecë përpara, ai mund të sjellë një ndryshim të rëndësishëm në mënyrën se si drejtohet institucioni më i lartë i futbollit botëror.

Superliga e Kosovës vazhdon sot (e shtunë) me dy ndeshje të javës së parë të edicionit 2026/27, me skuadrat që do të kërkojnë ta nisin sezonin e ri me rezultat pozitiv dhe tri pikë.

Në stadiumin “Bajram Aliu” në Skenderaj, Drenica do të përballet me Dukagjinin. Ndeshja është programuar të zhvillohet nga ora 16:30, në një përballje që pritet të sjellë emocione që në start të kampionatit.

Drenica synon të bëjë një paraqitje sa më të mirë para tifozëve të saj, ndërsa Dukagjini do të kërkojë ta nisë sezonin me pikë dhe të dëshmojë se do të jetë një kundërshtar i fortë gjatë këtij edicioni.

Në të njëjtën kohë, në Kampin Nacional të FFK-së në Hajvali, Vushtrria do të presë Malishevën. Edhe kjo sfidë nis në ora 16:30 dhe do të jetë një test i rëndësishëm për të dyja skuadrat në javën hapëse.

Vushtrria vjen me ambicie të mëdha në Superligë dhe synon të marrë një rezultat pozitiv në start, ndërsa Malisheva do të kërkojë ta nisë sezonin në mënyrën më të mirë të mundshme.

Gjatë ditës së diel janë programuar edhe dy ndeshjet e fundit të kësaj jave, Drita – Llapi dhe Prishtina – Ballkani.

Ndërkohë, ndeshja e zhvilluar të premten mes Feronikelit ’74 dhe Gjilanit përfundoi me fitoren e mysafirëve me rezultat 1-3.

Paris Saint-Germain ka zyrtarizuar transferimin e shumëpritur të Ferran Torresit nga Barcelona.

Sulmuesi spanjoll ka nënshkruar një kontratë pesëvjeçare me kampionët francezë, e cila do ta mbajë në Paris deri në vitin 2031. Për transferimin e tij, PSG-ja raportohet se do t’i paguajë Barcelonës 50 milionë euro.

Zyrtarizimi i marrëveshjes është bërë sot, të shtunën, përmes faqes zyrtare të Paris Saint-Germain, ku klubi ka zbuluar edhe numrin që Torresi do të mbajë në fanellë.

“Paris Saint-Germain ka kënaqësinë të njoftojë mbërritjen e Ferran Torresit. Sulmuesi spanjoll, kampion bote, ka nënshkruar me klubin deri në vitin 2031 dhe do të mbajë numrin 9”, thuhet në njoftimin e PSG-së.

26-vjeçari vjen në Paris pas një periudhe te Barcelona, ndërsa së fundmi ishte bërë një nga emrat kryesorë të kombëtares spanjolle pas paraqitjeve të tij në Kupën e Botës 2026.

Transferimi i Torresit është shtyrë përpara edhe nga trajneri i PSG-së, Luis Enrique, i cili e njeh mirë sulmuesin nga koha kur e ka drejtuar te kombëtarja e Spanjës.

Me largimet e Randal Kolo Muanit dhe Gonçalo Ramosit, Enrique e ka parë Torresin si një përforcim të rëndësishëm për repartin ofensiv të kampionëve francezë.

Torresi, nga ana tjetër, thuhet se ka refuzuar një ofertë rinovimi nga Barcelona për t’u ribashkuar me Luis Enriquen dhe për të nisur një aventurë të re në Paris.

Paris Saint-Germain ka refuzuar dy oferta të Liverpoolit për Bradley Barcolan, pavarësisht se klubi francez është i hapur për largimin e sulmuesit anësor gjatë kësaj vere.

Kampionët e Francës kanë bërë tashmë planet edhe për një sezon pa 23-vjeçarin, i cili ka kontratë me PSG-në deri në vitin 2028. Megjithatë, klubi parisien nuk ka ndërmend të ulë kërkesat financiare për lojtarin.

Sipas raportimeve të L’Équipe, Liverpooli ka paraqitur dy oferta zyrtare për Barcolan. E para ishte në vlerën e 100 milionë eurove, ndërsa e dyta u rrit në 110 milionë euro. Të dyja ofertat janë refuzuar nga PSG, pasi janë konsideruar të pamjaftueshme.

