Author: A.M.

Në Turqi, ku po zhvillohet turneu i Grupit 2 të Ligës B, Kombëtarja U-19 e Kosovës ka regjistruar fitoren e dytë në kualifikueset e Kampionatit Evropian 2027, duke mposhtur Gjibraltarin me rezultat të thellë 7-0, pas barazimit 1-1 në ndeshjen e parë ndaj Armenisë.

Ndeshja u dominua nga Kosova që në pjesën e parë. Rin Ahmeti hapi serinë e golave në minutën e 20’ për 1-0, ndërsa Donart Ahmeti dyfishoi epërsinë vetëm tre minuta më vonë. Lorik Mehmeti realizoi dy herë (28’ dhe 44’), duke e çuar rezultatin në 4-0 para pushimit.

Në pjesën e dytë, ritmi i sulmeve të Kosovës vazhdoi. Diart Gashi shënoi për 5-0 në minutën e 63’, ndërsa Agon Uka shtoi të gjashtin në minutën e 79’. Në minutën e 81’, Donart Ahmeti realizoi golin e tij të dytë personal, duke vulosur fitoren e thellë 7-0.

Dueli i fundit i Kosovës U-19 në këtë grup zhvillohet kundër Turqisë, më 30 mars.

Fundjava në ProCredit Superligën e Kosovës sjell ndeshje vendimtare dhe emocione të mëdha, pasi java e 26-të pritet të ndikojë drejtpërdrejt në renditjen përfundimtare të disa skuadrave.

Xhiroja hapet të shtunën me përballjen mes Trepçës dhe Borës, ku kampionët aktualë tashmë e kanë siguruar pozitën e tretë me 22 fitore dhe tri humbje. Në anën tjetër, Bora synon të përmirësojë bilancin dhe të mbyllë sezonin në mënyrë sa më dinjitoze.

Po të shtunën zhvillohet edhe një nga ndeshjet më të rëndësishme të javës, ajo mes Vëllaznimit dhe Rahovecit 029 në Gjakovë. Të dy skuadrat ndodhen në dy pozitat e fundit të tabelës me nga tetë fitore dhe 17 humbje, duke e bërë këtë takim jetik në luftën për mbijetesë në elitë. Fitorja është opsioni i vetëm për të dyja ekipet.

Të dielën, vëmendja përqendrohet te derbi i madh ndërmjet Pejës dhe Sigal Prishtinës. Edhe pse këtë sezon të dy skuadrat nuk kanë arritur rezultatet e pritura, rivaliteti historik garanton një ndeshje të fortë dhe të luftuar. Peja renditet e katërta me 11 fitore dhe 14 humbje, ndërsa Sigal Prishtina është në vendin e gjashtë me nëntë fitore dhe 16 humbje.

Java e 26-të mbyllet me sfidën mes Bashkimit dhe Golden Eagle Yllit. Skuadra nga Prizreni mban vendin e dytë me 17 fitore dhe tetë humbje, ndërsa therandasit kanë një bilanc prej 11 fitoresh dhe 14 humbjesh, duke kërkuar pikë të rëndësishme për renditje më të mirë.

Barcelona shpresonte që pauza ndërkombëtare në fund të sezonit 2025–26 të kalonte pa probleme, por situata nuk po shkon sipas planit. Trajneri Hansi Flick tashmë është përballur me disa dëmtime të rëndësishme gjatë sezonit, dhe tani një tjetër shqetësim është shfaqur në horizont.

Raphinha, i cili ka munguar për gjashtë javë këtë sezon për shkak të dy dëmtimeve në muskujt e kofshës, rrezikon të jetë sërish jashtë fushave. Konfederata Braziliane e Futbollit ka konfirmuar se ai u detyrua të largohej nga ndeshja miqësore kundër Francës pas një problemi muskulor.

Anësori 28-vjeçar ndjeu shqetësim në kofshën e djathtë gjatë pjesës së parë të takimit në “Gillette Stadium” dhe pritet t’i nënshtrohet testeve mjekësore nga stafi i kombëtares braziliane. Gjendja e tij do të bëhet e qartë në orët në vijim, por është pothuajse e sigurt se ai nuk do të jetë i gatshëm për ndeshjen kundër Kroacisë të martën.

Barcelona shpreson që zëvendësimi i tij të ketë qenë thjesht masë parandaluese dhe jo një dëmtim serioz. Megjithatë, me një kalendar shumë të ngjeshur pas pauzës ndërkombëtare përfshirë tre ndeshje brenda 11 ditëve kundër Atletico Madridit  mungesa e Raphinhas do të ishte një goditje e rëndë për skuadrën katalanase.

Bayern Munich ka bërë të qartë qëndrimin e tij për të ardhmen e Michael Olise, duke refuzuar çdo mundësi largimi, madje edhe për një ofertë marramendëse prej 200 milionë eurosh.

