ATV

Tag: Ballina

  • Konfirmohet puna në udhëzimin administrativ për zgjedhjet në veri

    Konfirmohet puna në udhëzimin administrativ për zgjedhjet në veri

    Ministri i Administrimit të Pushtetit Lokal në Kosovë, Elbert Krasniqi, ka konfirmuar të mërkurën se një udhëzim administrativ, i cili ua mundëson qytetarëve të komunave shkarkimin e kryetarëve të tyre përmes peticionit, do të jetë gati në shtator.

    Punimi i një udhëzimi të tillë administrativ vjen në kohën kur Kosovës është duke iu kërkuar me ngulm nga Bashkimi Evropian (BE) të shpallë zgjedhje të reja në katër komunat me shumicë serbe në veri të vendit.

    “Grupi punues ka afat një muaj që ta bëjë drafit e udhëzimit administrativ… dhe mandej të jetë gati nga shtatori si udhëzim administrativ në të cilin mund të deklarohen qytetarët të cilët kanë për qëllim organizimin e peticioneve për largimin e kryetarëve”, tha Krasniqi, më 2 gusht, gjatë përurimit të një salle sportive në një fshat të Lipjanit.

    Kryeministri i Kosovës, Albin Kurti, tha më 26 korrik se autoritetet e vendit janë duke u përgatitur për zgjedhje në komunat: Mitrovicë e Veriut, Zubin Potok, Leposaviq dhe Zveçan, por se ato nuk mund të mbahen pa u shtensionuar situata në këtë zonë.

    Zgjedhjet janë obligim që dalin nga një marrëveshje mes zëvendëskryeministrit të Kosovës, Besnik Bislimi, dhe të dërguarit të Bashkimit Evropian për dialogun Kosovë-Serbi, Mirosllav Lajçak, për shtensionimin e situatës në veri.

    Tensionet në këtë zonë janë rritur qysh në fund të majit, kur kryetarët shqiptarë të komunave, të dalë nga zgjedhjet e 23 prillit, kanë hyrë në objektet komunale, përkundër rezistencës së banorëve lokalë serbë.

    Protestat e tyre kanë kulmuar edhe në përleshje të dhunshme me ushtarët e misionit të NATO-s në Kosovë, KFOR.

    Sipas Ligjit për vetëqeverisje lokale, në zgjedhje të parakohshme për kryetar të komunës mund të shkohet në rast se kryetari aktual jep dorëheqje; në rast se qytetarët kërkojnë shkarkimin e kryetarit të komunës përmes një peticioni të nënshkruar nga 20 për qind e votuesve të komunës përkatëse; si dhe në rast se kryetari i komunës nuk paraqitet në vendin e punës më shumë se një muaj, pa arsye.

    Krasniqi shtoi se kryetarëve shqiptarë në komunat me shumicë serbe nuk mund t’iu kërkohet të japin dorëheqje “por ata mund ta bëjnë këtë me vendim individual”.

    “Peticioni është shprehje e vullnetit të 20 për qind të trupës votuese të një komune. Nëse në një komunë të caktuar qytetarët e asaj komune arrin t’i kenë 20 për qind të trupës votuese me kërkesën që të largohet kryetari i komunës, atëherë do të trajtohet si kërkesë, nëse nuk do të ketë atëherë kjo mbetet aty, kryetarët e vazhdojnë punën në komunë”, shtoi Krasniqi.

  • ​Peticioni për largimin e kryetarëve, Krasniqi: Një muaj kohë për Udhëzimin administrativ

    ​Peticioni për largimin e kryetarëve, Krasniqi: Një muaj kohë për Udhëzimin administrativ

    Ministri i Administrimit të Pushtetit Lokal, Elbert Krasniqi deklaroi sot se grupi punues ka një muaj kohë për të hartuar udhëzimin administrativ, për nisjen e peticionit të qytetarëve për largimin e kryetarëve nga komunat. Sipas tij, ky udhëzim administrativ nuk është për veriun e Kosovës dhe se nuk është i përpiluar në atë formë për largimin e kryetarëve nga zyrat. Kështu u shpreh ai pas vizitës në dy salla sportive ne Lipjan.

    Ai tha se Ligji për Vetëqeverisje Lokale ka shumë mangësi dhe hapësirë të korrigjohet, por për plotësim-ndryshim nevojiten edhe 2/3 e votave të komuniteteve. Sipas tij, së fundmi kanë filluar udhëzimin administrativ mbi procedurat se si organizohet një peticion në komuna, ku ka kërkesë nga qytetarët për largim nga komunat.

    Krasniqi shtoi se grupi punues ka kohë një muaj për draftimin e udhëzimit administrativ, ku qytetarët do të kenë mundësi hartimin e peticionit.

    “Kemi formuar një grup punues profesional nga akterët e përfshirë në qeverisjen lokale edhe të shohim se cila do të jetë puna e tyre…Grupi punues ka afat një muaj që ta bëjë draftin e këtij udhëzimi administrativ, faktikisht të përfundojë edhe konsultimet publike dhe mandej të jetë nga 1 shtatori si udhëzim administrativ, në të cilën mund të referohen qytetarët, të cilët kanë për qëllim organizimin e peticioneve apo largimin e kryetarëve. Mirëpo, çka është shumë e rëndësishme të përmendet, ky nuk është një udhëzim administrativ për veriun e Kosovës, është një udhëzim administrativ, i cili buron prej Ligjit për Vetëqeverisje Lokale dhe një gjë të tillë nesër qytetarët edhe të komunës së Lipjanit mund ta shfrytëzojnë për pakënqësinë e tyre në raport me kryetarin e komunës dhe largimin e kryetarit të komunës përmes një peticioni”, deklaroi ai.

