Prishtina – Dukagjini, dueli që mbyll javën e tetë në Superligën e Kosovës

Java e tetë në Albi Mall Superligën e Kosovës do të mbyllet sonte me përballjen ndërmjet Prishtinës dhe Dukagjinit, e cila do të zhvillohet në stadiumin “Kampioni Nacional”, me fillim nga ora 18:00.

Kjo është ndeshja e fundit e kësaj xhiroje, e cila deri më tani është karakterizuar nga rezultate të ngushta dhe befasi në disa prej përballjeve.

Vushtrria shënoi fitore minimale ndaj Gjilanit, duke triumfuar me rezultat 1-0. Me të njëjtin rezultat fitoi edhe Malisheva në udhëtim ndaj Dritës, ndërsa Ballkani mori tri pikë të plota në Podujevë, duke e mposhtur Llapin po ashtu me rezultat 1-0.

Ndërkohë, dueli ndërmjet Drenicës dhe Feronikelit ishte i vetmi që përfundoi pa fitues, me rezultatin 2-2.

Tashmë, vëmendja është te përballja Prishtina – Dukagjini, ku të dyja skuadrat do të kërkojnë rezultat pozitiv për ta mbyllur xhiron e tetë në mënyrën më të mirë të mundshme.