Tag: Ballina

Për mbajtjen e zgjedhjeve të reja të parakohshme në katër komunat veriore të vendit, popullata serbe që është shumicë në këto zona, ka kushte.

Ata gjatë një bashkëbisedimi për KosovaPress, thonë se duan që fillimisht të krijohet Asociacioni i komunave me shumicë serbe, pastaj që policia të tërhiqet nga veriu, të lirohen të gjithë të burgosurit serbë, si dhe kryetarët shqiptarë të komunave të tërhiqen, në mënyrë që ata pastaj të marrin pjesë në zgjedhjet që do të organizoheshin nga Qeveria e Kosovës.

Svetomir Boshkoviq, qytetar nga veriu i Mitrovicës, thotë se mbajtja e zgjedhjeve në veri është e nevojshme, por pasi të plotësohen të gjitha kushtet të cilat serbët ka kohë që po i kërkojnë.

Ai përmendi krijimin e Asociacionit, tërheqjen e të gjitha forcave policore nga veriu, si dhe lirimin e hapësirave komunale e arsimore, si kusht për pjesëmarrjen e serbëve në zgjedhje.

‘Është e duhur që zgjedhjet të mbahen, të jenë legale dhe legjitime. Mirëpo ka kushte që së pari duhet plotësuar… Të tërhiqen të gjitha forcat policore, të lirohen hapësirat komunale dhe arsimore…Kusht është poashtu formimi i Asociacionit të komunave me shumicë serbe i cili është nënshkruar para njëmbëdhjetë vitesh…Parakushte janë këto, ky është kushti (për të nënshkruar peticionin)’, ka thënë Boshkoviq.

Edhe Lubomir Miljkoviq, e ka kushtëzuar pjesëmarrjen në zgjedhje.

Ai veç tjerash, ka përmendur lirimin e të gjithë të burgosurve serbë, si kusht për të dalë në zgjedhje.

‘Zgjedhjet duhet të mbahen, por duhet të plotësohen kushtet, të formohet Asociacioni i komunave me shumicë serbe, të lirohen të arrestuarit, do të thotë të plotësohen të gjitha kushtet… edhe kryetarët e rrejshëm që janë të cilët nuk përfaqësojnë shumicën, ata përfaqësojnë një pakicë… Sipas të gjitha gjasave popullata nuk do të dalë (për të nënshkruar peticionin) … derisa kushtet të mos plotësohen, dyshoj se do të bëhet diçka’, theksoi Miljkoviq.

Mileva Bashcareviq, po ashtu qytetare nga veriu i Mitrovicës, tha se shqiptarët e serbët duhet të jetojnë së bashku dhe të kenë të drejta të barabarta.

Mirëpo shtoi se serbët kërkojnë disa kushte tashmë të njohura, pa plotësimin e të cilave ata nuk do të marrin pjesë në zgjedhje.

‘Duhet të mbahen zgjedhjet, të formohen komunat me shumicë serbe dhe të jetojmë të gjithë së bashku dhe të kemi të drejta të barabarta… Edhe policët të jenë serbë e shqiptarë… Nuk do të dalin qytetarët në zgjedhje nëse nuk ka Asociacion të komunave me shumicë serbe’, tha ajo.

Në anën tjetër, Emir Azemi, njohës i zhvillimeve politike nga veriu i Mitrovicës, ka bërë të ditur se për situatën në veri të vendit, duhet patjetër një marrëveshje politike mes palëve në proces, si dhe garanci e fortë nga ana e SHBA-së, për mbajtjen e zgjedhjeve të lira dhe demokratike.

Ai preferon dorëheqjen e kryetarëve si opsion më të lehtë dhe më të mirë, për shkak se, siç u shpreh, procesi i zgjedhjeve përmes peticionit, është shumë i komplikuar dhe i pamundur.

Azemi ka potencuar se nënshkrimi i peticionit për shkarkimin e kryetarëve nga ana e 20 përqind të votuesve, që nënkupton fazën e parë të procesit, është i mundur dhe mund të realizohet. Mirëpo, siç tha ai, procesi do të komplikohet gjatë fazës së dytë, e cila përfshinë daljen e 50 përqind plus një të votuesve.

Sipas tij, nëse në komunën e Mitrovicës Veriore janë 20 mijë votues në listën e votuesve, kjo nënkupton se duhet të dalin të nënshkruajnë 10 mijë plus një votues, gjë që është e pamundur.

