Tag: Ballina

Kryeministri Albin Kurti nëpërmjet “Facebook” ka uruar fillimin e vitit shkollorë.

Postimi i plotë:

“Të dashur nxënës, mësimdhënës e prindër, urime fillimin e vitit të ri shkollor.

Në veçanti, uroj të gjithë nxënësit që për herë të parë ulen në bankat shkollore. Për ta sot fillon një rrugëtim i ri, i cili do të përcaktojë të ardhmen e tyre por edhe të shtetit të Kosovës.

Për të përmbushur obligimin tonë për të siguruar tekstet shkollore, këtë vit kemi zgjedhur një rrugë të re. Po ashtu, si asnjë vit më parë, përveç teksteve shkollore po ndajmë edhe mjete shtesë për materiale shkollore të nevojshme për nxënësit tanë.

Arsimi dual për këtë vit shkollor po zgjerohet në gjithsej 12 profile të ndryshme, në 21 shkolla profesionale dhe 13 komuna, duke ndërtuar kështu urën ndërmjet arsimit dhe ekonomisë, diplomës së shkollës dhe vendit të punës.

Ndërkohë që kemi miratuar Ligjin për Edukim në Fëmijërinë e Hershme, kemi finalizuar kurrikulën për edukim në fëmijërinë e hershme dhe jemi duke investuar në rritjen e përfshirjes së fëmijëve në këtë nivel të edukimit.

Me punë e përkushtim do të realizojmë misionin tonë për një arsim cilësor, që edukon, shkollon dhe përgatit për përmbushjen e ëndërrave, synimeve dhe potencialit të rinisë sonë.

Ju qoftë një vit i mbarë e i suksesshëm!”

Në arsimin parauniversitar në vend sot më 1 shtator ka nis viti i ri shkollor 2023/24. Për dallim nga viti i kaluar kur pati grevë, këtë vit ka filluar me sfida sa i përket pajisjes me tekste shkollore për nxënësit.

Ndërkaq, prindërit shprehen se 1 shtatori këtë vit është më ndryshe prej viteve të tjera, kur nxënësit pajiseshin me libra nëpër shkolla, meqë sipas tyre po hasin në vështirësi në sigurimin e librave për fëmijët e tyre.

Nëna e një vajze që filloi klasën e parë sivjet, Vjollca Statovci tha se ende nuk i ka blerë librat për vajzën, derisa shton se ende nuk ka aplikuar për subvencionimin e librave si rrjedhojë e problemeve teknike.

“Fillon sivjet klasën e parë…Jo fatkeqësisht, kemi prit edhe prej qeverisë që do të na mundësojë këtë gjë për nxënësit, po që nuk kemi arrit. (Nuk është vendim i duhur) Jo, absolutisht jo, tani ne duhet të japim kosto ekstra derisa të na rimburësojnë ata, po ato familje që nuk kanë, a e mendojnë këtë gjë qeveria. (Nuk kam aplikuar për subvencione) Jo, kemi pasur disa herë pengesa, e kemi lënë ndoshta javën tjetër, ndoshta hapet linku si duhet. Si e vlerësoni sistemin arsimor në Kosovë? Nëse vlerësojmë prej njëshi deri në dhjetë, një shtatëshe të fortë, por ndoshta do të bëhet më mirë”, tha Statovci.

Po ashtu edhe prindi i dy fëmijëve, Genc Gigollaj u shpreh i zhgënjyer me vendimin e Ministrisë së Arsimit, që librat të blihen nga vetë prindërit, derisa kritikoi qeverinë aktuale për mos fokusin e duhur në arsim.

“Vajza është në klasën e tretë ndërsa djali është në klasën e parë, fillon këtë vit. Po, i kemi siguruar, edhe pse ka qenë shumë e vështirë për neve, përkundër angazhimeve që i kemi, por duke e ditur rëndësinë dhe fuqinë e librit, normal kemi marrë mundin. Ky slogan, po mendoj se këtë vit ka qenë si “Çantat bosh, kokën plotë”. Është inekzistente qasja e ministrisë për këto dy vjet. Unë jam i befasuar me qasjen që kanë ndaj shoqërisë që është më e ndjeshme edhe më e vlefshme. Sa kanë kushtuar librat? Nuk është e rëndësishme çmimi, ndoshta po, nuk është edhe aspekti material, por qasja është shumë e rëndësishme. Si e vlerësoni sistemin arsimor në Kosovë? Jo, absolut, unë nuk e di pse kjo qeveri ose ky ndryshim që ka ndodhur nuk e ka në fokus edukimin ose siç ka thanë edhe i madhi Dritëro Agolli “Një njeri i pa edukuar është barrë për shoqërinë gjithë jetën”, tha Gigollaj.