    Më tej, ministri u shpreh se udhëzimi administrativ e përcakton rregullin se si organizohet peticioni.

    “Udhëzimi administrativ përcakton rregullin se si organizohet peticioni, se si një peticion i inicuar nga qytetarët është i pranueshëm. Mirëpo, përpilimi i peticionit nuk është largimi i kryetarëve nga zyret, për shkak se pas kësaj ka edhe procedura tjera…Ne kemi kryetarë të komunave në zyre, kjo është me rëndësi…peticioni është shprehje e vullnetit të 20 për qind të trupës votuese të një komune. Nëse në një komunë të caktuar qytetarët e asaj komune arrijnë të kenë 20 për qind të trupës votuese me kërkesën që të largohet kryetari i komunës, atëherë do të trajtohet si kërkesë. Nëse nuk do të ketë, atëherë kjo do të mbetet aty dhe kryetarët vazhdojnë të punojnë”, tha ai.

    Sa i përket largimit të kryetarëve të komunave, Krasniqi shtoi se të njëjtit kanë fituar mandat dhe dorëheqja e tyre është kërkesë e Serbisë.

    “Unë nuk mund të flas për Listën Serbe, por çfarë mund të them për situatën aktuale është që çkado që ata veprojnë dhe mendojnë, asnjëherë nuk është për të mirën e Republikës së Kosovës. Ne kemi zgjedhje legale të organizuar në veriun e Kosovës, bazuar në kushtetutën dhe ligjet aplikative. Ne e dimë që këto zgjedhje kanë prodhuar kryetarët komune me mbështetje të vogël të qytetarëve, por prapë se prapë këta janë kryetarë të komunave, të cilët burojnë nga vota e lirë. Pengesa që të marrin pjesë qytetarët e veriut të Kosovës në zgjedhje është nga Serbia. Dhe kjo Serbi dhe këto instirucionet e saj që i ka në dispozicion për të penguar zhvillimin demokratik të Kosovës, do të vazhdojnë gjithmonë. Për ata na duhet të fokusohemi në punën tonë, në demokracinë e shtetit tonë dhe forcimin e shtetit tonë. Udhëzimi administrativ do të parasheh disa procedura, mirëpo udhëzimi administrativ nuk është një diçka që definon secilin pozicion përtej asaj që është kompetencë e vetëqeverisjes lokale”, u shpreh ai.

    Kryetari i Lipjanit, Imri Ahmeti tha se duhet të krijohet një zgjidhje në veri të Kosovës, e cila sipas tij, është çështje politike e jo ligjore.

    “Nuk besoj që ky mekanizmi i peticionit është mjet adekuat për të zgjidhur problemet politike. Për shkak se kjo mund të riciklohet pas tre muajve të mbahen zgjedhjet, pas tre muajve prapë peticion tjetër. Derisa nuk ka një peticion, i cili do të provon me i zgjidh këto situata është vështirë për të komentuar…Ne nuk kemi parë një udhëzim administrativ, i cili do të ketë parasysh për të qenë në kuadër të rregullativës ligjore shtetërore. Çështja e veriut është çështje politike, nuk është çështje e legjislacioneve”, deklaroi ai./KP

  • ​Opozita pasive në Kuvend, adresoi vetëm 68 pyetje parlamentare

    ​Opozita pasive në Kuvend, adresoi vetëm 68 pyetje parlamentare

    Kuvendi i Kosovës ka përmbushur vetëm 13 për qind të agjendës legjislative të vitit 2023, thuhet në raportin e publikuar sot nga Instituti Demokratik i Kosovës(KDI).

    Sipas këtij raporti Kuvendi gjatë këtij gjysmë viti miratoi 44 ligje, mirëpo pjesa dërmuese e tyre ishin të bartura nga viti i kaluar.

    Në bazë të gjetjeve të KDI-së del se opozita nuk ka qenë mjaft aktive gjatë këtij sesioni pranveror, pasi deputetët e tyre kryesojnë sa i përket mungesave në seanca plenare, ndërkaq nga 171 pyetje parlamentare vetëm 68 sosh janë bërë nga opozita ndaj ekzekutivit.

    Hulumtuesi në KDI, Arbër Thaçi, në publikimin e këtij raporti të mërkurën, tha se sesioni pranveror i Kuvendit është karakterizuar nga shumë të papritura, me përmbajtje të llojllojshme dhe shumë sfida.

    “Shumë prej tyre nuk janë projektligje që i takojnë agjendës legjislative të vitit 2023. Vetëm 17 nga këto janë projektligje apo marrëveshje ndërkombëtarë që janë të përfshira në agjendën e këtij viti, të tjerat i takojnë viteve paraprake. Prandaj mund të themi se në përqindje diku vetëm 13 për qind e planit legjislativ të vitit 2023 është përmbushur gjatë këtij sesioni. Një nga problemet të cilën duhet të evidentojmë ka qenë mungesa e deputetëve, e cila ka shkaktuar vazhdimisht problemin e mungesës së kuorumit. Në bazë të gjetjeve tona mesatarisht në secilën seancë 22.5 për qind e deputetëve kanë munguar. Trendet janë varësisht prej partive politike, në këtë rast partitë opozitare tregojnë shifra më të larta të mungesave. LDK ka diku 22 për qind të deputetëve që i mungojnë, PDK ka rreth 19 për qind, LVV ka nëntë për qind”, tha ai.

