ATV

Tag: Kuvendi i Kosovës

  • Tensione në Kuvend, Konjufca: Ndërpritet kjo seancë, shkojmë në shtëpi

    Tensione në Kuvend, Konjufca: Ndërpritet kjo seancë, shkojmë në shtëpi

    Seanca e nisur pas orës 12:00 ka përfunduar para kohe. Pikat e para të rendit të ditës ishin disa marrëveshje ndërkombëtare dhe u kërkua votimi dhe prania e 80 deputetëve.

    Por, shefi i Grupit Parlamentar i PDK-së, Abelard Tahiri tregoi se partia ku ai bën pjesë nuk i voton marrëveshjet ndërkombëtare.

    “Ne kemi hezituar për t’i votuar këto marrëveshje të enjten. Kemi qenë shumë hezitues për këtë çështje”.

    Mimoza Kusari-Lila e quajti të pakuptimtë deklaratën e Tahirit. Ajo kërkoi që të arrihet numri i duhur i deputetëve për t’i votuar marrëveshjet ndërkombëtare.

    “Dëshpëruese ndryshimi i qëndrimit dhe pavërtetat që i thotë shefi i Grupit Parlamentar të PDK-së, Abelard Tahiri. Asnjëherë Grupi Parlamentar i Lëvizjes Vetëvendosje nuk ka pasur pretendime për kërcënim apo devijim të seancës”, tha ajo, teksa i kërkoi Tahirit të mos akuzojë dhe ndryshojë fjalët e tij.

    “Mos bën lojëra tilla. Ju jeni njerëz të padijshëm, të paaftë. S’mundesh me drejtu një grup parlamentar siç duhet. S’është problem i PDK-së ky. Si GP nuk ua votojmë marrëveshjet. Problemin kryesor e kemi te paaftësia juaj”, tha Tahiri, teksa kërkoi nga Konjufca që t’i qetësojë deputetët, pas polemikave dhe tensioneve të krijuara në sallë.

    Më pas, Konjufca njoftoi ndërprerjen seancës së Kuvendit të Kosovës. “Atëherë ndërpritet kjo seancë. Shkojmë në shtëpi”, tha ai, i cili paraprakisht i kërkoi sinqeritet Tahirit të PDK-së.

    “Jeni pajtuar në një pikë, do të sjellim aq deputetë sa kemi mundësi. Nuk ka qenë që nuk do t’i votoni marrëveshjet ndërkombëtare. Ai është qëndrim i PDK-së, unë e respektoj. Sinqeritet po kërkoj, kjo më ndihmon në mbarëvajtjen e seancave. Këto po ta kërkoj. Kaq e thjeshtë është”.

    Dy pikat e para të seancës së sotme që ishin marrëveshje ndërkombëtare janë: Shqyrtimi i Projektligjit nr.08/L-221 për ratifikimin e Marrëveshjes së kredisë dhe projektit ndërmjet Republikës së Kosovës, përfaqësuar nga Ministria e Financave, Punës dhe Transfereve, KOSTT (Operator Sistemi, Transmisioni dhe Tregu sh. a.) dhe KFË, Frankfurt Am Main (KFË) për Projektin -Zhvillimi i sektorit të energjisë VII – përmirësimi i rrjetit të transmetimit, dhe shqyrtimi i Projektligjit nr.08/L-222 për ratifikimin e Marrëveshjes së kredisë në mes të Republikës së Kosovës dhe Bankës Evropiane për rindërtim dhe zhvillim për Projektin “Ngrohtorja solare e Prishtinës”.

  • Konsensus mes pozitës e opozitës, kalon ligji për zgjedhjet

    Konsensus mes pozitës e opozitës, kalon ligji për zgjedhjet

    E nisëm me disponim të mirë.

    Ky disponim i parapriu një gjëje që nuk ndodh aq shpesh në Kuvendin e Kosovës. Pozitë e opozitë u bënë bashkë dhe me 86 vota për, asnjë kundër dhe asnjë abstenim, votuan miratimin e Ligjin për Zgjedhjet e përgjithshme.

    Kosova mbetet me një zonë zgjedhore dhe nga pesë deputetë sa kanë mundur të votohen deri më tani, me hyrjen në fuqi të këtij ligji, mund të votohen dhjetë.

    Kurse, nga ky ligj, sipas Kryetarit të Komisionit Ad Hoc për reformën zgjedhore, Abelard Tahiri nga PDK-ja, do të favorizohet mërgata.