Vendimin e ministres së Arsimit, Arbërie Nagavci për mos shpërndarjen e librave, e konsideron skandaloz dhe të turpshëm, edhe një prind tjetër, Agron Gashi, derisa shton se ky vendim e ka “prishur” edhe ‘festën’ e 1 shtatorit.

“Natyrisht është ditë feste, për ditën e parë të shkollës, por ka diçka natyrisht që e prishë festën. E para, vendimi i Ministrisë së Arsimit për aplikim dhe mos shpërndarje të teksteve shkollore për prind është shumë shqetësues, imagjinoni unë jam mësimdhënës vetë aplikoj, përveç tjerash, nuk është që nuk di të aplikoj, por përveç tjerash kërkohet që kthehet me vonesë një konfirmim ku duhet bëjeni selfie me letërnjoftim, ja dërgon të gjitha të dhënat dhe fotografitë, dhe pastaj dërgoja. Të dhënat po kërkohen që po më duket shumë shqetësuese. Unë njoh familje dhe njerëz të cilët, kam pasur rastin t’u ndihmoi, nuk kanë rrjet, nuk kanë internet në shtëpi, nuk kanë telefona të mençur, kështu që e ka bërë konfuz dhe kjo është pengesa kryesore. Sot vije një pjesë e nxënësve pa mjete mësimore. Është diçka skandaloze dhe e turpshme”, tha Gashi.

Përveç kësaj, Gashi thekson edhe një problem tjetër, që sipas tij është shqetësues për të si prindër.

“Duke qenë se kjo shkollë bart një emër të madh, emrin “Naim Frashëri”, dhe është një ndër shkollat e zgjedhura, pra një shkollë publike për të cilën po të mos pëlqente nuk do e kisha sjell birin këtu. jo që më pengon ditën e parë, i sjellin që në klasën e parë dhe për të gjithë këta prindër është festë dita e parë e shkollës, dhe kur vijnë shohin këso sloganesh, të cilat janë slogane të pahijshme, slogane rrugaçësh, “danger”, të grupeve të ndryshëm të cilat frekuentojnë këtë shkollë, e cila të krijon pasiguri, pavarësisht se ka një menaxhment dhe mësimdhënës të jashtëzakonshëm, por për dy euro e gjysmë ngjyrë kanë mundur ta mbulojnë të paktën ditën e parë mos të duken këto slogane”, u shpreh Gashi.

Ndërkaq, nxënësit shprehen të emocionuar që do të fillojnë mësimin dhe do të takojnë shoqërinë, derisa tregojnë se çfarë profesionesh kanë dëshirë të zgjedhin në të ardhmen.

Nxënësja e cila nisi këtë vit klasën e parë, Tuana Statovci përmes një poezie shprehu gëzimin e saj për fillimin e vitit shkollor.

“Erdh shtatori sa u gëzova, klasën e parë sa e fillova, erdhi shtatori me gëzim, shkoj në shkollë me nxitim”, Çfarë ke dëshirë të bëhesh kur të rritesh? Mësuese…A ke shoqe këtu? Po. A je e gëzuar që po shkon në shkollë? Po, se kam dëshirë të mësoj shumë”, u shpreh vogëlushja.

Ndërkaq, nxënësit Noar Rreci dhe Amra u shprehën se janë të gëzuar që do të takojnë shokët e shoqet e tyre, dhe se do të mësojnë gjëra të reja.

Ministrja e Arsimit, ka marr vendim për subvencionimin e prindërve për blerjen e teksteve shkollore. /KP

Presidentja Vjosa Osmani i ka uruar fat të mbarë homologut të saj shqiptar Bajram Begaj dhe kryeministrit Edi Rama në udhëheqjen e Presidencës në Këshill të Sigurimit të Kombeve të Bashkuara.

