ATV

Tag: Ballina

  • Në Prishtinë ndizen qirinj për nxënësit e vrarë në Beograd

    Në Prishtinë ndizen qirinj për nxënësit e vrarë në Beograd

    Në shkallët e Teatrit Kombëtar të Kosovës në Prishtinë janë ndezur qirinj në nderim të 8 nxënësve dhe rojës së një shkolle në Beograd, të cilët u vranë të mërkurën, me armë zjarri nga një nxënës i mitur.

    Homazhet u bënë në hapje të Festivalit “Mirëdita, Dobar dan!”, ndërsa atyre iu bashkua dhe ministri për Komunitete dhe Kthim në Qeverinë e Kosovës, Nenad Rashiq.

    Të mërkurën, një 13-vjeçar hapi zjarr në shkollën e tij në kryeqytetin serb, duke vrarë tetë nxënës dhe një roje përpara se të arrestohej. Në këtë ngjarje që ka tronditur Serbinë, janë plagosur edhe 6 nxënës dhe një mësuese.

    Festivali, po ashtu, nisi me një minutë heshtje në nderim të viktimave të djeshme në Beograd.

    I themeluar në vitin 2014, si ngjarja më unike në Prishtinë e Beograd, festivali “Mirëdita, dobar dan!”, qëllim kryesor ka krijimin e lidhjeve të reja ndërmjet Kosovës dhe Serbisë përmes prezantimit të kulturave respektive.

    Edhe drejtuesit e institucioneve të Kosovës u kanë shprehur ngushëllime familjarëve të viktimave. /EO

  • Fischer: Vuçiq është në një situatë të vështirë, është i rrethuar nga NATO dhe aleati i tij po e humb luftën

    Fischer: Vuçiq është në një situatë të vështirë, është i rrethuar nga NATO dhe aleati i tij po e humb luftën

    Atasheu ushtarak amerikan, kolonel Jeffrey Fischer, intervistë CONTEXT në ATV, tha se presidenti i Serbisë, Aleksandar Vuçiq tani është një një situatë të vështirë, pasi që është i rrethuar nga NATO dhe aleti i tij, Rusia po e humb luftën.

    “Presidenti Vuçiq është në një situatë të vështirë. Nuk do të doja të isha në vend të tij. Ai tërësisht është rrethuar nga NATO-ja dhe aleati i tij numër një është në një luftë të cilën po e humb, 100-200 mijë ushtarë të vrarë, tani ka raportime nga vija e frontit se grupi mercenar “Wagner” në fakt po lufton ushtarët rusë. Një nga citatet e mija të preferuar nga Napoleoni është: “Kurrë mos i pengoni armikut kur ai është duke e bërë një gabim”, andaj nëse forcat ruse po e luftojnë njëra-tjetrën, kjo është një mundësi e shkëlqyer, ndërsa sa i përket Serbisë dhe presidentit Vuçiq, çfarë mundësi ka ai… është duke e shikuar perëndimin, duke e shikuar NATO-n, Bashkimin Evropian dhe duke e shikuar aleatin e tij i cili po dështon në mënyrë spektakolare”, tha Fischer.

    Ai tha se sjellja e mirë e Kosovës po shpërblehet nga perëndimi, pasi kohëve të fundit ka shënuar progres në disa tema të rëndësishme.