    Ndërkaq, hulumtuesja tjetër në KDI, Violeta Haxholli tha se Kuvendi ka dështuar edhe në rolin mbikëqyrës ndaj Qeverisë së Kosovës.

    “Sa i përket rolit mbikëqyrës të Kuvendit, fatkeqësisht nuk ka qenë shumë i kënaqshëm aktiviteti i deputetëve gjatë këtij sesioni. Në përgjithësi deputetët i kanë parashtruar ndaj ekzekutivit 171 pyetje parlamentare, por këtu hynë edhe pyetje të cilat janë përsëritur disa herë për shkak të mungesës së ministrave në seanca. Deputetët e partisë në pushtet kanë parashtruar më shumë pyetje. Kjo në vetvete paraqet problematik, pasi tregon se deputetët e opozitës nuk kanë qenë shumë aktiv në parashtrimin e pyetjeve parlamentare gjatë ekzekutivit. Kështu PDK-ja ka parashtruar 45 pyetje, LDK ka parashtruar 10 pyetje dhe AAK 13 pyetje. Të gjitha pyetjet parlamentare i kanë parashtruar vetëm 38 deputetë të Kuvendit, ndërsa 82 deputetë nuk kanë parashtruar fare pyetje që është shqetësuese”, tha ai.

    Më korrekti në përgjigjen e pyetjeve sipas KDI-së ka qenë kryeministri Albin Kurti, duke iu përgjigjur të gjithave, ndërkaq më të papërgjegjshëm del të jenë ministri Punëve të Brendshme dhe Administratës Publike, Xhelal Sveçla që nuk i është përgjigjur asnjë pyetje dhe ministrja e Punëve të Jashtme dhe Diasporës, Donika Gërvalla.

    Në raportin e KDI-së për punën e Kuvendit evidentohet edhe gjuha joparlamentare, ku kërkohet nga kryetari i Kuvendit, Glauk Konjufca të jetë më rigoroz në dënimin e deputetëve.

    Po ashtu u shprehën shqetësime lidhur me mungesën e transparencës së Kuvendit ndaj publikut, përfshirë mungesën e votimit elektronik, mos publikimin e votave me dorë, dhe mos publikimin e rregullt të procesverbaleve të mbledhjeve të komisioneve parlamentare dhe atyre Ad-Hoc.

    Në fund, KDI ofroi disa rekomandime për Kuvendin dhe deputetët, duke theksuar nevojën për planifikim të mirëfilltë të seancave, pjesëmarrje të rregullt të deputetëve në punimet e Kuvendit, zgjerim të konsensusit dhe gjithëpërfshirjes për Reformën në Drejtësi, rritje të mbikëqyrjes ndaj ekzekutivit, adresimin e gjuhës jo parlamentare dhe garantimin e transparencës së Kuvendit ndaj publikut./kp

  • Kryeministri Kurti mirëpriti mërgimtarët në shënim të Ditës së Diasporës

    Kryeministri Kurti mirëpriti mërgimtarët në shënim të Ditës së Diasporës

    Kryeministri i Republikës së Kosovës, Albin Kurti, mbrëmë për nder të Ditës së Diasporës ka organizuar pritje të veçantë për mërgimtarët në ambientet e “Ballkonit të Hapur të Qeverisë”, i cili tashmë është shndërruar në vend të këndshëm për takime e pritje.

    Duke iu uruar mirëseardhje, kryeministri Kurti njoftoi mërgimtarët e pranishëm mbi progresin e dukshëm demokratik e ekonomik të Kosovës të evidentuar nga të gjitha raportet ndërkombëtarë kredibile, duke përmendur kështu rritjen mesatare ekonomike, rritjen e të hyrave tatimore, eksportet e investimet e huaja direkte.

    Njëkohësisht, rritjen e vendeve të punës, miratimin e ligjit për pagën minimale, e së fundmi edhe ligjin për njohjen e kontributeve të punëtoreve të viteve ‘90-ta, kryeministri para mërgimtarëve i cilësoi hapa të rëndësishëm në zhvillimin e Kosovës.

    Paralelisht me këto progrese, kryeministri Kurti veçoi se edhe mërgata jonë ka evoluuar dukshëm vit pas viti duke e zgjeruar përfaqësimin tonë kombëtar.

    “Atë sot e gjejmë në format më të suksesshme në art, në kulturë, në sport, financa, e tash së fundmi edhe përfaqësim politik në shtetet e tyre, nga niveli komunal e deri te ai qendror. Disa prej tyre janë këtu në mesin tonë sonte”, shtoi kryeministri.

    Tutje, ai i prezantoi mërgimtarët edhe me programin për diplomaci publike “Citizen Diplomacy Fellowship”, që ka për qëllim ndërlidhjen me vendin e origjinës përmes angazhimit profesional, si dhe lansimin e platformës “Shijo Kosovën”, përmes së cilës mërgatës, sidomos gjeneratave të reja, i’u mundësohet njohja e vendit me anë të aktiviteteve kulturore, sportive e natyrore.

    Gjithashtu, me anë të lehtësimit të procesit së votimit për mërgatën rritet edhe më shumë pjesëmarrja e tyre aktive, derisa në kuadër të investimeve, kryeministri tha se po themelojmë Fondin Sovran përmes së cilit bashkatdhetarët tanë dëshirojmë t’i bëjmë aksionarë në ekonominë tonë.