Ajo tha se është një kohë kyçe për paqen dhe sigurinë dhe se është e nevojshme që të jenë bashkë.

“Suksese Presidentit Bajram Begaj, Kryeministrit Edi Rama, Misionit të Shqipërisë në OKB me marrjen e Presidencës së KS të OKB-së nga Shqipëria. Në këtë kohë vendimtare për paqen dhe sigurinë, është e rëndësishme që ne të vazhdojmë të qëndrojmë të bashkuar në promovimin e vlerave tona të përbashkëta demokratike globalisht”, ka shkruar Osmani.

Best of luck to President @BajramBegajAL, PM @ediramaal & @AlMissionUN as Albania takes over the #UNSC presidency.

At this crucial time for peace & security, it is important that we continue to stand united in promoting our shared democratic values globally. 🇽🇰🇦🇱

— Vjosa Osmani (@VjosaOsmaniPRKS) September 1, 2023

Ndonëse mësimi ka filluar në të gjitha shkollat e Kryeqytetit, disa prej tyre nuk kanë pasur fare tekste shkollore. Kështu ka bërë të ditur drejtoresha e Arsimit në Komunën e Prishtinës, Besianë Musmurati.

Ndërsa për vonesat në renovimin e shkollës “Meto Bajraktari”, për të cilën raportoi Ekonomia Online, Musmurati tha se presin që të përfundojnë të hënën.

Krahas kësaj shkolle, ajo tha se edhe shkolla “Gjergj Fishta”, është në renovim e sipër.

Në konferencën për medie të premten, ajo ka deklaruar se gjatë ditës do të presin një raport final për mungesat e teksteve shkollore.

“Mësimi veçse ka filluar në të gjitha shkollat e komunës së Prishtinës. Stafi veçse ka shkuar po marrim raporte. Deri më tani ka shumë shkolla që nuk kanë fare libra. Gjatë ditës do të kemi një raport të plotë në lidhje me furnizimin me libra”, tha ajo.

Musmurati tha se në tërësi në Prishtinë janë rinovuar 22 shkolla. Ndërsa dy gjimnaze, tha se i kanë bartur në një objekt tjetër deri më datë 15 shtator.

“Janë 5 shkolla në tërësi që janë në rinovim të thellë, ndërsa gjithsej i kemi rinovuar 22 shkolla. Janë shkolla ‘Meto Bajraktari’ dhe ‘Gjergj Fishta’ që janë duke mbajtur mësim me orar të shkurtuar dhe pjesë të shkollës i kemi izoluar që të mos pengojnë procesin mësimor nga e hëna presim që gjithçka t’i kthehet normalitetit. I kemi dy gjimnaze që i kemi alokuar në vende të ndryshme që të mbajnë mësimin deri më datën 15 shtator kur do të përfundojnë renovimet përfundimtare dhe ata pastaj do të vendosin në objektet e tyre. Bëhet fjala për shkollën e mesme profesionale ‘Hoxhe Kadri Prishtina’ si dhe shkollën ‘Gjin Gazulli’ të cilët po mbajnë mësim në gjimnazin ‘Ahmet Gashi’ dhe ‘Eqrem Qabej’”, tha ajo.

Ministrja e Arsimit, Arbërie Nagavci ka uruar nxënësit, mësuesit e prindërit për fillimin e vitit të ri shkollor.

Nagavci përmes një videoadresimi ka thënë se Ministria të cilën ajo e udhëheqë bashkë me komunat përkatëse kanë bërë të gjitha përgatitjet për fillimin e këtij viti shkollor.

Teksa ka theksuar se po punojnë çdo ditë për përmirësimin e infrastrukturës shkollore e ligjore dhe rritjen e cilësisë së teksteve mësimore.

“Sot shkollat tona hapin dyertë për të mirëpritur fëmijët në ditën e parë të vitit të ri shkollor . Ministria e Arsimit Shkencës dhe Teknologjisë në bahskëpunim dhe me komunat e shkollat kanë bërë t të gjithë përgatitjet e duhura për fillimin e vitit të ri shkollor 2023/2024. Si Ministri po punojmë cdo ditë për të përmirësuar infrastrukturën shkollore e ligjore dhe vazhdojmë punën tonë për rritjen e cilësisë së teksteve shk mësimore. Gjatë punës sonë në Ministri të Arsimit me vendosmëri po avancojmë politikat arsimore”, tha ajo.