    “Unë kam qenë i stacionuar në Kosovë për dy vite si atashe i mbrojtjes dhe kam qenë pilot gjatë luftës në 1999-ën, unë e dua Kosovën andaj jam pak i njëanshëm. E dua vendin. Por, këtu qëndron çështja. Arsyeja pse e dua Kosovën është se ata nuk ia qëllojnë gjithmonë në herën e parë, por është njëjtë si të bëhet një tortë dhe të ketë përmirësime vazhdimisht. Në fund keni një tortë, dhe keni këto vlera demokratike perëndimore dhe ka aspirata që të ketë lidhje me konstruktet perëndimore dhe evropiane. Dhe për t’u treguar i sinqertë, këto konstrukte si NATO-ja apo BE-ja, ato shpërblejnë sjelljen e mirë, shpërblejnë administrimin e mirë të veprimeve kombëtare dhe mendoj se kur shohim gjëra si kjo qeveri aktuale që po tenton të lëvizë para pak më shumë me njohjen e komunave me shumicë serbe, në mënyrë “magjike” gjithashtu shohim një politikë të liberalizimit të vizave për zonën shengen. Ju mund të shihni gjëra të tilla, në të cilat Kosova është duke përparuar. Në anën tjetër, te pala serbe shihni se si nëse vazhdoni të silleni si aktor i keq, atëherë nuk ju ofrohen mundësi të mira, dhe kjo është gjë e mirë për Kosovën”, tha Fischer. /atvlive.tv

  • Fischer: Rusia po e humb luftën, e vetmja shpresë për Putinin është Kina

    Fischer: Rusia po e humb luftën, e vetmja shpresë për Putinin është Kina

    Atasheu ushtarak amerikan, kolonel Jeffrey Fischer, intervistë CONTEXT në ATV, duke folur për zhvillimet në Ukrainë, tha se sulmi i pretenduar i ukrainasve me dron në Kremlin është pjesë e fushatës ruse të dezinformimit, pasi që sipas tij, sulmi ishte i vogël dhe po të ishte në të vërtetë cak i ushtrisë së Ukrainës, nuk do të ishte aq i vogël si me mjete piroteknike.

    “E kam parë videon, mendoj se kjo është pjesë e fushatës ruse të dezinformimit. Duhet të shohim dhe të presim lidhur me informacionet me këtë, por shpërthimi ishte shumë i vogël, do të mendonit se nëse Ukraina po bënte gati një plan ta sulmonte Kremlinin, po të shkonin deri aty nuk do të kishin një shpërthim kaq të vogël, ne bëmë shaka prapa kamerës se unë kam parë mjete më të forta piroteknike në një koncert të muzikës rok, madje më të mëdha, kështu që koha do ta dëshmojë, por ose është një strategji me të vërtetë e keqe nga Ukraina ose ky është edhe një herë një rast i propagandës ruse”, tha Fischer.

    Ai tha se Ukraina është duke bërë luftë për ta mbrojtur territorin e vet dhe jo që ta sulmojë Rusinë.

    “Kjo është një pyetje e shkëlqyer, dhe mendoj se ka arsye për shqetësim se Rusia do ta shfrytëzojë këtë edhe nëse ata e nxitën atë, që të thonë se jemi sulmuar në shtetin tonë. Unë kam thënë disa herë se nëse njerëzit në Ukrainë nuk mund të flenë të qetë natën dhe kanë frikë se mund të sulmohen, atëherë nëse jeni në luftë me një shtet tjetër, njerëzit e atij shteti gjithashtu duhet të frikësohen. Unë shpesh kam thënë se mbështes sulmet ukrainase në territoret e Rusisë, përshkallëzimet që kemi parë janë ngritur që prej shpërthimit masiv në fabrikën e karburanteve, dhe që nga kjo kohë kemi parë një ngritje të aktivitetit”, theksoi Fischer.

    Koloneli tha se pos Ukrainës, nga loja e Rusisë nuk mund të ndahet as edhe Ballkani, në rastin konkret Serbia dhe Kosova, pasi që sipas tij, të gjitha janë pjesë e lojës.

    “Unë besoj se nuk mund të ndani asgjë që prek Rusia, qoftë nëse bëhet fjalë për Ukrainën, Transistrinë, Osetian Jugore, “konfliktet e ngrira”, apo Serbinë dhe Kosovën, ato të gjitha janë pjesë e lojës, gjithashtu do të thosha se Kina, përkundër se nuk është në konflikt, gjithashtu është në lojë. Dhe Vladimir Putini dhe Rusia kanë vepruar si manipulues që kanë drejtuar gjithçka në këto vende të ndryshme, duke tentuar që të ndezin zjarre, konflikte të cilat do ta tërhiqnin vëmendjen larg tij dhe asaj që ai po bën në Ukrainë, ndoshta që do ta përshkallëzonin luftën, ndoshta që do ta nxisnin NATO-n të ndërhynte, sepse ai po humb luftën dhe mendoj se e vetmja shpresë për të është që ta shpëtojë Kina, nëse Kina siguron fondet, armët, ushtarët, dhe në këtë pikë Kina nuk po e bën këtë, dhe ai duhet t’ia dëshmojë Kinës se ka pasur një lloj përshkallëzimi që do të kërkonte ndërhyrje të Kinës dhe deri në këtë pikë, ai nuk ka arritur ta bëjë këtë”, vlerësoi koloneli amerikan Jeffrey Fischer. /atvlive.tv

  • Vuçiq pretendon se BE-ja propozoi djegien e mandateve të kryetarëve të rinj

    Vuçiq pretendon se BE-ja propozoi djegien e mandateve të kryetarëve të rinj

    Bashkimi Evropian nuk tregoi çfarë zgjidhje të përkohshme kishte propozuar Përfaqësuesi i Lartë, Josep Borrell, në takimin e 2 Majit, pas zgjedhjeve në katër komunat me shumicë serbe në veri të Kosovës.

    Në një përgjigje për ATV-në, BE-ja nuk dha shpjegime për propozimin e saj.

    Por, presidenti i Serbisë, Aleksandar Vucic, pretendon se Borrell propozoi djegien e mandateve të të zgjedhurve më 23 Prill – duke mos kryer ceremoninë e betimit brenda afatit ligjor prej 30 ditësh nga momenti i certifikimit të rezultateve.

    “Kurti refuzoi një zgjidhje të përkohshme, sipas së cilës ata nuk do t’i uzurponin zyrat në veri më 28 Maj. Mendoj se ishte një mundësi ideale për Kurtin që të tërhiqej dhe pastaj e kuptova që plani i tij është dëbimi i serbëve nga Kosova”, tha Vuçiq.

    Ai tha se refuzoi draftin e propozuar të sekuencimit të zbatimit të marrëveshjes së Brukselit dhe shtojcës së Ohrit – pasi nuk dëshiron ta njohë Kosovën.

    “Gjithçka ishte një grackë që Serbia të njohë Kosovën, de facto dhe de jure. Kishte një përpjekje për një plan të ri zbatimi, dhe pikë e parë ishte prezantimi i draft-statutit të Asociacionit, pika e dytë ishte t’i lejojmë ata të anëtarësohen në organizata ndërkombëtare dhe pika e tretë ishte themelimi i Asociacionit. E refuzova atë, sepse është në kundërshtim me atë që kemi diskutuar”, tha Vuçiq.

    Të martën, Ekipi Menaxhues, tashmë i liruar nga detyra, prezantoi një draft-statut të Asociacionit të komunave me shumicë serbe, që u refuzua nga kryeministri Albin Kurti, i cili propozoi një draft-vizion për vetë-menaxhimin.

    BE-ja ka shprehur “shqetësim të thellë” për situatën në veri të Kosovës dhe rrezikun e përshkallëzimit të saj pas zgjedhjeve të jashtëzakonshme komunale. /atvlive.tv

    Edicionin Qendror të lajmeve e gjeni në videon më poshtë:

  • Prokurorja Drita Hajdari jep detaje rreth aktakuzës së parë në mungesë

    Prokurorja Drita Hajdari jep detaje rreth aktakuzës së parë në mungesë

    As pas gjashtë vjetësh hetime, D.R., që akuzohet për dhunim seksual, nuk u soll para drejtësisë, andaj ndryshimet në kodin e ri të procedurës penale mundësuan ngritjen e aktakuzës në mungesë.

    “Hetimi ka nisur në vitin 2017. Dhe pavarësisht se kryerësi nuk ka qenë në Kosovë, me policët e Kosovës kam grumbulluar prova. Rrethana që i akuzuari nuk ishte këtu, nuk na ka ndalë të punojmë. Kjo është prej të mirave për aktakuzën në mungesë. Përveç që paraqet satisfaksion për viktimën, me anë të aktakuzës në mungesë dokumentohet krimi:, tha prokurorja e specializuar, Drita Hajdari.

    Pavarësisht se kishin kaluar vite, viktima e kishte identifikuar dhunuesin përmes një fotografie.

    “Në rastin konkret përveç viktimës, kryesin e kanë identifikua edhe banorët e tjerë të fshatit…”, tha ajo.

    Meqenëse aktakuza në mungesë ishte e para, përgjegjësia në përpilimin e saj ishte e madhe.

    “Në njëfarë mënyre kam krijuar një model të aktakuzës, të cilën do ta përdorim në vazhdim, unë por edhe kolegët”, tha Hajdari.

    Por, kjo nuk do jetë aktakuza e fundit në mungesë për këtë vit.

    “Unë personalisht i kam edhe disa aktakuza të tjera në mungesë, që po i përgatis për këtë vit, që kanë të bëjnë me dhunimin në Kosovë”, u shpreh Hajdari.

    Hajdari shprehet optimiste se gjykimet në mungesë do të kenë sukses.

    “Kompetencat e gjykatës janë të caktuara me ligj, d.m.th. nuk besoj se do të ketë problem në zbatimin e gjykimeve në mungesë”, theksoi Hajdari.

    Prokuroria Speciale gjatë ditës ngriti edhe një tjetër aktakuzë në mungesë, ndaj të pandehurit me inicialet Ç.A., i cili akuzohet për krime lufte të kryera gjatë periudhës janar – maj të vitit 1999, në Kosovë. /atvlive.tv

    Edicionin Qendror të lajmeve e gjeni në videon më poshtë:

  • Strukturat paralele ilegale serbe rrethojnë objektin e Komunës së Zubin Potokut

    Strukturat paralele ilegale serbe rrethojnë objektin e Komunës së Zubin Potokut

    Strukturat paralele/ilegale serbe kanë filluar përgatitjen për të penguar qasjen në objektin e Komunës së Zubin Potokut, ku pritet të betohet kryetari i ri, Izmir Zeqiri.

    Burime të KosovaPress-it kanë bërë të ditur se në derën kryesore të objektit komunal në Zubin Potok disa persona tashmë kanë filluar të vendosin rrethoja prej hekuri.

    “Sot jane pare disa persona në hyrje të objektit te komunës duke vendosur rrethoja prej hekuri”, ka thënë burimi.

    Ndryshe, kjo e ashtuquajtura “rezistencë” serbe vjen vetëm një ditë pas deklaratave të presidentit të Serbisë, Aleksandër Vuçiq se do të ketë “krizë të madhe” në veri të Kosovës.

    Ai para gazetarëve të mërkurën ka akuzuar ndërkombëtarët se gjoja po mbështesin kryeministrin Albin Kurti, për të shuar pikërisht “rezistencën e serbëve”.

    Kujtojmë se zgjedhjet në katër komunat veriore u mbajtën më 23 prill.

    Serbia vazhdimisht apeloi serbët të mos dalin në votime. Si pasojë e presionit të Beogradit zyrtar, edhe kryetari i Partisë së Serbëve, Aleksandër Jabllanoviq është tërhequr nga gara zgjedhore.

  • BE: Roli i Ekipit Menaxhues përfundon vetëm kur të miratohet statuti

    BE: Roli i Ekipit Menaxhues përfundon vetëm kur të miratohet statuti

    Roli i Ekipit Menaxhues për statutin e Asociacionit të komunave me shumicë serbe në Kosovë përfundon vetëm kur ai statut të miratohet, prandaj, sipas Bashkimit Evropian, vendimi i Qeverisë së Kosovës për ta shkarkuar atë është në kundërshtim me marrëveshjen.

    Kështu ka thënë të enjten në një konferencë për shtyp në Bruksel zëdhënësi i Bashkimit Evropian për politikë të jashtme dhe siguri, Peter Stano, duke u përgjigjur në disa pyetje lidhur me rolin e Ekipit Menaxhues.

    Ministri i Administrimit të Pushtetit Lokal në Qeverinë e Kosovës, Elbert Krasniqi, më 3 maj ka liruar nga detyra anëtarët e Ekipit Menaxhues.

    Ekipi në fjalë, i përbërë nga katër serbë nga Kosova, mori pjesë në takimin e fundit të dialogut në nivel të lartë, ku edhe paraqiti draftin e parë të statutit të Asociacionit të komunave me shumicë serbe, propozim i cili menjëherë u hodh poshtë nga kryeministri i Kosovës, Albin Kurti.

    Për më tepër, Kurti tha se koordinatorja e këtij ekipi, Danijella Vujiçiq, “është në konflikt interesi”, sepse ajo ka dhënë betimin si deputete në Kuvendin e Republikës së Serbisë.

    I pyetur se pjesë e cilit delegacion ishte Ekipi Menaxhues në takimin e fundit, Stano tha se ai ekip mori pjesë “si delegacion më vete” dhe se “ishin ftuar të vijnë dhe t’i bashkohen takimit për një pikë të rendit të ditës”.

    “Ata nuk ishin pjesë e asnjërit delegacion, as të Serbisë e as të Kosovës”, deklaroi Stano.

    Zëdhënësi i BE-së tha se përbërja e këtij ekipi “është në përputhje me marrëveshjen e dialogut”.

    “Palët ishin pajtuar rreth përbërjes së Ekipit Menaxhues. Anëtarët e Ekipit Menaxhues janë propozuar nga Serbia dhe zyrtarisht janë emëruar nga Kosova”, sqaroi Stano.

    Sipas BE-së, tha Stano, “marrëveshjet e dialogut qartë thonë se ekipet menaxhuese duhet të ekzistojnë derisa të miratohet statuti i Asociacionit”.

    “Ekipi Menaxhues propozoi dhe paraqiti draftin e parë, që do të thotë se nisën procesin e jo që procesi mori fund. Prandaj, vendimi për ta shkarkuar Ekipin Menaxhues shkel tekstin dhe frymën e marrëveshjes”, theksoi Stano.

    Pati edhe disa pyetje të gazetarëve rreth asaj se deri kur mund të vazhdohet në këtë mënyrë dialogu, me refuzime të njëpasnjëshme të palëve.

    “Jeta është e vështirë, e dialogu është edhe më i vështirë”, u përgjigj zëdhënësi i BE-së duke përsëritur se arritja e marrëveshjes është e domosdoshme që palët të ecin para në procesin e integrimit evropian dhe se, në rast të dështimit, do të ketë pasoja, përfshirë edhe ato financiare.

    Në pyetjen se a mund të thuhet se ekziston marrëveshja në tërësi, pasi presidenti i Serbisë, Aleksandar Vuçiq, ka përsëritur se ai “ia ka bërë të qartë BE-së se nuk do t’i zbatojë të gjitha pikat e marrëveshjes”, Stano ritheksoi se “Marrëveshja ekziston“ dhe se “përfaqësuesi i lartë, Joseph Borrell, e ka bërë të qartë se “Deklarata e lëshuar nga BE-ja, është parë dhe është pranuar edhe nga presidenti i Serbisë, Aleksandar Vuçiq, edhe nga kryeministri i Kosovës, Albin Kurti, dhe nga kjo buron edhe obligimi i palëve për ta zbatuar”.

    Ky zëdhënës i Bashkimit Evropian përmendi edhe Deklaratën për të Zhdukurit si dëshmi të progresit në dialog dhe shprehu bindjen e Bashkimit Evropian se palët do të punojnë për ta zbatuar këtë marrëveshje dhe për të zbuluar fatin e personave të zhdukur gjatë luftës.

    Kosova dhe Serbia kanë arritur marrëveshje për formimin e Asociacionit në vitin 2013, ndërsa për parimet e tij janë dakorduar në vitin 2015.