    Pas gjithë kësaj mbrëmjeje të frytshme e argëtuese, kryeministri Kurti i lumtur për takimin, falënderoi përzemërsisht gjithë bashkatdhetarët.

    Në këtë pritje, ku të ftuar ishin pjesëtarë e figura të ndryshme nga mërgata, artistë, veprimtarë, përfaqësues të shoqatave që veprojnë në mërgatë e përfaqësues të rinj politikë atje, bashkë me kryeministrin ishin të pranishëm edhe ministra e ministre të kabinetit qeveritar dhe zëvendësministra.

    Fjala e plotë e kryeministrit Kurti:

    Mirëmbrëma dhe mirë se vini,

    Për rastësi, ose ndoshta edhe jo, nesër bëhen fiks një vit prej se e kemi inauguruar “Ballkonin e Hapur” këtu në Kryeministri. Megjithatë, përvjetorin po e shënojmë sonte sepse ishim pikërisht bashkë, këtu, një vit më parë, prej kur kjo hapësirë e objektit të qeverisë, që dikur nuk shfrytëzohej, është bërë vend kaq i këndshëm për pritje e takime.

    E edhe një vit pas, Ballkoni ynë vazhdon të jetë i hapur, sonte, për mërgatën tonë të dashur, për juve bashkatdhetarë. Bashkë e shpallëm. Bashkë po e shënojmë edhe përvjetorin e parë. Bashkë do të takohemi për shumë mote. Mirë se vini e gëzuar!

    Kosova ka bërë përparim të dukshëm gjatë këtyre dy viteve të fundit. Që nga shpallja e pavarësisë përparimi ka qenë i theksuar si për popullin e shoqërinë ashtu edhe për shtetin edhe institucionet. Ndërkaq, në këto dy vitet e qeverisjes sonë nuk ka raport ndërkombëtar kredibil i cili nuk e ka evidentuar progresin tonë demokratik dhe ekonomik. E sërish kur themi progresin tonë nuk e mendojmë vetën tonë, por e mendojmë edhe një herë popullin e shoqërinë, shtetin e institucionet e tij. Kemi bërë hapa të rëndësishëm në zhvillimin ekonomik, tërheqjen e investimeve të huaja dhe krijimin e vendeve të punës.

    Rritja mesatare ekonomike në këto dy vite ka qenë 7.35% të bruto produktit vendor. Të hyrat tatimore janë rritur për 2/3, pa e ndryshuar politikën fiskale dhe eksportet e investimet e huaja direkte janë dyfishuar. Sivjet pritet të jetë viti i parë kur eksportet do ta kalojnë shifrën prej 1 miliard euro.

    Mesatarisht, gjatë çdo viti të qeverisjes, i kemi shtuar më shumë ekonomisë sonë sesa në tre vitet e mëparshme marrë së bashku për bazë.

    Për herë të parë, ekonomia e ka kaluar shifrën prej 400 mijë vendeve aktive të punës. Punësimi ka qenë zotim dhe prioritet i ynë. Kjo është dëshmi që politika dhe masat e shumta të punësimit po funksionojnë.

    Miratuam ligjin në Kuvend për rritjen e pagës minimale në Kosovë, pas më shumë se 10 viteve. Tash për punëtorët mbi 35 vjeç kemi rritje të pagës minimale prej 55%, ndërkaq prej atyre që janë nën 35 vjeç është rritja 103%. Me këtë Ligj e kemi larguar edhe tatimin në të ardhurat personale për pagat deri në nivelin e pagës minimale. Për fatin tonë jo të mirë, ky Ligj, sipas vullnetit të opozitës, përfundoi në Gjykatë Kushtetuese dhe duhet ta presim verdiktin e saj.

    E javën e kaluar në Kuvend i kemi dhënë fund padrejtësisë ndaj pensionistëve që u larguan dhunshëm nga puna gjatë viteve ‘90-ta. Falë ndryshimeve të bëra në ligj, rreth 70 mijë pensionistë të cilët po të mos ishin larguar dhunshëm nga puna në vitet e ‘90-ta do të arrinin kushtin prej 15 vitesh kontribut deri më 01.01.1999, tani e tutje, do të marrin pensionin parcial kontributpagues.

    Bashkë me Kosovën, edhe mërgata jonë ka evoluuar dukshëm. Nga streha e veprimtarisë së çështjes kombëtare dhe burimi i mbijetesës financiare në kohë të vështira për vendin, ajo vit pas viti po e zgjeron përfaqësimin tonë kombëtar. Atë sot e gjejmë në format më të suksesshme në art, në kulturë, në sport, financa, e tash së fundmi edhe përfaqësim politik në shtetet e tyre, nga niveli komunal e deri te ai qendror. Disa prej tyre janë këtu në mesin tonë sonte.

    Mërgata jonë gjithmonë ka qenë e rëndësishme për fatin tonë politik, përpjekjet tona historike e për mirëqenien tonë sociale. Çlirimi, shpallja e pavarësisë dhe krijimi e ndërtimi i shtetit të pavarur të Kosovës nuk ka qenë i mundur dhe as i paramenduar pa mërgatën tonë. Sa më shumë që e zhvillojmë shtetin, aq më shumë na forcohen edhe lidhjet. Një shtet i fortë reflektohet edhe me një mërgatë më të fuqishme dhe anasjelltas.