“Vit të mbarë shkollor për të gjithë “, shtoi Nagavci.

Qeveria e Kosovës tha se e mirëpret vizionin e shprehur nga presidenti i Këshillit Evropian, Charles Michel, se BE-ja do të mund të pranojë vende të reja anëtare deri në vitin 2030, por se ato “nuk duhet të importojnë konflikte nga e kaluara”.

Në një deklaratë me shkrim dhënë Radios Evropa e Lirë, Qeveria tha se ka marrëveshje me Serbinë për normalizimin e marrëdhënieve dhe se ajo është e përkushtuar për zbatimin e tyre.

Sipas saj, i takon Serbisë “të sillet me përgjegjësi”.

Në anën tjetër, presidenti i Serbisë, Aleksandar Vuçiq, tha të enjten se është Prishtina ajo që “nuk do zgjidhje”.

Dy vendet, nën ndërmjetësimin e Bashkimit Evropian, janë në bisedime për normalizimin e marrëdhënieve qysh në vitin 2011.

Ndonëse kanë arritur dhjetëra marrëveshje në fusha të ndryshme, zbatimi i shumicës prej tyre ka ngecur.

Kosova, dhjetorin e kaluar, ka aplikuar për anëtarësim në BE, ndërsa Serbia është vend kandidat nga viti 2012.

Zgjidhja e mundshme

Njohësit e integrimeve evropiane dhe të proceseve politike në Kosovë dhe në Serbi kanë pikëpamje të ndryshme lidhur me gjasat e dy vendeve për t’i normalizuar marrëdhëniet deri në fund të kësaj dekade.

Demush Shasha, nga Instituti i Kosovës për Politika Evropiane, thotë se, nëse shikohet historia e deritashme e dialogut Kosovë-Serbi, ka pak vend për optimizëm se kontesti ndërmjet dy vendeve mund të zgjidhet shpejt. Por, sipas tij, kjo nuk është e pamundur.

“Nëse dëshirojmë ta jetësojmë këtë vizion, pra deri më 2030, atëherë, që nga sot ose nesër, liderët duhet të fillojnë të sillen në mënyrë radikale ndryshe. Kjo më së shumti do të testohet në çështje të ndjeshme politike, si dialogu për normalizimin e marrëdhënieve [ndërmjet Kosovës dhe Serbisë]. Patjetër që 7 vjet janë më se të mjaftueshëm që Kosova dhe Serbia të mësohen të jetojnë si dy fqinj, sikurse që jetojnë Sllovenia dhe Kroacia, Gjermania dhe Austria etj.”, thotë Shasha për Radion Evropa e Lirë.

Arton Demhasaj, nga organizata joqeveritare “Çohu”, thotë se insistimi i BE-së dhe SHBA-së në vazhdimin e dialogut, i cili ka muaj që ka ngecur, tregon se Perëndimi po përpiqet ta çojë përpara procesin e normalizimit të marrëdhënieve Kosovë-Serbi.

“… pastaj, kur procesi të arrijë në fund, kur Serbia të jetë para dyerve të Bashkimit Evropian, unë jam i bindur që Serbia, medoemos, do ta kërkojë një marrëveshje me Kosovën [për normalizim], që t’i hapet dera për të hyrë në BE, sepse ndryshe, e ka të pamundur të hyjë në BE”, thotë Demhasaj.

“Por, normalisht, nëse Kosova bëhet pengesë për arritjen e një marrëveshjeje të tillë, atëherë kjo do t’i shkaktojë telashe [asaj] për sa i përket këtij procesi [të integrimit në BE]”, shton ai.

Kryeministri i Kosovës, Albin Kurti, dhe presidenti i Serbisë, Aleksandar Vuçiq, janë takuar për herë të fundit më 2 maj – nëntë ditë pas zgjedhjeve të jashtëzakonshme në veri të Kosovës, të cilat janë bojkotuar nga popullata lokale serbe. Nga ajo kohë, mes dy vendeve ka pasur një sërë tensionesh dhe krizash.

Më 30 gusht, BE-ja përsëriti thirrjen për të dyja që të krijojnë një klimë për vazhdimin e dialogut.

“Palët po bëjnë të kundërtën e normalizimit”

Në Serbi, njohësit e proceseve politike shprehen më pesimistë sa i përket mundësisë që Kosova dhe Serbia t’i zgjidhin të gjitha kontestet deri në fund të kësaj dekade.

Aleksandar Popov, drejtues i Qendrës për Rajonalizëm në Novi Sad, thotë se praktikat e deritashme në dialogun Kosovë-Serbi kanë treguar se palët u shmangen obligimeve që dalin nga marrëveshjet e arritura.

Për më tepër, thotë ai, në dy vjetët e fundit, palët kanë krijuar situata që nuk premtojnë se do të ndryshojnë qasje në procesin e normalizimit të raporteve.

“Të dyja palët, thjesht, bëjnë gjithçka të kundërt nga ajo që do ta sillte situatën në normalitet… [Normalizimi i marrëdhënieve] do të varet nga ajo se a do të mbeten në pushtet garniturat e njëjta në Kosovë dhe në Serbi. Do të varet edhe nga fakti se sa do të jetë Perëndimi energjik në presionin ndaj palëve, që problemet të zgjidhen”, thotë Popov për Radion Evropa e Lirë.

Dushan Janjiq, nga Forumi për Marrëdhënie Etnike në Beograd, vlerëson se normalizimi i marrëdhënieve ndërmjet Kosovës dhe Serbisë nuk do të varet në veçanti vetëm nga këto dy vende.

Sipas tij, vetë Bashkimi Evropian si tërësi është treguar joserioz në qasjen e tij ndaj këtij problemi, sepse pesë vende të tij – Greqia, Spanja, Sllovakia, Rumania dhe Qiproja – nuk e kanë njohur ende pavarësinë e Kosovës.
Janjiq thotë se, nëse Bashkimi Evropian do t’i bindë këto vende që ta njohin Kosovën, atëherë procesit të zgjidhjes së kontestit Kosovë-Serbi do t’i hapej rruga.

“Të jem preciz. Në qoftë se ata [BE-ja] janë seriozë në çfarëdo qoftë, si dhe në vendosjen e përparësive të tyre, ata nga Komisioni Evropian, së pari, duhet të merren vesh me ato pesë shtete. Pra, ‘a e pranojmë ne Kosovën si shtet dhe shoqëri demokratike, sipas parimeve të vitit 1990’? Ato quhen parime për pranimin e shteteve të reja, pra shteteve të reja demokratike në Evropë. Pse nuk po e bëjnë këtë?”, shprehet Janjiq.

Pavarësisht të gjithave, bashkëbiseduesit e REL-it thonë se anëtarësimi i vendeve të Ballkanit Perëndimor në BE, do të varet më shumë nga vendimi politik i BE-së, sesa nga përmbushja e kritereve për anëtarësim.

Nuk është hera e parë që nga BE-ja përmendin data konkrete për zgjerim, por ato nuk janë respektuar.

Për shembull, Strategjia e Komisionit Evropian për Zgjerimin e Ardhshëm, e publikuar në vitin 2018, parashikoi se Serbia dhe Mali i Zi mund të bëhen anëtare të BE-së deri në vitin 2025.

Kanë mbetur edhe 18 muaj deri në datën e synuar, por të dyja vendet kanë bërë pak përparim në procesin e anëtarësimit, ndërkohë që fundi i negociatave as që duket.

Në cilën fazë të integrimit janë vendet e tjera të rajonit?

Serbia dhe Mali i Zi konsiderohen lidere në procesin e negociatave të anëtarësimit në BE.

Mali i Zi ka statusin e kandidatit që nga viti 2010 dhe ka hapur negociatat në vitin 2012. Serbia, kandidate nga viti 2012, i ka hapur negociatat në vitin 2014.

Shqipëria dhe Maqedonia e Veriut kanë marrë dritën jeshile për hapjen e negociatave në vitin 2022.

Bosnje dhe Hercegovina ka marrë statusin e vendit kandidat në dhjetor të vitit të kaluar./REL