Mitrovica e Veriut, shtoi ai, ka rreth 12 mijë banorë rezidentë, dhe nëse në fazën e dytë duhet të votojnë mbi 10 mijë qytetarë, atëherë do të jetë e pamundur ose do të duhej që një person të votojë shumë herë për të arritur pesëdhjetë plus njëshin dhe në këtë mënyrë do të lëndohej procesi zgjedhor.

‘Unë mendoj se për situatën në veriun e Kosovës duhet një marrëveshje politike mes palëve në proces, një granci e fortë e SHBA-së se ky proces zgjedhor nuk duhet të dështojë, nuk do të ketë ndërhyrje siç ka pasur në të kaluarën, dhe të ketë zgjedhje të lira, fer dhe demokratike, ku do të marrin pjesë Lista qytetare, subjekte politike, dhe të dalin struktura nga vullneti qytetarë dhe assesi nga presioni, as nga detyrimi që mund të vije nga jashtë ose nga brenda, dhe në një formë të përmbyllet ky proces i riintegrimit të komunave të Kosovës me shumicë serbe… Pra thënë ndryshe, mendoj se peticioni prej 20 për qind mund të jetë një proces ose vullnet politik për të dëshmuar se serbët do të marrin pjesë në zgjedhje, por nëse shkohet në fazën e dytë që është pesëdhjetë plus një, mendoj se këtu do të ngecet, këtu do të dështojë procesi, sepse për mendimin tim është e paarritshme dhe e pamudur, siç shihet nga e kaluara që të dalin mbi 10 mijë qytetarë të votojnë në një proces zgjedhor… Është shumë e vështirë të arrihet që të votohet pesëdhjetë plus një, në një proces pas njëzetë përqindëshit që është paraparë me udhëzimin administrativ’, sqaroi për KosovaPress Azemi.

Ndryshe, zgjedhjet e parakohshme në komunat veriore të Kosovës përmenden si opsion për shtensionimin e situatës, pasi marrja e detyrës nga kryetarët shqiptarë të dalë nga zgjedhjet e 23 prillit, ka shkaktuar tensione e trazira që nga 26 maji e tutje, ndërsa në këto zgjedhje do të duhej të sigurohej pjesëmarrja e serbëve si votues, por edhe si kandidatë.

Tri aparatura sa i ka në dispozicion aktualisht Klinika e Radiologjisë, ka bërë që listë të pritjes të mos ketë për pacientët spitalor. Krahas kësaj, kjo klinikë po e shfrytëzon edhe aparaturën në Pediatri për mosha të reja, e që zakonisht dedikohet për fëmijë, raporton Ekonomia Online.

Drejtoresha e kësaj klinike, Shkëndije Nuza, ka thënë për Ekonomia Online se edhe Radiologjia është prekur nga ikja e mjekëve por që nuk ka lënë zbrazëtirë të madhe. E një tjetër ka thënë se është pensionuar në fillim të këtij viti.

Ajo ka thënë për Ekonomia Online, se aktualisht qëndrojnë mirë me infermierë dhe se punësimi i dhjetë të rinjve u ka lehtësuar shumë punën.

Nuza ka folur edhe për punën që bëhet në këtë klinikë, duke thënë se gjatë sezonit të verës, ka më pak kërkesa për rezonancë magnetike.

E pikërisht kjo gjë, ka bërë që menaxhmenti ta shfrytëzojë këtë mundësi për të ulur numrin nga lista e pritjes.

“Në një periudhë gjashtë mujore ne e kemi pasur rezonancën magnetike në Onkologji jashtë funksionit për shkak të vërshimeve dhe ka pësuar defekt aparati dhe kemi funksionuar me vetëm një aparat, dhe për kundër kësaj, asnjë pacientë nga lista e pritjes nuk iu është shtyrë termini dhe funksionalizimi në fillimvit i rezonancës në Onkologji dhe funksionalizimi muajve të fundit i rezonancës në Pediatri, ka ndikuar shumë dhe sidomos është revitimi i listave dhe në përgjithësi çdo pacient që ka ekzistuar në listën e pritjes, thirret dhe vendoset për t’u kryer. Është rritur numri i pacientëve ditor. Përveç rasteve të paradites, gjithmonë është e dedikuar për pacientët spitalor dhe duke pasur parasysh që sezona e verës ka më pak raste, ne e kemi shfrytëzuar këtë rast për ta ulur numrin”, ka thënë Nuza, teksa shtoi se rezonancën në Pediatri po e shfrytëzojnë edhe për mosha të reja.

