Kuvendi i Kosovës ka mbajtur sot një minutë heshtje për tetë të rinj që ranë dëshmorë 24 vjet më parë në një betejë të zhvilluar në Istog.
Kërkesën e bëri deputeti i AAK-së, Bekë Berisha.
“Meqë dje nuk u mbajt seancë, e kam një kërkesë. Dje 24 vjet më parë, tetë djem të rinj ranë dëshmorë në betejën në Istog. Ju ftoj për një minutë heshtje!”, tha Berisha.
Kuvendi i Kosovës do të mblidhet sot në seancë parlamentare.
Seanca do të fillojë me deklarimet jashtë rendit të ditës dhe pyetjet parlamentare.
Po ashtu në rend dite është shqyrtimi i dytë i Projektligjit për ndryshimin dhe plotësimin e ligjeve që kanë të bëjnë me racionalizimin dhe vendosjen e vijave llogaridhënëse të Agjencive Ekzekutive, shqyrtimi i dytë i Projektligjit për Prokurorin e Shtetit, shqyrtimi i rekomandimeve lidhur me Raportin e auditimit të teknologjisë së informacionit “Sistemi për Menaxhimin e Pagave” dhe shqyrtimi i rekomandimeve lidhur me Raportin e auditimit: “Funksionimi i sistemit të Grantit të Performancës Komunale dhe menaxhimi i projekteve të financuara nga Donatorët për vitin 2021”.
Kuvendi do të votojë edhe propozimin e GP të LVV për zëvendësimin e anëtarëve në komisionet parlamentare.
Kjo seancë ishte e paraparë të mbahej dje, por u shty për shkak të mungesës së kuorumit.