    Për të gjitha këto, ne po përpiqemi ta ofrojmë infrastrukturën e nevojshme.

    Për forcimin e lidhjeve, qeveria jonë, për herë të parë fillimisht ka zbatuar programin për diplomaci publike “Citizen Diplomacy Fellowship”, për çfarë e falënderoi Zëvendëskryeministrin dhe ministrin tonë të Punëve të Jashtme dhe Diasporës, zonjën Donika Gërvalla-Schwarz dhe zëvendësen e saj Liza Gashi, e që ka për qëllim ndërlidhjen me vendin e origjinës përmes angazhimit profesional. Ndërkaq pak ditë më parë e lansuam platformën “Shijo Kosovën”, përmes së cilës mërgata, e sidomos te gjeneratat e reja, do të mund ta njohin më mirë vendin e tyre të origjinës përmes aktiviteteve kulturore, sportive e natyrore.

    Për pjesëmarrje aktive, kemi miratuar në parim ligjin e ri për zgjedhje që lehtëson pjesëmarrjen e mërgatë tonë në procesin e votimit, duke mundësuar votimin edhe në ambasada dhe konsullata po gjithashtu edhe votimin me postë brenda shtetit ku jetojnë bashkatdhetarët tanë, përveç asaj mundësisë që të votojnë me postë direkt në Kosovë ose edhe të vijnë në Kosovë atëherë kur mbahen zgjedhjet.

    Për investime, po themelojmë Fondin Sovran për të cilin për herë të parë kemi folur para gjashtë vjetëve, nëpërmjet të cilit synojmë ta bëjmë indeksimin e kompanive tona publike po edhe private në ekonominë e vendit dhe dëshirojmë që edhe bashkatdhetarët t’i bëjmë aksionarë në ekonominë tonë.

    Ne e dimë që katragjyshet tona e katragjyshet tanë kanë definuar pasurinë si tokë dhe shtëpi. Mirëpo në shekullin 21 do të duhej që të mendojmë për aksionet e kompanive tona të cilët indeksohen në bursë në treg të kapitalit, e pikërisht këtë gjë e mundëson Fondi Sovran i cili na shpëton 44 mijë hektarë tokë bujqësorë nga ndërtimet e egra dhe tjetërsimet e tjera. Po gjithashtu edhe 17 ndërmarrjet politike i vendos në një çati për çfarë na nevojitet mbështetja e mërgatës për një bord profesional dhe për një kryeshef i cili zgjidhet për një mandat më të gjatë se sa ciklet elektorale katërvjeçar që janë tek ne.

    Ju e dini që në Kosovë mund të blesh bono të thesarit, por nuk mund të shesësh atë. Ne kemi nevojë ta bëjmë më dinamike ekonominë tonë dhe pronësinë e bashkatdhetarëve tanë të mos shndërrohen thjesht në pronësi që shtë gati kapitalizëm në vete sepse shfrytëzohet dy javë në vit, si banesë në Prishtinë për shembull, po të vijë dita që bashkatdhetari ynë në vend se ta blejë ndoshta edhe një banesë në Prishtinë, të blejë 0.1% të aksioneve në Trepçë, ose në KEK, ose në Telekom e kështu me radhë.

    Pra në duam që të ju ftojmë juve që, pra jo të kontribuoni duke sakrifikuar, po të fitoni edhe ju duke investuar.

    Mirë se vini edhe një herë e gëzohem shumë që po takohemi.

    Gëzuar!

  • Analisti gjerman: Kurti ka të drejtë kur thotë se dialogu është i pabalancuar

    Analisti gjerman: Kurti ka të drejtë kur thotë se dialogu është i pabalancuar

    Nuk po e sheh një proces të dialogut parimor e të balancuar mirë mes Kosovës dhe Serbisë.

    Analisti gjerman, Bodo Weber, thotë se Kosova nuk po trajtohet e barabartë me Serbinë në tavolinën e negociatave që po ndërmjetësohet nga unioni evropian.

    Sipas tij, shtetet Perëndimore kanë krijuar një perceptim se problemi qëndron tek Prishtina për krizën në veri.

    “Albin Kurti ka plotësisht të drejtë kur po thotë se procesi i dialogut momentalisht është i pa balancuar. Është mese e qartë se Perëndimi është duke përdorur një politikë të butë ndaj Beogradit. Me atë se çfarë ka ndodhur gjatë periudhës së fundit shtetet Perëndimore kanë krijuar një perceptim se Prishtina është problemi kryesor. Një qasje e tillë ndëshkuese e Perëndimit ka munguar ndaj Beogradit kur për shembull serbët vendosën të largohen nga institucionet e më pas i bojkotuan zgjedhjet”, vlerësoi Weber.

    Por Weber nuk po sheh vullnet nga asnjëra palë që ta zbatojë marrëveshjen e Ohrit.

    “Është e qartë se ka nuk ka vullnet nga Prishtina dhe Beogradi që ta respektojnë marrëveshjen e arritur në Ohër. Ky është rezultat i gjithë procesit të negociatave që është projektuar keq nga Perëndimi duke u qasur shumë butë ndaj Beogradit, dhe si rrjedhojë marrëveshjet nuk merren seriozisht. E për shkak të një qasje të tillë të pa balancuar e pafavorshme ndaj Prishtinës, ka ndikuar që kjo e fundit të humbas besimin tek ndërmjetësuesit e këtij procesi. Kjo në një farë forme i justifikon edhe veprimet e Prishtinës që të mos i zbatojë fare marrëveshjet”, deklaroi Weber.

    Për shtensionimin e situatës në veri BE dhe SHBA kanë kërkuar zgjedhje të reja në katër komunat veriore.

  • Gjykata e shpalli antikushtetues shkarkimin e bordit të RTK’së, ish-anëtari i tij paralajmëron padi

    Gjykata e shpalli antikushtetues shkarkimin e bordit të RTK’së, ish-anëtari i tij paralajmëron padi

    Bajram Mjeku, ish-anëtar i bordit të Radio Televizionit të Kosovës (RTK), ka qenë një nga të shkarkuarit në korrik të vitit 2021 nga Kuvendi i Kosovës.

    Por ky shkarkim ka qenë antikushtetues, ka qenë konstatimi i Gjykatës Kushtetuese, të martën e 1 gushtit.

    Për këtë Mjeku thotë se është i çliruar emocionalisht, pasi tregon se ai dhe familja e tij nuk i kanë shpëtuar bullizimit gjatë gjithë kësaj kohe.

    E me këtë çlirim emocional, nuk do të ndalet thotë se do të padisë deputetët përgjegjës.

    Më poshtë është statusi i plotë i tij:

    Reagim: Kushtetuesja foli, e drejta triumfoi

    Pas inicimit të dhjetë deputetëve të Kuvendit të Kosovës, kur në korrik të vitit 2021 dërguan në Gjykatën Kushtetuese ankimimin mbas shkarkimit arbitrar të Bordit të RTK-së nga deputetët e mazhorancës, më në fund pas dy vjetësh, sot foli Gjykata Kushtetuese. Vendimi rezultoi në favor të anëtarëve të shkarkuar të Bordit të RTK-së, që do të thotë se deputetët e mazhorancës kanë bërë veprim antikushtetues!

    Në kërkesën time me shkrim, të cilën më 21 qershor të vitit 2021 ia pata dërguar znj. Doarsa Kica Xhelili, kryetare e Komisionit Parlamentar për Administratë Publike, Pushtet Lokal, Medie e Zhvillim Rajonal në Kuvendin e Republikës, pata kërkuar që për shkak të ndjeshmërisë, të themelojnë komisionin hetimor parlamentar dhe të gjithë anëtarët e Bordit të intervistohen një për një, para se emrat tonë të dërgohen për shkarkim në Kuvendin e Republikës. Nga deputetët e Kuvendit jemi zgjedhur veç e veç dhe përgjegjësitë i kemi marrë veç e veç, pa paragjykuar asnjëherë gabimet apo shkeljet e dikujt tjetër.

    Në planin emocional, sot ndjehem i çliruar, pasi ndjesinë e shkarkimit e kam bartur tash dy vjet. Edhe pas Vendimit të sotëm nga Gjykata Kushtetuese, nuk ka përfunduar asgjë. Në fakt, ky është vetëm fillimi i fundit i një odiseade, derisa kjo barrë ka rënduar edhe mbi familjen time, e cila nuk ka mundur t’i shpëtojë bullizmit, i shprehur aq shumë në ambientin tonë brutal.

    Kurdo që vendimi të bëhet i plotfuqishëm nga Gjykata Themelore në Prishtinë, do të kontaktoj avokatin tim për të nisur procedurën e padisë civile ndaj deputetëve të Komisionit Parlamentar për Administratë Publike, Pushtet Lokal, Medie e Zhvillim Rajonal dhe deputețëve të Komisionit Parlamentar për Punë e Transfere në Kuvendin e Kosovës, të cilët si mjet rrënues përdorën numrat e arrogancën, në vend të argumenteve dhe qasjes profesionale. Janë pikërisht këta deputetë, të cilët me zell të paimagjinueshëm dhe pa zgjedhur asnjë mjet, provuan të rrënojnë integritetin personal e profesional në sy të opinionit publik, prandaj do t’i shfrytëzoj të gjitha mjetet ligjore, që të zbatohet drejtësia e munguar.

  • Lista Srpska i reagon Hovenierit pasi ua tregoi kufijtë: Foli për t’ia bërë qejfin opinionit në Prishtinë

    Lista Srpska i reagon Hovenierit pasi ua tregoi kufijtë: Foli për t’ia bërë qejfin opinionit në Prishtinë

    Lista Serbe i ka reaguar ambasadorit të Shteteve të Bashkuara të Amerikës në Kosovë, Jeffrey Hovenier, i cili ishte i qartë që Kosova është shtet i pavarur demokratik dhe se Lista Serbe është si të gjitha partitë opozitare në Kosovë, pra nuk është parti serbe por që përfaqëson serbët etnikë në Kosovë.

    Ky subjekt politik thotë se kjo deklaratë vjen pasi zyrtarë të Listës Serbe ishin në një vizitë në Uashington – dhe sipas këtij subjekti politik deklarata ishte për “t’ia bërë qefin” opinionit në Kosovë.

    Në lidhje me këtë thonë se ata përfaqësojnë kudo “interesat e popullit serb”.

    ”Përfaqësuesit e Listës Serbe kudo që janë, dhe këdo që takojnë do të përfaqësojnë gjithmonë interesat e popullit serb, sepse është detyrë e jona ndaj qytetarëve që mbështesin partinë tonë. Gjithashtu duam të theksojmë se politikën tonë gjithmonë e kanë vendosur autoritetet e Listës Serbe duke respektuar interesat e qytetarëve tanë, dhe jo nga diktimi i askujt, dhe se kështu do të vazhdojë të jetë.

    Si në Uashington, ashtu edhe ne Prishtinë, në cilindo qytet të botës apo para ndërtesave komunale me qytetarët e tyre në mënyrë paqësore dhe demokratike, gjithmonë do te luftojmë për te drejtat e popullit serb, mbijetesën dhe qëndrimin e tyre ne vatrat e tyre shekullore”, thuhet në komunikatën e Listës Serbe.

    Për deklaratën e ambasadorit amerikan ka deklaruar ashpër edhe drejtori i të ashtuquajturës “Zyre për Kosovën”, Petar Petkoviq, duke thënë se “Lista Serbe përfaqëson interesat e popullit serb e jo të ambasadave”.

  • Hajdari thotë se janë iniciuar kallëzime penale ndaj zyrtarëve të ARBK-së

    Hajdari thotë se janë iniciuar kallëzime penale ndaj zyrtarëve të ARBK-së

    Ministrja e Industrisë, Ndërmarrësisë dhe Tregtisë, Rozeta Hajdari, tha se janë iniciuar kallëzime penale ndaj zyrtarëve në Agjencinë Kosovare për Regjistrimin e Bizneseve (ARBK) dhe përfaqësuesve të kompanive lidhur me shkeljet e bëra gjatë regjistrimit në këtë agjenci.

    Kështu bëri të ditur MINT përmes një njoftimi për media ku publikoi fjalimin e plotë të ministres Hajdari. Ajo këtë adresim e bëri gjatë një konference për media më herët gjatë 1 gushtit, konferencë që u bojkotua nga shumica e mediave, në shenjë pakënaqësie me pezullimin e certifikatës së biznesit të televizionit Klan Kosova.

    Hajdari tha se përveç kallëzimeve penale kanë nisur edhe procedura disiplinore ndaj zyrtarëve të ARBK-së.

    Ministrja Hajdari tha se shkeljet janë gjetur nga Komisioni për riverifikimin e dosjeve në ARBK. Sipas saj, nga 10 deri më 19 korrik, ky komision ka verifikuar 660 dosje të bizneseve të regjistruara në ARBK, dhe ka gjetur se 48 dosje kanë pasur emërtime kundërkushtetuese “ku në rubrikën vendi/shteti i lindjes apo vendbanimi aktual është shkruar: “Prishtinë – Kosovo Metohija, Serbia”, “Pejë – Republika e Serbisë”, “Gjilan – Serbia” “Gjakovë – Republika e Serbisë” etj”.

    Për shkak të këtyre shkeljeve, Hajdari tha se më 31 korrik, janë shfuqizuar certifikatat e pesë bizneseve që kishin emërtime antikushtetuese.

    “ARBK do të vazhdojë me nxjerrjen e vendimeve edhe ndaj bizneseve të tjera të cilat e kanë kryer shkeljen e njëjtë të Kushtetutës së Republikës së Kosovës”, tha ajo.

    Ndërkaq, duke folur për rastin e televizionit Klan Kosova, ministrja Hajdari tha se pezullimi i certifikatës së biznesit të këtij televizioni “nuk kishte fare për qëllim që ta kufizojë fjalën e lirë, lirinë e shprehjes dhe punën e mediave në vendin tonë, por vetëm që t’i zbatojë kërkesat legjitime të Kushtetutës dhe ligjeve”.

    “Pra, qëllimi i vetëm i procesit administrativ të ARBK-së, në rastin e Klan Kosovës Sh.P.K. dhe bizneseve tjera që janë identifikuar, ka qenë zbatimi i ligjit, as më shumë, as më pak”, tha ajo.

    Më 31 korrik, punonjësit medialë kanë protestuar në Prishtinë lidhur me rastin e shfuqizimit të certifikatës së biznesit të Klan Kosovës, që mund të çojë në mbylljen e këtij televizioni kombëtar privat.

    Çfarë ka ndodhur me certifikatën e biznesit të Klan Kosovës?
    Më 28 korrik, Ministria e Industrisë, Ndërmarrësisë dhe Tregtisë (MINT) e hodhi poshtë ankesën e Klan Kosovës për shfuqizimin e pezullimit të certifikatës së biznesit saj.

    MINT-i kishte ngritur fillimisht kallëzim penal ndaj Klan Kosovës më 14 qershor, me pretendimin se në certifikatën e biznesit, te ndërrimi i pronarëve, figuron “Pejë – Serbia dhe Gjakovë – Serbia”.

    Pas kësaj, ARBK-ja ia anuloi certifikatën e biznesit Klan Kosovës, para se ta shfuqizonte vendimin më 21 qershor. Megjithatë, një ditë më vonë, ARBK-ja anuloi vendimin e 21 qershorit.

    Ky vendim i ARBK-së riktheu në fuqi masën e pezullimit të certifikatës së biznesit të televizionit privat më 22 qershor.

    Klan Kosova u ankua menjëherë në Komisionin për Shqyrtimin e Ankesave për Regjistrimin e Bizneseve, i cili më 28 korrik vendoi t’ia hedhë poshtë ankesën dhe ta konfirmojë përfundimisht pezullimin e certifikatës së biznesit të saj, duke theksuar se ARBK-ja kishte “vepruar në përputhje me ligjin kur e pezulloi certifikatën e biznesit të Klan Kosovës”.

    MINT-i e akuzon televizionin se e “ka shkelur Kushtetutën e Kosovës” duke i “paraqitur dy qytete të Kosovës, Pejën dhe Gjakovën, si pjesë të Serbisë” në dokumentet e regjistrimit të kompanisë.

    “Vetë fakti që përfaqësuesit e Klan Kosovës sh.p.k., pas kaq shumë vitesh, kanë nisur hapa për korrigjim, vërteton se biznesi në fjalë e kishte kryer shkeljen e konstatuar nga ARBK-ja dhe se vendimi për pezullimin e certifikatës së biznesit ishte marrë me të drejtë”, thuhej në njoftimin e MINT-it më 28 korrik.

    Klan Kosova i ka mohuar akuzat dhe i ka quajtur gabim teknik lëshimet në dokumentet e regjistrimit.

    “Pavarësisht se Klan Kosova SH.P.K. ka ndërmarrë hapat e rregullimit të dokumentacionit sipas udhëzimeve të MINT për të përmirësuar çështjen teknike në regjistrim, vendimi i Komisionit është refuzues, dhe si i tillë arbitrar dhe i papranueshëm për shoqëritë demokratike dhe shtetet ligjore”, thuhej në njoftimin e Klan Kosovës.

    MINT më 31 korrik tha se komisioni i tij e ka mbyllur këtë çështje, pra do ta mbajë në fuqi pezullimin e licencës së biznesit të televizionit, por konfirmoi se Klan Kosova gëzon të drejtën për të parashtruar padi në gjykatën kompetente./REL

  • Hovenier-Listës Serbe: E dimë saktësisht ku është kufiri, ju jeni parti opozitare e Kosovës së pavarur

    Hovenier-Listës Serbe: E dimë saktësisht ku është kufiri, ju jeni parti opozitare e Kosovës së pavarur

    Ambasadori amerikan në Kosovë, Jeff Hovenier, ka kërkuar de-përshkallëzimin e plotë të situatës në veri.

    Ai para mediave ka thënë se SHBA-ja kërkon zbatimin e plotë të marrëveshjeve të arritura.

    “Po vazhdojmë të kemi diskutime me Qeverinë, është mirë të shohim depërshkallëzim të mëtejmë të situatës në veri. Së dyti, duam të shohim përpjekje nga të dyja palët, Kosovës dhe Serbisë, për të arritur zbatim të plotë të marrëveshjes së arritur për të ecur përpara integrimit”, ka thënë ai.

    Hovenier ka folur edhe për takimin e Listës Serbe me të dërguarin e posaçëm të Uashingtonit për Ballkanin Perëndimor, Gabriel Escobar. Ai ka theksuar se SHBA-ja kërkon dhe pret që Lista Serbe të marrë pjesë në zgjedhje.

    Ambasadori ka shtuar se s’duhet të vihet në pyetje se Kosova është shtet sovran dhe se Lista Serbe është parti politike opozitare në Kosovë.

    “Pashë disa komente të Listës Serbe pas takimit dhe dua të theksoj disa gjëra. E para është që SHBA-ja e konsideron Kosovën të jetë, dhe që nga viti 2008 nga shpallja e pavarësisë, ne e kemi njohur të jetë shtet i sovran, i pavarur dhe demokratik. Puna që bëjmë ne me Listën Serbe, si parti politike e Kosovës, është puna që e bëjmë edhe me të tjera parti opozitare në Kosovë. Nuk duhet të ketë pyetje apo sugjerim për qëndrimin e SHBA-së se Kosova është tjetër pos shtet i pavarur. Dhe kjo përfshin veriun e Kosovës, siç e kam thënë shumë herë, ne e dimë saktësisht ku është kufiri. Është veriu i Mitrovicës. Ne duam që Lista Serbe ta luajë rolin e vet si parti politike në Kosovën sovrane, të pavarur dhe demokratike. Ne nuk e konsiderojmë parti politike serbe, e konsiderojmë si parti e serbëve etnikë në Kosovë. Duhet ta bëjmë këtë të qartë”, tha Hovenier.

    Katër ditë më parë, Lista Serbe në takim me Escobarin ka përmendur respektimin e marrëveshjeve të nënshkruara, duke kërkuar themelimin e Asociacionit të komunave me shumicë serbe.

    Nënkryetari i Listës Serbe, Igor Simiq, dy ditë më pas në një intervistë për Zërin e Amerikës ka pretenduar se qysh para zgjedhjeve në veri ka pasur njësi speciale që, siç supozoi ai, “po ndërtojnë baza ilegale duke marrë tokën serbe, duke mos respektuar as ligjet e shpronësimit”. Ndër tjerash, ai pati pretenduar se po bëhej terror mbi serbët e se zgjedhjet nuk do të zgjidhin asgjë pa depërshkallëzim total të situatës.

  • ​Hovenier ripërsëritë kërkesat për depërshkallëzimin e plotë të situatës në veri

    ​Hovenier ripërsëritë kërkesat për depërshkallëzimin e plotë të situatës në veri

    Ambasadori i Shteteve të Bashkuara të Amerikës në Kosovë, Jeffrey Hovenier, ka ripërsëritur kërkesat për depërshkallëzimin e plotë të situatës në veri të Kosovës dhe zbatimin e marrëveshjes së Ohrit.

    Ambasadori Hovenier pas pjesëmarrjes në dhënien e 250 kamerave të trupit donacion Policisë së Kosovës, foli edhe për rastin e televizionit Klan Kosova, ku tha se kjo çështje nuk është vetëm biznesore, por edhe për lirinë e mediave.