“Rezonanca në Pediatri, po ashtu bën pacientë të moshave të reja dhe jo vetëm fëmijë dhe në përgjithësi ka ardh tek ulja e listës së pritjes dhe jemi në fund të dhjetorit”, u shpreh ajo.

Nuza ka deklaruar se pacientët që janë të shtrirë në QKUK, nuk kanë nevojë për terminë. Ajo ka thënë se renditja bëhet nga klinika përkatëse.

“Ne e bëjmë një orar të klinikave të cilat kanë kërkesa për ekzaminime me rezonancë magnetike dhe në kuadër të shërbimit është i domosdoshëm ekzaminimi me rezonancë magnetike dhe i caktojmë terminët ditor. Shembull e kemi Neurologjinë dhe Neurokirurgjinë që i kanë çdo ditë terminet e veta dhe i kryejnë pacientët e tyre. Pacientët spitalor nuk bëjnë termine në Klinikën e Radiologjisë. Renditjen e pacientëve apo ekzaminimin në baza ditore të pacientëve në klinikat përkatëse e bëjnë klinikat në bazë të diagnozës së pacientit”, u shpreh Nuza.

E nga punësimi i infermierëve të rinj në QKUK, Klinika e Radiologjisë ka arritur t’i marrë 10. Me këtë rast, Nuza ka thënë se me pensionimin e një mjeku dhe një largimi për në sektorin privat, aktualisht nuk ka pasur lëvizje të tilla.

“Me staf për momentin, një mjek është pensionuar në fillim të vitit dhe një mjek ka kaluar në sektor privat, ndërsa teknikë kohëve të fundit 10 teknikë i kemi marrë të rinj që na kanë lehtësuar jashtëzakonisht punën, për arsye se Radiologjia çdo ditë rritet me numër të shërbimeve, ndërsa kemi qenë në numër të paktë me staf teknik e që ne varemi shumë nga puna e tyre dhe tash jemi shumë më mirë në krahasim siç kemi qenë më herët. Nga Klinika e Radiologjisë nuk ka pas që kanë dalë jashtë shtetit”, ka thënë Nuza.

Ministri i Financave, Punës dhe Transfereve, Hekuran Murati ka thënë se Graçanica, Obiliqi, dhe Drenasi janë komunat për të cilat në javën që po lëmë pas është raportuar se kanë miratuar faljen e një pjese të barrës së tatimit në pronë, ashtu siç e mundëson ligji i ndryshuar për tatimin në pronë.

Ai ka shkruatr në Facebook se si Qeveri, kanë hartuar ligjin e ndryshuar, dhe ligji sipas tij është miratuar në Kuvend.

Murati shprehet se u takon komunave të vendosin nëse duan ta shfrytëzojnë këtë mundësi ose jo.

“Një mundësi të tillë për të lehtësuar barrën e tatimpaguesve e patën kërkuar pothuajse të gjitha komunat. Tani, u takon komunave të vendosin nëse duan ta shfrytëzojnë këtë mundësi ose jo”, shkruan Murati.

Sipas Muratit deri në fund të muajit gusht 2023, nga tatimi në pronë komunat kanë mbledhur mbi 35 milionë euro, që sic thekson ai, e tejkalon me rreth 500 mijë euro nivelin e mbledhur për komplet vitin 2022.

“Marrë parasysh këtë performancë të mirë, i inkurajoj edhe komunat tjera që të shfrytëzojnë mundësinë e faljes së një pjese të tatimit në pronë që të lehtësojnë barrën e qytetarëve, para datës 15 shtator 2023, kur edhe përfundon afati ligjor”, shkruan Murati.

Asociacioni i Komunave të Kosovës (AKK), ditë më parë e ka çuar në Gjykatën Kushtetuese Ligjin që mundëson faljen e 100 eurove tatim për të gjithë qytetarët në vitin 2023.

FSK ka dalë me njoftim, ku bëri të ditur se ushtarakët nga Kosova kanë treguar rezultate të larta në Akademitë Ushtarake të Turqisë.

Siç njofton FSK, nëntoger Edison Murtezi ka diplomuar me suksese të lartë në Universitetin e Mbrojtjes Nacionale, pranë Akademisë Tokësore të Forcave të Armatosura të Republikës së Turqisë, si dhe OR3 Sylejman Dalloshi ka përfunduar me suksese Kolegjin profesional të Nënoficerëve (NOF), të Forcave Tokësorë.