PSG raportohet se kërkon të paktën 160 milionë euro për të dhënë dritën jeshile për transferimin e sulmuesit francez.

Megjithatë, Liverpooli nuk është tërhequr nga gara dhe pritet të rikthehet me një tjetër ofertë për Barcolan në ditët e ardhshme.

Barcola, i cili iu bashkua PSG-së nga Lyon në vitin 2023, mbetet një nga objektivat kryesorë të Liverpoolit në këtë merkato.

Saga mes dy klubeve pritet të vazhdojë, me Liverpoolin që duhet të vendosë nëse do të afrohet me kërkesën e lartë të PSG-së për të siguruar shërbimet e 23-vjeçarit.

Trajneri i Barcelonës, Hansi Flick, thuhet se ka dhënë miratimin për transferimin e një sulmuesi alternativ, pas vështirësive të klubit katalanas për të siguruar shërbimet e Julian Alvarez nga Atletico Madrid këtë verë.

Flick kishte këmbëngulur për transferimin e sulmuesit argjentinas si objektivin e tij kryesor, por vështirësitë e paraqitura nga Atletico Madrid për arritjen e një marrëveshjeje duket se kanë bërë që trajneri gjerman të ndryshojë qëndrim.

Sipas gazetarit Gerard Romero, Flick i ka dhënë dritën jeshile Barcelonës për të ndjekur një lëvizje për sulmuesin e Sporting Lisbonës, Luis Suarez.

Suarez është shfaqur si një alternativë e mundshme për repartin ofensiv të Barcelonës, megjithëse negociatat me klubin portugez pritet të jenë të vështira.

Sulmuesi 28-vjeçar nga Kolumbia zhvilloi një sezon të shkëlqyer në vitin 2025/26, duke shënuar 38 gola dhe duke dhënë nëntë asistime në të gjitha kompeticionet.

Sipas faqes së specializuar Transfermarkt, vlera e Suarez vlerësohet rreth 30 milionë euro. Megjithatë, në rast të një transferimi, Sporting Lisbona nuk pritet të pranojë një ofertë më të ulët se klauzola e lirimit prej 80 milionë eurosh.

Barcelona tashmë duhet të vendosë nëse do të tentojë të arrijë një marrëveshje për Alvarez apo do të fokusohet te alternativa kolumbiane.

Klubi belg, Sint-Truiden, ka konfirmuar zyrtarisht transferimin e përhershëm të sulmuesit anësor shqiptar, Arbnor Muja, nga Samsunspor.

Pas një huazimi njëvjeçar, Sint-Truiden ka vendosur të blejë përfundimisht kartonin e futbollistit shqiptar nga klubi turk. Paraqitjet e tij pozitive gjatë sezonit duket se kanë bindur drejtuesit e klubit belg për ta bërë marrëveshjen të përhershme.

Muja zhvilloi 28 ndeshje në të gjitha kompeticionet, duke shënuar gjashtë gola dhe dhënë dy asistime. Këto statistika kanë qenë të mjaftueshme që Sint-Truiden të vendoste për blerjen përfundimtare të tij.

Transferimi është konfirmuar nga faqja zyrtare e klubit belg, e cila ka bërë të ditur gjithashtu se Muja do të vazhdojë të mbajë fanellën me numër 7.

“STVV blen përgjithmonë Arbnor Mujën nga Samsunspor”, shkruan klubi belg në njoftimin e tij zyrtar.

Kujtojmë se Muja ka luajtur më herët për Trepçën, Trepçën ’89, Skënderbeun, Dritën dhe Royal Antwerp, përpara transferimit te Samsunspor.

Myrto Uzuni vazhdon të shënojë gola mbresëlënës me fanellën e Austin, duke treguar një formë të jashtëzakonshme në këtë periudhë të sezonit.

Sulmuesi i Kombëtares shqiptare ka tundur sërish rrjetën në Leagues Cup, duke ndihmuar ekipin e tij të sigurojë një vend në çerekfinalet e turneut, ku përballen skuadrat më të mira të MLS-së dhe kampionatit meksikan.

Austin u përball me Club América në një ndeshje të luftuar, ku skuadra amerikane e pa veten në disavantazh në fillimin e pjesës së dytë. Por në minutën e 67-të ishte pikërisht Uzuni ai që riktheu baraspeshën.

Sulmuesi shqiptar realizoi një gol spektakolar, duke goditur nga e majta dhe duke dërguar topin në cepin e largët të portës, duke i dhënë mundësi Austin-it të barazonte shifrat.

Pas 90 minutave, rezultati mbeti 1-1 dhe fituesi u përcaktua nga gjuajtjet e penalltive. Në lotarinë e 11-metërshave, Austin triumfoi me rezultatin 6-5, ndërsa Uzuni shënoi edhe në tentativën e tij nga pika e bardhë.

Ky sukses i siguroi Austin-it një vend në çerekfinalet e Leagues Cup, ku skuadra amerikane është një nga katër përfaqësueset e MLS-së që vijojnë rrugëtimin në turne.

Për Uzunin, kjo ishte një tjetër paraqitje e rëndësishme, duke konfirmuar formën e shkëlqyer që po kalon me fanellën e Austin-it.

Arsenali ka refuzuar ofertën e fundit të Milanit për talentin anglez, Ethan Nwaneri.

Milani po vazhdon kërkimet për një lojtar ofensiv cilësor që mund t’i përgjigjet kërkesave të trajnerit Ruben Amorim. Drejtuesit e klubit italian po punojnë intensivisht në merkato për të siguruar një futbollist të talentuar me këmbën e majtë, ndërsa aktualisht kanë në listën e tyre tre objektiva kryesorë.

Preferenca e parë e “Rossonerëve” është Ethan Nwaneri. Milani tashmë ka paraqitur një ofertë zyrtare për një marrëveshje huazimi me opsion blerjeje prej 40 milionë eurosh për 19-vjeçarin.

Megjithatë, Arsenali ka vendosur ta refuzojë propozimin e klubit italian, duke e komplikuar situatën për Milanin.

Në sfond, drejtuesit e klubit kuqezi po monitorojnë edhe Dario Osorion e Midtjyllandit dhe Matias Soulén e Romës, të cilët mbeten alternativa për repartin ofensiv.

Megjithatë, sipas La Gazzetta dello Sport, interesi i Milanit për sulmuesin argjentinas Matias Soulé është ftohur ndjeshëm gjatë orëve të fundit, duke e bërë Nwanerin objektivin kryesor të klubit italian.

FC Vushtrria po vazhdon të përforcojë skuadrën në prag të sezonit të ri në Superligën e Kosovës.

Klubi vushtrrias ka zyrtarizuar sot dy transferime të reja, duke afruar në skuadër Gentrit Ullurin dhe Rigon Spahiun.

Ulluri i bashkohet Vushtrrisë pas eksperiencës së fundit te Suhareka. Gjatë karrierës së tij, ai ka mbrojtur edhe fanellat e Lushnjës, Malishevës, Feronikelit 74, Vëllaznimit, Drenicës dhe Ramiz Sadikut.

Ndërkohë, qendërmbrojtësi Rigon Spahiu vjen si një tjetër përforcim për repartin defensiv. Ai ka qenë pjesë e Shkupit, Calcio Leinfelden-Echterdingen, SG Sonnenhof Großaspach, Lirisë, FC Berdenia Berbourg dhe Olympic Charleroi. Më herët, Spahiu ka qenë pjesë edhe e akademive të 1. FC Heidenheim dhe VfB Stuttgart.

“Gentrit, mirë se erdhe në Vushtrri! Të urojmë suksese në rrugëtimin tonë të përbashkët. Rigoni do të jetë një nga gladiatorët tanë në këtë rrugëtim. Mirë se erdhe në familjen e FC Vushtrrisë, Rigon! Shumë fat, suksese dhe një sezon të mbarë me fanellën tonë!”, shkroi klubi në njoftimin për dy përforcimet e reja.

Vushtrria kishte zyrtarizuar një ditë më parë edhe dy transferime të tjera, Kim Sanen dhe Klejdi Palokën, duke vazhduar kështu ndërtimin e skuadrës për sezonin e ri në elitën e futbollit kosovar.