Presidenti i nderit i klubit bavarez, Uli Hoeneß, konfirmoi se lojtari nuk është në shitje dhe konsiderohet një pjesë kyçe e projektit të skuadrës. Ai theksoi se klubi nuk është i gatshëm të sakrifikojë cilësinë në fushë për përfitime financiare.

“Olise nuk do të shitet, as për 200 milionë euro. Ne luajmë për tifozët dhe jo për të mbushur arkën e klubit, duke rrezikuar performancën në fushë”, u shpreh Hoeneß.

Ai komentoi gjithashtu interesimin nga Liverpool FC, duke shtuar se bavarezët nuk kanë ndërmend të ndihmojnë rivalët të përforcohen për sezonin e ardhshëm.

Trajneri i Kombëtares shqiptare, Sylvinho, u shfaq i zhgënjyer pas humbjes 2-1 ndaj Polonisë, por në të njëjtën kohë vlerësoi paraqitjen dhe angazhimin e lojtarëve të tij. Ai theksoi se skuadra zhvilloi një ndeshje të mirë, sidomos në pjesën e parë, ku arriti edhe të shënojë, ndërsa në pjesën e dytë pati ulje, por sërish krijoi raste për gol.

Sipas tij, përballë një kundërshtari të fortë si Polonia, me lojtarë të nivelit të lartë ndërkombëtar, paraqitja e barabartë është një sinjal pozitiv për ecurinë e ekipit. Sylvinho nënvizoi se puna me skuadrën është ende në proces dhe se koha në dispozicion ka qenë e kufizuar, çka e bën më të vështirë përgatitjen optimale.

Ai u ndal edhe te zgjedhjet taktike dhe zëvendësimet gjatë ndeshjes, duke pranuar se disa vendime mund të diskutohen, por theksoi se çdo lëvizje është bërë në funksion të ekipit dhe situatës në fushë. Trajneri shtoi se ky është një rrugëtim që kërkon durim dhe përkushtim, duke kujtuar progresin e bërë nga Kombëtarja në vitet e fundit.

Në lidhje me të ardhmen e tij, Sylvinho preferoi të mos komentojë, duke u fokusuar te ndeshja e radhës kundër Ukrainës. Ai përfundoi duke theksuar se në fushë zbresin gjithmonë lojtarët që konsiderohen më të mirët në dispozicion, pavarësisht rrethanave që lidhen me aktivizimin e tyre në klubet respektive.

Kosova ka arritur një fitore të madhe si mysafire ndaj Sllovakisë me rezultat 3–4, në kuadër të gjysmëfinales së “play-off”-it për kualifikim në Kupën e Botës 2026, e cila do të zhvillohet në Shtetet e Bashkuara të Amerikës, Kanada dhe Meksikë.

Ky sukses i rëndësishëm e ka afruar kombëtaren vetëm një ndeshje larg kualifikimit historik në Botëror, duke rritur entuziazmin te tifozët dhe opinionin sportiv në vend.

Fitorja e Kosovës ka nxitur reagime të forta në mediat serbe, të cilat e kanë komentuar me tone këtë arritje,dhe si gjithmon vënë në dyshim pjesëmarrjen e Kosovës në gara ndërkombëtare, ndërsa të tjera i janë referuar kombëtares me terma kontestues.

“Sensacioni i ashtuquajtur Kosovë – në Prishtinë luajnë për kualifikim në Botëror”raporton B92.

Edhe mediumi i pavarur Novar.rs shkruan për suksesin e vendit tonë: “Ashtuquajtura Kosovë është një hap larg Kampionatit Botëror, një ndeshje i ndan nga Botërori”.

Pavarësisht këtyre reagimeve, Kosova mbetet e fokusuar te sfida e radhës. Të martën, në stadiumin “Fadil Vokrri” në Prishtinë, ajo do të përballet me Turqinë në ndeshjen vendimtare për një vend në Kupën e Botës 2026.

Një fitore në këtë përballje do të shënonte një moment historik për futbollin kosovar, duke siguruar për herë të parë pjesëmarrjen në një Kampionat Botëror.

Kombëtarja e Turqisë ka siguruar kualifikimin në finalen e ‘play-off’-it për Kupën e Botës 2026, pasi mposhti Rumaninë me rezultat minimal 1-0. Megjithatë, fitorja u zbeh nga një lajm jo i mire për turqit, pasi mesfushori kryesor, Hakan Çalhanoğlu, pësoi një dëmtim në fund të ndeshjes.

Ylli i Interit u detyrua të largohej nga fusha në minutat e fundit, pasi ndjeu shqetësime gjatë një goditjeje nga distanca rreth minutës së 85-të. Ai u zëvendësua pak minuta më vonë, ndërsa dyshohet për një problem në pulpën e majtë – e njëjta zonë ku ishte lënduar edhe më parë gjatë këtij sezoni.

Gjendja e tij mbetet ende e paqartë dhe pritet të vlerësohet në ditët në vijim. Nëse dëmtimi rezulton serioz, Çalhanoğlu mund të mungojë në finalen vendimtare të ‘play-off’-it, ku Turqia do të përballet me Kosovën në Prishtinë.

Kujtojmë se 32-vjeçari ka pasur vështirësi me formën fizike gjatë vitit 2026, duke u aktivizuar në vetëm disa ndeshje të Serie A me Interin.

Qendërmbrojtësi Lumbardh Dellova do të jetë mungesa e radhës për Kombëtaren e Kosovës në ndeshjen finale të “play-off”-it ndaj Turqisë.

Kombëtarja e Kosovës mposhti Sllovakinë në udhëtim me rezultat 4-3, duke siguruar kualifikimin në finalen e madhe për një vend në Kupën e Botës 2026.

Në këtë finale të “play-off”-it, “Dardanët” do të përballen me Turqinë në stadiumin “Fadil Vokrri”, të martën, më 31 mars, nga ora 20:45. Megjithatë, kjo ndeshje pritet të jetë mjaft e vështirë për ekipin tonë kombëtar, pasi listës së mungesave i është shtuar edhe një tjetër lojtar.

Bëhet fjalë për mbrojtësin Lumbardh Dellova, i cili, pas ndëshkimit me karton të verdhë në ndeshjen ndaj Sllovakisë, ka plotësuar numrin e kartonëve dhe do të mungojë në përballjen vendimtare.

Vetë Dellova e ka konfirmuar këtë për Telegrafin pas ndeshjes në Bratislavë.

Kështu, pas Amir Rrahmanit dhe Leon Avdullaut, të cilët janë të lënduar, Dellova bëhet lojtari i tretë i formacionit që do të mungojë ndaj Turqisë.

Vendin e tij në listën prej 23 futbollistëve pritet ta zërë Leard Sadriu ose Ron Raçi.

Kombëtarja e Kosovës ka arritur të siguroj fianlen e play-off-it të kampionatit botëror,ku mposhti në udhëtim Sllovakinë 4:3 dhe në finale do të takohet kundër Turqisë të martën në stadiumin “Fadil Vokrri”në Prishtinë.

Dardanët me fitoren ndaj sllovakëve kanë shtuar gjasat për një kualifikim në botëror,ku sipas faqes së njohur Football MeetsData Kosova vlerësohet me rreth 45 % të shanseve teksa Turqia vlerësohet me vetëm 55 %.

Përndryshe me përqindje të njëjtë sikurse Kombëtarja e Kosovës është Çekia,teksa Polonia dhe Bosnja Hercegovina vlerësohen me 44%respektivisht 30%,kurse kombëtarja e cila ka vlerësimin më të lartë për kulaifikimn është Italia me 70%.

Por sipas projeksioneve Kosova ka mundësi reale për të shkruar histori të martën mbrëma.

Kujtojmë që ndeshja Kosovë-Turqi pritet të zhvillohet të martën në stadiumin “Fadil Vokrri”në Prishtinë.

Në Bratislava janë ndërmarrë masa të rrepta sigurie në prag të përballjes mes Kombëtares së Sllovakisë dhe asaj të Kosovës në futboll, e vlefshme për gjysmëfinalen e “play-off”-it kualifikues për Kupën e Botës 2026.

Autoritetet vendase kanë konfirmuar se gjithçka është organizuar për të garantuar mbarëvajtjen e qetë të këtij eventi të rëndësishëm sportiv.

Ndeshja do të zhvillohet sonte në stadiumin kombëtar të Bratislavës, me fillim nga ora 20:45. Institucionet e sigurisë kanë paralajmëruar prani të shtuar të forcave policore para, gjatë dhe pas takimit.

“Qëllimi i masave të sigurisë është mbrojtja e jetës, shëndetit dhe pronës së qytetarëve, sigurimi i rendit publik, si dhe garantimi i një rrjedhe të qetë të trafikut rrugor në Bratislavë. U bëjmë thirrje tifozëve që të ndjekin udhëzimet e organizatorëve dhe policisë dhe të shmangin çdo veprim të paligjshëm para, gjatë dhe pas ndeshjes, në stadium apo në afërsi të tij”, njofton policia sllovake në rrjetet sociale.

Autoritetet e kanë kategorizuar këtë ndeshje si një event me rrezikshmëri të lartë, duke marrë parasysh interesimin e madh dhe numrin e konsiderueshëm të tifozëve që pritet të jenë të pranishëm.

Për këtë arsye, njësi të ndryshme policore, përfshirë ato të trafikut, ndërhyrjes së shpejtë dhe hetimeve kriminale, do të jenë në terren për të monitoruar situatën dhe për të reaguar në çdo rast të nevojshëm.

Nga ana tjetër, përkrahja për Kosovën pritet të jetë e fuqishme edhe në tribunat e stadiumit. Edhe pse zyrtarisht tifozëve kosovarë u takon një numër i kufizuar biletash, interesimi i madh lë të kuptohet se prania e tyre mund të jetë edhe më e lartë.