Në ceremoninë shtetërore të organizuar, kanë diplomuar 937 oficerë nga Republika e Turqisë, dhe 76 oficerë ndërkombëtarë nga 15 shtete, ku në mesin e tyre ishte Nëntoger Murtezi.

“OF1 Edison Murtezi dhe OR3 Sylejman Dalloshi përfunduan me sukses të lartë shkollimin e tyre në Republikën e Turqisë, duke përfaqësuar kështu shtetin e Kosovës dhe Forcën e Sigurisë së Kosovës në mënyrën më të mirë, duke treguar rezultate të larta gjatë shkollimit.

Ata do të kthen në radhët e FSK-së, për të dhënë kontributin e tyre në ngritjen dhe avancimin profesional të FSK-së.

Ky shkollim është realizuar falë bashkëpunimit që ka Forca e Sigurisë së Kosovës me Republikën e Turqisë, ku një numër i madh i pjesëtarëve kanë ndjekur shkollime e trajnime të shumta në fusha të ndryshme të edukimit ushtarak.

“Në ceremoninë e diplomimit të oficereve morën pjesë udhëheqësit më të lartë shtetërorë të Republikës së Turqisë, Presidenti i Turqisë Rexhep Taip Erdogan, Ministri i Ministrisë së Mbrojtjes Nacionale Yasar Guler, përfaqësues shtetërorë, të universitetit të mbrojtjes, atashe ushtarak të shteteve të ndryshme, atasheu i Mbrojtjes nga Kosova në Republikën e Turqisë, familjare dhe të afërm të diplomuarve”, kështu u bë e ditur nga Ministra e Mbrojtjes.

Lëkundje sizmike janë ndjerë rreth orës 08:17 minuta sot në Shqipëri.

Sipas EMSC , magnituda e tërmetit është 3.9 e shkallës Rihter.

Epiqendra e tërmetit ishte 15 km në lindje të Ersekës, ndërsa raportohet se lëkundjet janë ndjerë edhe në Elbasan.

Tre vëllezër janë përleshur mes vete pas një mosmarrëveshje rreth një mjeti të përbashkët.

Dy prej tyre janë arrestuar dhe janë dërguar në mbajtje, ndëra njëri është liruar në procedurë të rregullt.

“SULM – Obiliq 01.09.2023-22:0. Pas një mosmarrëveshje rreth një mjeti të përbashkët janë sulmuar fizikisht tre të dyshuar meshkuj kosovarë-vëllezër. Të njëjtit janë intervistuar dhe me vendim të prokurorit dy prej tyre janë arrestuar dhe dërguar në mbajtje ndërsa i dyshuari tjetër i mitur është liruar në procedurë të rregullt.

Në pikat e kalimit kufitar me Serbinë edhe gjatë orëve të mëngjesit së të shtunës vazhdon të ketë fluks të automjeteve dhe pritje të bashkatdhetarëve, të cilët po kthehen në vendet e Evropës Perëndimore pas pushimeve në Kosovë.

Sipas raportit të Qendrës Kombëtare për Menaxhimin Kufitar të orës 07:39, bashkatdhetarët po presin në Merdar deri në një orë për të dalë nga Kosova.

Kolona e automjeteve brenda Kosovës në këtë pikë kufitare është 60 metra, transmeton Telegrafi.

Pritje deri në 30 minuta për të dalë nga Kosova ka edhe në vendkalimin kufitar Dheu i Bardhë, ku kolona e automjeteve arrin në 70 metra.

Ndërsa, për të hyrë në Kosovë në të gjithë vendkalimet kufitare pritjet janë 3 deri në 5 minuta.

Gjykata e Apelit e ka vërtetuar aktvendimin e Gjykatës Themelore në Prishtinë, dega në Drenas, lidhur me pjesën liruese për të akuzuarit B.R., dhe S.R., lidhur me veprën penale “Vjedhje e rëndë”, ndërsa e ka kthyer në rigjykim çështjen penale ndaj të akuzuarit F.M., për veprat penale “Vjedhje e rëndë” dhe “Shantazhi”.

Aktgjykimi i Apelit është marrë më 4 maj 2023, nga Kolegji i përbërë prej kryetarit Abdullah Ahmeti dhe anëtarë gjykatësit Kadrije Goga-Lubishani dhe Zyhdi Haziri, raporton “Betimi për Drejtësi“.