    Në vitin 2016, Ministria e atëhershme e Administrimit të Vetëqeverisjes Lokale në Kosovë ka emëruar Ekipin Menaxhues për hartimin e draft-statutit.

    Por, marrëveshja për Asociacion nuk është zbatuar kurrë, për shkak të këmbënguljes së Beogradit që ai të ketë kompetenca të gjera. Prishtina i ka refuzuar ato, me arsyetimin se mund ta kërcënojnë funksionalitetin e shtetit./REL/

  • ​Deklarata për Personat e Zhdukur, zyrtarë qeveritarë përplasen me deputetë opozitarë

    ​Deklarata për Personat e Zhdukur, zyrtarë qeveritarë përplasen me deputetë opozitarë

    Nënshkrimi i Deklaratës për Personat e Zhdukur më 2 maj në Bruksel është bërë temë debati në seancën e sotme (e enjte) të Kuvendit të Kosovës. Nga Qeveria e Kosovës kanë thënë se përmes kësaj deklarate, Serbia pranon për herë të parë krimet e bëra gjatë luftës në Kosovë, mirëpo deputetët opozitarë kritikuan kryeministrin Kurti se ka gabuar ku ka pranuar të largohet termi “persona të zhdukur me dhunë”, i cili sipas tyre njihet edhe në konventat ndërkombëtare.

    Por, zëvendëskryeministri, njëherësh kryenegociator i dialogut me Serbinë, Besnik Bislimi tha se ka dokumente të Gjykatës Evropiane të Drejtave të Njeriut që i referohen termit “persona të zhdukur me forcë”, siç figuron në deklaratën e nënshkruar.

    Madje, Bislimi paraqiti një dokument që sipas tij është dakorduar në vitin 2020 nga Qeveria Hoti, që sipas tij, ka zero brengë për personat e zhdukur.

    Përkitazi me këtë, ai tha se s’ka asnjë barazim në krime në Deklaratën për Personat e Zhdukur.

    Të kundërtën e kësaj e tha deputeti i LDK-së, Driton Selmanaj, i cili theksoi se nënshkrimi i deklaratës ku hiqet termi “persona të zhdukur me dhunë” është gabim historik dhe kombëtar i Kosovës.

    Ndërkaq, shtoi se Qeveria Hoti e ka pasur top prioritet çështjen e personave të zhdukur.

    Në debat u përfshi edhe ministrja e Drejtësisë, Albulena Haxhiu, e cila tha se përmes nënshkrimit të Deklaratës për Personat e Zhdukur, Serbia pranon për herë të parë krimet e bëra në Kosovë gjatë luftës së fundit.

    Ajo përmendi edhe disa deklarata të ish-eksponentëve të PDK-së që sipas saj kërkonin të amnistoheshin gjitha krimet e bëra gjatë luftës në Kosovë.

    Në anën tjetër, në reagimin e saj deputetja e PDK-së, Eliza Hoxha, u shpreh e habitur me këto deklarata të ministres Haxhiu. Ajo insistoi se termin “të zhdukur me forcë” nuk njihet në konventat ndërkombëtare.

    Në debat u inkuadrua edhe deputeti tjetër i LDK-së, Kujtim Shala, i cili paraqiti argumentet e tij se pse në Deklaratën për Personat e Zhdukur, Kosova barazohet me Serbinë për këtë çështje.

    Kryeministri i Kosovës, Albin Kurti dhe presidenti i Serbisë, Aleksandër Vuçiq, më 2 maj në Bruksel kanë nënshkruar Deklaratën për Personat e Zhdukur./KP

  • Haxhiu: Me nënshkrimin e deklaratës, Serbia për herë të parë pranon krimet e kryera në Kosovë

    Haxhiu: Me nënshkrimin e deklaratës, Serbia për herë të parë pranon krimet e kryera në Kosovë

    Ministrja e Drejtësisë, Albulena Haxhiu, konsideron se me nënshkrimin e deklaratës për të pagjeturit në Bruksel, Serbia për herë të parë pranon krimet e kryera gjatë luftës në Kosovë.

    “Për herë të parë çështja e personave të zhdukur po trajtohet me prioritet dhe seriozisht nga qeveria e republikës së Kosovës. Nënshkrimi i deklaratës për të zhdukurit e bën Serbinë përgjegjëse për krimin e zhdukjes me forcë të qytetarëve tanë”, tha ajo.

    Haxhiu, në Kuvend, tha se me nënshkrimin e kësaj deklarate Serbia po ashtu obligohet që të japë informacione për varreza masive.

    “Për herë të parë përmes një dokumenti zyrtar Serbia pranon për krimin e bërë dhe obligohet të jap informacione për varreza masive që po i mbanë qytetarët tanë. Po ashtu obligohet të mos pengoj gërmimet siç ka ndodhur në vazhdimësi – me atë deklaratë pranon krimet shtetërore mbi popullin e Kosovës dhe qytetarët tanë”.“Për mua është e papranueshme që një deputet i kuvendit, zonja hoxha thotë që Serbinë nuk e obligon ky dokument, e pranueshme pasi kjo është ajo që Serbia dëshiron të dëgjojë që të mos obligohet nga një deklaratë që e ka nënshkruar presidenti i Serbisë”, u shpreh Haxhiu.

  • Hill: Tensionimi i raporteve Kosovë-Serbi është në dëm të të gjithë rajonit

    Hill: Tensionimi i raporteve Kosovë-Serbi është në dëm të të gjithë rajonit

    Ndonëse procesi i dialogut ndërmjet Kosovës dhe Serbisë është tejet i vështirë, e vetmja zgjidhje mbetet që të dy palët t’i vazhdojnë bisedimet. Kështu deklaroi ambasadori i Shteteve të Bashkuara të Amerikës në Serbi, Christopher Hill, gjatë konferencës “Sfidat rajonale të sigurisë”, e cila është organizuar nga presidenti i Maqedonisë së Veriut, Stevo Pendarovski, në kuadër të Qendrës për Arsimim Politik.

    Duke përshëndetur përpjekjen e ndërmjetësuesve në procesin e dialogut mes Kosovës dhe Serbisë, Hill theksoi se tensionimi i raporteve mes Kosovës dhe Serbisë është në dëm të të gjithë rajonit.

    “Mendoj se tensionet dhe konflikti kanë ndikim në të gjitha vendet e rajonit dhe ajo që do të doja të shihja është një lloj përmirësimi ose të paktën ulje të tensioneve”, theksoi ai, raporton REL.

    Ndërkaq, në pyetjet e të rinjve rreth krijimit të Asociacionit të komunave me shumicë serbe në Kosovë, ambasadori Hill tha se për këtë duhet investuar në ngritjen e besueshmërisë mes dy komuniteteve.

    “Dy çështje janë me rëndësi kruciale: besimi te komuniteti ndërkombëtar dhe qartësia ndaj qytetarëve për sa i përket asaj se si do të jetë jeta e tyre në të ardhmen”, u shpreh Hill.

    Ambasadori i SHBA-së para të rinjve u fokusua dhe në rëndësinë e intensifikimit të bashkëpunimit mes vendeve të rajonit, si në aspektin e zhvillimit ekonomik ashtu dhe në atë të sigurisë.

    Ai nënvizoi se asnjë shtet nuk mund t’i zgjedhë fqinjët, por e gjithë mençuria qëndron në faktin që udhëheqësit politikë të gjejnë mënyra për t’i tejkaluar mosmarrëveshjet, dhe i gjithë fokusi të vendoset në interesat e përbashkëta, duke potencuar në këtë rast nismën Ballkani i Hapur.

    Ndërkaq, ministri i Punëve të Brendshme, Oliver Spasovski, theksoi rëndësinë që Maqedonia e Veriut t’u bëjë ballë sulmeve kibernetike.

    Duke iu referua rritjes së ndikimit rus në Ballkan, ambasadori Hill shprehu bindjen se udhëheqja aktuale ruse e ka çuar, siç tha ai, “civilizimin në pyll” .