    “Kemi marrë edhe rekomandime nga grupet parlamentare. Për herë të parë diaspora do ta ketë mundësinë të votojë në tri mënyra, në njërën prej tyre edhe fizikisht në ambasada diplomatike të vendit tonë. Ky është një hap i madh që e forcon edhe lidhjen tonë me diasporën”, tha Tahiri.

    Pas një mocioni të deputetit Rrustemi, që kërkoi përshpejtim të procedurave, Projektligji për Zgjedhjet e Përgjithshme kaloi edhe në lexim të dytë.

    Paraprakisht atmosferë e mirë i shoqëroi edhe gjatë seancës për shqyrtimin në lexim të dytë të Ligjit. Të gjitha amendamentet e propozuara nga deputetët lidhur me Ligjin për Zgjedhjet e Përgjithshme kaluan, pos amendamentit të Isak Shabanit nga PDK-ja.

    “Numërimi në qendrën komunale të votimit, bëhet duke ofruar transparencë të plotë. KQZ-ja obligohet të sigurojë transparencë të plotë me ofrimin e mjeteve mbështetëse teknologjike”, tha Shabani.

    E për këtë, nënkryetari i komisionit ad hoc, Adnan Rrustemi, pati një përgjigje.

    “Nuk mund t’i vendosim një dispozitë strikte KQZ-së, duke mos i marrë parasysh mundësit e KQZ-së. Ky formulim parashihet në amendamentin e 15-të”, tha Rrustemi.

    Ndërkaq, miratimi i këtij Ligji u përshëndet edhe nga kryeministri i vendit.

    Projektligji për Zgjedhjet e Përgjithshme është hartuar nga Komisioni Ad Hoc për reformën zgjedhore, i themeluar nga Kuvendi i Kosovës. /atvlive.tv

    Edicionin Qendror të lajmeve në ATV, e gjeni në videon më poshtë:

  • ​Shoqëria civile: Partitë politike, unanime në cenimin e integritetit zgjedhor

    ​Shoqëria civile: Partitë politike, unanime në cenimin e integritetit zgjedhor

    Organizatat e shoqërisë civile kanë reaguar pasi Kuvendi i Kosovës miratoi në dy lexime Projektligjin për zgjedhjet e përgjithshme. Sipas tyre, praktikat e miratimit të projektligjeve të rëndësishme, në procedura të përshpejtuara, janë në kundërshtim dhe të dëmshme me standardet e jetës parlamentare.

    Në reagimin e organizatave është theksuar se projektligji në fjalë nuk adreson nevojën për reformë zgjedhore.

    “Kuvendi i Kosovës miratoi sot projektligjin për zgjedhjet e përgjithshme, në të dy leximet brenda të njëjtës seancë, e për më shumë dhe pa kosto financiare. Praktikat e miratimit të projektligjeve të rëndësishme në procedura të përshpejtuara janë në kundërshtim dhe të dëmshme për standardet e jetës parlamentare. Ky projektligj, nuk adreson nevojën për reformë zgjedhore, që u proklamua si e tillë edhe në vetë emrin e komisionit ad-hoc. Për më tepër, përmbajtja e këtij projektligji përveç pjesës ‘kozmetike’, nuk adreson shumë prej mangësive përmbajtjesore të sistemit. e në disa raste veçse i përkeqëson ato”, është thënë në reagim.

    Organizatat e shoqërisë civile kanë deklaruar se do të ndjekin edhe format e tjera për kundërshtimin e hyrjes në fuqi të këtij ligji.

    “Ne shprehim kundërshtimin tonë dhe vazhdojmë të alarmojmë publikun dhe të gjithë akterët se reforma zgjedhore, e nisur para më shumë se një dekade, u shfrytëzua nga partitë politike për akomodim të interesave partiake në dëm të integritetit zgjedhor, e jo me qëllim burimor të përmirësimit të sistemit zgjedhor dhe nivelit të përfaqësimit politik në Kosovë. Koalicioni i OJQ-ve të cilët janë të angazhuar për rritjen e integritet zgjedhor, duke vlerësuar këtë ligj të një rëndësie të veçantë për nivelin e demokracisë Kosovare, do të ndjek edhe format tjera për kundërshtimin e hyrjes në fuqi të këtij ligji, i cili do ta cenojë integritetin zgjedhor”, është theksuar në reagim.

    Sipas tyre, projektligji i miratuar reflekton më shumë kompromis në mes të partive politike të cilat kanë shtyrë përpara interesat e tyre në raport me integritetin e kandidatëve, votimin preferencial dhe jashtë vendit.

    “Ndonëse me efektet të cilat do të cenojnë vlerat dhe standardet dhe integritetin zgjedho , me këto pasoja të këtij projektligji do të ballafaqohemi qysh në procesin e ardhshëm zgjedhor. Lista e kandidatëve dhe të zgjedhurit që mund të jenë pjesë e pjesë e Kuvendit të Kosovës, kuvendeve komunale apo kryetarë të komunave, potencialisht do të jenë individë të dënuar për vepra penale me më pak se një vit burgim, me kusht apo me gjobë – e që përbëjnë rreth 80% të rasteve vetëm viteve të fundit. Në anën tjetër, pozita e Kryesuesit dhe anëtarëve të KQZ-së do të politizohen dhe do dëmtohet kredibiliteti dhe imazhi i këtij institucioni të pavarur, për shkak se shkarkimi i tyre për shkelje të integritetit do të mund të bëhet vetëm me miratim të 2/3 të anëtarëve”, kanë deklaruar organizatat.

    Organizatat përkrahëse janë: Demokraci për Zhvillim (D4D); Fondacioni Kosovar për Shoqëri Civile (KCSF); Grupi për Studime Juridike dhe Politike (GLPS); Instituti Demokratik i Kosovës (KDI); Instituti i Kosovës për Drejtësi (IKD); Lëvizja FOL; Organizata ÇOHU./KP

  • ​Kuvendi miratoi në lexim të dytë Projektligjin për zgjedhjet e përgjithshme

    ​Kuvendi miratoi në lexim të dytë Projektligjin për zgjedhjet e përgjithshme

    Kuvendi i Kosovës, me 79 vota për ka miratuar në lexim të dytë Projektligjin për zgjedhjet e përgjithshme. Deputetët e pozitës dhe opozitës u bënë bashkë për t’i dhënë dritën e gjelbër reformës zgjedhore, ku miratuan edhe 19 amendamente shtesë për këtë projektligj.

    Miratimi i këtij projektligji erdhi me procedurë të përshpejtuar, pas miratimit në lexim të parë gjatë së enjtes.

    Kuvendi ndërpreu përkohësisht punimet e seancës plenare deri në orën 17:30, për t’i dhënë hapësirë miratimit në lexim të dytë edhe të Projektligjit për ndarjet buxhetore./KP

  • Dështon rezoluta e PDK-së për shkarkimin e ministres Hajdari

    Dështon rezoluta e PDK-së për shkarkimin e ministres Hajdari

    Propozim-rezoluta e grupit parlamentar të PDK-së për gjendjen në Ministrinë e Industrisë, nëpërmjet së cilës u kërkua shkarkimi i ministres Rozeta Hajdari, nuk kaloi. Projekt-rezoluta mori vetëm 26 vota për.

    Ndërkohë, në seancën e së enjtes në të cilën u trajtuan pikat e papërfunduara nga seancat e kaluara, u miratua plani hapësinor për Parkun Kombëtar “Bjeshkët e Nemuna”.

    “Qëllimet kryesore të planit janë futja nën kontroll e zhvillimeve dhe zvogëlimin në maksimum i veprimeve abuzuese me mjedisin”, tha ministri i Infrastrukturës, Liburn Aliu.

    Por, pati kundërshtime.

    Pavarësisht qëndrimit të partisë, për këtë plan hapësinor votuan edhe dy deputete të opozitës.

    Ndërkohë në rend dite ishte edhe votimi për ndryshimin dhe plotësimin e Projektligjit për lirinë fetare.

    Derisa nevojiten edhe votat e komunitetit serb, shqyrtimi është shtyrë për një seancë tjetër.

    “Një pikë e cila nuk mund të kalojë pa pjesëmarrjen dhe votat e komunitetit serb, sepse është një projektligj i karakterit vital dhe kërkon edhe votën e 2/3 të pakicave. Dhe pjesëmarrjen e një pjese të votave të komunitetit serb”, tha kryetari i Kuvendit, Glauk Konjufca.

    Me 70 vota për, po ashtu, është krijuar Komisioni Hetimor Parlamentar lidhur me rastet e dhunës seksuale dhe dhunës në familje. Derisa u zgjodh edhe një anëtar i bordit për Ankesa të Mediave, si dhe zëvendësi i Avokatit të Popullit nga radhët e komuniteteve joshumicë.

    Në mungesë të deputetëve të AAK-së në sallë është shtyrë votimi i Propozim-Rezolutës për punën dyvjeçare të Qeverisë, e propozuar nga kjo parti. /atvlive.tv

    Edicionin Qendror të lajmeve në ATV e gjeni në videon më poshtë:

  • Kuvendi mban seancë, në rend dite 28 pika

    Kuvendi mban seancë, në rend dite 28 pika

    Kuvendi i Republikës së Kosovës do të mbajë sot seancën e radhës, e cila do të jetë vazhdim i pikave të papërfunduara të dy seancave paraprake.

    Në rend të ditës janë 28 pika nga seanca që nuk përfunduan në shkurt, prill dhe maj.

    Seanca e Kuvendit pritet të fillojë në ora 12:00.

    Paraprakisht do të mblidhet Komisioni për Legjislacion, Mandate, Imunitete, Rregulloren e Kuvendit dhe Mbikëqyrjen e Agjencisë Kundër Korrupsionit.

    Në këtë mbledhje do të bëhet rishpallja e konkursit për anëtarë më Këshillin Gjyqësor të Kosovës.

  • Kuvendi mban tri seanca plenare gjatë kësaj jave

    Kuvendi mban tri seanca plenare gjatë kësaj jave

    Kuvendi i Kosovës do të mbajë tri seanca plenare gjatë kësaj jave. Deputetët fillimisht do të mblidhen të mërkurën me 7 qershor për të shqyrtuar një mori pikash të papërfunduara nga seancat e kaluara, kurse të enjten do të mbajnë fillimisht një seancë të veçantë plenare ku do të shqyrtohet Projektligji për reformën zgjedhore, ndërsa pas kësaj do të mbahet seanca e rregullt me pika të tjera në rend të ditës. Kjo u vendos sot në mbledhjen e Kryesisë së Kuvendit.

    Shefja e Grupit Parlamentar të LVV-së, Mimoza Kusari-Lila, tha se ka një konsensus mbipartiak për miratimin e reformës zgjedhore, derisa bëri të ditur se të enjten pritet të shqyrtohen edhe katër marrëveshje ndërkombëtare, raporton KosovaPress.

    “Jemi dakorduar të gjitha grupet parlamentare me një konsensus mbipartiak për reformën zgjedhore që të enjten të trajtohet si pikë e veçantë. Pas asaj hapet një seancë e re, e cila si zakonisht ka pikat e rregullta dhe ka katër marrëveshje ndërkombëtare”, tha ajo para mediave.

    Miratimin e reformës zgjedhore e konsideroi të nevojshëm edhe shefi i Grupit Parlamentar të PDK-së, Abelard Tahiri.

    “(Reformën Zgjedhore) Kemi arrit me përmbyllë dhe me bërë një punë jashtëzakonisht të mirë, të gjitha grupet parlamentare që kemi qenë pjesë e këtij komisioni. Më në fund do t’i dërgohet për trajtim seancës të enjten në orën 10:00, si pikë e veçantë. Ju e dini se janë disa ndryshime esenciale dhe thelbësore të sistemit tonë zgjedhor. Duke filluar nga vota preferenciale, propozimet që janë bërë, nga lehtësimi i votimit të diasporës, pastrimit të ligjit me një pjesë të dispozitave që nga koha e UNMIK-ut, çështjen e numërimit të votave dhe shumë çështje të tjera”, theksoi Tahiri.

    Ndërkaq, shefi i Grupit Parlamentar të AAK-së, Besnik Tahiri, tha se do të propozojnë rritje të koeficientit të pagave nga 105 në 129 euro, përmes amendamentimit të Ligjit të buxhetit.

    “Për neve si AAK është e rëndësishme interpelanca ndaj ministrit të Financave, Hekuran Murati, që ndërlidhet me koeficientin për zyrtarët publikë, rritjen e koeficientit me një amendamentim të Ligjit për Buxhet nga 105 në 129 sa ne kemi rekomanduar dhe të njëjtën kohë dislokimin e mjeteve për projektet kapitale”, theksoi ai.