Gjykata Themelore në Prishtinë, dega në Drenas, me aktgjykimin e 6 majit 2022, për veprën penale “Shantazhi”, të akuzuarin F.M., e ka shpallur fajtor dhe dënuar me 1 mijë euro gjobë dhe dënim me burg në kohëzgjatje prej 8 muaj, ndërsa për veprën penale “Vjedhje e rëndë” e kryer në bashkëkryerje, e ka dënuar tre vite e gjashtë muaj.

Konform nenit 80, paragrafi 1 lidhur me paragrafin 2, nënparagrafin 2.5 të KPRK-së, të akuzuarit i është caktuar dënim unik me gjobë në shumë prej 1 mijë euro.

Po ashtu, të njëjti i ishte shqiptuar dënim plotësues, urdhri për kompensimin e humbjes apo dëmit, ashtu që urdhërohej i akuzuari M., që të dëmtuarve S., N., dhe L.Sh., t’ua kompensojë dëmin, duke ua kthyer paratë në vlerë 96 mijë euro.

Kurse, të akuzuarit B.R., dhe S.R., për veprën penale “Vjedhje e rëndë”, i kishte liruar nga akuza.

Kundër këtij, aktgjykimi në aftin ligjor ankesë kishte ushtruar Prokuroria Themelore në Prishtinë, për shkak të vërtetimit të gabuar ose jo të plotë të gjendjes faktike, me propozim që Gjykata e Apelit, aktgjykimin e ankimuar ta ndryshojë që të akuzuarit B. dhe S.R., t’i shpallë fajtorë për veprën penale “Vjedhje e rëndë” e kryer në bashkëkryerje dhe t’iu shqiptojë sanksion penal sipas ligjit.

Ndërsa, mbrojtësi i të akuzuarit F.M, avokati Faik Morina, kishte ushtruar ankesë për shkak të shkeljeve esenciale të dispozitave të procedurës penale, shkeljes së Ligjit Penal, vërtetimit të gabuar dhe jo të plotë të gjendjes faktike, si dhe vendimit mbi sanksionin penal, duke propozuar që Apeli ta aprovojë ankesën si të bazuar dhe çështjen ta kthejë në gjykatën e shkallës së parë në rigjykim ose ta ndryshojë aktgjykimin e ankimuar, duke e liruar të akuzuarin nga akuza.

Përgjigje në ankesën e tij, kishte paraqitur mbrojtësi i palës së dëmtuar, avokat Gazmend Halilaj, duke propozuar që të refuzohet tërësisht e pabazuar ankesa e mbrojtësit të të akuzuarit dhe të vërtetohet aktgjykimi i shkallës së parë.

Ndërsa, Prokuroria e Apelit me parashtresën e 15 shtatorit 2022, kishte propozuar që të aprovohet si e bazuar ankesa e Prokurorisë dhe aktgjykimi i ankimuar të ndryshohet, ashtu që të akuzuarit B.R dhe S.R., të shpallen fajtorë dhe të njëjtëve t’iu shqiptohet sanksion penal, ndërsa ankesa e mbrojtësit të të akuzuarit, të refuzohet si e pabazuar.

Lidhur me këtë, Gjykata e Apelit pas mbajtjes së seancës erdhi në përfundim se ankesa e mbrojtësit të të akuzuarit F.M, avokatit Faik Morina ishte e bazuar, ndërsa ajo e prokurorit e pabazuar.

Në aktgjykimin e Apelit, thuhet se aprovohet ankesa e mbrojtësit të të akuzuarit F.M., Faik Morina dhe sipas detyrës zyrtare anulohet, aktgjykimi i Gjykatës Themelore në Prishtinë- dega në Drenas, i datës 6 maj 2022 dhe çështja i kthehet të njëjtës gjykatë në rivendosje.

Tutje, në aktgjykim thuhet se refuzohet si e pabazuar ankesa e Prokurorisë Themelore në Prishtinë, ndërsa aktgjykimi i Gjykatës Themelore në Prishtinë- dega në Drenas, i datës 6 maj 2022, në pjesën liruese për të akuzuarit B.R dhe S.R., lidhur me veprën penale “Vjedhje e rëndë” nga neni 327, paragrafi 2, nënparagrafi 2.1 lidhur me nenin 31 në KPRK-së, si në pikën dy të dispozitivit, vërtetohet.

Kurse, ankesa e mbrojtësit lidhur me vendimin mbi dënimin për të akuzuarin F.M., tani për tani është jolëndore.

Sa i përket të akuzuarve B. dhe S.R., për shkak të veprës penale “Vjedhje e rëndë” si në pikën dy të dispozitivit, thuhet se janë liruar nga akuza. Të dëmtuarit S., N. dhe L.Sh., lidhur me të pandehurit B. dhe S.R., për realizimin e kërkesës pasurore-juridike janë udhëzuar në kontest civil.

Lidhur me pjesën liruese për të akuzuarit B.R dhe S.R., Apeli gjen se aktgjykimi i ankimuar nuk është i përfshirë me shkelje esenciale të dispozitave të procedurës penale dhe as me shkelje tjera, të cilat do ta kushtëzonin anulimin e aktgjykimit të ankimuar.

Po ashtu, Apeli thekson se pretendimet ankimore të prokurorit për vërtetimin e gabuar dhe jo të plotë të gjendjes faktike nuk qëndrojnë, ngase gjendja faktike është vërtetuar drejt dhe në mënyrë të plotë nga gjykata e shkallës së parë.

“Nuk është provuar se të akuzuarit e kanë kryer veprën penale të përshkruar si në përshkrimin faktik të dispozitivit II të aktgjykimit të ankimuar…”, thuhet në vendimin e Apelit.

Gjithnjë sipas vendimit të Apelit, aktgjykimi i kundërshtuar për pjesën liruese nuk përbën shkelje shkelje të Ligjit Penal e as shkelje të tjera, të cilat do ta kushtëzonin anulimin e vendimit.

Kurse, lidhur me të akuzuarin F.M., thuhet se qëndrojnë pretendimet ankimore të mbrojtësit të të akuzuarit përkitazi me shkeljet esenciale të dispozitave të procedurës penale dhe se aktgjykimi i ankimuar duhet të anulohet.

Kjo ngase, shkalla e dytë vlerëson se aktgjykimi i Themelores është i përfshirë në shkelje esenciale të dispozitave të procedurës penale, për shkak se aktgjykimi nuk është përpiluar konform dispozitës 384, par.3, lidhur me nenin 368 të KPP-së, ngase ka kontradiktë mes dispozitivit me arsyet e theksuara në pjesën arsyetuese të aktgjykimit dhe se mungojnë arsyet për faktet vendimtare, kurse ato që janë dhënë thuhet se nuk janë në pajtueshmëri të plotë me provat dhe shkresat e tjera lëndore, shkelje këto që kushtëzuan anulimin e aktgjykimit.

Kolegji i Apelit ka vlerësuar se Gjykata e shkallës së parë, në arsyetimin e saj lidhur me veprimet e të akuzuarit, nuk ka vlerësuar drejt gjendjen faktike, në situatën konkrete thuhet se kemi vlerësim të mjaftueshëm të të provuarit të fakteve dhe rrethanave të cilat krijojnë paqartësi në raport me veprimet inkriminuese të të akuzuarit, e që gjykata duhet të jetë e kujdesshme me rastin e nxjerrjes së rezultateve inkriminuese dhe vetëm mbi bazën e të provuarit të fakteve ta mbështesin aktgjykimin fajësues.

Në aktgjykimin e Gjykatës së Apelit, thuhet arsyet e dhëna nga gjykata e shkallës së parë janë të pamjaftueshme, ndërsa ato që janë dhënë janë në kundërshtim me përshkrimin faktik të ngjarjes në dispozitiv të aktgjykimit, si dhe dëshmitë e të dëmtuarve, dëshmitarëve, si dhe provat materiale dhe nga kjo rrjedh se nuk është bërë vlerësimi i tërësishëm dhe i drejtë i provave materiale dhe i dëshmive të dëshmitarëve në kontestin rrethanave të kësaj çështjeje penale.

F.M., akuzohej edhe për armëmbajtje pa leje, por sipas Apelit për këtë vepër penale është veçuar procedura penale, pasi thuhet se kjo gjykatë nuk ishte kompetente që në aspektin territorial dhe as lëndor të gjykojë për këtë vepër penale dhe lidhur me këtë është marrë aktvendim i veçantë.

Ndryshe, sipas aktakuzës, nga muaji gusht 2018, në Drenas, me qëllim të përfitimit të kundërligjshëm të dobisë pasurore për vete apo personin tjetër, i pandehuri F.M.,e ka kërcënuar të dëmtuarën V., se do t’ia zbulojë fotot intime që do të dëmtojnë nderin dhe autoritetin e saj, ashtu që në vazhdimësi i ka kërkuar para të gatshme, në fillim 500 euro, pastaj 3 mijë e 500, 1 mijë e 200, herën e katërt 1 mijë dhe të pestën 2 mijë e 700 euro, në mënyrë që fotot në fjalë që i posedonte i pandehuri në telefon mos t’i publikojë në rrjetin social Facebook, Twitter dhe Instagram.

Sipas aktakuzës, e dëmtuara më pas e ka lajmëruar policinë.

Me këtë, sipas Prokurorisë, F.M., akuzohet ka kryer veprën penale “Shantazhi” nga neni 341, paragrafi 1 të Kodit Penal.

Aktakuza thotë se të pandehurit F.M., B.R dhe S.R., më 19 nëntor 2018, në Drenas në shtëpinë e të dëmtuarve S., N., dhe L.Sh., i pandehuri F.M., në bashkëkryerje me P.M (i cili gjendet në arrati), B.R dhe S.R., pas krijimit të planit dhe marrëveshjes së përbashkët paraprake, me qëllim që me përvetësimin e pasurisë së huaj të luajtshme vetes t’i sjellin përfitim të kundërligjshëm, duke përdorur mjete të përshtatshme, kanë hapur derën e oborrit të fqiut të të dëmtuarve me forcë.

Sipas aktakuzës, kanë hyrë në oborrin e të njëjtëve dhe duke përdorë shkallë të drurit, kanë depërtuar në katin e dytë të shtëpisë brenda në dhomë, derisa të dëmtuarit ishin në katin e parë të shtëpisë, të njëjtit kanë arritur të marrin nga sirtari i rrobave një valixhe, në të cilën kanë qenë në fshehura para në vlerë prej 96 mijë euro.

Në aktakuzë thuhet se janë larguar nga vendi i ngjarjes, me çka të dëmtuarve iu është shkaktuar dëm material në vlerën e lartekur.

Me këtë, thuhet se në bashkëkryerje kanë kryer veprën penale “Vjedhje e rëndë” nga neni 327, paragrafi 2, pika 2.1 lidhur me nenin 31 të Kodit Penal.

Sipas dispozitivit të tretë të aktakuzës, i akuzuari F.M., më 28 shkurt 2019 në fshatin Gollubovc të Malishevës, konkretisht në shtëpinë familjare të të pandehurit, pa autorizim në kundërshtim me ligjin e zbatueshëm për armë, ka mbajtur në pronësi dhe ka përdorur një armë të tipit AK-47, me dy karikatorë dhe 23 fishekë të kalibrit 9mm, e cila pas identifikimit nga policia është sekuestruar përkohësisht.

Me këtë, thuhet se F.M., ka kryer veprën penale “Mbajtja në pronësi, kontroll ose posedim të paautorizuar të armëve” nga neni 374, paragrafi 1 të KPRK-së.

Përgatiti: Arton Hamiti

Më 14 shtator, Brukseli do t’i bëjë bashkë në një takim të radhës, kryeministrin Albin Kurti dhe presidentin e Serbisë, Aleksandër Vucic.

Takimi në mesin e këtij muaji me ndërmjetësimin e Bashkimit Evropian, u konfirmua edhe nga ekzekutivi kosovar, veçse për agjendën, thanë se do të njoftojnë me kohë.

Megjithatë, profesori Valon Murtezaj pret që në kryeqendrën evropiane, palët të shkojnë me propozime konkrete për zbatimin e marrëveshjeve të arritura deri më tani.

“Takimi që është paralajmëruar në mes të shtatorit në Bruksel, do të jetë një takim për vazhdimin e procesit të dialogut ndërmjet Kosovës dhe Serbisë, pas një periudhe tensionesh, eskalimesh dhe tani situata është e qetë, e deeskaluar dhe prej palëve. Sigurisht pritet që të shkojnë me vendime konkrete, me propozime konkrete për t’i zbatuar ato marrëveshje, për të cilat janë dakorduar me herët dhe ky do të jetë qëllimi kryesor i takimit. Nuk është takim për ta zvarritur zbatimin e marrëveshjeve, por është takim për të konfirmuar suksesin apo për të treguar se çka është bërë për të zbatuar ato se çka janë palët janë dakorduar”, tha Murtezaj.

Bashkimi Evropian thirri takimin në kohën kur masat ndëshkuese ndaj Kosovës vazhdojnë të jenë në fuqi.

“Pikërisht për atë, pala kosovare, e përsëris, do të duhej t’i zbatonte ato që ka premtuar, pra ato që është zotuar se do t’i zbatojë dhe kjo pastaj do të kishte një ndikim direkt në reagimin nga Bashkimi Evropian. Kosovës, nuk duhet në fund të fundit, t’i interesojë sjellja e palëve të tjera, por të punojë me veten”, tha Murtezaj.

Por këmbëngulja e palës serbe, në kërkesën për formimin e Asociacionit të Komunave me shumicë serbe, mund të ndikojë që edhe ky takim të përfundojë pa ndonjë progres të theksuar.

“Nuk pres ndonjë rezultat pozitiv, sepse pala serbe është barrikaduar pas kërkesës së saj për formimin e Asociacionit të Komunave me shumicë serbe. Ky takim mund të jetë mbase veç një takim sa për t’u rikthyer në procesin e dialogut dhe për të treguar mbi dinamikën e re të dialogut, gjatë shtatorit e këndej”, tha Fidan Ukaj, politolog.

Pas takimit me kryeministrin Albin Kurti, në Bled të Sllovenisë, përfaqësuesi i Posaçëm i BE-së për dialogun, Miroslav Lajcak, njoftoi se takimi do të ketë në fokus normalizimin e marrëdhënieve dhe zbatimin e kërkesave të 3 Qershorit, për deeskalim të situatës në veri të Kosovës.

Takimi i fundit ndërmjet kryeministrit të Kosovës, Albin Kurti, dhe presidentit të Serbisë, Aleksandar Vucic, u zhvillua më 2 Maj, ndërsa më 22 Qershor, në Bruksel, liderët e dy shteteve zhvilluan takime të ndara me Përfaqësuesin e Lartë, Josep Borrell.

Edicionin Qendror të lajmeve në ATV e gjeni në videon më poshtë:

Të premten e 1 shtatorit, Komuna e Prishtinës ka hapur thirrjen për subvencionim me nga 70 euro të familjeve të Prishtinës, për regjistrim të fëmijëve në çerdhe private.

Por kjo do të vlejë vetëm për familjet që gjenerojnë të ardhura mujore më pak së 500 euro.

“Kjo është një metodë e re dhe alternative që të rrisim përfshirjen sa më të madhe të fëmijëve të Prishtinës, në edukim të hershëm, që asnjë fëmijë të mos mbetet mbrapa. Pra, secila familje e Prishtinës, që ka fëmijë të moshës nga 9 muaj deri në 6 vjeç dhe ka të hyrat familjare nën 500 euro, do të përfitojë 70 euro për të regjistruar fëmijën e tyre në cilëndo çerdhe private të licencuar të Prishtinës”, tha drejtoresha e Arsimit në Komunën e Prishtinës, Besianë Musmurati.

Sipas saj, përmes këtij subvencionimi do të rritet përfshirja e fëmijëve në çerdhe dhe edukim të hershëm dhe pjesëmarrja e grave në tregun e punës, si dhe do të lehtësohet barra financiare për shumë familje në Prishtinë.

“Ne kemi ndarë 100.000 euro për financim të fazës së parë, por varësisht nga numri i aplikimeve do të rrisim edhe buxhetin. Prandaj i bëj thirrje të gjithë prindërve të Prishtinës që të hyrat familjare i kanë nën 500 euro, të aplikojnë në thirrjen e hapur për subvencionim, e cila tanimë është në ueb-faqe të Komunës së Prishtinës dhe në rrjetet tona sociale”, ka thënë Musmurati.

Të gjithë qytetarët mund ta bëjnë aplikimin edhe në sportelin numër 5, në objektin e Komunës së Prishtinës.

Kategoritë të cilat do të kenë përparësi janë nënat vetushqyese, fëmijët bonjakë, fëmijët me nevoja të veçanta, fëmijët e prindërve të divorcuar, fëmijët e invalidëve të luftës së UÇK-së, si dhe fëmijët e veteranëve të luftës së UÇK-së. /atvlive.tv

Edicionin Qendror të lajmeve në ATV e gjeni në videon më poshtë: