ATV

Tag: Ballina

  • Von Cramon: Policët u kapën brenda Kosovës, arsye protestat në Beograd

    Von Cramon: Policët u kapën brenda Kosovës, arsye protestat në Beograd

    Raportuesja e Bashkimit Evropian për Kosovën, Viola von Cramon, është e para nga bashkësia ndërkombëtare që ka pranuar se tre zyrtarët policorë janë kapur nga forcat serbe brenda territorit të Kosovës.

    BE dhe KFOR e kanë kualifikuar si “arrestim” kidnapimin e policëve dhe kanë thënë se po presin nga NATO mbledhjen e informacioneve. SHBA ka kërkuar lirimin e menjëhershëmdhe pa kushte të policëve.

    Në një reagim në Twitter që ka bërë mbrëmë, Cramon ka thënë se është është e paligjshme hyrja e forcave speciale të Serbisë në territorin e Kosovës dhe “lidhja e policëve si kriminelë lufte”.

    Zyrtarja evropiane ka thënë se në bazë të informacionit të qasshëm, zyrtarët policorë të Kosovës nuk kanë lëvizur makinat e tyre, por kanë ecur në këmbë në zonën kufitare me Serbinë.

    “Edhe nëse ky operacion i nënshtrohet ligjërisht një njoftimi, është e paligjshme që të hysh në territorin e Kosovës me forcat speciale të Serbisë dhe të lidhësh zyrtarët policorë si kriminelë lufte, dhe t’i dërgosh në Beograd”, ka shkruar ajo.

    Viola von Cramon është e bindur se protestat kombëtare që po zhvillohen në Beograd ndaj presidentit të Serbisë, Aleksandar Vuçiq, janë arsyeja kryesore mbrapa rrëmbimit të policëve të Kosovës.

    Sipas saj, rrëmbimi u bë për të tërhequr vëmendjen nga revoltat e brendshme kundër Vuçiqit.

    Von Cramon ka thënë të enjten se Serbia, si vend që synon të bëhet anëtar i Bashkimit Evropian, duhet të zbatojë sundimin e ligjit, të respektojë ligjin ndërkombëtar dhe t’i largojë sa më shpejt policët e arrestuar të Kosovës.

    “Çfarë bëjnë autokratët kur janë nën presion të brendshëm? Ata analizojnë rrugë për ta larguar vëmendjen prej problemeve të brendshme. Një shembull klasik duket se është incidenti i djeshëm në zonën kufitare mes Kosovës dhe Serbisë”.

    Në Beograd është protestuar gjashtë herë në javët e fundit me thirrjet për dorëheqje të Vuçiqit.

  • Zhvillimet e fundit në Kosovë e Serbi, Escobar sot mban konferencë për media

    Zhvillimet e fundit në Kosovë e Serbi, Escobar sot mban konferencë për media

    I dërguari i Shteteve të Bashkuara të Amerikës për Ballkanin Perëndimor Gabriel Escobar, sot më 16 qershor, do të mbajë një konferencë online me gazetarë.

    Kjo konferencë pritet të mbahet nga ora 15:00.

    Escobar me gazetarët do të bisedojë rreth zhvillimeve të fundit në Kosovë dhe Serbi.

    Të mërkurën, Policia e Kosovës ka njoftuar se tre pjesëtarë të saj janë kidnapuar nga forcat serbe, brenda territorit të Kosovës.

    Policia në konferencë për media kishte prezantuar edhe një hartë nga vendi ku raportohet se u kidnapuan policët.

    Ndërsa, në anën tjetër, Serbia po pretendon se policët janë arrestuar në territorin e Serbisë, larg kufirit nga Kosova.

    Shtetet e Bashkuara kanë kërkuar të enjten lirimin pa kushte të tre pjesëtarëve të policisë së Kosovës të ndaluar nga forcat serbe. Ky qëndrim u shpreh nga zëdhënësi i Departamentit të Shtetit Matthew Miller në konferencën e përditshme për shtyp.

    “Ne besojmë se si Kosova dhe Serbia duhet të marrin masa për të shtensionuar situatën dhe kjo përfshin lirimin pa kushte të tre oficerëve të policisë së Kosovës që u ndaluan së fundmi”, ka thënë ai.Miller ka deklaruar gjithashtu se “të dyja palët duhet të ndjekin planin prej tre pikash që ka paraqitur BE-ja”.

  • Kryeministri Kurti merr pjesë në Forumin e Prespës

    Kryeministri Kurti merr pjesë në Forumin e Prespës

    Kryeministri Albin Kurti pritet që sot të marrë pjesë në Forumin e Prespës për Dialog.

    Alsat raporton se ky informacion u është konfirmuar nga Ministria e Punëve të Jashtme, të cilët u kanë thënë se Kurti e ka konfirmuar pjesëmarrjen.

    Ky medium raporton se edhe kryeministri i Malit të Zi, Dritan Abazoviq ka deklaruar se me Kurtin sot do të bisedojnë për situatën në Kosovë dhe për gjetjen sa më të shpejtë të zgjidhjes, me qëllim qetësimin e situatës dhe garantimin e paqes në rajon.

    Kurti dje i bëri thirrje dje KFOR-it të ushtrojë trysni mbi Serbinë që t’i kthejë në Kosovë tre zyrtarët policorë që u rrëmbyen nga forcat serbe të mërkurën.

    Në një seancë të jashtëzakonshme në parlamentin e Kosovës, kryeministri tha se KFOR-i si ushtrues i funksionit të mbrojtjes duhet ta ndëshkojë këtë shkelje të integritetit territorial dhe sovranitetit të Kosovës.

    “KFOR-i pra nuk do të duhej të jetë i heshtur e as përulur ndaj sulmit kidnapues të cilin edhe e kishte mandat ta parandalonte. Nëse KFOR-i e shndërron këtë heshtje në normë, e njëfarë nënshtrimi të heshtur në ligj që dihet publikisht, atëherë një gjë të tillë le të na e thotë hapur, dhe ashtu do e mohojë një përgjegjësi ndërkombëtare që ishte dashur të përmbushte efektivisht”, tha kryeministri Kurti.

    Veprimet e Serbisë, tha ai, dëshmojnë për orientimin e udhëheqjes së Serbisë nga verilindja dhe jo nga Bashkimi Evropian dhe Shtetet e Bashkuara.

    “Ajo që kemi parë dje është hakmarrje në njërën anë, e agresion në anën tjetër. Krijimi i hakmarrjes si instrument ndaj veprimeve të sundimit të ligjit në Kosovë, është jo vetëm mendësi barbare, mesjetare por tregues i orientimit të udhëheqjes së Serbisë kah verilindja, nga despotët e verilindjes, e jo nga Bashkimi Evropian dhe Shtetet e Bashkuara”, tha ai.

  • Lajçak thotë se ka informacione se ku po mbahen policët e kidnapuar

    Lajçak thotë se ka informacione se ku po mbahen policët e kidnapuar

    I dërguari i Bashkimit Evropian për dialogun Kosovë-Serbi, Miroslav Lajçak, ka thënë se kanë disa informacione ku po mbahen policët kosovarë.

    Tre policisë kosovarë të mërkurën u kidnapuan nga forcat serbe.

    Për këtë, Lajçak ka thënë se kanë kontakte me të dyja palët, Kosovën dhe Serbinë.

    “Ne kemi më shumë nevojë të dimë se çfarë ka ndodhur Kemi disa informacione dhe jemi duke mbajtur kontakte me të dyja palët”, ka thënë shkurtimisht teksa shtoi se po presin që palët të paraqesin provat.
    Për këtë çështje ka pasur reagim edhe nga departamenti i shtetit, duke kërkuar që policët të lirohen pa kushte.

    Ndërkaq, kryeministri i Kosovës, Albin Kurti, ka deklaruar në Kuvendin e Kosovës se kjo çfarë ka bërë Serbia është rrëmbim.

    Institucionet e Kosovës nuk e dinë vendndodhjen e policëve kosovarë, të kidnapuar nga forcat serbe.

    Ndërkaq, KFOR’i ka deklaruar se nuk ka qenë i përfshirë në këtë rast, poqë kidnapimin nuk e ka njohur si të tillë duke e quajtur “arrestim”.

    Në të njëjtën formë e ka quajtur edhe Josep Borrell, shefi i Bashkimit Evropian për Politikë të Jashtme dhe Siguri.

    Në anën tjetër, në Kosovë opozita po kërkon më shumë veprime nga pushteti që të ndihmojë në lirimin e policëve kosovarë.

    Për këtë rast, kreu i ekzekutivit, Albin Kurti, ka vizituar familjet e policëve të kidnapuar brenda territorit të Kosovës.

  • ​Kurti: Shefi i zyrës sonë në Beograd ka kërkuar për t’i vizituar tre policët e rrëmbyer

    ​Kurti: Shefi i zyrës sonë në Beograd ka kërkuar për t’i vizituar tre policët e rrëmbyer

    Kryeministri i Kosovës, Albin Kurti, ka bërë të ditur se shefi i zyrës ndërlidhëse të Kosovës në Beograd ka kërkuar për t’i vizituar tre policët e arrestuar nga forcat serbe, mirëpo kërkesa e tij ende nuk është trajtuar, pasi ende nuk janë bërë 48 orë nga paraburgimi i tyre.

    Kurti, duke raportuar para deputetëve në Kuvend, tha se ambasadori Jetish Jashari ka kontaktuar edhe me misionin e BE-së në Beograd, ambasadorët e QUINT-it dhe organizatat për të drejtat e njeriut.

    “Ambasadori Jetish Jashari, i cili është shefi i zyrës ndërlidhëse të Kosovës në Beograd ka kontaktuar me misionin e BE-së atje dhe ambasadorët e QUINT-it dhe organizata për të drejtat e njeriut, po ashtu i është drejtuar me kërkesë edhe gjykatës për vizitë, por ajo ende nuk është trajtuar pasi nuk janë bërë 48 orë të qëndrimit nën arrest të policëve tanë. Deri 48 orë ndodhet brenda MPB-së dhe më pas del tek gjyqësori dhe Ministria e Drejtësisë”, tha ai.

    Ai foli edhe për situatën në veri të Kosovës dhe kërkesat e ndërkombëtarëve për deeskalim.

    Kurti përsëriti pesë pikeshin e tij për depërshkallëzimin e situatës në veri, derisa tha se kryetarët në veri do të largohen nga zyrat e tyre vetëm me zgjedhje të reja.

    “Ndërsa sa i përket kërkesave që na janë bërë neve nga Brukseli. Natyrisht se kur kërkohet largimi i kryetarëve të komunave nga zyrat e tyre, kjo bëhet pikërisht me zgjedhje të reja. Ne nuk jemi kundër largimit të tyre, por jemi kundër largimit pa zgjedhje. Pas zgjedhjeve të reja pas zgjedhjeve të reja lokale me siguri do të fitojnë kryetarët e tjerë. Nëse pjesëmarrja është e lartë, s’ka dyshim se do të jenë këta kryetarë, por disa të tjerë”, shtoi Kurti.

    Pas fjalimin të tij, Kurti lëshoi sallën plenare, siç tha për shkak të angazhimeve të tjera.

  • SHBA kërkon lirimin pa kushte të tre pjesëtarëve të policisë së Kosovës

    SHBA kërkon lirimin pa kushte të tre pjesëtarëve të policisë së Kosovës

    Shtetet e Bashkuara të Amerikës kërkuan të enjten lirimin pa kushte të tre pjesëtarëve të policisë së Kosovës që u rrëmbyen nga forcat serbe. Ky qëndrim u shpreh nga zëdhënësi i Departamentit të Shtetit, Matthew Miller në konferencën e përditshme për shtyp.

    “Ne besojmë se si Kosova dhe Serbia duhet të marrin masa për të shtensionuar situatën dhe kjo përfshin lirimin pa kushte të tre oficerëve të policisë së Kosovës që u ndaluan së fundmi”, tha ai.

    Miller tha gjithashtu se “të dyja palët duhet të ndjekin planin prej tre pikash që ka paraqitur BE-ja” .

    “Si pjesë e kësaj Kryeministri Kurti duhet të garantojë që kryetarët e zgjedhur të kryejnë detyrat e tyre nga vend-ndodhje alternative dhe të tërheqë forcat e policisë”, tha Miller.

    Zëdhënësi Miller tha se SHBA dënon “dhunën e papranueshme ndaj forcave të KFOR-it, anëtarëve të zbatimit të ligjit dhe gazetarëve dhe përsa i takon rrugës më tej ne vazhdojmë të angazhohemi si drejtpërdrejt me të dyja palët, dhe me partnerët në rajon.”

    Ai tha se Sekretari i Shtetit Antony Blinken, këshilltari Derek Chollet dhe zyrtarë të tjerë të DASH-it janë të angazhuar me partnerët në rajon për këtë çështje.

    Zëdhënësi i Departamentit të Shtetit nuk pranoi të thoshte nëse SHBA po përgatit masa apo sanksione si kundërpërgjigje.

    “Nuk dua të flas për masa të mundshme në këtë moment. Fokusi ynë është që t’u bëjmë të qarta palëve pritshmëritë tona, që të dyja palët të marrin masa për të lehtësuar tensionet dhe të ndjekin planin me tre pika të paraqitur nga BE-ja”, tha ai.

  • Ramadani: Veprimi i Serbisë ka qenë i planifikuar, ka për qëllim eskalimin e situatës së sigurisë në Kosovë

    Ramadani: Veprimi i Serbisë ka qenë i planifikuar, ka për qëllim eskalimin e situatës së sigurisë në Kosovë

    Ish kryeinspektori i AKI-së, Burim Ramadani, në emisionin CONTEXT në ATV, tha se veprimi i policisë serbe ndaj zyrtarëve policorë të Kosvës, ka qenë veprim armiqësor dhe i planifikuar.

    Sipas tij, shpjegimin që dha presidenti serb Aleksandar Vuçiq ditëve të fundit, tregon qartë për një veprim i paramenduar, i cili ka për qëllim eskalimin e tensionit.

    “Veprimi duket qartë që ka qenë i planifikuar. Shpjegimi të cilin presidenti Vuçiq e ka dhënë gjatë këtyre dy ditëve me jashtëzakonisht shumë detaje propagandistike nga ana e tij, goxha tregon për një paramendim të situatës, pra për një veprim të paramenduar, i cili ka qëllim rritjen e tensionit, ka qëllim përshkallëzimin, eskalimin e situatës së sigurisë prapë, sepse eskalimi i situatës së sigurisë po ndodh të territorin tonë. Serbia nuk po eskalon kurrfarë situate as në Nish as në Kralevë, as në Novi Sad as në Beograd. Gjithçka që po ndodh, po ndodh në territorin tonë. Prezenca ndërkombëtare ushtarake është futur në sheshe duke vendosur kordon mes institucioneve të Kosovës dhe protestuesve, duke përfshirë edhe huliganët dhe grupet kriminale dhe si e tillë, Kosova në kuptimin qëllimit të sigurisë kombëtare, nuk po arrin sukses, sepse promovimi i sigurisë kombëtare, normalisht që vendoset përmes objektivave”, tha Ramadani.

    Ai thotë se për këtë veprim, Serbia duhet të marrë ndëshkimin e qartë dhe të prerë nga bota demokraike.

    “Serbia duhet absolutisht të merr ndëshkim të qartë dhe të prerë nga bota demokratike për këtë veprim. Veprimi është armiqësor. Nëse vërtetohet dhe po flasim nëse vërtetohet nga neutralët, nga KFOR-i, NATO, sepse edhe në bindjen time, kjo është hyrje brenda territorit të Kosovës, por nuk kam kapacitetin institucional për të vërtetu hapësirat gjeografike”, tha Ramadani.

    Sipas tij, janë të gjitha mundësitë që të vërtetohet vendndodhja ku ka noddhur kidnapimi i policëve kosovarë.

    “A ka mundësi të vërtetohet, normalisht që ka mundësi të vërtetohet. Vërtetimi besoj se do të bëhet publik në një periudhë pak më të qetë se tash siç është situata në veri të Kosovës. A besoj që ky vlerësim dhe bërja publik i këtij vlerësimi do të ndihmojë në uljen e tensioneve dhe uljen e retorikës, normalisht që besoj që ky do të jetë qëllimi i NATO-s si garant i sigurisë në Kosovë. Edhe përmes imazheve satelitore mund të qartësohet edhe përmes mënyrave të tjera, teknike, forenzike të cilat janë veç se të konsoliduara edhe në EULEX edhe në KFOR, i ka normalisht edhe në institucionet e Kosovës”, tha Ramadani.

    Pa vlerësimit, ai tha se shtetet e konsoliduara duhet të marrë kohën e mjaftueshme që të komunikojë me shtetet e tjera dhe aleatët, në mënyrë që të arrijë të një veprim i përbashkët.

    “Shtetet e konsoliduara, edhe në raste të tilla marrin një kohë hapësirë për të komuniku, lobu me shtetet dhe aleatët e vet, në mënyrë që të planifikohet veprimi i përbashkët dhe nëse unë kam dilema për sjelljen mbarëshoqërore e jo vetëm qeveritare, është se nuk po lëmë hapësirë të një planifikimi të përbashkët për veprime ndaj kësaj”, u shpreh Ramadani. /atvlive.tv

    Emisionin e plotë e gjeni në videon më poshtë:

  • Musliu: Putini do të përfundojë më keq se Millosheviçi

    Musliu: Putini do të përfundojë më keq se Millosheviçi

    Eksperti i sigurisë Agim Musliu, në emisionin DIREKT në ATV, tha se investimi serbo-rus është shumë i madh në veriun e Kosovës dhe në Ballkan në përgjithësi, për shkak se sipas tij, Rusisë i konvenon të ketë një vatër tjetër përveç asaj në Ukrainë për ta tërhequr vëmendjen e perëndimit.

    “Tash për tash situata është stabile, por sidomos në veriun e Kosovës është shumë e ndjeshme sepse e dimë që investimi serbo-rus është shumë i madh në veriun e Kosovës dhe në Ballkan në përgjithësi sepse i konvenon që të ketë një vatër tjetër përveç asaj në Ukrainë. Sipas diktatit të Putinit, i cili e komandon Vuçiqin si komandant taktik në Ballkan, për ta destabilizu Ballkanin kudo që të jetë, Bosnja Hercegovina, Mali i Zi, Kosova, ku do që të jetë, ku do që të mundet të fus pykat e kontrollit për të tërhequr vëmendjen nga Ukraina, nga agresioni që po e humb vazhdimisht terrenin në Ukrainë, por edhe të angazhojë forca shtesë edhe të ballafaqohet Rusia dhe Serbia, apo NATO të ketë angazhim shestë në këtë pjesë të Ballkanit dhe të humbet fokusi disi në atë pjesë të Evropës”, tha Musliu.

    Ai tha se Putini shpejt do ta humb luftën dhe do të përfundojë më keq se Millosheviqi.

    “Me rëndësi jetike për Putinin që të zhvillojë këto dy operacione për shkak të taktikës së vete në shtetet në rrethim që i ka sepse edhe ato do të rebelohen sidomos nëse shumë shpejtë do të humb luftën, ato do të rebelohen dhe Rusia do të mbetet e vetme dhe Putini do të kalojë më keq se Millosheviqi”, tha Musliu. /atvlive.tv

    Emisionin e Plotë e gjeni në videon më poshtë:

  • Kurti i njofton ambasadorët e akredituar në Kosovë me “agresionin” e Serbisë, kërkon dënim

    Kurti i njofton ambasadorët e akredituar në Kosovë me “agresionin” e Serbisë, kërkon dënim

    Kryeministri Albin Kurti, së bashku me zëvendësin Besnik Bislimi, ftuan sot për një takim informues ambasadorët, të ngarkuarit me punë, shefat e misioneve diplomatike dhe zëvendësambasadorët e akredituar në Kosovë.

    Sipas komunikatës së Zyrës së Kryeministrit, “temë qendrore e bisedës dhe diskutimit ishte situata e sigurisë në veri të vendit pas agresionit serb të djeshëm ndaj Republikës së Kosovës”.

    Kryeministri thuhet se njoftoi ata për mbledhjen e Këshillit të Sigurisë së Kosovës, që u mbajt sot në mëngjes, dhe me masat e sigurisë që institucionet e vendit kanë ndërmarrë, si dhe ndau me ta dëshmitë që dokumentojnë se kemi të bëjmë me agresion të Serbisë ndaj Kosovës dhe se rrëmbimi i zyrtarëve të Policisë së Kosovës kishte ndodhur thellë në brendi të territorit të Kosovës.

    Kryeministri tha që ky akt është shkelje e kushtetutës, rendit ligjor, sovranitetit dhe integritetit territorial të Republikës së Kosovës. Ai ritheksoi kërkesën e tij për reagim urgjent e dënues të faktorëve ndërkombëtarë ndaj këtij akti të agresionit ndaj Kosovës, teksa përsëriti po ashtu kërkesën e lirimit të menjëhershëm të tre policëve, familjet e të cilëve kryeministri Kurti i vizitoi sot.

  • ​Dhjetëra kamionë presin të hyjnë në Kosovë, Kurti: Morëm masa në vendkalimet me Serbinë

    ​Dhjetëra kamionë presin të hyjnë në Kosovë, Kurti: Morëm masa në vendkalimet me Serbinë

    Në vendkalimin kufitar në Merdare, dhjetëra maune me mallra serbe janë duke pritur në territorin e Serbisë për t’u futur në Kosovë.

    Disa transportues nga Serbia janë njoftuar se nuk u lejohet hyrja në Kosovë dhe janë ndalur afër pikës kufitare për të mos hyrë në Kosovë, raporton KosovaPress.

    Megjithatë, kryeministri i Kosovës, Albin Kurti ka deklaruar të enjten se nuk ka masa ekonomike – tregtare ndaj Serbisë, por sipas tij këto janë masa të sigurisë.

    Ndërsa, Nenad Nastasieviq vozitës i kamionit me targa të Serbisë ka thënë se është duke pritur në Merdare për të hyrë në Kosovë me mall nga Bullgaria.

    Ai ka treguar se disa kamionë nga Serbia nuk kanë pritur për të hyrë në territorin e Kosovës, por janë kthyer mbrapsht.

    “Janë rreth 20 kamionë duke pritur në parking, Qeveria e juaj nuk po lejon me kaluar megjithatë unë sjell mall nga Bullgaria dhe nuk kam diçka nga Serbia. Gati 6 orë jam duke pritur, ka pasur kamionë të cilët janë kthyer mbrapsht, por unë mendoj që të pres këtu”, ka thënë Nastasijeviq.

    Ndërsa, Esat Mehmeti shofer i një kompanie nga Kosova u shpreh se gjatë kalimit të kufirit ka kontrolle të rrepta nga ana e Policisë së Kosovës.

    “Në pjesën tjetër janë duke pritur rreth 200 kamionë me dalë në pjesën e Kosovës. Doganierët dhe policët po sillen keq. Vetëm me targa të Evropës, Zvicrës munden me kalua. Ka kontrolle të rrepta, po kontrollojnë në kabinë, të cilat janë provokime” tha Esat Mehmeti

    Kryeministri Albin Kurti, ka thënë se pas rrëmbimit të tre zyrtarëve policorë, gjendja nuk është e zakonshme dhe e ka quajtur agresion nga Serbia.

    Për këta ai thekson se qeveria e Kosovës ka marrë masa të sigurisë në pikat kufitare me Serbinë.

    “Masat tona nëpër vendkalimet kufitare me Serbinë nuk janë masa ekonomike – tregtare, por janë masa të sigurisë. Gjendja nuk është aspak e zakonshme dhe për neve është e qartë se agresioni po vjen nga Serbia, nga njëherë në rrugë ilegale, e është e mundshme edhe në vendkalimet kufitare. Prandaj, si masa të sigurisë ne kemi marrë vendimin për qarkullim të kufizuar dhe kontrolle të shtuara deri në një vendim tjetër”, theksoi Kurti të enjten në mëngjes.

    Aktualisht Serbia po i mban tre zyrtarë policorë të Kosovës të cilët i ka rrëmbyer të mërkurën në veri.

    Policia e Kosovës ka deklaruar se tre zyrtarët kufitarë janë rrëmbyer nga forcat serbe gjatë një patrullimi në vijën kufitare në veri të Kosovës derisa kanë qenë në detyrë, thellë brenda territorit të Kosovës, për të parandaluar shfrytëzimin e rrugëve ilegale.