    Po ashtu, në mbledhjen e sotme të Kryesisë u bë e ditur se do të dalë në pension sekretari i Kuvendit, Ismet Krasniqi.

    I njëjti në një adresim para mediave, u shpreh falënderues ndaj të gjithë bashkëpunëtorëve të tij në 17 vjet që ka mbajtur këtë post.

    “Jam i kënaqur që kam arritur që afër 17 vite të jem krahu i djathtë i të gjithë deputetëve të cilët kanë pasur nevojë për këshillat e administratës. Ndërsa juve(mediave) një falënderim të veçantë për përcjelljen e punës sonë të drejtë, të saktë dhe me kohë”, deklaroi ai. /kp

  • ​Gërvalla për deputetët e LDK-së: Ngatërrojnë partneritetin me servilizëm

    ​Gërvalla për deputetët e LDK-së: Ngatërrojnë partneritetin me servilizëm

    Seanca e Kuvendit ku po diskutohet për situatën në veri, për zëvendëskryeministren e Kosovës, Donika Gërvalla, është zhgënjyese.

    Duke ju drejtuar deputetëve të LDK-së, ajo ka thënë se Qeveria Kurti nuk e ngatërron partneritetin me servilizëm dhe politikën me thashethemet.

    Ajo ka përsëritur se me partnerët ndërkombëtar bisedojnë hapur dhe synojnë t’i bindin për qëllimet e drejta të Kosovës.

    Sipas saj dhuna në veri nuk ka të bëjë me të drejtat e pakicave serbe.

    “Dhuna në veri nuk ka të bëjë me të drejtat e pakicave serbe, nuk ka të bëjë me sigurimin e të drejtave të tyre dhe e dimë shumë mirë se cilat janë bandat serbe që terrorizojnë banorët brenda republikës sonë….Është një kohë e vështirë e cila kërkon vendime të vështira, me partnerët tanë bisedojmë hapur dhe debatojmë me ta jemi të pastër dhe synojmë të bindim partnerët tanë për qëllimet tona të drejta. Në dallim nga ata që sot flasin në emër të LDK dhe ngatërrojnë partneritetin me servilizmin politikën me thashethemet…Në krahë të presidentit Rugova e kam mësuar gjatë takimeve të tij që miqtë aleatët dhe partnerët tanë nuk duhet gënjyer, por duhet shpjeguar, diskutuar dhe koordinuar me ta për të siguruar mbështetjen e tyre për interesat legjitime të qytetarëve”, u shpreh ajo, transmeton KP.

    Ministrja e Punëve të Jashtme dhe Diasporës, Donika Gërvalla i ka replikuar Ramush Haradinajt duke i thënë se është turp me prit në zyre Radoiçiqin dhe shokët e tij e jo t’i mbrosh qëndrimet legjitime të Kosovës.

    “U përmend fjala turp deputetit Haradinaj e paska lëshuar sallën, turp nuk është të mbrosh qëndrimet legjitime të Kosovës turp është me prit në zyre Radoiçiqin dhe shokët e tij jo pse është serb por kriminel. Dy partitë politike këtu Aleanca dhe PDK thjesht nuk kanë kredibilitet për të folur për aleancën me Amerikën. Që nga qeveria Hotin as LDK më nuk ka kredibilitet…Ne nuk i gënjejmë SHBA dhe as BE e jo si ju deputetët të nderuar të opozitës, këtu në foltore jeni shqiponjë kur shkoni nëpër ambasada ktheni në pula”, tha ajo.

    Gërvalla tha se SHBA-të dhe BE nuk kërkojnë nënshtrim, por presin ndërtimin e një shteti demokratik.

    “SHBA dhe BE na ne nuk kërkojnë as nënshtrim as servilitet presin të ndërtojmë një shtet demokratik dhe ligjor presim vendime të guximshme presim marrje të përgjegjësisë për çdo veprim tonin presin debat të hapur në shërbim të prosperitet të Kosovës”, u shpreh ajo.

    Gërvalla ka kritikuar edhe PDK-në, sipas saj, për mos-shkuarjen e kryetarëve të zgjedhur në objektet komunale.

    E pas fjalimit të saj, shefi i grupit parlamentar të LDK-së, Arben Gashi, ka thënë se ndonëse Gërvalla e përmendi LDK-në 13 herë, si person ajo hynë në kategorinë e personave që si parti as nuk e replikojnë.

    “Hynë në kategorinë e personave që LDK as nuk replikon”, tha ai.

    Debati parlamentar për situatën në veri të vendit është ndërprerë për një pauzë deri në 15:30.

    Seancën e plotë të Kuvendit e gjeni në videon më poshtë:

  • ​Abdixhiku i kundërpërgjigjet Kurtit: Koordinimin e dini mirë si ai mbrëmë me telefon

    ​Abdixhiku i kundërpërgjigjet Kurtit: Koordinimin e dini mirë si ai mbrëmë me telefon

    Kryetari i Lidhjes Demokratike të Kosovës, Lumir Abdixhiku i ka replikuar fjalëve të kryeministrit Kurti për çështjen e arrestimit të bandave në veri, i cili pyeti liderët opozitarë se a duhet ta bëjë këtë veprim me apo pa koordinim.

    Sipas Abdixhikut edhe koordinimi për arrestimin e këtyre kriminelëve serbë duhet të bëhet sikur ai i mbrëmshmi me një telefonat.

    “Se çfarë koordinimi duhet e dinë ti shumë mirë kryeministër. Si ai mbrëmë me telefon e di shumë qartë si ai mbrëmë qasi koordinimi për t’i arrestuar kriminelët, qashtu qysh e ke bërë mbrëmë, ose pak më herët nuk ka Zajednicë as aso e as këso, RTK asociacion ka qasi koordinimi me atë koordinim arrestoj kriminelët në veri”, u shpreh ai, transmeton KP.

    Kreu i LDK-së u shpreh se Kurti i cili Oliver Ivanoviqin e ka quajtur mendjemprehtë, sekretarin amerikan Blinken e quan naiv.

    “Një njeri që ky kryeministër e ka quajtur mendjemprehtë e sekretarin amerikan të shtetit naiv, Oliver Ivanoviq sipas Kurtit mendje prehtë, Antony Blinken sekretar i shtetit naiv, ja patriotizmi i popullit të Kosovës dhe ju e duartrokisni. Ju mburreni me këtë“, tha ai.

    Lideri i Lidhjes Demokratike të Kosovës, Lumir Abdixhiku në këtë debat parlamentar për situatën në veri kërkoi koordinim me SHBA-të për shtrirjen e sovranitetit në atë pjesë të Kosovës.

    Sipas tij, koordinimi me aleatët është patriotizëm e kjo që po bënë kryeministri Kurti është tradhti.

    “Me ta duhet të shtrojmë edhe sovranitetin në veri dhe ky dallim është substancial, sepse për neve është patriotizëm, e jotja çka po bënë është tradhti sepse të zgjedhësh politikisht të sjellës kundër Republikës së Kosovës dhe NATO dhe BE dhe SHBA dhe aleatët tanë me deklarata publike, të zgjedhësh të krijosh një vëmendje qytetare ditën kur Vuçiq përballet me një propagandë dhe ti asiston t’i heqësh këtë vëmendje atij dhe të marrësh këtë barrë në emër të Kosovës kjo nuk ka lidhje me patriotizëm dhe as me dinjitet. Nuk ka lidhje me dinijtet kjo është sjellje e papërgjegjshme fëmijërore është, popullsitë” ,tha ai.

    Seancën e plotë të Kuvendit e gjeni në videon më poshtë:

    LEXO EDHE:

    ​Kurti-liderëve opozitarë: Arrestimin e kriminelëve serbë me koordinim a pa koordinim

  • ​Kurti-liderëve opozitarë: Arrestimin e kriminelëve serbë me koordinim a pa koordinim

    ​Kurti-liderëve opozitarë: Arrestimin e kriminelëve serbë me koordinim a pa koordinim

    Kryeministri i Kosovës, Albin Kurti ka replikuar me krerët opozitar në debatin parlamentar që po zhvillohet në Kuvendin e Kosovës për gjendjen në veri të vendit.

    Kurti u shpreh se protestat në komunat veriore nuk po bëhen për zgjedhje të reja komunale, por janë protesta të njerëzve që adhurojnë Millosheviqin dhe Putnin.

    “Nuk është kjo protestë as në Zveçan, as në Leposaviq e Zubin Potok për zgjedhje të reja komunale, këto janë protesta me kryqin me katër C, me shkronjën ruse Z, këto janë protesta të njerëzve që adhurojnë Millosheviqin dhe Putinin. Dhe punojnë të paguar nga Beogradi dhe me direktiva të Beogradit. Pra, nuk është thjesht vetëm çështja e komunës aty. A ndërtesat e komunës janë të Republikës. Nëse nuk janë për kryetar të komunave për kë janë aty, nëse kryetarët e komunave nuk shkojnë aty ku duhet të jenë ata. Që nga viti 1999 ka struktura paralele ilegale atje, nuk mund të krijojmë struktura paralele strukturave paralele, nuk ka kuptim të krijojmë zyra paralele atje”, theksoi ai, transmeton KosovaPress.

    Shefi i ekzekutivit kosovar iu është përgjigjur thirrjeve të liderëve opozitar për arrestim të kriminelëve serbë, duke i pyetur ata se a duhet ta bëjë këtë arrestim me koordinim apo pa koordinim.

    “Mua mu tha më shumë se sa një herë që meqenëse po i dini me emra edhe me hollësi të tjera kriminelë e bandave atëherë pse s’po i arrestoni dhe u kërkua prej meje që t’i arrestoj. Tash ne kemi filluar t’i arrestojmë dhe në fund të fjalimit përmenda emrat e atyre që janë të arrestuar. Por natyrisht që ka edhe aso që janë kriminel të paarrestuar që janë në veri të vendit. Nëse i hasim dihet që i arrestojmë mirëpo ka edhe mundësi që kanë shkuar në Serbi….Unë iu falënderoj për këtë thirrje që ma bëtë që të arrestohen këta kriminel, por unë e kam një pyetje për juve arrestimi i këtyre kriminelëve a me koordinim a pa koordinim. Qysh po thoni? Pra, ju po bëtë thirrje që njësia speciale e jona të marr urdhër që të bëjë arrestimin e këtyre kriminelëve dhe unë iu falënderoj shumë për këtë mbështetje dhe për këtë sjellje shtetërore, por megjithatë për shkak të diskursit tuaj më duhet tua bëjë këtë pyetje shtesë arrestimin e këtyre kriminelëve në veri për të cilën po më inkurajoni a me koordinim a pa koordinim.Pra, arrestimin po e bëjmë se ju thatë, ju ma dhatë mbështetjen për besë edhe në paça pas ndonjë dilemë mu hoqën dilemat kur folët ju të dy”, tha ai.

    Gjatë këtyre kundërpërgjigjeve karshi opozitës, Kurti pyeti edhe deputetin e PDK-së, Abelard Tahiri se arrestimin e kriminelëve serbë në veri a ta bëjë me shurdhues a pa shurdhues?

    “Arrestimin e tyre e kërkoi edhe ish ministri i Drejtësisë tash deputeti, Abelard Tahiri ky ka qenë ministër i Drejtësisë ky i di këto punë edhe ky tha që duhet të arrestohen kriminelët edhe deputetin Abelard Tahiri e pyes të njëjtën pyetje a me koordinim a po koordinim. Por, për këtë e kam edhe një pyetje speciale a me shurdhues a pa shurdhues qysh po thu deputeti Tahiri. Deputeti Krasniqi dhe Abdixhiku le të përgjigjen a me koordinim apo pa koordinim, e deputeti Tahiri le të përgjigjet me shurdhues a pa shurdhues” , u shpreh ai.

    E karshi kreut të PDK-së, parti kjo cila ka fituar udhëheqjen në dy komuna veriore, Zubin Potok dhe Zveçan, Kurti adresoi edhe një kërkesë.

    Ai kërkoi që këta kryetar të çlirohen e të shkojnë në objektet komunale sepse Policia i garanton e qeveria i mbështet.

    “Këta janë kanë plotësuar kërkesën Vuçiqit ndërsa, nuk e kanë larguar policinë se nuk pyeten më për polici, a po të pyeteshin për polici unë e di që këta edhe policinë e kishin largua….çlironi ata dy kryetarë që i kanë fitu zgjedhjet në Zubin Potok, kur të ec rroga duhet me punua kur të garojsh dhe zgjedhjesh e do me fitua duhet edhe me punua, prandaj çlironi ata kryetar mos i mbani pengë se ata dojnë me shku edhe në Zveçan edhe në Zubin Potok policia i garanton, qeveria i mbështet ju mos i mbani peng”, tha Kurti.

    Seancën e plotë të Kuvendit e gjeni në videon më poshtë: